42. ARTIKJEL FA DAUT STUDIUM
Sie die secha, daut du de Woarheit hast
“Unjasieekjt aules, un waut goot es hoolt faust” (1. TESS. 5:21)
LEET 142 Ons aun de Hopninj hoolen
WAUT WIE SEENEN WOAREN *
1. Wuarom komen väle oppem Twiewel?
DAUT jeft tieendusende Gloowes, waut sikj Christen nanen un sajen, daut see Gott rajcht deenen. Doawäajen komen väle oppem Twiewel. Dee denkjen soo: “Jeft daut mau eenen woaren Gloowen ooda haft Gott aun aule Gloowes eenen Jefaulen?” Sent wie aus Jehova siene Zeijen ons gaunz secha, daut wie aundre de Woarheit lieren un Jehova soo deenen, aus hee daut fa rajcht talt? Kaun eena sikj doa werkjlich secha äwa sennen, daut et mau eenen woaren Gloowen jeft? Well wie mol seenen.
2. Wuarom wia de Apostel Paulus sikj secha, daut hee de Woarheit haud? (1. Tessalonicha 1:5).
2 De Apostel Paulus wia sikj secha, daut hee de Woarheit haud (läs 1. Tessalonicha 1:5). Hee docht daut nich bloos, wiels hee daut jleicht, waut hee lieed. Paulus deed de Schreft flietich studieren un jleewd, daut dee “von Gott jejäft” wia (2. Tim. 3:16). Waut lieed hee doa biem studieren? Paulus funk kloaren Bewies en de Schreft, daut Jesus de vesproakna Messias wia. Oba de judische Gloowesleidasch jeewen om disen Bewies nuscht rom. Dee wieren Heichla, wiels dee säden, daut see aundre von Gott lieeden, oba to deeselwje Tiet soont deeden, waut Gott nich lieden kunn (Tit. 1:16). Paulus wia gaunz aundasch. Hee läsd sikj ut Gott sien Wuat nich bloos jewesset ut, waut hee dan jleewd. Hee lieed aundre “aules . . . waut Gott em Senn haud” un kjeem daut uk selfst no (Apj. 20:27).
3. Mott wie de Auntwuaten opp aul onse Froagen kjanen, om ons secha to sennen, daut wie de Woarheit haben? (See dän Kausten “ Jehova siene Woakjen un Jedanken sent väl mea, aus wie opprieejen kjennen”.)
3 Eenje denkjen, daut de woara Gloowen emstaunt sennen saul, jieda Froag to beauntwuaten, waut doa oppkjemt, soogoa soone Froagen, wua de Schreft goanich von rät. Es daut werkjlich soo? Woo wia daut bie Paulus? Hee säd to de Gloowesbreeda: “Unjasieekjt aules”, oba hee stunt uk too, daut daut väl jeef, waut hee nich vestunt (1. Tess. 5:21). Hee schreef: “Ons weeten es stekjawies . . . soo aus wan wie en eenen muzhajen Spieejel kjikjen un nich kloa seenen kjennen” (1. Kor. 13:9, 12). Paulus kunn nich aules vestonen un wie uk nich. Oba Paulus wist, waut Jehova sikj väajenomen haud. Hee wist jenuach, om sikj secha to sennen, daut hee de Woarheit haud.
4. Woo kjenn wie ons daut secha moaken, daut wie de Woarheit jefungen haben, un waut woa wie ons nu unjastonen?
4 Wie kjennen ons daut secha moaken, daut wie de Woarheit jefungen haben, wan wie daut, waut Jesus von de woare Aunbädunk lieed, met daut jäajenäwa hoolen, waut Jehova siene Zeijen vondoag dän Dach doonen. En disen Artikjel woa wie seenen, daut woare Christen (1) nuscht met Aufjettarie to doonen haben, (2) Jehova sienen Nomen ieren, (3) de Woarheit leewen un (4) groote Leew unjarenaunda haben.
