1. Samu na yinki bantu mingi ke zabá ve na wapi dibuundu kukwenda?

BUBU yayi mabuundu mingi ke zonzá ti ba ke bakristo mpe ti ba ke sambilá Nzambi na faso ya mbote. Ni na yawu, bantu mingi zaba ve kote ya kukwenda. Bantu ya nkaka ke yufulá: “ Nzambi ke ndimá kwandi mabuundu nyonso, to kaka dibuundu mosi?” Nge ke ndimá na ntima ya nge nyonso ti Batemwe ya Yehova ke longá matsyeleka mpe kaka ni bawu ke sambilá Yehova na faso ya mbote? Beto lenda zaba kwandi yawu? Beto tala yinki ke na lakisá ti kaka Batemwe ya Yehova ke sambilá Nzambi na faso ya mbote.

2. Faso me zonza 1 Batesalonika 1:5, samu na yinki Paul zabá ti bamambu yina yandi vandá ndimá vandá matsyeleka?

² Apotre Paul vandá ndima na ntima ya yandi nyonso ti yandi kuzwá matseleka. (Tanga 1 Batesalonika 1:5.) Kiminu ya yandi vandá ve ya zulu-zulu. Yandi vandá baká ntangu na kulongoka mambu ya Nzambi. Yandi zabá ti ‘bisono nyonso katuká na Nzambi.’ (2 Tim. 3:16) Bamambu yina yandi longoká sadisak’ yandi na kuzaba yinki? Paul kuzwá bamambu yina lakisá pwelele ti Yesu vandá Masiya yina Nzambi pesá promese, yina bamfumu ya dibuundu ya bajwife mangá kundima. Bamfumu yina vandá zonzá ti ba vandá bantu ya Nzambi. Kasi ba vandá salá mambu yina Nzambi ke niminá. (Tite 1:16) Paul vandá ve faso bawu. Yandi vandá solá ve mambu ya Nzambi yina yandi ke sadila mpe yina yandi ke manga kusadila. Yandi vandá longá mpe vandá sadila ‘mambu nyonso yina Nzambi me zola kusala.’—Bis. 20:27.

3. Beto zolá zaba kwandi bamambu nyonso samu na kundima ti beto ke na matsyeleka? (Tala enkadre “ Bamambu yina Yehova ke salá mpe makanisi ya yandi ke ‘mingi kuluta yina munu lenda zonzila.’”)

 ³ Bantu ya nkaka ke kanisá ti dibuundu ya tsyeleka zolá zaba bamambu nyonso, ata bamambu yina Biblia ke zonzilá ve. Ya ke kwandi faso ya mbote ya kukanisa? Beto zonzila kifwani ya apotre Paul. Yandi zonzá na bampangi ya yandi bakristo na “[kutala] mbote mambu nyonso.” Kasi yandi ndimá mpe ti ya vandá na bima yina yandi vandá zaba ve. (1 Tes. 5:21) Yandi soniká: “Luzabu ya beto [ke] ya kulunga ve.” Mpe yandi bwelá: “Mambu yina beto ke na [kutalá ke] mutindu kizizi yina ke na kutalana mbote ve na kitala-tala.” (1 Ko. 13:9, 12) Paul zabá ve bamambu nyonso. Beto mpe. Kasi, ndambu ya bamambu yina yandi zaba vandá ya kulunga samu na kunata yandi na kundima ti yandi kuzwá matsyeleka.

4. Wa’ faso beto lenda kulisa kimimu ya beto ti beto me kuzwa matsyeleka, mpe yinki beto ke zonzila samu na bakristo ya tsyeleka?

⁴ Mosi ya bafaso ya kukulisa kiminu ya beto ti beto me kuzwa matsyeleka, ke ya kutala si faso ya kusambila yina Yesu biká, ke mutindu mosi na faso yina Batemwe ya Yehova ke sambilá Yehova bubu yayi. Na artikle yayi, beto ke tala ti bakristo ya tsyeleka ke 1) mangá kusambila biteki, bizizi mpe bantu, 2) ba ke pesá buzitu na nkumbu ya Yehova, 3) ba ke zolá matsyeleka, mpe 4) luzolo ya ngolo ke talaná na kati ya bawu.

5. Yinki beto lenda longoka na Yesu na faso ya mbote ya kusambila Nzambi, mpe wa’ faso beto lenda sadila mambu yina yandi zonzá?

