1. Hana wa manofu-nofu dödö niha sato?

IADAʼA, so mato hauga wulu ribu agama sangumaʼö wa yaʼira andrö niha Keriso ba lafosumange Lowalangi ba lala satulö. Daʼö mbörö wa manofu-nofu dödö niha, ”Hadia omuso dödö Lowalangi ba agama andrö maʼafefu, mazui hadia ha sambua agama satulö?” Yaʼita ira Samaduhuʼö Yehowa, hadia faduhu dödöda wa sindruhu wamahaʼö nifaʼemada ba niha ba omuso dödö Lowalangi ba lala wamosumange nifaluada? Hadia sindruhu-ndruhu tola tafaduhusi tödö daʼö? Datatutunö hadia manö dandra sangaʼaroʼö faʼafaduhu dödöda.

2. Hana wa faduhu dödö Waulo wa no iʼokhögö zindruhu? (1 Tesalonika 1:5)

² Faduhu dödö Waulo wa no iʼokhögö zindruhu. (Baso 1 Tesalonika 1:5.) Faʼafaduhu dödönia andrö tenga ha teʼodane-dane ba nirasoinia. Owölö-ölö Waulo ba wamahaʼö yaʼia ba Daromali Lowalangi. Faduhu dödönia wa ”fefu nösi Mbuku Niʼamoniʼö andrö ba eheha Lowalangi zameʼe ba dödö niha”. (2 Ti. 3:16) Me ifahaʼö ia ba Mbuku Niʼamoniʼö, oya dandra nisöndra Waulo sangoromaʼö wa Yesu andrö Mesia si no mufabuʼu. Lö omasi ndra sondröniaʼö ba agama Yahudi ba wamaduhusi tödö fefu dandra daʼö. Lawaʼö ira niha samini tödö andrö wa lafahaʼö zindruhu sanandrösa khö Lowalangi. Hizaʼi, oroma moroi ba gamuatara wa sindruhunia latimbagö ia. (Tit. 1:16) Tenga simane daʼö Waulo. Lö ifili-fili hadia wamahaʼö somasi ia ifaduhusi tödö ba Daromali Lowalangi. Omasi ia ifahaʼö ba ifalua ”fefu gohitö dödö Lowalangi”.​—Hal. 20:27.

3. Enaʼö faduhu dödöda wa no taʼokhögö zindruhu, hadia moguna tasöndra wanema li moroi ba wanofu-nofuda maʼafefu? (Faigi göi kotak ” Halöwö Yehowa hegöi Fangera-ngerania​—ʼTalafo Oya Na Mudunö-dunöʼ”.)

³ So ösa niha sorasoi wa agama satulö andrö moguna ibeʼe wanema li moroi ba wanofu-nofuda maʼafefu, tefarahu ba daʼö wanofu-nofu si lö hadöi fanema li ba Zura Niʼamoniʼö. Hizaʼi,  hadia tola mufalua zimane daʼö? Nehegö atö duma-duma Waulo. Ifarou ndra talifusönia si sara lala wamati enaʼö ’lahaogö lafareso fefu hadia ia’. Hizaʼi, ifaduhuʼö göi wa oya zi lö aboto ba dödönia. (1 Te. 5:21) Imane, ”Lö soʼahonoa waʼaboto ba dödöda.” Imane nasa, ”Ha lumö-lumö si ndrundrumö niʼilada ba zörömi.” (1 Ko. 13:9, 12) Lö ahori aboto ba dödö Waulo fefu hadia ia, ba simane daʼö göi ita. Hizaʼi, aboto ba dödönia dane-dane zindruhu sanandrösa khö Yehowa hegöi ohitö dödönia. No ibönö waʼaboto ba dödö niʼokhögönia andrö ba wamaduhuʼö ba dödönia wa no iʼokhögö zindruhu!

