1. Ɔdiya nɛ ācɛ alɛwa gbaji icɛ a?

Ó lɛ ɔwɛ ku ɛ̄gbā ō gba alɛwa nōo yɔ icɛ nōo kē wɛ Ācɛ O Yɛce Ukraist, ku uwa klla gē gba Ɔwɔico ɛ̄gbā ɔwɛ nōo he ɔ ɔtu a. Ɔɔma ya ɛɛ nɛ ācɛ alɛwa gbaji icɛ a! É gē da ɔka kahinii: “Ɔwɛ o gba ɛ̄gbā ekponu wɛ ɔkwɛyi a nɛɛ, kɛɛ ku ɛjɛɛji aɔwɛ o gba ɛ̄gbā a gē ya ɔdā nōo he Ɔwɔico ɔtu a?” Alɔ miyɛ cɛ ku abɔ alɔ wɛ Ācɛ Ocijali Ku Ujehofa a alɔ gē nwu ɛlā ɔkwɛyi, ku ɔwɛ nɛ alɔ klla gē gba Ujehofa ɛ̄gbā a wɛ ɔwɛ foofunu nōo he ɔ ɔtu a? Ó tɔɔtɛ ō jé ɔkwɛyi lɛyikwu aɔka nyā? Alɔ leyi yɛ aɔdā nōo mafu ɛnyā a.

2. Oŋma ɛlā nōo yɔ ipu ɔkpá ku 1 Ācɛ Utesaloníka 1:5, ɔdiya nɛ Upɔlu miyɛ cɛ kli ku ɔdā nɛ ó kpɔtuce a wɛ ɛlā ɔkwɛyi a?

² Upɔlu nōo wɛ ɔcocɛhɔ a miyɛ ɛlā ɔkwɛyi a cɛ kli. (Jé 1 Ācɛ Utesaloníka 1:5.) Upɔlu i miyɛ ɛlā ɔkwɛyi a cɛ ohigbu ka ó gē cɛ lɛ ɔ gweeye anca ŋ. Ikɔkɔ ɔɔma, Upɔlu lɛ eko taajɛ jé Ɛlā ku Ɔwɔico a lɔɔlɔhi. Ó kpɔtuce lɔfu lɔfu ka “Ɔwɔicō je ɛjɛ̄ɛ̄jī ɛlɔ̄ɔwɔicō tá ipú ɔtū kú ācɛ á.” (2 Utím. 3:16) Ɔdi nɛ ó nwu a? Ipu Ubáyíbu, Upɔlu má ocabɔ nōo mafu peee ka Ujisɔsi wɛ Umɛsayiya néē cokonu ku nu a, ocabɔ nɛ ācɛ Ujiyu nōo wɛ otrɛyi ku ɛ̄gbā ō gba leyi gwu ɔ bonu a. É ka kē yɔ i nwu ācɛ ɛlā ɔkwɛyi lɛyikwu Ɔwɔico, amáŋ é kē i ya ɔdā nōo he Ɔwɔico ɔtu ŋ. (Utáy. 1:16) Upɔlu i lɛbɛɛka ācɛ nyā ŋ. Ó miyɛ aya nɛ ó cika ō kpɔtuce ŋma ipu Ɛlā ku Ɔwɔico, amāŋ aya nɛ ó cika ō miyɛ cɛ ŋ ma ŋ. Ó le tutu ō nwu ɛlā mla ō yuklɔ mla ɛjɛɛji ɔdā nɛ “Ɔwɔicō miya táajɛ” a.​—Ācot. 20:27.

3. O ya ɛɛ ku alɔ miyɛ cɛ ku ɛlā ɔkwɛyi a nɛ alɔ nwu a, alɔ cika ō lɛ ohi ku ɛjɛɛji ɔka nɛɛ? (Má ikpati nōo kahinii: “ Uklɔ Abɔ Ku Ujehofa Mla Ɛlá Ō Gbo Ku Nu​—‘Ó Le Lɛwa Nɛhi Nɛ Alɔ I Gáā Ka Uwa Tɛɛcɛ Duudu Gla Ŋ.’”)

