1. Habwaki abantu baingi baburanganiziibwe?

HAROHO amadiini maingi kasumi kanu agarukweyeta Makristaayo, kandi agarukugamba ngu nigaramya Ruhanga omu mulingo oguhikire. Enu niyo ensonga habwaki abantu abarukukira obwingi baburanganiziibwe! Nibekaguza, “Mali haroho ediini emu ey’amananu, rundi ediini zoona nizisemeza Ruhanga?” Itwe nk’Abakaiso ba Yahwe nitukigumiza kimu ngu ebiturukwegesa by’amananu, kandi ngu n’omulingo turamyamu Yahwe nugwo arukusiima? Mali nikisoboka kukigumiza kimu ngu ebintu ebi bihikire? Leka tubazeeho obwakaiso oburatukonyera kukigumya.

2. Habwaki Paulo akaba nakigumiza kimu ngu ali omu mananu? (1 Abasesalonika 1:5)

² Omukwenda Paulo akaba nakigumya ngu ali omu mananu. (Soma 1 Abasesalonika 1:5.) Akaba atarukusigikirra ha nyehurra ye kukigumya ngu ali omu mananu. Baitu akaba ali mwekambi omu kwesomesa Ekigambo kya Ruhanga. Yaikirizaaga ngu “ebihandikirwe byona [bikaterekerezebwa] omwoyo gwa Ruhanga.” (2 Tim. 3:16) Biki ebiyayegere omu kwesomesa kwe? Omu Byahandiikirwe, Paulo akasangamu obwakaiso obukaba butasobora kuhakanizibwa, oburukugumya ngu Yesu nuwe Masiya ow’akaba araganiziibwe, kandi obwakaiso bunu abebembezi b’ediini ey’Ekiyudaaya bakanga kubutaho omutima. Abanyadiini abo abagobya bagambaga ngu nibegesa abantu amananu agarukukwata hali Ruhanga baitu bakoraga ebintu ebyarukunoba. (Tit. 1:16) Kwahukanaho nabo, Paulo tiyakomamuga omu Kigambo kya Ruhanga ebicweka ebyarukugonza byonka nibyo akaikiririzaamu. Akaba ayetegekere kwegesa kandi n’okuhondera “obuhabuzi bwa Ruhanga bwona.”​—Eng. 20:27, NW.

3. Nitwetaaga kuba twine ebigarukwamu eby’ebikaguzo byaitu byona, kusobora kukigumya ngu tuli omu mananu? (Rora akasanduuko “ Emirimo ya Yahwe Hamu n’Ebitekerezo Bye​—‘Tibirukusobora Okubarwa.’”)

 ³ Abamu bateekereza ngu ediini ey’amananu esemeriire kuba n’egarukamu buli kikaguzo kyona, otwaliiremu n’ebikaguzo Baibuli eby’etarukubazaaho. Mali ky’amagezi kwikiriza tuti? Tekerezaaho ekyokurorraho kya Paulo. Akekambisa abaikiriza bagenzi be ‘kulenga byona,’ baitu h’akaire nuko kamu akagamba ngu hali haroho ebintu bingi ebyakaba atarukwetegereza. (1 Bas. 5:21) Akahandiika ati: “Tumanyireho ekicweka,” kandi yayongeraho ati: “Nturorra omu ndolerwamu ebitarukurorwa kurungi.” (1 Kol. 13:9, 12) Paulo atetegereze buli kimu, kandi naitwe nukwo kiri. Baitu Paulo akaba nayetegereza amananu agarukukwata ha bigendererwa bya Ruhanga. Akaba amanyire ebirukumara kumugumya ngu akaba ali omu mananu!

4. Nitusobora tuta kweyongera kukigumiza kimu ngu tukazoora amananu, kandi kiki ekiturukwija kubazaaho h’Abakristaayo ab’amananu?

⁴ Omulingo ogumu ogutusobora kwongera kukigumiza kimu ngu tukazoora amananu, nugwo ogw’okulengesaniza omulingo Yesu yaramyamuga hamu n’omulingo Abakaiso ba Yahwe baramyamu kasumi kanu. Omu kicweka kinu, nitwija kurora nk’oku Abakristaayo ab’amananu (1) banga kuramya ebisisani, (2) batekamu ibara lya Yahwe ekitiinisa, (3) bagonza amananu, kandi (4) bagonzangana muno.

5. Kiki ekiturukwegera hali Yesu ha mulingo oguhikire ogw’okuramya Ruhanga, kandi tusobora kuteeka tuta omu nkora ekiyayegeseze?

