1. Dahme kahrehda aramas tohto pingidahr?

MIE pelien lamalam tohto rahnwet me kin nda me dene irail Kristian kei oh me re kin kaudokiong Koht ni ahl me e ketin kupwurki. Ihme kahrehda aramas tohto pingidahr! Irail kin idek, “Mie kaudok mehlel ehute, de Koht kin ketin kupwurki pelien kaudok koaros?” Ia duwe, kitail uhdahn kamehlele me kitail Sounkadehdehn Siohwa kan kin padahngki me mehlel oh ahl me kitail kin kaudokiong Siohwa ieite ahl me e kin ketin kupwurki? Kitail kak uhdahn kamehlele met? Kitail pahn koasoiapene mehn kadehde kan.

2. Nin duwen me 1 Deselonika 1:5 mahsanih, dahme kahrehda wahnpoaron Pohl uhdahn kamehlele me e ahneki padahk mehlelo?

² Wahnpoaron Pohl uhdahn kamehlele me e ahneki padahk mehlelo. (Wadek 1 Deselonika 1:5.) E sohte kamehlele met ihte pwehki met kin kaperenda ih. Ahpw Pohl kin onopki kanahieng Mahsen en Koht. E kamehlele me “Nting Sarawi unsek ntingdier sang ni kaweid en Koht.” (2 Tim. 3:16) Dahme e sukuhlki? Nan Nting Sarawi kan, Pohl diarada mehn kadehde kan me Sises iei Mesaia me inoupe mie​—ire ehu me kaunen pelien lamalam kan en mehn Suhs pilada en soikala. Irail nda me re kin padahkihong aramas akan me mehlelo duwen Koht ahpw re kin wia soahng kan me Koht ketin kalahdeki. (Taitus 1:16) Weksang irail, Pohl sohte kin pilada dahme e men kamehlele sang Mahsen en Koht oh dahme e sohte men kamehlele. E kin nantihong en padahngki oh doadoahngki “sapwellimen Koht kaweid koaros.”​—Wiewia 20:27.

3. Kitail anahne pasapengpen atail peidek kan koaros pwehn uhdahn kamehlele me kitail ahneki padahk mehlel? (Pil kilang koakono “ Sapwellimen Siohwa Doadoahk oh Madamadau​—‘Tohtohsang me Kitail Kak Kasalehda.’”

³ Ekei aramas kin medewe me kaudok mehlel anahne sapengala peidek koaros, pil peidek kan me Paipel sohte uhdahn sapengala. Ia duwe, madamadau wet toupahrek? Medewehla  mehn kahlemeng en Pohl. E kangoange ienge Kristian kan en “kasawih pwungen mehkoaros,” ahpw e pil nda me mie soahng tohto me e sohte wehwehki. (1 Des. 5:21) E ntingihedi: “Atail loalokong sohte unsek.” E pil kapatahiong: “Kitail kin kilang ni soh sansal rasehng atail ireirong nan mehn irongen mete ehu.” (1 Kor. 13:9, 12) Pohl sohte wehwehki soahng koaros, pil duwehte kitail. Ahpw Pohl wehwehki padahk mehlel mengei kan duwen Siohwa. Dahme e ese itar ong ih en uhdahn kamehlele me e ahneki padahk mehlel!

4. Ia duwen atail kak kakehlakahla atail kamehlele me kitail diaradahr padahk mehlel, oh dahme kitail pahn koasoiapene duwen Kristian mehlel kan?

⁴ Ehu ahl me kitail kak kakehlakahla atail kamehlele me kitail diaradahr padahk mehlel iei sang ni atail kapahrekihpene mehn kahlemeng en kaudok me Sises ketikihda ong dahme Sounkadehdehn Siohwa kan kin wiewia rahnwet. Nan iren onop wet, kitail pahn kilang me Kristian mehlel kan kin (1) soikala pwongih dikedik kan, (2) wauneki mwaren Siohwa, (3) poakohng me mehlelo, oh (4) uhdahn limpoakpene nanpwungarail.

5. Dahme kitail sukuhlkihsang Sises me pid ahl pwung en kaudokiong Koht, oh ia duwen atail kak kapwaiada dahme e ketin padahngki?

