1. Omolwashike ovanhu vahapu va ngwangwana?

OKU na omalongelokalunga mahapu, oo hae liti kutya oopaKriste notaa longele Kalunga monghedi oyo a hokwa. Nomolwaasho ovanhu vahapu va ngwangwana. Ohava pula tava ti: “Mbela oku na elongelokalunga limwe lashili, ile omalongelokalunga aeshe okwa hokiwa kuKalunga?” Tu li Eendombwedi daJehova, mbela otwa tomhwa ngoo kutya osho hatu hongo oshoshili, nonokutya onghedi omo hatu longele Jehova oyo aike onghedi oyo tai mu hafifa? Mbela otashi shiiva ngoo okukala twa tomhwa kwaasho? Natu ka kundafaneni oumbangi umwe.

2. Metwokumwe no 1 Ovatessalonika 1:5, omolwashike omuyapostoli Paulus a li a tomhwa kutya okwa mona oshili?

² Omuyapostoli Paulus okwa li a tomhwa filufilu kutya okwa mona oshili. (Lesha 1 Ovatessalonika 1:5.) Okutomhwa kwa tya ngaho, kakwa li kwa kanghamena komaliudo. Ponhele yaasho, Paulus okwa li ha konakona noukeka Eendjovo daKalunga. Okwa li a itavela kutya “omishangwa adishe oda nwefwa mo kuKalunga.” (2 Tim. 3:16) Okwa li e lihonga shike eshi e di konakona? Paulus okwe lihonga mOmishangwa oumbangi uhe shii okupatanekwa, oo kutya Jesus oye Messias omuudanekwa, oumbangi oo ovawiliki velongelokalunga lOshijuda va li inava dimina. Ovawiliki ovo ovanaihelele ohave liti kutya ove lile po Kalunga, ndele ohava ningi oinima oyo Kalunga e tonde. (Titus 1:16) Paulus ka li a fa ovalumenhu ovo, molwaashi okwa li a itavela Eendjovo adishe daKalunga nokwa li ha dulika kudo. Okwa li a tokola okuhonga nokutula moilonga “elalakano laKalunga alishe.” — Oil. 20:27.

3. Mbela otwa pumbwa okumona omanyamukulo omapulo etu aeshe, opo tu tomhwe kutya otwa mona oshili? (Tala yo oshimhungu “ Eemhangela daJehova noilonga yaye ‘oihapu, itai dulu okuvalwa.’”)

³ Ovanhu vamwe ohava diladila kutya elongelokalunga lashili  otali dulu okunyamukula epulo keshe, nokuli nomapulo, oo inaa nyamukulwa kondadalunde mOmbiibeli. Mbela otwa pumbwa okukala tu na etaleko la tya ngaho? Natu ka taleni koshihopaenenwa shaPaulus. Okwa li a ladipika ovaitaveli vakwao va ‘konakone oinima aishe,’ ashike okwa li yo a dimina kutya ope na oinima ihapu oyo a li ehe udite ko. (1 Tes. 5:21) Okwa shanga a ti kutya ‘eshiivo letu inali lixwa po.’ Okwa weda ko a ti: “Otwa fa hatu litalele mesipili la fiilila.” (1 Kor. 13:9, 12) Paulus ka li e udite ko keshe shimwe, nafye osho tu li ngaho. Ashike Paulus okwa li e udite ko omahovelohongo oshili e na sha nomalalakano aJehova. Okwa li a tomhwa filufilu kutya okwa mona oshili.

4. Ongahelipi hatu dulu okukala twa tomhwa filufilu kutya otwa mona oshili, noshike hatu ka kundafana shi na sha nOvakriste vashili?

⁴ Onghedi imwe omo hatu dulu okukala twa tomhwa filufilu kutya otwa mona oshili, omokuyelekanifa onghedi yokulongela Kalunga oyo ya tulwa po kuJesus naayo Eendombwedi daJehova hadi longifa kunena. Moshitukulwa eshi, ohatu ka mona kutya Ovakriste vashili (1) ihava longifa oihongwafano, (2) ohava fimaneke edina laJehova (3) ove hole oshili (4) nove holafane tashi di komutima.

5. Oshike hatu lihongo kuJesus shi na sha nonghedi ya yuka yokulongela Kalunga, nongahelipi hatu dulu okutula moilonga osho a honga?

