1. Kansi ŵanthu anyinji ozikonsha kuti tyani?

MASIKU ŵano pali vipembezo vinyinji vamene vukamba kuti ni vacikhristu. Ndipo vipembezo ivi vulaŵila kuti vulambila Mulungu m’njila yovomelezhyeka. Niye cifukwa cake ŵanthu anyinji ozikonsha kuti: Kansi pali tyala cipembezo cimozi camene ni covomelezhyeka? Olo vipembezo vonse vukondwelesha Mulungu? Tufunika kunkhala osimikizhya kuti seo Mboni za Yehova tuphunzisa cendi na kuti ni seo seka amene tulambila Yehova m’njila yovomelezhyeka. Lomba, tiyeni tione maumboni osimikizhyila kuti mfundo iyi ni yacendi.

2. Molingana na 1 Atesalonika 1:5, kansi n’cinji ceyavya Paulo kusimikizhyila kuti epeza cendi?

² Mtumwi Paulo esimikizhyila na mtima wonse kuti epeza cendi. (Ŵelengani 1 Atesalonika 1:5.) Kansi n’cinji cemuyavya kusimikizhyila kuti wapeza cendi? Yove enzoŵelenga Mau a Mulungu mwakhama ndipo enzokhulupilila kuti “Malemba onse euzhyiliwa na Mulungu.” (2 Tim. 3:16) Kucita izi kwemuyavya kupeza umboni wosasushika wakuti Yesu Khristu niye Mesiya wolonjezewa. Koma asogoleli aciyuda ekana kukhulupilila umboni uyu. Ove enzolaŵila kuti ophunzisa ŵanthu cendi conena za Mulungu, koma enzocita zinthu zosemphana na malamulo ŵake. (Tito 1:16) Mosiyana na asogoleli aŵa, Paulo enzokhulupilila mfundo zonse za m’Mau a Mulungu osati kucitosankha zinthu zangakhulupilile. Yove enzouzhyako ayakine zinthu zeenzoŵelenga ndipo enzoseŵenzesha “mfundo zonse zopezeka m’Mau a Mulungu pa umoyo wake.”—Mac. 20:27.

3. Kansi tufunika kukwanisha kuyankha makonsho onse kuti tisimikizhyile kuti tepeza cendi? (Onani soti kabokosi kakuti “ Nzelu za Yehova na Nchito Zake, ni Zinyinji Ngako Cakuti ‘Tingakwanishe Lini Kuzifotokoza.’”)

³ Ŵanthu ayakine oganiza kuti cipembezo cacendi cufunika  kukwanisha kuyankha makonsho onse, kuyangizhyilapo na yala yamene m’Baibo muliye mayankho acindunji. Kansi izi n’zokwanishika? Yai. Ganizilani zecilaŵila Paulo. Yove elimbikisha Akhristu ayakine kuti ‘enzofunika kusimikizhyila zinthu zonse,’ koma penze vinthu vinyinji vamene enzovimvwishisha lini. (1 Ates. 5:21) Elemba kuti, “Tuziŵa lini vinthu vonse,” ndipo “tuona lini bwino-bwino cifukwa tuseŵenzesha gilasi yosaoneka bwino-bwino.” (1 Akor. 13:9, 12) Paulo enzomvwishisha lini mfundo zonse za m’Malemba, ndipo n’cimozimozi na seo. Koma yove enzoziŵa mfundo zofunika ngako zokhuza Yehova. Ndipo izi zemupangisha kukhulupilila kuti epeza cendi.

4. Kansi tingacitenji kuti tinkhale osimikizhya kuti tepeza cendi, ndipo tilaŵizhyane cinji m’nkhani ino?

⁴ Cimozi mwa zinthu zingatiyavye kusimikizhyila kuti tepeza cendi ni kuziŵa njila yeenzoseŵenzesha Yesu polambila Yehova, nolinganizhya ngati Mboni za Yehova zucita cimozimozi. M’nkhani ino, tione maumboni oonesha kuti Akhristu acendi (1) opewa kulambila mafano, (2) olemekeza zina ya Mulungu, (3) okonda cendi ndipo (4) okondana mofumila pansi pamtima.

5. Kansi tingaphunzilenji kwa Yesu pa nkhani yolambila Mulungu m’njila yovomelezhyeka, ndipo tuonesha tyani kuti tutolela cisanzo cake?

