1. Ino nceebonshi bantu baanji balapilinganishikwa?

MUNSHIKU shino kuli bupailishi buunji balyaamba ayi Mbeneklistu alimwi akwaamba ayi balalambila Lesa munshila imusangalasha. Nceceeco bantu baanji balapilinganishikwa! Aboobo baleepusha ayi, “Sa kulibo bupailishi bomwi bwancine, na sa bupailishi boonse bulalambila Lesa munshila imusangalasha?” Sa tulashoma cakutatoonsha kwaamba ayi mbuli Bakamboni Bakwe Yehova tulaiisha cancine alimwi akwaamba ayi nshila mbotulambila Yehova njenshila yomwibo imusangalasha? Sa cilakonsheka kwaashiba kabotu makani aya? Amuleke tubandike pabumboni bweenga bwatucafwa kushoma cakutatoonsha pamakani aya.

2. Ino nceebonshi mutumwi Paulo wakalinga kushoma cakutatoonsha kwaamba ayi ncakeeya ncocancine? (1 Bene Tesalonika 1:5)

² Mutumwi Paulo, wakalinga kushomete cakutatoonsha kwaamba ayi ncakeeya ncocancine. (Amubelenge 1 Bene Tesalonika 1:5.) Taakalinga kushoma cancine ncakeeya ceebo cakwaamba ayi cakalinga kumusangalasha. Sombi Paulo wakalinga kwiiya Maswi akwe Lesa cakubikila maano. Wakalinga kushoma ayi “Malembo oonse akatanjililwa a Lesa.” (2 Timo. 3:16) Ino nshiinshi nshakeeya? Paulo wakacana bumboni mu Malembo bwakalinga kutondesha patuba kwaamba ayi Yesu ngo Mesiya wakashomeshekwa, bumboni ubo bamatanjilili babupailishi ba baJuda mbobatakalinga kubikilaako maano. Bakalinga kwaamba ayi bakalinga kwiisha bantu cancine pali Lesa, sombi bakalinga kucita shintu Lesa nshaapatite. (Taitasi 1:16) Mubupusano ambabo, Paulo taakalinga kusala makani ngeenga washoma kuswa mu Maswi akwe Lesa, alimwi a ngateelete kushoma. Wakalinga kulibambite kwiisha alimwi akukonkela “shoonse nshaasuni Lesa.”​—Milimo 20:27.

3. Sa tulyeelete kucana shikumbulo kumiipusho yoonse njeenga katucite kwaamba ayi tushome cakutatoonsha kwaamba ayi ncotwakeeya ncocancine? (Amubone a kabokosi kacite mutwi utokwaamba ayi  Shintu Yehova ‘Nshaacita Nshiinji Abuumbi.’)

 ³ Bamwi balayeeya ayi bupailishi bwancine bulyeelete kucikonsha kukumbula mwiipusho uli woonse, kwiilikaawo a miipusho njotutacani shikumbulo mu Baibo. Ano sa ici inga cakonsheka? Amuyeeye pacakubonenaako cakwe Paulo. Wakayuminisha bashominyina ayi balyeelete ‘kushinisha shintu shoonse,’ sombi wakaamba ayi kwakalinga shintu shiinji nshatakalinga kunyumfwishisha. (1 Tesa. 5:21) Wakaleemba ayi: ‘Lushibo lwesu talushikite peene mpolweelete.’ Wakeelikawo akwaamba ayi: “Nshetubona bulya nshintu shili anga nsheesho shiboneka mucilola.” (1 Koli. 13:9, 12) Teshi shoonse Paulo nshaakalinga kunyumfwisha; mbocibete akulindiswe. Sombi nshaakalinga kucishi pali Yehova shakamucafwa kushoma cakutatoonsha kwaamba ayi ncakeeya ncocancine!

4. Ino nciinshi ceenga catucafwa kushoma cakutatoonsha kwaamba ayi twakacana cancine, alimwi ino nshiinshi nsheshi twiiye pa Beneklistu bancine?

