1. Engvângin nge mi tam tak chu an rilru a buai?

PATHIAN pawm tlâka chibai bûk nia inchhâl Kristian hmingpu sâng tam tak an awm thei a. Chuvângin, mi tam tak chu an rilru a buai zo ta! Anni chuan, “Sakhaw dik pakhat a awm em? Nge ni a, sakhua zawng zawng hian Pathian a tilâwm vek zâwk?” tiin an zâwt a ni. Kan thu zirtîrte hi thutak a ni tih leh tûn laia Jehova Thuhretute biak dân hi Jehova’n a pawm tih i ring nghet tlat em? Chutiang rinnghehna neih chu a theih tak tak em? Finfiahnate hi i lo ngaihtuah ang u.

2. Thessalonika thawn khat 1:5-a sawi angin, engvângin nge Paula’n a thurin chu thutak a ni tih a rinngheh tlat?

² Tirhkoh Paula chuan a thurin chu thutak a ni tih a ringnghet tlat a. (1 Thessalonika 1:5 chhiar rawh.) Chu a rinnghehna chu rilru veinaa innghat a ni lo. Ani chu Pathian Thu zirlai taima tak a ni a. “Pathian Lehkha Thu zawng zawng hi Pathian thâwk khuma pêk a ni,” tih a ring tlat a ni. (2 Tim. 3:16) A nih chuan, engte nge a zir? Paula chuan Bible-ah hian Isua hi thutiam Messia a ni tih leh chu chu Juda sakhaw hruaitute’n an ngaihthah lui tih hnial rual loh finfiahna a hmu a. Chûng sakhaw hruaitu vervêk takte chuan Pathian aiawhtute niin inchhâl mah se, an thiltihin Pathian an hnâwl a ni. (Tit. 1:16) Anmahni ang lo takin, Paula chuan Pathian Thua-ah hian a rin duhna lai leh rin duh lohna laite chu a thlang lo. Chu aiin, “Pathian rêl zawng zawng azain” a zirtîrin, a nunpui zâwk a ni.—Tirh. 20:27.

3. Rinnghehna nei tûr chuan zawhna zawng zawng atâna a chhânnate kan hriat vêk a ngai kher em? (“ Jehova Thiltihte leh Ngaihtuahnate Chu ‘Chhiar Sên Rual A Ni Lo,’” tih bâwm chu en bawk rawh.)

³ Mi ṭhenkhatin sakhaw dik chuan Bible-in chiang taka  chhânna a pêk loh zawhnate pawh tiamin, zawhna zawng zawng chhâng thei vêk tûrin an ngai a. Chutianga beisei chu thil inâwm a ni em? Paula entîrna hi han ngaihtuah teh. Ani chuan a Kristian unaute chu “engkim fiah zâwk” tûrin fuih mah se, a hriatthiam loh thil tam tak a awm tih pawh a pawm a. (1 Thes. 5:21) Ani chuan: “A kim lovin kan hria a,” tia a ziah hnuah, “dârthlalangah kan hmu riai ruai a ni,” tiin a ziah belh a ni. (1 Kor. 13:9, 12) Paula chuan engkim a hre vek lo va; keini pawhin ka hre vek lo. Mahse, ani chuan Jehova thiltum bulpuite chu a hre thiam a. A thurin chu thutak a ni tih pawh a chiang hle!

4. Engtin nge thutak kan nei tih kan rinna chu kan tihngheh lehzual theih a, Kristian dikte chungchângah eng nge kan ngaihtuah ang?

⁴ Thutak kan nei tih kan rinna kan tihngheh lehzual theih dân kawng khat chu Isua entawn tûr siam biak dân dik leh tûn laia Jehova Thuhretute biak dân khaikhin hi a ni a. He thuziakah hian Kristian dikte chuan (1) milem biakna an hnâwl, (2) Jehova hming an zah, (3) thutak an hmangaih, tih leh (4) tih tak zeta inhmangaih tawnna an nei tihte kan hmu ang.

5. Pathian biak dân dik chungchângah Isua hnên aṭangin nge nge kan zir a, a thu zirtîrte chu engtin nge kan nunpui theih?

