GĨCUNJĨ KĨA WĨRUTI KĨA 42
Ĩtĩkia Biũ Atĩ Ũrĩ Ũhoro-inĩ wa Ma
“Thuthuragiai maũndũ mothe; rũmagiai maũndũ marĩa mega.”—1 THES. 5:21.
RWĨMBO NA. 142 Kũrũmia Kĩĩrĩgĩrĩro Gitũ
GĨCUNJĨ-INĨ GĨKĨ *
1. Nĩ kĩĩ gĩtũmaga andũ aingĩ matukanĩrũo?
KŨRĨ ndini nyingĩ ũmũthĩ ciĩĩtaga cia Gĩkristiano na cikoiga atĩ cithathayagia Ngai na njĩra ĩrĩa ĩtĩkĩrĩkĩte. Ũndũ ũcio nĩ ũtũmaga andũ aingĩ matukanĩrũo. Meyũragia ũũ: “Hihi ndini ya ma no ĩmwe tu, kana ndini ciothe nĩ ikenagia Ngai?” Hihi nĩ tũkoragwo twĩtĩkĩtie biũ atĩ ũhoro ũrĩa tũrutanaga nĩguo ũhoro ũrĩa wa ma na atĩ ũthathaiya ũrĩa Aira a Jehova marũmagĩrĩra ũmũthĩ nĩguo wĩtĩkĩrĩkaga harĩ Jehova? Tũngĩkorũo na ũũma ta ũcio atĩa? Rekei twarĩrĩrie maũndũ mamwe megũtũteithia gũkorũo na ũũma.
2. Nĩ ũndũ ũrĩkũ watũmaga Paulo etĩkie biũ atĩ aarĩ ũhoro-inĩ wa ma? (1 Athesalonike 1:5)
2 Mũtũmwo Paulo nĩ eetĩkĩtie biũ atĩ aarĩ thĩinĩ wa ũhoro wa ma. (Thoma 1 Athesalonike 1:5.) Ndeetĩkĩtie ũhoro wa ma atĩ tondũ tu nĩ wamũkenagia. Paulo nĩ eerutaga Kiugo kĩa Ngai na kĩyo. Eetĩkĩtie atĩ “Rĩandĩko o rĩothe, rĩtongoretio nĩ roho wa Ngai.” (2 Tim. 3:16) Eerutire maũndũ marĩkũ? Maandĩko nĩ maateithirie Paulo gũkorũo na ũira ũtangĩkarario atĩ Jesu nĩwe Mesia ũrĩa weranĩirũo, ngũrani na atongoria a ndini ya Kĩyahudi arĩa mataatindanagĩra na ũira ũcio. Atongoria acio a ndini maaugaga atĩ mararutana ũhoro wa ma, ĩndĩ meekaga maũndũ marĩa matakenagia Ngai. (Tit. 1:16) Ngũrani nao, Paulo ndathuuranagia nĩ icunjĩ irĩkũ cia Kiugo kĩa Ngai angĩetĩkirie. Nĩ eehaarĩirie kũrutana na kũrũmĩrĩra “maũndũ mothe megiĩ wendi wa Ngai.”—Atũm. 20:27.
3. Hihi nĩ tũrabatara gũkorũo na macokio ma ciũria ciothe nĩguo twĩtĩkie biũ atĩ tũrĩ ũhoro-inĩ wa ma? (Ningĩ rora gathandũkũ, “ Mawĩra na Methugunda ma Jehova nĩ ‘Maingĩ Mũno Matingĩgweteka.’”)
3 Andũ amwe meciragia atĩ ndini ya ma yagĩrĩirũo gũkorũo ĩkĩhota gũcokia ciũria ciothe nginya iria itaarĩrĩirio thĩinĩ wa Bibilia. Hihi ũndũ ũcio no ũhoteke? Ta wĩcirie ũhoro wĩgiĩ Paulo. Eekagĩra andũ arĩa angĩ ngoro ‘gũthuthuragia maũndũ mothe,’ no ndaahithaga atĩ harĩ maũndũ mangĩ maingĩ ataataũkagĩrũo nĩmo. (1 Thes. 5:21) Aandĩkire atĩ “tũkoragwo na ũmenyo o gĩcunjĩ,” na agĩcoka akĩongerera atĩ “tuonaga na mairia, o ta tũrarora na gĩcicio gĩa cuma.” (1 Kor. 13:9, 12) O ta ithuĩ, Paulo ndaataũkagĩrũo nĩ maũndũ mothe. No nĩ aataũkagĩrũo nĩ maũndũ ma mũthingi megiĩ Jehova. Maũndũ marĩa ooĩ maarĩ maiganu ma gũtũma etĩkie biũ atĩ aarĩ ũhoro-inĩ wa ma.