⁴ Cintu comwi ceenga catucafwa kushoma cakutatoonsha kwaamba ayi twakacana cancine, nkubona cakubonenaako ca mbotweelete kulambila, Yesu ncaakatondesha alimwi a Bakamboni Bakwe Yehova mbobalambila. Mutwi uyu utootucafwa kushiba ayi Beneklistu bancine (1) tabalambili shibumbwabumbwa, (2) balalemeka liina lyakwe Yehova, (3) balicisuni cancine, alimwi (4) balisunene abuumbi.

5. Ino nshiinshi nsheenga tweeya kuswa kucakubonenaako cakwe Yesu pamakani ambotweelete kulambila Lesa munshila imusangalasha, alimwi ino nshaakalinga kwiisha inga twashikonkela buyani?

⁵ Mukwiinga Yesu wakalinga kumusuni abuumbi Yehova, wakalinga kulambilabo nguwe eenka, ndyaakalinga kwiculu alimwi andyaakalinga pacishi. (Luka 4:8) Alimwi wakaiisha bashikwiiya bakwe kunolambilabo Yehova eenka. Yesu alimwi a bashikwiiya bakwe bashomeka tabakalinga  kusebensesha shikoshanyo pakulambila. Mukwiinga Lesa taaboneki, taakuwo cintu muntu nceenga wapanga ceenga caboneka anga ngu Lesa! (Isa. 46:5) Ino mbuyani kupanga shikoshanyo sha bantu bamwi mbobabona ayi balisalalite alimwi akunoshilambila? Mulawo wabili pa milawo ili 10 Yehova njaakapa bene Isilaeli wakalinga kwaamba ayi: “Utalipangili shibumbwabumbwa shikoshanya ashintu sha kwiculu nabi sha pacishi ca panshi . . . Utafukamini cibumbwabumbwa cili coonse.” (Kulo. 20:4, 5) Bantu basuni kusangalasha Lesa balanyumfwisha kwaamba ayi taasuniiwo ayi tunolambila shibumbwabumbwa.

6. Ino ncakubonenaako nshi ca mbotweelete kulambila, Bakamboni Bakwe Yehova ncobakonkela?

⁶ Bantu bakeeya makani akale kale balaamba ayi muciindi ca batumwi, Beneklistu bakalinga kulambilabo Lesa wancine eenkabo. Kucakubonenaako, libuku limwi lyaamba pamakani akale kale lilaamba ayi, Beneklistu bakutaanguna bakalinga “kupatite” kusebensesha shikoshanyo mumisena yakulambililaamo. Munshiku shino, Bakamboni Bakwe Yehova balakonkela cakubonenaako ca Beneklistu bakutaanguna. Tatupaili shikoshanyo sha bantu, bamwi mbobabona ayi balisalalite nabi kupaila baanjelo; alimwi tatupaili Yesu. Alimwi tatupi bulemu ku fulagi nabi kucita cintu cili coonse ceenga catondesha anga tutolambila mfulumeende. Nabi twiinde mubukaalo buli buyani, tulishinishite kukonkela maswi Yesu ngakaamba ayi: ‘Ulyeelete kulambilabo Yehova, Lesa wako.’​—Mate. 4:10.