⁵ Molwaashi Jesus oku hole Kalunga neenghono, okwa li he mu longele oye aeke, kutya nee osheshi a li meulu, ile okombada yedu. (Luk. 4:8) Okwa honga ovahongwa vaye va ninge sha faafana. Jesus novahongwa vaye ovadiinini kava li hava longifa oihongwafano. Molwaashi Kalunga iha monika, ovanhu itava dulu okuninga oshinima shonhumba she mu fa, osho shi mu lile po. (Jes. 46:5) Ndele ongahelipi shi na sha nokuninga oihongwafano, oyo ya talika ko iyapuki nohai ilikanwa kovanhu? Jehova okwa popya  moshipango oshitivali shomOipango Omulongo, a ti: “Ino lihongela oshihongwafano, ile efano laashi shi li pombada meulu, ile laashi shi li poshi kombada yedu. Ino linyongamena moipafi yayo.” (Ex. 20:4, 5) Eendjovo odo oda yela filufilu kwaava va halelela okuhafifa Kalunga.

6. Eendombwedi daJehova ohadi shikula onghedi ilipi yokulongela Kalunga kunena?

⁶ Ovanandjokonona ova popya kutya pefimbo lovayapostoli ovanhu ova li ashike hava longele Kalunga oye aeke. Pashihopaenenwa, embo History of the Christian Church ola popya kutya Ovakriste votete “ova li hava tila” okulongifa oihongwafano meenhele delongelokalunga lavo. Kunena, Eendombwedi Jehova ohadi shikula onghedi yelongelokalunga, oyo ya tulwa po kOvakriste vopefimbo lovayapostoli vaJesus. Ihatu ilikana koihongwafano “yovanhu ovo va talika ko vayapuki,” ile ovaengeli. Ihatu ilikana nokuli nokuJesus. Ihatu shalutile epandela, ile okulinyongamena epangelo monghedi keshe. Nonande vamwe ove tu ningife tu ninge oinima yonhumba, ohatu kala twa tokola toko okudulika keendjovo daJesus, odo tadi ti: “Jehova Kalunga koye oye aeke u na okulinyongamena.” — Mat. 4:10.

7. Omeenghedi dilipi Eendombwedi daJehova da yooloka ko filufilu komalongelokalunga makwao?

⁷ Kunena, ovanhu ove hole okupwilikina kovawiliki vomalongelokalunga, ovo ve shiivike apeshe. Ova lenga neenghono ovanhu va tya ngaho, fiyo nokuli oposhitwa opo tava dulu okulinyongamena kuvo. Ovanhu vahapu ohava i keengeleka dovanhu ovo, hava lande omambo avo nohave va pe oimaliwa ihapu, opo ve va yambidide. Ovanhu vamwe ohava itavele keshe osho ovafita ovo tava popi. Ovanhu ovo hava i keengeleka da tya ngaho, ohava kala va tunhukwa neenghono okumona ovawiliki ovo va fa ngeno ve wete Jesus. Mepingafano naasho, ovalongeli vashili vaJehova kave na ovafita. Nonande ohatu fimaneke ovo tava kwatele komesho, ohatu dulika kehongo la yela laJesus, olo tali ti: “Amushe ovamwainafana.” (Mat. 23:8-10) Ihatu longele ovanhu, ile ovawiliki vomalongelokalunga, ile ovapangeli vopapolotika. Ihatu yambidida yo omalalakano avo opalongelokalunga, ile opapolotika. Ponhele yaasho, katu na olwaamambinga notwa yooloka ko kounyuni ou. Onghee hano, otwa yooloka ko filufilu komalongelokalunga aeshe, oo hae liti kutya oopaKriste. — Joh. 18:36.

8. Otu shi shii ngahelipi kutya Jehova okwa hala tu fimaneke edina laye noku li shiivifila keshe umwe?

⁸ Pomhito imwe, Jesus okwa li a ilikana ta ti: “Tate, fimanekifa edina loye.” Jehova okwa li a nyamukula eilikano olo nondaka ya dja meulu, a udaneka kutya ota ka fimanekifa edina laye. (Joh. 12:28) Jesus okwa li a fimanekifa edina laXe okupitila moukalele waye. (Joh. 17:26) Onghee hano, Ovakriste vashili ove shi tala ko shi li oufembanghenda okulongifa edina laKalunga noku li shiivifa kuvamwe.

