1. Bulagurhe bantu banene barhamenyere dini lihe bajagemo?

HALI madini manene manachiyirika oku mali me Chikristu n’oku mali maharamya Mungu omu njira emusimisize. Che chirhumire bantu banene barhamenyere dini lihe bajagemo! Banabaza ntya: “Ka hali dini liguma ly’okuli, changwa, k’amadini moshi manasimisa Mungu?” Ka rhuchizerere oku rhwabo Bahamirizi ba Yehova rhunayigiriza okuli, oku n’okuntu rhunayigiriza y’enjira nguma yonyine emusimisize? Ka byakashobokana okugwarha obwizere buli ntyo? Rhushambalage oku birhumire rhwachizera ntyo.

2. Nk’oku olwandiko lwa 1 Watesalonike 1:5 luderhere, bulagurhe entumwa Paulo alichizerere oku ali omu kuli?

² Entumwa Paulo aligwerhe obwizere bukomere omu kuli. (Osome 1 Watesalonike 1:5.) Obwizere bwage burhaliyumangiire oku kuntu aliri achiyunva konyine. Aliko Paulo aliri asuzuma bwinja Echinwa cha Mungu. Aliyemerere oku “buli Lwandiko lwaliyerekezwe n’eroho lya Mungu.” (2 Ti. 3:16) Bichi aliyigire omola? Kugerera Amandiko, Paulo abona ebintu biyemezeze oku kweri Yesu yi waliri Masiya walaganywaga—obukweri abakulu b’edini ly’Abayahudi balahiraga kuyemera. Baliri baderha oku bali bayigiriza abantu okuli oku bilolere Mungu, aliko baliri bajira ebimugayisize. (Tit. 1:16) Paulo yewe arhaliri kuguma n’abola balume. Arhachishogaga bintu biguma alisimire kuyemera kurhenga omu Chinwa cha Mungu n’ebi arhakayemerere. Aliri tayari kuyigiriza n’okukolesa “amahano moshi ma Mungu.”​—Mdo. 20:27.

3. Yi rhugwarha obwizere bukomere, ka rhukwanene kupata ebishubizo oku bibazo byerhu byoshi? (Olole echisanduku “ Amakasi n’Amawazo ma Yehova,‘Mali Manene Bwenene Marhankaganjwa.’”)

³ Bantu baguma banawaza oku edini ly’okuli likwanene kushubiza ku buli chibazo choshi chiro n’oku bibazo birhagwerhe  ebishubizo omu Biblia. K’ebyola byakagalikana si? Rhushambale oku mufano gwa Paulo. Alihebere ababo Bakristu omurhima “bagerereze buli chintu,” aliko alishubire derha oku haliri bintu binene arhalimenyere. (1 Te. 5:21) “Rhugwerhe obumenyi burhayenere,” aliyongerere omu kuyandika ntya: “rhulirhwabona omu bulyo burhahunukire kugerera echiyo ch’echuma.” (1 Ko. 13:9, 12) Paulo arhalimenyere ebintu byoshi; nerhu rhurhanayinji ebintu byoshi. Aliko Paulo alimenyere ebintu by’akamaro oku bilolere omuhigo gwa Yehova. Ebi alimenyere byalimurhabere achizere oku ali omu kuli!

4. Nka gurhe rhwakakomeza obwizere bwerhu oku rhwapatire okuli, na bichi rhwaganirako oku bilolere Abakristu b’okuli?

⁴ Njira nguma rhwakakomeza m’obwizere bwerhu oku rhuli omu kuli, kuli kuhuzanya omufano g’okuharamya Yesu arhulekeraga n’okuntu Abahamirizi ba Yehova bali baharamya zene. Mu gunola mwazi, rhwabona oku Abakristu b’okuli 1) barhaharamya bishushanyo, 2) banakenga ezino lya Yehova, 3) banazigira okuli, 4) n’okuzigirana bwenene buli muguma n’owindi.

5. Bichi rhwayigire kugerera Yesu oku bilolere okuharamya Mungu omu njira ekwanene, na nka gurhe rhwakakolesa eby’ayigirizaga?