7. Ino mbupusano nshi bunene buli pakati ka Bakamboni Bakwe Yehova abupailishi bumwi?

⁷ Munshiku shino, bantu baanji balisuni kukutika ku bamatanjilili babupailishi bapukite. Balibasuni abuumbi bamatanjilili babupailishi aba cakwaamba ayi balasuna akubalambila. Bantu baanji balaya ku maceeci abo, kuula mabuku abo alimwi akubapa maali aanji na kupa maali kutubunga bamatanjilili babupailishi aba ntobabeteemo. Bantu bamwi balashoma shoonse shaamba bamatanjilili babupailishi aba. Balasangalala kubona bamatanjilili babupailishi aba bweenka mbweenga basangalala na babona Yesu! Sombi abo balambila Lesa munshila imusangalasha tababi anga mbashikwiiya ba muntu. Nabi kwaamba ayi tulalemeka baabo batutanjilila, tulakonkela njiisho Yesu njakaamba ayi: “Noonse muli bamukowa.” (Mate. 23:8-10) Tatulambili bantu. Inga caba ayi mbamatanjilili babupailishi na beendeleshi. Alimwi tatucafwilishi tubunga mobabete na nshebasuni kucita mumfulumeende. Sombi tulatolelela kutaabanamo lubasu mushintu shacishi. Aboobo mushintu shoonse ishi, tulipusene abuumbi abeshibupailishi balyaamba ayi Mbeneklistu.​—Joni 18:36.

8. Ino tulishi buyani ayi Yehova alisuni kwaamba ayi liina lyakwe lilemekwe alimwi akushibikwa kubantu boonse?

⁸ Paciindi cimwi Yesu wakapaila ayi: “Ta, alilemekwe liina lyanu.” Yehova mwiine wakakumbula mupailo uyu a liswi lyapeculu akushomesha ayi alaakulemeka liina lyakwe. (Joni 12:28) Kuswabo ciindi Yesu ndyaakatalika kushimikila pacishi capanshi, wakalinga kulemeka liina lya baIshi. (Joni 17:26) Aboobo Beneklistu bancine balacibona ayi ncoolwe kusebensesha liina lyakwe Lesa alimwi akucafwa bamwi kulishiba.

9. Ino Beneklistu bakutaanguna bakatondesha buyani ayi bakalinga kulemeka liina lyakwe Lesa?

⁹ Ndyepakeendabo ciindi ciniinibo kuswa ciindi ndyekwakaba libungano lya Bwineklistu, Yehova “wakabonesha lusuno kubaswamashi bakunsengwe akusala bantu pakati kabo bashibikitwe a liina lyakwe.” (Milimo 15:14) Beneklistu bakutaanguna aba bakalinga kusangalete kusebensesha liina lyakwe Lesa alimwi akucafwa bamwi kulishiba. Bakalinga kusebensesha liina lyakwe Lesa ndyebatoshimikila alimwi apakulemba mabuku amu Baibo. * Aboobo bakatondesha ayi mbobantu beenkabo bakalinga kucafwa bantu kushiba liina lyakwe Lesa.​—Milimo 2:14, 21.

10. Ino tulishi buyani kwaamba ayi Bakamboni Bakwe Yehova beenkabo mbobantu bacafwa bamwi kushiba liina lyakwe Yehova?

 ¹⁰ Ino tulishi buyani kwaamba ayi Bakamboni Bakwe Yehova mbobantu beenkabo bacafwa bamwi kushiba liina lyakwe Lesa? Atubandike pabumboni ubu butokonkelaawo. Munshiku shino, bamatanjilili babupailishi baanji bacita shoonse nsheenga bacikonsha kwaamba ayi bantu batashibi cancine cakwaamba ayi Lesa alicite liina. Kucakubonenaako, tabakwe kulibikaamo liina lyakwe Lesa muma Baibo ngobakasansulula alimwi cimwi ciindi balakasha kusebensesha liina lyakwe Lesa mu maceeci abo. * Cilibwenekete patuba kwaamba ayi Bakamboni Bakwe Yehova beenkabo mbobapa bulemu bweelete kuliina lyakwe Lesa. Tulacafwa bantu baanji kushiba liina lyakwe Lesa kwiinda bupailishi bumwi buli boonse! Tutoocita shoonse nsheenga twacikonsha kwaamba ayi tutondeshe ayi ncakwiila tuli Bakamboni Bakwe Yehova! (Isa. 43:10-12) Twakapulinta ma Baibo a New World Translation of the Holy Scriptures eendilila 240 miliyoni, ayo acite liina lyakwe Yehova mumbasu shimwi basansulushi bamwi mobakalikushaamo. Alimwi tulasansulula mabuku aamba shamu Baibo mumishobo iindilila 1,000, ayo asebensesha liina lyakwe Yehova!

