1. Manino ty olo ro sahiran-tsay amy resaky fivavaha?

MARO biby henanizao ty fivavaha manao ty vatany ho Kristiana. Samby mivola iaby rozy hoe ankasitraha-Ndranahary ty fomba fivavahan-drozy. Farany sahira ty olo hoe aia amy reo ty tena ie. Mieritseritsy amy zay rozy hoe: “Raiky avao va ty fivavaha marina, sa ankasitraha-Ndranahary iaby lafa kila fivavaha?” Ka manao akory tsika? Tena resy lahatsy va tsika hoe marina ty raha ampianarintsika Vavolombeloni-Jehovah sady ty fomba fanompoantsika ani-Jehovah avao ro ekeny? Misy porofo mahavy antsika matoky ani-zay va? Ndao hodinihintsika porofo rezay.

2. Nanino apostoly Paoly ro niresy lahatsy hoe nahita ty marina? (1 Tesalonianina 1:5)

² Tena niresy lahatsy apostoly Paoly hoe nahita ty marina. (Vakio 1 Tesalonianina 1:5.) Tsy fihetseham-po avao ro nahavy azy ho resy lahatsy fa tena nianarany soa ty Safà-Ndranahary. Nino ie hoe “lafa atao raha voasoratsy amy Soratsy Masy ao le baka amy herini-fanahy masi-Ndranahary.” (2 Tim. 3:16) Ino, ohatsy, ty raha nianarany tamy Soratsy Masy tao? Nahita porofo tena azo antoky ie tao hoe Jesosy vatany ro Mesia nampitamany, kanefa tsy nidareani-mpitariky fivavaha jiosy rey porofo zay. Le nivola rozy hoe nampianatsy olo ty marina mikasiky a Ndranahary, fe nanao raha halany rozy. (Tit. 1:16) Tsy nanahaky ani-lahilahy reo Paoly. Tsy nifilifilìny hoe ino ty hinoany le ino ty tsy hinoany anaty Safà-Ndranahary ao. Parè hampianatsy  noho hanoriky ty “sitrapo-Ndranahary iaby” ie.​—Asa. 20:27.

3. Tsy maintsy mahavoavaly ty fanontaneantsika iaby va tsika zay vo hahazo antoky hoe nahita ty marina? (Henteo koa ty efajoro hoe “ Maro Loatsy ty Asani-Jehovah Noho ty Raha Teany Hatao ka ‘Tsy Voaisaky.’ ”)

³ Mieritseritsy ty olo sisany hoe fivavaha marina zao tokony hahavoavaly ze kila fanontanea mipetraky, ndre fanontanea tsy valeani-Baiboly mivanta aza. Azo inoa va raha zay? Eritsereto, ohatsy, Paoly. Nampirisiky ty olo finoa raiky taminy ie hoe: “Anovo hay soa ty raha iaby.” (1 Tes. 5:21) Fe nivola koa ie hoe ndre ie aza mbo maro ty raha tsy hainy. “Antsasany avao ty raha haintsika”, hoasany, sady ‘manjavozavo avao ty raha hitantsika amy fitaratsy eo.’ (1 Kor. 13:9, 12) Nanahaky antsika avao zany Paoly. Tsy hoe nahay ty raha iaby ie, fe nihainy ty fahamarina fototsy mikasiky ani-Jehovah. Raha nihainy reo le fa ampy naharesy lahatsy azy hoe nahita ty marina ie!

4. Ino ty azontsika atao mba hahavy antsika tsy hisalasala hoe nahita ty marina, le ino ty hodinihintsika mikasiky ty tena Kristiana?

⁴ Ino ty azontsika atao mba hahavy antsika tsy hisalasala hoe nahita ty marina? Azo atao, ohatsy, ty mampitaha ty modely napetrakini-Jesosy mikasiky fivavaha noho ty raha ataoni-Vavolombeloni-Jehovah henanizao. Ho hitantsika amy lahatsoratsy toy ato fa ty tena Kristiana le 1) tsy manompo sampy, 2) manaja ty anarani-Jehovah, 3) tea ty fahamarina, le 4) tena mifankatea.

5. Ino ty ianarantsika baka amy Jesosy mikasiky ty fomba tokony hivavaha amy Ndranahary, le akory ty azontsika anoriha ty raha nampianariny?

