1. Khu ginani vathu nya vangi va dzudzegago mapimo?

MUHUNO gu na ni wukhongeyi nya wungi wu ganeyago gu khuwo makristo, ni gu khuwo wa gu khozeya Nungungulu khu ndziya yi mu tsakisago. Isoso khiso si girago vathu nya vangi va dzudzega mapimo. Avo va gu dzi wudzisa gu khavo: “Ina wukhongeyi moyo basi nya lisine wu gomogo mwendro watshavbo wukhongeyi wu ngu tsakisa Nungungulu?” Ahati ethu ke, ina hi ngu tiyisega gu khethu, kha nga Dzifakazi dza Jehovha, esi hi hevbudzago lisine ni gu khethu ndziya hi khozeyago khiyo Jehovha khiyo basi yi mu tsakisago? Hongoleni hi wona silo nyo khaguri si na hi phasago gu manega ni gu tiyisega gogo.

2. Guya khu 1 Vatesalonika 1:5, khu ginani Pawulo a nga ba a tiyisega gu khuye esi a nga ba a si khodwa lisine?

² Pawulo a di gu tiyisega gu khuye esi a nga ba a si khodwa lisine. (Leri 1 Vatesalonika 1:5.) Uye a di gu khodwa ga mahungu a nga ba a hevbula na siri basi kholu ma nga ba ma mu tsakisa, ganiolu uye a di gu gevisisa gwadi Lito la Nungungulu. Uye a di gu tiyisega gu khuye “Milowo yatshavbo nya Guage yi lovidwe khu tshivba ya Nungungulu.” (2 Thim. 3:16) Ginani egi Pawulo a gi hevbudego avba nya wugevisisi a nga ba a wu gira? Umo nya Milowo, Pawulo tugude silo si nga ba si yeyedza gu khiso khu lisine Jesu a diri Mesiya a tumbisidwego, nigu tugude gu khuye vathangeyi nya wukhongeyi nya Vajudha va di gu veta khu lisabi silo sesi. Avo va di gu ganeya gu khavo va gu hevbudza vathu lisine maningano khu Nungungulu, ganiolu va di gu gira silo si nyenywago khu Nungungulu. (Tit. 1:16) Ganiolu, Pawulo a di si fani ni vathangeyi vava nya wukhongeyi. Uye a di si hathi esi a si vbwetago gu si khodwa umo nya Lito la Nungungulu ni esi a si vbwetigo gu si khodwa. Uye a di dzi emisede gu hevbudza nigu thumisa watshavbo wusingalagadzi wa “Nungungulu.” — Mith. 20:27.

3. Ina hi yede gu mana milhamulo nya satshavbo siwudziso gasi gu tiyisega gu khethu hi li manide lisine? (Wona kwadru yi gu khiyo: “ Makungo ya Jehovha ni esi a si giridego si ‘tade ngudzu nyamba kodza ni gu sayedwa.’”)

 ³ Vathu nyo khaguri va gu pimisa gu khavo wukhongeyi nya lisine wu yede gu si kodza gu hlamula satshavbo siwudziso ambari sile si gu mba hlamudwa umo nya Bhibhiliya. Ina isoso si ngu kodzega? Wona giyeyedzo gya Pawulo. Uye kutside Makristo gu gevisisa “gwadi satshavbo,” ganiolu uye ganede gu khuye gu na ni silo nya singi a nga ba a si si pwisisi. (1 Tes. 5:21) Uye lovide khuye: “Guti gwathu kha [gu] vbeleli . . . ha gu wona kha nga vbalibonatunu nya gupfhurele.” (1 Kor. 13:9, 12) Pawulo a di si pwisisi satshavbo nigu anethu khandri satshavbo hi si pwisisago. Ganiolu, Pawulo a di gu pwisisa lisine maningano ni Jehovha. Esi a nga ba a siti si di gu mu gira a tiyisega gu khuye a di gu li manide lisine!

4. Hi nga tiyisa kharini gukhodwa gwathu nya gu khethu hi li mane lisine, nigu ginani hi na gi wonago maningano khu Makristo nya lisine?

