1. Muloñadi antu amavulu chinaluwankeniwu?

KUDI nsakililu jajivulu makonu jahoshaña nawu tudi akwaKristu nawa nawu twadifukulaña kudi Nzambi munjila yetejayi. Dichinaleteshi antu amavulu kuluwankana. Ehulaña nawu: “Komana kudihu nsakililu yimu yalala, tahindi nsakililu yejima yamuzañaleshaña Nzambi?” Komana tweluka chikupu netu yuma yitwadizishaña dichalala nawa njila yadifukwilañamu aYinsahu jaYehova makonu diyi njila yetejayi Yehova? Komana chikutwesheka kukuhwelela yuma yejimiyi? Tushinshikenu wunsahu.

2. Kwesekeja na 1 ATesalonika 1:5, muloñadi kapostolu Pawulu chelukiliyi nindi yuma yakuhweleleliyi dichalala?

² Kapostolu Pawulu wakuhweleleli chikupu nindi ichi dichalala. (Tañenu 1 ATesalonika 1:5.) Hakuhweleleli chumichi hamuloña wakutiya hohu kuwahaku. Pawulu wadizileña nankashi Izu daNzambi. Wakuhweleleli nindi “Nsona yejima ayonena kudi Nzambi.” (2 Tim. 3:16) Yumanyi yadiziliyi? MuNsona, Pawulu wawaninimu wunsahu wamwekesheleña nawu Yesu diyi Mesiya akaniniwu, niwunsahu wamwekesheleña nawu akulumpi jansakililu yawaYudeya adiwili chumichi. Ahosheleña nawu ayidizishileña antu chalala chaNzambi, ilaña elileña yuma yahelayi Nzambi. (Tit. 1:16) Kwambukaku nawena, Pawulu hatondelihu yuma yatela kukuhwelelayi Mwizu daNzambi niyatela kubula kukuhwelelayiku. Watañishileña nikuzatisha yuma “yejima yaNzambi.”—Yilw. 20:27.

3. Komana twatela kwiluka ñakwilu yamalwihu ejima kulonda tukuhweleli netu ichi dichalala? (Talenu cheñi chikasha chinakwila nawu “ Nyidimu yaYehova niYitoñojoka Yindi ‘Yasweja Kuvula Kutwesha Kuyichinda Nehi.’”)

 ³ Antu amakwawu atoñojokaña nawu kudifukula kwalala kwatela kwakula malwihu ejima, nimalwihu abula kwakulawu muBayibolu. Komana iyi yuma yahoshañawu dimu? Talenu chakutalilahu chaPawulu. Wayilejeli akwawu akwakudifukula nindi “esekenu yuma yejima nakutondahu yayiwahi,” ilaña wahosheli nindi kudi yuma yayivulu yabulili kutiyishishayi. (1 Tes. 5:21) Wasonekeli nindi, “tweluka hohu chanti,” nawa wabombelelihu nindi, “tunakumona chiwahi wanyi, muloña chidi neyi tunakutala hachibanjilu chachikuñu.” (1 Kor. 13:9, 12) Pawulu hatiyishishili yuma yejimaku; ninetu twatiyishishaña yuma yejima wanyi. Ilaña Pawulu watiyishishili chalala chahosha hayuma yafuukulayi Yehova. Welukili yuma yayivulu yamuletesheli kukuhwelela nindi wadiña nachalala.

4. Chumanyi chikutukwasha kukuhwelela chikupu netu ichi dichalala, nawa yumanyi yitukuhanjekahu hadi akwaKristu alala?

⁴ Njila yimu yinateli kutukwasha kukuhwelela chikupu netu ichi dichalala, hikwesekeja yuma yelileñayi Yesu nayuma yinakwilawu aYinsahu jaYehova makonu. Muchinu chibaaba, tukumona akwaKristu alala (1) chakaanañawu kupesha, (2) chalemeshawu ijina daYehova, (3) chakeñawu chalala (4) nichadikeñawu wumu namukwawu chikupu.

5. Yumanyi yitwadizilaña kudi Yesu kutalisha hanjila yayiwahi yakudifukwilamu kudi Nzambi, nawa tunateli kuzatisha ñahi yuma yadizishiliyi?

