1. Ang’o momiyo ok yotga ne ji mang’eny fwenyo din madier?

NITIE dinde mathoth ma luongore ni Jokristo ma wacho ni gilamo Nyasaye e yo moyiego. Mano e momiyo ok yotga ne ji mang’eny fwenyo din madier! Gipenjore kama: “Be nitie din achiel ma lamo Nyasaye, koso dibed ni Nyasaye oyie gi dinde duto?” Be wan gadier chuth ni wan e ma wapuonjo adiera, kendo ni Joneno mag Jehova e ma lamo Jehova e yo ma odwaro ni olamego? Be ng’ato nyalo bedo gadier e wi wechego? We wane ane gik ma nyalo miyo wabed gadier ni wan e ma walamo Nyasaye e yo moyiego.

2. Ka luwore gi 1 Jo-Thesalonika 1:5, en ang’o momiyo Paulo ne ni gadier ni noseyudo adiera?

² Jaote Paulo ne ni gadier chuth ni noseyudo adiera. (Som 1 Jo-Thesalonika 1:5.) Paulo ne ok oyie ayiea gi wechego mana nikech ne gimoro chunye, to Paulo ne puonjore Wach Nyasaye gi kinda. Noyie ni “Ndiko duto okudh gi much Nyasaye.” (2 Tim. 3:16) Puonjruok e yo ma kamano nokonye nade? Ndiko nokonye fwenyo ni Yesu e ma ne Mesia ma nosingi kendo ni mano e adiera ma jotelo mar din mar Jo-Yahudi notamore yiego. Jotend dindego ne wacho ni gipuonjo ji adiera mar Nyasaye, kata kamano, ne gitimo gik ma Nyasaye osin-go. (Tito 1:16) Paulo to nopogore kodgi nikech noyie gi gik moko duto ma Wach Nyasaye puonjo, kar luwo mana puonj moko manie Ndiko. Noikore puonjo ji “dwaro mar Nyasaye” kendo timo gik ma ne opuonjogo.​—Tich 20:27.

3. Be ochuno ni nyaka wayud dwoko mag penjo duto e ka wabed gadier ni waseyudo adiera? (Ne sanduk ma wiye wacho ni, “ Gik ma Jehova Osetimo kod Moparo ‘Ng’eny Miwuoro.’”)

 ³ Jomoko paro ni Jokristo madier onego obed ni nyalo dwoko penjo moro amora, kata mana penjo ma dwokogi ok yudre e Muma. Be mano en gima nyalore? Wane ane ranyisi mar Paulo. Nojiwo Jokristo wetene ni gibed “gadier kuom weche duto” to e ma pod en bende noyie ni nitie gik moko ma ne ok ong’eyo. (1 The. 5:21) Paulo nomedo jiwo wechego kowacho kama: “Wan gi ng’eyo morem,” kendo “waneno gik moko e yo ma mirimiri kokalo kuom kio mar chuma.” (1 Kor. 13:9, 12) Paulo ne ok ong’eyo gik moko duto, to wan bende ok wanyal ng’eyo gik moko duto. Kata kamano, Paulo nong’eyo adiera madongo e wi Nyasaye. Gik ma nong’eyogo nokonye bedo gadier ni noseyudo adiera.

4. Ang’o ma nyalo miyo wabed gadier ni waseyudo adiera, to en ang’o ma wabiro nono e wi Jokristo madier?

⁴ Achiel kuom gik ma nyalo miyo wabed gadier chuth ni waseyudo adiera, en pimo ranyisi ma Yesu noketo ne Jokristo mondo oluw e yo monego gilamgo Nyasaye, kod gik ma Joneno mag Jehova timo e kindegi. E sulani, wabiro neno ni Jokristo madier onego (1) okwed lamo mag sanamu, (2) omi nying Jehova luor, (3) oher adiera, kendo (4) oher jowetegi gi hera matut.

