1. Why many people confuse?

PLENTY religion dey today wey claim say they be Christian, and say them de worship God for the correct way. No wonder plenty people don confuse! Them de ask say, “Na one true religion dey, or God de accept all the religions?” We really believe for our mind say the things wey we de teach na the truth, and say the way wey Jehovah Witness people de worship today na the one wey God accept? E really dey possible to dey sure of this things? Make we see some things wey prove-am.

2. With wetin 1 Thessalonians 1:5 talk, why apostle Paul dey sure say the thing wey e believe na the truth?

² Apostle Paul really dey sure say the thing wey e believe na the truth. (Read 1 Thessalonians 1:5.) Paul no believe-am just because of how e de feel about-am. Instead, Paul study Bible well. E believe say “na God use holy spirit direct everything wey them write inside Bible.” (2 Tim. 3:16) Wetin e learn from e Bible study? For Bible, Paul see strong proof to show say na Jesus be the Messiah wey God don promise. The leaders for Jew religion no gree accept this proof. They claim say them de teach people the truth about God, but them de do things wey God hate. (Titus 1:16) Paul no do like them at all. E no choose the part for Bible wey e want believe and the part wey e no go believe. E dey ready to teach and do “all the things wey God want.”—Acts 20:27.

3. We need to get the answers to all our questions before we dey sure say we get the truth? (Still check the box “ The Things Wey Jehovah De Do and Wey E Get for Mind Too Plenty to Count.”)

³ Some people feel say true religion suppose fit answer all question, even questions wey Bible no answer. E make sense  to think say this kind thing dey possible? See the example of apostle Paul. E encourage e brothers and sisters to “check and dey sure of everything,” but e still talk say plenty things dey wey e no understand. (1 Thess. 5:21) E talk say: “The thing wey we know no complete.” E still talk say: “We de look inside iron mirror and we no de see clear.” (1 Cor. 13:9, 12) Paul no understand everything, and even we too. But Paul understand the important truth them about Jehovah. The things wey e know dey enough to dey sure say wetin e believe na the truth!

4. How we fit believe more-more say we get the truth, and wetin we go talk about true Christians?

⁴ We fit dey sure more-more say we get the truth. One way wey we fit do this one na to compare the example of correct way to worship God wey Jesus show, with the way Jehovah Witness people de worship God today. For this topic, we go see say true Christians (1) de reject idol worship, (2) de respect the name of Jehovah, (3) love the truth, and (4) get strong love for each other.

5. Wetin we learn from Jesus about the correct way to worship God, and how we fit do wetin e teach?

⁵ Because Jesus really love Jehovah, e worship only Jehovah for heaven and when e dey this earth. (Luke 4:8) E teach e disciples to do the same thing. Jesus no ever use image for e worship, and e faithful disciples no do like that too. Since God na spirit, nobody go fit ever make anything wey go fit be like God! (Isa. 46:5) But e good to make image of people wey some people feel say them dey holy, and de pray to them? The second commandment wey Jehovah give for the Ten Commandment,  talk say: “Make you no make for yourself any image or something wey resemble anything for heaven or for the earth . . . Make you no bow down for them.” (Ex. 20:4, 5) The thing wey that verse talk dey clear for people wey like to do wetin God want.

6. Which example Jehovah Witness de follow today to worship God?

⁶ People wey study history talk say, for the time of the apostles, Christians worship only God. For example, one history book talk say, Christians that time “for hate” the idea to get image for place wey them de worship God. Today, Jehovah Witness people de follow the example wey the first-first Christians show. We no de pray to image of people wey some people feel say dey holy or angels; we no de even pray to Jesus. And we no de salute flag or do anything wey go show say we de worship our country. No matter anything wey anybody try to make us do, we don make up our mind say we go obey wetin Jesus talk, say: “Na Jehovah your God you must worship.”—Matt. 4:10.

7. How Jehovah Witness people really dey different from all other religions?

⁷ Today, plenty people de follow church leaders just because they like how this leaders be and how them de do things. They like this leaders sotey, them de almost worship them. Plenty people de pack go their church, de buy their books, and de give them plenty money or de give the organizations wey they support. Some people de believe everything wey they talk. Them de glad when they see this leaders like say na Jesus they see! But people wey de worship God for the right way no de follow men. Na true say we de respect the people wey de direct our work, but this thing wey Jesus teach dey clear, and we agree with-am. E say: “All of wuna na brothers.” (Matt. 23:8-10) We no de worship men, whether they be leaders for religion or rulers for government. And we no de support any plan wey they get for religion or for politics. Instead, we dey separate from the world. So for this ways, we really dey different from other religions wey claim say they be Christians.—John 18:36.

