1. Hikwalahokayini vanhu vo tala swi va tikela ku vona vukhongeri bya ntiyiso namuntlha?

VUKHONGERI byo tala namuntlha byi vona onge ndlela leyi byi gandzelaka Xikwembu hayona i yinene ngopfu. A swi hlamarisi leswi vanhu vo tala namuntlha va nga byi tiviki vukhongeri bya ntiyiso. Va nga ha vutisa va ku: “Xana ku ni vukhongeri byin’we bya ntiyiso kumbe vukhongeri hinkwabyo bya amukeleka eka Xikwembu?” Xana hina ha tiyiseka leswaku leswi hi swi dyondzisaka i ntiyiso naswona ndlela leyi Timbhoni ta Yehovha ti gandzelaka hayona ya amukeleka eka Yehovha? Xana byi kona vumbhoni bya sweswo? A hi voneni.

2. Hi ku ya hi 1 Vatesalonika 1:5, i yini lexi a xi endla muapostola Pawulo a tshemba leswaku u kume ntiyiso?

² Muapostola Pawulo a a tshemba leswaku u kume ntiyiso. (Hlaya 1 Vatesalonika 1:5.) A a nga tshembi ntsena hileswi a swi n’wi tsakisa ku endla tano. A a tikarhata hi matimba leswaku a hlaya Rito ra Xikwembu. A a kholwa leswaku “matsalwa hinkwawo ma huhuteriwe hi Xikwembu.” (2 Tim. 3:16) I yini leswi a swi dyondzeke? Ematsalweni, Pawulo u kume vumbhoni bya leswaku Yesu a ku ri yena Mesiya loyi a tshembisiweke ku nga vumbhoni lebyi varhangeri va vukhongeri bya Xiyuda va byi bakanyeke. Vakanganyisi volavo lava a va tibyela leswaku va yimela Xikwembu, va xi landzurile hi mitirho ya vona. (Tito 1:16) Ku hambana na vona, Pawulo a a nga hlawuli ndluwa a siya hove loko swi ta eka Matsalwa. A a tiyimisele ku dyondzisa ni ku tirhisa “ndzayo hinkwayo leyi humaka eka Xikwembu.”—Mit. 20:27.

3. Leswaku hi va ni ripfumelo leri tiyeke, xana hi fanele hi rhanga hi ku kuma tinhlamulo hinkwato ta swivutiso leswi hi nga na swona? (Vona bokisi leri nge “ Mitirho ya Yehovha ‘Yi Tele Ngopfu Lerova A Ndzi Nge Swi Koti Ku Yi Rungula!’”)

³ Van’wana va vona onge vukhongeri bya ntiyiso byi fanele  byi kota ku hlamula swivutiso hinkwaswo hambi ku ri leswi Bibele yi nga swi hlamuliki hi ku kongoma. Xana sweswo swa twala? Xiya xikombiso xa Pawulo. U khutaze Vakrestekulobye leswaku va fanele va ‘kambisisa swilo hinkwaswo’ naswona a a pfumela ku a nga tivi swilo hinkwaswo. (1 Tes. 5:21) U te: “Hikuva hi ni vutivi lebyi nga hetisekangiki,” u tlhele a ku: “A hi voni kahle onge hiloko hi langute exivonini lexi endliweke hi nsimbhi.” (1 Kor. 13:9, 12) Pawulo a a nga tivi swilo hinkwaswo, swi tano hi hina. Kambe a a wu tiva ntiyiso mayelana ni xikongomelo xa Yehovha. Vutivi byakwe byi n’wi tiyisekise leswaku se u kume ntiyiso!

4. Hi nga wu tiyisa njhani ntshembo wa hina wa leswaku se hi kume ntiyiso naswona hi ta kambisisa yini mayelana ni Vakreste va ntiyiso?

⁴ Ndlela yin’we leyi nga tiyisaka ntshembo wa hina wa leswaku se hi kume ntiyiso, i ku pimanisa ndlela leyi Yesu a a gandzela hayona ni ndlela leyi Timbhoni ta Yehovha ti gandzelaka hayona namuntlha. Eka nhlokomhaka leyi, hi ta kambisisa leswaku Vakreste va ntiyiso (1) a va gandzeli swifaniso, (2) va xixima vito ra Yehovha, (3) va wu rhandza ntiyiso naswona (4) va rhandzana.

5. Hi dyondza yini eka Yesu mayelana ni ndlela leyinene yo gandzela Xikwembu naswona hi nga yi tirhisa njhani dyondzo yakwe?

