1. Omolwashike aantu oyendji ya ngwangwana?

OKU na omalongelokalunga omayovi ngoka hagi iti ogi itaala muKristus nohaga ti wo kutya ohaga longele Kalunga momukalo ngoka a hokwa. Nomolwaashono aantu oyendji ya ngwangwana! Ohaya pula taya ti: “Mbela opu na ngaa elongelokalunga limwe yashili, nenge omalongelokalunga agehe oga hokiwa kuKalunga?” Mbela otwa tompwa ngaa thiluthilu kutya tu li Oonzapo dhaJehova ohatu longo aantu oshili yOmbiimbeli nosho wo kutya omukalo moka hatu longele Jehova ogwo a hokwa? Mbela otatu vulu ngaa okukala twa tompwa thiluthilu kombinga yiinima mbyoka? Natu ka taleni kuumbangi mboka tawu shi koleke.

2. Shi ikolelela kAatessalonika yotango 1:5, omolwashike Paulus a li a tompwa kutya okwa mona oshili?

² Omuyapostoli Paulus okwa li a tompwa thiluthilu kutya okwa mona oshili. (Lesha 1 Aatessalonika 1:5.) Shoka ka li e shi itaala shi ikolelela owala ando kenyanyu ndyoka a mono sho a tseya oshili. Paulus okwa li ha konakona Oohapu dhaKalunga muule. Okwa li i itaala kutya “Enyolo kehe olya nyolithwa kombepo yaKalunga.” (2 Tim. 3:16) Okukonakona kwe Omanyolo okwe mu kwathele a mone shike? Paulus okwa li a mono uumbangi wa yela kutya Jesus oye Mesiasa, uumbangi mboka aawiliki yelongelokalunga lyOshijuda ya li yi ipwililikile. Aawiliki mboka aafudhime oya li hayi iti kutya oye li aakalelipo yaKalunga, ihe iilonga yawo kaya li hayi shi ulike. (Tit. 1:16) Mepingathano naawiliki mboka, Paulus ka li ha hogolola kutya iinima yini yomOohapu dhaKalunga ti itaale. Okwa li ha kala i ilongekidha okulonga aantu nokutula miilonga ‘ashihe shoka Kalunga a hala okuningila aantu.’ — Iil. 20:27.

3. Mbela otwa pumbwa okukala tu na omayamukulo gomapulo agehe, opo tu kale twa tompwa thiluthilu kutya otwa mona oshili? (Tala wo oshimpungu “ Iilonga nosho wo uuwanawa waJehova ‘owindji unene okuyalula.’”)

 ³ Yamwe ohaya ti kutya elongelokalunga lyashili oli na okukala hali vulu okuyamukula omapulo agehe, nokuli naangoka inaaga yamukulwa kOmbiimbeli. Ihe mbela shoka otashi vulika ngaa? Natu taleni koshiholelwa shaPaulus. Okwa li a ladhipike ooitaali ooyakwawo ya ‘konakone iinima ayihe,’ ihe okwa li wo a zimine kutya opu na iinima oyindji mbyoka kee uvite ko. (1 Tes. 5:21) Okwa li wo a nyola a ti: “Katu na ontseyo yi ihwapo,” (NW) nokwa li a gwedha ko a ti: “Shoka tu wete ngashingeyi osha fa owala efano inaali yela nawa lyomuntu ngoka ti italele moshiitalelo.” (1 Kor. 13:9, 12) Ngaashi owala tse, Paulus ka li e uvite ko iinima ayihe. Ihe okwa li e shi oshili kombinga yehalo lyaJehova. Okwa li e na ontseyo ya gwana oku mu tompwa kutya okwa mona oshili.

4. Ongiini tatu vulu okukala twa tompwa thiluthilu kutya otwa mona oshili, noshike tatu ka kundathana kombinga yAakriste yashili?

⁴ Omukalo gumwe ngoka tagu vulu oku tu kwathela tu kale twa tompwa kutya otwa mona oshili, omokuyelekanitha oshiholelwa shelongelokalunga lyashili shoka Jesus a tula po, nomukalo ngoka Oonzapo dhaJehova hadhi longele Kalunga kunena. Oshitopolwa shika otashi ke tu kwathela tu mone kutya Aakriste yashili (1) ihaya galikana iimenka, (2) oya simaneka edhina lyaJehova, (3) oye hole oshili, (4) oye holathane nomutima aguhe.

5. Oshike tatu ilongo koshiholelwa shaJesus ngele tashi ya pokulongela Kalunga, nongiini tatu vulu oku shi tula miilonga?

