NKHANI YAKUPFUNZA 42
Phatisisani Cadidi
“Onesesani bzinthu bzentse; ndipo tsimikizirani kuti cabwino n’ciponi muciciphatisisa.”—1 ATESALONIKA 5:21.
NYIMBO 142 Tiphatisise Cidikhiro Cathu
BZOMWE TIN’PFUNZA *
1. Thangwe ranyi wanthu azinji ambazunguzika?
NTSIKU zino pana magereja mazinji yomwe yambalewa kuti njacikristau ndipo yambanamata Mulungu mu njira yomwe iye ambakomedwa nayo. Ndipopa wanthu azinji ambazunguzika! Iwo ambabvunza kuti: “Kodi pana gereja ibodzi yacadidi, ayai magereja yentse yambakondwesa Mulungu?” Kodi ifepano timbatsimikiza na mtima wentse kuti bzomwe timbapfunzisa mpsacadidi ndipo kanamatidwe komwe Mboni za Yahova zimbacita ntsiku zino Yahova ambakomedwa nako? Kodi mpsakukwanisikadi kutsimikiza bzimwebzi mu mtima mwathu? Bwerani tiwone umboni bomwe bungatithandize kutsimikiza bzimwebzi.
2. Mwakubverana na 1 Atesalonika 1:5, thangwe ranyi mpostolo Paulo akhatsimikiza kuti bzomwe akhakhulupira bzikhali bzacadidi?
2 Mpostolo Paulo akhambatsimikiza na mtima wentse kuti bzomwe akhakhulupira bzikhali bzacadidi. (Werengani 1 Atesalonika 1:5.) Iye akhandokhulupira lini mafalayo thangwe rakuti yakhamudekera. M’mbuto mwace, Paulo akhapfunza bwino-bwino Fala la Mulungu. Iye akhakhulupira kuti “Bzinembo bzentse bzidafuliziridwa na Mulungu.” (2 Timotio 3:16) Kodi iye adapfunza ciyani? M’Bzinembo, Paulo adagumana umboni bwakusaya kugazika bwakuti Jezu akhali Mesiya, umboni bomwe atsogoleri wa Adjuda adabulamba. Atsogoleri wapezi-peziwa akhalewa kuti akhapfunzisa wanthu mafala ya Mulungu, tsono akhacita lini bzomwe Mulunguyo akhafuna. (Tito 1:16) Mwakusiyana na iwo, Paulo alibe kusankhula kuti ni mbali iponi ya Fala la Mulungu yomwe iye an’funika kukhulupira. Iye akhali wakukonzeka kupfunzisa na kuphatisa basa ‘malango yentse ya Mulungu.’—Mabasa 20:27.
3. Kodi tin’funika kukhala na mitawiro ya mibvunzo yentse kuti titsimikize kuti tacigumana cadidi? (Onani kwadru yakuti “ Makumbukidwe na Mabasa ya Yahova ‘ni Mazinji Kwene-kwene.’”)
3 Wanthu winango ambakumbuka kuti gereja yacadidi in’funika kutawira mibvunzo yentse napo mibvunzo yomwe mitawiro yace imbagumanika lini m’Bibliya. Kodi makumbukidwe yamweya ngabwino? Onani bzomwe Paulo adalewa. Iye adauza Akristau anzace kuti ambawonesese “bzinthu bzentse,” tsono iye adabvuma kuti pakhana bzinthu bzizinji bzomwe akhabvesesa lini. (1 Atesalonika 5:21) Ndipo iye adalewa pomwe kuti: “Tina cidziwiso cakuperewera” ndipo “tikuwona lini bwino-bwino” thangwe tikuphatisa basa supedyo. (1 Akolinto 13:9, 12) Paulo akhabvesesa lini bzinthu bzentse, ndipo ifepano timbabvesesambo lini. Tsono Paulo akhabvesesa cadidi cakulewa bza Yahova na bzomwe an’funa kudzacita kutsogolo. Bzomwe akhadziwabzo bzidamuthandiza kukhulupira kuti bzikhali bzacadidi!
4. Kodi tingalimbise tani cikhulupiro cathu cakuti tacigumana cadidi, ndipo tin’cezerana ciyani pakulewa bza Akristau wacadidi?
