1. Ni kiki kili mukulengia bantu baye bavulunghana?

LOONU, kuli ma diini engi ali aikuuta a Kikristu kabili ali ailanda nangue ali amupupa Leeza mu kisinka. Keekio, i kili mukulengia bantu bengi bavulunghane! Bali baiipuzia eevi: “Eba, kulisie diini imo ya kisinka ao ma diini onse ali amusaansamusia Leeza?” Eba, fwe beene tusininkiziizie saana nangue tuli twasambilizia kisinka, kabili nangue nzila ya kupupa ya Bakasininkizia Bakue Yehova i nzila imosie iitabiilue na Yehova? Eba, kunti kyakitika kakiine kumana bintu bisininkiziizie evio? Ale, tumone bintu bisininkiziizie.

2. Kukoonkana ni 1 Batesalonika 1:5, juu ya ki mutumua Paulo waali wasininkiziizie nangue waali wazumiine kisinka?

² Mutumua Paulo waali waasininkiziizie saana nangue azumiine kisinka. (Soma 1 Batesalonika 1:5 *.) Tabanga wazumiine evio, paantusie kisinka kyaamulengiizie eyunvue buino. Paulo waali wasambilila Mulandu Wakue Leeza kwa mute. Waali wazumiine nangue ‘kila Lileembo litunguluilue na mupasi wakue Leeza.’ (2 Tim. 3:16, NWT) Weene, waasambiliile ki? Mu Maleembo, Paulo waasaangilemo busininkizio busipalile kukaanua, bulangiliile nangue Yesu i Masia waalailue, bobo busininkizio bwaakeenue na bantunguluzi ba diini ya Bayuda. Baali balanda nangue baali babasambilizia bantu kisinka palwakue Leeza, inzi kabili kuya bakita bintu bisiizi kutona Leeza. (Tit. 1:16) Kupusana ni babo bantu, mutumua Paulo taali watoolela bintu bili mu Mulandu Wakue Leeza byapalile kuzumina. Waali walengele kusambilizia ni kubombia “masoke onse akue Leeza.”​—Miil Bat. 20:27, NWT.

3. Eba, tupalile kuya twamanine byasuko bya kila kiipuzio eevi kulangilila nangue tumanine kisinka? (Mona ni kisanduku kilandile “Miilo Yakue Yehova ni malanga Akue​—‘Ni Bingi Saana te Bili na Mwakulandila.’”)

³ Bantu bange bali batontonkania nangue diini ya kisinka ipalile  kuya yaasuka kila kiipuzio, atasie keelia kisilondolwelue mu Bibilia. Eba, keekio kunti kyakitika? Mona mufuano wakue Paulo. Waabakinkiziizie bazumizi nakue nangue “Sininkizie bintu byonse,” inzi, waaitabiziizie nangue kwali bintu bingi byaasyaaunvuile. (1 Bat. 5:21, NWT) Waaleembele eevi: “Kumana kwetu te kupuililikile.” Kabili waaongeziizie eevi: “Musango utumweneenemo leenu uli nga kiizino [kio] kili kyalangisia lukebu kivuuvuutila.” (1 Bakor. 13:9, 12) Paulo taali wamanine kila kantu, ni fwefue te tumanine kila kantu. Inzi, Paulo waamanine kisinka kya musinzi palwakue Yehova. Waali ni busininkizio bwatosiizie bulangiliile nangue amanine kisinka!

4. Kunti twakita siani eevi kusininkizia nangue tumanine kisinka, kabili tuli kulondoluela ki palua Bakristu ba kisinka?

⁴ Kupalania mufuano wa kupupa wabiikilue na Yesu ni nzila ya kupupilamo ikoonkele Bakasininkizia Bakue Yehova loonu, kuli pakati ka nzila imo ya kutukwasia kukila kusininkizia nangue tumanine kisinka. Mu leeli lyasi, tuli kumona nangue Bakristu ba kisinka (1) basuulile kupupa mikisi, (2) bali bakindika liina lyakue Yehova, (3) batonene kisinka, kabili (4) batoneene saana.

5. Twasambilila ki kuli Yesu palua nzila iweeme ya kumupupa Leeza, kabili kunti twabombia siani beelia byaasambiliziizie?

