1. Mukonda dyahi athu avulu ala ni phata?

KWENE jingeleja javulu jamba kwila ene Jikidistá ni kwila amubheza Nzambi mu ukexilu umusangulukisa. Majiphe se kyene mukonda dyahi athu avulu ala ni phata? Ene adibhwidisa: “O kwila sayiku ngeleja imoxi yakidi, mba o kwila o jingeleja joso jisangulukisa Nzambi?” O kwila tuxikina ni kidi kyoso kwila etu tu Jimbangi ja Jihova tulonga o kidi ni kwila o ukexilu wetu wakubheza wene ngó usangulukisa Jihova? O kwila sayi mwene ima ituxikinisa? Tumone o ima ituxikinisa.

2. Kala kilondekesa o mukanda 1 Tesalonika 1:5, mukonda dyahi poxolo Phawulu waxikinine kwila wasangele o kidi?

² Poxolo Phawulu waxikinine ni kidi kyoso kwila wasangele o kidi. (Tanga 1 Tesalonika 1:5.) Mwene kaxikinine ngó mukonda o kidi kyexile kubhangesa kudivwa kyambote mba kumusangulukisa. Muveji dya kiki, Phawulu wexile mutokwesa kyambote o Maka a Nzambi. Mwene waxikinine ni kidi kyoso kwila o “Mikanda yoso [Nzambi wa] ibhusu.” (2 Tim. 3:16) Ihi yadilongo mwene? Poxolo Phawulu wasangele milongi mu Mikanda Ikola ilondekesa kwila Jezú mwene o Mexiya amukanene, sumbala o atwameni a Jijudé kasolele kumusuwa. Exile mukwamba kwila amulonga o kidi kyalungu ni Nzambi maji ene exile mubhanga ima yazembe Nzambi. (Titu 1:16) Phawulu kadifwile ni ene, mukonda mwene kexile musola se mbandu yebhi ya Maka a Nzambi yeji xikina mwene. Mwene wexile polondo phala kulonga ni kukumbidila “o mutendelu woso wa Nzambi.”—Ika. 20:27.

3. O kwila etu twatokala kutambwijila o ibhwidisu yetu yoso phala kuxikina kwila etu twasange o kidi? (Tala we o kaxa “ O Ikalakalu ni Ixinganeku ya Jihova—‘Ki kwala muthu u tena ku [i] kwata konda.’”)

 ³ Sayi ya axinganeka kwila o ngeleja yakidi yatokala kutambwijila o ibhwidisu yoso, kate yóyo o Bibidya ka itambwijila. O kwila kiki kyabhingi mwene? Tala o phangu ya poxolo Phawulu. Mwene wambe ku akayedi ni akwa: “Tungulenu jinga o ima yoso.” Maji mwene waxikina kwila sayi ima yavulu mwene kexile mu itendela. (1 Tes. 5:21) Mwene wasoneka: “Twejiya ngó mbandu,” yu wabandekesaku dingi: “Ki twal’iki tu mwena mu lumwenu lwa fefetela.” (1 Kol. 13:9, 12) Phawulu katendela o ima yoso, etu we kyene kimoxi. Maji Phawulu wejidile yoso yalungu ni vondadi ya Jihova. Mwene wejidile o ima yatokalele kwijiya phala kudixikinisa kwila mwene wasangele o kidi!

4. Kyebhi kitutena kukolesa o kixikanu kyetu kya kwila twasange o kidi ni ihi itwandazwela yalungu ni Jikidistá jakidi?

⁴ O ukexilu umoxi wa kukolesa o kixikanu kyetu kya kwila etu twasange o kidi, o kusokesa o phangu ya ubhezelu waxisa Jezú ni ima ibhanga o Jimbangi ja Jihova lelu. Mumilongi yiyi twandamona kwila o Jikidistá jakidi (1) adituna o ubhezelu wa iteka, (2) axila o dijina dya Jihova, (3) azolo o kidi, ni kwila (4) adizolo mudya ni kufulujuka kwoso.