4 Njira ibodzi yomwe ingatithandize kulimbisa cikhulupiro cathu kuti tacigumana cadidi ndiyo kundendemezera kunamata komwe Jezu adasiya na kanamatidwe komwe Mboni za Yahova zimbacita ntsiku zino. Mu nkhani ino tiniwona kuti Akristau wacadidi (1) ambalamba kunamata bzifanikiso, (2) ambalemekeza dzina la Yahova, (3) ambafuna cadidi, na (4) ambafunana kwene-kwene.
TIMBALAMBA KUNAMATA BZIFANIKISO
5. Kodi ifepano tikupfunza ciyani na momwe Jezu akhanamatira Mulungu, ndipo tingaphatise tani basa bzomwe iye adapfunzisabzo?
5 Thangwe ra lufoyi lace kuna Mulungu, Jezu adanamata Yahova yekha pomwe akhali kudzulu napo pomwe akhali pa dziko la pantsi. (Luka 4:8) Iye adapfunzisa anyakupfunza wace kuti ambacitembo bzibodzi-bodzibzi. Jezu na anyakupfunza wace akhaphatisa lini basa bzifanikiso pakunamata. Pakuti Mulungu ambawoneka lini, tenepo palibe munthu omwe angakonze cinthu ciri-centse comwe cingaimire ulemerero bwa Yahova! (Zaiya 46:5) Apo tani pakulewa bza kukonza bzifanikiso bzomwe bzimbacemeredwa kuti wakucena na kumbabzipemba? Mu lamulo laciwiri pa Malamulo Khumi, Yahova adalewa kuti: ‘Leka kubzisemera cifanikiso cakundendemerana na bzinthu bzomwe bziripo kudzulu, na bzomwe bziripo pantsi . . . leka kubzigodamira.’ (Kufuluka 20:4, 5) Wanthu omwe ambafuna kucita bzinthu bzomwe Mulungu ambakomedwa nabzo ambabvesesa kuti iye akufuna lini kuti timbanamate bzifanikiso.
6. Kodi Mboni za Yahova ntsiku zino zimbatewezera kanamatidwe kaponi?
6 Afotokozi wa nkhani zakale-kale adazindikira kuti Akristau wakuyambirira akhanamata Mulungu yekha basi. Mwa ciratizo, bukhu linango lakulewa bza magereja lidalewa kuti: “Akristauwo akhaipidwa kwene-kwene na nzeru ya kunamata bzifanikiso.” Ntsiku zino, Mboni za Yahova zimbatewezera bzomwe Akristau wakuyambirirawo akhacita. Ifepano timbapemba lini kuna bzifanikiso “bzakucena” ayai kuna anjo; ndipo timbapembambo lini napo kuna Jezu. Ndipo ifepano timbanamatira lini bandera ayai kucita ciri-centse comwe cingalatize kuti tikunamata maboma. Napo wanthu ayezere kuticitisa bzimwebzi, ifepano ndife wakutsimikiza kubvera mafala ya Jezu yakuti: “Yahova Mulungu wako, ndiye omwe un’funika kumunamata.”—Mateu 4:10.
7. Kodi n’kusiyana kuponi komwe kulipo pakati pa Mboni za Yahova na magereja yanango?
7 Ntsiku zino wanthu azinji ambatewera atsogoleri wa magereja wakutapira mkamwa. Wanthuwo ambadabwa na kapaliziridwe kawo, bzomwe bzimbacitisa kuti afike pakuwanamata atsogoleriwo. Wanthu azinji ambayenda ku magereja yawo, ambagula mabukhu yawo ndipo ambapereka kobiri zizinji kuna atsogoleriwo ayai ku magereja yawoko. Wanthu winango ambakhulupira mafala yentse yomwe atsogoleriwo ambalewa. Iwo ambakomedwa kwene-kwene na atsogoleriwo kuposa momwe angadakomedwera bzingadakhala kuti awona Jezu! Mwakusiyana na wanthuwo, anamati wacadidi wa Yahova ambatewera lini wanthu. Napo kuti ifepano timbalemekeza wale omwe akutitsogolera, ifepano timbabvera mafala ya Jezu yakuti: ‘Mwentsenemwe ni ubale bwanu.’ (Mateu 23:8-10) Ifepano timbanamata lini wanthu napo akhale atsogoleri wa magereja ayai wa ndale. Ndipo timbathandizira lini magereja yawoyo ayai ndale zawozo. M’mbuto mwace, timbapitira lini nkhani za ndale ndipo ndife wakusiyana na dzikoli. Pa bzentsebzi ndife wakusiyana kwene-kwene na magereja yomwe yambabziti ni Akristau.—Juwau 18:36.