4. Nĩ ũndũ ũrĩkũ ũngĩtũteithia gwĩtĩkia biũ atĩ tũrĩ ũhoro-inĩ wa ma, na tũkwarĩrĩria maũndũ marĩkũ megiĩ Akristiano a ma?
4 Ũndũ ũmwe ũngĩtũteithia gwĩtĩkia biũ atĩ tũrĩ ũhoro-inĩ wa ma nĩ kũringithania njĩra ĩrĩa Jesu aarutanire ya ũthathaiya na ũrĩa Aira a Jehova mekaga ũmũthĩ. Gĩcunjĩ-inĩ gĩkĩ nĩ tũkuona atĩ Akristiano a ma (1) nĩ mareganaga na ũhoi wa mĩhianano, (2) nĩ matĩĩte rĩĩtwa rĩa Jehova, (3) nĩ mendete ma, na (4) nĩ mendanĩte kuuma ngoro.
NĨ TŨREGANAGA NA ŨHOI WA MĨHIANANO
5. Tũreruta atĩa kuumana na Jesu igũrũ rĩgiĩ njĩra ĩrĩa yagĩrĩire ya gũthathaiya Ngai, na tũngĩathĩkĩra atĩa ũndũ ũrĩa aarutanire?
5 Rĩrĩa Jesu aatũũraga kũrĩa igũrũ na rĩrĩa ookire gũkũ thĩ, aathathayagia o Jehova wiki tondũ nĩ aamwendete mũno. (Luk. 4:8) Ũguo noguo aarutire arũmĩrĩri ake mekage. Gũtirĩ hĩndĩ Jesu na arutwo ake maahũthĩrire mĩhianano ũthathaiya-inĩ. Tondũ Ngai ndangĩoneka na maitho, gũtirĩ mũndũ ũngĩhota gũthondeka kĩndũ kĩhaana take. (Isa. 46:5) Ĩ ũhoro wĩgiĩ gũthondeka mĩhaano ya andũ arĩa metagwo atheru na kũmĩhoya? Thĩinĩ wa rĩathani rĩa kerĩ harĩ Maathani Marĩa Ikũmi, Jehova aaugĩte ũũ: “Ndũkanethondekere mũhianano wa gwacũhio kana mũhianĩre wa kĩndũ o gĩothe kĩrĩ kũrĩa igũrũ kana gũkũ thĩ . . . Ndũkanacinamĩrĩre.” (Tham. 20:4, 5) Andũ arĩa mendaga gũkenia Ngai nĩ mataũkagĩrũo atĩ ndendaga tũhũthĩre mĩhianano ũthathaiya-inĩ.
6. Aira a Jehova marũmagĩrĩra kĩonereria kĩrĩkũ kĩgiĩ ũthathaiya?
6 Athomi a historĩ maugaga atĩ Akristiano a mahinda ma atũmwo maathathayagia o Ngai tu. Kwa ngerekano, ibuku rĩmwe rĩa historĩ riugaga atĩ Akristiano acio, maangĩonire ũrĩ ũndũ wa magigi kũhũthĩra mĩhianano ũthathaiya-inĩ. Ũmũthĩ, Aira a Jehova marũmagĩrĩra kĩonereria kĩa Akristiano a karine ya mbere. Tũtierekagĩria mahoya maitũ kũrĩ atheru kana araika, na ningĩ tũtihoyaga kũrĩ Jesu. Ningĩ tũtihũũragĩra bendera thurutia, kana tũgeka ũndũ ũngĩ o wothe wa gũthathaiya bũrũri witũ. O na tũngĩkwo atĩa, tũkoragwo tũtuĩte itua rĩa gwathĩkĩra ciugo ici cia Jesu: “Wagĩrĩirũo gũthathaiya Jehova Ngai waku.”—Mat. 4:10.