 ³ Ɔtu gē ya ācɛ ōhī ka ó cika ō tɔɔtɛ lɛ ɔwɛ ku ɛ̄gbā ō gba ɔkwɛyi a kéē cila ɛjɛɛji ɔka, kwu aɔka nɛ Ubáyíbu i kóō je ohi ku nu ŋ ma. Ɔɔma tɔɔtɛ gla? Leyi yɛ ocabɔ mafu ku Upɔlu ɛ. Ó da Ācɛ O Yɛce Ukraist ɔmpa nu kē cika ō lɛ “ɔkwu olɛhɔ̄ ā bū,” amáŋ ó klla ka kpɔ ka ó lɛ aɔdā ōhī ɛ̄nɛ̄ ó jɛyi nu ŋ. (1 Utes. 5:21) Ó kahinii: “Ɛhi kú ɔdā ō jé kú alɔ í jīla dúúdú ŋ́,” ó klla ka kpɔ ku “alɔ í mɛ́ɛbɛ fluflu bɛ̄ɛka ɔdā nɛ̄ ɔ̄cɛ í má ipú ogigo nōó lɔhi ŋ́ mā.” (1 Ukɔ́r. 13:9, 12) Ó wɛ ɛjɛɛji ɛlā nɛ Upɔlu jé a ŋ, ó kē lɛ a mla alɔ duu. Amáŋ Upɔlu jé ɔkwɛyi okpɔcii lɛyikwu Ujehofa. Aɛlā nɛ ó nwu nyā cɛ lɛ ɔ miyɛ cɛ kli ku ɛlā ɔkwɛyi a nɛ ó nwu a!

4. Ɛgɛnyá nɛ alɔ lɔfu ya ku alɔ miyɛ cɛ kli fiyɛ ku ɛlā nɛ alɔ nwu a wɛ ɛlā ɔkwɛyi a, ɔdi nɛ alɔ kē gáā leyi yɛ ɔ a?

⁴ Ɔwɛ éyi nɛ alɔ lɔfu ya ku alɔ miyɛ cɛ kli fiyɛ, ku ɛlā nɛ alɔ nwu a wɛ ɛla ɔkwɛyi a, wɛ ō lɛ ɔwɛ ku ɛ̄gbā ō gba nɛ Ujisɔsi le taajɛ a miya mla ɛ̄nɛ̄ Ācɛ Ocijali Ku Ujehofa yɔ i ya icɛ a. Ipu ikpɛyi ɛlā nyā, alɔ géē má ku Ācɛ O yɛce Ukraist ɔkwɛyi (1) i gē gba ojibo ɛ̄gbā ŋ, (2) gē lɛ ojilima ce iye ku Ujehofa, (3) yihɔtu ɔkwɛyi a, klla (4) yihɔtu ɔmpa uwa ŋma ipu ɔtu.

5. Ɔdi nɛ alɔ nwu ŋma ɛgiyi Ujisɔsi lɛyikwu ɔwɛ okpaakpa nɛ alɔ lɔfu gba Ɔwɔico ɛ̄gbā a, ɛgɛnyá nɛ alɔ kē gáā yuklɔ mla ɛlā nɛ ó nwu a?

⁵ Ohigbu ka Ujisɔsi yihɔtu ku Ujehofa nɛɛnɛhi a, ó gba Ujehofa foofunu ɛ̄gbā, kwu eko nɛ ó yɔ ɔkpanco mɛmla eko nɛ ó yɔ ipu ɛcɛ nyā a. (Ulúk. 4:8) Ó kē nwu ayikpo ku nu kéē gba Ujehofa foofunu ɛ̄gbā duu. Ujisɔsi mla ayikpo ku nu nōo hayi kpaakpa a, i bi ojibo yuklɔ ipu ɛ̄gbā ō gba ku uwa ŋ. Abɔ alɔ i má Ɔwɔico eyī caa gla ŋ ma, ɔcɛ duuma i gáā  ya ɔdā duuma nōo gbla ɔ gla ŋ! (Ayis. 46:5) Amáŋ ō ya ojibo ku ācɛ nɛ ācɛ ōhī gbɛla kē wɛ ācɛ otiihɔ, mla ō gbɔɔkɔ lɛ uwa bɛɛ? Íne ɔmpa nōo yɔ ipu Íne Igwo a, Ujehofa kahinii: “Aá gáā yá ojibó dúúmā ɛ́gbla kú ɔdā nōo yɔ̄ ɔkpáncō ámāŋ ka ɛ̄nɛ̄ o yɔ̄ ipú ɛcɛ nyā . . . Aá gáā túkpɛɛ́ lɛ uwá” ŋ. (Oyɛb. 20:4, 5) Ācɛ nōo dɔka ō ya ɔdā nōo he Ɔwɔico ɔtu a jé peee, ka ó dɔka ku alɔ bi ojibo le gba ɔ ɛ̄gbā ŋ.

