1. Ngatta maguluan i aru nga totolay?

TA KARU na relihion nga makkakkagi tu Cristiano kanu ira anna akseptan na Dios i paddayaw da, maguluan lallagu i totolay! Yari tu iyavu da, “Egga kari tattadday nga kurug nga relihion onu akseptan kari na Dios i ngamin nga relihion?” Kumbinsidu kari ittam nga sittam nga Saksi ira ni Jehova i mangituttuddu ta kinakurug anna i klase na paddayaw tam laman i akseptan ni Jehova? Ammuattam i ebidensia ira nu ngatta makagi tam yatun.

2. Base ta 1 Tesalonica 1:5, ngatta kumbinsidu si apostol Pablo nga egga nisa i kinakurug?

² Kumbinsidu si apostol Pablo nga egga nisa i kinakurug. (Bibbigan i 1 Tesalonica 1:5.) Ari na laman matageno tu yatun i kurug. Ginigiammu tu mapia ni Pablo i Uvovug na Dios anna kinurug na tu “ngamin i egga ta Masanto nga Tura ay naggafu ta Dios.” (2 Tim. 3:16) Napakurug ni Pablo ta Katurakan nga si Jesus i nepromesa nga Mesias. Ngem ari nga kinurug na Judio ira nga lider na relihion yatun nga ebidensia. Minaggappappe ira ta kakkagiadda nga ituttuddu da ta totolay i kinakurug meyannung ta Dios ngem kukukuadda mabba i ikalussona. (Tito 1:16) Ari nga kunnatun si Pablo. Ari na nga pili-pilian nu anni laman i kayà na nga kurugan ta Uvovug na Dios. Sigga-paran yayya nga ituddu i “ngamin nga plano na Dios” anna tuttulan ngamin danatun.​—King. 20:27.

3. Mawag kari nga matabbag tam i ngamin nga pakkiavu tam tapenu makumbinsi ittam nga egga nittam i kinakurug? (Innan gapa i kahon nga “ I Kinikkingngua Anna i Appana-panono ni Jehova—‘Ariattam Makua Ngamin nga Uvovugan.’”)

³ Kakkagian na karuan nga kurug i tadday nga relihion nu matabbag  natun i ngamin nga pakkiavu maski yuri ira pakkiavu nga awan ta Biblia i tabbag na. Ngem rasonable kari yatun? Ikonsidera i ehemplo ni Pablo. Pinagaram na i kapangngurug na ira nga ‘innadda tu mapia nu kurug ngamin i mekagi nira,’ ngem aminadu gapa yayya nga aru nga gannug i ari na nga malippawa. (1 Tes. 5:21) Nitura na: ‘Egga i pakkurangan na pakannammu tam.’ Tapus kinagi na gapa nga “i paningat-tam ay kagitta na paningan tu muka ta maribbo nga espeho.” (1 Cor. 13:9, 12) Ari nga malippawa ni Pablo i ngamin nga gannug, maski gapa sittam. Ngem manawag ta nisa i importante ira nga kinakurug meyannung ta gakkag ira ni Jehova. Makalanno ngana danatun nga ammu na tapenu makumbinsi yayya nga egga nisa i kinakurug!

4. Kunnasi ittam mas makumbinsi nga egga nittam i kinakurug, anna anni i mammuattam meyannung ta kurug ira nga Cristiano?

⁴ Tapenu mas makumbinsi ittam nga egga nittam i kinakurug, makasta nu ikumpara tam i pamarigan na paddayaw nga nigafu ni Jesus ta kukukuan na Saksi ira ni Jehova ta maddaggun. Mammuattam taw nga artikulo nga i kurug ira nga Cristiano ay (1) panakitadda i idolatria, (2) irespeto da i ngagan ni Jehova, (3) ayatadda i kinakurug, anna (4) makka-aya-aya ta napafutu.