7. Nĩ ngũrani ĩrĩkũ ĩrĩ ho gatagatĩ-inĩ ka Aira a Jehova na ndini iria ingĩ?
7 Ũmũthĩ andũ aingĩ mendete kũrũmĩrĩra ahunjia arĩa marĩ igweta. Makoragwo mendete ahunjia acio ũũ atĩ nĩ ta mamathathayagia. Andũ aingĩ nĩ mathiaga kanitha ciao, makagũra mabuku mao, na makamahothera mbeca nyingĩ o hamwe na mathondeka mao. Andũ amwe metĩkagia maũndũ mothe marĩa ahunjia acio maugaga. Rĩrĩa mamona makenaga o ta ũrĩa mangĩkena kuona Jesu we mwene. Ngũrani nao, athathaiya a ma a Jehova matikoragwo na atongoria. O na gũtuĩka nĩ tũtĩaga arĩa mamũrĩtwo gũtongoria maũndũ, nĩ tũririkanaga ciugo ici cia Jesu: “Inyuothe mũrĩ ariũ a Ithe ũmwe.” (Mat. 23:8-10) O na mũndũ angĩkorũo arĩ mũtongoria wa ndini kana akorũo na gaturũa thirikari-inĩ, tũtingĩmũthathaiya. Ningĩ tũtingĩmũteithĩrĩria kũhingia mĩoroto yake ya kĩĩndini kana ya gĩũteti. Kwoguo tũtiĩingĩragia maũndũ-inĩ ma gĩũteti kana ma thĩ ĩno. Maũndũ macio nĩ matũmaga tũkorũo tũrĩ ngũrani na ndini nyingĩ iria ciĩĩtaga cia Gĩkristiano.—Joh. 18:36.
NĨ TŨTĨAGA RĨĨTWA RĨA JEHOVA
Akristiano a ma nĩ makenaga kwĩra andũ arĩa angĩ ũhoro wĩgiĩ Jehova (Rora kĩbungo gĩa 8-10) *
8. Tũmenyaga atĩa atĩ Jehova nĩ endaga rĩĩtwa rĩake rĩgoocithio na rĩmenyithanio kũrĩ andũ othe?
8 Hĩndĩ ĩmwe Jesu akĩhoya aaugire: “Awa, goocithia rĩĩtwa rĩaku.” Jehova nĩ aacokirie mahoya macio na mũgambo mũnene kuuma igũrũ akiuga atĩ nĩ ekũgoocithia rĩĩtwa rĩake. (Joh. 12:28) Mahinda-inĩ mothe ũtungata-inĩ wake, Jesu nĩ aagoocithagia rĩĩtwa rĩa Ithe. (Joh. 17:26) Kwoguo Akristiano a ma nĩ monaga arĩ gĩtĩo kĩnene kũhũthĩra rĩĩtwa rĩa Ngai na kũrĩmenyithia kũrĩ andũ angĩ.
9. Akristiano a karine ya mbere moonanirie atĩa atĩ nĩ maatĩĩte rĩĩtwa rĩa Ngai?
9 Kahinda kanini thutha wa kĩũngano gĩa Gĩkristiano kwambĩrĩrio thĩinĩ wa karine ya mbere M.M., Jehova nĩ eerekeirie “meciria make kũrĩ ndũrĩrĩ nĩguo egĩĩre na andũ kuuma kũrĩ cio metanĩtio na rĩĩtwa rĩake.” (Atũm. 15:14) Akristiano acio nĩ maakenagĩra kũhũthĩra rĩĩtwa rĩa Ngai na kũrĩmenyithia andũ arĩa angĩ. Nĩ maahũthagĩra rĩĩtwa rĩu rĩrĩa marahunjia, o na rĩrĩa maandĩkaga mabuku ma Bibilia. * Na njĩra ĩyo makĩonania wega atĩ no o tu maamenyithanagia rĩĩtwa rĩa Ngai.—Atũm. 2:14, 21.