6. Ɔwɛ ku ɛ̄gbā ō gba nyá nɛ Ācɛ Ocijali Ku Ujehofa gē yɛce icɛ a?

⁶ Ācɛ nōo jé odee lɛyikwu ɔ̄kā nōo ya eko igble a ka, ka ɛpleeko ku ayikpo ku Ukraist a, Ācɛ O Yɛce Ukraist gē gba Ɔwɔico foofunu ɛ̄gbā. Ocabɔ mafu, ɔkpá ku ɔdā nōo ya eko igble éyi ka ka Ācɛ O Yɛce Ukraist eko aflɛyi a gē “wɔtu” ō bi ojibo le yuklɔ ipu ɛga ō gba ɛ̄gbā. Icɛ, Ācɛ Ocijali Ku Ujehofa gē yɛce ocabɔ nɛ Ācɛ O Yɛce Ukraist eko aflɛyi a le taajɛ a. Alɔ i gē gbɔɔkɔ lɛ ojibo ku ācɛ “otiihɔ” amāŋ aalelekwu otɛhɔ ŋ, alɔ i kē gbɔɔkɔ lɛ Ujisɔsi ŋ duu. Alɔ i gē ya ɔdā duuma nōo mafu ku alɔ gē je ɛ̄gbā lɛ igɔmɛnti amāŋ éwo ku alɔ ŋ. Ɛgɛ duuma nōó lɛ, alɔ lɛ ɔtu ya ekponu ō lɛyitaajɛ lɛ ɛlā ku Ujisɔsi nōo kahinii: “Gbā Óndú ā, nōo wɛ Ɔwɔicō kú uwɔ ā ɛ̄gbā. Anú ōfōōfūnū nɛ̄ a géē gba ɔ̄ ɛ̄gbā á.”​—Umát. 4:10.

7. Ɔwɛ ɛyɛɛyɛyi nyá nɛ Ācɛ Ocijali Ku Ujehofa wɛ ɛyɛɛyi gwu ɔwɛ ku ɛ̄gbā ō gba ɔhá ta a?

⁷ Icɛ, ācɛ alɛwa gē dɔka ō jahɔ tu ācɛ ō tɔɔna Ɛla Ɔwɔico nōo loofu nɛɛnɛhi a. É gē hɛ ɔkɔ ācɛ ō tɔɔna ɛlā Ɔwɔico nyā nɛɛnɛhi bɛɛka ɔdā néē gáā gba uwa ɛ̄gbā a. Ācɛ alɛwa gē gā icɔɔci ku uwa, gē lá aɔkpá ku uwa, klla gē da ije nɛhi ō je otabɔ lɛ ɔwa ku uwa. Ācɛ gē kpɔtuce ɛjɛɛji ɛlā nɛ ācɛ ō tɔɔna ɛlā Ɔwɔico ɔɔma gē ka a. É gē gweeye nɛɛnɛhi ō má ācɛ ō tɔɔna ɛlā Ɔwɔico nyā bɛɛka Ujisɔsi néē yɔ i má a! Amáŋ ācɛ nōo gē gba Ɔwɔico ɔwɛ okpaakpa i lɛ ɛdɔ ācɛ ɛgɔɔma ŋ. Naana nɛ alɔ gē lɛ ojilima ce ācɛ nōo gē bi alɔ jé ɔwɛ a, alɔ cɛ mla ɛlā ō nwu ku Ujisɔsi nɛ ó ka teyi peee kahinii: “Odúúdú aá kē wɛ ayínɛ́ nɔ̄nyā mɛ́mla ayínɛ́ nɔ̄nyīlɔ” a. (Umát. 23:8-10) Alɔ i gē gba ɔlɛɛcɛ ɛ̄gbā ŋ, ɔdaŋ néē kóō wɛ otrɛyi ku ɛ̄gbā ō gba amāŋ ācɛ nōo lɛ íkwu ipu igɔmɛnti. Alɔ i gē cɛtra aɔdā ō ya ku uwa ŋ. Alɔ i kē lɛ abɔ ipu ɛlā imeli amāŋ ɛlā ku ɛcɛ nyā ŋ duu. Ipu ɔwɛ ɛyɛɛyɛyi nōo ba nyā, alɔ wɛ ɛyɛɛyi gwu ācɛ nōo ka kē wɛ Ācɛ O Yɛce Ukraist a ta.​—Ujɔ́n. 18:36.

