1. Faandi mbei sömëni sëmbë an sabi andi da di tuu?

A DI ten aki, sömëni keiki dë di ta taki taa de da Keesitu sëmbë, söseei taa de ta dini Gadu a wan fasi di ta kai ku ën. Di soni aki ta mbei taa sömëni sëmbë an sabi andi da di tuu. De ta hakisi deseei taa: „Wan kodo tuutuu lei nöö dë u, naa hii de tuu ta kai ku Gadu?” U dë seiki taa u dee Jehovah Kotoigi ta lei sëmbë di tuu ö, söseei u dë seiki taa di fasi fa u ta dini Jehovah da di wan kodo fasi di ta kai ku ën u? U sa ko sabi dee soni dë seei ö? Boo taki u wantu soni di sa heepi u fuu dë seiki.

2. Te u luku andi 1 Tesalonika 1:5 ta taki, nöö faandi mbei u sa taki taa apösutu Paulosu bi dë seiki taa a dë a di tuutuu lei?

² Apösutu Paulosu bi dë seiki taa a bi dë a di tuutuu lei. (Lesi 1 Tesalonika 1:5.) A bi dë seiki u di soni aki, u di di tuutuu lei an bi ta mbei a fii bunu nöö a kaba. Ma Paulosu bi ta öndösuku soni a Bëibel. A bi ta biibi taa ’Gadu seei mbei sëmbë sikifi hii dee soni dee dë a Gadu Buku’ (2 Tim. 3:16). Andi Paulosu bi ko si di a bi ta öndösuku di Wöutu u Gadu? Wë a bi ko si taa Jesosi bi dë di Mësiasi tuutuu, hii fa dee hedima u dee Dju keiki an bi ta biibi di soni aki. De bi ta taki taa de ta lei sëmbë soni u Gadu, ma a di seei ten de bi ta du soni di Gadu an lobi (Tit. 1:16). Paulosu an bi dë kuma dee hedima u dee Dju keiki. An bi ta luku un lei u di Wöutu u  Gadu a o biibi ku undi an o biibi. A bi dë kabakaba u lei sëmbë hii soni u di Wöutu u Gadu, söseei a bi dë kabakaba u libi ku hii soni di a bi lei.​—Tjab. 20:27.

3. A dë sö taa u musu sabi hii soni ufö u sa dë seiki taa u dë a di tuutuu lei ö? (Luku di pisi „ Dee wooko u Jehovah ku dee soni dee a ta pakisei hia tee taa sëmbë an sa konda de”.)

³ So sëmbë ta taki taa i musu sa feni piki u hii soni te i dë a di tuutuu lei, aluwasi ee di Bëibel an ta taki wan apaiti soni u di soni di wan sëmbë hakisi. Ma sö a musu dë u? Boo luku andi Paulosu bi taki u di soni aki. A bi da dee baaa ku dee sisa taanga u de „wegi hii soni luku ee de dë u Gadu tuu.” Ma a bi taki tu taa sömëni soni dë di an bi kaba fusutan (1 Tes. 5:21). Paulosu bi taki taa: „Wan pikiwan nöö wë u ta sabi . . . Wa ta si soni limbolimbo eti e, ma u ta si soni vitiviti sö” (1 Kol. 13:9, 12). Paulosu an bi kaba fusutan hii soni, nöö sö a dë ku u tu. Ma a bi fusutan dee möön fanöudu lei u Jehovah. Dee soni dee Paulosu bi sabi bi tjika faa fusutan taa a dë a di tuutuu lei!

4. Andi u sa du fuu sa möön dë seiki taa u dë a di tuutuu lei, nöö andi woo luku?

⁴ Wan soni di u sa du fuu dë seiki taa u dë a di tuutuu lei, hën da fuu maaka di fasi fa Jesosi seti di tuutuu lei ku di fasi fa Jehovah Kotoigi ta dini Gadu a di ten aki. A di woto aki woo si taa dee tuutuu Keesitu sëmbë an ta dini poipoi gadu, woo si tu taa de ta lesipeki Gadu në, de lobi di tuutuu lei, söseei taa de lobi de na de gaanfa.

