1. Eaa te manganui i manako ekoko ei?

E TAUATINI ua atu au akonoanga Kerititiano tei karanga e te akamori nei ratou i te Atua na te mataara tana e mareka ra. No reira rai te manganui i ekoko ei! Penei ka ui ratou, “E okotai ua ainei akonoanga mou, me te akamareka ra te au akonoanga pouroa i te Atua?” Kua papu ainei tatou e ko te Au Kite o Iehova te apii ra i te tuatua mou e te akamori ra ia Iehova na te mataara tana e mareka ra? Ka rauka ainei i te irinaki papu i teia? Ka akara ana tatou.

2. Ia 1 Tesalonia 1:5, eaa ra te apotetoro ko Paulo i irinaki papu ei i te tuatua mou?

² Irinaki pu tikai te apotetoro ko Paulo i te tuatua mou. (E tatau ia 1 Tesalonia 1:5.) Kare tona irinaki i akatumuia ki runga i tona mataora no te kite anga i te tuatua mou. Mari ra, kua apii meitaki a Paulo i te Tuatua a te Atua. Irinaki aia e ko “te au tuatua tapu katoa i tataia ra, e mea akauruia mai e te Atua.” (2 Timo. 3:16) Eaa tana i mou mai? Kua apii a Paulo mei roto i te au Tuatua Tapu i te au akapapuanga taka meitaki e ko Iesu te Mesia taputouia. E au akapapuanga teia ta te au arataki akonoanga ngati Iuda i kopae. Karanga ratou e na ratou e apii i te tuatua mou i roto i te Tuatua a te Atua, inara kua rave ratou i te au angaanga Tana i rikarika. (Tito 1:16) Kare a Paulo mei ia ratou, kare aia i iki e ko teea tana ka irinaki i roto i te Tuatua a te Atua, e ko teea tana ka kopae ke atu. Kua papa ua aia i te apii e te akono “i te anoano katoa o te Atua.”​—Anga. 20:27.

3. Ka anoanoia ainei tatou kia kite i te pauanga ki te au uianga pouroa e papu ei tei ia tatou te tuatua mou? (Akara katoa i te pia “ Ta Iehova au Angaanga e Tona au Manako​—‘Kare ra e Tika Kia Tatau Atu i te Maata.’”)

 ³ Manako tetai pae e ka pau te akonoanga mou i te au uianga pouroa, kapiti mai te au uianga kare i pauia i roto i te Pipiria. E tau ainei teia irinakianga? Akamanako i te akaraanga o Paulo. Kua akamaroiroi aia i te au taeake irinaki “e akara matariki marie i te au mea katoa.” Inara karanga katoa aia e maata te au mea kare aia i mārama ana. (1 Tesa. 5:21) Tata aia: “Te kite papaki tai ua nei tatou.” Karanga katoa aia: “Te kite makiri ua nei tatou, mei te mea e i na roto i te io.” (1 Kori. 13:9, 12) Kare a Paulo i mārama ana i te au mea pouroa e kare katoa tatou. Noatu ra, kua mārama a Paulo i te au tuatua mou puapinga no runga ia Iehova. Kua rava ua tona kite ei akapapu kiaia e ko te tuatua mou teia!

4. Akapeea tatou me akamatutu i to tatou irinaki papu e tei ia tatou te tuatua mou, e eaa ta tatou ka uriuri no runga i te au Kerititiano mou?

⁴ Tetai mataara ei akamatutu i to tatou irinaki papu e tei ia tatou te tuatua mou, na te akaaite anga i te akaraanga no te akamorianga tei akanooia e Iesu ki ta te Au Kite o Iehova e rave nei i teia tuatau. I teia atikara, ka uriuri tatou i ta te au Kerititiano mou tikai ka rave, koia oki ka (1) patoi i te akamori itoro, (2) akangateitei i to Iehova ingoa, (3) akaperepere i te tuatua mou, e te (4) aroa maata tikai i tetai e tetai.

5. Eaa ta tatou i apii mai mei ia Iesu no te mataara tau kia akamori i te Atua, e akapeea tatou me aru i tana i apii mai?

