1. Jméni xi tso je chjota.

JMI religión tjín xi kʼoatso nga chjotale Cristo ma kʼoa nga kʼoasʼin bexkón Niná josʼin mele. Kuijin nga i̱ tsoni je chjota: “A tojngoo mani religión xi kixi, axo sasénle Niná ngatsʼi religión”. Kʼoa ñá xi testigole Jeobá maa, a ñaki tjínjngoo tokoán nga kui xi kixi bakoyaa kʼoa nga kʼoasʼin ʼyaxkoán Niná josʼin mele. A koaan nga ñaki sʼe̱jngo tokoán. Kataʼyala kʼa choa̱ xi bakó jebi.

2. Ánni tsakʼéjngoni kon pastro Pablo nga ñaki Énle Niná xi koankjainle (1 Tesalonicenses 1:5).

² Je pastro Pablo ñaki tsakʼéjngo kon nga Énle Niná xi koankjainle (tʼexkiai 1 Tesalonicenses 1:5). * Ali tsa tokuijin nga tsjoa tsakáya kon jmeni xi tso je Énle Niná. Kuinga kʼoakitsoni nga nʼio nda kiskotʼayajin. Koankjainle nga “ngayije xo̱n Escritura [tʼatsʼe] Niná jinroani” (2 Tim. 3:16). Nga kiskotʼayajin Énle Niná je Pablo, koanjinle je choa̱ xi bakó nga je Jesús je Mesías xi tíchoyale. Tonga je chjotatítjonle religión alikui kʼoakisʼin. Chjota jebi jaonkjaín koan nga̱ kʼoakitso nga je Niná tjíosíxále, tonga alikuini kʼoakisʼin josʼin mele Niná (Tito 1:16). Je Pablo alikui tokiskoéjin je Énle Niná jñanile xi koanmele kʼoakisʼin kʼoa jñanile xi mai. Koanmele kitsoya je Énle Niná kʼoa kʼoasʼin kikao yaole jotso Niná (Hech. 20:27).

3. Kʼianga sʼe̱jngo tokoán nga ñaki Énle Niná xi tichotʼayá, a machjén nga ñaki jchaa ngayeje jmeni xi chjonangiaa (kʼoati chótsenlai je recuadro “ Je xále Jeobá kao kjoafaʼaitsjenle ngisaa nʼio tse tikʼoajinni xi kʼoéyanajmiá”).

³ Tjínkʼa xi kʼoatso nga je religión xi kixi tjínnele kuitsoya jmeni xi chjonangiaa kʼoa saʼnda xi tsínkjoan ya tsoyakixi Biblia.  A kixi tíjna nga kʼoasʼin si̱kjaʼaitsjeen. Kataʼyala je choa̱le Pablo. I kitsole je chjotale Cristo: “Nanda chótʼajion ngayije”. Tonga kʼoati kitso nga nkjín koya jmeni xi kje nanda majinjinle (1 Tes. 5:21). Je Pablo kʼoakitso nga “tochoa xi ʼyaxkoaan” kʼoa nga “joni cho̱tsín tichotsenyá, toxaa tiʼyaa” (1 Cor. 13:9, 12). Je Pablo alikui koanjinyejele, kʼoa kʼoati tsín majinyejená tsanda ñá. Tonga koanjinle xi ngisa nʼio chjíle xi tʼatsʼe Jeobá, kʼoa kuinga ñaki tsakʼéjngoni kon nga Énle Niná xi tíkotʼaya.

4. Jósʼiaan nga ñaki sʼe̱jngo tokoán nga Énle Niná xi tichotʼayá, kʼoa jmé xi chótʼayajiaan i̱ kjoaʼmiya jebi.

⁴ Jósʼiaan nga ñaki sʼe̱jngo tokoán nga Énle Niná xi tichotʼayá. Jngo koya xi koa̱n sʼiaan kuinga si̱ngósonkoaa josʼin kitsoya je Jesús kao josʼin tiʼyaxkoán Niná ndʼaibi xi testigole Jeobá maa. I̱ kjoaʼmiya jebi kui chótʼayajiaan jotjínnele sʼin je xi ñaki chjotale Cristo ma. Xi títjon, alikui xkóson bʼétsʼoale. Xi majaoni, bexkón je jaʼaínle Jeobá. Xi majanni, tsjoake je Énle Niná. Kʼoa xi mañoni, tsjoakengañá xínkjín.

