1. Mwanda waka bantu bavule i bakomenwe kuyuka mutōtelo wa bine?

DYALELO kudi bipwilo bivule bītela bu bya bwine Kidishitu, binenanga’mba bitōtanga Leza mu muswelo waitabije. O mwanda bantu bavule i bakomenwe kuyuka mutōtelo wa bine! Beipangulanga’mba, “le kudi kipwilo kimo kete kya bine’ni, nansha bipwilo byonso bisangajanga Leza?” Le tukulupile na kusumininwa mu ñeni yetu amba tufundijanga bubine ne amba muswelo utōta Batumoni ba Yehova dyalelo ye mwitabijibwe na Yehova? Le bine bibwanika kukulupila uno muswelo? Tulangulukilei pa bukamoni.

2. Mungya 1 Bene Tesalonika 1:5, mwanda waka mutumibwa Polo wādi ukulupile na kusumininwa amba udi mu bubine?

² Mutumibwa Polo wādi ukulupile na kusumininwa’mba udi mu bubine. (Tanga 1 Bene Tesalonika 1:5.) Kādipo ukulupile uno muswelo mwanda’tu wa bubine bwādi bumusangaja. Polo wādi wifunda Kinenwa kya Leza na kininga. Wādi ukulupile amba “kisonekwa kyonso i kisonekejibwe na mushipiditu wa Leza.” (2 Tm. 3:16) Le i bika byāefundile’mo? Polo wātene mu Bisonekwa bubinga kebupatanibwapo bwa amba Yesu i Meshiasa wālailwe​—bubinga bwine bwādi bupela bendeji ba bipwilo Bayuda. Bano bendeji banzazangi bādi banena’mba bafundijanga myanda ya Leza ino abo balonga bintu byashikilwe. (Tet. 1:16) Polo kādipo pamo bwa abo, mwanda kātongelepo bintu bya kukulupila mu Kinenwa kya Leza ne bya kuleka kukulupila. Wādi mwiteakanye kufundija ne kulonda “madingi onso a Leza.”​—Bil. 20:27.

3. Le tufwaninwe kulondolola bipangujo byetu byonso pa kuyuka shi byotukulupile i bya bine? (Tala kapango kanena’mba “ Mingilo ne Milangwe ya Yehova I ‘Mivule pa Kubanga’yo.’”)

³ Bantu bamo balañanga’mba kipwilo kya bine kifwaninwe  kulondolola bipangujo byonso, enka ne byobya kebilondolwelwepo patōkelela mu Bible. Le kulanga uno muswelo i kwendele’mo? Tulangulukilei bidi pa kimfwa kya Polo. Wākankamikile banababo mu lwitabijo ‘bajingulule senene bintu byonso,’ ino kadi wāitabije amba kudi bintu bivule byākadipo wivwanije. (1 Ts. 5:21) Wālembele amba “tudi na buyuki bwa kipindi,” kupwa wābweja’ko amba “tumwene kivwidima mu kiyo kya kyuma.” (1 Ko. 13:9, 12) Polo kādipo wivwanije bintu byonso; ne batwe netu mo monka. Polo wādi wivwanije bubine bwa kyalwilo butala mpango ya Yehova. Bintu byaādi uyukile byāmukweshe etabije amba byakulupile i bya bine!

4. Le i muswelo’ka otubwanya kukulupila na kusumininwa’mba twi basokole bubine, ne i bika byotusa kumona pa mwanda utala bene Kidishitu ba bine?

⁴ Muswelo umo otubwanya kukulupila na kusumininwa’mba twi basokole bubine, i kudingakanya mutōtelo wāshile Yesu na muswelo utōta Batumoni ba Yehova dyalelo. Mu kino kishinte, tusa kumona’mo amba bene Kidishitu ba bine (1) bapelanga kutōta bilezaleza, (2) balēmekele dijina dya Yehova, (3) basenswe bubine, ne (4) besenswe bininge abo bene na bene.

5. Le i ñeni’ka yotuboila kudi Yesu mu mwanda utala muswelo muyampe wa kutōta Leza, ne tubwanya kwingidija namani bintu byaāfundije?

