1. Беретӕ ци нӕбал фӕллӕдӕрунцӕ?

ЗӔНХӔБӔЛ хъӕбӕр берӕ динтӕ сӕхе киристон фӕххонунцӕ, ӕма си алкедӕр ӕхе раст фӕххонуй. Уомӕ гӕсгӕ беретӕмӕ фӕззиннуй уӕхӕн фарста: «Цума си Хуцауӕн ести уӕлдай ес, адӕймаг цӕхуӕн динбӕл хуӕст ӕй, е?» Ӕма дессаг нӕй, адӕн ӕй ке нӕбал лӕдӕрунцӕ, Хуцауӕн куд ковун гъӕуй, уой. Мах ба ’й кӕцӕй зонӕн, Йегови Ӕвдесӕнти дин раст ке ӕй ӕма Хуцауи зӕрдӕмӕ ке цӕуй? Не ’ууӕндундзийнадӕн федар бундор ес? Гъӕйдӕ уобӕл радзубанди кӕнӕн.

2. Павел федарӕй цӕй фӕрци ӕууӕндтӕй, рӕстдзийнадӕ ке иссирдта, уобӕл? (1 Фессалоникӕгтӕмӕ 1:5).

² Апостол Павел ӕгириддӕр нӕ гурусхӕ кодта, рӕстдзийнадӕ ке иссирдта, уобӕл. (Бакӕсӕ 1 Фессалоникӕгтӕмӕ 1:5.) Еци ахурӕдтӕ ӕ зӕрдӕмӕ ке цудӕнцӕ, айдагъ уой туххӕй сӕбӕл не ’ууӕндтӕй. Павел Финстадӕ лӕмбунӕг ӕртаста ӕма федарӕй ӕууӕндтӕй, «Хуцауи разамундӕй финст» ке ӕй (2 Тим. 3:16). Уой фӕрци Павел иссирдта, Йесо Мессийӕ ке ӕй, уомӕн бӕлвурдгӕнӕнтӕ. Дзиуиттаг дини разамонгутӕ ба еци бӕлвурдгӕнӕнтӕ нецӕмӕ ӕрдардтонцӕ. Етӕ сӕхе Хуцауи адӕн худтонцӕ, фал сӕ гъуддӕгтӕй ба е бӕрӕг н’ адтӕй (Тит. 1:16). Апостол Павел ба уони хузӕн н’ адтӕй. Е равзарӕ-бавзарӕ нӕ кодта, цӕбӕл ӕууӕнддзӕй, цӕбӕл ба – нӕ. Павел адӕнӕн игъосун кодта,  «Хуцауи фӕндонмӕ цидӕриддӕр хауй, уой» (Гъуд. 20:27).

3. Не ’гас фарстатӕбӕл дзуӕппитӕ ку нӕ зонӕн, уӕд дӕр цума нӕ бон ӕй федарӕй ӕууӕндун, рӕстдзийнадӕ ке иссирдтан, уобӕл? (Кӕсӕ ма рамкӕ  «Адӕн „кӕронмӕ некӕд базондзӕнцӕ, ӕцӕг Хуцау ци гъуддӕгтӕ аразуй, уони“».)

³ Еуӕй-еуетӕмӕ уотӕ фӕккӕсуй, ӕма раст дин гъӕуама се ’гас фарстатӕбӕл дӕр дзуапп дӕтта, кӕд син Библий комкоммӕ дзуапп нӕййес, уӕд дӕр. Фал цума е раст гъуди ӕй? Апостол Павел хуӕртӕ ӕма ӕнсувӕрти разӕнгард кодта, «алцидӕр исбӕлвурд кӕниайтӕ», зӕгъгӕ (1 Фес. 5:21). Фал алци базонӕн ке нӕййес, уой дӕр лӕдӕрдтӕй, ӕма уомӕ гӕсгӕ ниффинста: «Нуртӕккӕ ци зонӕн, уой ӕнхӕстӕй нӕ зонӕн... Нуртӕккӕ мах кӕсӕн, дзӕбӕх кӕми неци зиннуй, уӕхӕн айдӕнӕмӕ» (1 Кор. 13:9, 12). Павел алци нӕ зудта. Ӕма мах дӕр абони алци нӕ зонӕн. Фал Йегови туххӕй ци сӕйраг ахурӕдтӕ зудта, етӕ ин фагӕ адтӕнцӕ, цӕмӕй, рӕстдзийнадӕ ке иссирдта, уобӕл ӕууӕндтайдӕ.

