CILONGESA 42
Kulaheleni Ngweni Munawana Busunga
“Pweni baka-kweseka byuma byoshe, co nyungeni bije binapu byabibwa.”—1 TESA. 5:21.
MWASO 142 Tutwalelelaho Kukala na Lilabelelo
BILI MUNO MU CILONGESA *
1. Mwafwa bika banu babangi kubazibuka indi kwakala lika bulombelo bumo bwa busunga?
KULI baka-bulombelo bwabwingi bakalishasha ngwabo bapwa baka-Kilistu ba busunga, co bali na kulemesa Njambi mu ngila inapande. Mukemwo banu babangi bali na kwonowa kuzibuka ngwabo beya bapwa baka-Kilistu ba busunga. Bakalihula ngwabo, “Kuma kwakala lika bulombelo bumo bwa busunga indi bulombelo bwoshe buli na kulemesa Njambi mu ngila inapande?” Kuma yetu Bakaleho ba Yehova twakulahela ngwetu tukalongesa busunga, co ngila itukalemeselamo Njambi ikeyo lika ngila yaibwa ya kumulemeselamo ndi? Nga mukemwo, co bika bitulingisa tukulahele ngoco? Tusimutwiyeniko ha bukaleho bumo butulingisa tukulahele ngoco.
2. Kwesekesa na 1 Tesalonika 1:5, mwafwa bika kapositolo Paulu wakulahelele ngwendi byuma byalilongesele byapwile bya busunga?
2 Kapositolo Paulu wakulahelele ngwendi byuma byalilongesele byapwile bya busunga. (Tandeni 1 Tesalonika 1:5.) Nameme ngoco, kakulahelele ebi byuma mwafwa byamuzibisile kubwaha, embwe. Oloni wabikulahelele mwafwa wakele na kutondesesa bukaleho mu Lijwi lya Njambi. Co wakulahelele ngwendi, “Bisoneka byoshe Njambi wahwiminininemo.” (2 Tima 3:16) Kutondesesa kwamukwasele bati? Kutondesesa mu Bisoneka kwakwasele Paulu awane bukaleho buje bumwesa ngwabwo Yesu ikeye Mesiya ibapolofwetele. Bantwama ba Bayunda bakebo kubakulahelele ngoco. Balishashele ngwabo bali na kulemesa Njambi, oloni bilinga byabo kubyamwesele ngoco. (Tito 1:16) Oloni Paulu ikeye kalifwile na baje banalume mwafwa wakulahelele byuma byoshe bibanasoneka mu Lijwi lya Njambi. Co lalo, wakele na kulongesa na kupangesa binangulo byoshe bya mu Lijwi lya Njambi.—Vili 20:27.
3. Kuma tunapande kuwana bikumbululo ku bihula byetu byoshe asina tukulahela ngwetu tunawana busunga ndi? (Taleni lalo cipalo ca “ Bipangi na Biyongola bya Yehova Byapwa Byabingi Manene.”)
3 Banu bamo bakasinganyeka ngwabo bulombelo bwa busunga bunapande kukumbulula bihula byoshe nameme bije kubakumbulwile mu Mbimbiliya. Kuma kunapande kusinganyeka ngoco ndi? Tusimutwiyeni hali Paulu. Washongangeyeye bakwabo baka-kukulahela ngwendi beseke “byuma byoshe,” oloni wendekele lalo ngwendi kazibisisile byuma byoshe. (1 Tesa 5:21) Wasonekele ngwendi: “Tunazibukako lika byuma byabindondo,” co lalo “kutwesi na kumona mwamubwa mwafwa tuli na kupangesa ciponi ca cikubo.” (1 Koli 13:9, 12, NWT) Ngwe mwa Paulu, netu kutwazibisisile byuma byoshe. Nameme ngoco, Paulu wazibukile busunga hali Yehova. Wazibukile byuma byabingi bije byamulingisile akulahele ngwendi nawana busunga.