4. Hewisa lalada ba wangaʼaroʼö faʼafaduhu dödöda wa no taʼokhögö zindruhu, ba hadia nitutunöda ba artikel daʼa?

⁴ Hewisa lalada ba wangaʼaroʼö faʼafaduhu dödöda wa no taʼokhögö zindruhu? Tola tafaedogö lala wamosumange nifalua ndra Samaduhuʼö Yehowa iadaʼa ba duma-duma si no iröi khöda Yesu sanandrösa ba wamalua famosumange satulö. Ba artikel daʼa, tatutunö wa niha Keriso sindruhu andrö (1) latimbagö wamosumange adu, (2) lafosumange döi Yehowa, (3) laʼomasiʼö zindruhu, ba (4) faoma laʼomasiʼö nawöra soroi ba dödö.

5. Moroi ba duma-duma niröi Yesu, hadia wamahaʼö nihalöda sanandrösa ba lala satulö ba wamosumange Lowalangi, ba hewisa woloʼöda hadia zi no ifahaʼö khöda andrö?

⁵ Börö me iʼomasiʼö sibai Lowalangi Yesu, ha Yehowa nifosumangenia, he me so ia ba zorugo hegöi me so ia ba gulidanö. (Luk. 4:8) Ifarou göi dödö ndra nifahaʼönia enaʼö ha Yehowa nifosumangera. Yesu hegöi ira nifahaʼönia si lö faröi, lö irai laʼogunaʼö nadu ba wamalua famosumange. Börö me boto eheha Lowalangi, lö hadöi niha si tola mamazökhi gofu hadia ia si fakhili-khili khönia. (Yes. 46:5)  Hizaʼi, so ösa agama si toʼölö mamazökhi adu si fakhili-khili khö ndra niha niʼamoniʼö ba lalau mangandrö ba nadu andrö. Hewisa dödö Yehowa sanandrösa ba daʼö? Ba goroisa si dua moroi ba zi Fulu Oroisa, imane Yehowa, ”Böi fazökhi khöu nadu, ba he famaedo hadia ia, he si so si yawa ba mbanua, ba he si so si tou ba gulidanö . . . Böi angalulu khönia.” (2 Mo. 20:4, 5, Lembaga Alkitab Indonesia) Aboto ba dödö niha somasi mangomusoiʼö tödö Lowalangi wa fatuwu khönia na taʼogunaʼö nadu ba wamalua famosumange.

6. Hadia duma-duma niʼoʼö ndra Samaduhuʼö Yehowa ba götöda iadaʼa sanandrösa ba lala wamosumange?

⁶ Moloʼö ira sejarawan, ha Lowalangi nifosumange ndra niha Keriso me abad siföföna. Duma-dumania, itutunö buku History of the Christian Church wa ”fatuwu sibai” ba niha Keriso me abad siföföna na so zamarou yaʼira ba wamazökhi adu ba nahia wamosumange Lowalangi. Daʼö duma-duma niʼoʼö ndra Samaduhuʼö Yehowa ba götöda iadaʼa. Lö irai mangandrö ita khö ndra malaʼika mazui ba nadu si fakhili-khili khö ndra niha niʼamoniʼö. Lö göi mangandrö ita khö Yesu. Baero daʼö, lö irai tabeʼe yawa dangada ba gama-gama si tobali famaedo zi sambua soi, börö me fagölö daʼö ba wamosumange adu. Gofu hadia ia zalua, no tahalö gangetula ba wamalua oroisa nibeʼe Yesu andre, ”Ha khö Yehowa Lowalangiu mangalulu ndraʼugö.”—Mat. 4:10.