⁵ Isua chuan Pathian hmangaihna thûk tak a neih avângin, vâna a awm lai leh he leia a awm laiin, thinlung zawng zawngin Jehova chauh chibai a bûk a. (Lk. 4:8) A zirtîrte pawh chutianga ti tûrin a zirtîr a ni. Isua leh a zirtîr rinawmte chuan Pathian biaknaah milem an hmang ngai lo. Pathian chu hmuh theih a nih loh avângin, mihring tu mah hian Pathian anpui eng thil mah an siam thei lo! (Is. 46:5) A nih leh, mi thianghlim tia an  koh milemte leh an hnêna ṭawngṭai chungchâng hi eng nge ni ve? Thu Sâwm pêka a pahnihnaah chuan, Jehova’n: “Milem siam chawp leh thil, a anpui rêng rêng, chung lam vâna mi emaw, hnuai lam leia mi emaw, lei hnuai lama tuia mi emaw-i tân i siam tûr a ni lo: Chûng chu chubai i bûk tûr a ni lo,” tiin a sawi a. (Ex. 20:4, 5) Chûng thute chu Pathian tilâwm duhtute tân chuan a fiah hle a ni.

6. Tûn laia Jehova Thuhretute’n eng ang biak dân nge an zui?

⁶ Chanchin zir mite chuan Kristian hmasate’n Pathian hnênah inpêkna pumhlûm an hlân tih an pawm a. Entîr nân, History of the Christian Church tih lehkhabu chuan Kristian hmasate’n Pathian biakna hmuna milemte hman chu “an hua” tih a sawi a ni. Tûn laiah pawh, Jehova Thuhretute chuan kum zabi khatnaa Kristiante tih dân chu an zui a. “Mi thianghlimte,” leh vântirhkohte lim hnênah kan ṭawngṭai lo va; Isua hnênah tak ngial pawh kan ṭawngṭai hek lo. Ram sawrkâr aiawh flag emaw, thil dang eng emaw pawh ni se, chibai kan bûk lo bawk. Eng thil pawh lo thleng se, Isua thusawi: “Lalpa i Pathian chibai bûk la,” tih chu zawm kan tum tlat a ni.—Mt. 4:10.

7. Jehova Thuhretute leh sakhaw dangte inkârah eng danglamna chiang tak nge awm?

⁷ Tûn laiah, mi tam tak chuan thuhriltu hmingthang tak takte thusawi chu ngaihthlâk an duh a. Chûng thusawitute chu an duh êm avângin chibai an bûk lo chauh a ni. An biak inahte kalin an lehkhabu tihchhuahte chu an lei a, thawhlâwm tam tak tak an thawh bawk. Mi ṭhenkhat chuan chûng thuhriltute sawi tawh phawt chu an ring a. Isua hmuh an châk ang tlukin, chûng thuhriltute hmuh chu an châkin, anni chu an ngaisâng hle! Chumi nêna inkalh takin, Jehova betu dikte chuan rawngbâwltute hnung an zui lo va. Min hruaitu unaute chu zah hle mah ila, Isua zirtîrna chiang tak: “Nangni zawng zawng chu unau in ni si a,” tih hi kan pawm a ni. (Mt. 23:8-10) Sakhaw hruaitute an ni emaw, ram hruaitute an ni emaw pawh ni se, mihring tu mah hi chibai kan bûk lo va. An thiltumte pawh kan thlâwp hek lo. Chu aiin, tualdâwiha awmin, khawvêl lakah kan inla hrang a ni. Chûng dinhmunahte chuan Kristiana inchhal pâwl dang tam takte lakah kan danglam a ni.—Joh. 18:36.

8. Jehova chuan a hming chawimawi leh mi tinin an hriat a duh tih engtin nge kan hriat?

⁸ Ṭum khat chu, Isua’n: “Ka Pa, i hming chawimawi rawh,” tiin a ṭawngṭai a. Jehova chuan chu ṭawngṭaina chu vân aṭangin aw ring takin a chhâng a, a hming a chawimawi tûr thu a tiam a ni. (Joh. 12:28) Isua chuan a rawngbâwl chhûngin, a Pa hming a chawimawi a. (Joh. 17:26) Chuvângin, Kristian dikte chuan Pathian hming hman leh mi dangte hnêna hriattîr chu chawimawina angin an thlîr a ni.