5. Anni i nituddu ni Jesus meyannung ta paddayaw kani Jehova, anna kunnasi tam nga matuttul yatun?

⁵ Kuruga ayatan ni Jesus si Jehova yari tu yayya laman i zinayaw na ta kegga na ta langi onu maski turi ta egga yayya taw ta davvun. (Luc. 4:8) Sinudduan na gapa i disipulos na nga kunnatun i kuadda. Ari vuluvuga nangusa si Jesus onu i matalo nga disipulos na tu imahen ta paddayaw da. Tadday nga Espiritu si Jehova yatutta awan vuluvuga tu mapadday na tolay nga maski anni nga awayya na tu  mangirepresenta ta nisa! (Isa. 46:5) Kunnasi gafu yari ira totolay nga pabbalinadda tu sasanto tapus paddasalladda? Kunnaw i mekadua nga bilin ni Jehova ta Mafulu nga Dob: “Ari ka mangngua para ta baggim tu inukit nga imahen onu tadday nga forma nga gitta na maski anni nga egga ta langi onu ta davvun . . . Ari ka makkummag tatun ira onu matenta nga maddayaw tatun ira.” (Ex. 20:4, 5) Mawag gafu nga tuttulan yatun na totolay nga maya nga maddayaw ta Dios.

6. Anni nga pamarigan na paddayaw i tuttuttulan na Saksi ira ni Jehova?

⁶ Pakurugan na historiador ira nga ta Dios laman nga naddayaw i Cristiano ira ta ollu nga siglo. Angngarigan na, segun ta libru nga History of the Christian Church, nu ikagim ta Cristiano ira ta ollu nga siglo nga mangipuestu ira tu imahen ta lugar na paddayarayawadda, magga “ikalussaw da” yatun nga ideya. Tuttuttulan na Saksi ira ni Jehova i pamarigan nga nigafu na Cristiano ira ta ollu nga siglo. Ari ittam nga makimallo ta santo onu anghel ira; ari tam paga lagu makimallo kani Jesus. Ari ittam gapa massaludo ta bandera onu maddayaw ta maski anni nga mangirepresenta ta gobiernu. Maski gafu nu fuersadda ittam, determinadu ittam nakuan nga tuttulan yaw nga kinagi ni Jesus: “Si Jehova nga Dios mu i mawag nga dayarayawammu.”​—Mat. 4:10, NW.

7. Anni i dakal nga nadduman na Saksi ira ni Jehova ta karuan nga relihion?

⁷ Ta tiempo tam gapa, kakayà na totolay i sikat ira nga lider na relihion anna yatun i tuttuttuladda. Nu mittan, sossobra ngana mabba i pangidolo na totolay ta nira. Mapappannu i simbahadda, gata-gatangan na totolay i libru da ira, anna daddarakal i donasion na totolay ta nira onu ta organisasion ira nga supu-suportadda. Kuru-kurugan na karuan i ngamin nga kakkagian nira na lider ira na relihion. Fugurammu yatun nga kukukuadda! Kunnasi ngana laman gafu nu si Jesus i mappasingan ta nira? Ngem ari nga tumuttul ta tolay i kurug nga maddayarayaw kani Jehova. Kurug tu irespeto tam i mangirollu nittam ngem manawag ta nittam i nituddu ni Jesus: “Mawwaragi kamu ngamin.” (Mat. 23:8-10) Ari ittam nga mangidolo onu maddayaw tu tolay maski paga nu lider ira na relihion onu pulitiko ira. Ari tam gapa nga suportan i relihioso onu pulitikal ira nga programa da. Mattalupaddian ittam nga neutral anna nesina ta mundo. Danatun i dakal nga naddumattam ta ngamin nga relihion nga makkakkagi tu Cristiano kanu ira.​—Juan 18:36.

8. Ngatta makagi tam nga kayà ni Jehova nga medayaw i ngagan na anna makannammuan yatun na ngamin?

⁸ Nipakimallo ni Jesus: “Ama, ipasingam-mu ngana i dayaw na ngagam-mu!” Sinabbag mismu ni Jehova yatun gukaban na masikan nga ngaral nga naggafu ta langi anna nipromesa na nga ipasingan na noka i dayaw na ngagan na. (Juan 12:28) Zinayaw ni Jesus i ngagan na Yama na gukaban na pangipakannammu na tatun ta ministerio na. (Juan 17:26) Nu kunnatun i kingngua ni Jesus, mawag gafu gapa nga usan na kurug ira nga Cristiano i ngagan na Dios anna ipakannammu da yatun ta tanakuan.