TIMBALEMEKEZA DZINA LA YAHOVA
Akristau wacadidi ambakomedwa kuuzambo winango bza Yahova (Onani ndime 8-10) *
8. Kodi tikudziwa tani kuti Yahova akufuna kuti tilemekeze dzina lace na kulidziwisambo kuna munthu ali-wentse?
8 Pa nthawe inango, Jezu adapemba kuti: “Baba lemekezani dzina lanu.” Yahova adatawira mpemboyo na mafala yakukuwa yakucokera kudzulu yakulewa kuti iye angadalemekeza dzina lace. (Juwau 12:28) Pa utumiki bwace Jezu adalemekeza dzina la Baba wace. (Juwau 17:26) Ndipopa Akristau wacadidi ambawona kuti ni mwayi kuphatisa basa dzina la Mulungu na kulidziwisambo kuna wanthu winango.
9. Kodi Akristau wakuyambirira adalatiza tani kuti akhalemekeza dzina la Mulungu?
9 Pomwe gwere lacikristau lidakhazikisidwa, Yahova “adabvumambo wanthu wa mitundu inango pa nthawe yakuyamba kuti kucokera mwa iwo, asankhulembo wanthu wakudziwika na dzina lace.” (Mabasa 15:14) Akristauwo akhakomedwa kuphatisa basa dzina la Mulungu na kulidziwisambo kuna wanthu winango. Apostolo pabodzi na anyakupfunza akhaphatisa basa dzina la Mulungu pomwe iwo akhapalizira na pomwe akhanemba mabukhu ya m’Bibliya. * Na bzimwebzi, iwo adalatiza kuti akhali okhawo omwe akhadziwisa dzina la Mulungu.—Mabasa 2:14, 21.
10. Kodi ni umboni buponi bwakulatiza kuti Mboni za Yahova ndizo zokha zomwe zimbadziwika na dzina la Mulungu?
10 Kodi Mboni za Yahova ndizo zokha zomwe zimbadziwika na dzina la Yahova? Onani umboni bwa nkhaniyi. Ntsiku zino atsogoleri azinji wa magereja ambauza lini wanthu kuti Mulungu ana dzina. Iwo adacosa dzinalo m’Mabibliya yomwe adasandulizira, ndipo ambabvuma lini kuti dzina la Mulungu ligumidwe m’magereja yawo. * Bzikuwonekeratu padeca kuti ni Mboni za Yahova zokha zomwe zimbalemekeza dzina la Mulungu. Ifepano timbadziwisa dzina la Mulungu kuzungulira dziko lentse la pantsi kuposa magereja yentse! Mwakubverana na bzimwebzi, ifepano tikucita ciri-centse comwe tingakwanise kuti tibverane na dzina lathu lakuti Mboni za Yahova. (Zaiya 43:10-12) Ifepano tidadinda Bibliya Lakusanduliziridwa la Dziko Lipsa, makopiya yakupitirira mamidyau 240, lomwe lina dzina la Yahova m’mbuto zomwe anyakusandulizira wa Mabibliya manango adalicosa. Ndipo timbadinda mabukhu yomwe yambaphatisa basa dzina la Yahova m’bzirewedwe bzakupitirira 1000!