5. Ihi itwadilongo kwa Jezú ni ukexilu watokala wakubheza Nzambi, ni kyebhi kitutena kukumbidila o ilongesu yê?

⁵ Mukonda dya henda yadikota kwa Nzambi, Jezú wabhezele ngó Jihova kikale kyoso kyexile kudyulu ni kyoso kyexile mu ixi. (Luka 4:8) Mwene walongo o maxibulu mê phala kubheza ngó Jihova. Ne Jezú ne akayedyê kabhezele iteka. Kuma Nzambi nzumbi, seku muthu utena kubhanga kima  kyosokyoso kidifwangana ni mwene! (Iza. 46:5) Maji ihi itwamba yalungu ni iteka a ixana jisandu ni kujisambela? Mudikwinyi dya itumu, mukitumu kya kayadi, Jihova wambele: “Kana ku di yudikila kiteka kyósonge, né kidifwanganu kyoso kya kima ki kala mu dyulu ku thandu, mba mu ngongo bhoxi . . . Kana ku ifukamena, kana ku ibheza.” (Mak. 20:4, 5) O yó amesena kusangulukisa Nzambi atendela kwila, mwene kamesena kuma etu tubheza iteka.

6. Phangu yebhi ya ubhezelu yamukayela o Jimbangi ja Jihova lelu?

⁶ Sayi muthu wadilongo o misoso ya jipoxolo wambe kwila mu hama yadyanga, o Jikidistá exile mubheza ngó Nzambi. Mukifika, sayi divulu dya misoso dyambe we kwila o Jikidistá jadyanga “azembele o kixinganeku kyakuta kitena mu kididi kya ubhezelu.” Lelu o Jimbangi ja Jihova amukayela o phangu ya axila o Jikidistá jadyanga. Etu kitusambela “jisandu” mba jianju; kate mwene Jezú kitumusambela. Etu kitwene mubheza dibandela mba kubhanga kima kyosokyoso kilondekesa kubheza jinguvulu mba ixi yetu. Kiza kikize, etu twala polondo phala kubelesela o izwelu yiyi ya Jezú: “Mu kubheza kikale ubheza Jihova, Nzambi yé.”—Mat. 4:10.

7. Mu ukexilu webhi o Jimbangi ja Jihova kijidifu ni jingeleja jengi?

⁷ Lelu kwene athu avulu akayela o izwelu ya atwameni a jingeleja jâ. Ene adiwana kyavulu ni izwelu yawu katé mwene ela kala amwabheza. Athu avulu aya mu jingeleja, asumba madivulu mâ, asangela kitadi mukonda dya ima izwela o atwameni a jingeleja jâ. Ene axikina o ima yoso izwela o atwameni yâ. Ene adiwana kyavulu mukumona o atwameni a jingeleja jâ, ela mwene kya kala amumona Jezú pholo ni pholo! Maji o yó abheza Nzambi mu ukexilu watokala ene kakayela muthu. Sumbala etu tuxila yó atukala kupholo, maji tukayela o izwelu ya Jezú kyoso kyambe: “Enu oso mu jiphange.” (Mat. 23: 8-10) Etu kitwene mubheza athu, kikale se atwameni ajingelaja mba jinguvulu. Etu kitukwatekesa o ima yene mubhanga, kitudite mumaka mâ. Muveji dya kiki, tudisandula mu ima ya mundu. Mu ima yoso yiyi etu tuditungula, mu ibuka yavulu amba kwila ene Jikidistá.—Nzwá 18:36.

8. Kyebhi kitwejiya kwila Jihova wamesena kwila o dijina dyê adifumanese ni kudijidisa ku athu oso?

⁸ Sayi kithangana Jezú wasambe: “Tata, fumanesa o dijina dyé!” Jihova watambwijila o musambu tunde kudyulu yu wakanena kwila mwene weji fumanesa o dijina dyê. (Nzwá 12:28) Jezú bhukaxi ka ukunji wê wafumanesa o dijina dya Tat’ê. (Nzwá 17:26) Kyenyiki tutena kumona se mukonda dyahi o Jikidistá jakidi amona kala ujitu wadikota kwambata o dijina dya Nzambi ni kudijidisa ku athu engi.

9. Kyebhi o Jikidistá jadyanga kyalondekesa kwila ene exile muxila o dijina dya Nzambi?

⁹ Mu hama yadyanga K.K., kyoso kyamateka o kilunga kya Jikidistá, kikubhiti ithangana yavulu Jihova “o mu kaxi kâ yú wasolo kukatulamu o mundu wê wangene mu dijina dyê.” (Ika. 15:14) O Jikidistá jojo jadyanga, asangulukile mukwambata o dijina dya Nzambi ni kudijidisa ku athu engi. Poxolo Phawulu ni maxibulu akamukwa exile mutumbula o dijina dya Nzambi kyoso kyexile muboka ni kyoso kyasoneka o madivulu a Bibidya. * M’ukexilu yú ene alondekesa kwila ene ngó exile o kibuka kyexile mukwijidisa o dijina dya Nzambi ku athu oso.—Ika. 2:14, 21.