4. Bika bitukwasa tukulahele ngwetu tunawana busunga, co bika bitusimutwiya hali baka-Kilistu ba busunga?
4 Cuma cimo citukwasa tukulahele ngwetu tunawana busunga cinapu kwesekesa ngila yaibwa ya kulemeselamo Njambi yatumwesele Yesu nomwo mubali na kumulemeselamo Bakaleho ba Yehova. Muno mu cilongesa, tusimutwiya ha byuma biwana bibanapande kulinga baka-Kilistu ba busunga. (1) Kubapandele kulemesa tumponya, (2) banapande kusingimika lizina lya Yehova, (3) banapande kuzema busunga, na (4) banapande kulizema manene umo na mukwabo.
KUTWESI KULEMESA TUMPONYA
5. Yesu natumwesa bati ngila yaibwa ya kulemeselamo Njambi, co twasa kupangesa bati byuma byatulongesele?
5 Yesu wazemene manene Njambi. Ngeci, walemesele lika ikeye mwakele mwilu nomwo mwakele hano hasi. (Luka 4:8) Co walongesele bandongesi bendi nabo balinge ngoco. Yesu na bandongesi bendi ba kulongwa kubalemesele tumponya. Njambi wapwa Sipilitu, ngeci naumo wahi asa kumunga cuma ca kulifwa nendi. (Isaya 46:5) Batico kumunga tumponya twa banu babatumbula ngwabo ba kujela na kubalemesa? Mu lishiko lya mu cibali ku Mashiko Likumi, Yehova wendekele ngwendi: “Kesi mukalishongele cifwa ca cuma cimo cili mwilu, nambe cili hano hasi . . . Kesi mukatsikamene tumponya.” (Kutu 20:4, 5) Ngeci, baje bashaka kulemesa Njambi mu ngila inapande bazibuka ngwabo kashaka ngwendi tulemese tumponya.
6. Bakaleho ba Yehova bali na kukabangeya ngila muka ya kulemeselamo Njambi?
6 Baka-kulilongesa byuma bya kusañulu ngwabo baka-Kilistu ba kulibanga bakele na kulemesa lika Njambi. Cakumwenako, libulu limo lije lyendeka ha byuma bya kusañulu lyendekele ngwalyo aba baka-Kilistu “kubashakele kumona” tumponya mu mitambela yabo ya kulemesela. Bakaleho ba Yehova nabo bali na kutembwinina baka-Kilistu ba mu simbu ya tupositolo. Kutwesi kulemesa tumponya twa banu babatumbula ngwabo ba kujela nambe kulemesa tungelo. Co lalo, kutwesi kulemesa Yesu. Kutundaho, kutwesi kulemesa pandelo nambe kulinga byuma byoshe-byoshe bije bimwesa ngwabyo tuli na kulemesa fulumende ya mu lifuti lyetu. Nameme banu batulinge bati, twalyangwila kweseka mutwasela mwoshe kwononoka majwi a Yesu a kwendeka ngwawo: “Ukalemesa Shukulu Kalunga Njambi yobe na kumupangela ikeye lika.”—Mateo 4:10.
7. Bakaleho ba Yehova banaliseze bati na baka-bulombelo bweka?
7 Banu babangi ano matangwa bakakabangeya lika bibakabaleke bakulunu ba bulombelo ba kutsimana. Bakasingimika manene aba bakulunu ba bulombelo, co bakalingi ngwe bakabalemesa. Banu babangi bakai ku maceci abo na kulanda mabulu abo. Co lalo, bakabana bimbongo byabingi. Kutundaho, banu bamo bakakulahela byoshe bibakabaleke. Aba banu mubakamono bakulunu ba bulombelo, bakabwahelela manene ngwe baje banamono Yesu. Oloni bangamba ba Yehova ba busunga bakebo kubesi kulemesa banu. Nameme tukasingimika baje bakatutwamenena, oloni tukononoka majwi a Yesu uje wendekele ngwendi: ‘Yeni boshe munapu bandolome.’ (Mateo 23:8-10) Ngeci, kutwesi kulemesa bakulunu ba bulombelo nambe batwama ba bupolitiki. Co lalo, kutwesi kukundwiya byuma bibakalingi mwafwa kutushaka kulikobelesa mu byuma bya kaye. Ngeci, twalisezela kulako na baka-bulombelo bwoshe baje bakalishasha ngwabo bapwa baka-Kilistu.—Yowa 18:36.