⁴ Hi yede gu tiyisa gukhodwa gwathu nya gu khethu hi li manide lisine. Mweyo nya dzindziya nya gu gire isoso, khu gu hi fananisa giyeyedzo nya wukhozeyi hi tshiyedwego khu Jesu ni esi Dzifakazi dza Jehovha dzi girago muhuno. Ga ndrima yeyi hi na wona gu khethu Makristo nya lisine 1) kha ma khozeyi sifananiso, 2) ma ngu ninga githawo lina la Jehovha, 3) ma ngu gola lisine, ni gu 4) ma ngu haladzana khu gyawo.

5. Ginani egi Jesu a hi hevbudzidego maningano ni gu khozeya Nungungulu khu ndziya nya yadi nigu hi nga thumisa kharini esi a hi hevbudzidego?

⁵ Kha nga olu Jesu a nga ba a haladza ngudzu Jehovha, uye a di gu khozeya Jehovha basi tepo a nga ba a romo ndzadzini ambari tepo a nga ba a romo mafuni. (Luka 4:8) Jesu hevbudzide vapizane vaye gu gira sasimweso. Jesu ni vapizane vaye nyo tumbege gima kha va thumisa sifananiso avba nya wukhozeyi wavo. Nungungulu liphuvbo,  khu kharato mwalo a na sikodzago gu gira gifananiso gi fanago naye. (Isa. 46:5) Ahati ho gira sifananiso nya vathu va wonwago na va agide hi bwe hi gombeya gwavo ke? Avba nya likhumi milayo nya wuvili, Jehovha a di khuye: “U nga tshuki u dzi girela githombe nya guvatwe, mwendro gifananiso nya esi si guromo vbatshani, ndzandzini, mwendro nya esi si guromo vbavbatshi, mafuni . . . Khu na nga khizima mbeli nya silo soso.” (Ekiso. 20:4, 5) Ava va vbwetago gu tsakisa Nungungulu va ngu pwisisa gu khavo uye kha vbweti gu khuye hi khozeya sifananiso.

6. Khu gevbini giyeyedzo nya wukhozeyi egi Dzifakazi dza Jehovha dzi gi landrisago muhuno?

⁶ Vahevbuli nya matimu va ganede gu khavo dziteponi dza vapostoli, Makristo ma di gu khozeya Nungungulu basi. Khu giyeyezo, libhuku nya matimu, lo yeyedza gu khilo Makristo yaya ma di gu “nyenya” gu thumisa sifananiso ga malanga nya wukhozeyi. Muhuno, Dzifakazi dza Jehovha dzo landra giyeyedzo gya Makristo ya lizana myaga nyo pheye. Ethu kha hi gombeyi ga sifananiso “sa va nya guaga” mwendro sa dzingilosi, nigu kha hi gombeyi ambari ga Jesu. Ni gu ethu kha hi gwimbi bhandeira mwendro gu gira silo si girago gu khatsi ho khozeya litigo lathu. Ambari vathu va gu zama gu gira ni gevbini, ethu hi dzi emisede gu engisa malito ya Jesu ma gu khayo: “Khozeya Jehovha Nungungulu wago.” — Mat. 4:10.

7. Khu gwevbini gu hambana gu gomogo avba nya Dzifakazi dza Jehovha ni wumbe wukhongeyi?

⁷ Muhuno, vathu nya vangi va ngu gola gu landreya vathangeyi nya dzitshetshe, a gu vathu va tidwago ngudzu. Khu kotani nya olu va golago ngudzu vathangeyi vava nya dzitshetshe, dzimbe dzitepo si ngu va gira va va khozeya. Vathu nya vangi va ngu hongola dzitshetsheni dzavo, va renga mabhuku yawe ni gu ningeya dzitsapawu nya dzingi gasi gu seketeya hengeledzano yawe. Vathu vo khodwa satshavbo esi vathangeyi va ganeyago. Kha hi dziti ni gu khethu edzi vathu vava va tsakago khidzo khu vathangeyi nya dzitshetshe va di hadzi tsaka khu ndziya yamweyo a gu tshuka Jesu a va vboheya. Ganiolu, ava va khozeyago Nungungulu kha va landri mavbanyelo nya vathu. Lisine gu hi ngu ninga githawo ava va thangeyago, ganiolu tepo yatshavbo ho dundruga esi Jesu a hi hevbudzidego. Uye a di khuye: “Enu mu va na ndriye ni ndriye.” (Mat. 23:8-10) Ethu kha hi khozeyi vathu, ambari nari vathangeyi nya dzitshetshe mwendro dzipfhumu. Nigu ethu kha hi seketeyi esi va girago. Gu diga isoso, ethu kha hi dzi bedzedzeyi umo nya politika nigu ho simama gu mba gira gipandre nya litigo leli. Ga satshavbo silo sesi, somo guagani gu khiso ethu hi hambanide ni wumbe wukhongeyi wu dzi thulago gu khuwo Makristo. — Joh. 18:36.

