1. ¿Jas yuj ay jitsan kristyano mi snaʼa jas oj skʼuluke?

BʼOBʼTA ayni jitsan mil relijyonik bʼa wa xyalawe kʼotele snochuman Kristo sok wa xyalawe ke wa stoyowe ja Dyos ja jastalni lek xyila ja yeʼn. Ja yuj ayni jitsan kristyano bʼa mi snaʼa jas oj skʼuluke sok wa sjobʼo sbʼaje: «¿Ay maʼ kechanta jun relijyon smeranil ma lekni wa xyila spetsanil ja relijyonik ja Dyosi?». ¿Jaxa keʼntiki? ¿Jkʼuʼunejtik maʼ lek ke ja testigoʼik bʼa Jyoba wa xjeʼatik ja smeranili sok ja jastal wa xkatikyi stoyjel ja Dyos ja bʼa jtyempotiki jaʼitani ja jastal lek wa xyila ja yeʼn? ¿Meran maʼ wa xbʼobʼ jkʼuʼuktik lek? La kiltik jastal wa xchiktes ja prebaʼiki.

2. ¿Jas yuj ja jekabʼanum Pablo seguro ay lek ke jani skʼuʼunej ja smeranil? (1 Tesalonicenses 1:5).

² Ja jekabʼanum Pablo skʼuʼani lek ke jani ja smeranil ja jas skʼuʼani (kʼuman ja 1 Tesalonicenses 1:5). Sok sbʼaja jas skʼuʼan leki mini kechanuk yuj gustoʼil. Jani ja jas staʼunej yuja wa xchʼika sbʼaj ja bʼa spaklajel ja yabʼal ja Dyosi. Ja yeʼn wa skʼuʼan ke «yibʼanal ja Yabʼal ja Dyosi jani stojunej soka yipi» (2 Tim. 3:16). Yajni ja Pablo spaklay, staʼani prebaʼik bʼa chikan lek ke ja Jesús yeʼnani ja Mesías kʼapubʼali. Pe ama jachuk, ja olomalik bʼa relijyon judío stsaʼawe bʼa mini oj skise ja prebaʼik jaw. Ja olomalik jaw bʼa chabʼ kara aye wa xyalawe jani jekjiye yuja Dyosi, pe soka jas skʼulaneʼi mini jachukuk xchiktes (Tito 1:16). Ja stukil ja jas skʼulan ja Pablo, ja yeʼn mini stsaʼa jas ita xetʼanik ja bʼa Yabʼal ja Dyos wa skʼana oj skʼuʼuk sok bʼaya miyuki. Ja yeʼn puestoni ajyi bʼa oj sjeʼ sok yajel makunuk «yibʼanal ja jas wa skʼana ja Dyosi» (Hech. 20:27).

3. Bʼa skʼuʼajel lek ke jani kiʼojtik ja smeranili, ¿tʼilan maʼ oj jnatik ja sjakʼjelik yibʼanal ja sjobʼjeliki? (Cha kʼela ja rekwagro « Ja yaʼtelik sok ja spensarik ja Jyoba mastoni jitsan lek yuja janekʼ wa xbʼobʼ ekʼ bʼa jpensartiki»).

³ Ayni jujuntik wa spensarane ke ja relijyon smeranili tʼilani  oj chʼak yayi sjakʼjel yibʼanal ja sjobʼjeliki, sok cha jachnibʼi ja bʼa mi xyayi sjakʼjel jaman lek ja Biblia. ¿Stojol maʼ smajlajel ja jaw? La kiltik ja sjejel bʼa Pablo. Ama ja yeʼn yalyabʼ ja snochumanik Kristo «ilawik ta meran ja jastik junuki», pe chomajkil ja yeʼn snaʼani ke ay jitsan jastik junuk bʼa mi xyabʼ stojolil (1 Tes. 5:21). Ja yeʼn xcholo ke «mi tsʼikanuk ja snajel kiʼojtiki» sok «lajansok ti wantik yiljel bʼa jun takʼin espejo» (1 Cor. 13:9, 12). Ja Pablo mini snaʼa spetsanil, sok cha mini ja keʼntiki. Pe ja yeʼn wani xyabʼ stojolil ja sjejelik mi wokoluk sbʼaja Jyoba, ayni yiʼoj lek snajelil bʼa wa xkoltaji bʼa oj skʼuʼuk lek ke jani yiʼoj ja smeranili.

4. ¿Jastal oj katik tsatsbʼuk ja skʼuʼajel kiʼojtik bʼa jtaʼatiktani ja smeranili, sok jasa oj kiltik ja bʼa artikulo it?