⁵ Paantu Yesu waali wamutonene saana Yehova, waali wamupupasie weene musita lwabanga wali ku muulu ni musita lwabanga wali pa kyalo. (Luk. 4:8) Waabasambiliziizie basambi bakue ni beene baye bamupupasie Yehova bunke. Yesu aosie basambi bakue, te baaeziizie ata kaniini kubombia mikisi mu lupupo lwabo. Paantu Leeza ni Mupasi, tekuli kintu kili kuviinda kukita muntu kipalile kupalaniiwa kuli Yehova! (Is. 46:5) Ale palua kukita mikisi ya bantu bali bakuutua nangue batakatiifu, ni kutendeka  kuipepela? Mu elia mizilo likumi, Yehova waalandile eevi mu muzilo wa bubili: “Te upalile kwikitila mukisi ubaazile ao kintu kyonse kipaleene ni kintu kili koolia ku muulu ao kili paanu pansi pa kyalo . . . Te upalile kubifuinamina.” (Kuf. 20:4, 5) Ezio milandu yunvuikile buino ku bantu batonene kumusaansamusia Leeza.

6. Bakasininkizia Bakue Yehova bakoonkele mufuano wa kupupa wa baani?

⁶ Bantu basomeene mpunda ya maasi a kale, bali balanda nangue mu nsita ya batumua, Bakristu babanga bamupupasie Leeza bunke. Kwa mufuano, kitabu kimo kilandiile palua mpunda ya kale, kilandile nangue Bakristu ba ku ntendeko, beene “nga baakeene” malanga a kubombia mikisi mu fuasi ya kupupilamo. Loonu, Bakasininkizia Bakue Yehova bakoonkele mufuano waabiikilue na Bakristu ba mu miaka mia ya ku ntendeko. Tetwizi kupepela mikisi ya “batakatiifu” ao bamalaika; aosie kupepa kuli Yesu. Kabili, tetwizi kupepela drapo ao kukita kintu kinge eevi kupupa buteeko bwetu. Anzia kine kuli kwaluka ki, tupinguile kukindika milandu eezi yakue Yesu: “Pupa Mulopue [Yehova] Leeza obe.”​—Mat. 4:10.

7. Zimbula bintu bilangiliile paswetele nangue Bakasininkizia Bakue Yehova bebeleele saana ni ma diini ange.

⁷ Loonu, bantu bengi bali batona kubatuilizia bantunguluzi ba ma diini bamanikile saana. Bali babatasia ni kubatapilila saana babo bantunguluzi nga eveliasie bali mukubapupa. Bantu bengi bali baya ku tunisa twabo ni kufumia nfalanga ingi ya kubapeela babo bantunguluzi ao yakukwasia kuteania kwabo. Bantu bange bali bazumina kila kintu kili kyalanda bantunguluzi babo. Bali basekelela saana kubamona bantunguluzi babo nga evelia vibali kunvua kine bamumona Yesu! Kupusana ni babo bantu, baalia bali bamupupa Yehova, tebeezi kukoonka bantu. Anzia tuli twabakindika baalia bali batutungulula, twitabiile milandu yaasambiliziizie Yesu ilandile eevi: “Mwe bonse muli balupua.” (Mat. 23:8-10, NWT) Fwefue tetwizi kupupa bantu, anzia baye bali bantunguluzi ba ma diini ao bakateeka ba kyalo. Kabili, tetwizi kukwasia ma diini abo ao mipaango yabo ya politike. Tetwizi kukwasia kipande ata kimo kya politike, kabili twitengele ni kyalo. Mu bebio bintu byonse, fwefue twibeleele saana ni ma diini ali aikuuta nangue a Kikristu.​—Yoan. 18:36.

8. Ni kiki kyatukwasia kwinika nangue Yehova atonene liina lyakue lilumbaniiwe kabili limanike ku bantu bonse mu kyalo?

⁸ Lwendo lumo, Yesu waapepele eevi: ‘We Tawe [Baba] lumbania liina lyobe.’ Yehova muine waasukile leelio lipepo na lizui likata kufuma ku muulu, walaya nangue wakaba kulumbania liina lyakue. (Yoan. 12:28) Yesu waalumbaniizie liina lyakue Baba wakue mu miilo yakue yonse ya kusimikila. (Yoan. 17:26) Pakaako, Bakristu ba kisinka bali bamona kuya lyali lisyuko kubombia liina lyakue Leeza ni kubabuilako bange palua liina leelio.

9. Bakristu ba mu miaka mia ya ku ntendeko baalangiliile siani nangue babanga bakindikile liina lyakue Leeza?

⁹ Mu miaka mia ya ku ntendeko, Yesu wasyavyelue, musita uniini kisia kilonghaano kya Kikristu kutendeka, Yehova ‘waapoozele maano mu kwisaakuila bantu bakue [bantu palua liina lyakue, NWT] pa bazima.’ (Miil Bat. 15:14) Babo Bakristu ba mu miaka mia ya ku ntendeko baali baitoneena kubombia liina lyakue Leeza ni kukwasia bange balimane. Baali babombia liina lyakue Leeza mu miilo ya kusimikila ni lubaali baleemba bitabu bili mu Bibilia. * Baailangiliile nangue kakiine babanga bali bantu palua liina lyakue Leeza.​—Miil Bat. 2:14, 21.