⁵ Pwehki Sises uhdahn poakohng Siohwa, e kin kaudokiongete Siohwa kelehpw, ni ahnsou me e patopato nanleng oh pil ni eh patopato sampah. (Luk 4:8) E ketin padahkihong sapwellime tohnpadahk ko ren wia duwehte. Sises oh sapwellime tohnpadahk lelepek ko sohte mwahn kin doadoahngki dikedik kan nan kaudok. Pwehki Koht Ngehn emen, sohte emen kak wiahda mehkot me rasehng ih. (Ais. 46:5) Ahpw ia duwen sansal en aramas akan me ekei wiahda oh medewe me sarawi oh kin kapakapohng? Nan keriaun kosonned  en Kosonned Eiseko, Siohwa ketin mahsanih: “Kumwail sohte pahn wiahiong kumwail dikedik en eni de sansal en mehkot me mi pahnlahng, de nin sampah . . . Kumwail sohte pahn poaridiong dikedik en eni men de pwongih.” (Eks. 20:4, 5) Mahsen pwukat uhdahn sansal ong irail kan me kin men kaperenda Koht.

6. Mehn kahlemeng en kaudok dahieu me Sounkadehdehn Siohwa kan kin idawehn rahnwet?

⁶ Aramas akan me kin onopki poadopoad nda me ni mwehin wahnpoaron ko, Kristian kan kin kaudokiongete Koht kelehpw. Karasepe, ehu pwuhken poadopoad (History of the Christian Church) koasoia me tepin Kristian kan “pahn uhdahn kailongki” madamadau en doadoahngki dikedik kan nan wasahn kaudok kan. Rahnwet, Sounkadehdehn Siohwa kan kin idawehn mehn kahlemeng wet me tepin Kristian kan wiahda. Kitail sohte kin kapakap ong dikedik de sansal en “aramas sarawi kan” de tohnleng kan; kitail pil sohte kin kapakap ong Sises. Oh kitail sohte kin kasarawih pilaik kan de wia mehkot me pahn mwomwen me kitail kin pwongih atail wehi. Sohte lipilipil dahme aramas pahn kasongehki kitail en wia, kitail kin koasoanehdi teng en peikiong mahsen en Sises ko: “Siohwa omw Koht me ke anahne kaudokiong.”​—Mad. 4:10.

7. Ni ahl dah kan me Sounkadehdehn Siohwa kan uhdahn weksang pelien lamalam teikan?

⁷ Rahnwet, aramas tohto kin perenki rong sounpadahk en pelien lamalam ndand kan. Uwen arail pwungki sounpadahk pwukat, e kin mwomwen me irail kereniong pwongih irail. Aramas tohto kin kohla iang arail sarawio, pwainda neirail pwuhk kan, oh kihong irail mwohni laud de ong pwihn kan me re kin utung. Ekei kin uhdahn kamehlele soahng koaros me sounpadahk pwukat kin nda. Uwen arail pwungkin irail, e kin mwomwen me irail kilikilang Sises. Ahpw, irail kan me kin kaudokiong Koht ni ahl pwung sohte kin idawehn aramas. Mendahki kitail kin wauneki irail kan me kin tiengla mwohtail, kitail kin idawehn sapwellimen Sises kehkehliko: “Kumwail koaros pirien ehu.” (Mad. 23:8-10) Kitail sohte kin pwongih aramas, sohte lipilipil ma irail kaunen pelien lamalam kei de lapalap en koperment kei. Oh kitail sohte kin utung soahng kan me irail kin akadeiong. Ahpw kitail kin kolokol atail soupoupali oh tohrohrasang sampah wet. Nan soangen irair pwukat, kitail uhdahn weksang pwihn teikan me kose me irail Kristian kei.​—Sohn 18:36.

8. Ia duwen atail ese me Siohwa ketin kupwurki kitail en kalinganahla mwareo oh padahkihong aramas koaros?

⁸ Ehu ahnsou, Sises ketin loulou oh mahsanih: “Semei, komw ketin kalinganahda mwaromwi.” Pein Siohwa ketin sapengala kapakap wet ni ngihl laud sang nanleng oh ketin inoukihda me e pahn ketin kalinganahla mwareo. (Sohn 12:28) Erein sapwellime doadoahk en kalohk, Sises ketin kalinganahla mwaren Semeo. (Sohn 17:26) Eri Kristian mehlel kan pehm me e wia pai kaselel ehu en doadoahngki mwaren Koht oh padahkihong meteikan.

9. Ia duwen tepin Kristian ko ar kadehdehda me irail kin wauneki mwaren Koht?

⁹ Ni mwehin tepin Kristian ko, mwurin mwomwohdiso en Kristian wiawihda, Siohwa ketin “sohpeiong mehn liki kan pwe en ketikihsang nanpwungarail aramas ekei ong mware.” (Wiewia 15:14) Kristian pwukat kin pohlki arail doadoahngki mwaren Koht oh padahkihong meteikan. Wahnpoaron oh tohnpadahk ko kin doadoahngki mwaren Koht ni arail kin kalohk oh pil ni arail ntingihedi pwuhken Paipel kan. * Ni ahl wet, irail kadehdehda me irail kelehpw  me kin padahkihong meteikan duwen mwaren Koht.​—Wiewia 2:14, 21.