TUKASINGIMIKA LIZINA LYA YEHOVA
Baka-Kilistu ba busunga bashaka kulekako bakwabo bya Yehova (Taleni palagilafu 8-10) *
8. Tuzibuka bati ngwetu Yehova ashaka ngwendi banu boshe bashangale lizina lyendi na kulizibuka?
8 Simbu imo, Yesu walombelele ngwendi: “Tate, shangazala lizina lyobe.” Co Yehova wamukumbulwile na lijwi lyakama ngwendi ashangazala lizina lyendi. (Yowa 12:28) Yesu mwakele na kwambulula, washangazalele lizina lya Ishe. (Yowa 17:26) Ngeci, baka-Kilistu ba busunga nabo banapande kupangesa lizina lya Njambi na kukwasako bakwabo balizibuke.
9. Baka-Kilistu ba kulibanga bamwesele bati ngwabo basingimikile lizina lya Njambi?
9 Munima ya simbu yaindondo kutunda hacashangumukilile cikungulukilo ca baka-Kilistu ba kulibanga, Yehova ‘washolwele cizemo cendi kuli baje kesi Bayunda mu kwangulaho bamo hakati kabo ngeci bapwe banu babasana na lizina lyendi.’ (Vili 15:14) Aba baka-Kilistu ba kulibanga bapangesele lizina lya Njambi na kukwasako bakwabo balizibuke. Co lalo, bapangesele lizina lya Njambi mubakele na kwambulula nomwo mubasonekele mikanda ya mu Mbimbiliya. Ngeci, bamwesele ngwabo bakebo lika bapwile banu babasana na lizina lya Njambi.—Vili 2:14, 21.
10. Bukaleho muka bumwesa ngwabwo Bakaleho ba Yehova bakebo lika bali na kusingimika lizina lya Yehova?
10 Kuma Bakaleho ba Yehova bapwa banu babasana na lizina lya Njambi ndi? Tusimutwiyeniko ha bukaleho bumo. Bakulunu ba bulombelo babangi baneseka mwoshe mubanasela kushweka lizina lya Njambi. Banatundisa eli lizina mu Bimbimbiliya byabo, co bamo bakabindika banu ba mu maceci abo kulipangesa. * Oloni twalimwena ngwetu yetu Bakaleho ba Yehova lika tuli na kusingimika lizina lya Njambi. Tuli na kweseka mwoshe mutwasela kukwasa banu babangi bazibuke lizina lya Njambi, co kukwesi bulombelo bweka buli na kulinga ngoco. Co lalo, tuli na kweseka mwoshe mutwasela kumwesa ngwetu twapwa bene Bakaleho ba Yehova. (Isaya 43:10-12) Tunatuhula Bimbimbiliya bya New World Translation of the Holy Scriptures bya kupwa 240 milyoni. Co eyi Mbimbiliya inapangesa lizina lya Njambi ha mitambela yoshe haje habanalitundisile baka-kunungulula Bimbimbiliya byeka. Co lalo, tuli na kutuhula mabulu a kukundama ku Mbimbiliya aje akapangesa lizina lya Yehova mu bindaka bya kutubakana 1,000.
