1. Mwahaya bwaddi athu owinjhiva peeno yanganyedhaga ohukalawo webedha webaribari?

PEENO anyagereja owinjhiva enawoga wi enomwebedha Mulugu mwamakalelo anarumeedhiye. Bumwahaya athu owinjhiva yanganyedhaga ni yikohaga. “Ohukalawo webedha webaribari? Obe gereja-gerejave Muluguya di mmodhave ninga athu amodha enawogiwa.” Ki iyo Anamona a Yehova nnowanganyedha akala nnohudhiha ebaribari ni nnomwebedha Mulugu ninga anafuneliye mowiwanana ni mweddelo wowebedha webaribari yahiyedhiwe makiristawu oobajha? Kabeni nihudhere dhithu dhinanikavihere ohanganyedha.

2. Mowiwanana ni 1 Tessalonicenses 1:5, mwahaya bwaddi murumiwi Pawulo adhe awogege wihina kaanganyedha ebaribari?

² Murumiwi Pawulo kaanganyedha ebaribari, mwahaya bwaddi? (Omwileri 1 Tessalonicenses 1:5.) Murumiwi Pawulo kaanganyedha ebaribari mwaha ere ohudhera. Oliye owapwasedha wahudhera Madhu a Mulugu. Oliye orumedha wihina ‘dholebela dhatedhene dhinadha wa Mulugu.’ (2 Tim. 3:16) Murumiwi Pawulo amuhudheraga Bibliya ahudhere ddi? MBibliyani murumiwi Pawulo ohufwanya ebaribari, enawoga wi Yesu di Mesiya aapaganyiwe, mbwenye anddimuwa ammagereja aJudewu yopwaza ebaribari ela. Aliwa yowoota wihina yomuriha Mulugu mbwenye wiipini yowerana dhithu dhamutakalela Mulugu. (Tito 1:16) Mbwenye murumiwi Pawulo ahihiyana ni agwalamgwambi ala, oliye kasakula epaddi baani ya Bibliya yahoweleya orumedha. Oliye owilibihera ohudhiha ni weddela ‘dhatedhene Mulugu anafuniye werana.’​—Atos 20:27.

3. Wihina nihanganyedhege ebaribari enohoweleya makoho ehu atene yakuliwe? (Osugwe kwaduru: “ Thotho ni mabasa a Yehova ehithabwa ‘winjhiva wi esorihiwe.’”)

 ³ Athu amodha enubuwela wihina webedha webaribari ohukanna mutholo wowawakula makoho amatene naaleya ehinaakuliwa mBibliyani. Mbwenye eyo ebaribari? Kabeni none yotajhiha ya murumiwi Pawulo. Oliye ahakongomedha makiristawu egi: ‘Murajhihege opendda kadda ethu,’ teto oliye ahirumedha wihina koonelamo dhithu dhimodha. (1 Tes. 5:21) Oliye ohufiyera oleba egi: ‘Enonelo yehu kahi enene,’ ni ohenjhedhedha egi: ‘Ni nnavuhulela vang’ono.’ (1 Cor 13:9, 12) Pawulo kanonile dhatedhene, ni iyoya kannonile dhatedhene. Mbweneye Pawulo owonelamo efunelo ya Yehova. Dhithu aanonile murumiwi Pawulo dhomuthukulela ohanganyedha wihina ohufwanya ebaribari.

4. Wihina nihanganyedhege wi nihifwanya ebaribari enahoweleya nere ddi, ki nnahudhera ddi wodhela makiristawu eebaribari?

⁴ Sapama ohanganyedha wihina nihifwanya ebaribari. Negi nihanganyedhege ebaribari enohoweleya oladdaniha mweddelo wowebedha anihiyedhe Yesu ni mweddelo wa Anamona a Yehova peeno. Ohudhera wula nnere osuza wihina makiristawu ebaribari (1) kinebedha dhikwamuthu dhosema, (2) enothithimiha ndina na Yehova, (3) enodhivela ebaribari, (4) enodhivelana mmodha ni mukwaye.