10. Ima yahi ilondekesa kwila o Jimbangi ja Jihova ene o mundu wambata o dijina dya Jihova?

 ¹⁰ O kwila o Jimbangi ja Jihova ene o mundu wambata o dijina dya Jihova? Tala ngó yene mubhita. Lelu, kwene atwameni avulu ajingeleja abhanga yoso ni yoso mukutena kwâ phala kusweka o kidi kya kwila Nzambi wala ni dijina. Ene akatula o dijina dya Nzambi mu Jibibidya jawu, sayi ithangana ene afidisa o athu kutumbula o dijina dya Nzambi mu jingeleja jâ. * O kwila sayi muthu utena kudituna kwila o Jimbangi ja Jihova ene ngó axila o dijina dya Jihova ni kudibhana o kijingu kyatokala? Etu twabetakota mukwijidisa o dijina dya Nzambi o jingeleja joso ndenge! Etu tubhanga yoso itutena phala o ibhangelu yetu ilunge ni dijina dyetu, dya kwila etu tu Jimbangi ja Jihova! (Iza. 43:10-12) Etu twabhange kya 240 ndenge amazunda a Jibibidya Tradução do Novo Mundo da Bíblia Sagrada, itumbula o dijina dya Jihova mu ididi yoso jokatule mu Jibibidya jengi. Twene mubhanga we madivulu alungu ni milongi ya Bibidya atumbula o dijina dya Jihova mu 1.000 amadimi ndenge!

11. Kyebhi o Jikidistá jadyanga kyalondekesa kwila ene azolele o kidi?

¹¹ Jezú wazolele o kidi, kifwa, o kidi kyalungu ni Nzambi ni vondadi yê. O ukexilu wamwenyu wa Jezú walondekesa kwila mwene  wejidile o kidi, yú wejidisa o kidi kiki ku athu engi. (Nzwá 18:37) O kayedi akidi a Jezú azolele we o kidi. (Nzwá 4:23, 24) Mukidi poxolo Phetele wexana o kixikanu kya Jikidistá kala o “Njila ya Kidi.” (2 Phe. 2:2) Mukonda dya kuzola kyavulu o kidi, o Jikidistá jadyanga, aditunine o kixinganeku kya kukayela o ijila, o ixinganeku ya athu ki yalungile ni kidi kya Mak’â Nzambi. (Kol. 2:8) Kyene kimoxi we lelu, o Jikidistá ja kidi abhanga yoso phala “kwenda izuwa yoso mu kidi” mukukayela yoso kala kiyala mu Bibidya ni kukala ni ukexilu wamwenyu kala kizwela Jihova.—3 Nzw. 3, 4.

12. Ihi ibhita kyoso o yó ala kupholo kyamona kwila o ukexilu wetu wakutendela o ima wabhingi ku ulungulula ni mukonda dyahi ene abhingi kubhanga kiki?

¹² Jimbangi ja Jihova ene kamba kwila ejiya o ima yoso yala mu Bibidya. Sayi ithangana ene atondala mu ukexilu wajimbulula milongi ya Bibidya mba m’ukexilu wasokejeka o ima mukilunga. Kiki kikyatokala kutubhangesa kudiwana. O Bibidya yambe kya kwila o athu ejitendela dingi kyambote o kidi kyoso kithangana kiya ni kubhita. (Kol. 1:9, 10) Jihova uya ni kujingunwina o kidi bhofelebhofele, etu twatokala kukala polondo phala kukingila ni mwanyu woso kate kitwanda tendela o kidi m’ukexilu wabetakota. (Jisa. 4:18) Kyoso yó ala kupholo kyamona kwila sayi kima twabhingi kukilungulula mu ukexilu ututendela o milongi, ene akibhanga se kulaleka. Jingeleja javulu lelu ene alungulula o milongi mukonda amesena kusangulukisa o athu mungeleja yawu mba amesena kudifumanesa kumundu. Maji o Jimbangi ja Jihova alungululula o ukexilu wakutendela mukonda ene amesena kuzukama dingi kwa Nzambi, ni kukayela o phangu ya ubhezelu waxisa Jezú. (Tiya. 4:4) Kyoso kitulungulula kima, etu kitukibhange mukonda o ixinganeku ya athu kumundu walunguluka, kana, maji mukonda twatendela dingi kyambote o Bibidya. Etu twazolo o kidi!—1 Tes. 2:3, 4.