⁵ Samu yandi vandá zolá mingi Nzambi, Yesu, ya vanda na zulu to awa na ntoto, vandá sambilá kaka Yehova. (Luke 4:8) Yandi longá na bilandi ya yandi na kusambila kaka  Yehova. Ya vanda Yesu to bilandi ya yandi, ba vandá sadilá ata fioti ve biteki to bizizi samu na kusambila Yehova. Nzambi ke talaná ve. Na yawu, ata kiteki to kizizi lendá lakisa faso yandi kele. (Iza. 46:5) Kasi, yinki beto lenda zonza samu na bizizi ya bantu yina mabuundu ya nkaka ke bokilá basantu? Beto lenda sadila kwandi yawu samu na kusambila? Na musiku ya zole na kati ya misiku 10 yina Yehova pesá na bana ya Izraele, yandi zonzá na bawu: ‘Nge fwana kuyidika ve samu na nge mosi kiteki to kima mosi yina me fwanana na kima nyonso yina ke na zulu to na ntoto [. . .]. Nge fwana fukimina ve yawu.’ (Bas. 20:4, 5) Ba yina nyonso yina ke sosá kusepelisa Nzambi ke landá musiku yayi.

6. Batemwe ya Yehova ke landá nani na faso ya bawu ya kusambila ?

⁶ Bantu ya mayela yina ke longoká bamambu yina salamá na ntama ke zonzá ti na ntangu ya ba-apotre, bakristo vandá sambilá kaka Nzambi yandi mosi. Na kifwani, buku mosi ya istware ke zonzá ti “samu na bakristo ya ntete, ata dikanisi ya kuvanda na biteki kisika yina ba vandá vukaná samu na kusambila, vandá nganzi na meso ya bawu.” Bubu yayi, Batemwe ya Yehova ke landá kifwani ya bakristo ya siekle ya ntete. Beto ke sambilá ve bizizi ya “basantu” to bizizi ya ba-ange. Ata Yesu, beto ke sambilá ve yandi. Beto ke mangá kupesa mbote na drapo to na kima ya nkaka yina ke nata beto na kupesa nkembo na bwala. Ata bantu ke kwamisá beto samu na yawu, beto ke bika ve kulanda mambu yayi yina Yesu zonzilá: ‘Nge me lunga kusambila [Yehova] Nzambi ya nge.’ —Mat. 4:10.

7. Na wapi bamambu Batemwe ya Yehova ke ve faso mosi na mabuundu ya nkaka?

⁷ Bubu yayi, bantu mingi ke landá bamfumu ya mabuundu yina ke ya kuzabana mpe zaba kuzonza. Ntangu ya nkaka, luzolo ya bawu lendá kwenda ntama tii kubanda kutala bawu faso banzambi. Bantu mingi ke kwendá na ba-eglize ya bawu mpe ke pesá bawu mbongo mingi. Bamambu nyonso yina ba ke zonzá, bantu ya nkaka ke ndimá yawu na mbala mosi. Ntangu ba ke talá bawu, nete ba me tala Yesu. Kasi ba yina ke sambilá Nzambi na faso ya mbote ke ve na bamfumu. Ata beto ke pesá buzitu na ba yina ke twadisá beto, kasi beto ke ndimá mambu yayi Yesu zonzá: “Beno nyonso [ke] bampangi.” (Mat. 23:8-10) Beto ke sambilá ve bantu, ya vanda bamfumu ya mabuundu to bantu ya politike. Beto ke tulá ve kivuvu ya beto na bawu. Beto ke kotá ve na mambu ya politike mpe ke landá ve bamambu ya yinza yayi. Na bamambu yayi beto me zonzila, beto ke ve faso mosi na mabuundu ya nkaka yina ke zonzá ti ba ke bakristo.—Yoa. 18:36.

8. Wa’ faso beto me zaba ti Yehova zola ti beto pesa nkembo na nkumbu ya yandi, mpe beto zabisa yawu na bantu ya nkaka?

⁸ Kilumbu mosi Yesu sambilá: “Tata, pesa [nkumbu ya] nge nkembo.” Depwi na zulu, Yehova vutulá na ndinga ya ngolo ti yandi ke pesa nkembo na nkumbu ya yandi. (Yoa. 12:28, nwt-MK) Ntangu nyonso, Yesu vandá pesá nkembo na nkumbu ya Tata ya yandi. (Yoa. 17:26) Na yawu, bakristo ya tsyeleka ke talá ti ya ke bweso ya nene na kusadila nkumbu ya Nzambi mpe kuzonzila yawu na bantu ya nkaka.