8. Ho dziti kharini gu khethu Jehovha o vbweta gu khuye hi dhumisa lina laye hi bwe hi li tivegisa ga vambe?

⁸ Ga giemo nyo khaguri, Jesu a di gombeya khuye: “Baba dhumisa lina lago.” Khu kharato, Jehovha a di hlamula nombelo wa Jesu khu lito nyo khugege khuye a di hadzi dhumisa lina laye. (Joh. 12:28) Ndrani nya thumo waye nyo tshumayele, Jesu dhumiside lina la Papayi waye. (Joh. 17:26) Khu kharato, lithomo ga Makristo nya lisine gu ranwa khu gu thumisa lina la Nungungulu va bwe va li tivegisa ga vambe.

9. Makristo ya lizana myaga nyo pheye ma yeyedzide kharini gu khayo ma di gu ninga githawo lina la Nungungulu?

⁹ Ga lizana myaga nyo pheye, hwane nya gu ba libandla nyo pheye nya Wukristo li wumbidwe, Jehovha a di hatha “vbakari nya va nya mayigo vale va nga ranwago vathu vaye.” (Mith. 15:14) Makristo ya tepo yoyo ma di gu tsaka ngudzu khu gu thumisa lina la Nungungulu ni gu phasa vambe gu liti. Ayo ma di gu thumisa ngudzu lina la Nungungulu tepo ma nga ba ma tshumayela, ni tepo ma nga ba ma lova mabhuku nya Bhibhiliya. * Ayo  ma yeyedzide gu khayo khavo vonga va nga ba va tivegisa lina la Nungungulu. — Mith. 2:14, 21.

10. Ha gu dziti kharini gu khethu Dzifakazi dza Jehovha khidzo dzonga dzi tidwado khu lina la Jehovha?

¹⁰ Ina Dzifakazi dza Jehovha dzi ngu yedwa khu gu ranwa khu lina la Jehovha? Wona esi si na hi phasago gu tiyisega gu khethu ina. Muhuno, vathangeyi nya vangi nya wukhongeyi vo gira satshavbo va si kodzago gasi va si pwadzi lina la Nungungulu. Avo va di bwe va dusa lina la Nungungulu umo nya dzi Bhibhiliya dzawe. Nigu ga siemo nyo khaguri, va ngu himbedzeya gu khavo lina la Nungungulu li thumiswa umo nya dzitshetshe dzawe. * Somo guagani gu khiso Dzifakazi dza Jehovha khidzo basi dzi rungudzago ni gu ninga githawo lina la Jehovha. Wu mwalo wumbe wukhongeyi wu tivegisago lina la Nungungulu nga Dzifakazi dza Jehovha. Hi nga khethu ho gira satshavbo hi si kodzago gasi gu rungudza lina hi ningidwego nya Dzifakazi dza Jehovha. (Isa. 43:10-12) Ethu dza hi duside 240 dzimiliyoni nya dzikopiya ni guvbindra nya wuvbindrugedzeyi nya mafu yatshavbo (Tradução do Novo Mundo da Bíblia Sagrada) wu thumisago lina la Jehovha umo li nga duswa ga dzimbe dzi Bhibhiliya. Ethu gambe hi ngu dusa mabhuku ma seketedwago umo nya Bhibhiliya ma huweleyago lina la Jehovha khu 1000 malimi ni guvbindra!

