TLAMACHTIL 42
Nochipa ma tikchiuakan tlen toTajtsin Dios techmachtia
“Xikitakan kox nochi melauak uan ximochijchikauakan nochipa xikchiuakan tlen kuali” (1 TES. 5:21, TNM).
TLAKUIKALI 142 Notlaneltokilis nechyolchikaua
XIKILNAMIKTO *
1. ¿Tleka miakej amo kimatij katli religión tlen melauak?
KATEJ miakej tlen kipiaj inreligión uan kijtouaj kichiuaj tlen Jesús otlamachti uan kiueyichiuaj toTajtsin Dios ken ye kineki. Ik non, oksekimej amo kimatij katli religión melauak uan motlajtlaniaj: “¿Kajki san se religión tlen melauak? ¿Kiselia toTajtsin Dios nochi religiones?”. ¿Tejuan tiiTlaixpantijkauan Jehová tikneltokaj melauak tlen titlamachtiaj uan kiselia toTajtsin Dios? ¿Uelis tikneltokaskej melauak ijkon? Ma tikitakan tleka ijkon uelis tikneltokaskej.
2. Ijkon ken kijtoua 1 Tesalonicenses 1:5, ¿tleka apóstol Pablo okimatiaya melauak tlen okineltokaya?
2 Apóstol Pablo okimatiaya melauak tlen okineltokaya (xiktlajtolti 1 Tesalonicenses 1:5). Ye ijkon okineltokaya porque kuali omomachtiaya iTlajtol toTajtsin Dios. Ye okineltokaya “nochi tiotlajkuíloli Dios otlanawati makijkuilokah” (2 Tim. 3:16). Itech iTlajtol toTajtsin Dios okitak Jesús ye Mesías akin ualaskia. Pero tlayekankej judíos amo okineltokakej. Okijtouayaj okichiuayaj tlen toTajtsin otlanauatiaya pero okse tlamantli okiteititiayaj (Tito 1:16). Pero Pablo amo ijkon okichi porque ye amo san okipejpenki tlen kineltokaskia uan tlen amo. Ye okijto tlamachtiskia uan kichiuaskia “nochi tlan Dios kimonekiltia” (Hech. 20:27).
3. Tla tiknekij tikneltokaskej melauak tlen timomachtiaj, ¿moneki tikmatiskej nochi tlen timotlajtlaniaj? (Noijki xikita recuadro “ Amo nochi uelis tikmatiskej tlen okichijchi Jehová uan tlen mokuayejyekoua”).
3 Sekimej kijtouaj tlen katej itech religión tlen melauak moneki kinankiliskej nochi tlajtlanilmej uan noijki moneki kinankiliskej tlen Biblia amo kinankilia. ¿Kuali tlen ijkon mokuayejyekouaj? Pablo okijto “xikitakan kox nochi melauak”, pero noijki okajsikamatki amo nochi okimatiaya (1 Tes. 5:21). Ye okijto: “San siki tikmatokeh” uan noijki okijto: “Axa titlachiah kemi itla non amo moyekita itech se teskatl” (1 Cor. 13:9, 12). Ijkon ken Pablo amo nochi tikmatij. Pero ye okajsikamatiaya iTlajtol toTajtsin Dios, ik non, okineltokaya melauak tlen ompa kijtoua.
4. ¿Tlen techpaleuis okachi ma tikneltokakan melauak tlen kijtoua Biblia uan axkan tlen timomachtiskej?
4 ¿Tlen techpaleuis okachi ma tikneltokakan melauak tlen kijtoua Biblia? Ma tikitakan tla tikueyichiuaj Jehová ken Jesús otlamachti. Itech nin tlamachtil tikitaskej: (1) amo tikinueyichiuaj teotsitsintin, (2) tiktlakaitaj itoka toTajtsin Dios, (3) tikpatioitaj tlen kijtoua Biblia uan (4) tinochtin timotlasojtlaj.
AMO TIKINUEYICHIUAJ TEOTSITSINTIN
5. ¿Tlen okichi Jesús uan ken uelis tikchiuaskej ijkon ken ye?