10. Ia duwen atail ese me Sounkadehdehn Siohwa kan kelehpw me kin kadehdehda duwen mwaren Siohwa?

¹⁰ Ia duwe, Sounkadehdehn Siohwa kan wia aramas ekei ong mwaren Siohwa? Tehk mehn kadehde pwukat. Rahnwet, kaunen pelien lamalam tohto kin wia uwen arail kak koaros en ekihla ire mehlelo me mie mwaren Koht. Irail kihsang mwar wet nan neirail kawehwehn Paipel kan, oh ekei irail keinepwihsang tohn arail mwomwohdiso en doadoahngki mwar wet nan arail kaudok. * E sansal me Sounkadehdehn Siohwa kan kelehpw me kin kasalehda arail wauneki mwaren Koht ni ahl me konehng. Kitail kin kadehdehda duwen mwaren Koht laudsang pelien lamalam teikan koaros! Kitail kin wia uwen atail kak koaros en kadehdehda me kitail warohng adaneki Sounkadehdehn Siohwa kan. (Ais. 43:10-12) Kitail wiadahr Paipelo New World Translation of the Holy Scriptures daulih meh riesapw pahdep, me kasalehda mwaren Siohwa ni wasa kan me kawehwehn Paipel teikan kihsang. Kitail pil wiahda sawasepen Paipel kan ni lokaia daulih 1,000 me kin doadoahngki mwaren Siohwa.

11. Ia duwen tepin Kristian ko ar kasalehda arail poakohng me mehlelo?

¹¹ Sises ketin poakohng me mehlelo, me iei dahme mehlel duwen Koht oh soahng koaros me E pahn ketin wia. Sises ketin mour  pahrekiong me mehlelo, oh e ketin padahkihong meteikan duwen me mehlelo. (Sohn 18:37) Sapwellimen Sises tohnpadahk kan pil kin uhdahn poakohng me mehlelo. (Sohn 4:23, 24) Ni mehlel, wahnpoaron Piter kahdaneki pelien lamalam en Kristian “elen me mehlelo.” (2 Pit. 2:2) Pwehki arail uhdahn poakohng padahk mehlel, tepin Kristian ko soikala padahk en pelien lamalam teikan, tiahk kan en aramas, oh madamadau kan me kin uhwong padahk mehlelo. (Kol. 2:8) Pil Kristian mehlel kan rahnwet kin nantihong en “pousehlahte weweid ni me mehlelo” sang ni arail kin idawehn kanahieng mahsen en Siohwa nan arail padahk kan oh pil nan arail mour.​—3 Sohn 3, 4.

12. Dahme kin wiawi ni irail kan me kin tiengla mwohtail ar esehda me mwomwen atail wehwehki padahk de koasoandi kan anahne wekidekla, oh dahme kahrehda irail kin wiahda wekidekla pwukat?

¹² Sounkadehdehn Siohwa kan rahnwet sohte kin nda me irail kin ahnsou koaros wehwehki dahme mi nan Paipel. Mie ahnsou me irail kin wiahda sapwung kan ni mwomwen arail kawehwehda padahk en Paipel ehu de pil arail wiahda koasoandi kan ong mwomwohdiso. Met sohte kapwuriamwei ong kitail. Paipel kasalehda me sapwellimen Koht aramas akan pahn ekisekis wehwehkihla padahk mehlel. (Kol. 1:9, 10) Siohwa kin ekisekis ketin kasalehda padahk mehlel, oh kitail en men awih ni kanengamah lao kitail kak wehwehkihla mwahu. (Lep. Pad. 4:18) Ni Pwihn me Kin Apwalih Mwomwohdiso nan Sampah Pwon ar esehda me mie anahnepen en wekidala mwomwen atail wehwehki padahk ehu de wia mehkot, irail kin mwadang wiahda wekideklao. Pelien lamalam tohto rahnwet kin wekidala arail padahk kan pwehki re men kaperenda tohn arail mwomwohdisou de re men ndandla nan sampah. Ahpw Sounkadehdehn Siohwa kan kin wiahda wekidekla kan pwehki irail men karanihala Koht oh kaudokiong ih ni ahlohte me Sises kin ketin wia. (Seims 4:4) Ni atail kin wiahda wekidekla kan, met kaidehn pwehki madamadau en aramas akan nin sampah wekila, ahpw pwehki atail wehwehki Paipel kin mwahula. Kitail uhdahn kin poakohng padahk mehlel!​—1 Des. 2:3, 4.