10. Ni kiki kisininkiziizie nangue Bakasininkizia Bakue Yehova beenesie i bali mukulengia liina lyakue Yehova limanike?

 ¹⁰ Eba, Bakasininkizia Bakue Yehova i bantu palua liina lyakue Yehova? Mona bintu bisininkiziizie evio. Loonu, bantunguluzi bengi ba ma diini, bali bakita maka abo onse eevi kufiika kisinka kilangiliile nangue Leeza ali ni liina lyakue lya bunke. Bali bafumia liina leelio mu mpilibulo ya ma Bibilia abo, ni lunge kabili bali bakaania kubombia liina leelio mu makanisa abo. * Kimwenekelesie paswetele nangue Bakasininkizia Bakue Yehova i bali bakindika saana liina lyakue Leeza. Tuli mukulengia liina lyakue Leeza limanike saana kuliko kikundi kinge kyonse kya diini! Tuli mukwikwinda kuya twaikeele nga vili liina lyetu, i kulanda liina Bakasininkizia Bakue Yehova. (Is. 43:10-12) Tufumiizie ma Bibilia Tafsiri ya Ulimwengu Mupya akilile pa milioni 240. Mpilibulo ezio, ibueziizie liina lyakue Yehova mu fuasi mu lyaafumiiziwe na bakapilibula bange ba Bibilia. Kabili tufumiizie mpapulo iswapiile Bibilia, mu ndimi ikilile pa elufu imo (1 000), kabili mpapulo ezio ibombiizie liina Yehova!

11. Bakristu ba ku ntendeko baalangiliile siani nangue baali batonene kisinka?

¹¹ Yesu waali watonene kisinka, i kulanda kisinka palwakue Leeza ni mipaango Yakue yonse. Buikazi bwakue Yesu bwaalangiliile nangue waali wazumiine kisinka keekio, kabili waakwasiizie bange bamane keekio kisinka.  (Yoan. 18:37) Basambi ba kisinka bakue Yesu baali batonene saana kisinka. (Yoan. 4:23, 24) Petro waakuutile kiketekelo kya Kikristu nangue, “nzila ya kisinka.” (2 Pet. 2:2, NWT) Paantu baali batonene saana kisinka, Bakristu ba ku ntendeko bakeene kukoonka malanga a kidiini, tubeelela twa kale, ni malanga a bantusie asibanga apateene ni kisinka. (Bakol. 2:8) Enka evio ni Bakristu ba kisinka ba mu enu nsiku, bali baikwinda saana ‘kwikala kukoonkana ni kiine,’ kupitila kukita bintu byonse bibazumiine pamo ni buikazi bwabo biye byakoonkele saana beelia bili byalanda Mulande wakue Yehova.​—3 Yoan. 3, 4.

12. Kine Kabungue Kali Katungulula kainika nangue kipalile kwalulula bintu bimo bitwaali twamanine kali kakita siani, kabili juu ya ki kali kakita evio?

¹² Bantu bakue Leeza loonu, tebeezi kulanda nangue lyonse bali basaangua bamanine kila kantu kali mu Bibilia. Lunge, bali balondolola ovio lisambililo lili mu Bibilia, ao nzila ya kuteaniiziamo kilonghaano. Keekio te kipalile kutupapia. Maleembo ali alanda paswetele nangue bantu bakue Leeza bali baya bamana buino kisinka mu kupita nsita. (Bakol. 1:9, 10) Yehova ali waya walangilila kisinka bukebuke, kabili tupalile kuya twapembeele mpaka tufikiile kunvua buino kisinka. (Tus Maf. 4:18) Musita Kabungue Kali Katungulula lukali kainika nangue nzila itwaaunvuiliilemo kintu kimo ao nzila ituli twakitilamo kintu kimo ipalile kupilibulua, kali kaalulula bila kukokola. Ma diini engi loonu, ali aalulula masambilizio abo paantu atonene kusaansamusia bantu bali baya moomo, ao eevi akile kumanika ni kutonua na bantu mu kyalo. Inzi, fwefue Bakasininkizia Bakue Yehova tuli twakita bupilibuko paantu tutonene kumupalama Leeza ni kumupupa nga evelia vyaali vyakita Yesu. (Yak. 4:4) Tetwizi kwalulula bintu paantu malanga a bantu ba mu kyalo aakyaluluka, inzi tuli twaalulula bintu paantu twaakyunvuisia Bibilia. Tutonene kisinka!​—1 Bat. 2:3, 4.