11. Ino Beneklistu bakutaanguna bakalinga kutondesha buyani ayi balicisuni cancine?

¹¹ Yesu wakalinga kucisuni cancine, nkokwaamba ayi cancine pali Lesa alimwi ansheshi akacite. Mubuumi bwakwe boonse, Yesu wakalinga  kutondesha ayi wakalinga kushoma mucancine alimwi wakalinga kucafwa bamwi kushiba cancine ici. (Joni 18:37) Bashikwiiya bakwe bancinencine abalo bakalinga kucisuni abuumbi cancine. (Joni 4:23, 24) Pita wakaamba ayi bupailishi bwa Bwineklistu ‘ninshila ya lushinisho.’ (2 Pit. 2:2) Mukwiinga Beneklistu bakutaanguna bakalinga kucisuni abuumbi cancine, bakalinga kukaka njiisho sha beshibupailishi, milawo bantu njebakalinga kukonkela alimwi amiyeeyo ya bantu yatakalinga kweendelana acancine. (Kolo. 2:8) Amunshiku shino, Beneklistu bancine baleelesha cankusu ‘kutolelela kweenda mulushinisho’ kwiinda mukukonkela Maswi akwe Lesa cakubikila maano mushintu nshobashoma alimwi amushintu nshebacita.​—3 Joni 3, 4.

12. Ino nshiinshi shicitika na bamu Likoto Litanjilila babona ayi tulyeelete kwaalula mbotunyumfwishisha makani amwi, alimwi ino nceebonshi ncobacitila boobo?

¹² Bakamboni Bakwe Yehova tabaambi ayi lyoonse balanyumfwishisha makani ali mu Baibo. Paciindi cimwi tabakwe kusansulula kabotu njiisho shimwi shamu Baibo na kupa butanjilishi bweelete pamakani alibungano mbolyeelete kutanjililwa. Ici taceelete kutukankamika. Malembo alatondesha patuba ayi bantu bakwe Lesa balaya cinyumfwishisha cancine paniini paniini. (Kolo. 1:9, 10) Yehova alayubulula cancine paniini paniini, aboobo tulyeelete kuba balibambite kulindila cakukalika moyo kushikila twanyumfwishisha kabotu cancine. (Tus. 4:18) Na bamu Likoto Litanjilila babona kwaamba ayi tulyeelete kwaalulako mbotunyumfwisha makani amwi na mbotucita shintu shimwi, balacitawo comwi peenkaapo. Munshiku shino maceeci aanji balaalula nshobaiisha kwaamba ayi basangalashe bantu bapailaamo, alimwi akwaamba ayi bapuke mucishi. Sombi Bakamboni Bakwe Yehova balaalula shintu shimwi kwaamba ayi tube abushicibusa buyumu a Lesa alimwi akwaamba ayi tukonkele cakubonenaako cakwe Yesu ca mbotweelete kulambila Lesa. (Jemu. 4:4) Tatwaaluli shintu shimwi ceebo cakwaamba ayi bantu mucishi baalula mbobabona shintu shimwi. Sombi nceebo cakunyumfwishisha kabotu Baibo. Tulicisuni cancine!​—1 Tesa. 2:3, 4.

13. Ino ngumubo nshi uyandika abuumbi Beneklistu bancine ngobakalinga kutondesha alimwi ino Bakamboni Bakwe Yehova balautondesha buyani?