5. Ang’o ma wapuonjore kuom Yesu e yo monego walamgo Nyasaye, to ere kaka wanyalo tiyo gi weche ma nopuonjogo?

⁵ Nikech Yesu nohero Jehova Nyasaye ahinya, nolame gi chunye duto e kinde ma ne en e polo kod ka ne en e piny ka. (Luka 4:8) Nopuonjo jopuonjrene bende mondo otim  kamano. Yesu kod jopuonjrene ne ok otiyo gi sanamu moro amora e lamo Nyasaye. Nikech Nyasaye en roho, onge gimoro amora ma dhano nyalo loso ma nyalo chalo kode! (Isa. 46:5) To nade loso sanamu mag joma iluongo ni jotakatifu kendo lamogi? Kuom chike apar ma ne Jehova omiyo Jo-Israel, chik mar ariyo ne wacho kama: “Kik ilos kido mopa mar gimoro amora manie polo malo, kata manie piny mwalo . . . Kik ikulrinegi.” (Wuok 20:4, 5) Mago weche ma tiendgi winjore maler ne joma lamo Nyasaye gadier.

6. En yo mane ma Joneno mag Jehova lamogo Nyasaye e kindegi?

⁶ Joma nono weche histori bende oyie ni Jokristo ma kinde mokwongo ne ochiwore chuth ne Nyasaye. Kuom ranyisi, buk moro miluongo ni History of the Christian Church nowacho ni ne en “gima kuero” ne Jokristo mokwongo paro apara ni ginyalo tiyo gi kido e lamo Nyasaye. Joneno mag Jehova e kindegi luwo ranyisi ma ne Jokristo mokwongogo oketo. Ok walam kido mag jotakatifu kata malaike. Kata mana Yesu bende ok walam. Bende, ok wakulre ne bandera kata timo gimoro amora ma nyalo nyiso ni walamo sirkande mag piny. Kata ang’o ma timre, onego wang’ad e chunywa ni wabiro dhi nyime luwo weche ma Yesu nowachogi: “Jehova Nyasachu e ma onego ulam.”​—Mat. 4:10.

7. Gin pogruok mage ma nenore e kind Joneno mag Jehova kod dinde mamoko?

⁷ Tinde ji mang’eny ohero luwo jotend dinde ma nigi huma. Giherogi ahinya ma chal mana ka gima gilamogi. Ji pong’oga kanisnigigo, nyiewoga bugegi, kendo gologa chiwo madongo dongo mondo osirgo riwruoge ma dindego ochako. Moko kuomgi yiega gi weche duto ma jotend dindego wacho. Gitimorega malich sama gineno jotend dindego mana ka gima gineno Yesu! Mopogore kodgi, jotich Jehova madier ok nega dhano moro amora kaka jatendgi. Kata obedo ni wamiyo joma tayowa luor, waluwo weche ma Yesu nowacho niya: “Uduto un owete.” (Mat. 23:8-10) Ok walamga dhano, bed ni gin jotend dinde kata josiasa. Bende, ok wachiwga pesa mondo gisirgo riwruogegi. Ok wadonjre e weche mag pinyni. Weche kaka mago miyo wapogore ahinya gi jogo ma luongore ni Jokristo.​—Joh. 18:36.

8. Ere kaka wang’eyo ni Jehova dwaro ni nyinge omi duong’ kendo mondo olande ne ji?

⁸ Nitie kinde ma Yesu nolamo niya: “Wuora, mi nyingi duong’.” Jehova nodwoko lamono kowacho gi dwol maduong’ moa e polo ni nodhi miyo nyinge duong’. (Joh. 12:28) Kinde duto ma ne Yesu ni e piny ka koyalo, nomiyo nying Wuon-gi duong’. (Joh. 17:26) To mano e momiyo Jokristo madier bende mor tiyo gi nying Nyasaye kendo lando nyingno ne jomamoko.