⁵ Habwokuba Yesu yagonzaaga muno Yahwe, nuwe yaramyaga wenka, obwakaba akyali omu iguru kandi n’obuyaizire omu nsi. (Luk. 4:8) Kandi akegesa n’abegeswa be kuramya Yahwe wenka. Yesu hamu n’abegeswa  be abesigwa batakozese ebisisani omu kuramya kwabo. Nk’oku Ruhanga atarukurorwa busaho muntu asobora kukora ekintu kyona ekirukumusisana. (Is. 46:5) Baitu kihikire kukora ebisisani eby’abo abarukwetwa abahikiriire kandi n’okubikozesa omu kuramya? Omu kiragiro ekyakabiri omu Biragiro Ikumi, Yahwe akagamba ati: “Otalyekorra ekisisani ekisaruirwe kyona, nobukyakuba ekisisani ekyekintu kyona ekiri omu iguru haiguru, nobukyakuba ekiri hansi ha itaka . . . Otalibinamira ebi.” (Kurug. 20:4, 5) Ebigambo ebi nibyetegerezebwa kurungi abo abarukugonza kusemeza Ruhanga.

6. Abakaiso ba Yahwe bahondera kyokurorraho ki omu kuramya kwabo?

⁶ Abanyabyafaayo nibagamba ngu omu kasumi k’abakwenda, Abakristaayo baramyaga Ruhanga wenka. Ekyokurorraho, ekitabu History of the Christian Church nikigamba ngu Abakristaayo abaakara “bakunobiire kimu” entekereza ey’okuleeta ebisisani omu biikaro eby’okuramya. Omu kasumi kanu, Abakaiso ba Yahwe nibahondera ekyokurorraho eky’Abakristaayo ab’omu kyasa eky’okubanza. Titusaba hali ebisisani “eby’abahikiriire” kandi titusaba bamalaika, rundi Yesu. Tituterra bendera etamamu rundi kukora ekikorwa ekirukwoleka ngu nituramya ihanga lyaitu. N’obuhakubaho ki, tucweriiremu kimu kworobera ebigambo bya Yesu ebirukugamba ngu: “Oramyege [Yahwe] Ruhanga wawe.”​—Mat. 4:10.

7. Mbaganiza ki ezirukweyolekera kimu eziroho hagati y’Abakaiso ba Yahwe hamu n’amadiini agandi?

⁷ Kasumi kanu, abantu baingi bagonza kuhuliiriza abatebezi abamanyirwe muno. Begomba muno abatebezi banu bahika na ha rulengo orw’okugonza kubaramya. Abantu baingi bagenda omu makanisa gaabo, bagura ebitabu byabo, babaha sente nyingi rundi baziha ebitongole ebibarukusagika. Abantu abamu baikiririza omu buli kigambo kyona ekibabaza. Bagonza muno kurora abatebezi banu, osisana oti rundi barozere Yesu! Kwahukanaho nabo, abaramya Yahwe omu mananu tibahondera abantu. Nobukiraaba ngu tuteekamu abo abarukutwebembera ekitiinisa, twikiririza omu nyegesa ya Yesu erukugamba ngu: “[Inywena] muli baisemu.” (Mat. 23:8-10) Tituramya abantu kababe bebembezi b’amadiini rundi abalemi. Kandi titusagika ebigendererwa byabo eby’ediini rundi eby’obulemi. Baitu twikara tutagweriire rubaju kandi tutali kicweka ky’ensi. Nahabweki, omu miringo enu yoona nitwahukanira kimu n’amadiini agandi agarukweyeta ag’Ekikristaayo.​—Yoh. 18:36.

8. Nitumanya tuta ngu Ruhanga n’agonza ibara lye linyumizibwe kandi limanywe buli omu wena?

⁸ Kiro kimu, Yesu akasaba ati: “Isenyowe nyumiza ibara lyawe.” Yahwe akagarukamu esaara egi n’iraka ery’amaani kuruga omu iguru n’araganiza ngu akaba n’agenda kunyumiza ibara lye. (Yoh. 12:28) Omu buheereza bwe bwona Yesu akanyumiza ibara lya Ise. (Yoh. 17:26) Nahabweki, Abakristaayo ab’amananu behurra ngu baine omugisa gw’amaani ogw’okukozesa ibara lya Ruhanga, kandi n’okuligambira abandi.

9. Abakristaayo ab’omu kyasa eky’okubanza bakakyoleka bata ngu nibateekamu Ruhanga ekitiinisa?

⁹ Omu kyasa eky’okubanza C.E., hanyuma y’akasumi kake ekitebe Ekikristaayo kimazire kutandikwaho, Yahwe ‘akabungira abamahanga okubakomeramu ihanga habwa ibara lye.’ (Eng. 15:14) Abakristaayo ab’omu kyasa eky’okubanza bakagurora nk’omugisa gw’amaani kukozesa ibara lya Ruhanga kandi n’okulimanyisa abantu abandi. Bakozesaaga ibara lya Ruhanga obubaabaga nibatebeza kandi n’omu kuhandiika ebitabu bya Baibuli. * Bakakyoleka ngu mali bali bantu ab’ibara lya Ruhanga.​—Eng. 2:14, 21.