⁵ Cifukwa cakuti Yesu okonda Mulungu, enzolambila tyala Yehova peenze kululu, ndipo epitilizhya kucita izi olo pa nthawi yeciwela pacalo. (Luka 4:8) Ephunzisa soti ophunzila ŵake kucita cimozimozi. Yesu na ophunzila ŵake enzoseŵenzesha lini zifanizilo polambila. Mulungu ni mzimu ndipo tingamuone lini. Tetyo, paliye munthu wamene angakwanishe kupanga cinthu camene cingaoneke monga ni yove. (Yes. 46:5) Kansi Mulungu  ovomelezhya kupanga zifanizilo za ŵanthu oitiwa kuti “oyela mtima” noyamba kuzilambila? Mu lamulo yaciŵili pa malamulo 10, Yehova elaŵila kuti: “Usazipangile fano olo cifanizilo ca cinthu ciliconse ca kululu olo ca pacalo, ndipo usaviŵelamile.” (Eks. 20:4, 5) Tetyo, ŵanthu amene ofuna kukondwelesha Mulungu opewa kuseŵenzesha zifanizilo na mafano pomulambila.

6. Kansi Mboni za Yehova zutolela cisanzo ca ŵani polambila?

⁶ Ŵanthu olemba mbili yakale ecitila umboni kuti Akhristu a m’vyaka 100 voyambilila enzoseŵenzesha lini mafano polambila Mulungu. Mwacisanzo, buku yakuti History of the Christian Church yelaŵila kuti Akhristu a m’vyaka 100 voyambilila angadabwe ngako kuona kuti ŵanthu oseŵenzesha mafano polambila Mulungu. Masiku ŵano, seo Mboni za Yehova tutolela cisanzo ca Akhristu a m’vyaka 100 voyambilila polambila. Mwacisanzo, tulambila lini zifanizilo za “oyela mtima,” “angelo” olo Yesu. Ndipo tupewa kucitila saliyuti fulagi olo kucita zilizonse zoonesha kuti tupeleka ulemelelo kuli olamulila. Mulimonse mwazingankhalile, tukonkha mau a Yesu akuti: “Yehova Mulungu wako niye waufunikila kulambila.”—Mat. 4:10.

7. Kansi Mboni za Yehova zusiyana tyani na vipembezo viyakine?

⁷ Masiku ŵano, ŵanthu anyinji omvwishila kuli asogoleli acipembezo amene ni ochuka. Ndipo oŵapasa ulemu wopitilila malile cakuti zunkhala monga oŵalambila. Ŵanthu anyinji oluta ku machechi ŵao, ogula mabuku ŵao ndipo oŵapasa ndalama zinyinji kuti zicilikize machechi ŵao. Ŵanthu ayakine okhulupilila ciliconse caangaŵauzhye azisogoleli aŵa. Ndipo oŵalemekeza ngako cakuti n’zokaikisha kuti ngati angakumane na Yesu, angam’pase ulemu monga ni wakupasa azisogoleli aŵa. Koma seo Mboni za Yehova tupeleka lini ulemu wopitilila malile ku ŵanthu. Olo kuti tulemekeza ŵanthu amene osogolela pakati pasu, tukonkha malangizo a Yesu akuti, “Monse ni pokwanu.” (Mat. 23:8-10) Tupewa kucita ciliconse coonesha kuti tulambila ŵanthu, kaya ni asogoleli acipembezo olo olamulila. M’malomwake, tupitilizhya kusatolamo mbali m’zandale, zamene zuonesha kuti tili lini mbali ya calo. Izi niye zutisiyanisha na vipembezo viyakine vamene vukamba kuti ni vacikhristu.—Yoh. 18:36.

8. Kansi tuziŵa tyani kuti Yehova ofuna kuti zina yake ilemekezewe na kuti ŵanthu onse aiziŵe?

⁸ Peenze pacalo, Yesu epemphela kuti: “Atata, lemekezani zina yanu.” Nthawi yamene iyo, Yehova eyankha pemphelo yake mwa kumulonjeza kuti ailemekeze. (Yoh. 12:28) Pa nthawi yonse yeenzocita utumiki wake pacalo, Yesu elemekeza zina ya Ausuwake. (Yoh. 17:26) Tetyo, n’zoonekelatu kuti Akhristu acendi ofunika kuseŵenzesha zina ya Mulungu nouzhyako ayakine zokhuza zina yamene iyi.

9. Kansi Akhristu a m’vyaka 100 voyambilila eonesha tyani kuti enzolemekeza zina ya Mulungu?

⁹ Mpingo wacikhristu pewenkhazikishiwa m’vyaka 100 voyambilila, Yehova “eceukila ŵanthu a mitundu iyakine kuti pakati pao atolepo ŵanthu oziŵika na zina yake.” (Mac. 15:14) Akhristu aŵa enzoseŵenzesha zina ya Mulungu ndipo enzouzhyako ayakine kuti aiziŵe. Mwacisanzo, atumwi enzoseŵenzesha zina iyi mu utumiki na polemba mabuku a m’Baibo. * Izi zeonesha kuti ni ŵeve ŵeka amene enzoziŵikisha zina ya Mulungu.—Mac. 2:14, 21.