⁵ Chineli Yesu wamukeñeli nankashi Yehova, wadifukwileña kudi yena hohu, hampinji yadiñayi mwiwulu nihamaseki. (Luka 4:8) Wayilejeli niatumbanji twindi nindi  adifukuleña hohu kudi Yehova. Yesu hela atumbanji twindi ashinshika hiyazatishileña yifwikija hakudifukulaku. Chineli Nzambi hiSpiritu, kwosi chuma chidi chejima chikutuñayi muntu chinateli kwesekana naYehovaku. (Isa. 46:5) Indi kutuña nyevulu yawantu atoñojokañawu antu amakwawu nawu ajila nikutachika kudifukula kudi wena? MuNshimbi Ikumi yamuchiyedi Yehova wahosheli nindi: “Kudilila mukishi wakusoña, hela kufwikija chuma chamwiwulu, hela chuma chahamaseki munu mwishina,. . . chinjila. Kuyifukamina hela kuyipesha chinjila.” (Kwid. 20:4, 5) Antu akeñaña kumuzañalesha Nzambi eluka nawu hakeñaña nindi tudifukuleña kudi ankishiku.

6. Njilanyi yakudifukwilamu yazatishaña aYinsahu jaYehova makonu?

⁶ Antu adiza nsañu yakunyaaka ahoshaña nawu mumpinji yawapostolu akwaKristu adifukwileña hohu kudi Nzambi. Chakutalilahu, mukanda wumu wakunyaka wahosha nawu akwaKristu akusambila “aheleli kuzatisha nyevulu hakudifukula.” Makonu, aYinsahu jaYehova alondelaña njila yazatishileña akwaKristu akusambila. Hitwalombaña kunyevulu yawantu amonañawu nawu ajila hela añeluku; nawa hitwalombaña kudi Yesuku. Cheñi, hitwabuzwilaña mpandelu hela chuma chidi chejima chinakumwekesha nawu tunakudifukula kwituñaku. Hela chakwila muntu wukutukanjikija kwila chuma chamuchidinyi, twovwahilaña mazu aYesu akwila nawu: “Watela kudifukula kudi Yehova Nzambi yeyi.”—Mat. 4:10.

7. Chambwinyi chekala hakachi kawaYinsahu jaYehova nansakililu yikwawu?

⁷ Makonu, antu amavulu akeña kutiyilila kudi antañishi aya mpuhu. Ayitiyaña kuwaha chakwila adifukulaña kudi wena. Antu amavulu enzalaña mumachechi awu, alandaña nyikanda yawu nawa ayinkaña mali amavulu. Antu amakwawu akuhwelelaña mazu ejima ahoshañawu. Azañalalaña nankashi hakumona awa antañishi neyi chinateli kuzañalalawu neyi amumona Yesu. Kwambukaku, antu adifukulaña kudi Yehova munjila yayiwahi alondelaña antu wanyi. Hela chakwila twayilemeshaña antu alombolaña, wejima wetu twovwahilaña ntañishilu yaYesu yakwila nawu: “Wejima wenu mudi amanakwamuntu.” (Mat. 23:8-10) Hitwadifukulaña kudi antuku, chili anlomboli jansakililu hela anlomboli akwamatuña nachiyuulu. Hitwetejaña nsakililu yawu hela yuma yafwilañawu kwilawuku. Hitwadiñijaña munsañu jamatuña nachiyuluku nawa twambukaku nakaayi. Muyuma yejimiyi, twekala ambukaku chikupu nansakililu yejima yaditenaña nawu tudi akwaKristu.—Yow. 18:36.

8. Tuneluki ñahi netu Yehova nakukeña ijina dindi adilemeshi nawa adiluki kudi antu ejima?

⁸ Mpinji yimu, Yesu walombeli nindi: “Tata, lemeshaku ijina deyi.” Yehova wakwili iku kulomba nezu datiyakana kufuma mwiwulu, nakushimuna nindi wukulemesha ijina dindi. (Yow. 12:28) Hampinji yazatileñayi mudimu windi, Yesu walemesheli ijina daTata yindi. (Yow. 17:26) Dichi akwaKristu alala eluka nawu chalema nankashi kuzatisha ijina daNzambi nikukwasha antu kulonda adiluki.