9. Kum zabi khatnaa Kristiante’n Pathian hming an zah tih engtin nge an lantîr?

⁹ C.E. kum zabi khatnaa Kristian kohhran din a nih hnu rei vak lovah, Jehova chuan, “ama hming pu atân an zîng ata mite la chhuak tûrin Jentailte a kan ṭan” a ni. (Tirh. 15:14) Kum zabi khatnaa chûng Kristiante chuan Pathian hming hman leh mi dangte hnêna hriattîr chu an ngaisâng hle a. Pathian hming chu an rawngbâwlnaah leh an lehkha ziahahte chuan an hmang nasa hle a. * Pathian hming putute an nihzia an lantîr a ni.—Tirh. 2:14, 21.

10. Jehova Thuhretute hi Jehova hming pute an nihzia eng finfiahna nge awm?

 ¹⁰ Jehova Thuhretute hi Jehova hming pute an ni em? Finfiahna hi han ngaihtuah teh. Tûn laia sakhaw hruaitu tam tak chuan Pathian hming bil thup bo tûrin an tihtheih apiang an ti a. Bible an lehlin hunah Pathian hming a thai bo va, dinhmun ṭhenkhatah chuan, an sakhaw rawngbâwlnaahte Pathian hming hman an khap a ni. * Jehova Thuhretute hi zah taka Jehova hming hmangtute leh chawimawitu awmchhun an ni tih tuin nge hnial thei ang? Keini chuan sakhaw dang zawng zawngte aiin Pathian hming kan puang nasa zâwk a! Chumi kawngah chuan, Jehova Thuretute tih kan hming phua nung tûrin theih tâwp kan chhuah bawk! (Is. 43:10-12) New World Translation of the Holy Scriptures, tih Bible chu maktaduai 240 aia tamin kan tichhuak a, chu Bible chuan Bible lehlingtu dangte’n Pathian hming an paih chhuahna hmunahte chuan Pathian hming a dah leh vek a ni. Jehova hming chawi lârtu Bible ṭanchhan thu leh hla chhuahte pawh ṭawng 1,000 chuanin kan tichhuak bawk!

11. Engtin nge Kristian hmasate chuan thutak an ngainatzia an lantîr?

¹¹ Isua chuan Pathian leh A thiltumte chungchâng thutak chu a ngaina a. Thutak mila a nun bâkah, mi dangte hnênah a  hriattîr bawk. (Joh. 18:37) Isua hnungzuitu dikte pawhin thutak an ngaina hle a. (Joh. 4:23, 24) Dik tak chuan, tirhkoh Petera chuan Kristian rinna chu “kawng dik tak,” tiin a sawi a ni. (2 Pet. 2:2) Kristian hmasate chuan thutak an ngainat êm avângin, chu thutak nêna inmil lo sakhaw thurin te, hnam dân te, leh mi mal ngaih dânte chu an hnâwl a. (Kol. 2:8) Chutiang bawkin, tûn laiah pawh, Kristian dikte chuan an thurin zawng zawngte chu Pathian Thu ṭanchhan leh Jehova Thu nunpuina hmangin, “thutakah an awm,” tih an lantîr a ni.—3 Joh. 3, 4.

12. Governing Body chuan kan hriatthiamna siam ṭhat a ngai tih an hriat chuan eng nge an tih a, engvângin nge chutianga an tih?

¹² Tûn laia Pathian mite chuan thutak chungchângah hriatna famkim nei niin an insawi lo. Bible zirtîrna hrilhfiah dânah leh kohhran inrêlbâwl dânah tih dik loh chângte an nei a. Chu chu mak kan ti tûr a ni lo. Bible-in Pathian mite chuan hunte a liam zêl rualin thutak chu an hre thiam chho telh telh ang tih chiang takin a sawi a ni. (Kol. 1:9-12) Jehova chuan thutak chu zawi zawiin a tilang a, chiang lehzuala thutak kan hriatthiam hun chu dawhthei taka kan nghah a ngai a ni. (Thuf. 4:18) Governing Body chuan thil eng emaw kan hriatthiam dânah siam ṭhat a ngai nia a hriat chuan, a siam ṭha nghâl vat a ni. Tûn lai Kristian ram kohhran tam tak chuan an mi leh sate tihlâwm an duh avâng leh khawvêla hmingthan an duh avângin, an zirtîrnate an thlâk danglam a; mahse, Jehova Thuhretute chuan Pathian hnaih an duh avâng leh Isua anga Pathian chibai bûk an duh avângin, an siam ṭha zâwk a ni. (Jak. 4:4) Siam ṭhatna kan neihte chu khawvêl mite ngaih dân avânga nei ni lovin, Bible kan hriatthiamna a pun avâng zâwka nei kan a ni. Thutak kan ngaina hle si a!—1 Thes. 2:3, 4.