⁵ Leswi Yesu a a rhandza Xikwembu swinene, u gandzele xona ntsena loko a ri etilweni niloko a ri laha misaveni. (Luka 4:8) U dyondzise valandzeri vakwe leswaku va fanele va endla tano. Yesu ni vadyondzisiwa vakwe, a va swi tirhisanga swifaniso nikatsongo loko va gandzela. Leswi Xikwembu xi nga Moya, a nga kona loyi a nga kotaka ku endla xifaniso lexi fanaka na xona! (Esa. 46:5) Kambe hi nga ku yini hi lava endlaka swifaniso leswi va swi  vitanaka vakwetsimi ni ku tlhela va swi gandzela? Eka Milawu ya khume leyi Yehovha a a yi nyike Vaisrayele, Nawu wa vumbirhi a wu ku: “Mi nga tshuki mi tiendlela xifaniso lexi vatliweke kumbe xifaniso xo karhi xa nchumu lowu nga ematilweni, kumbe emisaveni . . . Mi nga tshuki mi swi khinsamela.” (Eks. 20:4, 5) Hinkwavo lava lavaka ku tsakisa Xikwembu va ma twisisa kahle marito wolawo.

6. Hi xihi xikombiso lexi Timbhoni ta Yehovha ti xi landzelaka loko ti gandzela?

⁶ Van’wamatimu va vula leswaku emikarhini ya Vakreste vo sungula, Vakreste hinkwavo a va gandzela Xikwembu ntsena. Hi xikombiso, buku ya History of the Christian Church yi vula leswaku Vakreste “a va nga ta swi tsakela” nikatsongo loko ku vekiwa swifaniso etindhawini ta vugandzeri. Ninamuntlha, Timbhoni ta Yehovha ta ha ya emahlweni ti landzela xikombiso xa le nkarhini wa Vakreste vo sungula. A hi swi khongeli swifaniso swa “vakwetsimi,” tintsumi kumbe Yesu. Nakambe a hi gandzeli mujeko kumbe ku endla swin’wana leswi fambisanaka ni ku gandzela mfumo. Hambi ko ba lexi dumaka, hi tiyimisele ku yingisa marito ya Yesu lama nge: “U fanele u gandzela Yehovha Xikwembu xa wena.”—Mat. 4:10.

7. Hi kwihi ku hambana exikarhi ka Timbhoni ta Yehovha ni vukhongeri byin’wana?

⁷ Vanhu vo tala namuntlha va landzela vafundhisi lava dumeke. Va va rhandza ngopfu lerova se ko xota katsongo va va gandzela. Vo tala va ya etikerekeni ta vona, va xava tibuku ta vona ni ku nyikela hi mali yo tala leswaku va va seketela. Van’wana va tshemba hinkwaswo leswi vuriwaka etikerekeni. Swi twisa ku vava ku xiya leswaku ndlela leyi va va khomaka hayona vafundhisi lava onge hiloko va vona Yesu! Ku hambana na vona, vagandzeri va ntiyiso a va na vafundhisi. Hambileswi hi xiximaka lava rhangelaka kambe hi yi tekela enhlokweni dyondzo ya Yesu leyi nge: “N’wina hinkwenu mi vamakwavo.” (Mat. 23:8-10) A hi gandzeli vanhu, swi nga ri na mhaka leswaku i varhangeri va vukhongeri kumbe va tipolitiki. Nakambe a hi swi seketeli swiendlo swa vona. A hi katseki eka leswi va swi endlaka naswona a hi xiphemu xa misava. Ndlela leyi hi gandzelaka hayona yi hambanile ni ya vukhongeri byin’wana lebyi tivulaka Vakreste.—Yoh. 18:36.

8. Hi swi tiva njhani leswaku Yehovha u lava leswaku vito rakwe ri vangamisiwa ni ku tiviwa emisaveni hinkwayo?

⁸ Siku rin’wana Yesu u khongele a ku: “Tatana, vangamisa vito ra wena.” Yehovha u hlamule xikhongelo xexo hi rito lerikulu leri humaka etilweni, a tshembisa leswaku u ta ri vangamisa. (Yoh. 12:28) Eka ntirho wakwe hinkwawo wa laha misaveni, Yesu u vangamise vito ra Tata wakwe. (Yoh. 17:26) Hikwalaho, swa twala ku vula leswaku Vakreste hinkwavo va ntiyiso va fanele va tirhisa vito ra Xikwembu ni ku ri tivisa vanhu van’wana.

