1. ¿Bin yuʼun ay ants winiketik ma snaʼik te bin ya schʼuunik?

AY BAYAL religionetik ya yalik te schʼuunejik te Cristo sok te ya yichʼik ta mukʼ te Dios, jich te bitʼil ya skʼane. Jich yuʼun bayal ants winiketik ma snaʼik te bin ya schʼuunik sok jich ya sjojkʼoybey sbaik: «¿Jun-naxbal te smelelil religión o lekbal ya yil Dios spisil te religionetik?». Jaxan te joʼotik te testigootik yuʼun Jehová, ¿kʼoembal ta koʼtantik te ya kakʼtik ta nopel te smelelil kʼop sok te ya kichʼtik ta mukʼ te Dios jich te bitʼil ya smulane? Sok ¿yabal schʼuun koʼtantik te yuʼun-nix smelelil-ae? Kiltik cheʼoxeb ejemploetik.

2. ¿Bin yuʼun te jpuk-kʼop Pablo ya xkʼot ta yoʼtan te yuʼun-nix smelelil-a te bin schʼuunej? (1 Tesalonicenses 1:5).

² Te jpuk-kʼop Pablo kʼoem ta yoʼtan te yuʼun-nix smelelil-a te bin schʼuunej (kʼopona 1 Tesalonicenses 1:5). Te bin schʼuunej yoʼtan ma jaʼuknax ta skaj te bin yaʼiyel ya yaʼiy sba. Jaʼ ta swenta te ya snop ta lek te sKʼop Dios. Kʼoem ta yoʼtan «te bin tsʼihbabil hilel ta Shun hich nix la scʼan Dios te ya yichʼ tsʼihbayel» (2 Tim. 3:16). Kʼalal la snop te sKʼop Dios, te jpuk-kʼop Pablo la sta ta ilel te jaʼnix-a te Mesías te Jesús te albil skʼoplale. Pero te judioetik te jaʼik jwolwanejetik yuʼun religión ma la yichʼik ta wenta te bin ya yal te sKʼop Dios. Te jchebal-oʼtanetik-abi, la yalik te ya snaʼbeyik sba te Dios, pero ma jichuk ya xchiknaj ta swenta te bin ya spasik (Tito 1:16). Yan stukel te Pablo ma la stsa te bantinax ya schʼuun yoʼtan te bin ya yal te sKʼop Dios. Jaʼ la yakʼ ta nopel sok la scholbey skʼoplal «spisil bintic schapoj te Diose» (Hech. 20:27).

3. Yuʼun ya schʼuun koʼtantik te jnopojtik te smelelil kʼop, ¿yabal skʼan ya yal-abi te ya jnaʼbeytik sujtib spisil te jojkʼoyeletik? (Jaʼnix jich ilawil te recuadro « Te bintik spasoj te Jehová sok te snopojibal ma xjuʼ ta naʼel spisil»).

 ³ Ay machʼatik ya yalik te spisil ya yakʼbey sujtib te jojkʼoyeletik te smelelil religión, manchukme ay ma xyakʼbey sujtib ta jamal te Bibliae. ¿Yuʼun-nixbal jich-a? Kiltik te ejemplo yuʼun te jpuk-kʼop Pablo, jich la yalbey te jchʼuunjeletik: «Tsahtayahic spisil», pero jamal la yal te jaʼnix jich ma spisiluk kʼoem ta yoʼtan (1 Tes. 5:21). La yal te «ma tsʼacaluc te bintic jnaʼojtic» sok «yaxinal nax ya quiltic ta espejo» (1 Cor. 13:9, 12). Te Pablo ma spisiluk snaʼoj ta lek, jaʼnix jich te joʼotike. Pero kʼoem ta yoʼtan te bintik snopoj ta swenta te Jehová sok schʼuunej yoʼtan te jaʼ te smelelil.

4. 1) ¿Bin-utʼil ya stsakxan yip te bin kʼoem ta koʼtantik ta swenta te smelelil kʼop? 2) ¿Bin ya kilbeytik skʼoplal ta artículo ini?