13. Kristian dikte lantîr mize pawimawh ber chu eng nge ni a, chu chu tûn laia Jehova Thuhretute’n engtin nge an lantîr?

¹³ Kum zabi khatnaa Kristiante neih mize ṭha tam tak zînga pawimawh ber chu hmangaihna a ni a. Isua chuan: “In inhmangaih chuan mi zawng zawngin ka zirtîrte in ni tih chu miah chuan an hria ang,” tiin a sawi a. (Joh. 13:34, 35) Tûn laiah, khawvêl pumpuia Jehova Thuhretute chu an inhmangaih tawnin, an inpumkhat hle a. Sakhaw dangte laka kan danglam chhan chu ram leh hnam dân hrang hranga mite ni mah ila, chhûngkaw khat ang kan nih vâng a ni. Chutiang kan nihziah chu kan inkhâwmah te, inkhâwmpuiah te, leh regional inkhâwmpuiahte kan hmu a. Chu chuan kan biak dân chu Jehova a pawm tih rin nghehna min neihtîr lehzual a ni.

14. Kolossa 3:12-14-a sawi angin, inhmangaih tawn uar tûra kan tihtheih dân kawng pawimawh tak chu eng nge ni?

¹⁴ Bible chuan “inhmangaih tawn uar” tûrin min fuih a. (1 Pet. 4:8) Chu hmangaihna kan lantîr theih dân kawng khat chu kan inngaihdam tawnna leh ṭhat famkim lohnate kan indawh tawnna hi a ni a. Min tilungni lotute pawh tiamin, kohhrana unau zawng zawngte chungah thilphalna leh khualchhâwn thiamna lantîr theihna hun remchâng kan zawng a. (Kolossa 3:12-14 chhiar rawh.) Chutiang inhmangaihna chu a ni, Kristian dikte chhinchhiahna langsâr ber chu ni.

15. Eng kawng dangte’n nge kum zabi khatnaa Kristiante Pathian biak dân chu kan zui?

¹⁵ Kum zabi khatnaa Kristiante Pathian  biak dân chu kawng dang pawhin kan zui a. Entîr nân, kan inawpna pâwl inrêlbâwl dân chuan—bial kantu te, kohhran upa te, leh kohhranho rawngbâwltute pawh telin—kum zabi khatnaa tirhkohte ruahmanna chu a entawn a. (Phil. 1:1; Tit. 1:5) Mipat hmeichhiatna leh inneihna kan thlîr dân te, thisen hlutna kan zah dân te, leh inchhîrna nei lo thil sual titute laka kohhran kan vênhim dânte chu kum zabi khatnaa tih dân zawng zawngte nên a inang vek a ni.—Tirh. 15:28, 29; 1 Kor. 5:11-13; 6:9, 10; Heb. 13:4.

16. Ephesi 4:4-6-a thute aṭangin eng nge kan hriat?

¹⁶ Isua chuan mi tam takin a zirtîrte niin inchhâl mah se, an ni vek lo vang tih a sawi a. (Mt. 7:21-23) Chu bâkah, Bible chuan ni hnuhnûngahte chuan mi tam tak chu “Pathian ngaihsak anna” chauh an nei ang tih a sawi lâwk bawk. (2 Tim. 3:1, 5) Mahse, Bible chuan Pathian pawm “rinna hmun khat” a awm tih chiang takin min hrilh a ni.—Ephesi 4:4-6 chhiar rawh.

17. Tûn laiah, tute’n nge Isua hnung zui a, rinna dik tak lantîr?

¹⁷ Tûn laiah, rinna dik tak lantîrtute chu tute nge ni? A finfiahnate kan endik tawh a. Isua’n Pathian a biak dân leh kum zabi khatnaa Kristiante tih dân pawh kan bih chiang tawh bawk. A chhânna chu pakhat chiah a awm—Jehova Thuhretute an ni tih hi. Jehova Thuhretute zînga kan tel thei a, Jehova leh a thiltumte chungchâng thutak kan hre thei chu chanvo hlu a va ni êm! Chuvângin, thutak chu nghet takin i vuan zawm zêl ang u.