8. Ɛgɛnyá nɛ alɔ bi le jé ka Ujehofa dɔka ku alɔ cɛtra iye ku nu, mla ō da ācɛ ɔhá lɛyikwu ɔ a?

⁸ Ɛpleeko éyi Ujisɔsi gbɔɔkɔ kahinii: “Ádā cɛ̄tra iyē kú uwɔ.” Ujehofa abɔyi nu lɛ ɔkɔ ō gba ɔɔma cila, mla ɔkɔ nōo kɛla gboomgboom ŋma ɔkpanco, yɔ i cokonu ka anuɔ géē cɛtra iye ku nu. (Ujɔ́n. 12:28) Ipu ɛjɛɛji uklɔ ku ɔna ō ta ku Ujisɔsi, ó cɛtra iye ku Adā nu. (Ujɔ́n. 17:26) Ohigbu ɛnyā, Ācɛ O Yɛce Ukraist gbɛla ka ó wɛ ɔdā ojilima ō bi iye ka Ɔwɔico le yuklɔ, mla ō da ācɛ ɔhá lɛyikwu ɔ.

9. Ɛgɛnyá nɛ Ācɛ O Yɛce Ukraist eko aflɛyi a mafu kē lɛ ojilima ce iye ku Ɔwɔico a?

⁹ Eko kpii igbihi néē lɛ ujɔ ku Ācɛ O Yɛce Ukraist ku eko aflɛyi a kwaajɛ a, Ujehofa “le māfú ka anúɔ lɛlá kwu aílɔ́wá o ŋmá lɛ ō je ācɛ ŋmá ipú uwā kéē kwú pīya ācɛ ɔlɛ́ nū.” (Ācot. 15:14) Ācɛ O Yɛce Ukraist a lɛ ojilima ō bi iye ka Ɔwɔico le yuklɔ, mla ō da ācɛ ɔhá lɛyikwu ɔ. Acocɛhɔ mla ayikpo ku Ujisɔsi bi iye ku Ɔwɔico yuklɔ eko duuma néē gē tɔɔna, mla eko néē yɔ i ta aɛga ku Ubáyíbu a. * O bu ɔwɛ nyā, é mafu ku uwa wɛ ācɛ foofunu nōo da ācɛ ɔhá lɛyikwu iye ku Ɔwɔico a.​—Ācot. 2:14, 21.

10. Ɛgɛnyá nɛ alɔ bi le jé ku Ācɛ Ocijali Ku Ujehofa foofunu wɛ ācɛ nōo gē da acɛ ɔhá lɛyikwu iye ku Ujehofa a?

 ¹⁰ Ācɛ Ocijali Ku Ujehofa wɛ ācɛ nōo gē bi iye ku Ujehofa yuklɔ ɔkwɔɔkwɛyi a nɛɛ? Má ɔdā nōo mafu ɛnyā a. Icɛ, alɛwa ku aotrɛyi ku ɛ̄gbā ō gba yɔ i ceyitikwu nɛɛnɛhi o ya ɛɛ kéē lɛ iye ku Ɔwɔico ŋmonyi. É lɛ iye a fu ŋma ipu Ubáyíbu ku uwa néē cɔwɔ a, ipu āhɔ̄ ōhī, é jɛga kéē bi iye ku Ɔwɔico yuklɔ ipu ɛga ō gba ɛ̄gbā ku uwa ŋ. * Ó teyi peee ku Ācɛ Ocijali Ku Ujehofa wɛ ācɛ foofunu nōo gē lɛ ojilima nōo cɛgba á ce iye ku Ɔwɔico a. Alɔ wɛ ācɛ nōo gē ceyitikwu ya ku ācɛ nōo yɔ ipu oduudu ɛcɛ a kéē jé iye ku Ɔwɔico, fiyɛ ɔwɛ ku ɛ̄gbā ō gba ɔhá a! Alɔ yɔ i ya ɔdā nɛ alɔ ya gla, ō wɛ ɔdā nɛ iye nɛ alɔ lé a ku alɔ wɛ a, alɔ wɛ Ācɛ Ocijali Ku Ujehofa. (Ayis. 43:10-12) Alɔ ya Ubáyíbu ku New World Translation of the Holy Scriptures nōo fiyɛ umiliyɔn ofu igwɛɛpa (240) a wɛɛcɛ, ācɛ nōo kē cɔwɔ ku Ubáyíbu nyā a bi iye ku Ujehofa yuklɔ ɛga nɛ ācɛ nōo cɔwɔ ku Ubáyíbu ɔhá i bi ɔ le yuklɔ ŋ ma. Alɔ kē ya aɔkpá ku alɔ nōo bi iye ku Ujehofa yuklɔ ipu uce nōo fiyɛ 1,000 a!