10. Kansi pali umboni wotyani uonesha kuti Mboni za Yehova zulemekeza zina ya Mulungu?

 ¹⁰ Kansi Mboni za Yehova zulemekeza zina ya Mulungu? Eee. Ndaŵa yanji talaŵila teti? Masiku ŵano, asogoleli a vipembezo vinyinji ocita zilizonse zangakwanishe kuti mamembala a m’machechi ŵao asaziŵe kuti Mulungu ali na zina. Mwacisanzo, omasulila ayakine ecosamo zina ya Mulungu m’Mabaibo mwao. Ndipo asogoleli ayakine olola lini kuti ŵanthu akoseŵenzesha zina ya Mulungu m’machechi mwao. * N’zoonekelatu kuti paliye ŵanthu amene olemekeza zina ya Mulungu monga ni mwatucitila seo Mboni za Yehova. Tuyavya ŵanthu pacalo conse kuti aziŵe zina ya Mulungu, ndipo tucita zinthu mokatizhyana na zina yasu yakuti Mboni za Yehova. (Yes. 43:10-12) Pofwika pano, tafalisa makope a Baibulo la Dziko Latsopano opitilila pa 240 miliyoni. M’Baibo iyi, zina ya Mulungu yeikiwa m’malo monse mwamene omasulila ayakine enze eifumyamo. Kuyangizhyila apo, tufalisa mabuku, mavidyo na nkhani za pa webusaiti m’vilaŵilo vopitilila 1,000. Nkhani izi zuyavya ŵanthu kuti aziŵe zina ya Mulungu.

11. Kansi Akhristu a m’vyaka 100 voyambilila eonesha tyani kuti enzokonda cendi?

¹¹ Yesu enzokonda cendi conena za Mulungu na colinga cake. Yove enzonkhala mokatizhyana na cifunilo ca Mulungu, ndipo enzouzhyako ayakine zinthu zeenzokhulupilila. (Yoh.  18:37) Nao ophunzila a Yesu enzokonda cendi. (Yoh. 4:23, 24) Mtumwi Petulo elaŵila kuti mpingo wacikhristu ni “njila ya cendi.” (2 Pet. 2:2) Cifukwa cakuti enzokonda cendi, Akhristu a m’vyaka 100 voyambilila enzokana kukonkha viphunziso va cipembezo na miyambo yamene ni yosakatizhyana na mfundo za m’Baibo. (Akol. 2:8) Molingana na izi, Mboni za Yehova zuyesayesa kupitilizhya “kuyenda m’cendi” mwa kukhulupilila mfundo za m’Baibo. Ndipo oyesayesa kucita zinthu mokatizhyana na malamulo a Mulungu.—3 Yoh. 3, 4.

12. Kansi Bungwe Yolamulila yucitanji ikazindikila kuti tufunika kucinja kamvwidwe kasu, ndipo ndaŵa yanji?

¹² Seo Mboni za Yehova tulaŵila lini kuti tuziŵa zonse zayuphunzisa Baibo. Nthawi ziyakine tucinja kamvwidwe kasu olo malangizo ayakine tikazindikila kuti tenze tiliyomvwishishe mfundo iyakine ya m’Baibo. Ndipo izi zufunika lini kutidabwisa cifukwa Baibo yelaŵililatu kuti atumiki a Mulungu akomvwishisha cendi patontho-patontho. (Akol. 1:9, 10) Tetyo, tufunika kunkhala oleza mtima nonkhala okonzeka kucinja kamvwidwe kasu cifukwa cendi cuwala patontho-patontho. (Miy. 4:18) Bungwe Yolamulila ikazindikila kuti tufunika kucinja kamvwidwe kasu olo mwatucitila zinthu ziyakine m’gulu ya Mulungu, yucitapo kanthu kamangu. Vipembezo vinyinji masiku ŵano vucinja viphunziso vao pofuna kukondwelesha mamembala ŵao olo pofuna kuti ŵanthu a ku calo aŵakonde. Koma seo Mboni za Yehova tucinja zinthu zatukhulupilila kuti tivwendele pafupi na Mulungu na kuti tikomulambila m’njila yoyenelela. (Yak. 4:4) Tucinja kamvwidwe kasu kuti kakatizhyane na mfundo za m’Baibo. Ndipo tucita izi cifukwa tukonda cendi, osati cifukwa cofuna kuti zinkhale zokatizhyana na zokamba za ŵanthu ayakine olo zocitika za pacalo.—1 Ates. 2:3, 4.

