1. Ngenyi vandhu vazinji nyamasi uno vari kubararika hwiru?

NYAMASI uno, kuno zviuru zvo zviyara zvinonanga kuti ngo zvo Cikristu no zvinonamata Mwari mu njira inotendehwa ndiyena. Izvi zviri kuita kuti vandhu vazinji vabararike hwiru. Ivona vanojivhunjisa kudari: “Kureva kuti kuno ciyara cimwe cokadi, kana kuti zvese zvinodakajisa Mwari?” Waro tingati kudini ndisu, kureva kuti tinokhohwa kuti tiri kujijisa cokwadi? Tino cokwadi co kuti Zvapupu zva Jehovha nyamasi uno zviri kunamata Mwari mu njira yaanoda? Ngativone mathangwe manganani anotibesera kukhohwa izvi.

2. Mukuzwirana no 1 Vatesaronika 1:5, ngenyi Pauro waikhohwa kuti wainga awana cokwadi?

² Mupostori Pauro waikhohwa kamare kuti iyena wainga awana cokwadi. (Verenganyi 1 Vatesaronika 1:5.) Kukhohwa uku akucaicijikira mu mazwiro ake. Pauro wainga mundhu wainasa kujija Soko ra Mwari. Iyena waitenda kuti: “Matahwa ese akafemehwa ndi Mwari.” (2 Timoti 3:16) Pauro wakajijenyi mu Soko ra Mwari? Iyena wakajija zviro zvaikhohwesa kamare kuti Jesu wainga Mesiya wakagondeswa. Ngo divi rimweni, vatungamiriri vo ciyara co Cijudha avacaitenda zviro izvi. Ngo kucengejera ivona vainanga kuti vaiimirira Mwari, asi vaimuramba ngo zviro zvavaita. (Tito 1:16) Pauro aacaiezana no vatungamiriri ava. Iyena aacaitendepi divi rimwe ro Soko ra Mwari rimweni worisiya. Wainga wakanasiririka kuti ajijise no kuzwira “zviro zvese zvinoda Mwari.”—Mabasa o Vapostori 20:27.

3. Kureva kuti tinodikana kuva no mupinguro jo muvhunjo jese kuitira kukhohwa kuti tawana cokwadi? (Vonanyivo bhokiso rinoti: “ Mabasa no Murangariro ja Jehovha, “Bzinopindirija Kuverengwa Kurikwese.””)

³ Vamweni vanorangarira kuti ciyara co kadi cinodikana  kukwanisa kudavira muvhunjo jese, kubatanijavo jiya jicikadavihwi mu Bhaibheri. Kunanga kuti izvi, ndizvonadi kamare? Ngatende tivone muezaniso wo mupostori Pauro. Iyena wakavangisa Makristu kuti ave no “cokwadi pa zviro zvese.” Wakatonangavo kuti painga no zviro zvakawanda zvaacaizwisisa. (1 Vatesaronika 5:21) Pauro wakatara kudari: “Tino zivo icizivi kukwana . . . Ngokuti wari atiripi kunasa kuvona ushoni ngo supeya yo simbi.” (1 VaKorinte 13:9, 12) Pauro aacainasa kuzwisisa zvese, itusu atidokwanisi kuzwisisa zvese. Asi iyena waikwanisa kuzwisisa zvokadi zvinosisira ngo pamusoro po zvigondiso zva Jehovha. Zvaaizivari zvaikwana kuti zvimukhohwese kuti wainga awana cokwadi.

4. Tingavangisa kudini kukhohwa kwedu kuti tawana cokwadi? Tinoda kuvonenyi ngo pamusoro po Makristu ocokwadi?

⁴ Itusu tinodikana kuvangisa kukhohwa kwedu kuti tawana cokwadi. Njira imwe yatingaita ndiyona izvi, ngo yo kuezanisa muezaniso o manamatire aiitwa ndi Jesu no ari kuitwa ngo Zvapupu zva Jehovha nyamasi uno. Pa jijo iyi tinozovona kuti Makristu ocokwadi (1) aanamati zvithombi, (2) anoreremeja zina ra Jehovha, (3) anoda cokwadi, cokupejisira (4) anodisana ngocao.