⁵ Yesu byaādi usenswe Yehova bininge, wādi utōta’nka Yehova kete, paādi momwa mūlu ne paādi pano pa ntanda. (Luka 4:8) Wāfundije ne bandi bana ba bwanga batōte enka Yehova kete. Yesu ne bandi bana ba bwanga ba kikōkeji kebāingidijepo bankishi mu butōtyi. Leza byadi Mushipiditu, i kutupu kintu kibwanya kulonga muntu  kikokeja kudingakana na ntumbo ya Yehova! (Isa. 46:5) Ino le tunene bika pa kwingidija bankishi betwa bu basanto ne kulombela kobadi? Mu lubila lwa bubidi lwa mu mbila dikumi, Yehova wānenene’mo amba: “Kokelongela nkishi musōnge nansha kyelekejo kya kintu kyo-kyonso kidi mūlu nansha kidi panshi . . . Kokevukwila kobadi nansha kwibengidila kwine.” (Div. 20:4, 5) Boba basaka kusangaja Leza bevwanije bino binenwa.

6. Le dyalelo Batumoni ba Yehova balondanga kimfwa’ka mu mwanda utala kutōta?

⁶ Balembi ba ino ntanda betabije amba bene Kidishitu babajinji bādi batōta’nka Leza kete. Kimfwa, dibuku (Mānga ya Kipwilo kya Bwine Kidishitu) dya mu Angele dinena’mba bene Kidishitu babajinji “badi bashikilwe” mulangwe wa kutūla bankishi mu bifuko bya kutōtela’po. Dyalelo, Batumoni ba Yehova balondanga kimfwa kyāshile bene Kidishitu ba mu myaka katwa kabajinji. Ketulombelangapo ku bankishi ba “basanto” nansha bamwikeulu; kadi ketulombelangapo ne kudi Yesu mwine. Ketutōtangapo maludiki nansha byelekejo byao. Nansha shi abetuningila namani, batwe tusumininwe kulonda byānenene Yesu amba: “Ufwaninwe kutōta Yehova Leza obe.”​—Mat. 4:10.

7. Le Batumoni ba Yehova i beshile namani na bipwilo bikwabo?

⁷ Dyalelo, bantu bavule balondanga bendeji ba bipwilo batumbe. Byobasenswe bano bantu, kyaba kimo bafulanga’nka ne ku kwibatōta. Bantu bayulanga mu byabo bipwilo, bapota mabuku abo, ne kwibapa lupeto luvule mwanda wa kwibakwatakanya. Bantu bamo bakulupilanga bintu byonso byobanena. Bano bantu ba mu bipwilo basangalanga kumona bano bafundiji enka na abo bamona Yesu! Ino batōtyi ba bine ba Yehova abo kebalondangapo bantu. Nansha byotulēmekele boba betutangidile, twitabije bufundiji bupēla bwāfundije Yesu amba: “Banwe bonso mwi bana na bana.” (Mat. 23:8-10) Ketutōtangapo bantu, ekale bendeji ba bipwilo nansha ba politike. Ketukwatakanyangapo byobalonga. Ino kadi ketwikujangapo mu myanda ya ntanda. Mu uno muswelo, twi beshile na bipwilo bivule bitela bu bya bwine Kidishitu.​—Yoa. 18:36.

8. Le tuyukile namani amba Yehova usakanga dijina dyandi ditumbijibwe ne kwidiyukanya?

⁸ Difuku dimo, Yesu wālombele amba: “Tata, tumbija dijina dyobe.” Yehova wālondolwele ino milombelo na diwi dikatampe ditamba mūlu, wālaya’mba ukeditumbija. (Yoa. 12:28) Yesu paādi usapula, wātumbije dijina dya Shandi. (Yoa. 17:26) O mwanda i byendele’mo bene Kidishitu bamone amba i dyese kwingidija dijina dya Leza ne kwidiyukanya ku bakwabo.

9. Le bene Kidishitu ba mu myaka katwa kabajinji bālombwele namani amba balēmekele dijina dya Leza?

⁹ Mu myaka katwa kabajinji Yesu kaile, kitatyi kityetye pa kupwa’tu kushimika kipwilo kya bwine Kidishitu, Yehova wātele mutyima “ku mizo mwanda wa kutonga’mo bantu ba dijina dyandi.” (Bil. 15:14) Bano bene Kidishitu ba mu myaka katwa kabajinji bāmwene’mba i dyese kwingidija dijina dya Leza ne kwidiyukanya ku bakwabo. Bādi bengidija dijina dya Leza mu busapudi ne mu bilembwa byabo. * Bālombwele amba i bantu ba dijina dya Leza.​—Bil. 2:14, 21.