4. Нӕ бон куд ӕй нӕхецӕн исбӕлвурд кӕнун, рӕстдзийнадӕ ке иссирдтан, уой ӕма аци статьяй цӕмӕ ӕркӕсдзиан?

⁴ Рӕстдзийнадӕ ке иссирдтан, уой цӕмӕй нӕхецӕн исбӕлвурд кӕнӕн, уой туххӕй гъӕйдӕ рабарӕн, Йесо Киристе ци дӕнцӕг ниууагъта ӕма Йегови Ӕвдесӕнтӕ куд цӕрунцӕ, уой. Аци статьяй фӕууиндзиан, 1) ӕцӕг киристӕнттӕ гумеритӕн ӕма хузтӕн ке нӕ ковунцӕ, 2) Хуцауи ном ке нимайунцӕ, 3) рӕстдзийнадӕ ке уарзунцӕ ӕма 4) кӕрӕдзей ке уарзунцӕ.

5. Йесо Хуцаумӕ куд кувта ӕма ӕ фӕдбӕлдзӕугутӕ дӕр куд гъӕуама ковонцӕ?

⁵ Йесо Йегови берӕ уарзуй, ӕма уомӕ гӕсгӕ ӕрмӕстдӕр уомӕн лӕггадӕ кӕнуй. Уотӕ адтӕй, зӕнхӕбӕл ку цардӕй уӕд дӕр  ӕма уӕлӕрвти дӕр (Лук. 4:8). Ӕ ахуркӕнуйнӕгти дӕр уобӕл ахур кодта. Нӕдӕр ӕхуӕдӕг, нӕдӕр ӕ еузӕрдон ахуркӕнуйнӕгтӕ Йеговӕмӕ ковгӕй хузтӕй некӕд пайда кодтонцӕ. Адӕнӕй Хуцауи некӕд неке фӕууидта, ӕма ин ӕ хузӕ искӕнун дӕр неке бон ӕй (Ис. 46:5). Мадта уӕд сугъдӕгутӕ ке фӕххонунцӕ, уони хузтӕмӕ ковун ба ӕнгъезуй? Йеговӕ израилӕгтӕн ци 10 фӕдзӕхсти равардта, уонӕй дуккаг уӕхӕн адтӕй: «Ма кӕнӕ дӕхецӕн, сӕрӕй арвбӕл ци ес, бунӕй зӕнхӕбӕл ци ес... уонӕн сӕ гумеритӕ ӕма сӕ хузтӕ. Сӕ рази дӕ уӕргутӕбӕл ма лӕууӕ ӕма син ма ковӕ» (Рац. 20:4, 5). Хуцауи хуарзӕнхӕ иссерун ке фӕндуй, етӕ аци дзурдтӕ, куд гъӕуй, уотӕ лӕдӕрунцӕ.

6. Йегови Ӕвдесӕнтӕ Хуцауӕн куд ковунцӕ ӕма син дӕнцӕг ци ӕй?

⁶ Историктӕ куд зӕгъунцӕ, уомӕ гӕсгӕ фиццаг ӕноси киристӕнттӕ ӕрмӕстдӕр Хуцаумӕ кувтонцӕ. Киристон аргъауӕнти туххӕй финст кӕми адтӕй, еу уӕхӕн киунуги финст адтӕй: «Фиццаг киристӕнттӕ сӕ ковӕн бунатмӕ хузӕ ӕрбахӕссонцӕ ӕма имӕ ковонцӕ, уобӕл сагъӕс дӕр нӕ ракодтайуонцӕ». Мах рӕстӕги дӕр Йегови Ӕвдесӕнтӕ гъе уӕхӕн гъудибӕл хуӕст ӕнцӕ. Мах нӕ ковӕн нӕдӕр сугъдӕгутӕн, нӕдӕр изӕдтӕн, нӕдӕр Йесо Киристейӕн. Удта ци бӕсти цӕрӕн, уомӕн дӕр, Хуцауӕн ци кадӕ ӕмбӕлуй, еци кадӕ нӕ кӕнӕн. Турусайӕн дӕр нӕ табу кӕнӕн. Цийфӕнди ма ’рцӕуа, уӕддӕр мах ӕнхӕст кӕнӕн Йесо Киристей фӕдзӕхст: «Дӕ Хуцау Йеговӕн ковӕ» (Матф. 4:10).