10. Bwakaiso ki oburukwoleka ngu Abakaiso ba Yahwe bali bantu ab’ibara lya Ruhanga?

 ¹⁰ Abakaiso ba Yahwe, bantu ab’ibara lya Ruhanga? Tekerezaaho obwakaiso ekiburukwoleka. Kasumi kanu, abebembezi b’amadiini maingi bakozere kyona ekibarukusobora kusereka abantu ngu Ruhanga aine ibara. Balihire omu mpindura zaabo eza Baibuli, kandi abamu batangire n’abantu kulikozesa omu makanisa gaabo. * Nikyeyolekera kimu ngu Bakaiso ba Yahwe nubo bonka bateekamu ibara lya Ruhanga ekitiinisa ekirisemeriire? Nitweyongerra kimu kumanyisa abantu ibara lya Ruhanga kukira ebitebe by’amadiini ebindi byona, omu mulingo ogu tukora kyona ekiturukusobora kuhikiiriza amakuru ag’ibara lyaitu ery’Abakaiso ba Yahwe. (Is. 43:10-12) Tuturukize Baibuli eza New World Translation of the Holy Scriptures ezirukuhingura omu milioni 240, kandi Baibuli zinu zikozesa ibara lya Yahwe omu biikaro nambere abahinduzi abandi baalihire. Kandi nituturukya ebitabu ebindi ebirukusigikirra ha Baibuli ebikozesa ibara lya Ruhanga omu ndimi ezirukuhingura omu 1,000!

11. Abakristaayo abaakara bakooleka bata ngu nibagonza amananu?

¹¹ Yesu akaba nagonza muno amananu, ago nugo amananu agarukukwata hali Ruhanga, hamu n’ebigendererwa Bye. Omulingo Yesu  yatwaizeemu obwomeezi bwe, gukooleka ngu akaba amanyire amananu kandi yagamanyisaaga abandi. (Yoh. 18:37) Abahondezi ba Yesu ab’amananu nabo bagonzaaga muno amananu. (Yoh. 4:23, 24) Omukwenda Petero akeeta enyikiriza ey’Ekikristaayo “omuhanda gwamazima.” (2 Pet. 2:2) Habw’okugonza okw’amaani okubaali bainiire amananu, Abakristaayo ab’okubanza bakanga entekereza ez’abanyadiini, emigenzo, hamu n’entekereza ezaabo nk’abantu ezikaba zitarukukwatagana n’amananu. (Bak. 2:8) N’omu kasumi kanu, Abakristaayo ab’amananu bekamba ‘kugendera omu mazima’ obu nibasigikirra enyikiriza zaabo zoona n’omulingo betwazaamu, ha Kigambo kya Ruhanga.​—3 Yoh. 3, 4.

12. Kiki ekibaho Akatebe Akalemi obukakyetegereza ngu omulingo tusoborramu ekyahandiikirwe nigwetaaga kuhindurwamu, kandi habwaki bakora empindahinduka zinu?

¹² Abakaiso ba Yahwe tibagamba ngu nibetegereza buli kimu kyona ekiri omu Baibuli. Obwire obumu, bakora ensobi omu mulingo basoborramu enyegesa ya Baibuli rundi omulingo batekanizaamu ekitebe. Eki tikisemeriire kutuhuniriza. Ebyahandiikirwe nibikyoleka kurungi ngu okumanya okuhikire kweyongera hanyuma ya kasumi. (Bak. 1:9, 10) Yahwe asukura amananu mpora mpora, nahabweki tusemeriire kugumiisiriza kuhikya ekyererezi eky’amananu obukyeyongera. (Nfu. 4:18) Akatebe Akalemi obukakyetegereza ngu niketaaga kukora empindahinduka omu mulingo tusoborra ekyahandiikirwe rundi omulingo tukoramu ebintu, kakora empindahinduka egi aho naaho. Nobukiraaba ngu ediini nyingi ezirukweyeta ez’Ekikristaayo zikora empindahinduka kusemeza abahondezi baazo rundi kweyongera kwirra haihi n’ensi, empindahinduka ekitebe kya Yahwe kikora, ziba z’okutukonyera kweyongera kwirra haihi na Ruhanga n’okuhondera ekyokurorraho ky’okuramya Yesu ekiyataireho. (Yak. 4:4) Empindahinduka ezitukora tizisigikirra ha mulembe, rundi abantu baingi ekibarukugonza, baitu habwokuba tuba tweyongiire kwetegereza kurungi Ebyahandiikirwe. Nitugonza amananu!​—1 Bas. 2:3, 4.