10. Nĩ ũira ũrĩkũ wonanagia atĩ Aira a Jehova nĩ mamenyithanagia rĩĩtwa rĩa Ngai?
10 Hihi Aira a Jehova nĩ mamenyithanagia rĩĩtwa rĩa Ngai? Rekei tuone ũndũ ũronania nĩ mekaga ũguo. Ũmũthĩ, atongoria aingĩ a ndini mekaga ũrĩa wothe mangĩhota kũhitha rĩĩtwa rĩa Ngai. Nĩ marĩeheretie thĩinĩ wa Bibilia iria mataũrĩte, na rĩmwe o na nĩ magiragia rĩhũthĩrũo thĩinĩ wa ũthathaiya wao. * Gũtirĩ mũndũ ũngĩkararia atĩ no Aira a Jehova tu maheaga rĩĩtwa rĩa Jehova gĩtĩo kĩrĩa rĩagĩrĩire kũheo. Nĩ tũmenyithanagia rĩĩtwa rĩa Ngai na njĩra nene makĩria gũkĩra ndini ĩngĩ o yothe. Ũhoro-inĩ ũcio, nĩ twĩrutanagĩria o ũrĩa wothe tũngĩhota gwĩka kũringana na ũrĩa rĩĩtwa Aira a Jehova riugĩte. (Isa. 43:10-12) Nĩ tũrutĩte makĩria ma kobĩ milioni 240 cia Bibilia ya New World Translation of the Holy Scriptures, ĩrĩa ĩhũthagĩra rĩĩtwa rĩa Jehova kũrĩa guothe rĩeheretio nĩ ataũri angĩ a Bibilia. Ningĩ nĩ tũrutaga mabuku maragĩrĩria Bibilia na makĩria ma thiomi 1,000, na mabuku macio nĩ mahũthagĩra rĩĩtwa rĩa Jehova.
NĨ TWENDETE MA
11. Akristiano a karine ya mbere moonanirie atĩa atĩ nĩ meendete ũhoro wa ma?
11 Jesu nĩ eendete ma, na ũguo nĩ kuuga ma ĩgiĩ Ngai na mĩoroto yake. Ũtũũro wa Jesu nĩ woonanagia atĩ nĩ eetĩkĩtie ũhoro wa ma, na nĩ aaũmenyithanagia kũrĩ andũ arĩa angĩ. (Joh. 18:37) Arũmĩrĩri a Jesu o nao nĩ mendete ma kuuma ngoro. (Joh. 4:23, 24) Mũtũmwo Petero aaugire atĩ Ũkristiano nĩ “njĩra ya ũhoro ũrĩa wa ma.” (2 Pet. 2:2) Tondũ nĩ meendete ũhoro wa ma mũno, Akristiano a tene nĩ maareganaga na morutani ma kĩĩndini, ũndũire, na mawoni ma andũ marĩa mataatwaranaga na ũhoro wa ma. (Kol. 2:8) O na ũmũthĩ, Akristiano a ma nĩ merutanagĩria ‘gũthiĩ kũringana na ũhoro ũrĩa wa ma,’ na njĩra ya gũtigĩrĩra atĩ maũndũ marĩa mothe metĩkĩtie na marĩa mekaga ũtũũro-inĩ nĩ maratwarana na Kiugo kĩa Jehova.—3 Joh. 3, 4.
12. Gũthiaga atĩa rĩrĩa Kĩama Kĩrĩa Gĩtongoragia kĩamenya atĩ nĩ tũrabatara gwĩka mogarũrũku harĩ ũndũ mũna twĩtĩkĩtie? Twĩkaga mogarũrũku ta macio nĩkĩ?