5. Andi u sa lei a Jesosi te a nama ku di fasi fa u musu dini Gadu, nöö unfa u sa du di soni di a taki?

⁵ Jesosi bi lobi Jehovah gaanfa seei. Fëën mbei a bi ta dini Jehovah wanwan. A bi ta du di soni aki di a bi dë a liba ala, söseei di a bi  ko a goonliba aki (Luk. 4:8). Jesosi bi piki dee bakama fëën taa de seei musu ta dini Jehovah wanwan. Na wan daka seei Jesosi nasö dee bakama fëën bi wooko ku pindi a di dini di de bi ta dini Jehovah. Jehovah da wan jeje. Fëën mbei na wan sëmbë sa mbei wan soni di ta djei Jehovah (Jes. 46:5). Ma unfa a dë ee wan sëmbë mbei wan pindi u wan sëmbë di a ta si kuma wan santa sëmbë, nöö a tjökö kini a goon begi ën? Jehovah bi da dee sëmbë fëën teni wëti u de hoi. Di u tu bi ta taki taa: „Wan musu mbei wan pindi di djei wan soni di dë a mundu ala, [nasö] a goonliba aki . . . Wan musu tjökö kini a goon begi de” (Ëki. 20:4, 5). Dee sëmbë dee ta kë du soni di ta kai ku Gadu, ta fusutan taa Gadu an kë fuu dini pindi.

6. Na ambë baka dee Jehovah Kotoigi ta waka te a nama a di fasi fa de ta dini Gadu?

⁶ Dee könima dee ta öndösuku soni bi taki taa dee fesiten Keesitu sëmbë bi ta dini Gadu wanwan. Wan buku bi taki taa dee Keesitu sëmbë an bi kë pindi seepiseepi a dee kamian ka de ta dini Gadu. A di ten aki, dee Jehovah Kotoigi ta si di soni aki di seei fasi nöö. Wa ta tjökö kini a goon begi pindi nasö woto soni, wa ta begi dee ëngëli, söseei wa ta begi Jesosi tu. Wa ta si di faaka ku woto soni u wan köndë kuma wan apaiti soni di u musu dini. Aluwasi andi ta pasa, u dë kabakaba u piki Jesosi buka. A bi taki taa: „Ja musu begi na wan oto soni a mundu möön leki Gadu i Masa.”​—Mat. 4:10.

7. Na un fasi dee Jehovah Kotoigi tooka ku dee woto biibi?

⁷ A di ten aki, sömëni sëmbë lo’ u haika dee nëbai keiki fesima. De lobi de sö tee taa a djei kuma dee keiki fesima de ta dini. Sömëni sëmbë nango a di keiki u de, sëmbë ta bai dee buku u de, söseei de ta da de hia möni. So sëmbë ta biibi hii soni di dee fesima aki ta taki. A djei kuma aluwasi ee Jesosi saka ko a goonliba aki ko taanpu a de fesi, tökuseei de an o wai ku ën möön leki fa de ta wai te de si di keiki fesima u de. Ma dee sëmbë dee ta dini Gadu a di bunu fasi, an ta waka a libisëmbë baka. Hii fa u ta lesipeki dee baaa dee ta tei fesi, tökuseei u ta hoi di soni di Jesosi bi taki a pakisei. A bi taki taa: „Un tuu dë baaa ku baaa makandi” (Mat. 23:8-10). Wa ta dini libisëmbë, aluwasi ee de da keiki fesima, nasö ee de da tiima u köndë. Söseei wa ta du soni u lei taa u ku de dë a wan së. Wa ta tei së ku politiki soni u di köndë. Te u ta hoi dee wëti aki, nöö u ta lei taa u ku dee woto sëmbë dee ta taki taa de da Keesitu sëmbë tooka.​—Joh. 18:36.

8. Unfa u sabi taa Jehovah kë fuu tja gafa ko da di në fëën, söseei taa a kë fuu heepi woto sëmbë u de ko sabi ën?

⁸ Jesosi bi taki taa: „Taata o, be di në fii bai e.” Jehovah bi piki di begi u Jesosi. Jehovah bi taki taa a o mbei di në fëën ko santa (Joh. 12:28). Di Jesosi bi ta du di diniwooko fëën a goonliba aki, a bi ta tja gafa ko da hën Tata në (Joh. 17:26). Fëën mbei dee tuutuu Keesitu sëmbë ta si ën kuma wan gaandi u kai Gadu në, söseei u heepi woto sëmbë u de ko sabi di në fëën.

9. Unfa dee fesiten Keesitu sëmbë bi lei taa de ta lesipeki Gadu në?

⁹ Kölö sö baka di de seti di Keesitu kemeente, hën Jehovah pii sëmbë di an bi dë Isaëli sëmbë u de ko sëmbë fëën (Tjab. 15:14). Dee fesiten Keesitu sëmbë bi wai seei u wooko ku Gadu në, söseei de bi wai u heepi woto sëmbë u de ko sabi hën në. Dee Apösutu ku dee woto bakama u Jesosi bi ta wooko ku di në u Gadu te de bi ta du di  peleikiwooko, söseei di de bi ta sikifi di Bëibel. * A di fasi aki de bi lei taa de bi dë dee sëmbë dee ta heepi woto sëmbë u de ko sabi Gadu në.​—Tjab. 2:14, 21.