13. Kidifwa kyebhi kyabetakota kyalondekesa o Jikidistá jakidi, ni kyebhi o Jimbangi ja Jihova kyalondekesa o kidifwa kiki lelu?

¹³ O Jikidistá jadyanga exile ni idifwa yavulu yambote, maji o kidifwa kyabetakota kyexile mulondekesa o henda. Jezú wambe: “Kyene kya m’ijidila ku athu oso, kuma mwala mu jixibulu jami, se mwa di zolo mu dyenu.” (Nzwá 13:34, 35) O Jimbangi ja Jihova kumundu woso amona o henda yiyi yakidi, ala ni muxima umoxi. Etu kitwadifu ni jingeleja jengi mukonda etu tumwiji umoxi, sumbala kitwatokala mu ixi imoxi, ni mu ijila imoxi. Tumona o kidi kiki muyônge yetu, muyôge ya ilunga ni muyônge yamakota. O ima yoso yiyi ituxikinisa ni kidi kyoso kwila o ukexilu wetu wakubheza wene usangulukisa Jihova.

14. Kala kilondekesa Kolose 3:12-14, webhi o ukexilu wabetakota ututena kulondekesa o henda yetu kwa akwetu?

¹⁴ O Bibidya ituswinisa, “o henda yenu mudyenu i fulujuke.” (1 Phe. 4:8) O ukexilu umoxi ututena kulondekesa o henda yiyi o kudiloloka ni kukamba kudikwatenena mukukamba kuyuka mudyetu. Etu tusota kithangana phala kuzalela o jiphange jetu mukilunga katé yó nange atuluwalesa mba atuxingi. (Tanga Kolose 3:12-14.) Kyoso kitulondekesa o henda kala yiyi etu twamulondekesa kwila tu Jikidistá jakidi.

15. Maukexilu ebhi dingi ututena kukayela o phangu ya ubhezelu watuxila o Jikidistá jadyanga?

¹⁵ Etu tukayela o phangu yambote yatuxila o Jikidistá mu hama yadyanga mu maukexilu  amukwa. Mukifika, etu twadisokejeka mu ukexilu umoxi kala o Jikidistá mu hama yadyanga, etu twala ni tufunga twa ilunga, tufunga, ni akwatekexi atufunga. (Fil. 1:1; Titu 1:5) Kala ene etu tuxila o kitumu kyalungu ni diyala ni muhatu, kukazala, ni ima yalungu ni kuta manyinga mu mukutu, ni kulanga o kilunga kwa yó kamesena kukayela o itumu ya Nzambi.—Ika. 15:28, 29; 1 Kol. 5:11-13; 6:9, 10; Jihe. 13:4.

16. Ihi itudilonga ni izwelu itusanga Efezu 4:4-6?

¹⁶ Jezú wambe kwila avulu ejikwamba kuma maxibulu mê, maji athu ofele ngó ejilondekesa o henda yakidi. (Mat. 7:21-23) O Bibidya yatudimuna kya kwila mu izuwa yasukidilaku athu “ku kanga a kwata kidifwa kala kya kuxila Nzambi.” (2 Tim. 3:1, 5) Maji, o Bibidya itutangela kwila kwene ngó “kixikanu kimoxi” kisangulukisa Nzambi.—Tanga Efezu 4:4-6.

17. Ananyi amukayela Jezú lelu ni kukumbidila o ima yamudilonga?

¹⁷ Lelu ananyi amukumbidila o ima yamudilonga? Etu twadilongo o ima yene mubhita lelu. Twamono o ukexilu wakubheza kala kyalongo Jezú, ni kyebhi o Jikidistá mu hama yadyanga akumbidila o ukexilu yú wakubheza. O Jimbangi ja Jihova ene amubheza Nzambi mu ukexilu watokala. Ujitu wadikota kubhanga mbandu kumundu wa Jihova ni kwijiya o kidi kyalungu ni Jihova ni vondadi yê! Kyenyiki, twamesena kubhanga yoso itutena phala kukwata o kidi ni maku ayadi ni kukolesa o kixikanu kyetu.