9. Kunnasi nga nirespeto na ollu-siglo ira nga Cristiano i ngagan na Dios?

⁹ Ari nabbayag kabalin nga nabuu i Cristiano nga kongregasion ta ollu nga siglo C.E., ‘nipasingan na Dios i pagiddu na ta Hentil ira gafu ta pamabbalin na nira tu totolay [para ta ngagan na].ʼ (King. 15:14) Ari nga ipasiran natun nga ollu-siglo ira nga Cristiano i pangusa da ta ngagan na Dios anna i pangipakannammu da  tatun ta tanakuan. Niyusa da yatun ta pallayyagayya da anna ta netura da ira nga libru na Biblia. * Pinakurug da nga totolay ira para ta ngagan na Dios.​—King. 2:14, 21.

10. Ngatta makagi tam tu Saksi ira ni Jehova laman i mangiyawa tu mepappangngo nga pangirespeto ta ngagan nga Jehova?

¹⁰ Kingngua na aru nga lider na relihion i ngamin nga mawayya da tapenu metagu i personal nga ngagan na Dios. Inalsadda yatun ta translation na Biblia da anna egga ira i karuan nga nigamma da paga lagu i pangusa tatun nga ngagan ta simbahadda. * Ngem kumusta kari i Saksi ira ni Jehova? Irerrespeto tam kari i ngagan nga Jehova? Ipaka-pakannammu tam i personal nga ngagan na Dios. Awan tu tanakuan nga relihion nga magangngua ta kunnatun! Sittam i Saksi ira ni Jehova anna kukukuattam i ngamin tapenu metaddaggan yatun. (Isa. 43:10-12) Maturu tu 240 million ngana nga kopia na New World Translation of the Holy Scriptures i neyimprenta tam. Neyusa tatun i ngagan ni Jehova maski ta teksto ira nu sitaw inalsan yatun na karuan nga translator na Biblia. Mangipuppublisa ittam gapa tu nebase-Biblia ira nga publikasion nga kabibbigan na ngagan nga Jehova ta maturu tu 1,000 nga lengguahe! Saksi ira ni Jehova gafu laman i mangiyawa tu mepappangngo nga dayaw anna pangirespeto ta ngagan na Dios.

11. Kunnasi nipasingan na Cristiano ira ta ollu siglo nga ayatadda i kinakurug?

¹¹ Ayatan ni Jesus i kinakurug meyannung ta Dios anna ta urena. Nattolay si Jesus segun tatun anna nipakannammu na yatun nga kinakurug ta tanakuan. (Juan 18:37) Ayatan gapa na disipulos ni Jesus i kinakurug. (Juan 4:23, 24) Inagalan paga lagu ni apostol Pedro nga “Dalan na kurug” i pangurug na Cristiano ira. (2 Ped. 2:2) Dakal i pangaya na ollu-siglo ira nga Cristiano ta kinakurug yari tu pinammanakitadda i tuttuddu na relihion, tradision ira nga nebase ta kultura, anna personal ira nga opinion nga mekontra ta kinakurug. (Col. 2:8) Kunnatun gapa i kurug ira nga Cristiano ta maddaggun. Ikagumadda nga ‘mattolay segun ta kurug’ gukaban na memmugug nga pangibase da ta ngamin nga kuru-kurugadda anna kukukuadda ta Uvovug ni Jehova.​—3 Juan 3, 4.

12. Anni i kuan na Manangngal nga Baggi nu masingadda nga egga i mawag tu moli ta pakalippawa tam, anna ngatta kuadda yatun?

¹² Ari nga kagian na Saksi ira ni Jehova nga malippawa da i ngamin nga egga ta Biblia. Egga ira i tiempo nga makkamali ira ta pangipakanawag ta tadday nga tuddu na Biblia onu ta pangorganisa da ta kongregasion. Ngem gagangay laman yatun. Kagian gare na Biblia nga sisinu nga mannawag i kinakurug ta pappasa na tiempo. (Col. 1:9, 10) Sisinu i pangipakanawag ni Jehova ta nittam ta kinakurug. Mawag gafu nga pasensiattam i maginnag adde sonu manawag ngana i pakalippawa tam tatun. (Prov. 4:18) Nu masingan na Manangngal nga Baggi nga egga i mawag tu moli ta pakalippawa tam ta kinakurug onu ta unnug ta kongregasion, insigida ira nga magguyu. Ulian na aru nga relihion nga makkakkagi tu Cristiano ira i tuttuddu da megafu ta kayà da nga pagustuan i miembro da ira onu kayà da nga mabbalin tu sikat taw nga mundo. Ngem nu egga i ulian na Saksi ira ni Jehova, kuadda yatun tapenu mas maddukko ira ta Dios anna tapenu matuttul da i pamarigan na paddayaw nga nigafu ni Jesus. (Sant. 4:4) Kuattam laman i panguli nu mas nga mannawag i pakalippawa tam, ngem ari tu megafu ta nanguli i opinion na totolay. Ayatattam i kinakurug!—1 Tes. 2:3, 4.