11. Makristo nyo pheye ma yeyedzide kharini gu khayo ma di gu gola lisine?

¹¹ Jesu a di gu gola lisine, mwendro lisine maningano ni Nungungulu ni makungo yaye. Jesu vbanyide  guya khu lisine nigu phaside vambe gu liti. (Joh. 18:37) Vapizane va Jesu navo va di gu li gola lisine. (Joh. 4:23, 24) Mupostoli Pedro a di bwe a rana wukhozeyi nya Wukristo khuye: “Ndzila nya lisine.” (2 Ped. 2:2) Lihaladzo eli Makristo nyo pheye ma nga ba ma ri nalo, khu lisine li diri likhongolo ngudzu, khu kharato ayo ma di si dzumeyi sihevbudzo nya wukhongeyi, sihena ni mawonelo nya vathu ma nga ba ma si gimbeleyani ni lisine. (Kol. 2:8) Khiso sa simweso si giregago ni Makristo nya lisine muhuno. Ayo ma ngu dzi garadza gu gimbiya lisineni, nigu esi ma si khodwago ni mavbanyelo yawe so dzi seketeya basi umo nya Bhibhiliya. — 3 Joh. 3, 4.

12. Tepo si lombago gu khiso gu vbindrugedzwa mapwisiselo yathu, ginani egi Huwo nyo thangeye yi girago nigu khu ginani?

¹² Dzifakazi dza Jehovha kha dzi ganeyi gu khidzo idzo tepo yatshavbo dzi ngu pwisisa khu gu vbeleya satshavbo esi si lovidwego omu nya Bhibhiliya. Idzo dzi nga phazama gu pwisisa libhuku nyo khaguri nya Bhibhiliya mwendro tepo dzi ningago sileletelo nya edzi libandla li yedego gu thuma khidzo. Isoso kha si yeli gu hi hlamadzisa. Bhibhiliya yi ngu si vega guagani gu khiyo guti nya lisine ga gu engedzeya khu gu gimbiya nya tepo. (Kol. 1:9, 10) Jehovha a gu hi yeyedza lisine vbadugwanavbadugwana, khu kharato hi yede gu vireya khu gu laphisa monyo kala hi li pwisisa gwadi lisine. (Mav. 4:18) Tepo Huwo nya gu thangeye yi wonago gu somo si yedego gu vbindrugedza avba nya ma pwisiselo yathu, mwendro edzi silo si girwago khidzo, iyo ya gu gira guvbindrugedza gogo khu gu vbiredza. Dzitshetshe nya dzingi muhuno, dzi ngu vbindrugedza sihevbudzo sadzo khu gu vbweta gu tsakisa ava va girago gipandre nya dzitshetshe dzawe mwendro khu gu vbweta ndruma omu nya litigo leli. Ganiolu, Dzifakazi dza Jehovha dza gu vbindrugedza silo nyo khaguri gasi gu hi phasa gu hidzimeya vbafuvbi ni Jehovha hi bwe hi mu khozeya khu ndziya hi tshiyedwego khu Jesu. (Jak. 4:4) Ethu kha hi vbindrugedzi silo khu kotani nya olu mawonelo nya vathu ma vbindrugedzago, ganiolu ho gu gira isoso kholu ha gu yi pwisisa gwadi Bhibhiliya. Ethu hi ngu li gola ngudzu lisine! — 1 Tes. 2:3, 4.

13. Khu levbini likhalelo nya lisima li yeyedzidwego khu Makristo ya lizana myaga nyo pheye nigu Dzifakazi dza Jehovha dza gu li yeyedza kharini muhuno?

¹³ Makristo ya lizana myaga nyo pheye ma diri ni makhalelo nya mangi nya yadi. Ganiolu, nya lisima ga yatshavbo gu diri lihaladzo. Jesu a di khuye: “Khavbo vathu va na dzitigo nya gukhavo mu vapizane vangu, mwa gu golanani khu gyanu.” (Joh. 13:34, 35) Muhuno, Dzifakazi dza Jehovha mafuni gwatshavbo dzi ngu dzi buza khu lihaladzo nya lisine ni gupwanana. Ethu hi hambanide ni wumbe wukhongeyi kholu so gira gu khatsi hi va ndranga mweyo ambari hi gu na ni mitumbunugo nyo hambane ni olu hi tago khu ga mayigo nyo hambane. Hi ngu si kodza gu wona lihaladzo lolo umo nya mitshangano yathu nya libandla, umo nya mitshangano nya gipandre ni umo nya dzikongresu. Esi sa gu hi phasa gu tiyisega gu ethu ha gu khozeya Jehovha khu ndziya yi mu tsakisago.