5. Yesu anihudhihe makalelo baani omwebedha Mulugu, ki nnaamutajhihe addi?

⁵ Yesu omudhivela vanlubale Mulugu, bumwahaya Yesu agaali odhulu ni nufiya elabo yavati Yesu amwebedha Yehova baahi. (Lucas 4:8) Yesu ohahudhiha anamaharaye werana emodhave. Yesu ni anamaharaye oororomeleya kinebedhege ekwamuthu yosema. Mulugu muzimu mwaha wa yeyo ekwamuthu si  ekwamuthu athu enasasanyiwa kinaligana ni Yehova Mulugu. (Isa. 46:5) Ki wodhela olobelela ni okokorela dhikwamuthu dhosema dhaathu oororomeleya? Yehova avahaga malamulo kumi amwaana Ezarayeli nlamulo nanabili nawoga negihina: ‘Onaaseme ekwamuthu, oladdanihaga ni ethu eli odhulu, naari ethu eli elabo yavati . . . onaakokorele ni oneebedhe.’ (Êx. 20:4, 5) Ale enafuna omwebedha Mulugu ni makalelo apama enowiwelela nlamulo nna.

6. Anamona a Yehova yamwebedhaga Mulugu, enahara mweddelo baani?

⁶ Anamaleba thalako enorumedha wihina makiristawu obajha yamwebedha Mulugu baahi. Motajhiha livuru a Historia da vida Crista nnowoga wihina makiristawu oobajha “yowidda mubuwelo ola wokokorela ekwamuthu yosema” yamwebedha Mulugu. Peeno Anamona a Yehova enohara mweddelo mmodhave wa makiristawu obajha. Iyo kanneebedha ekwamuthu yaathu “ororomeleya” ni ya angero, newene kannamulobelela Yesu Kiristu. Ni kannakokorela anamathonga elabo yehu newene kannakokorela bandera. Yoluba yehu fuwawiwelela madhu awogile Yesu Kiristu enihina: ‘Omwebedhege Mulugu awo Yehova.’​—Mat. 4:10.

7. Ohiyana baani orivo Anamona a Yehova ni gereja dhimodha?

⁷ Peeno athu owinjhiva enowahara anddimuwa amugereja ekirijimariwe ni ethabwile ovuwa. Aliwa enowaatikina athu yala ni enofiyera wakokorela. Athu enodha mwigereja mwewa, enowagula malivuru ewa ni enowavaha oferta anddimuwa ala ammagereja. Anddimuwa ala ammagereja yawoga ethu athu ale enaahara kinaddoddoma. Mwaha wayeyo nnowikoha, vano yahere athu ala yere omoona Yesu tho-tho yere omutikina ninga enaatikiniwa anddimuwa ala ammagereja? Mbwenye makiristawu eebaribari kinaakokorela athu. Ebaribari wi iyo nnowariiha addibila enaniholela, mbwenye kannaddiwala madhu a Yesu Kiristu awogiliye egi: ‘Atene muri addibila.’ (Mat. 23:8-10) Iyo kannakokorela athu naari ekale anddimuwa amugereja obe ekale anamathonga. Newene kannakavihera ni museludhiwa, mbwenye nnowilibihera ohukala epaddi yelabo. Mwaha wa yeyo yaka dhatedhene nnowoniha wi iyo nihiyana ni athu amodha enawoga wi nili makiristawu.​—João 18:36.

8. Nnone addi wihina Yehova anofuna wi ndina naaye nithithimihiwe, ni nnoniwe?

⁸ Nlabo nimodha Yesu olobela: ‘Babani muthithimihe ndina nenyu.’ Vano Yehova agaari odhulu wakula nlobelo na Yesu ni ndhu notama, apaganyaga wihina ere othithimiha ndina naaye. (João 12:28) Aaparaga mabasaye oolaleya Yesu ahithithimiha ndina naaBabe. (João 17:26) Bumwahaya makiristawu eebaribari enowithukula vanlubale mwaha olabihedha ndina na Mulugu ni wahudhiha athu amodha.

9. Makiristawu ansaka noobajha yonihe addi wihina yothithimiha ndina na Mulugu?

⁹ Nsaka noobajha, mulogo wa makiristawu weraga ofuguleliwawene Yehova ‘Mulugu wawubuwela athu amalogo, wihina asakule nlogo niithaniwege ni ndina naaye.’ (Atos 15:14) Makiristawu nsaka nenna yowithukula mwaha yolabihedha ndina na Mulugu, ni wakavihera athu amodha wihina enone ndina nna. Aliwa yolabihedha ndina nna yalaleyaga ni yaamutapulelaga Bibliya. * Aliwa yahoniha wi yaali nlogo nimodha baahi yavuwiha ndina na Mulugu.​—Atos 2:14, 21.