5. Jmé choa̱ xi tsakʼéjna je Jesús tʼatsʼe josʼin jchaxkoán Niná, kʼoa jósʼin kjuintjenngiaa choa̱ jebi.

⁵ Nga nʼio tsjoake Jesús je Jeobá, ñaki toje tsabexkón ya ngʼajmi kao i̱ Sonʼnde (Luc. 4:8). Kʼoa kʼoakitsole je chjotatjenngile nga kʼoati katasʼín tsanda je. Je Jesús kao chjotatjenngile alikuikʼia nga xkóson kisichjén nga tsakʼétsʼoale Niná. Nga tsín matsen Niná alikʼia koa̱nle je chjota nga kʼoakjoan siká je xi sinda kʼoa nga kʼoakji kjoajeya tsjoále (Is. 46:5). Kʼoa jósʼin tíjna nga kui sínda chjota je xkósonle xi santo tsole kʼoa nga kui bʼétsʼoale. Nga kitsjoa Jeobá je xi te kjoatéxoma, je xi majaoni itso: “Ali tsa xkósonjin nindai, nijejin  xi kʼoakji jokjoan xi tjío ngʼá, tsa xi tjío tʼanangi kʼoa tsa xi tjío ya jinnandá. Ali tsa xkólijin basenlai” (Éx. 20:4, 5). Je xi mele kʼoasʼin skoe̱xkón Niná josʼin mele, majinle nga tsín tjínnele xkóson sichjén nga kʼoetsʼoale.

6. Jmé choa̱ xi fitjenngi ndʼaibi je testigole Jeobá.

⁶ Je chjota xi kotʼayason jokoan ngasʼa kʼoatso nga ñaki toje Niná tsakʼétsʼoale je chjotale Cristo xi títjon tsakatio. Tobʼelañá, je libro xi kui nchja̱ni tʼatsʼe chjotale Cristo xi títjon tsakatio kʼoatso nga nʼio chʼaosʼin tsabekon ninga to kisikjaʼaitsjen nga xkóson kuinya jñani bexkón Niná. Nichxin xi tiyoaa ndʼaibi, xi testigole Jeobá maa, kʼoati kui choa̱ mangíntjenngiaa jokisʼin je chjotale Cristo xi títjon tsakatio. Alikui je bʼetsʼoalee xi santo tsole chjota, tsa je ánkje kʼoa nijejinla Jesús bʼetsʼoalee. Kʼoati tsín je bʼetsʼoalee je xkósonle naxinandá, jolani nga tsín nʼia saludar je bandera kʼoa tsa jmesani. Ninga tojme kjoa xi kuitjátojiaan, ñaki kʼoakʼoé tokoán nga si̱tjosoán nga i̱ kitso je Jesús: “Tojé [Jeobá] Naili Nináli xi jchaxkuín” (Mat. 4:10).

7. Jméni xi tsín mangóson josʼín je testigole Jeobá kao josʼín je religión xi kjaʼaí.

⁷ Nichxin xi tiyoaa ndʼaibi, nʼio nkjín chjota xi ya fitʼale xi nyatítjonle religión kʼoa saʼnda síkʼatone choa̱le josʼin bexkón. Nʼio nkjín chjota fi ya yo̱ngo̱, batse libro kʼoa nʼio tse tao̱n batío. Tjínkʼa xi makjainle ngayeje jmeni xi ʼmile. Tosajin tsín kʼoasʼin kʼiatsa ñaki xko̱n tjíobeni je Jesús. Tonga ñá xi choʼndale Jeobá maa nijngojinla chjota mangíntjenngilee. Ningalani bakolee kjoaxkóntokon je xi bándiaaná, kui mangíntjenngiaa nga i̱ kitso je Jesús: “Ngatsʼio nga jon ndsʼe manio” (Mat. 23:8-10). Alikui chjota bʼetsʼoalee, nijejinla chjota xi nyatítjonle religión kʼoa tsa chjotaxá. Alikui ya bʼainganʼiolee jmeni xi sʼín kʼoa tsín ya nojiaan yaoná jme xi chon sonʼnde. Alikui kʼoanʼia josʼín je religión xi chjotale Cristo tsole yaole (Juan 18:36).