7. Hadia manö gamaehuta ndra Samaduhuʼö Yehowa ba agama tanö böʼö?

⁷ Iadaʼa, ato niha somasi mamondrondrongo huhuo nifaʼema ndra fandrita si tehöngö. Itaria, hulö laʼolowalangigö ndra fandrita andrö börö waʼahöli-höli dödöra. Ato niha si möi ba gerejara, laʼöli ngawalö mbuku nifazökhira, ba ebua gameʼela nibeʼera khöra hegöi ba organisasi nituhinira. Lafaduhusi tödö fefu niwaʼö ndra fandrita andrö. Omuso sibai dödöra wamaigi yaʼira irege hulö zamaigi Yesu ira! Hizaʼi, lö laʼoʼö niha gulidanö ira samosumange Yehowa. Hewaʼae na tafosumange ndra sondröniaʼö ba organisasida, taʼoʼö hadia zi no ifahaʼö Yesu andre: ”Si fatalifusö ami fefu.” (Mat. 23:8-10) Lö taʼolowalangigö niha gulidanö hewaʼae na yaʼira andrö sondröniaʼö ba agama mazui politik. Lö tatuhini ira mazui organisasira. Lö tebulö taforomaʼö wa lö faʼawö ita khöra ba lö tabaliʼö ita tana khö niha gulidanö. Daʼö zangoromaʼö wa no faehu sibai ita moroi ba agama tanö böʼö sangotöigö niha Keriso.​—Yoh. 18:36.

8. Hezo tola taʼila wa omasi Yehowa na tefolakhömi döinia ba laʼila niha sato?

⁸ No irai mangandrö Yesu simane daʼa: ”He Ama, folakhömi döimö.” Ebua sibai li Yehowa moroi ba zorugo ba wameʼe fanema li ba ifabuʼu wa hasambalö ifolakhömi döinia. (Yoh. 12:28) Sagötö me so Yesu ba gulidanö, lö tebulö ifolakhömi döi Namania. (Yoh. 17:26) Tatu manö, omuso göi dödö niha Keriso sindruhu ba wangogunaʼö töi Lowalangi hegöi ba wangombakha töinia andrö ba niha böʼö.

9. Hewisa wangoromaʼö niha Keriso me abad siföföna wa lafosumange döi Lowalangi?

⁹ Lö ara me no mufasindro mbanua niha Keriso me abad siföföna, ”ifaigi soi böʼö Lowalangi, ba ituyu ba gotaluara zi tobali ono mbanuania ba döinia andrö”. (Hal. 15:14) Omuso sibai dödö niha Keriso me luo daʼö ba wangogunaʼö töi Lowalangi hegöi ba wangombakha töinia andrö ba niha böʼö. Asese laʼogunaʼö döi daʼö ba wanuriaigö hegöi ba wanura Sura Niʼamoniʼö. * Börö me lafalua daʼö, no  laforomaʼö wa yaʼira andrö ono mbanua sangotöigö töi Lowalangi.​—Hal. 2:14, 21.

10. Hadia zangoromaʼö wa Samaduhuʼö Yehowa andrö ono mbanua sangotöigö töi Yehowa?

¹⁰ Hadia ono mbanua sangotöigö töi Yehowa ndra Samaduhuʼö Yehowa andrö? Nehegö atö dandra-tandrania. Iadaʼa, ato ndra sondröniaʼö ba agama samorege ba waminiʼö töi Lowalangi enaʼö lö laʼila niha sato. Laheta döi daʼö moroi ba Zura Niʼamoniʼö nifoʼeluahara. So göi zi lö manehegö ba wangogunaʼö töi daʼö ba gerejara. * Ba daʼa taʼila, ha ira Samaduhuʼö Yehowa zindruhu-ndruhu mamosumange töi Yehowa. Ha yaʼita zasese mangombakha töi Lowalangi, tenga simane agama tanö böʼö! Yaʼita andre Samaduhuʼö Yehowa, ba taforege ba wamaudugö faʼaurida ba döi andrö. (Yes. 43:10-12) Töra 240 zuta Mbuku Niʼamoniʼö Famoʼeluaha Gulidanö si Bohou nifazökhida. Ba Zura Niʼamoniʼö andrö, no mufangawuli döi Yehowa si no latayaigö ira samoʼeluaha Sura Niʼamoniʼö. Töra 1.000 ngawalö li publikasi nifazökhida si teʼodane-dane ba Zura Niʼamoniʼö, ba muʼogunaʼö döi Yehowa ba publikasi daʼö fefu!