14. Guya khu Vakolosi 3:12-14, khu yevbini ndziya nya lisima hi nga yeyedzanago khiyo lihaladzo?

¹⁴ Bhibhiliya yari khiyo: “Haladzanani khu gyanu nyamba pfhadzedzela.” (1 Ped. 4:8) Mweyo nya dzindziya nyo yeyedze lihaladzo lolo, khu gu hi divaleyana hi bwe hi si vegi gupima avba nya sihoso sa moyo ni moyo wathu. Hi nga vbwetedzeya gambe dzimbe dzindziya nya gu yeyedze wuhindzi ni gu phara gwadi vatshavbo libandlani ambari vale va hi gandridego ginyalana. (Leri Vakolosi 3:12-14.) Tepo hi yeyedzago lihaladzo lolo, ha gu yeyedza gu khethu hi Makristo nya lisine.

15. Khu dzevbini dzimbe dzindziya dzi yeyedzago gu khidzo hi ngu landreya giyeyedzo nya wukhozeyi hi tshiyedwego khu Makristo ya lizana myaga nyo pheye?

¹⁵ Gu na ni simbe silo si yeyedzago gu khiso ethu ha gu landra giyeyedzo nya wukhozeyi, hi  tshiyedwego khu Makristo ya lizana myaga nya gu pheye. Khu giyeyedzo, ethu hi sasamedzidwe khu ndziya yayimweyo ma nga ba ma sasamedzidwe khiyo Makristo ya lizana myaga nya gu pheye. Hi na ni vawoneleyi nya gipandre, madhota ni va phasedzeyi nya libandla. (Filp. 1:1; Tit. 1:5) Nigu, gu fana ni Makristo ya lizana myaga nya gu pheye, ethu hi ngu ninga githawo milayo ya Jehovha maningano ni gu hengeya malawu, mitshadho ni esi Nungungulu a ganeyago maningano khu novba, nigu hi ngu vhikeya libandla ga ava va gu mba vbweta gu landrisa milayo ya Nungungulu.— Mith. 15:28, 29; 1 Kor. 5:11-13; 6:9, 10; Hebh. 13:4.

16. Ginani hi gi hevbulago avba ga malito ma gomogo omu ga Vaefeso 4:4-6?

¹⁶ Jesu ganede gu khuye nya vangi va di hadzi ganeya gu khavo vapizane vaye. Ganiolu, yeyedzide gambe gu khuye khandri vatshavbo va na ganeyago lisine. (Mat. 7:21-23) Bhibhiliya yi hi embede gambe gu khiyo ga matshigu nyo hegise, nya vangi va di hadzi “sayisa giemo nya wukhodwa.” (2 Tim. 3:1, 5) Ganiolu, Bhibhiliya gambe yi ngu si vega guagani gu khiyo gu na ni “gukhodwa gumogo basi” gu tsakedwago khu Nungungulu.— Leri Vaefeso 4:4-6.

17. Khu wevbini tsawa muhuno wu landrisago Jesu ni gu gira wukhozeyi mowo basi nya lisine?

¹⁷ Khu wevbini tsawa wu girago wukhozeyi nya lisine muhuno? Avba nya ndrima yeyi hi wonide esi si nga hi phasa gu tugula. Hi wonide giyeyedzo nya wukhozeyi gi hevbudzidwego khu Jesu gi nga bwe gi landriswa khu Makristo ya lizana myaga nyo pheye. Khu kharato, hlamulo moyo basi. Tsawa wu girago wukhozeyi nya lisine muhuno, Dzifakazi dza Jehovha. Khu lisine, lithomo gwathu gu gira gipandre nya vathu va Jehovha ni guti lisine khu uye ni makungo yaye. Khu kharato, moyo ni moyo wathu yede gu dziemiseya gu simama a bangeleya avba nya lisine nari ni gukhodwa nya gutiye.