9. Wa’ faso bakristo ya siekle ya ntete lakisá ti ba vandá pesá buzitu na nkumbu ya Nzambi?

⁹ Na siekle ya ntete, mwa ntangu fioti na kubanda ya kimvuka ya bakristo, Yehova ‘tulá dikebi na mbala ya ntete na makanda samu na kusola bantu na kati ya bawu samu na kunata nkumbu ya yandi.’ (Bis. 15:14) Bakristo ya siekle ya ntete vandá na kilengi na kunata nkumbu  ya Nzambi mpe kuzonzila yawu na bantu ya nkaka. Ba vandá sadila yawu na kisalu ya predikasion mpe na mikanda yina ba soniká. * Na yawu, ba lakisá ti kaka ni bawu vandá nata nkumbu ya Nzambi.—Bis. 2:14, 21.

10. Yinki ke na lakisá ti kaka ni Batemwe ya Yehova ke natá nkumbu ya Yehova bubu yayi?

¹⁰ Batemwe ya Yehova mpe ke kwandi ba yina ke natá nkumbu ya Nzambi bubu yayi? Ee. Beto tala yinki ke na lakisak’ yawu. Bubu yayi, bamfumu ya mabuundu mingi me sala nyonso samu na kuzimbisi nkumbu ya Nzambi. Ba katulá nkumbu ya Nzambi na babiblia yina ba basisá. Bantangu ya nkaka, ba me niminá kusadila nkumbu ya Nzambi na ba-eglize ya bawu. * Muntu lenda nanguna kwandi musapi samu na kumanga ti kaka Batemwe ya Yehova ke pesá buzitu mpe nkembo na nkumbu ya Nzambi? Ata dibuundu lendá bula ntulu na kuzonza ti bawu mpe ke zabisá nkumbu ya Nzambi. Ya ke na lakisá ti kaka ni beto me lunga kulwata nkumbu ya Temwe ya Yehova. (Iza. 43:10-12) Beto me basisá bamilion kuluta 240 ya Biblia Traduction du monde nouveau. Biblia yango ke vutulá nkumbu ya Yehova na bisika nyonso yina babiblia ya nkaka katulak’ yawu. Beto ke basisá mpe mikanda yina ke longá mambu ya Biblia na bandinga kuluta 1000. Mikanda yango mpe ke sadilá mkumbu ya Yehova.

11. Wa’ faso bakristo ya siekle ya ntete lakisá luzolo ya bawu samu na matsyeleka?

¹¹ Yesu vandá zolá matsyeleka, matsyeleka na yina me tadila Nzambi mpe dikanisi ya yandi samu na bantu. Na luzingu ya yandi nyonso, Yesu vandá landá matsyeleka mpe vandá zabisá yawu na bantu ya nkaka. (Yoa. 18:37) Bilandi ya yandi mpe zolá mingi matsyeleka. (Yoa. 4:23, 24) Ni na yawu, apotre Pierre bokilá dibuundu ya bakristo ‘nzila ya matsyeleka.’ (2 Pi. 2:2) Samu ba vandá zolá mingi matsyeleka, bakristo ya siekle ya ntete mangá kulanda malongi ya mabuundu ya luvunu, bamambu ya bankoko mpe makanisi ya bantu yina vandá kwelana ve na matsyeleka ya Biblia. (Kol. 2:8) Faso mosi mpe, bubu yayi bakristo ya tsyeleka ke salá bangolo samu na kubika ve ‘kutambula na matsyeleka.’ Na malongi ya bawu, mpe na faso ya kunata luzingu ya bawu, ba ke landá mambu ya Biblia.—3 Yoa. 3, 4.

12. Yinki ke salamá ntangu ba yina ke twadisá beto ke kwizá talá ti ba vunamá, mpe samu na yinki ba ke salá yawu?

¹² Batemwe ya Yehova ke zonzá ve ti ba zaba bamambu nyonso yina Biblia ke zonzá. Bantangu ya nkaka, na bamambu yina ba zonzá, mpe na faso ya kuyidika bamambu na kati ya bimvuka ya bawu, ba vunamá. Mambu yayi zolá pamusa ve beto. Biblia yawu mosi ke zonzá pwelele ti bisadi ya Nzambi ke zabá bamambu fioti-fioti. (Kol. 1:9, 10) Yehova ke lakisá matsyeleka malembe-malembe, mpe beto zolá ndima kuvingila tii ntangu yina yandi me sola kulakisa beto bamambu nyonso. (Bin. 4:18) Ntangu ba yina ke twadisá beto ke talá ti ba me vunama na mwa mambu, ba ke bumbá ve yawu. Ba ke ndimá yawu mpe ba ke sosá kuyidika yawu. Mabuundu mingi yina ke zonzá ti ba ke bakristo, ba ke sobá bamambu kaka samu na kusepelisa bantu to yinza. Na kati ya organizasion ya Yehova, bamambu ke sobá samu na kunata beto na kuvanda dyaka pene-pene na Yehova, mpe kulanda faso ya kusambila yina Yesu biká. (Zaki 4:4) Beto ke chanjeke ve bamambu samu na kulanda yinza, kasi samu beto me zaba dyaka mbote-mbote Biblia. Beto ke zolá matsyeleka.—1 Tes. 2:3, 4.