5 Ijkuak Jesús okatka iluikak uan noijki ijkuak okatka tlaltikpak, nochipa okiueyichi Jehová, ijkon okichi porque sapanoua okitlasojtlaya (Luc. 4:8). Uan ijkon okinmititi imachtijkauan ma kichiuakan. Jesús uan imachtijkauan amo okiueyichijkej Jehová ika teotsitsintin. ToTajtsin Dios se espíritu, ik non, amitlaj uelis ika kineskayotiskej (Is. 46:5). Pero ¿uelis tikinpiaskej teotsitsintin tlen miakej kintokayotiaj santos? Se tlanauatil tlen poui itech majtlaktli tlanauatilmej tlen Jehová okitemakak kijtoua: “Amo xikmochijchiuili nion se teotsin tlen kajki itech iluikak, nion tlen kajki itech tlaltikpak, nion tlen kajki itech ueyi atl. Amo ximotlankuaketsa inmixpan” (Éx. 20:4, 5). Akinmej tiknekij tikyolpaktiskej toTajtsin Dios tikmatij amo moneki tikueyichiuaskej ika teotsitsintin.
6. ¿Ken akinmej tikchiuaj tiiTlaixpantijkauan Jehová?
6 Ixtlamatkej kijtouaj tokniuan tlen okatkaj itech achto siglo san okiueyichiuaya toTajtsin Dios. Se amochtli kijtoua amo omokuayejyekojkej kintlaliskej teotsitsintin para kiueyichiuaskiaj toTajtsin Dios (History of the Christian Church). TiiTlaixpantijkauan Jehová tikchiuaj ijkon ken nonmej tokniuan. Amo tikintlatlaujtiaj teotsitsintin, ángeles nion Jesús. Noijki amo tiktlajpalouaj bandera uan amo tikinueyichiuaj tekiuajkej, tejuan yotikijtojkej tikchiuaskej tlen Jesús okijto: “Xikweyijkachiwa Moteko Dios” (Mat. 4:10).
7. ¿Tleka tiiTlaixpantijkauan Jehová amo ken okseki religiones?
7 Miakej kinpaktia kinkakiskej akinmej tlayekanaj itech religiones, ik non, hasta kinueyichiuaj. Motemitiaj kanin yejuan tlamachtiaj, kinkouaj amochmej uan kitemakaj miak tomin para kinpaleuiskej. Noijki nochi kinneltokiliaj. Okachi kinpaktia tlen kichiuaj uan amo tlen Jesús otlamachti. Pero tejuan amo tikchiuaj ken oksekimej, maski tikintlakaitaj akinmej techyekanaj noijki tikinmitaj ken Jesús okijto, nochtin ‘tiiknimeh’ (Mat. 23:8-10). Amo tikinueyichiuaj tlakamej, akinmej tlayekanaj itech religiones nion tekiuajkej. Amo tikinpaleuiaj ken oksekimej kichiuaj, amo tikchiuaj ken okseki religiones tlen kijtouaj kichiuaj ken Cristo (Juan 18:36).
TIKTLAKAITAJ ITOKA TOTAJTSIN DIOS
TiiTlaixpantijkauan Jehová sapanoua tiyolpakij tikintlapouiskej oksekimej akin ye. (Xikinmita párrafos 8 hasta 10). *
8. ¿Ken tikmatij Jehová kineki ma tikueyichiuakan itoka uan ma tikinmatiltikan oksekimej?
8 Se tonal Jesús okijto: “Notajtsi, maweyijkachito Motoka”. Jehová okilui kiueyichiuaskia itoka (Juan 12:28). Jesús nochipa okiueyichi itoka iTajtsin ijkuak otetlapoui (Juan 17:26). Tejuan tiyolpakij tikueyichiuaj itoka toTajtsin Dios uan tikinmatiltiaj oksekimej.
9. ¿Ken okiteititijkej okitlakaitayaj itoka toTajtsin Dios tokniuan tlen okatkaj itech achto siglo?
9 Itech achto siglo ijkuak opejkej monechikouaj tokniuan Jehová “opé kinnotsa akimeh amo judíojteh. Iwa intech okinmopejpeni sikimeh para mayetokah iaxkawah” (Hech. 15:14). Yejuan oyolpakiayaj kimatiskej itoka toTajtsin Dios uan okinmatiltijkej oksekimej. Noijki ijkuak okinmijkuilojkej amochmej tlen katej itech Biblia okitlalijkej itoka toTajtsin Dios. * Ijkon okiteititijkej san yejuan okitematiltijkej itoka toTajtsin Dios (Hech. 2:14, 21).
10. ¿Tlen kiteititia toTajtsin Dios okinpejpenki iTlaixpantijkauan Jehová para ma kitematiltikan itoka?