⁵ No to Iesu aroa maata i te Atua, kua akamori aia ia Iehova anake iaia i te rangi e i te enua nei. (Luka 4:8) Apii aia i tana au pipi kia akapera katoa. Kare a Iesu e tana au pipi akarongo i taangaanga ana i te tiki e te itoro no te  akamorianga. I te mea e vaerua te Atua, kare e rauka i te tangata i te maani i tetai ua atu apinga ei akatutu i te kakā o Iehova! (Isa. 46:5) Akapeea ra te maani tutu no te tangata tapu e te pure kia ratou? Akakite a Iehova i roto i te rua o te ture o te Ture Ngauru: “Auraka rava koe e rapa i te idolo akatikitikiia noou, e te tu no tetai mea i runga i te rangi ra, e no tetai mea i raro i te enua nei . . . Auraka rava koe e tupou ki raro ia ratou.” (Exo. 20:4, 5) Taka meitaki ua teia irava ki te aronga tei inangaro i te Atua.

6. Eaa te akaraanga no te akamorianga ta te Au Kite o Iehova e aru nei i teia tuatau?

⁶ Akakite mai te aronga apii tuatua enua e i te tuatau o te au apotetoro, kua akamori te au Kerititiano i te Atua anake ua. Ei akaraanga, akakite tetai puka tuatua enua e ka “rikarika” te au Kerititiano mua i te manako kia taangaangaia te au tiki no te akamorianga. I teia tuatau, te aru nei te Au Kite o Iehova i te akaraanga tei akanooia e te au Kerititiano i te anere mataiti mua. Kare tatou e pure ki te au tiki no te tangata tapu me kore te au angera; kare katoa tatou e pure kia Iesu. Kare tatou e akaepaepa i te reva me kore e rave i tetai ua atu angaanga no te akamori i to tatou enua. Noatu eaa te ka tupu, ka tauta tatou i te akarongo ki ta Iesu i tuatua: “Ko toou Atua ra ko Iehova taau e akamori, e koia anake rai taau e akarongo.”​—Mata. 4:10.

7. Eaa te tuke maata i rotopu i te Au Kite o Iehova e te au akonoanga ke?

⁷ Teia tuatau e manganui tei aru i te au orometua rongonui e tei akaepaepa ia ratou. Maata te tangata tei aere ki ta ratou pure, oko i ta ratou puka, oronga maata i te moni ei turu i to ratou au akakoroanga e te irinaki ua i te tuatua a teia au orometua. Ka akapaapaa tetai aronga aere pure i to ratou au orometua mei te mea e ko Iesu ratou! Kareka ra te aronga akamori mou ia Iehova, kare ratou e aru patete ua i te tangata. Noatu ka akangateitei ratou i te aronga arataki, ka akono ratou i ta Iesu apiianga: “E taeake anake oki kotou katoa na.” (Mata. 23:8-10) Kare tatou e akamori i te tangata, kapiti mai te au arataki akonoanga e te au tutara poritiki. Kare katoa tatou e turu i to ratou au akakoroanga. Mari ra, ka vai takake ua tatou e ka akaatea mai mei teianei ao. Na roto i teia au mataara, e tuke takiri tatou mei te au akonoanga tei karanga e e au Kerititiano ratou.​—Ioa. 18:36.

8. Akapeea tatou i kite ei ka inangaro a Iehova kia akakakāia tona ingoa e kia akakiteia ki te tangata?

⁸ Kua pure a Iesu i tetai atianga: “E taku Metua, e akakakā i toou ingoa.” Pau mai a Iehova i tana pure ma te reo maata i runga i te rangi i te na ko anga e ka akakakā Aia i tona ingoa. (Ioa. 12:28) I roto i tana angaanga evangeria, kua akakakā a Iesu i te ingoa o tona Metua. (Ioa. 17:26) No reira, e mea tau kia irinaki e e tikaanga ngateitei ta te au Kerititiano mou kia taangaanga i te ingoa o te Atua e te akakite i te reira ki te tangata.

9. Akapeea te au Kerititiano mua te akaari anga e kua akangateitei ratou i te ingoa o te Atua?

⁹ I te anere mataiti mua, i muri ua ake i te akamata anga o te putuputuanga Kerititiano, “kua akara aroa mai te Atua i te etene i muatangana, e rave i tetai papaki tangata i roto ia ratou ra no tona ingoa.” (Anga. 15:14) Mareka rava te au Kerititiano mua i te taangaanga i te ingoa o te Atua. Kua taangaanga katoa te au apotetoro e te au pipi i te ingoa o te Atua i roto i ta ratou angaanga tutu aere e i roto i te au puka Pipiria ta ratou i tata. Akaari ratou e ko ratou anake te iti tangata o te Atua tei akakite aere i tona ingoa.​—Anga. 2:14, 21.