8. Jósʼin ʼyañá nga kui xi mele Jeobá nga chʼa̱sjejeyaa jaʼaínle kʼoa nga kʼuínyalee xi kjaʼaí.

⁸ Ñandia nga i̱ kitso je Jesús nga tsakʼétsʼoa: “Nʼaina, chʼa̱sjejeyai jaʼaínli”. Nʼio kinoʼyale je jta̱le Jeobá ya tjen ngʼajmi nga kʼoakitso nga kʼoasjejeya jaʼaínle (Juan 12:28). Kʼianga kitsoyason je Jesús i̱ Sonʼnde tsʼasjejeya je jaʼaínle Nʼaile (Juan 17:26). Kuinga tjínnenile sichjén jaʼaínle Niná je xi chjotale Cristo ma kjoaixi kʼoa nga kuitsoyale xi kjaʼaí.

9. Jósʼin tsakakóni je chjotale Cristo xi títjon tsakatio nga tsabexkón je jaʼaínle Niná.

⁹ Kʼianga siglo 1, nga to chriankʼia kisʼejna je jtín xi tsʼe chjotale Cristo, je Jeobá kuenta kisʼin je “chjota xi li judíojin, nga kjoaʼajin chjota xi kʼuínle nga tsʼe”, xi tsonile, jngo naxinandá xi jaʼaínle kʼoa̱ (Hech. 15:14). Je chjotale Cristo jebi nʼio tsjoa kisatio kon nga kisichjén je jaʼaínle Niná kʼoa nga kitsoyale xi kjaʼaí. Kisichjén jaʼaínle Niná kʼianga kitsoyason kʼoa nga kiski Biblia. * Tojé chjota jebi xi kitsoya joʼmi Niná kʼoa kʼoasʼin tsabexkónni je jaʼaínle (Hech. 2:14, 21).

10. Jmé choa̱ xi tjín nga bʼéjnatsen jaʼaínle Niná je testigole Jeobá.

¹⁰ A bʼéjnatseen je testigole Jeobá joʼmi je Niná. Kataʼyala je choa̱ xi tjín. Nichxin xi tiyoaa ndʼaibi nʼio nkjín chjota xi nyatítjonle religión xi básjaile josʼín nga tsín bʼéjnatsen je jaʼaínle Niná. Tjíofaʼáxin je jaʼaínle Niná ya Biblia, kʼoa tjínkʼa xi tsín síchjén ya yo̱ngo̱le. *  Tojé testigole Jeobá xi bexkón kʼoa bʼéjnatsen je jaʼaínle Niná. Nijngojinla religión xi kʼoasʼín jonʼia nga ʼmiyalee chjota je jaʼaínle Niná. Bʼenelee yaoná nga kʼoasʼin mangínkoaa yaoná nga bakoá nga testigole Jeobá ma kjoaixiaa (Is. 43:10-12). Jetsʼato 240 millón Biblia xi tsʼe Traducción del Nuevo Mundo kitjo. Biblia jebi faʼaitʼa je jaʼaínle Niná jñani tsakjaʼáxinle je Biblia xi kjaʼaí. Kʼoa tsʼato 1,000 én tíbitjo je xo̱n kao video xi Énle Niná yʼangini xi faʼaitʼa je jaʼaínle Jeobá.