9. Ere kaka Jokristo mokwongo nonyiso ni ne gimiyo nying Nyasaye luor?

⁹ Mapiyo bang’ ka nosechak kanyakla mar Jokristo mokwongo, Jehova noparo joma a e ogendni mamoko mondo “okaw kuomgi jo ma iluongo gi nyinge.” (Tich 15:14) Jokristogo ne mor tiyo gi nying Nyasaye kendo lando nyingno ne jomamoko. Ne gitiyo gi nyingno e tijgi mar yalo kod e buge ma ne gindiko. * Ne ginyiso ni gin joma iluongo gi nying Nyasaye.​—Tich 2:14, 21.

10. Ang’o ma nyiso ni Joneno mag Jehova gin joma iluongo gi nying Nyasaye?

 ¹⁰ Be Joneno mag Jehova e joma iluongo gi nying Nyasaye? Wane ane gik ma nyiso ni en kamano. E kindegi, jotend dinde osetimo gimoro amora ma ginyalo mondo gipand nying Nyasaye. Gisegolo nyingno e loko mag Mumbegi, kendo gisegoyo marfuk tiyo gi nyingno e kanisnigi. * Be nitie ng’ama nyalo tamore ni Joneno mag Jehova e joma omiyo nying Nyasaye luor mowinjore? Wasemiyo nying Nyasaye ong’ere ne ji moloyo din moro amora, kendo watimo duto ma wanyalo mondo wadag ka luwore gi nyingwa miluongowago ni Joneno mag Jehova. (Isa. 43:10-12) Wasegoyo kopi mag Muma mar Loko mar Piny Manyien mokalo milion 240, kendo Mumano osedwoko nying Jehova kuonde duto ma joloko mamoko mag Muma ne ogolee. Bende, wagoyo buge ma lero Muma kendo ma miyo nying Jehova duong’ e dhok mokalo 1,000!

11. Ere kaka Jokristo mokwongo nonyiso ni ne gihero adiera?

¹¹ Yesu nohero adiera, tiende ni, adiera e wi Nyasaye kod dwach Nyasaye. Yesu nodak ka luwore gi adierago kendo nopuonjo jomamoko adierago. (Joh. 18:37) Jolup  Yesu madier bende nohero adiera gi chunygi duto. (Joh. 4:23, 24) Jaote Petro noluongo Jokristo ni joma wuotho e “yo mar adiera.” (2 Pet. 2:2, The Bible in Luo, 1968) Nikech Jokristo mokwongogo nohero adiera ahinya, ne gikwedo puonj mag dinde mag miriambo, timbegi, kod paro moro amora ma ne ok winjre gi adiera. (Kol. 2:8) Kamano bende, Jokristo madier temo matek mondo ‘gidhi nyime wuotho e adiera’ ka gijiwo puonjgi kod gik ma giyiego ka luwore gi Wach Jehova.​—3 Joh. 3, 4.

12. Ang’o ma joma tayowaga timo sama gifwenyo ni nitie lokruok moro monego otim e wi puonj moro, to ang’o momiyo gikawoga okang’ ma kamano?

¹² Joneno mag Jehova ok wachga ni ging’eyo adiera e yo ma kare chuth. Nitie kinde ma gisebetga gi paro ma ok kare e wi puonj mag Muma kata yore ma itayogo riwruogwa. Mano ok onego okawwa gi wuoro. Ndiko nyiso maler ni ng’eyo makare e wi adiera medorega mosmos. (Kol. 1:9, 10) Jehova eloga adiera mosmos kendo dwarore ni wahore mondo wawinj tiend adierago. (Nge. 4:18) Ka joma tayowa ofwenyo ni nitie lokruok moro monego otim e wi puonj moro, ok gidikrega kawo okang’ mar timo lokruogno. Dinde mang’eny ma luongore ni Jokristo timoga lokruok mana ni mondo gimor jo kanisnigi kata mondo gichalre gi piny. Joneno mag Jehova to timoga lokruok mondo okonygi sudo machiegni gi Nyasaye, kendo mondo giluw machiegni ranyisi ma Yesu noketonegi. (Jak. 4:4) Sama watimoga lokruok, ok watimga kamano nikech yo ma ji nenogo weche koro opogore, to nikech wamedo winjo tiend ndiko e yo matut. Kuom adier, wahero adiera!​—1 The. 2:3, 4.