7. Йегови Ӕвдесӕнтӕ иннӕ динтӕй цӕмӕй хецӕн кӕнунцӕ?

⁷ Аргъауӕнти саугинтӕй беретӕ хъӕбӕр зундгонд ӕнцӕ. Адӕн сӕмӕ хатгай уотӕ фегъосунцӕ, цума сӕмӕ уӕларвӕй изӕд ӕрцудӕй. Сӕ аргъауӕнти ревӕд бунат нӕбал фӕууй, сӕ киунугутӕ син балхӕнунцӕ, удта син дуйне ӕхца нисайнагӕн фӕддӕттунцӕ. Сӕ алли дзурдбӕл дӕр син ӕууӕндунцӕ. Удта сӕбӕл уотӕ фӕццийнӕ кӕнунцӕ, цума Киристей фӕууидтонцӕ. Йегови ӕцӕг лӕггадгӕнгути туххӕй ба ци ес зӕгъӕн? Кӕд нӕмӕ разамунд ка дӕттуй, уони гъӕуама нимайӕн, уӕддӕр адӕни фӕдбӕл ба нӕ цӕуӕн. Уомӕн ӕма Йесо комкоммӕ загъта: «Уе ’гасдӕр ӕнсувӕртӕ айтӕ» (Матф. 23:8–10). Мадта мах адӕнӕн нӕ ковӕн, нӕдӕр дини разамонгутӕн, нӕдӕр политиктӕн. Удта син сӕ къох дӕр нецӕмӕй аразӕн. Политики гъуддӕгти неке фарс фӕууӕн ӕма аци дуйней гъуддӕгти нӕхе нӕ тъунсӕн. Е нӕ аци дуйней киристон динтӕй хъӕбӕр хецӕн кӕнуй (Иоан. 18:36).

8. Кӕцӕй ӕй зонӕн, Йегови уотӕ ке фӕндуй, цӕмӕй ӕ ном искадгин уа ӕма ’й ӕгас адӕн дӕр базононцӕ?

⁸ Еухатт Йесо Йеговӕмӕ ковгӕй загъта: «Мӕ Фидӕ, искадгин кӕнӕ дӕ ном». Ӕма ин Йеговӕ ӕхуӕдӕг дзуапп равардта: «’Скадгин ӕй кодтон, ӕма ’й никкидӕр ’скадгин кӕндзӕн» (Иоан. 12:28). Зӕнхӕбӕл лӕггадӕ кӕнгӕй Йесо Йегови ном алкӕддӕр кадгин кодта (Иоан. 17:26). Цума е цӕбӕл дзорӕг ӕй? Ӕцӕг киристӕнттӕ дӕр гъӕуама Хуцауи ном кадгин кӕнонцӕ, иннетӕн ӕй дзоронцӕ, удта уой сӕхецӕн гъӕуама устур кадӕбӕл нимайонцӕ.

9. Фиццаг ӕноси киристӕнттӕ Хуцауи ном ке нимадтонцӕ, е цӕмӕй бӕрӕг адтӕй?

