NKHANI YAKUSAMBIRA 42
Khorwani na Kukoleska Unenesko Uwo Mwasanga
“Musande vinthu vyose. Koleskani icho ntchiwemi.”—1 TES. 5:21.
SUMU 142 Kukoleska Chigomezgo Chithu
IVYO VILI MU NKHANI IYI *
1. Chifukwa wuli ŵanthu ŵanandi ŵakutimbanizgika?
MAZUŴA ghano kuli mipingo yinandi chomene yakuchemeka Yachikhristu iyo yikuti yikusopa Chiuta munthowa iyo yikumukondweska. Lekani ŵanthu ŵanandi ŵakutimbanizgika! Ŵakufumba kuti: “Kasi chiliko chisopa chimoza chaunenesko, panji kasi visopa vyose vikukondweska Chiuta?” Kasi ise tikukhorwa nadi kuti tikusambizga unenesko kweniso kuti kasopero ako Ŵakaboni ŵa Yehova ŵakulondezga mazuŵa ghano ndiko Yehova wakukondwa nako? Kasi ntchamachitiko kumanya nadi unenesko? Tiyeni tiwone ukaboni.
2. Kuyana na 1 Ŵatesalonika 1:5, chifukwa wuli mpositole Paulosi wakakhorwa kuti wali kusanga unenesko?
2 Mpositole Paulosi wakakhorwa na mtima wose kuti wali kusanga unenesko. (Ŵazgani 1 Ŵatesalonika 1:5.) Iyo wakagomezganga nthena, chifukwa chakuti wakajipulikanga waka makora na kasopero aka yayi. Kweni wakasambiranga chomene Mazgu gha Chiuta. Ndipo wakagomezga kuti “Malemba ghose ngakupelekeka na Chiuta kwizira mwa mzimu.” (2 Tim. 3:16) Kasi wakasanga vichi pakusambira? Mu Malemba, Paulosi wakasangamo ukaboni wambura kususkika wakuti Yesu wakaŵa Mesiya uyo wakalayizgika, ukaboni uwu ndiwo ŵalongozgi Ŵachiyuda ŵakawusulangako mwadala. Ŵalongozgi aŵa ŵakatenge ŵakwimira Chiuta kweni ŵakamukana kwizira mu milimo yawo. (Tito 1:16) Paulosi wakaŵa wakupambana na ŵalongozgi aŵa. Iyo wakachitanga kusankha yayi vigaŵa vya Mazgu gha Chiuta ivyo wangalondezga. Iyo wakaŵa wakunozgeka kusambizga na kulondezga “khumbo lose la Chiuta.”—Mil. 20:27.
3. Kasi tikukhumbikwira kumanya dankha mazgoro gha mafumbo ghithu ghose kuti tikhorwe kuti tili mu unenesko? (Wonaniso bokosi lakuti “ Milimo ya Yehova na Maghanoghano Ghake Ni ‘Vinandi Chomene Vingapendeka Yayi.’”)
3 Ŵanthu ŵanyake ŵakughanaghana kuti chisopa chaunenesko chikwenera kuzgora fumbo lililose, nanga ni mafumbo agho ghakuzgoreka mwakudunjika yayi mu Baibolo. Kasi ichi ntchakupulikikwa? Wonani ivyo Paulosi wakachitanga. Iyo wakaphalira Ŵakhristu ŵanyake kuti ‘ŵasande vinthu vyose,’ kweni wakayowoyaso kuti pakaŵa vinandi ivyo nayo wakavipulikiskanga yayi. (1 Tes. 5:21) Iyo wakalemba kuti: “Tikumanya vyakupeleŵera,” ndipo wakasazgirapo kuti “tikuwona muzgezge wambura kuwoneka makora pa gilasi lachisulo.” (1 Kor. 13:9, 12) Paulosi wakamanyanga vyose yayi; nase tikumanya vyose yayi. Kweni Paulosi wakapulikiska fundo yikuru yakukhwaskana na Yehova. Ivyo wakamanyanga vikaŵa vyakukwana kumukhorweska kuti wali mu unenesko!
4. Kasi ntchivichi chingatovwira kuti tikhorwe kuti tili kusanga unenesko, ndipo tiwonenge vichi vyakukhwaskana na Ŵakhristu ŵaunenesko?