WIE HABEN NUSCHT MET AUFJETTARIE TO DOONEN
5. Waut kjenn wie von Jesus doaräwa lieren, woo wie Gott aunbäden sellen, un woo kjenn wie daut nokomen?
5 Wiels Jesus Jehova sea leewd, deed hee bloos dän aunbäden, endoont aus em Himmel ooda oppe Ieed (Luk. 4:8). Hee lieed siene Jinja, dautselwje to doonen. Jesus un siene true Jinja brukten kjeenmol Bilda toom Gott aunbäden. Un wiels Jehova een Jeist es, wudd uk kjeen Mensch een Bilt moaken kjennen, waut soo harlich wia aus Jehova (Jes. 46:5). Oba wudd eena sellen Bilda moaken von soone, waut de Menschen fa heilich talen, un to dee bäden? Jehova säd en daut tweede von de Tieen Jebooten: “Jie sellen junt kjeenen Aufgott moaken un kjeene Form schmäden von irjentwaut, eendoont auf von daut waut em Himmel bowa junt, ooda waut von oppe Ieed . . . es. Kjneet junt nich ver dee” (2. Mo. 20:4-5). Daut sent sea dietelje Wieed fa aule, waut Gott jefaulen wellen.
6. Woo bäden Jehova siene Zeijen Gott aun?
6 De Jeschichtsforscha sajen, daut de Christen en de Aposteltiet bloos Gott aunbäden deeden. En daut Buak History of the Christian Church sajcht daut biejlikj, daut de ieeschtemmasche Christen daut “wudd sea jäajenaun jewast sennen” opp dee Städen, wua see Gott aunbäden, Aufjettabilda to haben. Jehova siene Zeijen doonen dise Christen no. Wie bäden nich to Bilda von Heilje ooda Enjel un nich mol to Jesus. Un wie veieren uk nich Laundestieekjens, soo aus de Flag. Wie sent ons eenich, emma Jesus siene Wieed notokomen: “Du saust Gott, dienen Harn, aunbäden” (Mat. 4:10).
7. En waut fa Stekjen sent Jehova siene Zeijen gaunz aundasch aus aule aundre Gloowes?
7 Vondoag dän Dach jleichen väle daut sea, no bekaunde Gloowesleidasch to horchen. Dee veieren dee soo sea, daut see dee schia aunbäden. Een deel Menschen gonen no dee äare Kjoakj, kjeepen äare Bieekja un jäwen väl Jelt, wan de Gloowesleidasch daut enkollakjten. Eenje jleewen aules, waut dee an sajen, un räakjnen dee soo väl, aus wan dee Jesus wieren. Oba Jehova siene woare Deena foljen nich Menschen no. Wie achten dee, waut äwa ons aunjestalt sent, oba wie denkjen soo aus Jesus. Hee säd: “Jie unjarenaunda sent Breeda” (Mat. 23:8-10). Wie doonen nich Menschen veieren, endoont aus daut Gloowesleidasch sent ooda Rejierungsmana. Un wie unjastetten nich daut, wua dee no sträwen. Enne Städ daut stal wie ons opp kjeenem siene Sied un sent nich Poat von dise Welt. En dise Stekjen sent wie gaunz aundasch aus aul de aundre Gloowes, waut sikj Christen nanen (Joh. 18:36).
WIE IEREN JEHOVA SIENEN NOMEN
Woare Christen jeit daut scheen, aundre von Jehova to vetalen (See Varsch 8-10) *
8. Woo weet wie, daut Jehova well, daut sien Nomen veharlicht un bekauntjemoakt woat?
8 Jesus bäd mol: “Voda, veharlich dienen Nomen!” Jehova horcht no dit Jebäd un säd met lude Stemm vom Himmel, daut hee sienen Nomen veharlichen wudd (Joh. 12:28). Derch sienen Deenst veharlicht Jesus sienen Voda sienen Nomen (Joh. 17:26). Un fa woare Christen es daut uk eene groote Iea, Gott sienen Nomen to brucken un dän bekaunttomoaken.
9. Woo beweesen de Christen en de Aposteltiet, daut see Gott sienen Nomen ieeden?
9 Boolt nodäm aus de Christenvesaumlunk oppjestalt wort, wia Jehova “doarom besorcht . . ., ut de Velkja een Volkj fa sienen Nomen to jewennen” (Apj. 15:14). De Christen en de Aposteltiet brukten wellich Gott sienen Nomen un muaken dän uk bekaunt, wan dee biejlikj prädijden un de Bibelbieekja schreewen. * Dee beweesen, daut see opp iernst een Volkj fa Gott sienen Nomen wieren (Apj. 2:14, 21).