10. Unfa u sabi taa dee Jehovah Kotoigi da dee sëmbë dee ta heepi woto sëmbë u de ko sabi Gadu në?

¹⁰ Dee Jehovah Kotoigi ta lesipeki di në u Gadu ö? Boo luku di soni aki möön fini. A di ten aki, sömëni keiki fesima ta du hii soni di de sa, u sëmbë an sabi taa Gadu abi wan në. De puu di në a so Bëibel. So u de an ta kai di në u Gadu te de ta hoi keiki. * A dë gbelingbelin u si taa dee Jehovah Kotoigi da dee sëmbë dee ta lei taa de ta lesipeki di në u Gadu. U ta heepi sëmbë u de ko sabi Gadu në. Woto keiki an dë di ta du di soni aki kumafa u ta du ën. U da Jehovah Kotoigi, nöö u ta lei taa Kotoigi fëën u dë tuutuu! (Jes. 43:10-12) U doloki möön leki 240 milion u di Bijbel​—Nyun-Grontapuvertaling. A di Bëibel aki u buta di në Jehovah a hii dee kamian ka woto sëmbë bi puu ën. Boiti di dë u ta sikifi woto buku di u ta puu buta a möön leki 1000 peipei töngö, nöö a dee buku dë di në Jehovah dë u feni.

11. Unfa dee fesiten Keesitu sëmbë bi lei taa de lobi di tuutuu lei?

¹¹ Jesosi bi lobi di tuutuu lei. Di tuutuu lei  da di lei u Gadu ku dee soni di Gadu o du da u. Di fasi fa Jesosi bi ta libi bi lei taa a bi ta biibi dee soni dee a bi ta lei, nöö a bi ta konda soni u di lei aki da woto sëmbë (Joh. 18:37). Dee tuutuu bakama u Jesosi lobi di tuutuu lei tu (Joh. 4:23, 24). Apösutu Petuisi bi taki taa di Keesitu biibi da dee „bumbuu lei u Gadu dee a buta da u” (2 Pet. 2:2). U di dee fesiten Keesitu sëmbë bi lobi di tuutuu lei, mbei de an bi ta haika keiki lei, söseei de an bi ta haika sëmbë di bi ta ko ku di u deseei pakisei. De an bi ta hoi guwenti di an bi kai ku di tuutuu lei tu (Kol. 2:8). Wë a di ten aki, dee tuutuu Keesitu sëmbë ta mbei möiti u „waka a di pasi ta piki di lei u Masa Gadu”. Hii soni di de ta biibi kumutu a di Wöutu u Gadu, söseei de ta hoi dee wëti fëën.​—3 Joh. 3, 4.

12. Andi dee baaa u di Tii Kulupu ta du te de si taa de musu tooka wan soni a di fasi fa u ta fusutan wan Bëibel lei, nöö faandi mbei de ta du di soni aki?

¹² Dee Jehovah Kotoigi an ta taki taa hii juu de ta fusutan hii soni di sikifi a di Bëibel. A bi pasa taa de bi mbei föutu a di fasi fa de bi fusutan wan Bëibel lei, söseei a di fasi fa de bi seeka soni a di kemeente. Di soni dë an musu foondo u. U di di Bëibel ta taki taa dee sëmbë u Gadu o fusutan dee lei u Bëibel möön bunu möön di ten ta pasa (Kol. 1:9, 10). Pikipiki Jehovah ta mbei u ko sabi di tuu. Nöö u musu wakiti ku pasensi fuu fusutan di tuutuu lei möön bunu (Nöng. 4:18). Te dee baaa u di Tii Kulupu si taa u musu tooka di fasi fa u ta si wan soni, nasö taa u musu tooka di fasi fa u ta du wan soni, nöö de ta tooka soni wantewante. Sömëni keiki fesima ta tooka di fasi fa de ta si soni, u di de kë mbei soni kai ku dee sëmbë dee ta ko a di keiki u de, nasö de ta tooka soni sö taa dee sëmbë u di goonliba aki lobi de. Ma dee Jehovah Kotoigi ta tooka soni u di de kë taa de ku Gadu musu dë mati, söseei u di de kë dini Gadu a di fasi fa Jesosi bi ta du ën (Jak. 4:4). Wa ta tooka soni u di soni musu kai ku di fasi fa dee sëmbë u di goonliba aki ta si soni, ma u ta tooka soni u di u ta fusutan dee lei u Bëibel möön bunu. Awa, u lobi di tuutuu lei!​—1 Tes. 2:3, 4.