⁴ ¿Jastal oj katik tsatsbʼuk ja skʼuʼajel kiʼojtik bʼa jtaʼatiktani ja smeranili? Jun modo jani yajel slaj sbʼaj ja jastal sjeʼa ja Jesús bʼa stoyjel ja Dyos sok ja jastal wa xkatikyi stoyjel ja testigoʼotik bʼa Jyoba bʼa jtyempotiki. Ja bʼa artikulo it, oj kiltik ke ja meran snochumanik ja Kristo: 1) mi xyaʼteltaye kʼulubʼal Dyos, 2) wa skisawe ja bʼiʼilal Jyoba, 3) wa syajtaye ja smeranili sok 4) jelni syajta sbʼaje.

5. ¿Jas sjejel yaʼa ja Jesús sbʼaja stoyjel ja Dyosi, sok jastal oj bʼobʼ jnochtik?

⁵ Yuja Jesús jel syajta juntiro ja Jyoba ja yuj kechantani yeʼn yayi stoyjel ja yajni ti ajyi bʼa satkʼinal cha jachni ja yajni ti ajyi bʼa luʼum (Luc. 4:8). Cha sjeʼayi ja snebʼumanik bʼa cha a-skʼuluke junxta. Mini ja yeʼn cha mini ja snebʼumanik tojiki yawe makunuk imagenik bʼa stoyjel ja Dyosi. Yuja Dyos jach jastal ikʼ ason, spetsanil ja jas wa skʼulan ja winik bʼa yajel senyaʼuk, mini tʼun xbʼobʼ mojxuk ja bʼa niwan stoyjelali (Is. 46:5). ¿Sok jas wa xpensaraʼantik sbʼaja  skʼulajel imagenik bʼa wa xyawe sbʼiʼiluk santoʼik sok wa xyaweyi reso? Ja bʼa xchabʼil lajune mandari, ja Jyoba yala: «Mokni akʼuluk juna kʼulubʼal dyos ma splanta chikan jasunuk tey bʼa xchaʼanil ja satkʼinali, bʼa yibʼel ja luʼumi ma ja bʼa yibʼel ja jaʼi. Ja weʼn mokni koʼan sbʼaj mekʼan» (Éx. 20:4, 5). Sbʼaja matik wa skʼanawe yajel gustoʼaxuk ja Dyosi ja yaljelik it wani skʼuʼane lek.

6. ¿Jas sjejel wa snochowe ja testigoʼik bʼa Jyoba ja bʼa jtyempotiki?

⁶ Ja matik wa xcholowe ja jas ekʼeli wa snaʼawe ke ja snochumanik Kristo bʼa bʼajtan siglo kechani yaweyi stoyjel ja Dyosi. Jun sjejel, jun libro bʼa wa xcholo sbʼaja bʼajtan snochumanik ja Kristo wa xyala «jelni tuk oj yabʼye» ja kechanta spensarajel yajel makunuk imagenik ja bʼa lugarik wa stoyowe ja Dyosi (History of the Christian Church). Ja bʼa jtyempotiki, ja testigoʼik bʼa Jyoba wani xnochotik ja sjejel bʼa snochumanik Kristo bʼa bʼajtan siglo. Mini xkatikyi orasyon santoʼik ma anjelik, asta mini xkatikyi orasyon ja Jesús. Cha mini xkatikyi stoyjelal jastik wa senyaʼan jun Estado, jastal skʼulajel saludar ja bandera ma tuk jastik. Chikan jas x-ekʼi, puesto ayotik bʼa skʼuʼajel ja yaljelik it bʼa Jesús: «Jaʼ xa toyo ja Jyoba wa Dyosi» (Mat. 4:10).

7. ¿Jasa stukil yiʼoj ja testigoʼik bʼa Jyoba soka tuk relijyoniki?