11. Jósʼin tsakakó nga tsjoake je Énle Niná je chjotale Cristo xi títjon tsakatio.

¹¹ Je Jesús nʼio tsjoake koan je Énle Niná kao jme xi tjínndajinle. Kʼoasʼin kikao yaole jotso je Énle Niná kʼoa kitsoyale xi kjaʼaí (Juan 18:37). Je xi ñaki chjotatjenngile Cristo koan kʼoati nʼio tsjoake koan je Énle Niná (Juan 4:23, 24). Je pastro Pedro kʼoakitso nga je chjotale Cristo kui ndiaa xi kixi tjíomaya (2 Ped. 2:2). Je chjotale Cristo xi títjon tsakatio nʼio tsjoake koan je Énle Niná kʼoa tsínkui kitjenngi jotso je religión, josʼín kʼoa jme costumbre xi tjínle, kʼoa tsínkui kitjenngi je kjoafaʼaitsjen xi kontra tjíole je Énle Niná (Col. 2:8). Tikʼoasʼinni ndʼaibi, je xi ñaki chjotatjenngile Cristo ma bʼénele yaole nga sítjoson jotso je Énle Niná (3 Juan 3, 4). Yaa Énle Niná bʼangini jmeni xi makjainle kʼoa kʼoasʼin fikao yaole jotso je Énle Jeobá.

12. Jósʼín je ndsʼee xi bándiaale je xále Niná kʼianga be nga tjínnele kʼoantjaiyajin tsa jmeni, kʼoa ánni nga kʼoasʼínni.

¹² Je testigole Jeobá alikui kʼoatso nga  majin tsjetsjele jmeni xi tso je Biblia. Tjín jmeni xi skanni síkixiyanda josʼin majinle tsakai jmeni xi tso Biblia kʼoa tsakuije̱ josʼin tjínnele sʼendajin ya jinjtín. Tonga ʼyañá nga toxá kʼoakoa̱nni, nga̱ je Biblia kʼoatso nga choa choa koa̱njinle jokjoantjínni Énle Niná je naxinandále (Col. 1:9, 10). Je Jeobá choa choaa tíbʼéjnatsen jotjínni je Énle. Kuinga machjénni nga tsejta koaan nga sa tse sa tse koa̱njinná jotjínni je Énle Niná (Prov. 4:18). Kʼianga majinle je ndsʼee xi bándiaale je xále Niná nga machjén nga kʼoantjaiyajin josʼin majinná je Biblia kʼoa tsa jmesani, tokjoan síkʼantjaiyajin. Je yo̱ngo̱ sakʼoa síkʼantjaiyajin jmeni xi sʼín tojoni nga tsjoa sa̱tío kon je chjota kʼoa tsakuije̱ nga nda kʼoaxki̱. Tonga kui kʼoanʼiañá xi testigole Jeobá maa nga ngisa koa̱nchriantʼalee je Niná kʼoa nga kʼoasʼin jchaxkoán tojosʼin kitsoya je Jesús (Sant. 4:4). Ali tsakuijin kʼoanʼiañá nga kui mangíntjenngiaa je kjoafaʼaitsjen xi sʼa kjimatsen chjotse, kuinga ngisa nda majinná jmeni xi tso je Biblia nga bʼantjaiyajinni tsa jmeni. Tsjoachañá je Énle Niná (1 Tes. 2:3, 4).

13. Jméni xi ngisa bakó jokjoan je xi ñaki chjotale Cristo ma, kʼoa jósʼin bakó jebi je testigole Jeobá nichxin xi tiyoaa ndʼaibi.

¹³ Je chjotale Cristo xi títjon tsakatio kʼoasʼin tsaʼyale nga nda chjota, tonga xi nʼio tsaʼyale kuinga tsjoakengañá xínkjín. Je Jesús i kitso: “Kʼuisʼin skoe̱ ngatsʼi nga jon nío chjotana, tsa kʼoasʼin matsjoachao xíngio” (Juan 13:34, 35). Nichxin xi tiyoaa ndʼaibi, je testigole Jeobá tsjoake xínkjín kʼoa jtín tjío jngo tjíjtsa Sonʼnde. Alikui kʼoasʼin tjío je religión xi kjaʼaí. Tonga xi testigole Jeobá maa tojngo familia maa ngatsʼiaa, ninga xinxin tsaan kʼoa ninga kjaʼaí kjaʼaísʼin nganá nga jngó jngoá. Yaa ʼyanile nga tsjoachaa xíngiaa kʼianga satíoná kjoajtín kao kjoajtíntse. Jebi ngisaa bʼéjngo tokoán nga toñá xi kʼoasʼin ʼyaxkoán Jeobá josʼin mele.