9. AkwaKristu akusambila amwekesheli ñahi nawu alemesheli ijina daNzambi?

⁹ Mumafuku awapostolu, hanyima yakutuña chipompelu chawakwaKristu, Yehova “[wabalumukilili] kudi antu akunyuza katachi nakunonamu antu ejina dindi.” (Yilw. 15:14) Dichi awa akwaKristu akusambila atiyileña kuwaha kuzatisha ijina daNzambi nikulejaku antu kulonda adiluki. Azatishileña ijina daNzambi neyi anakushimwina nimunyikanda  yawu yasonekeliwu. * Amwekesheli nawu wena hohu diwu atiyakesheleña ijina daNzambi.—Yilw. 2:14, 21.

10. Wunsahwinyi wunakumwekesha nawu aYinsahu jaYehova hohu diwu atiyakeshaña ijina daYehova?

¹⁰ Komana aYinsahu jaYehova hiyantu ejina daYehova? Talenu iwu wunsahu. Makonu, anlomboli ansakililu anazati nañovu kulonda asweki ijina daNzambi. Adifumisha mumaBayibolu awu abalumunawu nawa adikaanishaña kudizatisha mumachechi awu. * Kwosi muntu wukukaana nindi aYinsahu jaYehova hohu diwu alemesha ijina daNzambi nawa adizatishaña. Tunakutandisha ijina daNzambi kulonda antu ejima adiluki, kubadika nsakililu jejima. Tunakuzata nañovu kulonda twikali neyi mwatalisha ijina detu, netu tudi aYinsahu jaYehova. (Isa. 43:10-12) Tunedishi maBayibolu akubadika ha 240 miliyoni aNew World Translation of the Holy Scriptures mwazatishawu ijina daYehova hamaluña hidekala nawa hadifumishiliwu kudi akwakubalumuna Bayibolu. Nawa tunakwidisha nyikanda yashindamena haBayibolu yazatishaña ijina daYehova mumadimi akubadika ha 1,000.

11. AkwaKristu akusambila amwekesheli ñahi nawu akeñeli chalala?

¹¹ Yesu wakeñeli chalala, chalala chahosha hadi Nzambi ninkeñelu Yindi. Yuma yelileñayi Yesu yamwekesheleña nawu wakuhweleleli  ichi chalala nawa walejeleñaku antu ichi chalala. (Yow. 18:37) Atumbanji twaYesu alala niwena akeña ichi chalala. (Yow. 4:23, 24) Dichi, kapostolu Petulu wateneni chikuhwelelu chawakwaKristu nindi “njila yachalala.” (2 Pet. 2:2) Chineli akeñeli nankashi chalala, akwaKristu akusambila akaanineña yitoñojoka yamunsakililu, tushidikilu niyitoñojoka yawantu yaditadikishileña nachalala. (Kol. 2:8) Nimakonu, akwaKristu alala azataña nañovu kulonda “[atwalekihu] kwenda muchalala. Yuma yelañawu muchihandilu chawu niyuma yakuhwelelawu yashindamena Hezu daYehova.”—3 Yow. 3, 4.

12. Izanvu Dalombolaña delaña ñahi neyi diluka nawu twatela kuhimpa ntiyishishilu yetu, nawa muloñadi chahimpilañawu?

¹² Antu jaNzambi makonu ahoshaña wanyi nawu atiyishishaña yuma yejima yekala muBayibolu. Mpinji yikwawu, aluwañeshaña chalumbululañawu ntañishilu yamuBayibolu hela chalombolañawu chipompelu. Chumichi hichatela kutuhayamishaku. Bayibolu yalumbulula hatooka nawu antu jaNzambi atiyishishaña chalala mukuhita kwampinji. (Kol. 1:9, 10) Yehova wasololaña chalala chovu-chovu nawa twatela kudiwunjika hampinji yitunakuhembelela chejeji chachalala kutoñeka. (Yish. 4:18) Neyi Izanvu Dalombolaña diluka nawu twatela kuhimpa ntiyishishilu yetu hela kwilahu chuma, ashikenaña kuhimpa hohenohu. Machechi amavulu ahimpaña ntañishilu yawu kulonda ayitiyisheña antu jawu kuwaha hela kufwila kuya mpuhu mukaayi. Ilaña aYinsahu jaYehova ahimpaña muloña wakwila akeñaña kuswina kwakwihi naNzambi nikudifukula kudi yena neyi chelileñayi Yesu. (Yak. 4:4) Twahimpaña hohu muloña wakwila twatiyishishaña Bayibolu bayi neyi hamuloña wakwila yitoñojoka yawantu mukaayi yinahimpikiku. Twakeña chalala.—1 Tes. 2:3, 4.