10 ¿Jehová okinpejpenki iTlaixpantijkauan para ma kitematiltikan itoka? Miakej tlen tlayekanaj itech inreligión yokichijkej miak tlamantli para amo ma kimatikan itoka toTajtsin Dios. Ayakmo kitekauiliaj ma kijkuilokan itech Biblia uan ualeua amo kitekauiliaj ma kitematiltikan kanin monechikouaj. * Pero san iTlaixpantijkauan Jehová kitlakaitaj itoka toTajtsin Dios uan kitematiltiaj. Timochijchikauaj tikpiaskej tonemilis ijkon ken ye kineki. (Is. 43:10-12). Biblia Traducción del Nuevo Mundo okitlajtolkopkej uan okinchijkej miak copias, kanaj 240 millones uan okijkuilojkej itoka toTajtsin Dios kanin miakej amo okijkuilojkej. Noijki kintlajtolkopaj amatlajkuilolmej kanaj ika 1,000 tlajtolmej kanin kijkuilouaj itoka toTajtsin Dios.
TIKPATIOITAJ TLEN TLAMACHTIA TOTAJTSIN DIOS UAN TLEN KIJTOUA KICHIUAS
11. ¿Ken okiteititijkej tokniuan tlen okatkaj itech achto siglo okipatioitayaj tlen toTajtsin Dios tlamachtia?
11 Ijkuak Jesús okatka nikan tlaltikpak okipatioitak tlen tlamachtia toTajtsin Dios uan tlen kijtoua kichiuas. Okichi tlen omomachti uan okinmatilti oksekimej (Juan 18:37). Imachtijkauan Jesús noijki okipatioitakej tlen toTajtsin Dios tlamachtia (Juan 4:23, 24). Apóstol Pedro okijto “akimeh kineltokah Cristo”, yejuan okichijtoka tlen toTajtsin Dios kineki (2 Ped. 2:2). Nonmej tokniuan sapanoua okipatioitakej tlen omomachtijtokaj, ik non, amo okineltokakej tlen okseki religiones otlamachtiayaj, okichiuayaj uan tlen omokuayejyekouayaj (Col. 2:8). Axkan noijki akinmej kichiuaj ken Cristo kichiuaj tlen kijtoua iTlajtol toTajtsin Dios (3 Juan 3, 4).
12. ¿Tlen kichiuaj tokniuan tlen tlayekanaj para ma motetlapoui itech nochi tlaltikpak uan tleka?
12 TiiTlaixpantijkauan Jehová amo tikijtouaj yikimatij nochi tlen kijtoua Biblia. Ualeua timotlapololtiaj ijkuak tikyekijtouaj se tlamachtil noso ijkuak tikitaj ken tikinyekanaskej tokniuan itech nochi tlaltikpak (Col. 1:9, 10). Pero non amo techtlajtlachialtia porque iTlajtol toTajtsin Dios kijtoua yolik tikajsikamatiskiaj tlen ompa kijtoua (Prov. 4:18). Jehová yolik techajsikamatiltia tlen melauak uan non yetoskia ken se tlauili tlen okachi petlani. Ijkuak tokniuan tlen tlayekanaj para ma motetlapoui itech nochi tlaltikpak kitaj moneki kipatlaskej ken tikajsikamatij se tlamachtil noso itlaj okseki, san niman kichiuaj. Miakej tlen tlayekanaj intech inreligión itlaj kipatlaj para ma kinpakti akinmej kinyekanaj noso para miakej ma kinmixmatikan. Pero tejuan itlaj tikpatlaj porque tiknekij oksekimej ma kixmatikan toTajtsin Dios uan ma kichiuakan ijkon ken Jesús otlamachti (Sant. 4:4). Itlaj tikpatlaj pero amo tlen oksekimej kinpaktia, ijkon tikchiuaj porque okachi otikajsikamatkej tlen kijtoua Biblia uan noijki tikpatioitaj (1 Tes. 2:3, 4).
SAPANOUA TIMOTLASOJTLAJ
13. ¿Tlen tikteititiaj tiiTlaixpantijkauan Jehová uan ken tikchiuaj?
13 Miakej okinmitayaj omotlasojtlayaj tokniuan tlen okatkaj itech achto siglo. Jesús okijto: “Tla nomejwah nonmosepantlasojtlah, nochteh n tlaltikpaktlakah nomechitaskeh nomejwah de milajka notlamachtijkawah” (Juan 13:34, 35). TiiTlaixpantijkauan Jehová tlen tikatej itech nochi tlaltikpak kuali timouikaj uan timotlasojtlaj. Tejuan amo ken okseki religiones, maski tlatlamantli toaltepe tinochtin timouikaj ken se familia. Tikteititiaj timotlasojtlaj ijkuak timonechikouaj uan ijkuak tiauij uejueyij nechikolmej. Non kichiua ma tikneltokakan san tejuan tikueyichiuaj Jehová ken ye kineki.