⁷ Ja bʼa jtyempotiki, jitsan kristyano gustoxta wa snochowe olomalik bʼa relijyonik jel naʼubʼal sbʼaje, sok tʼusan mi xkʼot yaweyi stoyjel. Wa sbʼutʼuweyi jastik ja yiglesiaʼe, wa smanaweyi ja slibroʼe sok wa xyaʼawe jitsan lek takʼin bʼa oj skoltaye. Jujuntik wa skʼuʼane spetsanil ja jas wa xyalaweʼi. ¡Asta lek jaʼ wane yiljel ja Jesusi mini oj gustoʼaxuke jastal jaw! Pe ja meran yaʼtijumik ja Jyoba mini xnochotik jun olomal winik. Ama wa xkisatik ja matik wa stojowotiki, jani wa xkaʼatikan bʼa oj stojotik ja jas yalakan jaman lek ja Jesús: «Ja weʼnlexi puro awermano abʼajex» (Mat. 23:8-10). Mini xkatik pax jastal kʼulubʼal Dyos ja winikeʼi, sea kʼotele olomalik bʼa relijyon ma gobyernoʼik. Sok mini xkoltaytik soka jastik wa skʼulaneʼi, tojni wala ajyitik sok pilan ayotik ja bʼa luʼumkʼinal it. Bʼa spetsanil ja jastik it tukotikni lek ja keʼntik soka kʼoleʼik bʼa wa xyalawe snochumane Kristo (Juan 18:36).

8. ¿Jastal wa xnaʼatik ke ja Jyoba wa skʼana oj katikyi stoyjel ja sbʼiʼili sok oj katikyi snaʼ spetsanil ja kristyano?

⁸ Bʼa jun ekʼele, ja Jesús yayi orasyon: «Tat, toyo jawa bʼiʼili». Ja Jyoba yeʼnani mismo sjakʼayi sok jun tsatsal kʼumal man satkʼinal bʼa skʼapayi ke ojni stoy ja sbʼiʼili (Juan 12:28). Ja bʼa janekʼ tyempo xcholo, ja Jesús yayi stoyjel ja sbʼiʼil ja stati (Juan 17:26). Ja yuj ayni sbʼej smajlajel ke ja meran snochumanik ja Kristo gustoni lek wa xyawe makunuk ja sbʼiʼil ja Dyosi sok yajelyi snaʼ ja tuki.

9. ¿Jastal sjeʼawe ja nochumanik bʼa Kristo bʼa bʼajtan siglo ke wa skisawe ja sbʼiʼil ja Dyosi?

⁹ Ja bʼa bʼajtan siglo, tʼusan tsaʼan yajni kujlajita ja kongregasyon sbʼaja snochumanik ja Kristo, ja Jyoba yaʼa sat «ja matik mi judíoʼuki bʼa oj ya eluk jun chonabʼ bʼa oj yiʼ ja sbʼiʼili» (Hech. 15:14). Ja bʼajtan nochumanik bʼa Kristo jelni gustoʼaxiye yajel makunuk ja sbʼiʼil ja Dyosi sok yajelyi snaʼ ja tuki. Yawe makunuk jaman lek ja sbʼiʼil ja Dyos ja bʼa xcholjeli sok ja yajni stsʼijbʼane ja libroʼik bʼa Biblia. * Sok jachuk sjeʼawe kʼotele jun chonabʼ bʼa oj yiʼ ja sbʼiʼili (Hech. 2:14, 21).

10. ¿Jastik preba kiʼojtik ke ja testigoʼik bʼa Jyoba kʼotele jun chonabʼ bʼa oj yiʼ ja sbʼiʼil ja Jyoba?

 ¹⁰ ¿Kʼotele maʼ ja testigoʼik bʼa Jyoba jun chonabʼ bʼa oj yiʼ ja sbʼiʼil ja Jyoba? La kiltik ja prebaʼik. Ja bʼa jtyempotiki, jitsan olomalik bʼa relijyon skʼuluneje ja janekʼ bʼobʼelyujile bʼa mi oj xchiktese ja sbʼiʼil ja Dyosi. Skusunejekan ja bʼa Biblia sutunejeʼi sok bʼa jujuntik ekʼele stimuneje yajel makunuk ja bʼa jujuntik jas wa skʼulane ja bʼa srelijyone. * Pe chikani lek ke kechan yeʼnle ja testigoʼik bʼa Jyoba wa stoyowe sok wa skisawe ja sbʼiʼil ja Dyosi. Mini ay pilan relijyon jastal keʼntik bʼa wa sjeʼayi ja sbʼiʼil ja Dyos ja janekʼ kristyano wa xbʼobʼi. Wa xkʼulantik ja janekʼ wa xbʼobʼi bʼa kʼotel ja jastalni wa xyala ja jbʼiʼiltiki: testigoʼik bʼa Jyoba (Is. 43:10-12). Kaʼunejtik eluk mas ja 240 miyon Biblia bʼa Traducción del Nuevo Mundo, bʼa wa xya makunuk ja sbʼiʼil ja Dyos, ja Jyoba, ja bʼa lugarik yaʼuneje elkan ja tuk sutumanik bʼa Biblia. Sok wa xkatik eluk juʼunik bʼa Biblia bʼa mas ja 1.000 kʼumalik bʼa wa xya makunuk ja bʼiʼilal Jyoba.