5. Ngozvapi zvakajijisa Jesu ngo pamusoro po kunamata Mwari ngo njira inotendehwa? Tingamutevejeresa kudini?

⁵ Jesu nguva jese waida maningi Mwari. Ngo kudaro, wainamata basi Jehovha azvinenyi dangani wainga pasi pano kana kudenga. (Ruka 4:8) Jesu wakajijisa vajiji vake kuti vaitevo zvondhozvo. Iyena no vajiji vake vakagondeka avazivi kumboshandisa zvithombi pa kunamata. Zvecivoneka kuti Jehovha i mujimu, cithombi ciri cese cingaitwa ngo mundhu  acigumi pa kuezana naye. (Isaia 46:5) Asi tingati kudini ngo kuita zvithombi zvo vandhu vanorangarihwa ngo vamweni kuva vakacena no kuvaitira mukumbiro? Pa Mupango wocipiri wo Gumi ro Mupango, Jehovha wakati: “Ucazoita mufananijo yakavezwa, yakaezana no bziro bziri mu denga, nokuti mu nyika yo pasi . . . Ucazogwadamira pamberi” pazvo. (Exodo 20:4, 5) Kuno vaya vanoda kudakajisa Mwari, magama aya akanasa kujeka kamare.

6. Zvapupu zva Jehovha nyamasi uno, zviri kutevera muezaniso wapi pa kunamata?

⁶ Pikija vandhu vakajija shitoriya vakananga kuti Makristu okutanga ainamata Mwari basi. Inga muezaniso, bhuku rinozwi História da Igreja Cristã, rinonanga kuti Makristu okutanga “vaivona kuva zvinosembhusa” murangariro wo kuva no zvithombi pa ndau yo kunamatira. Nyamasi uno Zvapupu zva Jehovha zvinotevejera muezaniso wakasiiwa ngo Makristu okutanga. Itusu atiiti mukumbiro ku zvithombi zvinonangwa kuva “zvakacena” nee kuno ngirozi. Nee atitoitivo mukumbiro kuna Jesu. Atiitizve ciri cese cinovonesa kuti tiri kunamata nyika yedu. Azvinenyi kuti ngozvapi zvingaitika, itusu takatema civaringo co kuzwira magama a Jesu okuti: “Ndi Jehovha Mwari wako waunodikana kunamata.”—Mateu 4:10.

7. Ngowapi musiyano uripo pakati po Zvapupu zva Jehovha no magerejha amweni?

⁷ Nyamasi uno, vandhu vazinji vanodakarira kutevejera vatungamiriri vo magerejha vanoita zviro zvinoshamaisa no vanozivika maningi. Nguva jimweni kushamaisika ngo vandhu ava, zvinoita kuti vagumire pa kuvanamata. Vandhu vakawanda vanoenda mu magerejha mavo, vanotenga mabhuku avo no kupa mare yakawanda kuti vabesere vatungamiriri ava. Vamweni vavo vanotenda zvese zvinonangwa ngo vatungamiriri ava. Zvinonesa maningi kurangarira kuti vandhu ava vaizodakarira Jesu inga manera avanodakarirari vatungamiriri ava. Mukusiyana, vanamati vokadi va Jehovha avanamati mundhu ari wese. Ngo zvokadi kuti itusu tinoreremeja vaya vanotungamirira, asi nguva jese tinoceukija jijiso yakajeka ya Jesu yo kuti: “Imwimwi mwese muri hama no hama.” (Mateu 23:8-10) Itusu atinamati vandhu, azvinenyi dangani ivona i vatungamiriri vo magerejha kana vo utongi. Nee atitobeseri zvavanoita. Kusiyapo zvondhozvo, tinoenderera mberi ticikaiti divi ro nyika. Pa zvese zvotaperari kuvona, zvakajeka kamare kuti itusu takasiyana maningi no vandhu vamweni vanonangaya kuti tiri Makristu.—Johani 18:36.

8. Tinozvizivisa kudini kuti Jehovha anoda kuti zina rake rikujwe no kuzivika ngo vamweni?

⁸ Pa vhaza imweni, Jesu wakakumbira eciti: “Baba, kujanyi zina renyu.” Ngo kudaro, Jehovha wakadavira mukumbiro uwu naari kudenga, ecigondesa kuti iyena waizokuja zina rake. (Johani 12:28) Pa mushando wake wese, Jesu wakakuja zina ra Baba wake. (Johani 17:26) Ngo kudaro, zvinovetehwavo kuti Makristu o cokwadi akuje zina ra Mwari no kurivhunjavo vamweni.

9. Makristu o muzana ro kutanga akakhombijisa kudini kuti iwona aireremeja zina ra Mwari?

⁹ Mu zana ro kutanga ro makore no papera mukuvo mushoma ungano yokutanga yo Makristu noyapera kuumbhwa, Jehovha ‘wakatendera vandhu vomajinja zvokuti wakatokheta vandhu vanotora zina rake.’ (Mabasa o Vapostori 15:14) Makristu o mu nguva iyi, aida kamare kushandisa zina ra Mwari no kurivhunjavo vamweni. Ivona vakashandisa  zina ra Mwari pavaicumaera no pavaitara mabhuku o Bhaibheri. * Vakavonesa kuti vainga ivona vega vaishandisa zina ra Mwari.—Mabasa o Vapostori 2:14, 21.