14. Ijkon ken kijtoua Colosenses 3:12-14, ¿ken tikteititiskej timotlasojtlaj?
14 Biblia kijtoua: “Okachi moneki, ximosepantlasojtlakah” (1 Ped. 4:8). Tikteititiaj timotlasojtlaj ijkuak tikintlapojpoluiaj oksekimej uan tikxikouaj tlen yejuan kichiuaj porque tinochtin titlajtlakolejkej. Noijki tikintliokoliaj tokniuan tlen tikpiaj uan noijki ijkon tikchiuaj hasta iuan akinmej otechyolkokojkej (xiktlajtolti Colosenses 3:12-14). Ijkon tikteititiaj tejuan melauak tikchiuaj ken Cristo.
ONKA SAN SE TLANELTOKILISTLI
15. ¿Ken tikteititiaj tikchiuaj ken tokniuan itech achto siglo?
15 Onka okseki tlamantli tlen tikchiuaj ijkon ken tokniuan itech achto siglo. Ijkon ken apóstoles okijtojkej ken omonekiaya tlayetos yiuejkika, axkan noijki katej tlayekankej tlen kintlajpalotiuij sejse tlanechikol, tikinpiaj tlayekankej kanin timonechikouaj uan siervos ministeriales (Filip. 1:1; Tito 1:5). Ijkon ken yejuan okichiuayaj, tejuan tikintlakamatij itlanauatiluan Jehová, amo tiauilnemij, tiktlakaitaj tosiua noso tonamik, tiktlakaitaj estli uan tikinmaluiaj tokniuan tlen inmiuan timonechikouaj ijkuak ikaj tlajtlakolchiua uan amo moyolkopa (Hech. 15:28, 29; 1 Cor. 5:11-13; 6:9, 10; Heb. 13:4).
16. ¿Tlen techmachtia Efesios 4:4-6, TNM?
16 Jesús okijto miakej kijtoskiaj okatkaj imachtijkauan pero kiteititiskiaj amo melauak (Mat. 7:21-23). ITlajtol toTajtsin Dios kijtoua itlamian tonalmej “kichiwaskeh kemi yetoskiah de milajka kineltokah Dios” (2 Tim. 3:1, 5). Pero Biblia kijtoua onka san se tlaneltokilistli tlen toTajtsin Dios kiselia (xiktlajtolti Efesios 4:4-6, TNM).
17. ¿Akinmej kichiuaj ken Jesús uan kiueyichiuaj toTajtsin Dios ken ye kineki?
17 ¿Akinmej kiueyichiuaj toTajtsin Dios ken ye kineki? Yotikitakej tlen okichi Jesús uan tokniuan tlen okatkaj itech achto siglo okichijkej ken ye. Uan axkan ijkon kichiuaj iTlaixpantijkauan Jehová. Se ueyi tlateochiualistli tikatej itech ialtepe toTajtsin Dios, tikmatij tlen ye tlamachtia uan tlen kichiuas. Ik non, moneki okachi ma tikneltokakan tlen toTajtsin Dios techmachtia.
TLAKUIKALI 3 Jehová nechpaleuia uan nechyolchikaua
^ párr. 5 Itech nin tlamachtil tikitaskej ken Jesús okiueyichi toTajtsin Dios uan ken noijki ijkon okichijkej imachtijkauan tlen okatkaj itech achto siglo. Noijki tikitaskej axkan iTlaixpantijkauan Jehová noijki ijkon kichiuaj.
^ párr. 9 Xikita recuadro “¿Empleaban los primeros cristianos el nombre de Dios?”, kajki itech revista Akin Tetlapouijtok, 1 de julio 2010, página 6.
^ párr. 10 Itech 2008 teopixki XVI okinnauati católicos amo ma kijtokan itoka toTajtsin Dios ijkuak tlakuikaskiaj, motlatlaujtiskiaj noso ijkuak monechikoskiaj.
^ párr. 63 FOTO: Ialtepe Jehová yokitlajtolkopki Biblia Traducción del Nuevo Mundo ika kanaj 200 tlajtolmej, ompa ijkuilitok itoka toTajtsin Dios uan ijkon miakej uelis kitlajtoltiskej ika intlajtol.