12 Aira a Jehova matiugaga atĩ nĩ makoragwo mataũkĩirũo nĩ maũndũ mothe marĩ thĩinĩ wa Bibilia. Kũrĩ hĩndĩ manahĩtia magĩtaarĩria morutani mana thĩinĩ wa Bibilia kana makĩbanga maũndũ thĩinĩ wa kĩũngano. Ũndũ ũcio ndwagĩrĩirũo gũtũmakia. Maandĩko monanagia wega atĩ ũmenyo ũrĩa wa ma ũthiaga ũkĩongererekaga o ũrĩa mahinda marathiĩ. (Kol. 1:9, 10) Jehova aguũragia ũhoro wa ma o kahora na nĩ twagĩrĩirũo gweterera tũrĩ na ũkirĩrĩria nginya tũtaũkĩrũo biũ nĩ ũhoro wa ma. (Thim. 4:18) Rĩrĩa Kĩama Kĩrĩa Gĩtongoragia kĩamenya atĩ ũtaũku mũna tũrarĩ naguo nĩ ũrabatara gũcenjio, nĩ mekaga mogarũrũku marĩa marabatarania o na ihenya. Ndini nyingĩ ũmũthĩ ciĩkaga mogarũrũku harĩ morutani ma cio nĩguo ikenie arũmĩrĩri a cio, kana nĩguo ciĩtĩkĩrĩke nĩ andũ a thĩ ĩno, no Aira a Jehova mekaga mogarũrũku nĩguo makuhĩrĩrie Ngai na mamũthathaiye kũringana na kĩonereria kĩrĩa Jesu aatũigĩire. (Jak. 4:4) Tũticenjagia morutani maitũ atĩ tondũ mawoni ma andũ thĩinĩ wa thĩ nĩ macenjetie, no tũcenjagia tondũ wa gũtaũkĩrũo wega nĩ Maandĩko. Nĩ twendete ũhoro wa ma.—1 Thes. 2:3, 4.
NĨ TWENDANĨTE KUUMA NGORO
13. Ngumo ya bata ĩrĩa Akristiano a ma monanagia nĩ ĩrĩkũ? Aira a Jehova mamĩonanagia atĩa?
13 Akristiano a karine ya mbere nĩ mooĩkaine nĩ ũndũ wa gũkorũo na ngumo nyingĩ njega, no ngumo ĩrĩa mooĩkaine nayo mũno nĩ wendo. Jesu aaugire ũũ: “Nĩ ũndũ ũcio andũ othe nĩ marĩmenyaga atĩ mũrĩ arutwo akwa—mwakorũo na wendo gatagatĩ-inĩ kanyu.” (Joh. 13:34, 35) Mahinda-inĩ maya, Aira a Jehova nĩ makoragwo na wendo na ũrũmwe thĩinĩ wa thĩ yothe. Tũkoragwo tũrĩ ngũrani na ndini iria ingĩ ciothe, tondũ tũikaranagia ta andũ a famĩlĩ o na gũtuĩka tuumĩte mabũrũri na ũndũire-inĩ ngũrani. Nĩ twĩyonagĩra wendo ũcio wa ma rĩrĩa tũrĩ mĩcemanio-inĩ na igomano-inĩ. Ũndũ ũcio nĩ ũtũteithagia gwĩtĩkia biũ atĩ njĩra ĩrĩa tũthathayagia nayo nĩyo ĩtĩkĩrĩkĩte nĩ Jehova.
14. Kũringana na Akolosai 3:12-14, njĩra ĩmwe ya bata tũngĩonania wendo mũnene nayo nĩ ĩrĩkũ?
14 Maandĩko matwĩkĩraga ngoro tũkoragwo na “wendo mũnene harĩ mũndũ na ũrĩa ũngĩ.” (1 Pet. 4:8) Njĩra ĩmwe tũngĩonania wendo ta ũcio, nĩ kuohanagĩra na gũkiranagĩrĩria mũndũ na ũrĩa ũngĩ. Ningĩ nĩ tũcaragia mĩeke ya kuonia andũ othe thĩinĩ wa kĩũngano ũtaana o na arĩa mangĩkorũo matũhĩtĩirie. (Thoma Akolosai 3:12-14.) Rĩrĩa twakorũo na wendo ta ũcio, nĩ tuonanagia atĩ nĩ ithuĩ Akristiano a ma.
“WĨTĨKIO ŨMWE”
15. Nĩ njĩra irĩkũ ingĩ tũrũmagĩrĩra nacio kĩonereria kĩa Akristiano a karine ya mbere?
15 Nĩ harĩ njĩra ingĩ tũrũmagĩrĩra nacio kĩonereria kĩa ũthathaiya kĩa Akristiano a karine ya mbere. Kwa ngerekano, ithondeka-inĩ ritũ nĩ gũkoragwo andũ matungataga marĩ arori a mũthiũrũrũko, athuri a kĩũngano, na ndungata cia kĩũngano, na ũguo noguo kwarĩ hĩndĩ ya Akristiano a karine ya mbere. (Afil. 1:1; Tit. 1:5) Na tũkĩrũmĩrĩra kĩonereria kĩa Akristiano acio, nĩ tũtĩĩte mawatho ma Jehova megiĩ ngomanio na kĩhiko, ũrĩa Ngai augaga igũrũ rĩgiĩ ũhũthĩri wa thakame, na nĩ tũgitagĩra kĩũngano kuumana na andũ arĩa matarenda kũrũmĩrĩra mawatho ma Ngai.—Atũm. 15:28, 29; 1 Kor. 5:11-13; 6:9, 10; Ahib. 13:4.