11. ¿Jastal sjeʼawe ke wa syajtaye ja smeranil ja snochumanik ja Kristo bʼa bʼajtan siglo?

¹¹ Ja Jesús jelni syajtay ja smeranili, wa xkʼan kaltik, ja smeranil bʼa Dyos sok sbʼaja jastik wa skʼana oj skʼuluki. Jachni yiʼa ja sakʼanil jastal ja smeranili sok sjeʼayi ja tuki (Juan 18:37). Ja meran snochumanik ja Jesús cha jelni syajtaye ja  smeranili (Juan 4:23, 24). Sok ja jekabʼanum Pedro ya sbʼiʼiluk ja snochumanik ja Kristo ja «bʼej bʼa smeranili» (2 Ped. 2:2). Ja nochumanik bʼa bʼajtan siglo jelni syajtaye ja smeranili, sok ja yuj mi skisawe ja jas sjeʼawe ja tuk relijyonik, ja skostumbre yiʼoje sok ja pensarik yiʼoje ja kristyanoʼik bʼa kontra ay soka smeranili (Col. 2:8). Cha jachni junxta ja meran snochumanik Kristo ja bʼa jtyempotiki wani skʼujolane bʼa «ajyel ja bʼa sbʼejlalil ja smeranili» (3 Juan 3, 4). ¿Jastal modo? Jani wa xyilawe ke ja jas wa skʼuʼane sok ja tikʼe sakʼanil yiʼoje akuerdo ay soka yabʼal ja Jyoba.

12. ¿Jas wa skʼulane ja hermanoʼik matik wa stojowe ja aʼteli yajni wa xyaʼa sbʼaje kuenta bʼa tʼilan ay jas oj tukbʼesxuk, sok jas yuj wa skʼulane?

¹² Ja testigoʼik bʼa Jyoba mini xyalawe ke ayiʼoje jun tojil snajelil bʼa Biblia. Jujuntik ekʼele mini stojoluk xcholuneje jujuntik sjejelik bʼa Biblia ma ja jastal tsoman oj ajyuk ja kongregasyon. Pe ja it mini chamto oj kabʼtik, pes ja Biblia wa xchiktes jaman lek ke ja xchonabʼ ja Dyos takal takal oj yabʼ och stojol ja smeranili (Col. 1:9, 10). Ja Jyoba takal takal wan xchiktesel ja smeranili, ja yuj jelni tʼilan puesto oj ajyukotik smajlajel sok pasensya bʼa jachuk masto oj ijlabʼanuk ja smeranili (Prov. 4:18). Yajni ja hermanoʼik matik wa stojowe ja aʼteli wa xyaʼa sbʼaje kuenta bʼa tʼilan ay jas oj tukbʼesxuk ja bʼa jastal wa xkabʼtik stojoli ma ja jastal wa xkʼulantiki, mini xyawe ekʼ tyempo bʼa skʼulajel ja jas tʼilani. Jitsan iglesiaʼik bʼa wa xyalawe snochumane Kristo ayni wa stukbʼese jun jasunuk bʼa yajel gustoʼaxuk ja maʼ wa xnochjiyeyuji ma bʼa lek oj iljuke yuja kristyanoʼiki. Pe ja testigoʼik bʼa Jyoba wani xkʼulantik bʼa stukbʼesel jun jasunuk bʼa oj mojxukotik mas soka Dyos sok bʼa stoyjel jastalni sjeʼakan ja Jesús (Sant. 4:4). Yajni ay jas wa xtukbʼestik, mi yuj kechan wa xkʼana oj kitik ja jas wa skʼulane ma ja spensare ja kristyanoʼiki, jani yuja kʼotel kabʼtik mas stojol ja jas wa sjeʼa ja Biblia. Wa xyajtaytik ja smeranili (1 Tes. 2:3, 4).

13. ¿Jas modoʼal ja mas tʼilan sbʼaja meran snochumanik ja Kristo, sok jastal wa sjeʼawe ja testigoʼik bʼa Jyoba ja bʼa jtyempotiki?