⁵ Bulala Yesu alizigiire Yehova bwenene, aliri aharamya Yehova yenyine, amango aliri omu mbingu n’amango aliri oku gulu. (Lu. 4:8) Aliyigirize abanafunzi bage nabo, baharamye Yehova yenyine. Eyi Yesu changwa abanafunzi bage, ntaye n’omuguma chiro wakoleseze ebishushanyo omu buharamye. Mungu arhabonekana, bobola nta chintu chiro n’echiguma omuntu akajira chimushushire! (Isa. 46:5) Gurhe si oku bilolere okujira ebishushanyo byabalala bayirikwa mpu batagatifu  n’okubisalira? Omu Rhegeko lya kabiri mu Marhegeko 10 Yehova aderha ntya: “Orhahira okachijirira echishuchanyo changwa eshusho lya chintu choshi-choshi chili omu mbingu enyanya changwa oku gulu eshishi . . . orhahira okabiyinamira.” (Kut. 20:4, 5) Abantu balonzeze kusimisa Mungu, bamenyere oku arhalonzeze rhuharamye ebishushanyo.

6. Mufano guhe g’obuharamye Abahamirizi banakulikira zene?

⁶ Ababalazi b’engani baderhere oku omu mango m’entumwa, Abakristu baliri baharamya Mungu yenyine. Omufano, chitabu chiguma ch’engani chiderhere oku abola Bakristu “baliri bashomba” ewazo ly’okukolesa ebishushanyo omu buharamye. Zene, Abahamirizi ba Yehova banakulikira omufano Abakristu ba burhanzi babalekeraga. Rhurhasalira ebishushanyo “by’abatagatifu” changwa bya bamalayika; rhurhanasalira chiro Yesu. Rhurhalamusa edrapo changwa kujira echindi chintu choshi-choshi ch’okuharamya oburhegesi changwa echihugo. Chiro barhujira gurhe, rhuhigirire kukenga ebila binwa bya Yesu: “Yehova Mungu wawe y’okwanene oharamye.”​—Mt. 4:10.

7. Mu njira zihe Abahamirizi banayerekana oku barhali chiro kuguma n’amandi madini moshi?

⁷ Zene, bantu banene banasima kuyunviriza abahubiri b’amadini bamenyikene bwenene. Banasingiza abola bahubiri bwenene n’okuhikira aha babaharamya. Abantu banachisheshera omu makanisa mabo, banagula ebitabu byabo n’okubarhulira furanga zinene n’echola chanarhuma baba bantu balengerere. Baguma banayemera buli choshi abola bahubiri baderhere. Abola bantu banasomezwa nabo, banasima bwenene nka kulala bakanabwene Yesu! Aliko balala baharamya Mungu omu njira ekwanene, barhajira abakulu b’amadini. Chiro akaba oku rhunakenga balala bayumangiire, rhuyemerere enyigirizo za Yesu ziyunvikene: “Mweshi mwebaguma.” (Mt. 23:8-10) Rhurhaharamya abantu, babe bakulu b’amadini changwa barhegesi. Rhurhabarhabala omu mihigo yabo, eb’elolere eby’echidini changwa by’epolitike. Kandi, nta lunda rhujako omu by’epolitike rhurhanachiheba omu by’egulu. Mw’ebyola byoshi, rhunayerekana oku rhurhali kuguma n’amandi madini moshi machiyirika oku mali me Chikristu.​—Yoh. 18:36.

8. Nka gurhe rhumenyere oku Yehova asimire rhukuuze ezino lyage n’okulimenyesa ku buli muntu?

⁸ Mango maguma Yesu asalira ntya: “Darha, okuuze ezino lyawe.” Yehova yenyine ashubiza elyola sala n’omulenge gunene kurhenga embingu, omu kulaganya oku akuuza ezino lyage. (Yoh. 12:28) Amango m’akasi kage koshi k’okuhubiri, Yesu aliri akuuza ezino ly’Eshe. (Yoh. 17:26) Che chirhumire Abakristu b’okuli banabona oku luli lukengo okukolesa ezino lya Mungu n’okulimenyesa oku bandi.

9. Gurhe Abakristu b’omu myaka 100 ya burhanzi baliyerekene oku bakengere ezino lya Mungu?

⁹ Omu myaka 100 ya burhanzi, echibaga che Chikristu chiyusa kuhwanziswa, Yehova “ahindamukira abantu b’amashanja y’arhola abantu bahekere ezino lyage.” (Mdo. 15:14) Abola Bakristu ba burhanzi balichivugire okukolesa ezino lya Mungu n’okulimenyesa oku bandi. Entumwa n’abanafunzi baliri bakolesa ezino lya Mungu amango baliri bahubiri n’amango baliri bayandika ebitabu bye Biblia. * Omu kujira ntyo bayerekana oku bobantu bonyine banamenyesa abandi ezino lya Mungu.​—Mdo. 2:14, 21.