⁵ Tena tea ani-Jehovah Jesosy, ka nivavaky tamy Jehovah raiky avao ie, ndre tamy ie mbo tan-danitsy any zay ndre tamy ie tan-tany etoy. (Lioka 4:8) Nampianatsy ty mpianatsiny koa ie mba hivavaky amy Jehovah raiky  avao. Tsy nampiasa sary mihintsy Jesosy noho mpianatsiny tsy nivaliky rey lafa nivavaky. Tsy hita maso Ndranahary ka tsy misy zany olo afaky hanao ty sariny na hanao raha mitovy amy ty tarehiny! (Isaia 46:5) Fe misy olo sisany mamboatsy sary, le inoan’olo hoe sarin’olo masy raha rey, le ivavahan-drozy. Ka manao akory koa rey? Hoy Jehovah amy didy faharoe amy Didy Folo rey ao: “Ka manao sarin-draha voasokitsy ho anao, na raha mitovy pozy amy ze raha an-danitsy anabo eny, na an-tany ambany etoy ... Ka miankohoky alohany eo.” (Eks. 20:4, 5) Laha tena ta hanao raha mahafalifaly a Ndranahary ty olo raiky, le hainy soa ty teani-safà reo hambara fa tsy tea-Ndranahary hivavaky amy sary tsika.

6. Modelin’ia ro tahafini-Vavolombeloni-Jehovah henanizao lafa manompo a Ndranahary?

⁶ Mivola ty olo nianatsy mikasiky tantara hoe tamy androni-apostoly, le nivavaky tamy Ndranahary raiky avao ty Kristiana. Mivola koa, ohatsy, ty boky Tantarani-Lagilizy Kristiana (anglè) fa ndre ty hieritseritsy hoe hampiasa sary amy pilasy fivavahan-drozy, le fa “nampangaroharo” ani-Kristiana rey. Manahaky ty modelini-Kristiana tamy taonjato voalohany rey ty Vavolombeloni-Jehovah henanizao. Tsy mivavaky amy sary “masy” na amy anjely tsika. Ndre Jesosy aza tsy ivavahantsika. Tsy mananga saina koa tsika sady tsy manao raha hafa mampiseho fanompoa tanindraza. Ndre ino ino forosevan’olo hataontsika, le tapa-kevitsy tsika hanoriky ty safàni-Jesosy hoe: “Jehovah Ndranaharinao ro tsy maintsy iankohofanao, le ho azy raiky avao ro tsy maintsy anaovanao fanompoa masy.”​—Mat. 4:10.

7. Ino iaby ty mampiavaky ty Vavolombeloni-Jehovah amy fivavaha hafa?

⁷ Maro henanizao ty olo tea mijanjy ani-mpitoriteny malaza rey. Fa tafahoatsy ty fitiavan’olo rey ani-mpitariky fivavaha reo ka sahala mivavaky aminy mihintsy rozy. Mandeha an-dagilizin-drozy any ty olo, mivily ty bokin-drozy, noho manome drala be ho an-drozy na ty fikambana tohanan-drozy. Inoan’olo reo iaby ze raha volanin-drozy. Falifaly biby rozy lafa manenty ani-mpitoriteny rey ka atao raha mahita ani-Jesosy io! Fe tsy manahaky ani-zay ty tena mpivavaky amy Jehovah satria tsy manaraky olo. Ndre manaja ani-azy mitariky reo aza tsika, le orihintsika raha nampianarini-Jesosy toy: “Mpirahalahy nareo iaby.” (Mat. 23:8-10) Tsy mivavaky amin’olo tsika, ndre mpitariky fivavaha ie ndre mpanday fanjakà. Tsy manoha ty fivavahan-drozy na ty raha mifandramby amy politiky ataon-drozy koa tsika. Tsy poro ty atia na ty aroa tsika satria tsy miharo amy tontolo toy. Raha iaby rezay ro tena mampiavaky antsika amy fivavaha manao ty vatany ho Kristiana.​—Jaona 18:36.

8. Akory ty ahaizantsika fa teani-Jehovah hanome voninahitsy noho hanambara ty anarany amin’olo tsika?

⁸ Nivavaky manahaky ani-zao Jesosy ndraiky zay: “Baba, ameo voninahitsy ty anaranao.” Jehovah mihintsy namaly ani-vavaky iny tamy feo marè baka an-danitsy any, le nampitamà ie fa hanome voninahitsy ty anarany. (Jaona 12:28) Nanome voninahitsy ty anarani-Babany avao Jesosy tamy fanompoany tan-tany etoy. (Jaona 17:26) Ka amy tena Kristiana, le voninahitsy bevata ty mampiasa ty anara-Ndranahary noho manambara ani-anara io amin’olo hafa.

9. Akory ty nampisehoani-Kristiana tamy taonjato voalohany rey hoe nanaja ty anara-Ndranahary rozy?

⁹ Tafara kelikely ty niorenani-fiangona kristiana, le nanomboky “nieritseritsy ty hafa firenena” Jehovah “mba hangalàny olo baka amin-drozy mba handay ty anarany.” (Asa.  15:14) Nirambesin-drozy ho voninahitsy bevata ty nampiasa ty anara-Ndranahary noho nanambara ani-anara io tamin’olo hafa. Nampiasa ty anara-Ndranahary koa rozy lafa nitory noho nanoratsy boky amy Baiboly ao. * Nasehon-drozy tamy zay hoe rozy avao ro vahoaky manday ty anara-Ndranahary.​—Asa. 2:14, 21.