¹³ Beneklistu bakutaanguna bakalinga kushibikitwe ayi bakalinga kucite mibo iinji ibotu. Sombi lusuno wakalinga mubo uyandika abuumbi ngobakalinga kutondesha. Yesu wakaamba ayi: “Mukwiinga na kamusunene, bantu boonse balaakwishiba ayi muli bashikwiiya bangu.” (Joni 13:34, 35) Munshiku shino, Bakamboni Bakwe Yehova nsengwe yoonse balisunene cancinencine alimwi balicatene. Tulipusene abuumbi abupailishi bumwi buli boonse mukwiinga tulibo anga ngumukwashi nabi kwaamba ayi tulaswa mushishi shipusenepusene alimwi tulakonkela milawo ipusenepusene. Tulabona ayi tulisunene cancinencine, ndyetuli kumabungano ansondo ansondo, kubungana kwalubasu alimwi akubungana kunene. Bumboni ubu bulatucafwa kushoma cakutatoonsha kwaamba ayi tulalambila Yehova munshila imusangalasha.

14. Kweelana a Bene Kolose 3:12-14, ino ninshila nshi iyandika mbweenga twatondesha ayi tulisunene abuumbi?

¹⁴ Malembo alatuyuminisha ayi “tulyeelete kusunana abuumbi.” (1 Pit. 4:8) Nshila yomwi mbotutondesha lusuno ulu, nkwiinda mukulekelela bamwi na batubishisha. Alimwi tulatondesha mushimu wa bwaabi akutambula bamwi mulibungano, kwiilikaawo abaabo bakalinga batukalasha. (Amubelenge Bene Kolose 3:12-14.) Na katutondeshanya lusuno munshila iyi, tulatondesha ayi ncakwiila tuli Beneklistu bancine.

15. Ino munshila nshi shimwi mbotukonkela cakubonenaako ca mbotweelete kulambila cakatondesha Beneklistu bakutaanguna?

¹⁵ Kuli nshila ashimwi mbotukonkela cakubonenaako ca mbotweelete kulambila cakatondesha Beneklistu bakutaanguna. Kucakubonenaako,  mulibunga lyesu muli bamatanjilili balubasu, bamanene alimwi abasebenshi bacafwilisha​—bweenka mbocakalinga ku Beneklistu bakutaanguna. (Filip. 1:1; Taitasi 1:5) Bweenka mbuli Beneklistu bakutaanguna, andiswe tulalemeka milawo yakwe Yehova yaamba pakoonana alimwi acikwati, Lesa nshaamba pamakani ambotweelete kubona bulowa alimwi tulashitilisha libungano kubaabo batasuni kukonkela milawo yakwe Lesa.​—Milimo 15:28, 29; 1 Koli. 5:11-13; 6:9, 10; Ebu. 13:4.

16. Ino maswi amwi ngotucana pa Bene Efeso 4:4-6 alatwiisha nshi?

¹⁶ Yesu wakaamba ayi baanji balaakunolyaamba ayi mbashikwiiya bakwe. Sombi teshi boonse bancinencine. (Mate. 7:21-23) Alimwi Malembo akatucenjeshela limwi ayi munshiku shakweelaako, bantu baanji balaakubabo “ambonekelo ya bushomi.” (2 Timo. 3:1, 5) Sombi Baibo ilaamba cakuteenda mweela ayi kulibo “lushomo lomwi” na bupailishi busangalasha Lesa.​—Amubelenge Bene Efeso 4:4-6.

17. Ino mbaani batokonkela cakubonenaako cakwe Yesu munshiku shino alimwi balambila Lesa munshila imusangalasha?

¹⁷ Ino mbaani balambila Lesa munshila imusangalasha munshiku shino? Tweeya pabumboni bweenga bwatucafwa kubashiba. Tweeya pacakubonenaako ca mbotweelete kulambila, Yesu ncaakatondesha alimwi a Beneklistu bakutaanguna mbobakacikonkela. Kulibo cikumbulo comwi​—Mbakamboni Bakwe Yehova. Ncoolwe cinene abuumbi kuba pakati kabantu bakwe Yehova alimwi akushiba cancine pali Yehova akuyanda kwakwe! Amuleke tutolelele kushoma cakutatoonsha ayi ncotwakeeya ncocancine.