4 Chinthu chimoza icho chingatovwira kuti tikhorwe nadi kuti tili kusanga unenesko ni para tingayaniska kasopero ako Yesu wakambiska na kasopero ako Ŵakaboni ŵa Yehova ŵakulondezga mazuŵa ghano. Mu nkhani iyi, tiwonenge kuti Ŵakhristu ŵaunenesko (1) ŵakukana kusopa vikozgo, (2) ŵakuchindika zina la Yehova, (3) ŵakutemwa unenesko, kweniso (4) ŵakutemwana chomene.
TIKUKANA KUSOPA VIKOZGO
5. Kasi tikusambirako vichi kwa Yesu pa nkhani yakukhwaskana na kusopa Chiuta munthowa yakwenelera, ndipo tingalondezga wuli ivyo wakasambizga?
5 Chifukwa chakuti Yesu wakumutemwa chomene Yehova, wakasopanga iyo pera apo wakaŵa kuchanya kweniso apo wakaŵa pa charu chapasi. (Luka 4:8) Nakuti ndivyo wakasambizga ŵasambiri ŵake kuti ŵachitenge. Yesu kweniso ŵasambiri ŵake ŵakugomezgeka ŵakaŵanga na vikozgo yayi pakusopa. Pakuti Chiuta tingamuwona yayi, palije icho munthu wangapanga icho chingayanako na uchindami wa Yehova! (Yes. 46:5) Kweni wuli pakuyowoya za kupanga vikozgo vya ŵanthu awo ŵakuti ŵakaŵa ŵatuŵa na kulomba kwa iwo? Mu dango lachiŵiri pa Malango Khumi, Yehova wakati: “Ungajipangiranga chikozgo chakuŵaja chara panji chinthu chilichose chakukozgana na ivyo vili mu mtambo kuchanya panji pa charu chapasi . . . Ungavisindamiranga chara.” (Ek. 20:4, 5) Ŵanthu awo ŵakukhumba kukondweska Chiuta ŵakumanya kuti iyo wakukhumba yayi kuti tisopenge vikozgo.
6. Kasi Ŵakaboni ŵa Yehova ŵakulondezga kasopero wuli mazuŵa ghano?
6 Ŵanthu ŵakulemba mdauko ŵali kuzomerezga kuti Ŵakhristu ŵakwambilira ŵakasopanga Chiuta pera. Mwachiyelezgero, buku lakuti History of the Christian Church likuyowoya kuti Ŵakhristu ŵakwambilira “mphanyi ŵakuseluka nayo” fundo ya kuŵika vikozgo mu nyumba zakusoperamo. Mazuŵa ghano, Ŵakaboni ŵa Yehova ŵakuchita nga umo Ŵakhristu ŵakwambilira ŵakachitiranga. Tikulomba ku vikozgo vya “ŵatuŵa” panji ŵangelo yayi; kweniso tikulomba kwa Yesu yayi. Ndipo tikusindamira yayi ndembera panji kuchita chilichose icho chingalongora kuti tikusopa boma panji charu. Tikuŵikapo mtima kupulikira ivyo Yesu wakayowoya, visuzge viti uli. Iyo wakati: “Yehova Chiuta wako ndiyo ukwenera kumusopa.”—Mat. 4:10.
7. Kasi pali mphambano wuli pakati pa Ŵakaboni ŵa Yehova na visopa vinyake?
7 Mazuŵa ghano, ŵanthu ŵanandi ŵakulondezga waka ŵaliska ŵakutchuka. Ŵakuŵatemwa chomene ŵaliska aŵa, icho chikukhalako waka nkhuŵasopa. Ŵanthu ŵakuzura ndundundu mu matchalitchi ghawo, ŵakugura mabuku ghawo, na kupeleka ndalama kwa iwo panji ku mawupu agho ŵakwendeska. Ŵanthu ŵanyake ŵakugomezga chilichose icho ŵaliska aŵa ŵayowoya. Ŵakukondwa nawo chomene nga kuti ŵawona Yesu. Kweni awo ŵakusopa Chiuta munthowa yakwenelera ŵakulondezga ŵanthu yayi. Nangauli tikuŵachindika awo ŵakudangilira, kweni tikupulikira fundo ya Yesu yakuti: “Imwe mose muli ŵabali.” (Mat. 23:8-10) Ise tikusopa ŵanthu yayi, kwali mbalongozgi ŵachisopa panji ŵalongozgi ŵandyali. Nakuti tikukhozgera yayi vilato vyawo. Tikunjilirapo yayi pa ndyali ndipo tikupatukako ku charu. Mu vigaŵa ivi, tikupambana chomene na visopa vinandi ivyo vikuti ni Vyachikhristu.—Yoh. 18:36.