10. Eaa te akapapuanga e ko te Au Kite o Iehova te iti tangata no te ingoa o Iehova?

 ¹⁰ Ko te Au Kite o Iehova ainei te iti tangata no to Iehova ingoa? Akamanako ana i teia. E maata te au arataki akonoanga i teia tuatau tei tauta pakari i te uuna i te ingoa o te Atua. Akaatea ratou i te reira mei roto mai i ta ratou Pipiria e i tetai taime, kare ratou e akatika kia tuatuaia te ingoa o te Atua i roto i te are pure. * Te taka meitaki ua ra e ko te Au Kite o Iehova anake te pupu akonoanga tei akangateitei i te ingoa o Iehova. Ko tatou te akonoanga tei akakitekite maata i te ingoa o te Atua! Ka tauta pakari katoa tatou i te apai meitaki i to tatou ingoa​—te Au Kite o Iehova. (Isa. 43:10-12) Kua nenei tatou e tere atu i te 240 mirioni kopi o te New World Translation of the Holy Scriptures. Kua akaoki te reira i te ingoa o Iehova i te au ngai pouroa kua akaateaia te reira i roto i te au Pipiria ke. E kua nenei tatou i te au puka Pipiria tei taangaanga i te ingoa o te Atua i roto i te 1,000 tuma reo!

11. Akapeea te au Kerititiano mua te akaari anga e kua akaperepere ratou i te tuatua mou?

¹¹ Akaperepere a Iesu i te tuatua mou no runga i te Atua e Tona akakoroanga. Akarotai a Iesu i tona oraanga ki te tuatua mou e kua akakite aere i te reira ki te tangata. (Ioa. 18:37) Akaperepere maata katoa te au pipi mou a Iesu i te tuatua mou. (Ioa. 4:23, 24)  Kapiki te apotetoro ko Petero i te akonoanga Kerititiano e ko “te arataa tuatua-mou.” (2 Pete. 2:2) No to ratou akaperepere maata i te tuatua mou, kua patoi te au Kerititiano mua i te au irinakianga akonoanga, peu tupuna e te au manako tangata kare i rotai ana ki te tuatua mou. (Kolo. 2:8) Pera katoa i teia tuatau, ka tauta te au Kerititiano mou i te “akono i te tuatua-mou” na te akatumu i ta ratou irinakianga e te oraanga ki runga i te Tuatua a Iehova.​—3 Ioa. 3, 4.

12. Eaa ta te Pupu Akaaere ka rave me kite mai ratou e ka anoanoia kia taui to tatou mārama anga i te tuatua mou, e eaa te tumu i pera ai ratou?

¹² Kare te Au Kite o Iehova e karanga ana e kua mārama pu tikai ratou i te au mea pouroa i roto i te Pipiria. Tetai taime, kua tarevake ana ta ratou akamārama anga i tetai apiianga Pipiria me kore te akaaere anga i te putuputuanga. Kare tatou e poitirere. Akakite taka meitaki te Pipiria e ka mārama meitaki atu tatou i te tuatua mou i te tuatau ka aereia. (Kolo. 1:9, 10) Ka akakite marie mai a Iehova i te tuatua mou, no reira kia tiaki marie ua tatou kia rauka mai te mārama o te tuatua mou. (Mase. 4:18) Me kite mai te Pupu Akaaere e ka anoanoia kia taui i to tatou mārama anga i tetai tuatua mou, ka viviki ua ratou i te rave i te au akatanotanoanga. Maata te au akonoanga i teia tuatau tei rave i te au tauianga ei akamareka i te au mema me kore kia rongonui ratou i roto i teianei ao. Inara, ka rave te Au Kite o Iehova i te au tauianga no to ratou inangaro kia akavaitata atu ki te Atua e kia akamori iaia mei ia Iesu rai. (Iako. 4:4) Te tumu ka rave tatou i te au tauianga e te akatanotanoanga, no tei rauka mai te mārama meitaki o te au Tuatua Tapu, kare no te au mea ou o teianei ao e te au peu rongonui. Akaperepere tikai tatou i te tuatua mou!​—1 Tesa. 2:3, 4.