⁵ Molwaashoka Jesus okwa li e hole Kalunga noonkondo, oye owala a li a longele sho a li megulu naasho a li kombanda yevi. (Luk. 4:8)  Okwa longo aalongwa ye ya ninge sha faathana. Jesus nosho wo aalongwa ye aadhiginini kaya li haya galikana iimenka. Molwaashoka Kalunga Ombepo, kapu na ngoka ta vulu okuhonga sha she mu fa. (Jes. 46:5) Ihe ongiini kombinga yiimenka yaamboka haku tiwa aayapuki? Shimwe shomiipango mbyoka Jehova a li a gandja osha tile: “Ino ihongela oshiyelekela nenge efano lyashaashoka megulu nenge kombanda yevi nenge momeya kohi yevi . . . Ino yi inyongamena nenge wu yi simaneke.” (Eks. 20:4, 5) Oohapu ndhoka odha yela notadhi ulike kutya mboka ya hala okukala ya hokiwa kuJehova kaye na okugalikana nenge okulongela iimenka.

6. Oshiholelwa shini shi na ko nasha nokulongela Kalunga Oonzapo dhaJehova hadhi landula kunena?

⁶ Aanandjokonona oye shi zimina kutya Aakriste yopetameko oya haya longele Kalunga oye awike. Pashiholelwa, embo History of the Christian Church olya ti kutya andola Aakriste yopetameko oko ya li kunena, ando “otaya kala ya kumwa noonkondo” okumona iimenka yi li momahala gomalongelokalunga. Kunena, Oonzapo dhaJehova ohadhi landula oshiholelwa shAakriste yopetameko. Ihatu galikana “iimenka yaamboka haku tiwa aayapuki,” aayengeli, nenge nokuli Jesus. Ihatu salutile wo omapandela goshilongo nenge tu galikane omapangelo. Kutya nduno otashi pula shike, otwa tokola toko tu vulike koohapu dhaJesus ndhoka tadhi ti: “Omuwa Kalunga koye oye awike u na oku mu galikana.” — Mat. 4:10.

7. Oonzapo dhaJehova odha yooloka ko ngiini komalongelokalunga galwe?

⁷ Kunena, oyendji oye hole okukala moongeleka dhaasita mboka ye shiwike apuhe. Oye hole noonkondo aasita mboka nohaya kala ye ya tala ko ya fa oyo Kalunga. Aantu oyendji ohaya gongala moongeleka dhawo, ohaya landa omambo gawo nohaya gandja iimaliwa yawo oyindji kuyo. Yamwe yomuyo ohaya itaale wo ashihe shoka aasita mboka haya popi. Ohaya kala ya nyanyukwa noonkondo uuna ya tala aasita mboka, ya fa owala ye wete Jesus. Mepingathano naashono, aalongeli yaJehova yashili ihaye mu longele molwomuntu gwontumba. Nonando otwa simaneka mboka haya kwatele komeho, ohatu vulika kelombwelo lyaJesus ndyoka tali ti: “One amuhe aamwayinathana.” (Mat. 23:8-10) Ihatu galikana aantu, kutya nduno aawiliki yomalongelokalunga nenge aapangeli yiilongo. Ihatu yambidhidha wo omalalakano gawo. Pehala lyaashono, ohatu ikaleke kokule nokukutha ombinga nenge nokuyambidhidha iinima yomuuyuni. Miinima ayihe mbyoka otwa yooloka ko komalongelokalunga ogendji ngoka hagi iti ogopaKriste. — Joh. 18:36.

8. Otu shi shi ngiini kutya Jehova okwa hala tu simanekithe edhina lye notu li tseyithile wo yalwe?

⁸ Oshikando shimwe Jesus okwa li a galikana a ti: “Tate, simanekitha edhina lyoye.” Jehova okwa li a yamukula egalikano lyaJesus newi enene okuza megulu, noku uvaneke kutya ote ke shi ninga. (Joh. 12:28) Sho Jesus a li kombanda yevi, okwa li ha simanekitha edhina lyaHe. (Joh. 17:26) Onkene Aakriste yashili oye na oku shi tala ko shi li uuthembahenda uunene okulongitha edhina lyaKalunga noku li tseyithila yalwe.