9. Vakreste vo sungula va swi kombise njhani leswaku va xixima vito ra Xikwembu?

⁹ Loko vandlha ra Vukreste ra ha ku simekiwa enkarhini wa vaapostola, Yehovha u ‘tsundzuke vamatiko kutani a tihlawulela vanhu va vito rakwe exikarhi ka vona.’ (Mit. 15:14) Vakreste volavo a va tinyungubyisa hileswi a va tirhisa vito ra Xikwembu ni ku kota ku ri byela van’wana. Va ri tirhise ngopfu loko va ri karhi va chumayela niloko va tsala Bibele. * Hi ndlela yoleyo, va kombise leswaku hi vona ntsena lava a va dyondzisa ni ku yimela vito ra Xikwembu.—Mit. 2:14, 21.

10. Hi swi tiva njhani leswaku Timbhoni ta Yehovha hi tona ntsena leti tirhisaka vito ra Xikwembu?

 ¹⁰ Xana Timbhoni ta Yehovha hi tona ntsena leti tirhisaka vito ra Xikwembu? Xiya vumbhoni lebyi landzelaka. Namuntlha varhangeri va vukhongeri va we va pfuka leswaku va ringeta ku tumbeta vito ra Xikwembu. Va kale va ri susa ni le Tibibeleni ta vona naswona etikerekeni ta vona a va lavi na ku ri twa. * Xana u kona loyi a nga kanakanaka leswaku Timbhoni ta Yehovha hi tona ntsena ti tirhisaka vito ra Xikwembu ni ku ri xixima hilaha ri faneleke hakona? Hi tirha hi matimba leswaku vito ra Xikwembu ri tiviwa emisaveni hinkwayo, ku tlula mitlawa ya vukhongeri hinkwabyo lebyi nga kona! Nakambe hi tikarhatela ku hanya hi ku pfumelelana ni vito leri hi vitaniwaka harona, ku nga Timbhoni ta Yehovha. (Esa. 43:10-12) Hi humese Tibele ta Vuhundzuluxeri Bya Misava Leyintshwa Bya Matsalwa Yo Kwetsima leti tlulaka 240 wa timiliyoni, leti ngheniseke vito ra Yehovha laha ri susiweke kona. Nakambe hi humesa tibuku leti dyondzisaka vanhu Bibele ni ku vulavula ngopfu hi vito ra Yehovha, leti kumekaka hi tindzimi leti tlulaka 1 000!

11. Vakreste va le nkarhini wa vaapostola va swi kombise njhani leswaku va rhandza ntiyiso?

¹¹ Yesu a a wu rhandza ntiyiso mayelana ni Xikwembu ni swikongomelo swa Xona.  A hanya hi ndlela leyi kombisaka leswaku u rhandza ntiyiso naswona a a wu dyondzisa van’wana. (Yoh. 18:37) Valandzeri va Yesu na vona a va wu rhandza ntiyiso. (Yoh. 4:23, 24) Hikwalaho, muapostola Petro u vule leswaku ndlela leyi Vakreste va hanyaka hayona i “ndlela ya ntiyiso.” (2 Pet. 2:2) Leswi a va wu rhandza swinene ntiyiso, va bakanye tidyondzo ta vukhongeri bya mavunwa, ta mindhavuko ni mavonelo lama hoxeke lama nga fambisaniki ni ntiyiso. (Kol. 2:8) Ninamuntlha, Vakreste va ntiyiso va tikarhatela ku ya emahlweni va “famba entiyisweni” naswona va tirhisa Bibele eka swilo hinkwaswo leswi va swi endlaka.—3 Yoh. 3, 4.

12. I yini leswi lava rhangelaka va swi endlaka loko va xiya leswaku ku fanele ku antswisiwa tidyondzo tin’wana naswona hikwalahokayini?

¹² Vanhu va Xikwembu namuntlha a va tiendli onge va tiva hinkwaswo leswi nga eBibeleni. Mikarhi yin’wana va pfa va endla swihoxo hi matwisiselo ya tidyondzo to karhi kumbe ndlela leyi nhlangano wu faneleke wu kongomisiwa hayona. Sweswo a swi fanelanga swi hi hlamarisa. Bibele yi swi veke erivaleni leswaku vutivi bya ntiyiso byi ta andza hi ku famba ka nkarhi. (Kol. 1:9, 10) Yehovha u hi voningela ntiyiso hakatsongotsongo naswona hi fanele hi tiyimisela ku rindza leswaku wu ya wu voninga. (Swiv. 4:18) Loko lava rhangelaka va xiya leswaku ku ni tidyondzo tin’wana leti faneleke ti antswisiwa, a va bi mariri. Loko varhangeri va vukhongeri va endla ku cinca loku fambisanaka ni misava leyi, nhlangano wa Yehovha wu endla ku cinca loku hi tshinetaka ekusuhi ni Xikwembu ni ku hi pfuna hi landzela ndlela yo gandzela leyi sunguriweke hi Yesu. (Yak. 4:4) A hi endli ku cinca loku fambisanaka ni misava leyi kambe i ku cinca ka ndlela leyi hi ma twisisaka hayona Matsalwa. Ha wu rhandza swinene ntiyiso!—1 Tes. 2:3, 4.