10. Bichi biyerekene oku Abahamirizi ba Yehova bonyine babali bamenyesa ezino lya Mungu?

 ¹⁰ Abahamirizi ba Yehova babantu bahekere ezino lya Yehova si? Rhulole ebiyerekene ntyo. Zene, bakulu banene b’amadini bajirire okwabo koshi omu kujira abantu barhamenyaga oku Mungu ajira ezino lyage-lyage. Balikulire omu tafsiri zabo ze Biblia, banalahize ezino lya Mungu limenye lyakoleswa omu makanisa mabo. * Nde wakalahira oku Abahamirizi ba Yehova bonyine babali bakengesa ezino lya Mungu nk’oku bikwanene? Rhwabo rhwerhuli rhwamenyesa bwenene ezino lya Mungu kulusha echindi chigusho choshi-choshi ch’edini! Omu kujira ntyo, rhuli rhwajira okwerhu koshi rhugalire omu kulama nk’oku ezino lyerhu liderhere, Bahamirizi ba Yehova! (Isa. 43:10-12) Rhwakulire miliyoni 240 ze Tafsiri ya Ulimwengu Mupya, ekoleseze ezino lya Yehova omu fasi abandi batafsiri balikulire omu Biblia zabo. Kandi rhuli rhwakula ebitabu biyumangiire oku Biblia bili byamenyesa ezino lya Yehova omu ndimi zirhalukire 1 000!

11. Nka gurhe Abakristu ba burhanzi baliyerekene oku bazigire okuli?

¹¹ Yesu alisimire okuli, k’okuderha okuli oku bilolere Mungu n’emihigo yage. Yesu alilamire akalamo kayerekene oku ayemerere okuli, anayigiriza abantu oku ayemerere  okuli. (Yoh. 18:37) Abanafunzi b’okuli nabo, balizigiire bwenene okuli. (Yoh. 4:23, 24) Petro aliderhere oku obwemere bwe Chikristu buli “njira y’okuli.” (2 Pe. 2:2) Bulala balizigiire bwenene okuli, Abakristu ba burhanzi barhayemeraga amawazo m’amadini, emigenzo y’abantu, n’amandi mawazo moshi marhapatene n’okuli. (Kol. 2:8) Konakuguma zene, Abakristu b’okuli banajira okwabo koshi yi “bagenderera kulambagira omu kuli” omu kuseza enyigirizo zabo n’okuntu balamire oku Chinwa cha Yehova.​—3 Yo. 3, 4.

12. Gurhe Ebaraza Lirhambwire linajira amango lyamabona ok’okuntu rhwaliri rhwayunva ebintu kukenerwe kusabanurwa bwinja, na bulagurhe banajira ntyo?

¹² Abahamirizi ba Yehova barhaderha oku buli mango baba bayunvirhe bwinja buli chintu omu Biblia. Mango maguma, banajira amagosa omu kuntu bali bafasiriya enyigirizo ze Biblia changwa omu kuntu bali bayerekeza echibaga. Ebyola birhakwanene kurhusomeza. Ebiblia ederhere oku abantu banahikira okuyunva bwinja okuli oku ebisanzi binali byagera. (Kol. 1:9, 10) Yehova anabishula okuli kubuyabuya, nerhu rhukwanene kulindira omu kulembera kuhika amango rhwayunva bwinja okuli. (Mez. 4:18) Amango Ebaraza Lirhambwire lyamabona oku bihemere rhuhindamule okuntu rhwaliyunvirhe bintu bilebe changwa okuntu rhunabikola, linabihindamula buzira kulegama. Madini manene ma zene manahindamula enyigirizo zabo bulala balonzeze kusimisa abantu babo changwa bamenyikane mu linola gulu. Aliko Abahamirizi ba Yehova bowe banahindamula enyigirizo zabo bulala balonzeze kuyegera Mungu n’okumuharamya nk’oku Yesu ajiraga. (Yak. 4:4) Amango rhwamahindamula enyigirizo, arhali mpu bulala amawazo m’abantu balinola gulu mahindamukire, s’aliko bulala rhwayunvirhe bwinja Ebiblia. Rhunazigira okuli!​—1 Te. 2:3, 4.