13. Anni i pinaka-importante nga kualidad nga nipasingan na kurug ira nga Cristiano? Kunnasi nga ipasa-pasingan yatun na Saksi ira ni Jehova sangawe?

¹³ Napakaru i makasta nga kualidad nga nipasingan na ollu-siglo ira nga Cristiano ngem aya i pinaka-importante tatun. Kinagi ni Jesus: “Nu egga nikamu i pakka-aya-aya, kannammuan ngamin na totolay tu disipulo takamu.” (Juan 13:34, 35) Makka-aya-aya anna mattaradday gapa i Saksi ira ni Jehova ta interu mundo sangawe. Neruma ittam ta tanakuan ira nga relihion megafu ta gitta tam i tadday nga familia maski paga nu nadduruma i lahi, kultura, anna nasion nga naggafuattam. Ta study, asembli, anna kombension ira, masingattam nga makka-aya-aya ittam ta napafutu. Yatun i mas mangumbinsi nittam nga i klase na paddayaw tam laman i akseptan ni Jehova.

14. Segun ta Colosas 3:12-14, kunnasi ittam nga makka-aya-aya ta napafutu?

¹⁴ Pagaramman ittam na Biblia nga ‘makka-aya-aya ittam ta napafutu.’ (1 Ped. 4:8) Makua tam yatun nu makka-paka-pakoma ittam anna makka-pasa-pasensia ittam ta imperfekto ittam mabba ngamin. Mannono ittam gapa tu makua tam tapenu mabbalin tu minangngiyawa anna minammadulo ta ngamin nga wawwaragi, maski turi ira ta awayya na tu nakataki ta nittam. (Bibbigan i Colosas 3:12-14.) Nu  makka-aya-aya ittam, mepasingattam nga sittam i kurug nga Cristiano.

15. Anni paga i karuan nga pamarigan na paddayaw nga nigafu na ollu-siglo ira nga Cristiano i tuttuttulattam?

¹⁵ Tuttuttulattam gapa i karuan paga nga pamarigan na paddayaw nga nigafu na ollu-siglo nga kongregasion. Sangawe, egga i manangngal ta sirkito tam, elder, anna ministerial ira nga aripan. Egga gapa i kunnatun nga unnug da tagga. (Fil. 1:1; Tito 1:5) Gitta na ollu-siglo ira nga Cristiano, irespeto tam gapa i dorob ni Jehova meyannung ta sex, pagatawa, pangusa tu daga, anna i unnug ta paddisfellow tapenu maprotektan i kongregasion.​—King. 15:28, 29; 1 Cor. 5:11-13; 6:9, 10; Heb. 13:4.

16. Anni i magigiammu tam ta Efeso 4:4-6?

¹⁶ Kinagi ni Jesus nga aru noka i makkagi nga disipulos na ira ngem minaggappappe mabba ira. (Mat. 7:21-23) Neprofesiya gapa ta Biblia nga ta pangurianan nga aggaggaw, aru i totolay nga ‘appe tumuttul ira ta relihion.’ (2 Tim. 3:1, 5) Ngem mananawag i kagian na Biblia nittam nga ‘tadday laman i angngurug’ nga alawatan na Dios.​—Bibbigan i Efeso 4:4-6.

17. Sinni sangawe i kurug nga relihion nga tumuttuttul kani Jesus?

¹⁷ Ginigiammu tam i pamarigan na paddayaw nga nigafu ni Jesus anna na ollu-siglo ira nga Cristiano. Base tatun ira nga ebidensia, sinni gafu laman i tattadday anna kurug nga relihion? I Saksi ira ni Jehova. Daka-dakal nga pribilehio nga tadday ittam ta totolay ni Jehova anna ammu tam i kinakurug meyannung ta nisa anna ta gakkag na ira! Kuattam gafu i ngamin nga mawayya tam tapenu makumbinsi ittam nga egga nittam i kinakurug.