10. Ngozvapi zvinovonesa kuti Zvapupu zva Jehovha ivandhu vanoshandisa zina ra Jehovha?

¹⁰ Kureva kuti Zvapupu zva Jehohva vanoshandisa zina ra Jehovha here? Ngativone zviro zvinganani zvingatibesera. Nyamasi uno, vatungamiriri vazinji vo magerejha vanoita zvese zvavanokwanisa kuti vavige zina ra Mwari. Ivona vakatorivhisa mu sandujo javo jo Bhaibheri. Nguva jimweni ivona vanoguma pa kurambisa kuti zina Mwari ritame kushandiswa pavanoita musongano javo jo kunamata. * Kureva kuti kuno kukana-kana kuri kwese ko kuti Zvapupu zva Jehovha ndizvona zvega basi zvinoreremeja zina ra Mwari no kupa rukujo hwarinofanera here? Akuna cikwata cimweni cinozivisa zina ra Mwari inga zvinoita Zvapupu zva Jehovha. Tingatonanga kuti tiri kuita zvese zvatinokwanisa kuti tikuje zina ro takaashira, Zvapupu zva Jehovha. (Isaia 43:10-12) Itusu takabudisa makhopi o Bhaibheri ro Sandujo yo Nyika Imbza, anopindirija 240.000.000. Anoshandisa zina ra Mwari mu ndau morakavhiswa ngo vasanduji vamweni vo Bhaibheri. Itusu tinobudisa  mabhuku akacijikira mu Bhaibheri anozivisa zina ra Jehovha mu ndumi jinodarika 1000.

11. Makristu okutanga akakhombijisa kudini kuti aida cokwadi?

¹¹ Jesu waida cokwadi ngo pamusoro pa Mwari no zvidisiso zvake. Iyena wakapona mukuzwirana no cokwadi ici no kuita kuti vamweni vacizive. (Johani 18:37) Vateveri vokadi va Jesu, vaida maningi cokwadi. (Johani 4:23, 24) Izvo ngozvakaita kuti mupostori Pedhru adaninje Cikristu kuva “gwanja ro cokwadi.” (2 Pedru 2:2) Makristu okutanga aida maningi cokwadi zvokuti vairamba zvainangwa ngo magerejha, zvirovejeso zvavo no mavonero o vandhu ainga acikazwirani no cokwadi. (Vakorose 2:8) Ndizvona zvinoitikavo no Makristu ocokwadi nyamasi uno, ivona vanovangisira kuti “vaenderere mberi vecifamba mu cokwadi.” Vanoita izvo vakacijikira rutendo hwavo no maponero ovanoita mu Soko ra Jehovha.—3 Johani 3, 4.

12. Panodikanaya kucinja zwisiso yedu hama jinotungamirira jinoitenyi, ngenyi vanoita zvondhozvo?

¹² Zvapupu zva Jehovha azvinangi kuti nguva jese izvona zvinozwisisa zvese zvinonangwa ngo Bhaibheri. Nguva jimweni ivona vangatoposa pakusanangura vhesi iri yese yo Bhaibheri kana pakupa ndhungamiriro inodikana kushanda mu ungano. Izvo azvidikani kutishamaisa. Bhaibheri rinojekesa kamare kuti uzivi hwakakwana unoengejeka pakufamba ko nguva. (Vakorose 1:9, 10) Jehovha anojekesa cokwadi padoko ngo padoko, itusu tinodikana kuva vanosengerera kuti tizwisise cokwadi ici. (Mazwi Akangwara 4:18) Hama jinotungamirira pajinozwisisa kuti panodikana kuitwa cinjo pa zwisiso yatinonga tinayo kana manera otaiita zviro, ivona vanozviita ngo kukasika. Izvo zvakasiyana no zvinoizwa ngo zviara zvo kunyepa, kazinji vanoita cinjo kuti vadakajise vatendi doni vavo kana kuti vazivike maningi mu nyika ino. Ngo divi rimweni, sangano ra Jehovha rinoita cinjo jinozotibesera kuti tive phedo na Mwari no kutevera ngo phedo muezaniso wo kunamata wakasiiwa ndi Jesu. (Jakobo 4:4) Cinjo jatinoita ajindundihwi ngo mugariro unonga uripo kana ngo zvinodiwa ngo vandhu, asi ngokuti tinonga tino zwisiso inonga yakajeka yo Bhaibheri. Itusu tinoda maningi cokwadi!—1 Vatesaronika 2:3, 4.