10. Waut bewiest, daut Jehova siene Zeijen een Volkj fa sienen Nomen sent?
10 Sent Jehova siene Zeijen een Volkj fa Jehova sienen Nomen? Well wie mol seenen. Vondoag dän Dach haben väl Gloowesleidasch aules jedonen, waut see kunnen, om Gott sienen Nomen plietsch to hoolen. Dee haben dän ut äare Bibeläwasatungen rutjelascht un eenjemol nich Frieheit jejäft, daut Gott sien Nomen en de Kjoakj jebrukt woaren kunn. * Kaun doa irjentwäa jäajen strieden, daut Jehova siene Zeijen de eensje sent, waut Jehova sienen Nomen dän Respakjt un de Iea jäwen, waut dee vedeent? Kjeen aundra Gloowen moakt Gott sienen Nomen soo sea bekaunt aus wie! Wie doonen werkjlich ons bastet, om daut notokomen, waut ons Nomen sajcht. Wie sent Jehova siene Zeijen (Jes. 43:10-12, NW). Un en de Neue-Welt-Übersetzung der Heiligen Schrift es Jehova sien Nomen opp aul dee Städen bennen, wua de aundre Bibeläwasata dän rutjeloten haben, un wie haben aul äwa 240 Millionen von dise Biblen jemoakt. Wie moaken uk opp äwa 1 000 Sproaken biblische Bieekja, waut Jehova sienen Nomen bekauntmoaken.
WIE LEEWEN DE WOARHEIT
11. Woo wia daut bie de ieeschtemmasche Christen to seenen, daut dee de Woarheit leewden?
11 Jesus leewd de Woarheit äwa Gott un äwa daut, waut dee sikj väajenomen haud. Aun sien Läwen wia to seenen, daut hee dise Woarheit kjand, un hee muak dee uk mank aundre bekaunt (Joh. 18:37). Jesus siene woare Nofolja leewen de Woarheit uk sea (Joh. 4:23-24). De Apostel Petrus säd mau rajcht, daut de Christengloowen “de Woarheitswajch” wia (2. Pet. 2:2). Wiels de Christen en de Aposteltiet de Woarheit sea leewden, wullen dee nuscht met Glooweslieren, Jewanheiten un Iedeeen to doonen haben, waut nich met dise Woarheit stemden (Kol. 2:8). Un wiels woare Christen vondoag dän Dach “no de Woarheit . . . läwen” wellen, stetten dee aul äare Glooweslieren un uk äa gaunzet Läwen opp Jehova sien Wuat (3. Joh. 3-4).
12. Waut deit de Väastaunt, wan dee enwoaren, daut doa waut fält to endren, un wuarom?
12 Gott siene Deena en de vondoagsche Tiet sajen nich, daut see nu aul rein aules von de Schreft volkomen vestonen kjennen. Eenjemol haben dee Fäla jemoakt, wan dee eene Glooweslia utjelajcht ooda jewesset en de Organisazion jedonen haben. Daut saul ons nich wundren. De Schreft wiest je, daut wie Gott met de Tiet emma bäta kjanen lieren (Kol. 1:9-10). Jehova moakt de Woarheit soo bie sacht openboa un wie motten reed sennen jeduldich to wachten, bat daut Licht von de Woarheit emma dacha woat (Spr. 4:18). Wan de Väastaunt daut enwoat, daut wie nu waut aundasch vestonen ooda aundasch doonen sellen, dan endren dee daut fuaz. Daut jeft väl Gloowes, waut äare Lieren endren, om äare Menschen to jefaulen ooda om bie de Welt goot aunjeseenen to sennen. Oba Jehova siene Zeijen moaken Endrungen, om Gott noda to komen un dän soo auntobäden, aus Jesus daut deed (Jak. 4:4). Wan wie waut endren, dan es daut, wiels wie de Schreft nu bäta vestonen kjennen, un nich, wiels de Menschen en de Welt nu aundasch äwa eene jewesse Sach denkjen. Wie leewen de Woarheit! (1. Tess. 2:3-4).
WIE HABEN GROOTE LEEW UNJARENAUNDA
13. Woont es de wichtichste Ieejenschoft von de woare Christen, un woo es dee bie Jehova siene Zeijen to seenen?
13 De Christen en de Aposteltiet hauden väl goode Ieejenschoften, oba de wichtichste wia de Leew. Jesus säd: “Wan jie Leew unjarenaunda haben, woat aulemaun seenen, daut jie miene Jinja sent” (Joh. 13:34-35). Vondoag dän Dach haben Jehova siene Zeijen oppe gaunze Welt Leew un Eenichkjeit unjarenaunda. Wie sent aundasch aus aule aundre Gloowes, wiels wie soo aus eene Famielje sent, wan wie uk von veschiedne Lenda un Raussen komen un veschieden oppjewossen sent. Dise Leew es bie onse Toopkomes un Kongressen to seenen. Wan wie daut beläwen, dan sent wie ons noch sechra, daut wie Jehova rajcht deenen.