11. Ɛgɛnyá nɛ Ācɛ O Yɛce Ukraist aflɛyi a mafu ihɔtu ku uwa lɛ ɔkwɛyi a?

¹¹ Ujisɔsi yihɔtu ɛlā ɔkwɛyi a, ɔɔma kē wɛ ɔkwɛyi lɛyikwu Ɔwɔico mla ɛjɛɛji ɔdā nɛ Ɔwɔico géē ya a. Ɔwɛ nɛ Ujisɔsi lā oyeeyi ku nu a mafu ka ó jé ɔkwɛyi a, ó kē da ācɛ ɔhá lɛyikwu ɔkwɛyi ɔɔma. (Ujɔ́n. 18:37) Ayikpo ku Ujisɔsi ɔkwɔɔkwɛyi a yihɔtu ɔkwɛyi a nɛɛnɛhi duu. (Ujɔ́n. 4:23, 24) Ku ɛlā ɔkwɛyi a ba, Upita kóō hi Ācɛ O Yɛce Ukraist eko aflɛyi a ka ‘ɔwɛ ku ɛlā Ɔwɔico ɔkwɛyi a.’ (2 Upít. 2:2) Ohigbu ihɔtu nɛhi néē lɛ lɛ ɛlā ɔkwɛyi a, Ācɛ O Yɛce eko aflɛyi a ta ɛlá ō gbo ku ɔwɛ ku ɛ̄gbā ō gba ɛyɛɛyɛyi, uculo, mla ɔdā nɛ ɔcɛ gbɛla nɛ ó cɛtɔha mla ɛlā ɔkwɛyi a ŋ ma. (Ukól. 2:8) Ó lɛ a icɛ duu, Ācɛ O Yɛce Ukraist ɔkwɛyi a gē ceyitikwu kéē “lɛyítáajɛ lɛ ɔ̄kwɛ̄yi a,” ŋma lɛ ō gbolo ce Ɛlā ku Ujehofa ipu ɛjɛɛji ɔdā néē kpɔtuce mla ɔwɛ néē gē lā oyeeyi a.​—3 Ujɔ́n 3, 4.

12. Ɔdi gē ya eko duuma nɛ Ígwu Nōo Gē Leyi Kwu Ɔwa Ku Alɔ a gáā le má ku alɔ cika ō lɛ ɔwɛ nɛ alɔ jɛyi odee amāŋ gē ya odee piyabɔ a, ɔdiya néē kē i ya opiyabɔ nyā a?