TIMBAFUNA CADIDI
11. Kodi Akristau wakuyambirira adalatiza tani kuti akhafuna cadidi?
11 Jezu akhafuna cadidi cakulewa bza Mulungu na bzomwe iye an’dzacita kutsogolo. Jezu akhakhala na moyo mwakubverana na cadidico ndipo iye adadziwisambo wanthu winango cadidico. (Juwau 18:37) Ateweri wacadidi wa Jezu akhafunambo kwene-kwene cadidi. (Juwau 4:23, 24) Ndipopa Pedru adalewa kuti kunamata kwacikristau ni ‘njira ya cadidi.’ (2 Pedru 2:2) Thangwe ra kufuna kwene-kwene cadidi, Akristau wakuyambirira akhalamba nzeru ya magereja, miyambo na nzeru za wanthu zomwe zimbabverana lini na cadidi ca m’Bibliya. (Akolose 2:8) Ninga momwe adacitira Akristau wakuyambirira, ntsiku zino Akristau wacadidi ambacita nyongo yakufamba m’cadidi mwakuteweza bzomwe ambakhulupira na kucita bzinthu mwakubverana na Fala la Yahova.—3 Juwau 3, 4.
12. Kodi n’ciyani comwe cimbacitika wale omwe akutsogolera akazindikira kuti kabvesesedwe kanango kan’funika kucinja, ndipo n’thangwe ranyi iwo ambacita bzimwebzo?
12 Mboni za Yahova zimbalewa lini kuti zimbabvesesa bwino-bwino bzentse bzomwe Bibliya limbalewa. Nthawe zinango iwo adafotokoza mwakuphonyeka bzomwe Bibliya limbapfunzisa ayai alibe kulinganiza bwino bzinthu m’gwere. Bzimwebzi bzimbatidabwisa lini. Bzinembo bzimbalatiza padeca kuti cidziwiso cimbathimizirika nakupita kwa nthawe. (Akolose 1:9, 10) Yahova ambazimbula cadidi pang’ono na pang’ono ndipo ifepano tin’funika kukhala wakukonzeka kudikhirira nthawe yomwe tidzabvesese bwino-bwino cadidico. (Mimwani 4:18) Omwe akutsogolera akazindikira kuti pana kabvesesedwe komwe kan’funika kucinja, iwo ambacita lini manyazi kucinja kabvesesedweko. Magereja mazinji ntsiku zino yambacinja bzinthu bzomwe yambapfunzisa thangwe ra kufuna kuti wanthu wawo akomedwe nawo, ayai kuti dziko likomedwe nawo. Tsono Mboni za Yahova zimbacinja bzinthu thangwe ra kufuna kufendererana na Mulungu na kumunamata mu njira yomwe Jezu adacitira. (Tiyago 4:4) Ifepano timbacinja bzinthu sikuti thangwe ra kucinja kwa nzeru za wanthu m’dzikoli, koma ni thangwe ra kubvesesa bwino Bibliya. Ifepano timbafuna cadidi!—1 Atesalonika 2:3, 4.
TIMBAFUNANA NA MTIMA WENTSE
13. Kodi ni khalidwe liponi lakufunika lomwe Akristau wacadidi ambalatizana, ndipo kodi Mboni za Yahova zimbalatiza tani khalidweli ntsiku zino?
13 Akristau wakuyambirira akhadziwika na makhalidwe mazinji yabwino, koma khalidwe lakufunika kwene-kwene lomwe akhadziwika nalo ni lufoyi. Jezu adalewa kuti: “Na bzimwebzi, wentse an’dzadziwa kuti ndimwe anyakupfunza wangu mukambafunana.” (Juwau 13:34, 35) Ntsiku zino, pa dziko lentse la pantsi Mboni za Yahova zimbalatiza kuti zimbafunana ndipo zimbabverana. Ifepano ndife wakusiyana na magereja manango thangwe rakuti tiri ninga banja libodzi, napo kuti ndife wa madziko yakusiyana-siyana, na bzikhalidwe bzakusiyana-siyana. Timbakwanisa kuwona umboni bwa lufoyiro pa mitsonkhano ya gwere, mitsonkhano ya dera na mitsonkhano ya cigawo. Umboni bumwebu bumbatithandiza kutsimikiza kuti kanamatidwe kathu ndiko komwe Yahova ambakomedwa nako.
14. Mwakubverana na Akolose 3:12-14, kodi tingalatize tani kuti timbafunana na mtima wentse?
14 Bzinembo bzimbatiuza kuti: “Mbafunanani na mtima wentse.” (1 Pedru 4:8) Njira ibodzi yomwe timbalatizira lufoyi ndiyo kumbalekerera anzathu na kuyebwa bzomwe atiphonyera. Timbanyang’anambo mipata yakuti tikhale wanthu wakupasa na kutambira alendo kuna wentse m’gwere napo kuna wale omwe atiphonyera. (Werengani Akolose 3:12-14.) Tikambacita bzimwebzi, timbalatiza kuti ndife Akristau wacadidi.