TIKUCHINDIKA ZINA LA YEHOVA
Ŵakhristu ŵaunenesko ŵakukondwa kuphalirako ŵanyawo vya Yehova (Wonani ndime 8-10) *
8. Kasi tikumanya wuli kuti Yehova wakukhumba kuti zina lake lichindikikenge kweniso kuti ŵanthu wose ŵalimanye?
8 Nyengo yinyake, Yesu wakalomba kuti: “Adada, chindikani zina linu.” Yehova iyomwene wakazgora lurombo ulu na lizgu likuru kufuma kuchanya, wakayowoya kuti walichindikenge zina lake. (Yoh. 12:28) Nyengo yose iyo wakachitanga uteŵeti wake pano pasi, Yesu wakachindikanga zina la Awiske. (Yoh. 17:26) Ntheura ntchakupulikikwa kukhazga kuti Ŵakhristu ŵaunenesko ŵakondwenge kuzunura zina la Chiuta na kumanyiskaso ŵanji.
9. Kasi Ŵakhristu ŵakwambilira ŵakalongora wuli kuti ŵakachindikanga zina la Chiuta?
9 Nyengo yichoko waka mpingo Wachikhristu wati wambika, Yehova “wakang’anamukira ku mitundu kuti kwa iwo watoleko ŵanthu ŵa zina lake.” (Mil. 15:14) Ŵakhristu aŵa ŵakaŵa ŵakukondwa kuzunura zina la Chiuta na kumanyiskako ŵanji. Ŵakazunuranga zina la Chiuta para ŵakupharazga kweniso apo ŵakalembanga mabuku gha mu Baibolo. * Iwo ŵakalongora kuti ŵakaŵa ŵanthu ŵekha awo ŵakamanyikwanga na zina la Chiuta.—Mil. 2:14, 21.
10. Kasi pali ukaboni wuli wakuti Ŵakaboni ŵa Yehova mbanthu ŵa zina la Yehova?
10 Kasi Ŵakaboni ŵa Yehova mbanthu ŵa zina la Yehova? Wonani ukaboni. Mazuŵa ghano, ŵalongozgi ŵanandi ŵavisopa ŵayezgayezga kubisa fundo yakuti Chiuta wali na zina. Ŵali kufumiskamo zina ili mu Mabaibolo agho ŵakung’anamura, ndipo nyengo zinyake ŵakukanizga ŵanthu kuzunura zina la Chiuta pa visopo. * Ni fundo yambura kususkika yakuti Ŵakaboni ŵa Yehova ŵekha ndiwo ŵakuchindika zina la Chiuta umo likwenera kuchindikikira. Ndise pera tikumanyiska chomene ŵanthu zina la Chiuta kuluska gulu linyake lililose la chisopa! Pa nkhani iyi, tikuyezgayezga kuchita vinthu kuyana na zina lithu lakuti Ŵakaboni ŵa Yehova. (Yes. 43:10-12) Tafumiska Mabaibolo ghakujumpha 240 miliyoni gha Malemba Ghakupatulika mu Mang’anamuliro gha Charu Chiphya, agho ghali na zina la Yehova mu malo ghose agho ŵanthu ŵanyake ŵakung’anamura Baibolo ŵali kuwuskamo. Tikupangaso mabuku ghakulongosora Baibolo mu viyowoyero vyakujumpha 1,000 agho nagho ghakuthandazga zina la Yehova.