⁴ ¿Bin-utʼil ya stsakxan yip te bin kʼoem ta koʼtantik ta swenta te smelelil kʼop? Jaʼ te ya jpajbeytik skʼoplal te bin la yal te Jesús ta swenta te yichʼel ta mukʼ Dios, jich bitʼil ya spasik te testigoetik yuʼun Jehová. Ta artículo ini, ya kiltik bin yuʼun te smelelil jchʼuunjeletik 1) ya spʼajik te yichʼel ta mukʼ lokʼombaetik, 2) ya yichʼbeyik ta mukʼ sbiil te Jehová, 3) kʼux ta yoʼtanik te smelelil kʼop sok 4) talel kʼaxel kʼux ya yaʼiy sbaik.

5. ¿Bin ejemplo la yakʼ te Jesús yuʼun ya kichʼtik ta mukʼ te Dios sok bin-utʼil ya jpastik?

⁵ Te Jesús kʼux ta yoʼtan te Jehová, la yichʼ ta mukʼ te kʼalal ay ta chʼulchan sok te kʼalal xtaluk ta Balumilal (Luc. 4:8). Sok la snojpteslan te jnopojeletik te jichuk ya spasik. Te Jesús maba la stuuntes  lokʼombaetik ni jaʼuk te jnopojeletik yuʼun ya yichʼik ta mukʼ te Jehová. Te Dios jaʼ espíritu, maʼyuk machʼa ya xjuʼ ya spajbey te yutsilal manchukme te winik ya spas lokʼombaetik yuʼun ya yichʼik ta mukʼ (Is. 46:5). ¿Bin ya kaltik yuʼun te ya spasbeyik slokʼombail te santoetik sok ya skʼoponik? Ta schebal te Lajuneb Mantaliletik la yakʼ te Jehová, jich la yal: «Ma me xapasbe slocʼombahil o biluc a te pajal yilel soc te bintic ay ta chʼulchan, ta bahlumilal o ta haʼetic ta yeʼtal bahlumilal. Ma me xaquejan aba ta stojolic» (Éx. 20:4, 5). Te machʼatik lek ya skʼan ya x-ilotik yuʼun te Dios, ya schʼuunik spasel te mantalil ini.

6. ¿Bin ejemplo ya stʼunik te testigoetik yuʼun Jehová?

⁶ Te historiadoretik la yalbey skʼoplal te jchʼuunjeletik ta sbabial siglo te jaʼnax ya yichʼik ta mukʼ te Jehová. Ay jun libro yuʼun historia te ya yalbey skʼoplal ta swenta te sbabial jchʼuunjeletik te kʼaxel ma lek la yilik te ya yakʼik lokʼombaetik te banti ya yichʼik ta mukʼ te Jehová (History of the Christian Church). Ta ora ini, te testigoetik yuʼun Jehová ya stʼunik te ejemplo jich bitʼil la spasik te jchʼuunjeletik ta sbabial siglo. Maba ya jkʼopontik te slokʼombail te santoetik o te chʼul-abatetik, ni jaʼuk ya jkʼopontik te Jesús. Jaʼnix jich maba ya jchʼuuntaytik te bandera sok te bintik ya yichʼik ta mukʼ ta nación. Chikan te bin ya xkʼax ta jtojoltik, jun koʼtantik ya jchʼuuntik spasel te bin la yal te Jesús: «Ha nax me xachʼuhuntay [...] te Dios awuʼun» (Mat. 4:10).

7. ¿Bintik ma pajal ya spasik te testigoetik yuʼun Jehová sok te yantik religionetik?