11. Hewisa wangoromaʼö niha Keriso me abad siföföna wa laʼomasiʼö zindruhu?

¹¹ Iʼomasiʼö zindruhu Yesu, yaʼia daʼö sindruhu sanandrösa khö Lowalangi hegöi ohitö dödönia. Moroi ba lala waʼauri Yesu, oroma wa faduhu dödönia ba zindruhu andrö,  ba ifatunö daʼö ba niha böʼö. (Yoh. 18:37) Laʼomasiʼö sibai göi zindruhu ira soloʼö khö Yesu. (Yoh. 4:23, 24) Iwaʼö Fetero wa no ”lala sindruhu” agama niha Keriso andrö. (2 Fe. 2:2) Börö me laʼomasiʼö zindruhu ira niha Keriso me abad siföföna, latimbagö zi toʼölö mufalua, famahaʼö moroi ba agama, hegöi bua gera-era niha si lö tefaudu ba zindruhu. (Kol. 2:8) Simanö göi, laforege ira niha Keriso sindruhu iadaʼa enaʼö ”lö laböhöli wanörö lala sindruhu”. Latatugöi enaʼö tefaudu ba Daromali Lowalangi fefu nifaduhusira tödö hegöi lala waʼaurira.​—3 Yo. 3, 4.

12. Na laʼila ira Boto Solohe wa moguna mufaudugö waʼaboto ba dödöda, hadia nifaluara ba hadia mbörö?

¹² Lö lawaʼö ira Samaduhuʼö Yehowa wa sindruhu-ndruhu aboto ba dödöra fefu nösi Zura Niʼamoniʼö. Itaria, fasala göi ira ba wanutunö famahaʼö Zura Niʼamoniʼö mazui ba wondröniaʼö banua niha Keriso. Lö moguna tokea ita na alua daʼö. No ihaogö itutunö Sura Niʼamoniʼö wa itugu tefaudu waʼaboto ba dödöda na no numalö ginötö. (Kol. 1:9, 10) Izara-zara Yehowa ba wangombakha sindruhu andrö, ba moguna tabaloi ia si fao faʼebolo dödö irege sindruhu-ndruhu aboto ba dödöda daʼö. (Amd. 4:18) Na laʼila ira Boto Solohe wa so zinangea tafaudugö ba waʼaboto ba dödöda, iʼanemaiʼö labulöʼö daʼö. Oya gereja samalua fombulöʼö ba wangomusoiʼö tödö nono mbanuara mazui enaʼö laʼomasiʼö ira niha gulidanö. Hizaʼi, ifalua daʼö organisasida enaʼö ahatö ita khö Yehowa ba tola taʼoʼö duma-duma si no ihonogöigö Yesu sanandrösa ba wamosumange Lowalangi. (Yak. 4:4) Tafalua wombulöʼö tenga börö me omasi ita taʼoʼö mbua gera-era niha sato ba gulidanö daʼa, hizaʼi börö me itugu aboto ba dödöda nösi Zura Niʼamoniʼö. Daʼö dandra wa taʼomasiʼö sibai zindruhu!​—1 Te. 2:3, 4.

13. Hadia gamuata sabölö tohude sinangea laforomaʼö ira niha Keriso sindruhu, ba hadia zangoromaʼö wa laʼokhögö gamuata daʼö ira Samaduhuʼö Yehowa?

¹³ Oya gamuata si sökhi niforomaʼö ndra niha Keriso me abad siföföna. Hizaʼi, sabölö tohudenia yaʼia daʼö faʼomasi. Imane Yesu, ”Ba daʼö aboto ba dödö niha fefu wa no nifahaʼögu ami na faoma miʼomasiʼö nawömi.” (Yoh. 13:34, 35) Iadaʼa, faoma laʼomasiʼö nawöra ira Samaduhuʼö Yehowa ba zi sagörö ulidanö ba so khöra wahasara dödö. Tenga simane agama tanö böʼö, yaʼita andre no amaedola zi sambua ösi nomo hewaʼae na faböʼö-böʼö madoda, soida, hegöi si toʼölö tafalua. Tola taʼila daʼö ba gangowuloa ero migu mazui ba gangowuloa ba zi sambua wilayah hegöi regional. Andrö wa itugu faduhu dödöda wa möi fangomusoiʼö dödö Yehowa lala wamosumangeda yaʼia.