TIKUTEMWA UNENESKO
11. Kasi Ŵakhristu ŵakwambilira ŵakalongora wuli kuti ŵakatemwanga unenesko?
11 Yesu wakatemwanga chomene unenesko, kung’anamura unenesko wakukhwaskana na Yehova na ivyo wakukhumba kuchita. Yesu wakachitanga vinthu kuyana na unenesko uwu, ndipo wakaŵaphalirangako ŵanthu. (Yoh. 18:37) Ŵanthu awo ŵakulondezga nadi Yesu nawo ŵakutemwa chomene unenesko. (Yoh. 4:23, 24) Nakuti mpositole Petrosi wakayowowoya kuti Chikhristu ni “nthowa ya unenesko.” (2 Pet. 2:2) Pakuti ŵakawutemwanga chomene unenesko, Ŵakhristu ŵakwambilira ŵakakananga fundo za chisopa, maluso, na maghanoghano, ivyo vikakolerananga yayi na unenesko. (Kol. 2:8) Mazuŵa ghano napo, Ŵakhristu ŵaunenesko ŵakuyezgayezga ‘kulutilira kwenda mu unenesko’ pakujintha vigomezgo na umoyo wawo pa Mazgu gha Yehova.—3 Yoh. 3, 4.
12. Kasi chikuchitika ntchivichi para Wupu Wakulongozga wawona kuti fundo yinyake yikukhumbikwira kuyilongosoraso makora, ndipo chifukwa wuli ukuchita nthena?
12 Ŵakaboni ŵa Yehova ŵakuyowoyapo yayi kuti ŵakumanya chilichose cha mu Baibolo. Nyengo zinyake, ŵabudiskapo pa umo ŵakulongosolera chisambizgo cha mu Baibolo, panji pa kendeskero ka mpingo. Ichi chikwenera kutizizika yayi. Malemba ghakuyowoya makora kuti ŵanthu ŵa Chiuta ŵakupulikiska makora unenesko para nyengo yikujumphapo. (Kol. 1:9, 10) Yehova wakuvumbura unenesko pachokopachoko, ndipo tikwenera kulindilira waka mwakuzikira kuti ungweru wa unenesko uŵale chomene. (Zinth. 4:18) Para Wupu Wakulongozga wawona kuti pakukhumbikwa kulongosoraso makora umo tikupulikiskira fundo yinyake ya unenesko, ukusintha nyengo yeneyiyo apo mphakukhumbikwa. Matchalitchi ghanandi ghakusintha vinthu kuti ghakondweske waka ŵanthu ŵawo panji kuti ŵatemweke na charu, kweni gulu la Yehova likusintha vinthu kuti tiŵe pafupi na Chiuta kweniso kuti vikolerane na kasopero ako Yesu wakambiska. (Yak. 4:4) Tikusintha vinthu chifukwa cha kukhumba kuti vikoleraneko na umoyo wa mazuŵa ghano yayi, kweni chifukwa cha kupulikiska makora Malemba. Tikuwutemwa chomene unenesko!—1 Tes. 2:3, 4.
TIKUTEMWANA CHOMENE
13. Kasi ni mukhaliro wuli ukuru chomene uwo Ŵakhristu ŵaunenesko kale ŵakalongorananga, ndipo Ŵakaboni ŵa Yehova mazuŵa ghano ŵakuwulongora wuli?
13 Pa mikhaliro yose yiwemi iyo Ŵakhristu ŵakwambilira ŵakamanyikwanga nayo, mukhaliro ukuru chomene ukaŵa chitemwa. Yesu wakati: “Usange mukutemwana, wose ŵamanyenge kuti ndimwe ŵasambiri ŵane.” (Yoh. 13:34, 35) Mazuŵa ghano, Ŵakaboni ŵa Yehova ŵakutemwana na kukolerana pa charu chose chapasi. Tose tili munthu yumoza nanga tiŵe ŵakupambana mtundu, fuko, kweniso vyaru. Tikuwona ukaboni wa chitemwa ichi pa maungano ghithu gha mpingo, gha dera, na gha chigaŵa. Ukaboni uwu ukutikhorweska chomene kuti kasopero kithu ndiko Yehova wakukondwa nako.
14. Kuyana na Ŵakolose 3:12-14, kasi nthowa yikuru iyo tingalongolera kuti tikutemwana chomene njakuti wuli?
14 Malemba ghakutichiska kuti ‘titemwanenge chomene.’ (1 Pet. 4:8) Nthowa yimoza iyo tikulongolera chitemwa ichi ni para tikugowokerana kweniso para tikuzizipizgirana pa tunthu uto tikubudirana. Nakuti tikupenja mipata iyo tingalongolera kuti tili ŵakupa kweniso kupokelera wose mu mpingo, nanga ni awo ŵangaŵa kuti ŵali kutikhuŵazga. (Ŵazgani Ŵakolose 3:12-14.) Para tili na chitemwa chanthena, tikulongora kuti ndise Ŵakhristu ŵaunenesko.