⁷ Ta kʼajkʼal ini, bayal ants winiketik ya stʼunik te jwolwanejetik yuʼun religión sok ya skʼan ya sdiosinik. Bayal machʼatik ya xkʼotik ta iglesia o ta stemploik, ya smanik bayal libroetik sok ya yakʼik bayal takʼin. Ay machʼatik ya schʼuunik spisil te bin ya x-albotik. ¡Maniwan jichuk ya spasik te yakuk yilik te Jesús! Yan stukel te smelelil j-abatetik yuʼun te Jehová maba ya stʼunik jtul winik. Manchukme ya kichʼtik ta wenta te machʼatik ay yaʼtelik ta organización, pero jaʼ ya jpastik te bin la yakʼ ta nopel te Jesús: «Awermano abahic ta apisilic» (Mat. 23:8-10). Ma jichuk ya kiltik bitʼil jdiostik te winiketik, manchukme jwolwanejetik yuʼun religión o ajwaliletik. Ma jkoltaybeytik skʼoplal, jun koʼtan ya kakʼ jbatik sok ma jkap jbatik ta bintik ya spasik. Ma pajalotik sok te yantik religionetik manchukme ya yalik te schʼuunejik Dios. (Juan 18:36).

8. ¿Bin-utʼil ya jnaʼtik te ya skʼan ya kichʼtik ta mukʼ te sbiil te Jehová sok te ya kakʼtik ta naʼel?

⁸ Ta jun buelta, te Jesús jich la skʼopon te Jehová: «Jtat, acʼa ta ichʼel ta mucʼ te abihile». Te Jehová la yakʼbey sujtib kʼalalto ta chʼulchan sok la yal te ya yakʼ ta ichʼel ta mukʼ te sbiile (Juan 12:28). Kʼalal la schol skʼop Dios te Jesús, la yakʼ ta ichʼel ta mukʼ sbiil te sTat (Juan 17:26). Jich yuʼun-abi, te smelelil jchʼuunjeletik tseʼel yoʼtanik te ya stuuntesik te sbiil te Dios sok te ya yakʼik ta naʼel.

9. ¿Bin-utʼil la yakʼik ta ilel te jchʼuunjeletik ta sbabial siglo te yichʼojbeyik ta mukʼ sbiil te Jehová?

⁹ Ta sbabial siglo, kʼalal jajch te congregación te Jehová la «yicʼ ta stojol jun pueblo yuʼun ta yohlil te jyanlumetique» (Hech. 15:14). Te jchʼuunjeletik-abi, tseʼel yoʼtanik te ya stuuntesbeyik sbiil te Dios sok te ya yakʼbeyik snaʼ te yantik. La stuuntesbeyik te sbiil ta scholel skʼop Dios sok te kʼalal la  yichʼ tsʼibayel te Biblia. * Jich la yakʼik ta ilel te yichʼojbeyik sbiil te Jehová (Hech. 2:14, 21).

10. ¿Bin ya yakʼ ta ilel te yichʼojbeyik sbiil te Dios te testigoetik yuʼun Jehová?

¹⁰ Te testigoetik yuʼun Jehová, ¿yichʼbeyojikbal sbiil te Dios? Kiltik cheʼoxebuk ejemplo. Ta ora ini, bayal jwolwanejetik yuʼun religión ma xyakʼik ta nopel te sbiil te Diose. Maba tsʼibaybil ta sBibliaik sok maba ya yakʼik ta stuuntesel te kʼalal ayik ta iglesia o ta stemploik. * Jaʼnax te testigoetik yuʼun Jehová ya yalbeyik yutsil skʼoplal sbiil te Dios sok ya yichʼik ta mukʼ. Maʼyuk yan religión te ya yakʼbey snaʼ te ants winiketik sbiil te Dios te bitʼil joʼotike. Ya jpastik tulan yuʼun ya kakʼtik ta ilel te bin yuʼun kichʼojtik biiltesel: testigo yuʼun Jehová. (Is. 43:10-12). Kʼaxem ta 240 millón yichʼoj pukel te Traducción del Nuevo Mundo, te tsʼibaybil tey-a te sbiil te Jehová yan stukel te yantik Bibliaetik yichʼoj lokʼesel te sbiil te Dios. Te publicacionetik yichʼoj kʼasesel kʼaxem ta jmil kʼopiletik sok yichʼoj sbiil te Jehová.