13. Ngeso ehe y’akamaro bwenene eyerekene oku rhuli Bakristu b’okuli, na nka gurhe Abahamirizi ba Yehova bali bayiyerekana zene?

¹³ Abakristu ba burhanzi balimenyikene oku ngeso zinja baligwerhe, aliko ey’akamaro bwenene muzo, bwaliri buzigire. Yesu aliderhere ntya: “Kugerera echola boshi bamenya oku muli banafunzi bani akaba mugwerhe obuzigire ahakagarhi kenyu.” (Yoh. 13:34, 35) Zene, Abahamirizi ba Yehova b’oku gulu lyoshi, banasiimira obuzigire b’okuli n’obuguma. Rhurhali kuguma n’amandi madini moshi bulala rhwabo rhuli mulala chiro akaba rhuhulukiire omu bihugo n’amoko marhali kuguma. Rhunachibonera echola oku mbuganano zerhu z’echibaga, oku mbuganano zerhu z’omuzunguluko, n’oku mbuganano ze eneo. Echola chinarhurhabala rhuyemere oku rhuli rhwaharamya Yehova omu njira emusimisize.

14. Nk’oku olwandiko lwa Wakolosai 3:12-14 luyerekene, njira ehe y’akamaro rhwakayerekanamo oku rhugwerhe obuzigire bukomere ku buli muguma n’owindi?

¹⁴ Amandiko marhuhebere omurhima oku “rhuzigirane bwenene buli muguma n’owindi.” (1 Pe. 4:8) Njira nguma rhwakayerekanamo obuzigire buli nk’obo, kuli kubabalirana buli muguma n’owindi n’okulembera okurhashinganana kwa buli muguma n’owindi. Rhunashuba kulonza ezindi njira rhwakabamo bantu banahaana n’okukaribisa omu chibaga chiro ku na balala barhugoseze. (Osome Wakolosai 3:12-14.) Amango rhwamayerekana obuzigire buli nk’obo, rhwanayerekana oku rhuli Bakristu b’okuli.

15. Mu zindi njira zihe rhunakulikira omufano g’obuharamye Abakristu ba burhanzi barhulekeraga?

¹⁵ Omu zindi njira, rhunakulikira omufano  gw’echibaga che Chikristu ch’omu mango ma burhanzi charhulekeraga. Omufano, rhunapanga ebintu nk’oku Abakristu ba burhanzi nabo baliri bajira. Rhujira abemangizi b’emizunguluko, abashamuka, n’abagwasi b’akasi, nk’oku nabo balibagwerhe. (Flp. 1:1; Tit. 1:5) Kuguma nabo, rhunakenga amarhegeko ma Yehova oku bilolere echijiro ch’obuhya n’obuhya, ebi Mungu aderhere oku bilolere okukolesa eshagama, kandi rhunacha omu chibaga balala barhalonzeze kukulikiza amarhegeko ma Mungu.​—Mdo. 15:28, 29; 1 Ko. 5:11-13; 6:9, 10; Ebr. 13:4.

16. Bichi ebinwa bili omu Waefeso 4:4-6 birhuyigirize?

¹⁶ Yesu aliderhere oku banene bakachihamagere oku bali banafunzi bage, aliko boshi barhakabere b’okuli. (Mt. 7:21-23) Amandiko mashubire kuderha oku omu siku zizinda, banene ‘bakabonekene konyine nka bali bimana emwa Mungu.’ (2 Ti. 3:1, 5) Aliko, Ebiblia erhubwirire omu bulyo bugalagere oku hali “bwemere buguma” Mungu ayemerere.​—Osome Waefeso 4:4-6.

17. Bande bali bakulikira Yesu zene n’okuyerekana bwemere buguma b’okuli?

¹⁷ Bande bagwerhe bwemere buguma b’okuli zene? Rhwashambere oku bintu birhuyemezeze echola. Rhwashambere oku mufano g’obuharamye Yesu ayigirizaga, bona buharamye Abakristu ba burhanzi baliri bajira. Echishubizo chili chiguma chonyine, bali Bahamirizi ba Yehova. Rhugwerhe lukengo lunene l’okuba baguma b’omu lubaga lwa Yehova n’okumenya okuli oku bilolere Yehova n’emihigo yage! Rhujage rhwagenderera kuchizera oku rhuli omu kuli.