 ¹² Ācɛ Ocijali Ku Ujehofa i gē ka ku uwa jé ɛjɛɛji ɔdā nōo yɔ ipu Ubáyíbu a ŋ. Ekoohi, é gē ya inyileyi lɛyikwu ɔwɛ néē je ɛlā ō nwu ku Ubáyíbu éyi teyi peee, amāŋ ɛgɛ nɛ odee gē nyɔ mɛɛlɛ ipu ujɔ a lɛ a. Ɔɔma i cika ō hɛ alɔ idaago ŋ. Ubáyíbu lɛ ɔ teyi peee ku ācɛ ɔlɛ Ɔwɔico géē jɛyi ɛlā ɔkwɛyi a lɔɔlɔhi fiyɛ abɔ eko gē nyɔ a. (Ukól. 1:9, 10) Ujehofa gē je ɛlā ɔkwɛyi a teyi peee ɛmɛɛma, alɔ kē cika ō le tutu ō gbeyi cii jaa gbeeko nɛ alɔ géē jé ɛlā ɔkwɛyi a lɔɔlɔhi fiyɛ a. (Aíit. 4:18) Eko duuma nɛ Ígwu Nōo Gē Leyi Kwu Ɔwa Ku Alɔ gáā le má, ku alɔ cɛgbá ō lɛ ɔwɛ nɛ alɔ jɛyi odee amāŋ gē ya odee a piyabɔ, é gē ya opiyabɔ ɔɔma boobu. Icɔɔci alɛwa icɛ gē piya ɛla ō nwu ku uwa abɔ ɔwɛ nōo géē he ācɛ icɔɔci ku uwa ɔtu, mla ō ya ku ɛcɛ a kéē jé uwa lɔɔlɔhi. Amáŋ Ācɛ Ocijali Ku Ujehofa gē ya opiyabɔ, ohigbu ku alɔ dɔka ō tubla Ɔwɔico ajaajɛ, cɛɛ ku alɔ gba ɔ ɛ̄gbā ɔwɛ nɛ Ujisɔsi ya a. (Ujɛ́m. 4:4) Eko duuma nɛ alɔ lɛ opiyabɔ ya, ó wɛ ohigbu ku ɛlá ō gbo ku ācɛ nōo yɔ ipu ɛcɛ a kwu piyabɔ ŋ, amáŋ ohigbu ku Ubáyíbu le ta alɔ eyī peee fiyɛ nɛ. Alɔ yihɔtu ɔkwɛyi a ibi!​—1 Utes. 2:3, 4.

13. Uce ō ya ocɛgbá nyá nɛ Ācɛ O Yɛce Ukraist ɔkwɛyi gē mafu a, ɛgɛnyá nɛ Ācɛ Ocijali ku Ujehofa kē i ma ɔ fu icɛ a?

¹³ Ó lɛ alɛwa ku auce ō ya olɔhi néē bi le jé Ācɛ O Yɛce Ukraist eko aflɛyi a, amáŋ uce ō ya nōo cɛgbá fiyɛ duu néē bi le jé uwa a wɛ ihɔtu. Ujisɔsi kahinii: “Ɔ́dāŋ́ ka aá gē yíihɔtū tá iyī aá, cɛ́ɛ́ ācɛ géē jé ka aá wɛ ayíkpó kú um.” (Ujɔ́n. 13:34, 35) Icɛ, Ācɛ Ocijali Ku Ujehofa gē jɔɔnyɛ ihɔtu ɔkwɛyi a klla piyatɔha lɔɔlɔhi. Alɔ wɛ ɛyɛɛyi gwu ɔwɛ ku ɛ̄gbā ō gba ohile ta, ohigbu ku alɔ lɛbɛɛka apɔlɛ naana nɛ alɔ ŋma éwo ɛyɛɛyɛyi, klla lɛ uculo ɛyɛɛyɛyi a. Alɔ gē má ocabɔ ku ihɔtu ɔkwɛyi nyā ipu ōjila ku alɔ, ojileyi, mla ojileyi nɛhi. Ɛnyā klla gē ta alɔ abɔ ō jé kpɔcii ku alɔ yɔ i gba Ujehofa ɔwɛ nōo he ɔ ɔtu a.

14. Oŋma ɛlā nōo yɔ ipu ɔkpá ku Ācɛ Ukólōsi 3:12-14, ɔwɛ ocɛgbá nyá nɛ alɔ lɔfu mafu ihɔtu ɔkwɛyi lɛ ɔmpa alɔ a?

¹⁴ Ubáyíbu ta alɔ ɔtu kwu ɔtu kahinii: “Ɔ̄cɛ ɔ́mpa aá kóō he aá ɔtu.” (1 Upít. 4:8) Ɔwɛ éyi nɛ alɔ gáā mafu ɛdɔ ihɔtu nyā a wɛ ō je ya ɔmpa alɔ ɛhi, mla ō ya ɛlā ɛmɛɛma mla uwa eko duuma néē lɛ ɔdā okwiiye ya alɔ. Alɔ klla gē dɔka ɛnɛɛnɛ ɛga nɛ alɔ géē nwula abɔ mla ō gbonɛnɛ lɛ ɛjɛɛji ācɛ nōo yɔ ipu ujɔ a, kwu ācɛ nōo kóō lɛ ɔdā okwiiye ya alɔ ɛ. (Jé Ācɛ Ukólōsi 3:12-14.) Ɔdaŋ ku alɔ mafu ɛdɔ ihɔtu nyā, alɔ gē mafu ku alɔ wɛ Ācɛ O Yɛce Ukraist ɔkwɔɔkwɛyi.