⁹ Фиццаг ӕноси киристон ӕмбурд ку фӕззиндтӕй, уой хуӕдфӕсте Йеговӕ «иннӕ адӕнихӕттитӕмӕ... ӕркастӕй, цӕмӕй уонӕй ӕхецӕн искӕна, ӕ ном ин ка хӕсса, уӕхӕн адӕн» (Гъуд. 15:14). Еци рӕстӕг ка  цардӕй, еци киристӕнттӕ сӕхецӕн устур кадӕбӕл нимадтонцӕ Хуцауи ном адӕнӕн хӕссун. Уомӕй уӕлдай ма Библий киунугутӕ ка финста, етӕ дӕр Хуцауи номӕй пайда кодтонцӕ *. Уотемӕй ӕй еци киристӕнттӕ бавдистонцӕ, Хуцауи ном ка хӕссуй, еци адӕн ке ’нцӕ (Гъуд. 2:14, 21).

10. Йегови Ӕвдесӕнтӕ, Хуцауи ном ка хӕссуй, еци адӕн ке ’нцӕ, уомӕн цӕхуӕн бӕлвурдгӕнӕнтӕ ес?

¹⁰ Цума Йегови Ӕвдесӕнти ӕнгъезуй исхонун, Хуцауи ном ка хӕссуй, уӕхӕн адӕн? Ӕркӕсӕн бӕлвурдгӕнӕнтӕмӕ. Абони дини разамонгутӕ, сӕ бон ци ӕй, уой кӕнунцӕ, цӕмӕй адӕнӕй Хуцауи ном баримӕхсонцӕ. Сӕ Библий тӕлмацтӕй дӕр ӕй рандӕ кодтонцӕ. Еуӕй-еухатт ба ’й сӕ аргъауӕнти дзорун дӕр нӕ фӕууадзунцӕ *. Фал Йегови Ӕвдесӕнтӕ ба Хуцауи номӕн, куд ӕмбӕлуй, уотӕ ке кадӕ кӕнунцӕ, уой нихмӕ ба еске бон ӕй ести зӕгъун? Ескӕци дин ма байархайдта, цӕмӕй адӕн Хуцауи ном базудтайуонцӕ? Мадта нӕхе Йегови Ӕвдесӕнтӕ дзӕгъӕли нӕ хонӕн (Ис. 43:10–12). «Библи – Нӕуӕг дуйней тӕлмац» 240 милиуанемӕй фулдӕр ниммухур кодтан. Ӕма си Хуцауи ном, иннӕ тӕлмацгӕнгутӕ ’й кӕми райхалдтонцӕ, уоми алкӕмидӕр ӕй. Уомӕй уӕлдай ма 1 000 ӕвзагемӕй фулдӕрбӕл уадзӕн Библибӕл арӕзт публикацитӕ, ӕма уоми дӕр Хуцауи номӕй фӕппайда кӕнӕн.

11. Фиццаг ӕноси киристӕнттӕ рӕстдзийнадӕ ке уарзтонцӕ, е цӕмӕй бӕрӕг ӕй?

¹¹ Йесо Хуцауи туххӕй ци рӕстдзийнадӕ зудта, уой уарзта. Удта цӕргӕ дӕр уомӕ гӕсгӕ кодта ӕма ’й иннетӕн дзурдта (Иоан. 18:37). Ӕ фӕдбӕл ка рацудӕй, етӕ дӕр рӕстдзийнадӕ берӕ уарзтонцӕ (Иоан. 4:23, 24). Зӕгъӕн, апостол Петур киристон дин исхудта «раст над» (2 Пет. 2:2). Фиццаг ӕноси киристӕнттӕ ӕнцонтӕй ниууагътонцӕ, рӕстдзийнади хӕццӕ ка нӕ федудта, еци дини ӕгъдӕуттӕ, сӕ адӕни ӕгъдӕуттӕ, удта сӕхе фӕндтӕ дӕр (Кол. 2:8). Уотӕ абони дӕр ӕцӕг киристӕнттӕ архайунцӕ, цӕмӕй «раст надбӕл» цӕуонцӕ, гъома, Хуцауи Дзурди ци финст ес, уобӕл ӕууӕндунцӕ ӕма сӕ цард дӕр уомӕ гӕсгӕ аразунцӕ (3 Иоан. 3, 4).

12. Разамонӕг совет ӕй ку балӕдӕруй, цӕхуӕндӕр аййивдтитӕ искӕнун ӕй ке гъӕуй, уӕд куд фӕййархайуй ӕма цӕмӕн?