14. Woo kjenn wie bewiesen, daut wie woare Leew unjarenaunda haben, soo aus Kolossa 3:12-14 sajcht?
14 De Schreft sajcht: “Seet doano daut nuscht june Leew, eena toom aundren, stieren kaun” (1. Pet. 4:8). Wie wiesen aundre biejlikj Leew, wan wie ons unjarenaunda vejäwen un vedroagen. Wie bemieejen ons uk, met aule von de Vesaumlunk friejäwrich un oppnäment to sennen, soogoa met dee, waut ons mol beleidicht haben (läs Kolossa 3:12-14). Dise Leew bewiest, daut wie woare Christen sent.
EEN GLOOWEN
15. Waut jeft daut noch, wua wie krakjt soo sent aus de Christen en de Aposteltiet?
15 Wie sent uk noch en aundre Stekjen krakjt soo aus de Christen en de Aposteltiet. Biejlikj es daut en onse Vesaumlungen krakjt soo enjerecht aus bie dee. Wie haben reisende Oppsechta un “Jemeentenleida”, ooda Eltestasch, un “Diakonen”, ooda Deenstaumthelpa, soo aus dee daut uk hauden (Filip. 1:1; Tit. 1:5). Un krakjt soo aus dee hool wie ons aun Jehova siene Jesazen äwa daut Jeschlajchtsläwen, dän Ehestaunt un daut Bloot un wie beschitzen de Vesaumlunk fa soone, waut sikj nich aun Gott siene Jebooten hoolen wellen (Apj. 15:28-29; 1. Kor. 5:11-13; 6:9-10; Heb. 13:4).
16. Waut lia wie von Efeesa 4:4-6?
16 Jesus säd, daut väle sajen wudden, daut see siene Nofolja wieren, oba daut en Werkjlichkjeit goanich sennen wudden (Mat. 7:21-23). De Schreft säd uk, daut en de latste Tiet väle bloos väajäwen wudden “gottesferchtich to sennen” (2. Tim. 3:1, 5). Un de Schreft wiest gaunz dietlich, daut daut “eenen Gloowen” jeft, wua Gott eenen Jefaulen aun haft (läs Efeesa 4:4-6).
17. Wäa sent vondoag dän Dach Jesus siene Nofolja, waut dän woaren Gloowen haben?
17 Nu hab wie jeseenen, waut Jesus von de woare Aunbädunk lieed un waut de Christen en de Aposteltiet deeden. Wäa sent dan vondoag dän Dach dee, waut dän woaren Gloowen haben? Wie haben ons unjastonen, daut Jehova siene Zeijen daut sent. Es daut nich eene groote Iea, daut wie to Jehova sien Volkj jehieren kjennen un de Woarheit äwa am un äwa sien Väanämen weeten? Well wie aules doonen, waut wie kjennen, om ons secha to sennen, daut wie de Woarheit jefungen haben, un uk doabie bliewen.
LEET 3 Ons Gott jeft ons Hopninj un Krauft
^ Varsch 5 En disen Artikjel woa wie seenen, waut Jesus von de woare Aunbädunk lieed un woo siene Jinja daut nokjeemen. Wie woaren ons uk unjastonen, woo Jehova siene Zeijen daut vondoag dän Dach krakjt soo doonen.
^ Varsch 9 See dän Kausten “Gebrauchten die ersten Christen den Gottesnamen?” em Wachtturm vom 1. Juli 2010, S. 6.
^ Varsch 10 Aune 2008 säd biejlikj de Popst Benedikt XVI. daut Gott sien Nomen en de katoolsche Kjoakj “nich jebrukt ooda jesajcht sull”, uk nich en Leeda ooda Jebäda.
^ Varsch 63 BILTBESCHRIEWUNK: Jehova siene Organisazion haft de Neue-Welt-Übersetzung opp äwa 200 Sproaken rutjejäft, daut de Menschen opp äare Sproak eene Bibel läsen kjennen, wua Gott sien Nomen bennen es.