“CHIPULIKANO CHIMOZA”
15. Kasi tikulondezga kasopero ka Ŵakhristu ŵakwambilira munthowa wuli zinyake?
15 Tikulondezga kasopero ka Ŵakhristu ŵakwambilira munthowa zinyakeso. Mwachiyelezgero, umo gulu lithu likwendera, vikuyana waka na umo Ŵakhristu ŵakwambilira ŵakachitiranga. Nase tili na ŵalaŵiliri ŵakwendakwenda, ŵalara, na ŵateŵeti ŵakovwira, nga umo ŵakaŵira iwo. (Fil. 1:1; Tito 1:5) Nakuti nga ndiwo, nase tikuchindika malango gha Yehova pa nkhani za kugonana na nthengwa, kupatulika kwa ndopa, ndipo tikuvikilira mpingo ku ŵanthu ŵakwananga awo ŵakukhumba yayi kupera.—Mil. 15:28, 29; 1 Kor. 5:11-13; 6:9, 10; Heb. 13:4.
16. Kasi tikusambirapo vichi pa mazgu agho ghakuyowoyeka pa Ŵaefeso 4:4-6?
16 Yesu wakayowoya kuti ŵanandi ŵazamuti mbasambiri ŵake, kweni ni wose yayi awo ŵazamuŵa ŵanadi. (Mat. 7:21-23) Malemba ghakayowoyaso kale kuti mu mazuŵa ghaumaliro, ŵanthu ŵanandi ‘ŵazamuwoneka waka nga ŵakusopa Chiuta.’ (2 Tim. 3:1, 5) Kweni Baibolo likutiphalira mwambura kubisa kuti pali “chipulikano chimoza” icho Chiuta wakukondwa nacho.—Ŵazgani Ŵaefeso 4:4-6.
17. Kasi mbanjani mazuŵa ghano awo ŵakulondezga Yesu kweniso ŵakulondezga chipulikano chimoza chanadi?
17 Kasi mbanjani ŵali na chipulikano chanadi mazuŵa ghano? Tasanda maukaboni. Tawona kasopero ako Yesu wakambiska, ndipo kasopero aka ndiko Ŵakhristu ŵakwambilira ŵakalondezganga. Ntheura zgoro ndimoza pera. Mbakaboni ŵa Yehova. Ni mwaŵi ukuru chomene kuŵa yumoza wa ŵanthu ŵa Yehova kweniso kumanya unenesko wakukhwaskana na Yehova ndiposo ivyo wakukhumba kuchita! Ipo mphanyi talutilira kukhorwa na kukoleska unenesko uwo tili kusanga.
SUMU 3 Nkhongono na Chigomezgo Chithu
^ ndime 5 Mu nkhani iyi, tiwonenge kasopero ako Yesu wakambiska na kuwona umo ŵasambiri ŵakwambilira ŵakalondezgeranga kasopero aka. Tiwonengeso maukaboni ghakuti Ŵakaboni ŵa Yehova ndiwo ŵakulondezga kasopero aka mazuŵa ghano.
^ ndime 9 Wonani bokosi lakuti “Kodi Akhristu Oyambirira Ankatchula Dzina la Mulungu?” mu Gongwe la Mulinda, la Chichewa la Julayi 1, 2010, p. 6.
^ ndime 10 Mwachiyelezgero, mu 2008, Papa Benedict XVI wakalangura kuti zina la Chiuta “lingazunulikanga yayi” mu visopo, sumu, panji mu malurombo gha Ŵakatolika.
^ ndime 63 MAZGU GHAKULONGOSORA CHITHUZI: Gulu la Yehova lafumiska Baibolo la Mang’anamuliro gha Charu Chiphya mu viyowoyero vyakujumpha 200 mwakuti ŵanthu ŵaŵazgenge Baibolo ilo lili na zina la Chiuta mu chiyowoyero chakonkhera.