9. Ongahelipi Ovakriste vopefimbo lovayapostoli vaJesus va li va ulika kutya ova fimaneka edina laKalunga?

⁹ Mefelemudo lotete O.P., diva konima eshi eongalo lopaKriste la totwa po, Jehova okwa li a “dimbuluka ovanhu vomoiwana imwe nanghee a hovela okuhoolola mokati kavo ovo tava ka ifanwa nedina laye.” (Oil. 15:14) Ovakriste ovo vopefimbo lovayapostoli vaJesus ova li ve udite etumba, eshi tava longifa edina laKalunga noku li shiivifa kuvamwe. Ova li hava longifa edina laKalunga moukalele wavo nongeenge tava shange omambo Ombiibeli. * Ova li va ulika kutya ove li oshiwana osho sha lukilwa edina laKalunga. — Oil. 2:14, 21.

10. Oumbangi ulipi tau ulike kutya Eendombwedi daJehova odo ashike hadi shiivifa edina laJehova?

¹⁰ Mbela Eendombwedi daJehova odo ashike  di lile po edina laJehova? Natu ka taleni koumbangi umwe. Kunena, ovawiliki vomalongelokalunga vahapu ohava ningi ngaashi tava dulu, opo va holeke oushili oo kutya Kalunga oku na edina. Ove li kufa mo momatoloko Eembiibeli davo, nopeemhito dimwe ova shilika, opo edina la tya ngaho liha longifwe mo momalongelokalunga avo. * Osha yela kutya Eendombwedi daJehova odo ashike da lenga nohadi fimaneke edina laye. Ohatu kwafele ovanhu va shiive edina laKalunga tu dulife omalongelokalunga aeshe. Kungaho, ohatu ningi ngaashi hatu dulu, opo tu kale metwokumwe nedina letu, tu li Eendombwedi daJehova. (Jes. 43:10-12) Otwa nyanyangida eekopi di dulife peemiliyona 240 dOmbiibeli yo-New World Translation of the Holy Scriptures, oyo ya longifa edina laJehova peenhele opo la li la kufwa po kovatoloki vamwe vOmbiibeli. Otwa nyanyangida yo oishangomwa ya kanghamena kOmbiibeli oyo hai longifa edina Jehova momalaka e dulife 1 000.

11. Ovakriste votete ova ulika ngahelipi kutya ove hole oshili?

¹¹ Jesus oku hole oshili, sha hala kutya, oshili kombinga yaKalunga nosho yo omalalakano aYe. Jesus okwa kala metwokumwe noshili nokwe i shiivifila yo vamwe. (Joh. 18:37) Ovashikuli vashili vaJesus navo ove hole neenghono oshili. (Joh. 4:23, 24) Omuyapostoli Petrus okwa ifana eitavelo lOvakriste kutya oli li ‘oshili.’ (2 Pet. 2:2) Molwaashi Ovakriste votete ova  li ve hole neenghono oshili, ova li va henuka omaetepo omalongelokalunga, eenghulunghedi nosho yo omadiladilo opanhu, oo ehe li metwokumwe noshili. (Kol. 2:8) Sha faafana, nokunena Ovakriste vashili ohava kendabala ‘okutwikila oku i diinina,’ eshi hava kanghamekele omahongo avo aeshe nosho yo onghedi yavo yokukalamwenyo metwokumwe nEendjovo daJehova. — 3 Joh. 3, 4.

12. Oshike hashi ningwa po, ngeenge ovo tava kwatele komesho ova didilike kutya eudeko letu ola pumbwa okupepalekwa, nomolwashike hava katuka onghatu oyo?

¹² Oshiwana shaKalunga ihashi liti kutya oshi udite ko filufilu keshe shimwe mOmbiibeli. Peemhito dimwe, ova ninga omapuko monghedi omo va yelifa omahongo amwe Ombiibeli, ile monghedi omo va unganeka eongalo. Osho kashi na oku tu kumwifa. Omishangwa ode shi yelifa nawa kutya eshiivo lashili ohali ende tali hapupala. (Kol. 1:9, 10) Jehova oha ende ta holola oshili kanini nakanini. Onghee hano, otu na okukala hatu teelele nelididimiko fiyo osheshi ouyelele wa hapupala. (Omayel. 4:18) Ngeenge ovo tava kwatele komesho ova didilike kutya eudeko letu ola pumbwa okupepalekwa moshinima shonhumba, ihava ongaonga okuninga omalunduluko oo a pumbiwa. Kunena, omalongelokalunga mahapu ohaa lundulula omahongo ao, opo va wapalele oilyo yavo, ile opo va shiivike mounyuni aushe. Ashike Eendombwedi daJehova ohadi ningi omalunduluko, molwaashi oda hala okweehena popepi elela naKalunga noku mu longela monghedi ya yuka, oyo ya totwa po kuJesus. (Jak. 4:4) Ihatu ningi omalunduluko omolwomadiladilo ovanhu oo taa lunduluka, ndele omolwaashi twa mona eudeko la yela lopaMishangwa. Otu hole oshili. — 1 Tes. 2:3, 4.