10. Akory ty ahaizantsika fa ty Vavolombeloni-Jehovah avao ro fivavaha manday ty anarani-Jehovah?

¹⁰ Vahoaky manday ty anarani-Jehovah koa va ty Vavolombeloni-Jehovah? Diniho porofo retoa. Maro henanizao ty mpitariky fivavaha nanao ze fara herin-drozy mba tsy hahaizan’olo hoe mana ty tena anarany Ndranahary. Lafa nandika Baiboly, ohatsy, rozy le nalan-drozy baka ao anara io. Niraràn-drozy mihintsy aza hoe tsy azo ampiasà an-dagilizin-drozy ao ty anara hoe Jehovah. * Misy olo afaky mandà va fa ty Vavolombeloni-Jehovah raiky avao ro tena manaja noho manome voninahitsy ty anarani-Jehovah? Tsika ro tena miezaky manambara amin’olo ani-anara-Ndranahary io fa ty fivavaha hafa tsy de manao ani-zay! Manao ze fara herintsika koa tsika mba hiay mifanaraky amy ty anarantsika hoe Vavolombeloni-Jehovah. (Isaia 43:10-12) Fa mandilatsini-240 tapitrisa ty Baiboly Ny Soratra Masina—Fandikan-tenin’ny Tontolo Vaovao naboakintsika. Mampiasa  ty anarani-Jehovah amy pilasy tokony hisy azy Baiboly io ndre nalàni-mpanoratsy Baiboly sisany baka ao aza anara io. Mampiboaky boky noho gazety mampiasa ty anarani-Jehovah koa tsika amy fivolana 1 000 mahery!

11. Akory ty nampisehoani-Kristiana voalohany rey hoe tea fahamarina rozy?

¹¹ Teani-Jesosy ty fahamarina, zany hoe ty marina mikasiky a Ndranahary noho ty raha teany hatao. Nihita tamy fomba fiainani-Jesosy hoe nino ani-fahamarina zay ie, le nampeany koa ty olo hafa mba hahay ty marina. (Jaona 18:37) Tena nitea fahamarina koa ty mpanori-dia ani-Jesosy. (Jaona 4:23, 24) Nikaihini-Petera hoe “lalani-fahamarina” mihintsy aza ty fivavaha kristiana. (2 Pet. 2:2) Tena nitea fahamarina ty Kristiana tamy taonjato voalohany ka nihalavirin-drozy ty raha ampianarini-fivavaha, ty fomban-draza, noho ty hevitsin’olo manohitsy ty fahamarina. (Kol. 2:8) Manahaky ani-zay koa ty Kristiana henanizao. Miezaky mafy rozy mba ‘handeha amy fahamarina ao avao’, ka ataon-drozy azo antoky hoe mifototsy amy Safàni-Jehovah iaby ze raha inoan-drozy noho ty fomba fiainan-drozy.​—3 Jaona 3, 4.

12. Ino ty ataoni-Filan-kevi-pitantana lafa hitany hoe mila ahity ty fahatakarantsika ty fahamarina? Manino ty Filan-kevi-pitantana ro manao ani-fanovà rezay?

¹² Tsy mivola ty Vavolombeloni-Jehovah hoe hain-drozy soa iaby ze raha amy Baiboly ao. Kindraiky aza misy tsy mety ty fomba anazavan-drozy ty raha ampianarini-Baiboly, na ty fomba andaminan-drozy ty fiangona. Fe tsy tokony hahatseriky antsika raha zay. Mivola mazava soa ty Baiboly fa arakaraky ty andehanani-fotoa, le hihamazava avao ty fahatakarani-mpanompo-Ndranahary ty fahamarina. (Kol. 1:9, 10) Ambarani-Jehovah antsika tsikelikely ty fahamarina ka tokony hahaliny tsika zisiky hahazoantsika soa ani-raha zay. (Ohab. 4:18) Lafa hitani-Filan-kevi-pitantana hoe misy mila areny ty fahazoantsika fahamarina sisany na ty fanaovantsika raha, le tsy misalasala rozy fa avy le arenin-drozy raha iny. Fivavaha maro koa henanizao ro manova ty raha ampianarin-drozy. Manao ani-zay rozy mba hampifalifalea ty mpivavaky amin-drozy ao na mba hampalaza an-drozy. Fe tsy manahaky ani-zay ty Vavolombeloni-Jehovah. Manao fanovà tsika satria ta hihariniky a Ndranahary noho ta hanompo azy mitovy amy ty nataoni-Jesosy. (Jak. 4:4) Tsy hoe manity ty fahatakarantsika ty fahamarina tsika satria niova ty hevitsin’olo amy tontolo toy. Manao ani-raha zay tsika satria lasa azontsika soa ty raha volanini-Baiboly. Teantsika vatany ty fahamarina!​—1 Tes. 2:3, 4.