¹² Йегови Ӕвдесӕнтӕ уотӕ некӕд фӕдздзорунцӕ, ӕма Библий алцидӕр лӕдӕрунцӕ. Еуӕй-еухатт кӕцидӕр ахурӕдтӕ раст нӕ балӕдӕрун кӕнунцӕ кенӕ ба ӕмбурди гъуддӕгти фӕдбӕл раст унаффитӕ нӕ рахӕссунцӕ. Фал нӕмӕ е дессаг гъӕуама ма кӕса. Библимӕ гӕсгӕ Хуцауи адӕн рӕстдзийнадӕ хуӕздӕрӕй-хуӕздӕр лӕдӕрдзӕнцӕ (Кол. 1:9, 10). Йеговӕ ’й сабургай игон кӕнуй ӕ адӕнӕн, ӕма гъӕуама фӕразон уӕн (Ӕмб. 4:18). Разамонӕг совет ӕй ку балӕдӕруй, цӕхуӕндӕр гъуддӕгти кенӕ ахурӕдти фӕдбӕл сӕ сӕ гъуди раййевун ке гъӕуй, уой, уӕд ӕй еци фӕдбӕл раййевунцӕ. Абони берӕ динтӕ се ’гъдӕуттӕ раййевунцӕ сӕ адӕни зӕрдӕ балхӕнуни туххӕй. Йегови адӕн ба ести ӕййивдтитӕ ку искӕнунцӕ, уӕд сӕ уой туххӕй искӕнунцӕ, цӕмӕй Хуцауи хуарзӕнхӕ иссеронцӕ ӕма Йесой амундтӕ никки хуӕздӕр ӕнхӕст кӕнонцӕ (Иак. 4:4). Еци ӕййивддзийнӕдтӕ искӕнӕн, адӕни зӕрдитӕ балхӕнун нӕ ке фӕндуй, уой туххӕй нӕ, фал Библий ахурӕдтӕ хуӕздӕр лӕдӕрун ке райдӕдтан, уой туххӕй. Мадта федарӕй зӕгъӕн ес, ӕма рӕстдзийнадӕ ӕцӕгӕйдӕр уарзӕн! (1 Фес. 2:3, 4).

13. Йегови Ӕвдесӕнтӕ ӕцӕг киристӕнттӕ ке ’нцӕ, е ма цӕмӕй бӕрӕг ӕй?

¹³ Фиццаг ӕноси киристӕнттӕ адӕни астӕу бӕрӕг адтӕнцӕ, кӕрӕдзей куд уарзтонцӕ, уомӕй. Йесо загъта: «Мӕ ахуркӕнуйнӕгтӕ ке айтӕ, уой еугур адӕн дӕр базондзӕнцӕ, уӕ кӕрӕдзей ку уарзайтӕ, уӕд» (Иоан. 13:34, 35). Ӕма абони дӕр ӕгас дуйнебӕл Йегови Ӕвдесӕнтӕ кӕрӕдзей гъе уотӕ уарзунцӕ, кӕд аллихузи бӕститӕ ӕма адӕнихӕттитӕй ӕнцӕ, уӕддӕр. Иннӕ динтӕй дӕр уомӕй хецӕн кӕнӕн. Кӕрӕдзей куд уарзӕн, е бӕрӕг фӕууй не ’мбурдтӕ ӕма конгрессти. Ӕма ма уомӕй дӕр бӕрӕг ӕй, Йеговӕ нин нӕ лӕггадӕй арази ке ӕй.

14. Кӕрӕдзей ке уарзӕн, е цӕмӕй бӕрӕг ӕй? (Колоссӕгтӕмӕ 3:12–14).