13. Un fasi dee tuutuu Keesitu sëmbë musu möön abi, nöö unfa dee Jehovah Kotoigi ta lei taa de abi di fasi dë?

¹³ Dee fesiten Keesitu sëmbë bi abi sömëni bunu fasi, ma di fasi di sëmbë bi ta möön si a de da lobi. Jesosi bi taki taa: ’Te un ta lobi unuseei, nöö hii sëmbë o si taa bakama u mi gbelin un dë’ (Joh. 13:34, 35). A di ten aki, dee Jehovah Kotoigi a hii së u goonliba lobi de na de, söseei de ta libi fiifii makandi. Wa dë kuma dee woto keiki. Hii fa u kumutu a peipei köndë, nasö peipei lö, tökuseei u ta libi fiifii ku useei kuma wan famii. Te u dë a dee komakandi fuu, a di keling-komakandi fuu, nasö a dee könklësi fuu, nöö u ta si unfa dee baaa ku dee sisa ta lei taa de lobi de na de. Di soni aki ta mbei u dë seiki taa u ta dini Jehovah a wan fasi di ta kai ku ën.

14. Unfa u sa lei taa u lobi useei gaanfa, te u luku Kolosën 3:12-14?

¹⁴ Di Bëibel ta da u taanga fuu ’ta lobi u na u makandi gaanfa’ (1 Pet. 4:8). Wan fasi fa u sa lei taa u lobi useei da te u ta da useei paadon, söseei te u ta mbei möiti u libi fiifii ku useei go dou. U musu abi di guwenti u da dee baaa ku dee sisa fuu soni, söseei u musu abi di guwenti u kai de ko a u pisi, aluwasi ee de bi du wan soni di hati u. (Lesi Kolosën 3:12-14.) Te u ta lobi useei, nöö u ta lei taa u da tuutuu Keesitu sëmbë.

15. Na un woto fasi u ta waka a dee fesiten Keesitu sëmbë baka?

¹⁵ U ta djeesi dee fesiten Keesitu sëmbë a woto fasi tu. Leti kuma dee fesiten Keesitu sëmbë useei seti soni a di ölganisaasi fuu. U abi baaa di ta du di sëndëlengi wooko, u abi gaanwomi, ku dinai (Fil. 1:1; Tit. 1:5). Söseei leti kuma dee fesiten Keesitu sëmbë, u ta hoi dee wëti u Jehovah di nama ku di duumi di womi ku mujëë ta duumi ku deseei, söseei u ta hoi dee wëti di nama ku di tööu libi. U ta hoi dee wëti dee nama ku buuu, söseei u ta tjubi di kemeente da sëmbë di an ta kë hoi dee wëti u Gadu.​—Tjab. 15:28, 29; 1 Kol. 5:11-13; 6:9, 10; Heb. 13:4.

16. Andi u ta lei u di soni di sikifi a Efeise 4:4-6?

¹⁶ Jesosi bi taki taa sömëni sëmbë bi o ta taki taa de da bakama fëën, ma na hii de tuu bi o dë bakama fëën tuutuu (Mat. 7:21-23). Di Bëibel bi piki u a fesi taa a dee lasiti daka, nöö sömëni sëmbë o ta „mbei taa de ta nama ku Gadu” (2 Tim. 3:1, 5). Ma di Bëibel ta piki u gbelingbelin taa „wan biibi nöö” ta kai ku Gadu.​—Lesi Efeise 4:4-6.

17. Ambë a di ten aki ta waka a Jesosi baka, söseei ambë dë a di tuutuu lei?

¹⁷ Ambë a di ten aki ta du soni di ta lei taa de dë a di tuutuu lei? Wë u bi taki u wantu soni kaa. U bi taki u di fasi fa Jesosi bi taki taa u musu dini Gadu, söseei u bi si taa dee fesiten Keesitu sëmbë bi ta du dee soni dee Jesosi bi taki. Dee Jehovah Kotoigi ta lei taa de abi di tuutuu lei. A dë wan gaandi u dë sëmbë u Jehovah, söseei u ko sabi soni u Jehovah ku dee soni dee a o du da u! Wë boo du hii soni di u sa du, u fika a di tuutuu lei.