TWAZEMA BUSUNGA
11. Baka-Kilistu ba kulibanga bamwesele bati ngwabo bazemene busunga?
11 Yesu wazemene manene biñanda bya busunga bije byendekele hali Njambi na ha byuma byanayongola kulingila banu. Yoyesi ya Yesu yamwesele ngwayo wakulahelele ebi biñanda bya busunga, co walongeseleko na bakwabo. (Yowa 18:37) Bandongesi ba Yesu ba busunga nabo bazemene manene busunga. (Yowa 4:23, 24) Kapositolo Petulu watumbwile bulombelo bwa baka-Kilistu ngwendi “ngila ya busunga.” (2 Petu 2:2) Baka-Kilistu ba kulibanga bazemene manene busunga mukemwo kubakulahelele bilongesa bya bulombelo, bisemwa na biyongola bya banu bije kubyalitombwele na binangulo bya mu Mbimbiliya. (Kolo 2:8) Mu ngila imolika, baka-Kilistu ba busunga ano matangwa bakulahela lika biñanda bije byemana ha Lijwi lya Yehova. Co lalo, bakeseka mubasela mwoshe kuyoya mu kulitombola na binangulo bya mu Mbimbiliya mwafwa bashaka kutwalelelaho ‘kwenda mu busunga.’—3 Yowa 3, 4.
12. Bika bibakalingi baje bali na kutwamenena nga bananguka ngwabo tunapande kutengululako mutuli na kuzibisisila ñanda imo, co bika bakalingila ngoco?
12 Bakaleho ba Yehova kubesi kulishasha ngwabo bazibuka byuma byoshe embwe. Bisimbu bimo bakasebuka mubakalumbununa Bisoneka nomwo mubakabwahesela byuma mu cikungulukilo. Oloni kutwapandele kukomoka. Bisoneka bimwesa ngwabyo busunga bwa mu Mbimbiliya tukabuzibisisa kamandondo-kamandondo. (Kolo 1:9, 10) Yehova akatukwasa kuzibisisa busunga bwa mu Mbimbiliya kamandondo-kamandondo. Ngeci, tunapande kukala na mbunge ya kubandamena kwetela noho hatukazibisisila mwamubwa busunga. (Visi 4:18) Baka-cibunga ca Kutwamenena mubakananguka ngwabo tunapande kutengulula mutunakele na kuzibisisisila ñanda imo, bakalingi ngoco bwasi-bwasi. Baka-Kilistu ba makuli bakatengululako byuma bimo mu biceci byabo mangana bazibise kubwaha banu babo nambe kulikwatasana manene na kaye. Oloni munga ya Yehova ikeyo ikatengululako byuma bimo mangana itukwase kushwenya manene kuyehi na Njambi na kumulemesa mu ngila inapande ije yatumwesele Yesu. (Yako 4:4) Kutwesi kutengulula mutuli na kuzibisisila byuma mwafwa ya kukabangeya mubali na kubizibisisila banu babangi ano matangwa, oloni tukalingi ngoco mwafwa ceke cetu cikatwalelelaho kulibwezelela. Cili bene, twazema busunga.—1 Tesa 2:3, 4.
TWALIZEMA MANENE UMO NA MUKWABO
13. Cifwa muka cibanapande kumwesa baka-Kilistu ba busunga, co Bakaleho ba Yehova bali na kumwesa bati eci cifwa?
13 Baka-Kilistu ba kulibanga bakele na bifwa byabingi byabibwa, oloni cifwa calingisile banu babazibuke ngwabo bapwile baka-Kilistu ba busunga capwile cizemo. Yesu wendekele ngwendi: “Nga mulizema umo na mukwabo, asinoni boshe bakazibuka ngwabo mu bandongesi bange.” (Yowa 13:34, 35) Ano matangwa, Bakaleho ba Yehova mu kaye koshe balizema, co lalo bapwa ba kulikwatasana. Twaliseze na banu ba bulombelo bwoshe mwafwa twapwa ngwe naanga imo nameme twakala mu mafuti a kuliseza-seza, co lalo twapwa ba bisemwa bya kuliseza-seza. Tukalimwena ngwetu twalizema mutukakala ku biwano bya cikungulukilo, bya citingitingi nebi bya mutambela. Co oku kukatulingisa tukulahele ngwetu tuli na kulemesa Yehova mu ngila inapande.