13. Zimbula mibeele ya mana saana ili yalangilila Bakristu ba kisinka. Mibeele ezio ili yamoneka siani ku Bakasininkizia Bakue Yehova loonu?

¹³ Bakristu ba ku ntendeko baali bamanikile kupitila mibeele ingi iweeme, inzi, baali bamanikile saana kupitila ntono. Yesu waalandile eevi: “Paantu kine mwatonana, bantu bonse bali kumana nangue muli basambi bane.” (Yoan. 13:34, 35) Loonu mu kyalo kyonse Bakasininkizia Bakue Yehova bali mukusekelela ntono ni buumo. Tupuseene ni bantu ba ma diini ange onse paantu tuli nga bantu ba mu lupua lumo anzia kine tufumine mu byalo paleepale ni mibeele ipusene-puseene ya buikazi. Tuli twaimwena ntono ezio ikata ku kulonghaana, ku kulonghaana kwa muputule, ni ku kulonghaana kunge kukata. Ezio ntono ili yakila kutusininkiziizia nangue tuli twamupupa Yehova mu nzila yatonene.

14. Nga vilandile lileemba lya Bakolosai 3:12-14, ni nzila ki ya mana ituli kuviinda kubalangililamo bange ntono ya kisinka?

¹⁴ Maleembo ali atusoka tuye ‘twatoneene saana.’ (1 Pet. 4:8) Nzila imo ya kulangilila nangue tutoneene saana ni kuya twaeleelana ni kusipikizia bilubo bya bange. Kabili, tuli twakeba fuasi ya kulangilila bonse mu kilonghaano mibeele ya kupeelana ni ya kupokelelana atasie ku baalia bakituluvia. (Soma Bakolosai 3:12-14.) Musita utuli twalangililana ntono ya evio, tuli twasininkizia nangue tuli Bakristu ba Kisinka.

15. Ni biki binge bilangiliile nangue tukoonkele nzila ya kupupa yaabiikilue na kilonghaano kya Kikristu kya mu miaka mia ya ku ntendeko?

¹⁵ Mu nzila inge kabili, tukoonkele nzila ya kupupa yaabiikilue na kilonghaano kya Kikristu kya mu miaka mia ya ku ntendeko. Kwa mufuano mu kuteania kwetu muli mwasaangua bakangalila ba muputule, bakote ni babombi bali babombela. Keekio kilangiliile mipaango yaali yabiikilue na batumua ba mu miaka mia ya ku  ntendeko. (Baf. 1:1; Ti. 1:5) Kabili nga babo Bakristu, tuli twakindika mizilo yakue Yehova palua kulaalana ni kuupana, ni bintu bilandile Leeza palua kubombia milopa, kabili tuli twasuunga kilonghaano eevi te kunti kiinoonue na baalia basiizi kukindika mizilo yakue Leeza.​—Miilo Bat. 15:28, 29; 1 Bakor. 5:11-13; 6:9, 10; Baeb. 13:4.

16. Twasambilila ki kupitila milandu ili mu Baefeso 4:4-6?

¹⁶ Yesu, waalandile nangue bantu bengi bakaba balanda nangue ni basambi bakue, inzi te bonse bakaba bapalile. (Mat. 7:21-23) Maleembo aalandile ntaanzi nangue bantu ba mu nsiku ya mpeleezio bakaba ‘nga bali bapupa.’ (2 Tim. 3:1, 5) Inzi, Bibilia ili yatubuila nangue kulisie “kiketekelo kimo” kiitabiilue na Leeza.​—Soma Baefeso 4:4-6 *.

17. Loonu ni baani bamukoonkele Yesu kabili bali ni kiketekelo kimo kya kisinka?

¹⁷ Ni baani bali ni kiketekelo kimo kya kisinka loonu? Twasambilila bintu bisininkiziizie. Twamona mufuano wa kupupa waasambiliziizie Yesu, kabili ni Bakristu ba mu miaka mia ya ku ntendeko, baakoonkele mufuano wenka ozo. Kyasuko ni kimosie, babo bantu ni Bakasininkizia Bakue Yehova. Kakiine tuli ni lisyuko likata lya kuya twali pakati ka bantu bakue Yehova, kabili twamanine kisinka palwakue Yehova ni mipaango yakue! Kansi tukite maka etu onse eevi kusininkizia kakiine nangue tuzumiine kisinka.