16. Ciugo iria irĩ thĩinĩ wa Aefeso 4:4-6 iratũruta ũndũ ũrĩkũ?
16 Jesu aaugire atĩ andũ aingĩ nĩ mangĩkoiga atĩ nĩ arutwo ake, no ti othe mangĩgaakorũo marĩ arutwo ake kũna. (Mat. 7:21-23) Maandĩko ningĩ maugĩte atĩ matukũ-inĩ ma kũrigĩrĩria, andũ aingĩ mangĩgaakorũo makĩoneka “ta marĩ na wĩyamũrĩri Ngai” no tiguo kũrĩ. (2 Tim. 3:1, 5) Ĩndĩ Bibilia ĩtwĩraga wega atĩ no “wĩtĩkio ũmwe” tu ũkoragwo wĩtĩkĩrĩkĩte nĩ Ngai.—Thoma Aefeso 4:4-6.
17. Ũmũthĩ nĩa marũmagĩrĩra Jesu na magakorũo na wĩtĩkio ũrĩa wa ma?
17 Ũmũthĩ nĩa makoragwo makĩrũmĩrĩra wĩtĩkio ũcio ũmwe wa ma? Maũndũ marĩa tweruta no matũteithie kũmenya. Nĩ tuona kĩonereria kĩa ũthathaiya kĩrĩa Jesu aaigire, kĩrĩa kĩarũmagĩrĩrũo nĩ Akristiano a karine ya mbere. Aira a Jehova no o tu marũmagĩrĩra kĩonereria kĩu. Na githĩ ti gĩtĩo kĩnene gũkorũo tũrĩ andũ a Jehova na kũmenya ũhoro wa ma ũmwĩgiĩ na wĩgiĩ mĩoroto yake? Rekei tũthiĩ na mbere gwĩtĩkia biũ atĩ tũrĩ thĩinĩ wa ũhoro wa ma.
RWĨMBO NA. 3 Ngai nĩ Mwĩhoko na Hinya Witũ
^ kĩb. 5 Thĩinĩ wa gĩcunjĩ gĩkĩ nĩ tũkwarĩrĩria kĩonereria kĩrĩa Jesu aatigire aiga kĩgiĩ ũthathaiya wa ma na tuone ũrĩa Akristiano a tene maarũmĩrĩire kĩonereria kĩu. Ningĩ nĩ tũkwarĩrĩria maũndũ marĩa maronania atĩ Aira a Jehova nĩ marũmagĩrĩra kĩonereria kĩu kĩa ũthathaiya wa ma mahinda-inĩ maya.
^ kĩb. 9 Rora gathandũkũ “Je, Wakristo wa Karne ya Kwanza Walitumia Jina la Mungu?” thĩinĩ wa Mnara wa Mlinzi wa Julaĩ 1, 2010, kar. 6.
^ kĩb. 10 Kwa ngerekano, mwaka wa 2008, mũtongoria wa ndini ya Gatoreki, Pope Benedict XVI, aaugire atĩ rĩĩtwa rĩa Ngai rĩtigacoke kũhũthĩrũo kana gũtamũkwo thĩinĩ wa ũthathaiya wa ndini ya Gatoreki, nyĩmbo-inĩ kana mahoya-inĩ.
^ kĩb. 63 GŨTAARĨRIA MBICA: Ithondeka rĩa Jehova nĩ rĩrutĩte Bibilia ya New World Translation na thiomi makĩria ma 200 nĩguo andũ mahote gwĩthomera Bibilia ĩyo na rũthiomi rwao, ĩrĩa ĩkoragwo ĩhũthĩrĩte rĩĩtwa rĩa Ngai.
