1. Lamo anto efula oyɛwɔ l’okakando?

LƆƆKO kɛnɛ ntolo ndekana nunu djomi watepela ambɔ oyɛwɔnde Akristo edjinge ambɔ watɛmɔla Ndjambe lá wopo w’osasangɛ. Djɛkondeke anto efula walekɔ l’okakando! Wangopolake ambɔ: “Ngo etolo kɛmɔ toko ndeke lolekɔ nsɔsɔlɔ ndokoko ntolo nkfumɔ ndeke l’awolama me Ndjambe?” Toyashikikɛ isɔmɛlɛ ente kɛnɛ k’olakanyɛso kelekɔ nsɔsɔlɔ edjinge ndjɔmbɔmba k’ɔtɛmwɛlɔ k’Ewakɛ wɛ Yehova okilikawɔ lɔɔko kɛnɛ, kelekɔ kawolama me Yehova? Alekɔ nsɔsɔlɔ wɔdju dj’iso ndashikikɛ nkambo djɛsɔ? Nyontshɔ tokolenda tolembetelo.

2. Lá nkilika 1 Tesalɔnikɛ 1:5, lamo ɔpɔstɔlɔ Poolo ndoyashikikɛ ante akambo wa ndawolaka wayalaki nsɔsɔlɔ?

² Ɔpɔstɔlɔ Poolo ayalaka la djawo djɛ wolo ante nde alekɔ lá nsɔsɔlɔ. (Wala 1 Tesalɔnikɛ 1:5.) Djawo djɛsɔ djetapikama ngo lá wopo wɔ ndoyawokaka wɔlɔ l’akambo wa nsɔsɔlɔ. Poolo ayalaki ombeki wɔ nkɔmɛ w’Otepela wɔ Ndjambe. Nde awolaki ante ‘Afunelo ankfumɔ wafunamaka m’ɛlɔndjɛlɔ kɛ nyuma kɛ Ndjambe.’ (2 Ti. 3:16) Ndeeke nge? Má Afunelo, Poolo awaka ilembetelo yɛ nsɔsɔlɔ yɛnyɛ ente Yeso ayalaka Mesiya kelakemisa, ilembetelo yɛ ewandji wɛ ntolo w’ase Juda yotakɔpa ndjawola. Ewandji wɛ ntolo wɛ dongi mpe wɛsɔ watepelaki ambɔ walakanyɛ anto akambo wa nsɔsɔlɔ walendana la Ndjambe, koko wowanghanaki má nanghedji djɛwɔ. (Tit. 1:16) Otshikitanyi lawɔ, Poolo atasɔnaki kɛnɛ k’okokande ndjawola la kɛ ndopakoke ndjawola m’Otepela wɔ ndjambe. Nde ayalaki entshupa djɛ ndakanyɛ la nkamba ‘l’akambo ankfumɔ walendana l’ɛkɔpa kɛ Ndjambe.’​—Ele. 20:27.

3. Djɛ ndjala la djawo djɛ wolo, ngo iso mba nsakiso lá weepó wɛso enkfumɔ? (Lenda ipapango “ Elemo la tokanyi tɔ Yehova, tolekɔ ‘efula kepewama mbala.’”)

 ³ Anto amɔtshi mfɛnyɛka ambɔ etolo kɛ nsɔsɔlɔ ladjɛ nkadjimola lá weepó enkfumɔ ayale kaanga weepó wepalendana la Bible. Ɔsɔ alekɔ ikanyi yɛ wɔlɔ? Tokolenda ndjɔmbɔmba kɛ Poolo. Nde akembɛka winande antɛmɔdji djɛ ‘nshishima akambo ankfumɔ,’ koko nde awolaka lonkina ante ayalaka akambo efula wandotasipisoyɛ. (1 Te. 5:21) Nde afunaka ante: ‘Iso ndjewaka ngo ndambo,’ ko akotshɛka ante: ‘Tɔpɛnyi wɔlɔ mande tolenda l’ilendjeyɛ yɛpɛnama wɔlɔ.’ (1 Kɔ. 13:9, 12) Poolo atasipisoyɛ akambo ankfumɔ, ole koko iso. Koko Poolo asipisoyɛka akambo wa nsɔsɔlɔ wa bango walendana la Yehova. Nde ayalaki la ndashikikɛ ante akambo w’indawolaka walekɔ nsɔsɔlɔ!