9. Aakriste yomethelemumvo lyotango oya li ya ulike ngiini kutya oya simaneka edhina lyaKalunga?

⁹ Methelemumvo lyotango E.N., konima owala sho egongalo lyopaKriste lya totwa po, Jehova ‘okwa tameke okwiilikolela egongalo lye mwene mokati kaapagani.’ (Iil. 15:14) Aakriste mboka yomethelemumvo lyotango oya li ye shi tala ko shi li uuthembahenda okulongitha edhina lyaKalunga noku li  tseyithila yalwe. Aayapostoli nosho wo aalongwa oya li haye li longitha unene uuna taya uvitha nuuna taya nyola omamboMbiimbeli. * Kungawo oya li ya ulike kutya oyo ayeke haya tseyithile aantu edhina lyaKalunga. — Iil. 2:14, 21.

10. Uumbangi wuni tawu ulike kutya Oonzapo dhaJehova odha simaneka edhina lyaKalunga?

¹⁰ Mbela Oonzapo dhaJehova odha simaneka ngaa edhina lyaJehova? Natu ke shi taleni. Kunena, aawiliki yomalongelokalunga ohaya ningi ashihe shoka taya vulu ya holeke uumbangi mboka tawu ulike kutya Kalunga oku na edhina lye lyopaumwene. Edhina ndyoka oye li kutha mo mOombiimbeli dhawo, nayamwe oyi indika nokuli kaali longithwe momalongelokalunga gawo. * Osha yela kutya Oonzapo dhaJehova odho owala dha simaneka nohadhi tseyitha edhina lyaKalunga. Ohatu tseyithile aantu edhina lyaKalunga tu vulithe omalongelokalunga agehe. Ohatu ningi ngaashi tatu vulu tu gwanithe po shoka edhina lyetu tali ti, ano Oonzapo dhaJehova. (Jes. 43:10-12) Otwa nyanyangidha Oombiimbeli dho-New World Translation of the Holy Scriptures omamiliyona 240, ndhoka dhi na edhina lyaKalunga pomahala mpoka lya li lya pingenwa po nomadhinasimaneko kaatoloki yalwe yOmbiimbeli. Ohatu nyanyangidha wo iileshomwa yopaMbiimbeli mbyoka hayi  longitha edhina lyaKalunga, momalaka ge vulithe 1 000.

11. Aakriste yopetameko oya li yu ulike ngiini kutya oye hole oshili?

¹¹ Jesus okwa li e hole oshili, ano oshili kombinga yaKalunga noyomalalakano Ge. Okukalamwenyo kwaJesus okwa li haku ulike kutya oku shi oshili nokwa li he yi tseyithile yalwe. (Joh. 18:37) Aalanduli yaJesus yashili nayo oya li ye hole oshili noonkondo. (Joh. 4:23, 24) Omuyapostoli Petrus okwa li nokuli a popi kutya Uukriste owo “ondjila yoshili.” (2 Pet. 2:2) Molwaashoka Aakriste yopetameko oya li ye hole oshili, oya tindi okwiitaala omalongo gopalongelokalunga galwe, omithigululwakalo nenge omikalondjigilile ndhoka dhi li ompinge nomithikampango dhOmbiimbeli nosho wo omaitaalo gaantu ngoka ge li ompinge noshili. (Kol. 2:8) Sha faathana, kunena Aakriste yashili ohaya lalakanene ‘okukala moshili,’ mokukaleka shoka yi itaala nosho wo okukalamwenyo kwawo metsokumwe nOohapu dhaKalunga. — 3 Joh. 3, 4.

12. Oshike hashi ningwa po uuna mboka taya kwatele komeho ya ndhindhilike kutya euvoko lyetu kombinga yenyolo lyontumba olya pumbwa okuyelithululwa, nomolwashike haye shi ningi?

¹² Oonzapo dhaJehova ihadhi inomo kutya odhi uvite ko ashihe shoka sha popiwa mOmbiimbeli. Poompito dhimwe odha li dha ningi omapuko kombinga yankene dhi uvite ko omanyolo gontumba nosho wo nkene egongalo li na okukala lya unganekwa. Shoka kashi na oku tu kumitha. Ombiimbeli oye shi popya sha yela kutya okuuva ko kwetu omanyolo ohaku endele ko kashonanakashona. (Kol. 1:9, 10) Jehova ohe tu hololele oshili kombinga yomanyolo kashonanakashona, notu na okukala hatu tegelele neidhidhimiko tu ga uve ko nawa. (Omayel. 4:18) Uuna mboka taya kwatele komeho ya ndhindhilike kutya euvoko lyetu kombinga yenyolo lyontumba olya pumbwa okuyelithululwa, ihaya kakadhala okuninga po omalunduluko ngoka ga pumbiwa. Oongeleka odhindji kunena ohadhi lundulula omalongo gadho dhi opalele aantu nodhi taambiwe ko kuuyuni. Ihe ehangano lyaJehova ohali ningi omalunduluko nelalakano lyoku tu hedhitha popepi naJehova notu mu longele momukalo gwa faathana nogwaJesus. (Jak. 4:4) Omalunduluko ngoka ihaga ningwa molwaashoka andola twa hala tu kale tu na euvoko lya faathana naantu yomuuyuni, ihe ohaga ningwa molwaashoka ngashingeyi tu uvite ko enyolo lyontumba nawa. Otu hole oshili! — 1 Tes. 2:3, 4.