13. Chilwilwinyi chabadika chadiña nawakwaKristu alala, nawa aYinsahu jaYehova makonu achimwekeshaña ñahi?

¹³ AkwaKristu akusambila ayilukili muloña wayilwilu yawu yayiwahi. Ilaña chilwilu chabadika chayilukiliwu nachu hikukeña. Yesu wahosheli nindi: “Neyi mukeñañana, dihu hakuyilukilawu kudi antu ejima nawu mudi atumbanji twami.” (Yow. 13:34, 35) Makonu, aYinsahu jaYehova adikeña nawa anuñañana mukaayi kejima. Twambuka nansakililu yejima, muloña twekala neyi chisaka hela chakwila twafuma kumatuña nikuyisemwa yamboka-mboka. Twamonaña iku kukeña kwalala hakupompa kwahachipompelu, hakupompa kwanyanya nikweneni. Chumichi chatukwashaña kwiluka netu twadifukulaña kudi Yehova munjila yetejayi.

14. Kwesekeja naAKolosi 3:12-14, tunateli kumwekesha ñahi netu twadikeña chikupu wumu namukwawu?

¹⁴ Nsona jatulejaña nawu “dikeñenu chikupu wumu namukwawu.” (1 Pet. 4:8) Njila yimu yitwamwekeshelañamu iku kukeña hikudanakena wumu namukwawu nikuditiyilila. Twahanaña kudi antu ejima nikuyimwekeshela chisambu ejima amuchipompelu, kushilahu niantu atuneñeshaña. (Tañenu AKolosi 3:12-14.) Neyi tumwekesha kukeña kwamuchidiwu, tunakumwekesha netu tudi akwaKristu alala.

15. Njilanyi jikwawu jinakumwekesha nawu twadifukulaña neyi chadifukwileñawu akwaKristu akusambila?

¹⁵ Twadifukulaña neyi chadifukwileña chipompelu chawakwaKristu akusambila. Chakutalilahu, atulombolaña neyi chayilombweleñawu akwaKristu akusambila. Tukweti ankoñi endaña, akulumpi niankoñi akuzatila, neyi chelileñawu. (Fwili. 1:1; Tit. 1:5) Kufwana awa akwaKristu, twalemesha nshimbi jaYehova jahosha hawuvumbi nihawulu,  chahoshayi Nzambi hakuzatisha mashi nawa twakiñaña chipompelu neyi kudi muntu wunakubula kulondela nshimbi jaNzambi.—Yilw. 15:28, 29; 1 Kor. 5:11-13; 6:9, 10; Heb. 13:4.

16. Chumanyi chitunakudizila kumazu adi haAEfwesesa 4:4-6?

¹⁶ Yesu wahosheli nindi amavulu akahoshaña nawu hiyatumbanji twindi, ilaña ejima hiyakekala atumbanji alalaku. (Mat. 7:21-23) Nsona nijena jatulejaña nawu kumafuku akukuminina, antu amavulu akamwekanaña “neyi kwiji amwakama Nzambi.” (2 Tim. 3:1, 5) Ilaña Bayibolu yatulejaña hatooka nawu kwekala hohu “chikuhwelelu chimu” chetejayi Nzambi.—Tañenu AEfwesesa 4:4-6.

17. Anyi elaña yuma yelileñayi Yesu makonu nawa akuhwelela yuma yoyimu?

¹⁷ Anyi akuhwelela yuma yoyimu makonu? Tunahanjeki hawunsahu. Tunahanjeki dehi cheñi hanjila yakudifukwilamu yashiliku Yesu nawa yazatishileñawu akwaKristu akusambila. AYinsahu jaYehova hohu diwu elaña yumiyi. Hikukooleka chikupu kwikala antu jaYehova, kwiluka chalala chahosha hadi Yehova ninkeñelu yindi. Tutwalekihu kukuhwelela chikupu netu ichi dichalala.