11. ¿Bin-utʼil la yakʼik ta ilel te jchʼuunjeletik ta sbabial siglo te kʼux ta yoʼtanik te smelelil kʼop?

¹¹ Te Jesús kʼux ta yoʼtan te smelelil kʼop sok te skʼanojel yoʼtan te Dios. La yakʼ ta  ilel ta skuxlejal sok la yakʼbey snop te yantik (Juan 18:37). Te smelelil jnopojeletik yuʼun te Jesús, jaʼnix jich kʼux ta yoʼtanik te smelelil kʼop (Juan 4:23, 24). Te jpuk-kʼop Pedro la yal ta stojol te smelelil jchʼuunjeletik te ayik ta «be yuʼun te smelelil cʼope» (2 Ped. 2:2). Te jchʼuunjeletik ta sbabial siglo kʼux ta yoʼtanik te smelelil kʼop, jaʼ yuʼun la spʼajik te bin ya yalik te religionetik, te costumbreetik sok te bin ya yalik te ants winiketik (Col. 2:8). Jaʼnix jich ya spasik te smelelil jchʼuunjeletik ta ora ini, «stʼunojic te smelelil cʼop» (3 Juan 3, 4). ¿Bin-utʼil ya spasik? Jaʼ ay ta yoʼtanik te bintik schʼuunejik sok ya spas ta skuxlejalik te bin ya yal te Biblia.

12. ¿Bin ya spasik te hermanoetik te ya xwolwanik kʼalal ya yilbey skʼoplal te ay bin ya skʼan jelel sok bin yuʼun jich ya spasik?

¹² Te testigoetik yuʼun Jehová ma xyalik te kʼaxel ya snaʼik te bin ya yal te Biblia. Ay baeltik te ma jichuk te bin la yakʼik ta nopel ta Biblia o xchapel te bin ya yichʼ pasel ta congregación. Pero ma yanuknax ya skʼan ya kiltik-a, melel te Biblia ya yal te kʼunkʼun ya xkʼot ta yoʼtanik te j-abatetik yuʼun Dios te smelelil kʼop (Col. 1:9, 10). Te Jehová kʼunkʼun ya yakʼ jnaʼtik te smelelil kʼop, jaʼ yuʼun ya skʼan ya jmaliytik sok slamalil koʼtantik te kʼunkʼun ya xkʼotxan ta koʼtantik te smelelil kʼope (Prov. 4:18). Te hermanoetik te ya xwolwanik, kʼalal ya yilik te ay bin ya skʼan jelel yuʼun ya xkʼotxan ta koʼtantik, oranax ya spasik. Bayal religionetik ay bintik ya sjelik swenta lek ya x-ilotik yuʼun te sjoʼtak. Pero te testigootik yuʼun Jehová ay bintik ya jeltik yuʼun ya xnoptsajotikxan ta stojol te Dios sok ya kichʼtik ta mukʼ jich bitʼil la yakʼ ta nopel te Jesús (Sant. 4:4). Kʼalal ay bin ya yichʼ jelbeyel skʼoplal, ma yuʼunuk ya jkʼayintik te bin ya snop te ants winiketik o te bin yachʼil ya spasik, jaʼ ya yichʼ pasel ta swenta te kʼoem ta koʼtantik te bin ya yal te Biblia sok kʼux ta koʼtantik te smelelil kʼop (1 Tes. 2:3, 4).

13. 1) ¿Bin talelil te mukʼxan skʼoplal la yakʼik ta ilel te jchʼuunjeletik ta sbabial siglo? 2) ¿Bin-utʼil ya yakʼik ta ilel te testigoetik yuʼun Jehová ta ora ini?