13. Uukwatya wuni wa simanenena Aakriste yashili ye na okukala haya ulike, nOonzapo dhaJehova ohadhi wu ulike ngiini kunena?

¹³ Aakriste yomethelemumvo lyotango oya li ye na omaukwatya omawanawa ogendji, ihe uukwatya wa simanenena mboka ya li ye na, ohole. Jesus okwa ti: “Ngele omu holathane, nena aantu ayehe otaa ka dhimbulula kutya one aalongwa yandje shili.” (Joh. 13:34, 35) Kunena, Oonzapo dhaJehova muuyuni awuhe odhi holathane nodha hangana. Otwa yooloka ko komalongelokalunga galwe, molwaashoka nonando otwa za miilongo nomomaputuko ga yoolokathana, otu li aamwayinathana. Shoka ohashi kala shi iwetikile uuna tu li pomakugongala nopiigongi iishona niinene. Uumbangi mboka owe tu tompa kutya ohatu longele Jehova momukalo moka a hokwa.

14. Shi ikolelela kAakolossa 3:12-14, omomukalo guni gwa simanenena tatu vulu okuulukilathana ohole?

¹⁴ Omanyolo otage tu ladhipike tu kale tu ‘holathane nomwenyo aguhe.’ (1 Pet. 4:8) Omukalo gumwe tatu vulu oku shi ninga, omokukala hatu dhiminathana po nokwiidhidhimikila  okwaagwanenena kwayalwe. Ohatu kongo wo oompito tu kwathele yalwe megongalo noku ya yakula, nokuli naamboka ye tu uvitha nayi. (Lesha Aakolossa 3:12-14.) Ngele ohatu ulukilathana ohole, otashi ka ulika kutya otu li Aakriste yashili.

15. Omomukalo gulwe guni hatu landula oshiholelwa shAakriste yomethelemumvo lyotango shokulongela Jehova?

¹⁵ Ohatu landula wo oshiholelwa shAakriste yomethelemumvo lyotango momikalo dhilwe. Pashiholelwa, otwa unganekwa ngaashi owala Aakriste mboka ya li ya unganekwa. Otu na aatonateli aayendi, aakuluntugongalo naayakuligongalo, ngaashi owala yo ya li ye ya na. (Fil. 1:1; Tit. 1:5) Shimwe ishewe, ngaashi yo, ohatu vulika komithikampango dhaJehova kombinga yomilalo, yondjokana, yelongitho lyombinzi nohatu gamene egongalo kenwethomo ewinayi lyaamboka ya yona sha kwata miiti, ihe inayi iyela ombedhi. — Iil. 15:28, 29; 1 Kor. 5:11-13; 6:9, 10; Heb. 13:4.

16. Oshike tatu ilongo moohapu ndhoka tadhi adhika mAaefeso 4:4-6?

¹⁶ Jesus okwa ti kutya oyendji otaya ka tya kutya oye li aalongwa ye, ihe aashona owala taya ka vulika kuye. (Mat. 7:21-23) Omanyolo oge tu londodha wo kutya momasiku gahugunina, oyendji otaya ka “kala ya fa haa simaneke Kalunga.” (2 Tim. 3:1, 5) Nonando ongawo, Ombiimbeli oye shi popya sha yela kutya oku na owala ‘eitaalo limwe’ ndyoka Kalunga a hokwa. — Lesha Aaefeso 4:4-6.

17. Kunena oolye mbela taya landula oshiholelwa shaJesus notaya longele Kalunga momukalo ngoka a hokwa?

¹⁷ Kunena oolye mbela haya longele Kalunga momukalo ngoka a hokwa? Moshitopolwa shika otwa konakona uumbangi wontumba, notwa tala koshiholelwa shokulongela Jehova shoka Jesus nosho wo Aakriste yomethelemumvo lyotango ye tu tulila po. Opu na owala eyamukulo limwe, ano Oonzapo dhaJehova. Oshi li uuthembahenda uunene okukala aalongeli yaJehova nokutseya oshili kombinga ye noyomalalakano ge. Onkee ano, natu kale twa tokola toko tu dhiginine oshili sigo aluhe.