10. Dhithu baani dhinoniha wihina Anamona a Yehova nlogo nnafwanelela ndina nna na Yehova?

 ¹⁰ Niwogege wi Anamona a Yehova enofwanelela ndina nna? Hee. Kabeni none dhithu dhinoniha wi eyo ebaribari. Peeno anamasogolela gereja owinjhiva enowilibihedha wi ndina na Mulugu nihinoniwe. Ehivenyihamo mBibliyani ndina nna mburo munadhiwa, ohiya yeyove aliwa enowawadeliha anyagereja owinjhiva onona ndina nna. * Ki nnowanganyedha wi Anamona a Yehova thi nlogo nimodha baahi nnariha ni nnathithimiha ndina nna mwamakalelo apama? Kavo nlogo nimodha nnavuwiha ndina nna na Mulugu ehili Anamona a Yehova! Iyo nnowilibihedha vanlubale wihina nthithimihe ndina nna nivahiwihu, Anamona a Yehova. (Isa. 43:10-12) Mwaha nihimutapulela Bibliya Tradução do Novo Mundo da Biblia Sagrada ni dhiwogelo dhowakwana 240 milhões, analabihedha ndina nna na Yehova mburo munadhiwa. Teto nihaatapulela malivuru ni marevista owinjhiva enawoga muselu dhinadhela mBibliyani ni enavuwiha ndina nna na Yehova ni dhiwogelo dhowakwana 1000.

11. Makiristawu ansaka noobajha etonyihedhe addi wihina yodhivela ebaribari?

¹¹ Yesu odhivela ebaribari obe niwoge, ebaribari ya Mulugu wodhela nde oliye dhinafuniye werana. Egumi yaye yatene Yesu oweeddela ebaribari teto owahudhiha athu  amodha ebaribari yela. (João 18:37) Anamahara a Yesu ebaribari naaliwaya yodhivela ebaribari. (João 4:23, 24) Bumwahaya murumiwi Peduru adhe ithanege webedha wekiristawu ninga ‘webedha webaribari.’ (2 Ped. 2:2) Odhivela wanna makiristawu ansaka noobajha wodhela ebaribari waali winlubale, bumwahaya aliwa yovanyiha mubuwelo, dhilemelelo, ni mweddelo dhaathu dhahiwanana ni ebaribari. (Col. 2:8) Ethu emodhave enopadduwa peeno ni makiristawu ebaribari, aliwa enowilibihedha wihina yeddegeve ‘mwibaribarini’ aliwa enerana yeyo mwaha nde enahudhihiwa dhinadhela mmadhuni a Yehova. ​—3 João 3, 4.

12. Yakala yohoweleya osaddula eenonelo ninnihuna wodhela Bibliya, addibila enanisogolela eneera ddi, ki mwahaya bwaddi

¹² Anamona a Yehova kinawoga wi iyo dinna eenonelo yowogowa, yowakwanela ni yeebaribari. Malabo mamodha nnoviriganiha. Motajhiha, natapulelaga yolebela ya mBibliyani obe naavahaga dhoholela wodhela makalelo mulogo onafuniwa weddaga. Mbwenye eyo yapadduwa kinantikiniha. Mwaha wi Bibliya onosoriha wi eenonelo yowakwanela enunnuwa mudhidhi waviraga. (Col. 1:9, 10) Ohiya eyo, Yehova ananonelihamo ebaribari vang’no vang’no ninga waara vati vasaga. (Pro. 4:18) Ale enanisogolela yoona wi enohoweleya wawerana masadduwo wodhela enonelo ya mBibliyani yoneliwamo ovanene aliwa enowawerana mowaguva, eyo ethu enanihiyaniha ni anyagereja owoota. Mwaha wi dila dhowinjhivadhene aliwa enowawerana masadduwo wihina yahagalase ale enaroromela ni yahagalase athu atene. Mbwenye nikuru na Yehova nnawerana masadduwo wihina nnikavihere omwaddamela Mulugu ni ohara mweddelo wowebedha Yesu atikiteriye. (Tia. 4:4) Masadduwo nnawerihuna kinahara mweddelo okumile ovanene obe kahiyo wi niwaddihedhiwe naathu, mbwenye nnawerana masadduwo mwaha ethu nonelihumo wodhela Bibliya. Iyo nnodhivela vanlubale ebaribari.​—1 Tes. 2:3, 4.