14. Moloʼö Kolose 3:12-14, hadia zinangea tafalua ba wangoromaʼö wa faoma taʼomasiʼö nawöda?

¹⁴ Iʼamenesi ita Sura Niʼamoniʼö enaʼö ’faoma taʼomasiʼö nawöda soroi ba dödö’. (1 Fe. 4:8) Sambua lala ba wangoromaʼö faʼomasi yaʼia daʼö faoma taʼefaʼö zala nawöda ba tabologö dödöda ba walömoʼahonoa niha böʼö. Lö tebulö göi taforege ba wangoromaʼö faʼasökhi dödö ba faʼoböwö khö ndra talifusöda fefu ba mbanua niha Keriso, hewaʼae na laʼafökhöiʼö dödöda. (Baso Kolose 3:12-14.) Faʼomasi ba gotaluada zangoromaʼö wa yaʼita andre niha Keriso sindruhu.

15. Hadia manö zangoromaʼö wa no taʼoʼö duma-duma niröi ndra niha Keriso me abad siföföna sanandrösa ba wamosumange Lowalangi?

¹⁵ So danö böʼö sangoromaʼö wa no taʼoʼö duma-duma niröi ndra niha Keriso me abad siföföna sanandrösa ba wamosumange Lowalangi. Oroma daʼö moroi ba lala wondröniaʼö yaʼita. Simane yaʼira, so göi khöda zatua  samasui, satua sokubaloi, hegöi enoni. (Fil. 1:1; Tit. 1:5) Baero daʼö, simane nifalua ndra niha Keriso me abad siföföna, taʼoʼö göi lala wangera-ngera Yehowa sanandrösa ba waʼorudu hegöi fangowalu. Taʼameʼegö tödö goroisa Yehowa sanandrösa ba wangogunaʼö do. Ba talumöʼö mbanua niha Keriso moroi ba niha si lö omasi moloʼö oroisa Lowalangi.​—Hal. 15:28, 29; 1 Ko. 5:11-13; 6:9, 10; Heb. 13:4.

16. Hadia wamahaʼö nihalöda moroi ba Efeso 4:4-6?

¹⁶ Itutunö Yesu wa ato niha sangumaʼö wa soloʼö khönia ira, hizaʼi so ösa moroi ba gotaluara zangumaʼö daʼö ha ba mbewe, lö iʼoʼö bua-buara. (Mat. 7:21-23) Itutunö khöda Sura Niʼamoniʼö wa ato niha ba ngaluo safuria andre ”hulö soloʼö khö Lowalangi ira wamaigida”. (2 Ti. 3:1, 5) Hizaʼi, iʼombakhaʼö khöda Sura Niʼamoniʼö wa ha ”sambua wamati”, mazui agama, sangomusoiʼö tödö Lowalangi.​—Baso Efeso 4:4-6.

17. Haniha zoloʼö khö Yesu iadaʼa ba samalua famati sindruhu?

¹⁷ Haniha zamalua famati sindruhu iadaʼa? Ha sambua wanema linia, yaʼia daʼö ira Samaduhuʼö Yehowa. No tatutunö mege hadia manö dandra-tandrania. Aboto ba dödöda, ha ira Samaduhuʼö Yehowa zoloʼö duma-duma niröi Yesu hegöi ira niha Keriso me abad siföföna sanandrösa ba wamosumange Lowalangi. Sindruhu-ndruhu wa no tebeʼe khöda döi si sökhi tobali ono mbanua Yehowa, ba aboto ba dödöda zindruhu sanandrösa khönia hegöi ohitö dödönia. Yalötebulö faduhu dödöda wa no taʼokhögö zindruhu!