4. Wopo wɔkɔnge w’okokaso nkembɛ djawo djɛso dj’ente tombisola akambo wa nsɔsɔlɔ, ko kɛkɔnge k’ɔkɔpaso nyɛna lá kɛnɛ kelendana l’Akristo wa nsɔsɔlɔ?

⁴ Yopo imɔtshi y’okokaso nkembɛ djawo djɛso dj’ente tolekɔ lá nsɔsɔlɔ nde má ndjɛdjɛ ndjɔmbɔmba k’ɔtɛmwɛlɔ ketshikisa Yeso la k’Ewakɛ wɛ Yehova onanghawɔ lɔɔko kɛnɛ. Lá djamba djɛnɛ, tɔngɛna ente Akristo wa nsɔsɔlɔ ntonaka 1) etolo kɛ tosakandole, 2) nɛmɛyɛka djiina djɛ Yehova, 3) nkɔpaka akambo wa nsɔsɔlɔ, la 4) nkɔpanaka lombombe l’anteyi kɛwɔ.

5. Olakanyelo wɔkɔnge w’owaso me Yeso lá kɛnɛ kelendana la yopo yɛ wɔlɔ yɛ ntɛmɔla Ndjambe, ko wopo wɔkɔnge w’okokaso nkamba l’elakanyelo wɛnde?

⁵ Má ngandji k’efula kɛ ndokaka Ndjambe, Yeso atɛmɔlaki ngo Yehova ayale winá wɔ ndayalaka l’olongo kana lá looko. (Luka 4:8) Nde alakanyɛka ambeki wande djɛ nangha wopo wɔk’ɔmɔ. Ayale Yeso kana ambeki wande wa nkɔmano, lako onto w’okambaki l’isakandole  l’ɔtɛmwɛlɔ kaanga ndambo. Mande Yehova alekɔ Nyuma, lako ekete k’onto okokande nangha ko mfɛna kaanga ndambo daambi lande! (Iza. 46:5) Iya otepelaso nge lá nkambo djɛ nangha tosakandole t’etama ambɔ osanto edjinge ndɔmba lá ntondo kɛwɔ? Lá ɔlɛmbɛ w’ape welá Ɛlɛmbɛ djomi, Yehova atepelaka ante: ‘Toyananghelake isakandole kana ɛfɔ kɛ ekete kɛmɔtshi kelekɔ l’olongo lá djiko kana kelekɔ lá looko l’anse . . . Tookfusamelake.’ (Epo. 20:4, 5) Etepela wɛsɔ ndjokamaka papoo le wanɛ wakɔpa nkambela Ndjambe.

6. Ndjɔmbɔmba kɛkɔnge k’ɔtɛmwɛlɔ Ewakɛ wɛ Yehova okilikawɔ lɔɔko kɛnɛ?

⁶ Andjewi y’ɛkɔndɔ welá andja wanɛ ntepelaka ambɔ l’etsho w’apɔstɔlɔ, Akristo watɛmɔlaki ngo Ndjambe. Ndjɔmbɔmba, onkanda Ɔkɔndɔ w’etolo k’Akristo wolekɔ lá Angɛlɛ ntepelaka djɛ Akristo wa ntondo wɔsaki ambɔ “alekɔ nkambo djɛ wɛnyɛnyɛ” nkamba la tosakandole l’edjena k’ɔtɛmwɛlɔ. Lɔɔko kɛnɛ, Ewakɛ wɛ Yehova wakilika ndjɔmbɔmba ketshikisa Akristo wal’ɛtɛndɔ kɛ ntondo. Iso topalɔmbɛ te tosakandole tɔsama etengo “asanto” kana te andjelo, topalɔmbɛ kaanga te Yeso. La topatɛmɔlaka Drapo kana ewandji w’ewila. Ayale nkambo djɛkɔnge djengotokomela, tɔmbɔsa nkano djɛ nɛmɛyɛ etepela wɛ Yeso wɛnɛ: ‘Ngo Yehova Ndjambe kɛko ndeke oyɛ ladjɛ ntɛmɔla.’​—Mat. 4:10.