13. En kido mane maduong’ ma Jokristo madier nyiso, to ere kaka mano osenenore maler e kind Joneno mag Jehova e kindegi?

¹³ Hera e kido maduong’ moloyo ma ne dwarore ni Jokristo mokwongo obedgo. Yesu nowacho niya: “Ma e ma nomi ji duto ong’e ni un jopuonjrena ka un gi hera e kindu uwegi.” (Joh. 13:34, 35) E kindewagi, Joneno mag Jehova nigi hera kod winjruok e piny mangima. Wapogore gi dinde mamoko nikech kata obedo ni waa e ogendni mopogore opogore, dhoudi mopogore opogore, kendo kit ngimawa bende opogore, ok wayie mondo gik ma kamago opogwa. Kar mano, waherore mana kaka joot achiel. Wanenoga hera madier sama wan e chokruogewa mag kanyakla, mag alwora, kata chokruogewa madongo. Mano en achiel kuom gik ma nyiso ni wan e ma walamo Jehova e yo moyiego.

14. Ka luwore gi Jo-Kolosai 3:12-14, en yo mane maduong’ ma wanyalo nyisogo ni wahero jowetewa?

¹⁴ Muma jiwowa ni wabed gi “hera matut” e kindwa. (1 Pet. 4:8) Achiel kuom yore ma wanyisogo ni waherore en weyo ne jowetewa kethogi kendo nano kodgi. Bende, wamanyoga thuolo ma wanyalo bedogo jochiwo kendo rwako ji duto e kanyakla, moriwo nyaka jogo ma nyalo bedo ni ochwanyowa. (Som Jo-Kolosai 3:12-14.) Hera ma kamano e ma nyiso ni wan e Jokristo madier.

15. Gin yore mage mamoko ma wachalree gi Jokristo mokwongo?

¹⁵ Waluwoga ranyisi ma kanyakla mar Jokristo mokwongo noketonwa e weche mamoko bende. Kuom ranyisi, ochan riwruogwa  mana kaka nochan kanyakla mar Jokristo mokwongo. Wan bende wan gi jorit-alwora, jodong-kanyakla, kod jokony-tich mana kaka Jokristo mokwongogo. (Fil. 1:1; Tito 1:5) Kendo mana kaka Jokristogo, wachiwo luor ne chike ma Jehova oketo e weche mag nindruok kod kend kaachiel gi tiyo gi remo. Bende, nikech wadwaroga ni kanyakla mar Jokristo osik ka ler, joricho motamore loko chunygi gadier igologa e kanyakla.​—Tich 15:28, 29; 1 Kor. 5:11-13; 6:9, 10; Hib. 13:4.

16. Ang’o mipuonjori e weche ma yudore e Jo-Efeso 4:4-6?

¹⁶ Yesu nowacho ni ji mang’eny ne dhi wacho ni gin jopuonjrene, kata kamano, thothgi ne ok dhi bedo jopuonjrene madier. (Mat. 7:21-23) Muma nokoro bende ni e ndalo mag giko, ji mang’eny ne dhi “nenore gi oko ni gin jo moluoro Nyasaye.” (2 Tim. 3:1, 5) Kata kamano, Muma wacho maler ni nitie mana “yie achiel” ma Nyasaye oyiego.​—Som Jo-Efeso 4:4-6.

17. Gin jomage ma gin jolup Yesu e kindegi kendo ma nigi yie achiel?

¹⁷ Gin jomage ma nigi yie achiel e kindegi? Sulani osekonyowa fwenyo wachno. Waseneno weche ma Yesu nopuonjo e wi lamo madier, kod kaka Jokristo mokwongo noluwo wechego. Omiyo, dwoko mar penjono en ni gin Joneno mag Jehova kende. To mano kaka odhialwa gi dhial makende mar bedo Joneno mag Jehova mong’eyo adiera e wi Jehova kod dwache! Mad wadhiuru nyime mako motegno adiera ka wan gadier chuth ni ma e adiera.