14. Kwesekesa na mukanda wa Kolose 3:12-14, twasa kumwesa bati ngwetu twalizema manene umo na mukwabo?
14 Bisoneka bitushongangeya ngwabyo ‘tulizeme manene umo na mukwabo.’ (1 Petu 4:8) Ngila imo itwasa kumweselamo ngwetu twalizema manene inapu kulikonekela umo na mukwabo na kwecelela tupenga twa bakwetu. Tunapande kuwanako bingila bya kulingilamo mwamubwa banu boshe mu cikungulukilo kwambateselela na baje banatulubalesa. (Tandeni Kolose 3:12-14.) Nga tulizema manene umo na mukwabo, co tumwesa ngwetu twapwa baka-Kilistu ba busunga.
‘LIKULAHELO LIMO’
15. Tukatembwinina baka-Kilistu ba kulibanga mu bingila muka bikwabo?
15 Kuli bingila bikwabo bituli na kutembwininamo baka-Kilistu ba kulibanga mubakele na kulemeselamo Njambi. Ngwe mwa baka-Kilistu ba kulibanga, na matangwa ano tuli na tunyungi ba kuzenguluka, bakulunu na baka-kupangela. (Fili 1:1; Tito 1:5) Kutundaho, tukamono bupangala, bulo na maninga ngwe mubakele na kubimwena baka-Kilistu ba kulibanga. Co lalo, tukamono baka-bubi baje kubesi kutenguluka ngwe mubakele na kubamwena baka-Kilistu ba kulibanga.—Vili 15:28, 29; 1 Koli 5:11-13; 6:9, 10; Heve 13:4.
16. Majwi ali ku mukanda wa Efeso 4:4-6, atulongesa bika?
16 Yesu wendekele ngwendi banu babangi bakalishasha ngwabo bandongesi bendi, oloni keti banu boshe banapu bandongesi bendi. (Mateo 7:21-23) Bisoneka byamwesele cimweja ngwabyo mu matangwa a kukotoka banu babangi “bakalimwesa lika ngwe bali na kulinga bya bunjambi.” (2 Tima 3:1, 5, NWT) Oloni Mbimbiliya yatuleka lalo ngwayo kwakala lika ‘likulahelo limo’ lya busunga.—Tandeni Efeso 4:4-6.
17. Beya bapwa baka-Kilistu ba busunga baje bali na kumwesa likulahelo lya busunga ano matangwa?
17 Beya bali na kumwesa eli likulahelo lya busunga ano matangwa? Twalimwena bukaleho. Twasimutwiya ha ngila yaibwa yakulemeselamo Njambi yalongesele Yesu ije ibakabangeyeye baka-Kilistu ba kulibanga. Byuma bitunasimutwiya binamwesa ngwabyo Bakaleho ba Yehova bakebo lika bali na kumwesa eli likulahelo lya busunga. Twabezika manene kupwa banu ba Yehova na kuzibuka busunga hali ikeye na bikulaheso byendi. Ngeci, tutwaleleleniho kukulahela na mbunge yetu yoshe ngwetu tunawana busunga.
MWASO 3 Watwana Nzili na Lilabelelo, co Yobe Itwakulahela
^ par. 5 Muno mu cilongesa, tusimutwiya ha ngila yaibwa ya kulemeselamo Njambi yatumwesele Yesu nomwo bandongesi bendi ba kulibanga baikabangeyeye. Tusimutwiya lalo ha bukaleho bumwesa ngwabwo Bakaleho ba Yehova bali na kukabangeya eyi ngila ya kulemeselamo Njambi yatumwesele Yesu.
^ par. 10 Cakumwenako, mu 2008, Popu Benedict XVI washikile ngwendi lizina lya Njambi kubapandele kulipangesa mu bulombelo bwa Katolika omwo bemba myaso nambe omwo balombela.
^ par. 62 KULUMBUNUNA CIKUPULO: Munga ya Yehova inatuhula Mbimbiliya ya New World Translation mu bindaka bya kutubakana 200 mangana banu batande Mbimbiliya ije ili na lizina lya Njambi mu bindaka byabo.