13. Ngowapi mugariro unosisira maningi unokhombijwa ngo Makristu, iwona unokhombijiswa kudini ngo Zvapupu zva Jehovha?

¹³ Makristu o muzana rokutanga ro makore, ainga no mugariro muzinji jakanaka, asi waisisira maningi wainga rudo. Jesu wakati: “Mukaita kudaro vese vanozoziva kuti imwimwi muri vajiji vangu kudari mukadisana ngo cenyu.” (Johani 13:34, 35) Nyamasi uno Zvapupu zva Jehovha kutenderera nyika yese, zvino rudo hwokadi no rubatano. Itusu takasiyana maningi no zviara zvimweni, tiri mbhuri imwe yakabatana pikija tinovha ku nyika jakasiyana-siyana, tino zvirovejeso zvakasiyana-siyana, izvi azvitiiti kuti tive vandhu vakaparajana. Tinokwanisa kuvona rudo uhwu mu musongano jedu no mu magungano. Izvi zvinonasa kutikhohwesa kamare kuti manamatiro atinoita, ndiwona kamare anotendehwa ndi Jehovha.

14. Mukuzwirana no Vakorose 3:12-14, ngoyapi njira inosisira maningi yokukhombija kuti tinodisana maningi ngocedu?

¹⁴ Bhaibheri rinoti: “Disananyi maningi ngocenyu.” (1 Pedhru 4:8) Njira imwe yatingakhombija ndiyona kuti tino rudo, ngo yo kuregererana ngocedu no kucungirira kutama kukwana ko vamweni. Itusu tinodikana kupsaka  mukana wo kukova no kuashira vamweni mu ungano pikija no vayana vanonga vatikhugunya. (Verenganyi Vakorose 3:12-14.) Patinokhombija kuti tinodisana ngocedu, tinovonesa kuti tiri Makristu okadi.

15. Tingatevejeresa kudini Makristu o muzana rokutanga ro makore?

¹⁵ Pano ciro cimwe cinokhombija kuti tiri kutevera muezaniso wo kunamata wakasiiwa ngo Makristu o muzana rokutanga ro makore. Inga muezaniso, sangano redu rino vavonereri vo ndharaundha, vakuru no vabeseri vo ungano. Zvese izvo, ndizvona kamare zvaiizwa ngo Makristu o muzana rokutanga ro makore. (Vafiripi 1:1; Tito 1:5) Kunja ka izvi, mavonero edu ngo pamusoro po vatano, mucadho, kushandisa ngazi no kujivirira ungano kuno vashaishi vanonga vacingakhauyi, akacijikira pa muezaniso wakasiiwa ngo Makristu o muzana ro kutanga ro makore.—Mabasa o Vapostori 15:28, 29; 1 VaKorinte 5:11-13; 6:9, 10; Vahebheru 13:4.

16. Ngozvapi zvatinojija ngo zvinonangwa pana Vaefeso 4:4-6?

¹⁶ Jesu wakananga kuti vandhu vazinji vaizonanga kuti i vajiji vake, asi wakanangazve kuti asipi vese vaizova vokadi. (Mateu 7:21-23) Bhaibheri rakatingwaja kare kuti mu njiku jo kupejisira, vandhu vazinji vaizojiita inga “vanonamata Mwari.” (2 Timoti 3:1, 5) Asi Bhaibheri rinonasa kujekesa kamare parinonanga kuti kuno “rutendo humwe” basi unotendehwa ndi Mwari.—Verenganyi Vaefeso 4:4-6.

17. I cikwata capi ciri kutevera muezaniso wa Jesu no kunamata ngo njira inotendehwa ndi Mwari?

¹⁷ Nyamasi uno, ndiyani anonamata Mwari ngo njira inotendehwa? Tavona zviro zvizinji. Tabhuya ngo pamusoro po muezaniso wo kunamata wakajijiswa ndi Jesu uwo wakatevehwa ngo Makristu o muzana rokutanga ro makore. Mupinguro ndi umwe basi, Zvapupu zva Jehovha. Pacina kukana-kana i cidakajiso cakakura maningi kuva divi ro vandhu va Jehovha vanoziva cokwadi ngo pamusoro pake no zvidisiso zvake. Ngo kudaro, ngatiite zvese zvatinokwanisa kuti tikhohwe kuti takawana cokwadi.