10. Le i bika bilombola’mba Batumoni ba Yehova i bantu ba dijina dya Yehova?

 ¹⁰ Lelo Batumoni ba Yehova i bantu ba dijina dya Yehova? Tulangulukilei pa buno bukamoni. Dyalelo, bendeji ba bipwilo bavule baloñanga bukomo bwabo bonso mwanda wa kufya mulangwe wa amba Leza udi na dijina dyandi dya bunka. I beditalule ne mu malamuni abo a Bible, enka ne kupeleja kwiditela mu byabo bipwilo. * Le kudi muntu ubwanya kupatana’mba i Batumoni ba Yehova kete batumbijanga dijina dya Yehova ne kwidilēmeka? Batwe tuyukanyanga dijina dya Yehova bininge kupita bipwilo bikwabo! Kadi tuloñanga bukomo bwa kwiendeja mungya dijina dyetu dya bu Batumoni ba Yehova. (Isa. 43:10-12) Twi balupule Mabible midiyo 240 ne kupita a Bisonekwa Bijila Bwalamuni bwa Ntanda Mipya, mwingidijibwe dijina dya Yehova pa bifuko poditalwilwe mu malamuni makwabo a Bible. Kadi tulupulanga mabuku esambila pa Bible atelelwe’mo dijina Yehova mu ndimi 1 000 ne kupita!

11. Le bene Kidishitu babajinji bālombwele namani amba basenswe bubine?

¹¹ Yesu wādi usenswe bubine, ko kunena’mba bubine butala padi Leza ne pa mpango yandi. Yesu weēndeje mungya buno bubine, kadi wāyukenye’bo ku bantu bakwabo.  (Yoa. 18:37) Balondi ba bine ba Yesu nabo bādi basenswe bubine bininge. (Yoa. 4:23, 24) Mutumibwa Petelo wātelele bwine Kidishitu bu “dishinda dya bubine.” (2 Pe. 2:2) Bene Kidishitu babajinji byobādi basenswe bubine bininge, bāpelele milangwe ya bipwilo, bishi, ne milangwe ya bantu mitupe na bubine. (Kol. 2:8) Ne dyalelo nadyo, bene Kidishitu ba bine beelelanga’ko ‘kunangila nyeke mu bubine’ na kulupula nkulupilo yabo yonso mu Kinenwa kya Yehova ne kwikilonda mu būmi bwabo.​—3 Yo. 3, 4.

12. Le boba betutangidile baloñanga namani shi abamone amba tufwaninwe kujadika mwivwanino wetu, ne mwanda waka beujadikanga?

¹² Bantu ba Leza dyalelo kebanenangapo amba bevwanije bintu byonso bya mu Bible. Kyaba kimo betupanga mu muswelo obashintulula myanda ya mu Bible nansha obateakanya bipwilo. Kino kekifwaninwepo kwitutulumuja. Bisonekwa bilombola potōkelela’mba buyuki bwendanga buvudila’ko. (Kol. 1:9, 10) Yehova usokolanga bubine bityebitye, kadi tufwaninwe kwilaija na kitūkijetyima kufika ne byotwivwanija bubine biyampe. (Nki. 4:18) Shi boba betutangidile abamone’mba mwivwanino wetu wa bintu bimobimo bya mu Bible ufwaninwe kujadikwa, kebekakangapo kwiujadika. Monka mushintyilanga bipwilo bitela bu bya bwine Kidishitu mwanda wa kusangaja bipwilo byabo ne kwikala pabwipi na ntanda, bulongolodi bwa Yehova nabo bushintanga mwanda wa kwitufwenya kudi Leza ne kumutōta mu muswelo wādi umutōta Yesu. (Yak. 4:4) Tushintanga, ke pa mwandapo wa milangwe ya bantu ba ino ntanda ishintanga, ino i mwanda twivwanijanga Bisonekwa biyampe. Tusenswe bubine!​—1 Ts. 2:3, 4.