7. Otshikitano wɔkɔnge wɛnama papoo l’antenyɛ Ewakɛ wɛ Yehova la ntolo nkina?

⁷ Lɔɔko kɛnɛ, anto efula nkilikaka ewandji wɛ ntolo wɛ lomo. Ngandji k’efula k’awokawɔ ndakomɛka tii kaanga lá ndaatɛmɔla. Anto efula ntshoka t’ɛtɛmwɛlɔ wɛwɔ, nsombaka enkanda wɛwɔ, la mpɛyɛka epapɛyɛ wɛ nkekete djɛ nsuka elonghanyelo wɛwɔ. Amɔtshi ndjawolaka kenkfumɔ k’otepelawɔ. Iwɔ ndjalaka l’osasa w’ipa wɔsɔdjɔmba winá w’ɛnawɔ ewadji wɛwɔ wɛ ntolo ngo ngete yɔmbɛna nde Yeso! Koko, antɛmɔdji wa nsɔsɔlɔ wa Yehova wapalekɔ l’owandji w’onto. Kaanga ɔlɛmɛyɛso wanɛ walɔndjɛ, iso ndjawolaka olakanyelo wɔ Yeso wokama papoo wɔnɛ: ‘Nyankfumɔ nyolekɔ wananyɔ.’ (Mat. 23:8-10) Topatɛmɔla kaanga onto, ayale ewandji wɛ ntolo kana wɛ pɔlitikɛ. La topasuke ekoma wɛwɔ. Tɔpɔshi opiko lá wayi wa pɔlitikɛ edjinge iso ndakakitolaka l’andja wanɛ. Djɛkondeke l’akambo ankfumɔ wasɔ, iso ntshikitana otale la ntolo nkina djetepela ambɔ walekɔ Akristo.​—Dj. 18:36.

8. Wopo wɔkɔnge ewaso ente Yehova nkɔpaka djɛ djiina djɛnde numɛma la ndjewama l’andja w’otondo?

⁸ Lá mbamba kɛmɔtshi, Yeso alɔmbaka ante: ‘Papa, lumɛ djiina djɛko.’ Yehova nyɔmɛlɛ akadjimolaka lá lɔlɔmbɔ lɔsɔ la djoyi djɛ wolo etengo nkfungola djɛ mvula ko alakaka ante nde angolumɛ djiina djɛnde. (Dj. 12:28) L’ilá kenkfumɔ k’olemo wɔnde, Yeso alumɛka djiina djɛ Papa kɛnde. (Dj. 17:26) Djɛkondeke alekɔ nkambo djɛ balo djɛ Akristo wa nsɔsɔlɔ ndjalaka l’onfuno wɔ nkamba la djiina djɛ Ndjambe edjinge ndjewanyɛ djiina djɛkɔ le anto ankina.

9. Wopo wɔkɔnge Akristo wa l’ɛtɛndɔ kɛ ntondo iyɛnyɛ ambɔ iwɔ nɛmɛyɛka djiina djɛ Ndjambe?

⁹ Lá ɛtɛndɔ kɛ ntondo D.D, ndambo daambi m’ɔkɔngɔ w’otshumano w’Akristo nkfumbama, Yehova ‘ilaka ase ewila yimba djɛ nsɔna anto amɔtshi m’anteyi kɛwɔ lá nkambo djɛ djiina djɛnde.’ (Ele. 15:14) Akristo wa l’ɛtɛndɔ kɛ ntondo wasɔ, wayalaka l’onfuno wɔ nkamba la djiina djɛ Ndjambe edjinge ndjewanyɛ djiina djɛkɔ te anto ankina. Iwɔ wakambaka la djiina djɛ Ndjambe l’olemo w’ɔwɔ w’ipoposanyɛ la l’enkanda w’iyafune. * Má nangha nghɔsɔ iwɔ wɛnyɛka djɛ  iwɔ ndeke anto wasɔnamisa lá nkambo djɛ djiina djɛ Ndjambe.​—Ele. 2:14, 21.