13. Ino ty toetsy tena mampiavaky ty tena Kristiana, le akory ampisehoani-Vavolombeloni-Jehovah ani-toetsy io?

¹³ Maro ty toetsy soa nananani-Kristiana voalohany rey, fe ty fitiava ro tena nampiavaky an-drozy. Hoy Jesosy: “Laha mifankatea nareo, le zay ro hahaizan’olo iaby fa mpianatsiko nareo.” (Jaona 13:34, 35) Tena mifankatea noho miharo say koa ty Vavolombeloni-Jehovah amy tany toy iaby henanizao. Tsy mitovy amy fivavaha hafa tsika satria sahala fianakavia raiky io ndre samby mana ty tany niaviantsika, ty foko misy antsika, noho ty fombantsika. Mahita ani-fitiava zay, ohatsy, tsika lafa am-pivoria any na lafa amy fivoriambe rey. Manampy antsika tena hatòky raha zay hoe ekeni-Jehovah ty fomba fivavahantsika aminy.

14. Laha hentea ty Kolosianina 3:12-14, akory ty azontsika ampisehoa hoe tena mifankatea tsika?

¹⁴ Mampirisiky antsika ty Soratsy Masy mba ‘hifankatea marè.’ (1 Pet. 4:8) Mampiseho  ani-fitiava zay, ohatsy, tsika laha mifanenga hadisoa noho miezaky hifankazaka satria samby tsy lavorary ndre tsika ndre ty mpiara-manompo amintsika. Mila fomba samby hafa koa tsika mba hampisehoantsika hoe matariky amin’olo iaby amy fiangona eo tsika sady tea mandramby vahiny. Miezaky manao ani-zay tsika ndre amy azy nanao raha nampalahelo antsika rey aza. (Vakio Kolosianina 3:12-14.) Laha mampiseho ani-fitiava zay tsika, le atorontsika hoe tena Kristiana vatany tsika.

15. Ino koa ty ahità hoe manoriky ty modelini-Kristiana tamy taonjato voalohany rey tsika lafa manompo a Ndranahary?

¹⁵ Mitovy amy ty nataoni-fiangona kristiana tamy taonjato voalohany rey ty ataontsika lafa manompo a Ndranahary. Mitovy amy fomba nandamina ani-Kristiana rey, ohatsy, ty fomba andamina antsika henanizao, satria misy mpiandraikitsy mpitety faritany, anti-panahy, noho mpanampy amy fanompoa. (Fil. 1:1; Tit. 1:5) Manahaky an-drozy tsika ka manaja ty lalànani-Jehovah mikasiky firaisa noho fanambalea, manaraky ty raha volani-Ndranahary mikasiky fampiasà lio, sady miaro ty fiangona amy ze olo tsy ta hanoriky ty lalàna-Ndranahary.​—Asa. 15:28, 29; 1 Kor. 5:11-13; 6:9, 10; Heb. 13:4.

16. Ino ty ianarantsika baka amy raha volanini-​Efesianina 4:4-6?

¹⁶ Ho maro hoasani-Jesosy ty olo hanao hoe mpianatsiny, kanefa tsy tena mpianatsiny ty sisany amy reo. (Mat. 7:21-23) Fa nivola koa ty Soratsy Masy hoe amy andro farany, le ho maro ty olo “atao ho mpivavaky be” io. (2 Tim. 3:1, 5) Fe mivola mazava soa ty Baiboly hoe “raiky ty finoa”, na fivavaha ekè-Ndranahary.​—Vakio Efesianina 4:4-6.

17. Ia ty fivavaha tena manoriky ty liani-Jesosy henanizao?

¹⁷ Ia ty manoriky fivavaha marina henanizao? Fa nandiniky porofo tsika teo. Nihitantsika hoe karaza fivavaha manao akory ro nampianarini-Jesosy, le akory ty fomba nanorihani-Kristiana tamy taonjato voalohany rey ani-raha zay. Tsy misy fivavaha manoriky ani-raha reo laha tsy ty Vavolombeloni-Jehovah raiky avao. Tena voninahitsy ho antsika ty hoe anisani-vahoakini-Jehovah, le mahay ty marina mikasiky azy noho ty raha teany hatao! Enga anie tsika hanao ze azontsika atao avao mba hivahara amy ty marina.