¹³ Te jchʼuunjeletik ta sbabial siglo naʼbil sbaik te lek stalelik, pero te bin mukʼxan skʼoplal ya yakʼik ta ilel, jaʼ te kʼuxul oʼtanil. Te Jesús jich la yal: «Hich ya snaʼic spisil ants-winiquetic te haʼex jnopojelex cuʼun teme talel cʼaxel cʼux yac awaʼiy aba ta awoʼtanique» (Juan 13:34, 35). Ta ora ini, te testigoetik yuʼun te Jehová kʼux ya yaʼiy sbaik sok jun-nax ayik ta swolol Balumilal. Ma pajalotik sok te yantik religionetik, melel jun-nax familia jbatik manchukme yanyantik jtaleltik, jtsʼumbaltik sok jlumaltik. Jich ya kiltik te kʼalal ya xbootik ta tsoblejetik sok ta mukʼul tsoblejetik. Jaʼ ya yakʼ schʼuun koʼtantik te joʼotiknax ya kichʼtik ta mukʼ te Jehová, jich te bin-utʼil ya skʼan stukele.

14. Jich bitʼil ya yal te Colosenses 3:12-14, ¿bin-utʼil ya kakʼtik ta ilel te talel kʼaxel kʼux ya kaʼiy jbatik?

¹⁴ Te Biblia jich ya yal: «Talel cʼaxel cʼux xawaʼiy abahic» (1 Ped. 4:8). Te bitʼil ya kakʼtik ta ilel te kʼuxul oʼtanil, jaʼ te talel kʼaxel ya jpasbey jbatik perdón sok te ya xkujch kuʼuntik ta skaj te jmulawilotik. Jaʼnix jich jletik bin-utʼil ya kakʼtik ta ilel slekil koʼtantik ta stojol te hermanoetik manchukme ay machʼatik ay bin ma lek la spasbotik (kʼopona Colosenses 3:12-14). Teme talel kʼaxel kʼux ya kaʼiy jbatik jich ya kakʼtik ta ilel te smelelil jchʼuunjelotik.

15. ¿Bin-utʼil ya jtʼuntik te ejemplo yuʼun te jchʼuunjeletik ta sbabial siglo?

¹⁵ Ay yantikxan te bin ya jpastik ta yichʼel ta mukʼ Dios jich bitʼil la spasik te jchʼuunjeletik ta sbabial siglo. Jich bin-utʼil chajpanbil te organización, ay superintendenteetik yuʼun circuito, ancianoetik sok siervo ministerialetik, jaʼ ya yichʼ tʼunel te ejemplo yuʼun te jpuk-kʼopetik ta sbabial siglo (Filip. 1:1; Tito 1:5). Jaʼnix jich ma jelonem te snopojibal kuʼuntik te bitʼil ya yichʼ ilel te ants, te winik, te nujpunel, te chʼultesbil ya kiltik te chʼichʼ sok ya jkanantaytik te congregación yuʼun te machʼatik ya spasik mulil te ma sujtes yoʼtanik (Hech. 15:28, 29; 1 Cor. 5:11-13; 6:9, 10; Heb. 13:4).

16. ¿Bin ya yakʼ jnoptik te Efesios 4:4-6?

¹⁶ Te Jesús la yal te bayal machʼatik ya yalik te jaʼik jnopojeletik yuʼun, pero manix jaʼukik-a (Mat. 7:21-23). Jaʼnix jich te sKʼop Dios ya yal te ta slajibal kʼajkʼal, bayal machʼatik «sjel te stojil yaquic ta schʼuhunel Dios yilel» (2 Tim. 3:1, 5). Pero te Biblia jamal ya yal te jun-nax ay te schʼuunel koʼtantik te lek ya yil te Diose (kʼopona Efesios 4:4-6).

17. ¿Machʼatik ya stʼunik te ejemplo yuʼun te Jesús sok ayik ta smelelil religión?

¹⁷ Jich yuʼun, ¿machʼatik ayik ta smelelil religión? Chikan ta ilel te jaʼik te testigoetik yuʼun te Jehová. La kiltikix te ejemploetik, te bin la yal te Jesús sok te bin la spasik te jchʼuunjeletik ta sbabial siglo. Jaʼ jun mukʼul majtanil te ayotik ta lum yuʼun te Dios, melel ya jnaʼbeytik sba te Jehová sok te skʼanojel yoʼtane. Jaʼ yuʼun junuk koʼtantik ayukotik ta smelelil kʼop.