13. Kansi Akhristu a m’vyaka 100 voyambilila eonesha tyani kuti enzolambila Mulungu m’njila yovomelezhyeka, nanga Mboni za Yehova zutolela tyani cisanzo cao?

¹³ Akhristu a m’vyaka 100 voyambilila enzoziŵika kuti enzolambila Mulungu m’njila yovomelezhyeka, cifukwa enzokondana mofumila pansi pamtima. Yesu elaŵila kuti: “Ngati mukondana, onse akaziŵe kuti nimwe ophunzila ŵangu.” (Yoh. 13:34, 35) Mboni za Yehova pacalo conse ni zokatizhyana ndipo zuoneshana cikondi, mosasamala kanthu kuti ofumila m’vyalo vosiyanasiyana ndipo ali na vinkhalidwe vosiyanasiyana. Tuona umboni wa izi pa misonkhano ya mpingo, ya dela na ya cigao. Izi zutisiyanisha na vipembezo viyakine, ndipo zupeleka umboni wosasushika wakuti tulambila Yehova m’njila yovomelezhyeka.

14. Molingana na Akolose 3:12-14, kansi ni m’njila iyakine yotyani yatuoneshelamo kuti tukondana ngako?

¹⁴ Baibo yutilimbikisha kuti “tufunika kukondana.” (1 Pet. 4:8) Njila imozi yatuoneshelamo kuti tukonda ŵanthu ayakine ni mwa kuŵakhululukila akatilakwila. Kuyangizhyila apo, tuyesayesa kuonesha nkhalidwe ya wanzi ku ŵanthu onse mumpingo, kuyangizhyilapo na ŵala amene etilakwila. (Ŵelengani Akolose 3:12-14.) Izi zuonesha kuti nise Akhristu acendi.

15. Kansi ni m’njila ziyakine zotyani zatutolela cisanzo ca Akhristu a m’vyaka 100 voyambilila?

¹⁵ Pali soti njila ziyakine zatuoneshelamo kuti tutolela cisanzo ca Akhristu a m’vyaka 100 voyambilila pa nkhani yolambila. Mwacisanzo, monga ni mwezenzele mumpingo wa Akhristu a m’vyaka 100 voyambilila, tili na oyanganila a madela, akulu na atumiki oyavya. (Afil. 1:1; Tito 1:5) Ndipo monga ni mweenzocitila ove, nase tulemekeza malamulo a Mulungu  pa nkhani yokhuza kulalana na ukwati. Kuyangizhyila apo, tulemekeza milopa ndipo tucilikiza ciyelo mwa kucosa ŵanthu amene ofuna lini kulapa mumpingo.—Mac. 15:28, 29; 1 Akor. 5:11-13; 6:9, 10; Aheb. 13:4.

16. Kansi tuphunzilapo cinji pa lemba ya Aefeso 4:4-6?

¹⁶ Yesu ekamba kuti ŵanthu anyinji akolaŵila kuti ni ophunzila ŵake. Koma ni onse lini amene olambila Yehova m’njila yovomelezhyeka. (Mat. 7:21-23) Ndipo Baibo yelaŵililatu kuti m’masiku osilizhya, ŵanthu anyinji “akooneka monga ni ozipeleka kwa Mulungu.” (2 Tim. 3:1, 5) Koma yulaŵila mosapita mbali kuti pali tyala “cikhulupililo cimozi” camene ni covomelezhyeka kwa Mulungu.—Ŵelengani Aefeso 4:4-6.

17. Kansi ni cipembezo cotyani camene culambila Yehova m’njila yovomelezhyeka monga ni mweenzocitila Yesu?

¹⁷ Kansi ni cipembezo cotyani camene culambila Yehova m’njila yovomelezhyeka masiku ŵano? M’nkhani ino, taona njila yeenzoseŵenzesha Yesu na Akhristu oyambilila polambila Yehova. Ndipo taona maumboni osasushika oonesha kuti ni Mboni za Yehova tyala zamene zutolela cisanzo cao masiku ŵano. Kulaŵila cendi, ni mwai ukulu ngako kuziŵa cendi cokhuza Yehova na colinga cake nonkhala m’gulu yamene yumulambila m’njila yovomelezhyeka. Tetyo, tiyeni tipitilizhye kunkhala osimikizhya kuti tepeza cendi.