14. Tojo tso Efesios 4:32, jñánile xi jngo koya josʼin bakolee kjoatsjoacha xíngiaa.

¹⁴ Je Biblia itso: “Nʼio katamatsjoachao xíngio” (1 Ped. 4:8). Jngo koya josʼin bakoá nga tsjoachaa xíngiaa kʼiaa nga nichatʼalee kʼoa nga kaná josʼín xi totʼatsʼe nga chjotajée maa. Kʼoati bakolee kjoanda kʼoa nda chjoéyaa ngatsʼi je ndsʼee, ninga je xi jokitsoná kʼoa tsa jokisikaoná (tʼexkiai Efesios 4:32). * Kʼoasʼin bakoñá nga chjotatjenngile Cristo ma kjoaixiaa.

15. Jósasʼin mangíntjenngiaa je choa̱le chjotale Cristo xi títjon tsakatio.

¹⁵ Kʼoati nkjínsa koya jonʼia nga mangíntjenngiaa jokisʼin je chjotale Cristo xi títjon tsakatio nga tsabexkón Niná. Tobʼelañá, josʼin sʼendajin naxinandále Niná nga tjín je superintendente viajante, xi chjotajchínga sʼin tjío kao siervo ministerial, kui mangíntjenngiaa jokisʼin je pastrole Jesús xi títjon tsakatio (Filip. 1:1; Tito 1:5). ʼYaxkónñá jotso je kjoatéxomale Niná xi tʼatsʼe josʼin tíjna nga xínkjín fayokao chjota kao tʼatsʼe kjoabixan. ʼYaxkónñá jotso je kjoatéxomale Niná xi tʼatsʼe josʼin machjén je njín, kʼoa kʼoati makuinda je jtín tʼatsʼe chjota xi jée bajngi xi tsín kʼoamanile jme xi sʼín (Hech. 15:28, 29; 1 Cor. 5:11-13; 6:9, 10; Heb. 13:4).

16. Jmé xi bakóyaná Efesios 4:4-6.

¹⁶ Je Jesús kʼoakitso nga nʼio nkjín xi kʼoakuitso  nga chjotatjenngile mani, tonga tjínkʼa xi toxokʼoani kuitso (Mat. 7:21-23). Je Énle Niná tongini kʼoakitso jmeni xi koa̱n nga to jetífikjetʼa nichxin, kʼoakitso nga nʼio nkjín xi toxokʼoani kuitso nga bexkón Niná (2 Tim. 3:1, 5). Je Biblia kʼoatso nga tojngo kjoamakjain tjín xi sasénle Niná (tʼexkiai Efesios 4:4-6). *

17. ʼYáni xi kʼoasʼin fitjenngi choa̱le Jesús, kʼoa ʼyáni xi kʼoasʼin bexkón ndʼaibi Niná josʼin mele.

¹⁷ ʼYáni xi kʼoasʼin tjíobexkón ndʼaibi Niná josʼin mele. Jekaʼyaa je choa̱ xi tjín josʼin tjínnele jchaxkoán Niná, kao je choa̱ xi tsakʼéjna je Jesús kʼoa jokisʼin je chjotale xi títjon tsakatio. Tojé testigole Jeobá xi kʼoasʼin tjíobexkón Niná josʼin mele. Nʼio tse kjoanda tjínná nga ya tiyojiaan naxinandále Niná kʼoa nga ʼyaa jotjínni xi tʼatsʼe Jeobá kao jme xi tjínndajinle. Kuinga kʼoéjngosíñá tokoán nga Énle Niná xi tichotʼayá.