13. Oukwatya wa fimanenena ulipi hau ulikwa kOvakriste vashili, nongahelipi Eendombwedi daJehova hadi ulike oukwatya oo kunena?

¹³ Ovakriste votete ova li ve shiivikile omaukwatya mahapu mawa, noukwatya wa fimanenena owa li ohole. Jesus okwa ti: “Kungaho, ovanhu aveshe otava ka shiiva kutya nye ovahongwa vange ngeenge omu holafane.” (Joh. 13:34, 35) Kunena, Eendombwedi daJehova mounyuni aushe odi holafane noda hangana. Otwa yooloka ko komalongelokalunga aeshe, molwaashi otu li oumwainafana, nonande otwa dja moilongo nosho yo momaputuko a yoolokafana. Ohatu ulikilafana ohole yashili pokwoongala, poyoongalele inini naayo ya kula. Oumbangi wa tya ngaho, ohau tu kwafele tu kale twa tomhwa filufilu kutya ohatu longele Jehova monghedi oyo a hokwa.

14. Metwokumwe nOvakolossi 3:12-14, omonghedi ilipi ya denga mbada omo hatu dulu okuulikilafana ohole tashi di komutima?

¹⁴ Omishangwa ode tu ladipika tu ‘kale tu holafane nohole yomoule.’ (1 Pet. 4:8) Onghedi imwe omo hatu dulu okuulika ohole ya tya ngaho, omokudiminafana po nosho yo mokulididimikilafana. Ohatu kongo yo eemhito, opo tu yandje sha nokukwafela aveshe meongalo, nokuli naavo ve tu udifa nai. (Lesha Ovakolossi 3:12-14.) Ngeenge otwa ulike ohole ya tya ngaho, ohatu ka ulika kutya fye Ovakriste vashili.

15. Omeenghedi vali dimwe dilipi hatu shikula onghedi yelongelokalunga, oyo ya totwa po kOvakriste vopefimbo lovayapostoli vaJesus?

¹⁵ Ohatu shikula onghedi yelongelokalunga, oyo ya totwa po meongalo lopaKriste pefimbo lovayapostoli vaJesus meenghedi dimwe vali. Pashihopaenenwa, otwa unganekwa monghedi ya faafana neongalo olo. Otu na ovapashukili ovaendi, ovakulunhuongalo novayakuliongalo, ngaashi ashike navo va li va unganekwa. (Fil. 1:1; Tit. 1:5) Etaleko letu li na sha nomilele nosho yo ohombo, okufimaneka omufika wetu wokuhatulwa ohonde, nokukala twa halelela okwaamena eongalo kovanyoni, ovo inava hala okulivela ombedi, aishe oya kanghamena  konghedi oyo ya totwa po kOvakriste ovo. — Oil. 15:28, 29; 1 Kor. 5:11-13; 6:9, 10; Heb. 13:4.

16. Oshike hatu lihongo mOvaefeso 4:4-6?

¹⁶ Jesus okwa popya kutya vahapu otava ka tya kutya ovahongwa vaye, ashike haaveshe tava ka kala ve li ovahongwa vaye vashili. (Mat. 7:21-23) Omishangwa ode tu lombwela yo kutya momafiku axuuninwa, vahapu otave ke “limonikifa va fa ovatilikalunga.” (2 Tim. 3:1, 5) Ndele Ombiibeli oye tu yelifila nawa kutya oku na ashike “eitavelo limwe,” olo la hokiwa kuKalunga. — Lesha Ovaefeso 4:4-6.

17. Oolyelye kunena hava shikula Jesus nohava kufa ombinga meitavelo lashili?

¹⁷ Oolyelye kunena hava kufa ombinga meitavelo lashili? Otwa mona oumbangi. Otwa kundafana shi na sha nonghedi yokulongelakalunga, oyo Jesus a honga nosho yo oyo Ovakriste vopefimbo lovayapostoli vaye va li hava kufa ombinga muyo. Enyamukulo, Eendombwedi daJehova. Kashi fi tuu oufembanghenda okukala tu li oshiwana shaJehova notu shii oshili kombinga yaye nomalalakano aye! Onghee hano, natu twikileni okuninga ngaashi hatu dulu tu diinine oshili nokukala twa tomhwa filufilu.