13. Mehnia irair keieu kesempwal me Kristian mehlel kan kin kasalehda, oh ia duwen Sounkadehdehn Siohwa kan ar kasalehda met rahnwet?

¹³ Aramas akan kin esehki tepin Kristian ko arail irair mwahu tohto, ahpw irair me keieu sansal rehrail iei limpoak. Sises mahsanih: “Pwe koaros pahn esehki me kumwail nei tohnpadahk kan​—ma kumwail kin limpoakpene nanpwungamwail.” (Sohn 13:34, 35) Rahnwet, Sounkadehdehn Siohwa kan nan sampah pwon kin ahneki limpoak mehlel oh minimin. Kitail weksang pelien lamalam teikan koaros pwehki kitail duwehte peneinei ehu mendahki wasa kan me kitail kohsang ie oh tiahk kan me kitail ahneki wekpeseng. Kitail kin kilang kadehdepen met ni atail mihting kan, oh mihting tohrohr laud oh tikitik kan. Met sewese kalaudehla atail kamehlele me kitail kin kaudokiong Siohwa ni ahl me e ketin kupwurki.

14. Nin duwen me Kolose 3:12-14 mahsanih, ia ehu ahl kesempwal me kitail kak en uhdahn limpoakpene?

¹⁴ Paipel kin kangoangehkin kitail “en uhdahn limpoakpene.” (1 Pit. 4:8) Ehu ahl me kitail en kasalehda soangen limpoak wet iei sang ni atail mahkpene nanpwungatail oh kanengamahiong soh unsek en meteikan. Kitail pil kin nantihong en kasalehda kadek oh sapan ong koaros nan mwomwohdiso, pil irail kan me ele kansensuwedihkitailla. (Wadek Kolose 3:12-14.) Ni atail kin kasalehda soangen  limpoak wet, kitail kin kadehdehda me kitail Kristian mehlel kei.

15. Ni ahl dah teikan me kitail kin idawehn mehn kahlemeng en kaudok me tepin Kristian kan wiahda?

¹⁵ Kitail pil kin idawehn mehn kahlemeng en kaudok me tepin Kristian kan wiahda ni ahl teikan. Karasepe, atail koasoandi kan kin duwehte ahn tepin Kristian ko ar koasoandi. Duwehte irail, e kin mie atail sounapwalih kan me kin seiloak, elder kan, oh sounsawas kan. (Pil. 1:1; Taitus 1:5) Oh duwehte irail, kitail kin wauneki sapwellimen Siohwa kosonned kan me pid pwopwoud oh wia nsenen pwopwoud, dahme Koht ketin mahsanih ong ia duwen atail pahn doadoahngki nta, oh kitail kin pere mwomwohdiso sang irail kan me sohte men idawehn sapwellimen Koht kosonned kan.​—Wiewia 15:28, 29; 1 Kor. 5:11-13; 6:9, 10; Ipru 13:4.

16. Dahme kitail sukuhlkihsang Episos 4:4-6?

¹⁶ Sises mahsanih me me tohto pahn nda me dene irail Kristian kei, ahpw kaidehn koaros pahn kin mehlel. (Mad. 7:21-23) Paipel pil mahsanih me ni imwin rahn akan, me tohto pahn kin ‘mwomwehdahte aramas me kin poadidiong Koht.’ (2 Tim. 3:1, 5) Ahpw Paipel mahsanihong kitail ni sansal me “pwosonteieu mie” me Koht kin ketin kupwurki.​—Wadek Episos 4:4-6.

17. Ihs me kin idawehn Sises oh kin wiewia kaudok mehlel rahnwet?

¹⁷ Ihs me kin wiewia kaudok mehlel rahnwet? Kitail koasoiapeneier mehn kadehde kan. Kitail tehkpeneier mehn kahlemeng en kaudok me Sises ketin padahngki oh me tepin Kristian kan kin idawehn. Pasapeng tehieu mie​—Sounkadehdehn Siohwa kan. E wia pai uhdahn kaselel ehu en wia emen sapwellimen Siohwa aramas oh en ese padahk mehlel duwen Siohwa oh kupwure kan! Eri kitail men wia uwen atail kak en kolokol teng me mehlelo oh uhdahn kamehlele.