15. Ɔwɛ ɔhá nyá nɛ alɔ gē yɛce ɔwɛ ku ɛ̄gbā ō gba nɛ Ācɛ O Yɛce Ukraist eko aflɛyi a le taajɛ a?

¹⁵ Ó lɛ ɔwɛ ɔhá nɛ alɔ klla gē yɛce ɔwɛ ku ɛ̄gbā ō gba, nɛ Ācɛ O Yɛce Ukraist eko aflɛyi a le taajɛ a. Ocabɔ mafu, alɔ piyatɔha  lɔɔlɔhi ɛgɛ nɛ Ācɛ O Yɛce Ukraist eko aflɛyi a piyatɔha lɛ a. Alɔ lɛ ācɛ ō leyi kwu usɛkut, anyakwɔcɛ ku ujɔ, mla ācɛ ō ta anyakwɔcɛ ku ujɔ abɔ ɛgɛ néē lɛ duu a. (Ufíl. 1:1; Utáy. 1:5) Bɛɛka uwa a, alɔ gē lɛ ojilima ce ɔwɛ nɛ Ujehofa gē leyi má ikpo ɔnyā ō ce amāŋ aja ō gbo mla obatɔha ku ɔba mla ɔnyā, mla íne ku Ɔwɔico lɛyikwu oyi ō miyɛ a. Alɔ kē i gbo ujɔ a ŋma ɛgiyi ācɛ nōó dɔka ō yɛce íne ku Ɔwɔico ŋ ma.​—Ācot. 15:28, 29; 1 Ukɔ́r. 5:11-13; 6:9, 10; Uhíb. 13:4.

16. Ɔdi nɛ alɔ nwu ŋma ipu ɔkpá ku Ācɛ Ɛ́fēsɔsi 4:4-6 a?

¹⁶ Ujisɔsi ka ka ācɛ alɛwa gē yɔ i ka kē wɛ ayikpo ku nu ɔkwɔɔkwɛyi, amáŋ ó wɛ oduudu ācɛ gáā wɛ ayikpo ku nu ɔkwɛyi a ŋ. (Umát. 7:21-23) Ubáyíbu klla da alɔ ku ɛpleeko amoomɛ a, acɛ alɛwa géē yɔ i ya “bɛ̄ɛka ɔdā nēé pó ɛlɔ̄ɔwɔicō ā.” (2 Utím. 3:1, 5) Amáŋ, Ubáyíbu le da alɔ peee ku “alɔ lɛ ɔwɛ ékpó nɛ̄ alɔ lɔtūce ɔwɔico,” ɔwɛ ɔɔma kē wɛ ɔwɛ nōo he Ɔwɔico ɔtu a.​—Jé Ācɛ Ɛ́fēsɔsi 4:4-6.

17. Anyɛ yɔ i yɛce ɔwɛ ku ɔtu okpoce ekpo nōo wɛ ɔkwɛyi icɛ a?

¹⁷ Anyɛ yɔ i yɛce ɔwɛ ku ɔtu okpoce ekpo nōo wɛ ɔkwɛyi icɛ a? Alɔ leyi yɛ aɔdā nōo cɛ lɛ alɔ jé ɛnyā kpɔcii a ɛ. Alɔ leyi má ɔwɛ ku ɛ̄gbā ō gba nɛ Ujisɔsi nwu ɛlā lɛyikwu ɔ, nɛ Ācɛ O Yɛce Ukraist eko aflɛyi a klla yɛce a duu ɛ. Ohi ekponu foofunu yɔ a, Ācɛ Ocijali Ku Ujehofa nɛ. Ó wɛ ɔdā ojilima nɛhi ō wɛ éyi ku ācɛ ɔlɛ Ujehofa, mla ō jé ɛlā ɔkwɛyi lɛyikwu Ujehofa mla ɔdā nɛ ó bi ɔtu ō ya a! Ohigbu ɛnyā, alɔ ya ɔdā nɛ alɔ ya gla, ō lɛ abɔ bi ɔkwɛyi nɛ alɔ nwu a kli.