13. Hi wihi nchumu wa nkoka lowu kombisiwaka hi Vakreste va ntiyiso naswona wu vonaka njhani eka Timbhoni ta Yehovha namuntlha?

¹³ Vakreste vo sungula a va tiveka ngopfu hi swilo swa kahle kambe xa nkoka ngopfu a ku ri rirhandzu. Yesu u te: “Hinkwavo va ta tiva leswaku mi vadyondzisiwa va mina loko mi rhandzana.” (Yoh. 13:34, 35) Timbhoni ta Yehovha emisaveni hinkwayo ta tiphina hi ku va ni vun’we naswona ta rhandzana. Ku hambana ni minhlangano leyin’wana, hi ndyangu wun’we hambileswi hi humaka ematikweni yo hambanahambana, tindzimi, tinxaka ni mindhavuko leyi nga faniki. Ha byi vona vumbhoni byebyo loko hi ri etinhlengeletanweni ta vandlha, ta muganga ni ta xifundzha. Sweswo swi tiyisa ntshembo wa hina wa leswaku hi gandzela hi ndlela leyi amukelekaka eka Yehovha.

14. Hi ku ya hi Vakolosa 3:12-14, hi yihi ndlela ya nkoka leyi hi nga swi kombisaka hayona leswaku ha rhandzana?

¹⁴ Matsalwa ma hi khutaza leswaku hi ‘rhandzana swinene.’ (1 Pet. 4:8) Ndlela yin’wana ya nkoka yo kombisa rirhandzu rolero i ku rivalelana hi ku ntshunxeka ni ku swi ba hi makatla swihoxo swa van’wana. Nakambe hi tikarhatela ku lava tindlela to hanana eka vamakwerhu hinkwavo evandlheni, ku katsa ni lava hi tlulaneke milenge na vona. (Hlaya Vakolosa 3:12-14.) Rirhandzu rolero ri kombisa leswaku hi Vakreste va ntiyiso.

15. Hi yihi ndlela yin’wana leyi kombisaka leswaku hi landzela ndlela leyi Vakreste vo sungula a va gandzela hayona?

¹⁵ Hi landzela xikombiso lexinene xo gandzela xa Vakreste vo sungula. Hi xikombiso, hi nhlangano lowu hlelekeke naswona hi endla hilaha Vaapostola a va endla hakona hi  ku va ni valanguteri lava fambafambaka, vakulu ni malandza ya vutirheli. (Filp. 1:1; Tito 1:5) Nakambe ndlela leyi hi tikhomaka hayona hi swa masangu ni vukati, ku xixima ngati ni ku sirhelela vandlha eka vadyohi lava nga hundzukiki, swi fambisana hi ku helela nileswi a swi endliwa hi Vakreste va le nkarhini wa vaapostola.—Mit. 15:28, 29; 1 Kor. 5:11-13; 6:9, 10; Hev. 13:4.

16. Hi dyondza yini eka marito lama kumekaka eka Vaefesa 4:4-6?

¹⁶ Yesu u vule leswaku vo tala va ta tiendla onge i vadyondzisiwa vakwe kambe a hi hinkwavo lava a va ta va va ntiyiso. (Mat. 7:21-23) Matsalwa ma swi boxe khale leswaku emasikwini yo hetelela, vanhu vo tala va ta “vonaka onge va gandzela Xikwembu.” (2 Tim. 3:1, 5) Ninamuntlha Bibele ya ha ya emahlweni yi hi byela leswaku ku ni ‘ripfumelo rin’we’ leri Xikwembu xi ri amukelaka.—Hlaya Vaefesa 4:4-6.

17. I va mani valandzeri va Yesu namuntlha lava nga ni ripfumelo ra ntiyiso?

¹⁷ I va mani lava nga ni ripfumelo ra ntiyiso namuntlha? Vumbhoni se hi byi vonile. Hi vone ndlela leyinene yo gandzela leyi Yesu a yi dyondziseke Vakreste vo sungula. Nhlamulo yi le rivaleni, i Timbhoni ta Yehovha. I nkateko ku va un’wana wa Timbhoni ta Yehovha ni ku tiva ntiyiso mayelana ni swikongomelo swakwe! Onge hi nga tiyimisela ku ya emahlweni hi nga kanakani leswaku hi kume ntiyiso.