13. Wapi yina ke kifu ya kulutila nene ya bakristo ya tsyeleka, mpe wa’ faso Batemwe ya Yehova ke lakisak’ yawu bubu yayi?

¹³ Bakristo ya ntete vandá na bifu mingi ya mbote. Kasi kifu ya kulutila yina ba vandá lakisá na bampangi, ni luzolo. Yesu zonzá: “Kana beno zolasana beno na beno, bantu nyonso ke zaba ti beno [ke] bilandi ya munu.” (Yoa. 13:34, 35) Bubu yayi na yinza nyonso, luzolo mpe bumosi ke na kati ya Batemwe ya Yehova. Beto ke ve faso mabuundu ya nkaka samu beto ke famiye, ata beto ke katuká ve na bwala mosi, beto ke zonzá ve ndinga mosi to beto ke ve na mpusu mosi. Luzolo mpe bumosi ya beto ke talaná na balukutakanu ya beto ya kimvuka, mpe ya nene. Ya ke natá beto na kundima na ntima mosi ti faso ya beto ya kusambila Nzambi, kaka ni yawu ke mbote.

14. Faso ke zonzá Bakolose 3:12-14, wapi yina ke mosi ya bafaso ya mbote ya kulakisa luzolo ya ngolo na bampangi?

¹⁴ Biblia ke zonzá na beto na ‘kuzolasana mingi.’ (1 Pi. 4:8) Mosi ya bafaso ya kulakisa luzolo ke ni ya kulemvokila bampangi mpe ya kunata kilo ya mwa bifu ya yimbi yina ba ke lakisá. Beto ke sosá kulakisa kifu ya kukabulá na bampangi nyonso ya kimvuka, ata ba yina me nyongisa beto. (Tanga Bakolose 3:12-14.) Luzolo ya ngolo yina ke na kati ya beto ke lakisá ti beto ke bakristo ya tsyeleka.

15. Na wapi bamambu ya nkaka beto ke landá faso ya kusala ya bakristo ya siekle ya ntete?

¹⁵ Beto ke landá mutindu ya kusambila ya bakristo ya siekle ya ntete na bafaso ya nkaka. Na kifwani, samu organizasion ya beto tambula, ya ke na bantwadisi ya sirkonskripsion, bakuluntu na basadisi. Bisalu nyonso yayi vandá mpe na bimvuka ya siekle ya ntete. (Flp. 1:1; Tite 1:5) Faso bawu, beto ke landá mambu yina Yehova ke zonzá na yina me tadila kuvukisa nzutu, makwela, menga mpe musiku ya kubasisa muntu na kimvuka si ya me sala disumu ya ngolo mpe ke na balulá ve ntima.—Bis. 15:28, 29; 1 Ko. 5:11-13; 6:9, 10; Ebr. 13:4.

16. Yinki beto lenda longoka na mambu yina ke zonzá Baefeze 4:4-6?

¹⁶ Yesu zonzá ti bantu mingi ke zonza ti ba ke bilandi ya yandi. Kasi bawu nyonso ve ke vanda bilandi ya yandi ya tsyeleka. (Mat. 7:21-23) Biblia ke zonzá mpe ti na bilumbu ya nsuka, bantu mingi ke sosa ‘kulakisa ti ba ke zolá mambu ya Nzambi.’ (2 Tim. 3:1, 5) Kasi ya ke lakisá mpe ti ya ke kaka na “kiminu mosi” yina Nzambi ke ndimá.—Tanga Baefeze 4:4-6.

17. Wapi yina ke dibuundu ya tsyeleka bubu yayi?

¹⁷ Wapi yina ke dibuundu ya tsyeleka yina Nzambi ke ndimá? Beto me tala bamambu yina lenda sadisa beto na kuzaba dibuundu yango. Beto me tala faso ya mbote ya kusambila Nzambi yina Yesu na bakristo ya ntete biká. Ni na yawu beto lenda zonza ti kaka Batemwe ya Yehova ke dibuundu ya tsyeleka. Ya ke bweso ya nene na kuvanda mosi ya bisadi ya Yehova bubu yayi, na kuzaba nani ke Yehova mpe dikanisi ya yandi. Na yawu, beto zolá sala bangolo ya beto nyonso samu na kukangama na matsyeleka.