¹⁴ Библи нӕ разӕнгард кӕнуй: «Кӕрӕдзей уотӕ уарзетӕ, уӕ уарзт артау куд содза» (1 Пет. 4:8). Кӕрӕдзей ке уарзӕн, уой фӕрци кӕрӕдземӕн хатир кӕнун дӕр зонӕн. Уомӕй уӕлдай ма ан рӕдау ӕма иуазӕгуарзон, сауӕнгӕ ма нӕ зӕрдихудти ка бацудӕй, уонӕмӕ дӕр. (Бакӕсӕ Колоссӕгтӕмӕ 3:12–14.) Уарзондзийнадӕ нӕ кӕрӕдзебӕл бӕттуй, ӕма уой фӕрци бӕрӕг ӕй, ӕцӕг киристӕнттӕ ке ан, е.

15. Фиццаг ӕноси киристӕнттӕ Йеговӕн куд лӕггадӕ кодтонцӕ, мах дӕр ин уотӕ ке лӕггадӕ кӕнӕн, е ма цӕмӕй бӕрӕг ӕй?

¹⁵ Фиццаг ӕноси киристӕнттӕ Йеговӕн  куд лӕггадӕ кодтонцӕ, мах дӕр ин уотӕ ке лӕггадӕ кӕнӕн, е ма цӕмӕй бӕрӕг ӕй? Зӕгъӕн, не ’мбурдти абони уӕнгӕ дӕр, апостолтӕ ци уагӕ ӕрфедар кодтонцӕ, уомӕ гӕсгӕ архайӕн. Махӕн дӕр ес районон цӕстӕдаргутӕ, хестӕр нӕлгоймӕгтӕ ӕма кӕстӕреуӕггӕнӕг ӕнсувӕртӕ (Фил. 1:1; Тит. 1:5). Удта мах дӕр фиццаг ӕноси киристӕнтти хузӕн нимайӕн, Хуцау ӕмуат ӕрцӕуни туххӕй, бийнонти туххӕй ӕма тоги туххӕй ци закъӕнттӕ равардта, уони, ӕма мах дӕр ӕмбурд гъӕуай кӕнӕн, ӕ тӕрегъӕдтӕбӕл ка нӕ фӕсмон кӕнуй, уонӕй (Гъуд. 15:28, 29; 1 Кор. 5:11–13; 6:9, 10; Дзиуит. 13:4).

16. Ефесӕгтӕмӕ 4:4–6 цӕхуӕн ӕхсидзгӕ гъуди финст ес?

¹⁶ Йесо куд дзурдта, уомӕ гӕсгӕ беретӕ сӕхе ӕ ахуркӕнуйнӕгтӕ хондзӕнцӕ, фал ӕцӕгӕй ба уотӕ нӕ уодзӕй (Матф. 7:21–23). Библий дӕр ма финст ӕрцудӕй, фӕстаг бӕнтти беретӕ сӕхе уотӕ ке ӕвдесдзӕнцӕ, «цума Хуцауӕн ковӕг адӕн ӕнцӕ» (2 Тим. 3:1, 5). Удта си ӕргом финст ӕй, ӕрмӕстдӕр еунӕг дин ке цӕуй Хуцауи зӕрдӕмӕ. (Бакӕсӕ Ефесӕгтӕмӕ 4:4–6.)

17. Абони Йесой фӕдбӕл ка цӕуй ӕма еунӕг раст динбӕл хуӕст ка ӕй?

¹⁷ Мадта абони еунӕг ӕцӕг динбӕл хуӕст ка ӕй? Йесо Киристе куд ахур кодта, удта фиццаг ӕноси киристӕнттӕ Хуцауӕн куд лӕггадӕ кодтонцӕ, уотӕ ка лӕггадӕ кӕнуй? Мах аллихузи бӕлвурдгӕнӕнтӕмӕ ӕркастан, ӕма нӕмӕ аци фарстатӕбӕл ӕрмӕстдӕр еунӕг дзуапп ес – Йегови Ӕвдесӕнтӕ. Йегови адӕн ке ан, рӕстдзийнадӕ ке зонӕн, удта Хуцауи фӕндӕнттӕ ке зонӕн, е хъӕбӕр устур кадӕ ӕй. Гъӕйдӕ мадта идарддӕр дӕр рӕстдзийнадӕбӕл федар хуӕцӕн ӕма ибӕл макӕд гурусхӕ кӕнӕн!