10. Tolembetelo tɔkɔnge tɛnyɛ ente Ewakɛ wɛ Yehova walekɔ anto wasɔnamisa lá nkambo djɛ djiina djɛ Yehova?

¹⁰ Ewakɛ wɛ Yehova ndeke anto wasɔnamisa lá nkambo djɛ djiina djɛ Yehova? Nyontshɔ tolende tolembetelo. Lɔɔkɔ kɛnɛ, ewandji wɛ ntolo efula wanangha kenkfumɔ k’okokawɔ nangha djɛ ndjisa anto djiina djɛ Ndjambe. Iwɔ wimɛka djiina djɛkɔ má nkadjimwelo djɛwɔ djɛ Bible edjinge, lá mbamba imɔtshi, washimbaka okambelo wɔ djiina djɛ Ndjambe lá ntolo djɛwɔ. * Onto wɔkɔna w’okoka nyanghana ante ngo Ewakɛ wɛ Yehova toko ndeke lɔlɛmɛyɛka la lilaka djiina djɛ Yehova lomo? Tewanyɛ djiina djɛ Ndjambe l’andja w’otondo ndeka ntolo nkina nkfumɔ. Lá nkambo djɛsɔ iso nanghaka kenkfumɔ kokokaso nangha djɛ mbika lá yopo y’ɛlama la djiina djɛso, dj’Ewakɛ wɛ Yehova. (Iza. 43:10-12) Tomboposɛ kɔpi ndekana miliyɔ 240 yɛ Bible—Ekadimwelo k’andja w’oyoyo, yekamba la djiina Yehova lá djena djɛ ankandjimodji inkina yɛ Bible iyimɛ. Edjinge toposɛ enkanda wesakisola Bible wekamba la djiina djɛ Yehova l’etepela ndekana 1 000!

11. Wopo wɔkɔnge Akristo wa ntondo iyɛnyɛ ambɔ iwɔ nkɔpaka akambo wa nsɔsɔlɔ?

¹¹ Yeso akɔpaki akambo wa nsɔsɔlɔ, walendana la Ndjambe edjinge l’ikanyi yɛnde. Yeso awikaki lá yopo yɛlama l’akambo wakɔ wa  nsɔsɔlɔ edjinge ewanyɛki akambo wakɔ wa nsɔsɔlɔ le anto ankina. (Dj. 18:37) Ambeki wa nsɔsɔlɔ wa Yeso wakɔpaki edjinge iwɔ akambo wa nsɔsɔlɔ efula. (Dj. 4:23, 24) Lá nsɔsɔlɔ, ɔpɔstɔlɔ Pɛtɛlɔ etaka etolo kɛ nsɔsɔlɔ k’Akristo ante ‘mboka k’akambo wa nsɔsɔlɔ.’ (2 Pɛ. 2:2) Mande wakɔpaki akambo wa nsɔsɔlɔ efula, Akristo wa ntondo watonaka tokanyi t’ase ntolo, nkfumbo dj’andoyi, la tokanyi t’anto topokana l’akambo wa nsɔsɔlɔ. (Kɔl. 2:8) Wopo wɔk’ɔmɔ ndeke lɔɔko kɛnɛ, Akristo wa nsɔsɔlɔ nanghaka la wolo djɛ ‘nkɛnda l’akambo wa nsɔsɔlɔ,’ má nangha djɛ djawo djɛwɔ la yopo yɛwɔ yɛ lowiko mpikama l’Otepela wɔ Yehova.​—3 Dj. 3, 4.