13. Le bene Kidishitu ba bine bālombwele ngikadila’ka mikatampe, ne Batumoni ba Yehova balombolanga namani ino ngikadila dyalelo?

¹³ Bene Kidishitu ba mu myaka katwa kabajinji bādi bebayukila ku ngikadila miyampe mivule, inoko mikatampe’mo i buswe. Yesu wānenene amba: “Pa kino bonso bakayuka’mba mwi bami bana ba bwanga​—shi mudi na buswe umbukata mwenu.” (Yoa. 13:34, 35) Dyalelo, Batumoni ba Yehova ba ntanda yonso besenswe bya bine kadi badi mu bumo. Twi beshile na bipwilo byonso, mwanda ketutengapo mutyima ku muzo wetu, lukoba lwetu nansha bibidiji byetu mu bu bana na bana bwetu. Twimwenanga buswe bwa binebine, ku kupwila, ne ku bitango bikatampe ne bityetye. Kwimwena bino bintu, kwitulengejanga tukulupile na kusumininwa’mba tutōtanga Yehova mu muswelo waitabije.

14. Mungya Bene Kolose 3:12-14, le i muswelo’ka umo otubwanya kulombola’mba twisenswe bininge batwe bene na bene?

¹⁴ Bisonekwa bitusoñanya’mba, “mwisanswei bininge banwe bene na bene.” (1 Pe. 4:8) Muswelo umo otulombolanga buno buswe i kwilekela batwe bene na bene ne kwitūkijija mityima pa kubulwa kubwaninina kwetu. Kadi tukimbanga mikenga ya kulombola kizaji ne buntu ku bonso badi mu kipwilo, enka ne ku boba padi betusanshije. (Tanga Bene Kolose 3:12-14.) Buno buswe, bwituyukanyanga bu bene Kidishitu ba bine.

15. Le i mu myanda’ka mikwabo motulonda muswelo wādi utōta bene Kidishitu ba mu myaka katwa kabajinji?

¹⁵ Tulondanga muswelo wādi utōta kipwilo kya bwine Kidishitu kya mu myaka katwa kabajinji ne mu myanda mikwabo. Kimfwa, twi balongololwe na mobādi balongolwedilwe ​—tudi na batadi bendakana, bakulumpe, ne bengidi ba mingilo​—monka mobādi bekadile nabo mu myaka katwa kabajinji. (Fid. 1:1; Tet. 1:5) Kadi pamo bwa mu myaka katwa kabajinji, tulēmekele bijila bya Leza pa mwanda utala kusambakena pamo ne busongi, pa buujila bwa mashi, ne pa kukinga kipwilo ku banonga-bibi bampikwa kwisāsa.​—Bil. 15:28, 29; 1 Ko. 5:11-13; 6:9, 10; Bah. 13:4.

16. Le binenwa bidi mu Bene Efisesa 4:4-6, bitufundija bika?

¹⁶ Yesu wānenene amba bantu bavule bakanena’mba i bandi bana ba bwanga, ino ke bonsopo bakekala ba bine. (Mat. 7:21-23) Bisonekwa nabyo byābadikile kudyumuna’mba mu mafuku a mfulo, bantu bavule bakekala “na mumwekelo wa bwine Leza.” (2 Tm. 3:1, 5) Kadi Bible witusapwila patōkelela’mba kudi’tu “lwitabijo lumo” lwitabijibwe na Leza.​—Tanga Bene Efisesa 4:4-6.

17. Le i bāni balonda Yesu dyalelo kadi badi na lwitabijo lumo lwa bine?

¹⁷ Lelo i bāni badi na lwitabijo lwa bine dyalelo? Tubabandaula kala bukamoni. Tulondanga mutōtelo wāfundije Yesu, kadi wālondele ne bene Kidishitu ba mu myaka katwa kabajinji. Malondololo i ano amba, i Batumoni ba Yehova. Bine, tudi na dyese dikatampe dya kwikala bantu ba Yehova ne dya kuyuka bubine butala padi Yehova ne pa mpango yandi! Nanshi tukulupilei nyeke na kusumininwa’mba tudi mu bubine.