13. Mulingo ki ogurukukirrayo kimu obukuru Abakristaayo ab’amananu ogu booleka, kandi Abakaiso ba Yahwe bagwoleka bata omu kasumi kanu?

¹³ Abakristaayo ab’omu kyasa eky’okubanza baali bamanyirwe muno habwokuba n’emiringo enungi, baitu ogurukukira obukuru ogu baali baine nukwo okugonza. Yesu akagamba ati: “Nukwo bona balimanya muli begeswa bange, obumurabaga nokugonzangana inywenka.” (Yoh. 13:34, 35) Abakaiso ba Yahwe omu kasumi kanu nibegondeza omu bumu ha rulengo rw’ensi yoona. Nitwahukana n’amadiini agandi goona, habwokuba nitusisana nk’eka emu n’obukiraaba ngu nituruga omu mahanga n’enganda ezirukwahukana. Turora okugonza kunu obutuba tuli omu nsorrokano z’ekitebe, hamu n’ensorrokano enkooto. Kinu kitukonyera kukigumiza kimu ngu omulingo turukuramyamu Yahwe nugwo ogw’arukusiima.

14. Kusigikirra ha Abefeso 4:32, mulingo ki omukuru ogutusobora kwolekangana okugonza okwingi muno?

¹⁴ Ebyahandiikirwe nibitutererra kuba ‘n’okugonzangana okwingi muno.’ (1 Pet. 4:8) Gumu ha miringo twolekamu okugonza kunu nugwo ogw’okuganyirangana, kandi n’okugumiisiriza bagenzi baitu habw’obutahikirra bwabo. Tuserra n’emiringo ey’okugabamu hamu n’okwoleka amakune omu kitebe, otwaliiremu naabo abaatubihiize. (Soma Abefeso 4:32.) Obutwoleka okugonza okwa mulingo ogu, tukigumiza kimu ngu tuli Bakristaayo ab’amananu.

15. Miringo ki endi eituhonderamu ekyokurorraho eky’okuramya eky’Abakristaayo ab’omu kyasa eky’okubanza?

¹⁵ N’omu miringo endi, tuhondera ekyokurorraho  eky’okuramya eky’Abakristaayo ab’omu kyasa eky’okubanza. Ekyokurorraho, tutekaniziibwe omu mulingo nugwo gumu nk’Abakristaayo ab’omu kyasa eky’okubanza, twine abaroleerezi b’ebicweka, abagurusi b’ebitebe, hamu n’abaheereza. (Baf. 1:1; Tit. 1:5) Kandi kusisanaho n’Abakristaayo ab’omu kyasa eky’okubanza, tuteekamu ekitiinisa ebiragiro bya Ruhanga ebirukukwata ha kuterana, obuswere, kukozesa esagama, kandi tulinda ekitebe hali abasiisi ababa bangire kwegarukamu.​—Eng. 15:28, 29; 1 Kol. 5:11-13; 6:9, 10; Baheb. 13:4.

16. Kiki ekiturukwega kuruga omu bigambo ebiri omu Abefeso 4:4-6?

¹⁶ Yesu akagamba ngu baingi bakweyesere begeswa be, baitu boona tibakubaire b’amananu. (Mat. 7:21-23) Ebyahandiikirwe bitugambira ngu omu biro bya hanyuma baingi bakubaire ‘n’okusisana nk’okutiina Ruhanga.’ (2 Tim. 3:1, 5) Baitu Baibuli n’ekyolekera kimu ngu haroho “okuikiriza kumu” Ruhanga okw’arukusiima.​—Soma Abefeso 4:4-6.

17. Nibaha omu kasumi kanu abarukuhondera Yesu kandi abaine okwikiriza kumu okw’amananu?

¹⁷ Omu kasumi kanu nibaha abaine okwikiriza kumu okw’amananu? Twetegeriize obwakaiso ekiburukwoleka. Turozere ekyokurorraho eky’okuramya Yesu hamu n’Abakristaayo ab’omu kyasa eky’okubanza ekibataireho. Nahabweki titwine kugurukyagurukya ngu Abakaiso ba Yahwe nubo baine okwikiriza kumu okw’amananu. Ka mugisa gw’amaani kuba omu h’abantu ba Yahwe, kandi n’okumanya amananu agarukukwata hali Yahwe hamu n’ebigendererwa bye! Nahabweki leka itwena tweyongere kukigumiza kimu ngu tuli omu mananu.