13. Eaa te tu puapinga roa atu e akaariia ana e te au Kerititiano mou, e akapeea te Au Kite o Iehova i te akaari anga i te reira?

¹³ I te au tu pouroa tei akataka mai i te putuputuanga Kerititiano mua, ko te aroa te mea puapinga roa atu. Karanga a Iesu: “Ko te mea teia e kite ei te tangata katoa e e pipi kotou naku, kia aroa kotou ia kotou uaorai.” (Ioa. 13:34, 35) I teia tuatau, te tupu nei te aroa mou e te taokotai i rotopu i te Au Kite o Iehova. Kare atu e akaaerenga tei aite ki ta tatou taokotaianga taeake piri mou. Riro te reira mei tetai ngutuare rai noatu e tukeke to tatou enua, iti tangata e te au peu. Ka kite tatou i te aroa mou i ko i ta tatou au uipaanga, akaputuputuanga e te uruoaanga. Te akapapu ra teia i to tatou irinaki e te akamori nei tatou ia Iehova na te mataara tana e mareka ra.

14. Ia Kolosa 3:12-14, eaa tetai mataara puapinga ka akaari tatou i te aroa maata tikai no tetai e tetai?

¹⁴ Akamaroiroi maira te Pipiria: “Ko te aroa rai, kia maata tikaia ïa ia kotou uaorai.” (1 Pete. 4:8) Tetai mataara ka akaari tatou i teia tu aroa, na te akakore anga i te ara a tetai e tetai e te akakoromaki marie i te tu apa o tetai e tetai. Ka kimi katoa tatou i te tuatau no te oronga ua e te takinga meitaki atu i te katoatoa i roto i te putuputuanga, kapiti mai te aronga tei akariri mai ia tatou. (E tatau ia Kolosa 3:12-14.) Me akaari tatou i teia tu aroa, ka akapapu tatou e e au Kerititiano mou tikai tatou.

15. Eaa tetai au mataara ke ka aru tatou i te akaraanga no te akamorianga tei akanooia e te au Kerititiano mua?

¹⁵ Ka aru tatou i te akaraanga no te akamorianga tei akanooia e te putuputuanga Kerititiano o te anere mataiti mua na roto i tetai au  mataara ke. Ei akaraanga, te akanoonooanga o te akaaerenga​—kapiti mai te au akaaere tutaka, te aronga pakari e te au tavini tauturu​—te aru vaitata ra i te akanoonooanga tei akamouia e te au apotetoro i te anere mataiti mua. (Phili. 1:1; Tito 1:5) Pera katoa mei te au Kerititiano mua rai, ka akangateitei tatou i ta Iehova au ture no te pirianga ainga e te akaipoipo, tana i tuatua no te toto, e ka paruru tatou i te putuputuanga mei te aronga tei kore i inangaro i te aru i te Tuatua a te Atua.​—Anga. 15:28, 29; 1 Kori. 5:11-13; 6:9, 10; Ebe. 13:4.

16. Eaa ta tatou ka apii mei ia Ephesia 4:4-6?

¹⁶ E manganui tei karanga e e pipi ratou na Iesu inara kare ratou i te au pipi mou. (Mata. 7:21-23) Akamatakite katoa te Pipiria e i te tuatau openga, e manganui “e tutu akono i te Atua to ratou.” (2 Timo. 3:1, 5) Noatu ra, akakite taka meitaki te Pipiria e “okotai akarongo” ta te Atua e mareka ra.​—E tatau ia Ephesia 4:4-6.

17. Koai ma i teia tuatau te aru nei ia Iesu e tei akono i te akarongo mou okotai?

¹⁷ Koai ma te akono ra i te akarongo mou okotai i teia tuatau? Kua uriuri tatou i te au akapapuanga. No te akamanako tatou i te akaraanga no te akamorianga ta Iesu i akanoo e tei aruia e te au Kerititiano mua. E tai rai pauanga​—te Au Kite o Iehova. E tikaanga ngateitei roa to tatou kia riro ei iti tangata no Iehova e kia mārama i te tuatua mou no runga iaia e tona au akakoroanga. E mou tikai tatou i te tuatua mou ma te irinaki papu.