¹³ Ja nochumanik bʼa Kristo bʼa bʼajtan siglo naji sbʼaje yuj jitsan modoʼalik, pe ja mas tʼilani jani ja yajalkʼujolal. Ja Jesús yala: «Sok ta waxa yajta abʼajex, jach oj snaʼe yibʼanal kristyano ja weʼnlexi kʼotelex jnebʼumanik» (Juan 13:34, 35). Ja bʼa jtyempotiki, ja testigoʼik bʼa Jyoba wa xyawe el slekilal ja yajalkʼujol sok ja ajyel tsoman soka bʼa tuk chonabʼiki. Ja stukil ja keʼntik soka tuk relijyoniki, jani yuja kʼotelotik jun meran pamilya bʼa mini stimawotik ja jastal kʼotelotiki, ja jrasatiki sok ja jchonabʼtiki. Sok wa xkilatik ja tikʼe yajtanel jaw ja bʼa jreuniontiki sok ja bʼa kasambleʼatiki. Ja it wani xya jkʼuʼuktik lek bʼa kechani keʼntik ja matik wa xkaʼteltaytik ja Jyoba jastalni wa skʼana.

14. Jastalni wa xyala ja Colosenses 3:12-14, ¿jasa jel tʼilan oj jkʼuluktik bʼa sjejel jbʼajtik yajulal kʼujol?

¹⁴ Ja Biblia wa xyala: «Jelni tʼilan oja yajtabʼajex meran lek» (1 Ped. 4:8). Jun modo bʼa sjejel ja yajalkʼujol it jani yajel jbʼajtik perdon sok kuchelkujtik yuja mulanumotiki. Cha wani xleʼatik modoʼik bʼa sjejel jaman jkʼujoltik sok spetsanil ja hermanoʼiki, cha jachni soka matik syajbʼesnejotiki (kʼuman ja Colosenses 3:12-14). Chikani lek jani ja yajalkʼujol ja meran preba bʼa kʼotelotik meran snochumanik Kristo.

15. ¿Jas tuk modo wa xnochotik ja sjejel bʼa kongregasyon bʼa snochumanik Kristo bʼa bʼajtan siglo?

¹⁵ Ay tuk modo ja bʼa jastal wa xtoyotik ja Dyos bʼa wanotikni snochjel ja jastal  stoyowe ja Dyos ja kongregasyon bʼa snochumanik Kristo ja bʼa bʼajtan siglo. Jun sjejel, ja jastal chapan ay wa xkʼulantik ja kaʼteltiki, bʼa tini chʼikane ja biajanteʼiki, ja ansyanoʼiki sok ja siervo ministerialiki, wani nochxel ja sjejel yawe kujlajuk ja jekabʼanumik bʼa bʼajtan siglo (Filip. 1:1; Tito 1:5). Cha jachni wa xpensaraʼantik sbʼaja stajel sbʼaj jun ixuk sok winik sok sbʼaja nupaneli, ja jastal chaʼanyabʼal wa xkilatik ja chikʼi sok sbʼaja jastal wa xkʼanatik stalnajel ja kongregasyon sbʼaja matik wa xkoye chaʼanik mulal sok mi sutxi skʼujole (Hech. 15:28, 29; 1 Cor. 5:11-13; 6:9, 10; Heb. 13:4).

16. ¿Jasa wa sjeʼakitik ja Efesios 4:4-6?

¹⁶ Ja Jesús yala ke jitsan oj yale kʼotele snebʼuman, pe mini spetsaniluke meran kʼotele (Mat. 7:21-23). Jaxa Yabʼal ja Dyos yalunejxa ke ja bʼa tsaʼanikxta kʼakʼu, jitsan kechantani oj sjeʼ sbʼaje ke «wa xiwyeyuj ja Dyosi» (2 Tim. 3:1, 5). Pe ja Biblia wa xchiktes jaman lek ke kechani ay «jun skʼuʼajel» bʼa lek wa xyila ja Dyosi (kʼuman ja Efesios 4:4-6).

17. ¿Machtik wane snochjel ja sjejel bʼa Jesús sok wane yijel ja relijyon smeranil ja bʼa jtyempotiki?

¹⁷ Anto, ¿machunkiluk yiʼoje ja bʼa jtyempotik ja relijyon smeranili? Yajni jpaklaytikta ja prebaʼiki sok kilatik ja sjejel yaʼakan ja Jesús sok jani yiʼaje ja nochumanik bʼa Kristo bʼa bʼajtan siglo, chikani lek stojol: jani ja testigoʼik bʼa Jyoba. Yuja tini ayotik ja bʼa xchonabʼil ja Dyos sok snajel ja smeranil sbʼaja Jyoba sok sbʼaja jas wa skʼanaʼi juni chaʼan cholal. Ja yuj, tolabida la jkʼuʼuktik ke jani kiʼojtik ja smeranili.