TINA “CIKHULUPIRO CIBODZI”
15. Kodi ni njira ziponi zinango zomwe timbatewezerera kanamatidwe ka Akristau wakuyambirira?
15 Ifepano timbatewezera kanamatidwe ka Akristau wakuyambirira mu njira zinango pomwe. Mwa ciratizo, gulu lathu lidalinganizidwa ninga momwe Akristau wakuyambirira akhadalinganizidwira, tina anyakunyang’anira dera, akulu wa gwere, atumiki wakuthandiza, ninga momwe iwo akhambacitira. (Afilipi 1:1; Tito 1:5) Ninga iwo, ifepano timbalemekeza malamulo ya Mulungu pa nkhani ya malume ya pa mphasa, malowozi, bzomwe Mulungu ambalewa pa nkhani ya kuphatisa basa mulopa na kukhotcerera gwere kuna wale omwe ambalamba kuteweza malamulo ya Mulungu.—Mabasa 15:28, 29; 1 Akolinto 5:11-13; 6:9, 10; Ahebereu 13:4.
16. Kodi tikupfunza ciyani na mafala ya pa Aefezo 4:4-6?
16 Jezu adalewa kuti wanthu azinji angadadzalewa kuti ni anyakupfunza wace koma ni wentse lini omwe angadadzakhaladi anyakupfunza wace wacadidi. (Mateu 7:21-23) Bzinembo bzidalewa kuti mu ntsiku zakumalizira wanthu azinji ‘angadadzabziwonesa ninga kuti mbakubzipereka kwa Mulungu.’ (2 Timotio 3:1, 5) Tsono Bibliya limbatiuza kuti pana “cikhulupiro cibodzi” comwe Mulungu ambacibvuma.—Werengani Aefezo 4:4-6.
17. Kodi mbani ntsiku zino omwe akutewera Jezu na kulatiza cikhulupiro cacadidi?
17 Kodi mbani akulatiza kuti ana cikhulupiro cakulimba ntsiku zino? Ifepano tawona umboni. Tawona kanamatidwe komwe Jezu adapfunzisa na momwe Akristau wakuyambirira adaphatisira basa. Tenepo, mtawiro ngwakuti omwe ana cikhulupiro cacadidi ni Mboni za Yahova. Ifepano tina mwayi wakukhala wanthu wa Yahova na kudziwa cadidi cakulewa bza iye na bzomwe akufuna kudzacita kutsogolo. Tenepo, bwerani ticite ciri-centse comwe tingakwanise kuti tiphatisise cadidi.
NYIMBO 3 Ndimwe Mphanvu Yathu, Cidikhiro Cathu, Timbakukhulupirani
^ ndi. 5 Mu nkhani ino, tin’cezerana nkhani yakunamata kwacadidi komwe Jezu adakuyambisa ndipo tiniwona kuti anyakupfunza wace adatewezera tani kunamatako. Ndipo tiniwonambo umboni bwakulatiza kuti Mboni za Yahova zikuteweza kanamatidwe kacadidi kamweko ntsiku zino.
^ ndi. 9 Onani kwadru yakuti: “Kodi Akhristu Oyambirira Ankatchula Dzina la Mulungu?” mu Ntsanza ya Mulindiri ya 1 Julho, 2010, tsa. 6, Chichewa.
^ ndi. 10 Mwa ciratizo, mu 2008 papa Bento 16 adalewa kuti dzina la Mulungu “lin’funika lini kuphatisidwa basa ayai kugumidwa” m’magereja yacikatolika, mu nyimbo zawo ayai mu mipembo.
^ ndi. 63 BZOMWE BZIKUCITIKA PA CITHUNZI-THUNZI: Gulu la Yahova lasandulizira kale Bibliya Lakusanduliziridwa la Dziko Lipsa m’bzirewedwe bzakupitirira 200, kuti wanthu akwanise kuwerenga Bibliya lomwe limbaphatisa basa dzina la Mulungu m’cirewedwe cawo.