13. Ekalelo baani ya thima makiristawu enonihiwa, ki ekalelo ela enathabwa woneya mudhidhi baani vaari va Anamona a Yehova?

¹³ Makiristawu ansaka noobajha yahikanna dhikalelo dhapama, mbwenye ekalelo yathimaya waali odhivela. Yesu ohuwoga egi: Mowindo athu atene enere onona wi muri anamahara aaga: ‘Mwadhivelanaga mmodha ni mukwaye.’ (João 13:34, 35) Peeno Anamona a Yehova wapela elabo yatene podi wooniha odhivela webaribari ni okala mwimodhani. Iyo niihiyana ni dhigereja dhimodha nili ninga emudhi eli mwimodhani, podi nikale elabo emodha obe dhilemelelo dhohiyana eyo kinanigawanya. Iyo nnowona odhivela wula webaribari nakala vamutugumanoni, nakala vamusonkanoni wa nlabo nimodha obe wa malabo mararu. Odhivela wula winonithukulela iyo ohanganyedha wihina makalelo ala owebedha biyala enamudhivela Yehova.

14. Mowiwanana ni Colossenses 3:12-14, makalelo athima owoniha odhivela mmodha ni mukwaye baavi?

¹⁴ Bibliya ononaddela ‘mudhivelanege pamadhene.’ (1 Ped. 4:8) Makalelo ootonyihedha odhivela wula fuudhela olevelelana mmodha ni mukwaye, ni ovilelana ohulogomana waddibilihu. Iyo podi waja ofuru wokala athu ovaha, ni wawakela vaade vehu addibilihu ammulogoni, podi naleya yerilena ethu enipihe mbani. (Omwileri Colossenses 3:12-14.) Nadhivelanaga mmodha ni mukwaye nnowoniha wi nili makiristawu ebaribari.

15. Makalelo baani mamodha enatonyihedha wi nnahara mweddelo wowebedha ehiyile makiristawu obajha?

¹⁵ Dhihikalawo dhithu dhimodha dhinoniha wi nnahara mweddelo wowebedha webaribari ehiyile makiristawu ansaka noobajha. Motajhiha, nikuru nehu nihikanna anameeddela mulogo, anamaholela mulogo ni adhaari ookavihera. Teto nsaka noobajha yahikalawo athu yala. (Fil. 1:1; Tito 1:5) Ohiya eyo, monelo wehu wodhela ogonihana, matelo, ohurumedha nikame ni makalelo obarela mulogo waale yerilena yothega ehifunaga othwaruwa dhinowiwanana ni makalelo owebedha ehiyile makiristawu ansaka noobajha.​—Atos 15:28, 29; 1 Cor. 5:11-13; 6:9, 10; Heb. 13:4.

16. Nnahudhera ddi ni ele anawoga, Efésios 4:4-6?

¹⁶ Yesu ohuwoga wi athu owinjhiva yerege osoriha wi niri anamahara aye, mbwenye oliye ahisorihave wi kiyakale atene yawogege ebaribari. (Mat. 7:21-23) Teto Bibliya ohunaddela wihina malabo okuthula athu owinjhiva ‘enere okanna ekalelo yofuna omulabela Mulugu.’ (2 Timóteo 3:1, 5) Teto Bibliya kananikuwa awogaga wi niliwo ‘nroromelo nimodha.’ Mulugu anarumedheye.​—Omwileri Efésios 4:4-6.

17. Nikuru baani peeno nnamuhara Yesu ni nnerana webedha webaribari?

¹⁷ Nikuru baani peeno nnerana webedha webaribari? Iyo nihoona makalelo Yesu ahudhihiye makiristawu ansaka noobajha webedha webaribari. Bumwahaya yowakula ya nikoho nna thinna — Anamona a Yehova. Gari nlubale okosa epaddi na nikuru na Yehova ni onona ebaribari ni efunelo yaye. Bumwahaya kadda muthu wa iyo, ikome wihina ahiddele ebaribari ni malada menli ahanganyedhaga.