12. Kɛkɔnge kenanghema winá wɔ Iloyi yɛ lɔndjɛ ɛnande ante iso ladjɛ ntshikitanyɛ looka lɔso lɔ nkambo mɔtshi, ko lamo onanghawɔ nghɔsɔ?

¹² Lɔɔko kɛnɛ Ewakɛ wɛ Yehova wapapomela ikole ambɔ iwɔ nsipisoyɛka ikakambo inkfumɔ yelendana la Bible. Lá mbamba imɔtshi, wangonanghake evunga ɛmɔtshi l’olakanyelo la lá wopo wɔ nonghanyɛ akambo. Nkambo djɛsɔ mpakoke ntokamoyɛ. Afunelo nyɛnyɛka papoo ante, balo djɛ djɔ mfulaka ndambondambo. (Kɔl. 1:9, 10) Yehova ntisolaka akambo wa nsɔsɔlɔ ndambo ndambo, edjinge iso ladjɛ ndjala entshupa djɛ nkonga la balentshitshi nkfumɔ djɛ osase w’akambo wa nsɔsɔlɔ mpɛta. (Woo. 4:18) Winá wɔ Iloyi yɛlɔndjɛ ɛnande ante iso ladjɛ ntshikitanyɛ looka lɔso lá nkambo mɔtshi, iwɔ wapakakandaka djɛ nangha etshikitano wɛlɔmbama. Winá wɔ efula k’ewandji wɛ Lokristokristo onanghawɔ etshikitano djɛ nsasangɛ ase ntshumano djɛwɔ kana djɛ ndjokana l’andja wanɛ, olonghanyelo wɔ Yehova nanghaka etshikitano djɛ ndasukanyɛ la Ndjambe la djɛ ndɔtɛmɔla wopo wɔ Yeso ndɔtɛmɔla. (Dja. 4:4) Iso nanghaka etshikitano apalekɔ m’ɔtɛ wɔ ikanyi yel’andja wanɛ imbotshikitana, koko mande tombowa looka lɔ wɔlɔ lɔ Afunelo. Iso nkɔpaka akambo wa nsɔsɔlɔ!​—1 Te. 2:3, 4.

13. Djekeka djɛkɔnge djeleka djonyi djɛnyisa Akristo wa nsɔsɔlɔ, edjinge wopo wɔkɔnge djekeka djɛsɔ ɛnamawɔ le Ewakɛ wɛ Yehova lɔɔko kɛnɛ?

¹³ Akristo wa l’ɛtɛndɔ kɛ ntondo wewamaki má wekeka efula wa wɔlɔ wayalaki lawɔ, koko pekapeka má djekeka djeleka djonyi, ngandji. Yeso atepelaka ante: ‘Má nkambo djɛnɛ, anto ankfumɔ wangewa ambɔ nyolekɔ ambeki wami, ntsha nyokana ngandji l’anteyi kɛnyo.’ (Dj. 13:34, 35) Lɔɔko kɛnɛ, Ewakɛ wɛ Yehova wel’andja w’otondo wokana ngandji kɛ nsɔsɔlɔ kɛsɔ edjinge walekɔ l’osanga. Iso ntshikitana la ntolo nkina nkfumɔ mande, iso tolekɔ etengo nkfumbo kaanga isaye m’ewila, mposo edjinge nkolo djetshikitanyi. Iso nyɛnaka ilembetelo yɛ ngandji kɛ nsɔsɔlɔ kɛsɔ lá nsanghanyɛ y’otshumano, yɛ ndjingadjinga, la yɛ rɛjɔ. Tolembetelo tɔsɔ, nkembɛka djawo djɛso dj’ente, yopo yɛso yɛ ntɛmɔla ilekɔ y’awolama me Yehova.

14. Lá nkilika Kɔlɔsɛ 3:12-14, yopo imɔtshi yɛ djonyi yɛkɔnge y’okokaso nyɛnyɛ ente iso ndjokanaka ngandji k’efula l’anteyi kɛso?

¹⁴ Afunelo ntokembɛka ante: ‘Nyoyale la ngandji k’efula l’anteyi kɛnyo.’ (1 Pɛ. 4:8) Yopo imɔtshi y’ɛnyɛso ngandji kɛsɔnde, má nyimeyana la nkfulumeyana evunga wɛso. Lonkina iso mponaka mbamba kɛ nyɛnyɛ lokapo lɔso la ndongola anto ankfumɔ wal’otshumano, ayale kaanga wanɛ watokiyanyisa. (Wala Kɔlɔsɛ 3:12-14.) Yopo yɛ ngandji kɛ nghɔsɔ ndeke lolekɔ ilembetelo yɛ ntondo y’Akristo wa nsɔsɔlɔ.

15. Lá topo tonkina tɔkɔnge t’okilikaso ndjɔmbɔmba k’ɔtɛmwɛlɔ ketotshikelisa Akristo wa l’ɛtɛndɔ kɛ ntondo?

¹⁵ Iso nkilikaka ndjɔmbɔmba k’ɔtɛmwɛlɔ ketotshikelisa otshumano w’Akristo wel’ɛtɛndɔ  kɛ ntondo lá topo tonkina efula. Ndjɔmbɔmba, tombolonghanyema wopo wɔ Akristo wasɔ iyalonghanyema. Etengo iwɔ, tolekɔ l’enami wɛ djingadjinga, tokokolo, la enkambi wekotshɛ. (Flp. 1:1; Tit. 1:5) Wopo w’ɔsaso wayi wa ntshɛngi edjinge bala, wopo wɔlɛmɛyɛso ekina k’ekila, la mposɛ kelekɔ laso kɛ nama otshumano me ananghanghi y’evunga yepayapɛlɛ mpikama ngo má ndjɔmbɔmba ketotshikelisa Akristo wa l’ɛtɛndɔ kɛ ntondo.​—Ele. 15:28, 29; 1 Kɔ. 5:11-13; 6:9, 10; Heb. 13:4.

16. Olakanyelo wɔkɔnge w’owaso má etepela w’otanaso lá Ɛfɛsɛ 4:4-6?

¹⁶ Yeso atepelaka ante anto efula wangopomela ikole ambɔ walekɔ ambeki wande, koko apalekɔ yankfumɔ ndeke longoyala ambeki wa nsɔsɔlɔ. (Mat. 7:21-23) Afunelo watepelaka lonkina ambɔ l’etsho w’ekomo, anto efula wangoyala ngo la ‘ɛnamelo k’anto wayapɛyɛ lá wayi wa Ndjambe toko.’ (2 Ti. 3:1, 5) Koko, Bible ntoshimelaka papoo ante ngo ‘djawo mɔ’ toko ndeke lawolama me Ndjambe.​—Wala Ɛfɛsɛ 4:4-6.

17. Waa na wakilika Yeso la walekɔ la djawo mɔ djɛ nsɔsɔlɔ lɔɔko kɛnɛ?

¹⁷ Waa na walekɔ la djawo djɛ nsɔsɔlɔ lɔɔko kɛnɛ? Tomboshishima tolembetelo efula. Tomboshishima ndjɔmbɔmba k’ɔtɛmwɛlɔ kɛ Yeso ndalakanyɛ edjinge kekilikisa Akristo wa l’ɛtɛndɔ kɛ ntondo. Nsakiso kelekɔ ngo kɛmɔ, Ewakɛ wɛ Yehova. Ɔsɔngo mpeyi kelekɔ laso kɛ ndjala l’anteyi k’enkambi wɛ Yehova edjinge ndjewa nsɔsɔlɔ kelendana la Yehova la ikanyi yɛnde! Djɛkondeke nyontshɔ tokindjɛ mvunda akambo wa nsɔsɔlɔ mpidji la djawo djɛ wolo.