8. Wetin make us know say Jehovah want make we honor e name and make everybody know the name?

⁸ E get one time wey Jesus pray say: “Father, do something so that people go praise your name.” Jehovah answer that prayer with loud voice from heaven, and e promise say e go do something so that people go praise e name. (John 12:28) For all the time wey Jesus do the preaching work, e do wetin go make people praise the name of e Father. (John 17:26) So, true Christians take-am as honor to use the name of God and to make people know the name.

9. How Christians for apostles their time show say they respect God name?

⁹ For apostles their time, small time after they form the Christian congregation, Jehovah accept people “from the nations” make e fit choose people from them “wey go bear e name.” (Acts 15:14) Christians that time see-am as honor to use the name of God and to tell people about-am. The apostles and disciples use the name of God when they preach and when they write Bible. * As they do like that, they show say they be the only people wey make other people know the name of God.—Acts 2:14, 21.

10. Wetin show say na only Jehovah Witness people de make other people know the name of Jehovah?

 ¹⁰ Na only Jehovah Witness people de make other people know the name of Jehovah? See wetin show say that one na true. Today, plenty leaders for religion don do everything wey they fit do to make sure say they hide the name of God. For their Bible translations, and for some situations, they no de allow people to use the name of God for their church. * E no clear say na Jehovah Witness people be the only people wey de give the name of God the respect and honor wey e suppose get? We de make people know the name of God more-more pass any other religion! For this way, we de really do our best to show say we really be Jehovah Witness. (Isa. 43:10-12) We don produce more than 240 million New World Translation Bible. This Bible use the name of Jehovah for place them wey other Bible translators don remove the name. And the publications wey we de produce, and wey dey for more than 1,000 language de make people know the name of Jehovah!

11. How the first-first Christians show say they love the truth?

¹¹ Jesus love the truth, and this truth na about God and all the things wey God go do. The way Jesus live e life show say e believe  that truth, and e make other people know the truth. (John 18:37) And true followers of Jesus get strong love for the truth too. (John 4:23, 24) Apostle Peter talk about Christian religion as “the way wey be the truth.” (2 Pet. 2:2) Because the first-first Christians get strong love for the truth, they reject things wey religion de teach, traditions, and ideas from people wey dey against the truth. (Col. 2:8) Today too, true Christians de do everything to “continue to waka for truth.” For this one to dey possible, them de make sure say the things wey they believe and the way them de live their life agree with wetin Bible talk.—3 John 3, 4.

12. Wetin de happen when Governing Body see say the way we understand some things need to change, and why them de do like that?

¹² Jehovah Witness no de claim say they always understand everything for Bible well. Sometimes, they don make mistakes for the way they explain some things wey Bible teach, or for how them de organize the congregation. Make this one no surprise us. Bible make-am dey clear say God people de understand the truth more-more as time de go. (Col. 1:9, 10) Jehovah de make e people to understand the truth small-small. And we must dey ready to wait with better mind, until we fit understand the truth pass as we understand-am before. (Prov. 4:18) When Governing Body see say we need to change the way we understand or de do something, they no de waste time to change-am. Many church today, de change the things wey them de teach because they want make their members happy or they want dey popular for the world. But Jehovah Witness de make change because they want near God more-more, and worship God for the way wey Jesus show. (Jas. 4:4) When we make change no be because the way people for the world de think don change, but na because the way we understand Bible don better. We love the truth!—1 Thess. 2:3, 4.

13. Wetin be the number one important character wey true Christians show, and how Jehovah Witness people today de show this one?

¹³ People know the first-first Christians for the better-better character wey they get. But the number one important character wey they use know them na love. Jesus talk say: “Na this one go make everybody know say wuna be my disciples, if wuna love wuna self.” (John 13:34, 35) Today, Jehovah Witness people for the whole world get real love for each other, and them dey as one. We dey different from other religions because, we be like one family even as we come from different countries and we get different cultures. The real love wey we get de show for our meetings, assemblies, and conventions. This one make us believe more-more say, we de worship Jehovah for the way e like.

14. As e dey for Colossians 3:12-14, wetin be one important way wey we fit show say we get strong love for each other?

¹⁴ Bible encourage us say make we “get strong love for each other.” (1 Pet. 4:8) One way wey we de show this kind love na when we de forgive each other and de bear wetin our brothers do us. We still de look for ways to show say we get open hand and to accept everybody for congregation, even people wey fit don do wetin pain us. (Read Colossians 3:12-14.) True-true, when we show this kind love, we de show say we be true Christians.

15. Which other ways we de follow the example of the first-first Christians about how to worship God?

¹⁵ For other ways too, we still de follow the example wey the first-first Christians show about how to worship God. For example, the way our organization de organize things na the same way the first-first Christians do things. We get traveling overseers, elders, and ministerial servants just as they get that time. (Phil. 1:1; Titus 1:5) And just like them, we de respect the laws wey Jehovah give about sex and marriage, the thing wey God talk about blood, and we de protect the congregation from people wey no want repent.—Acts 15:28, 29; 1 Cor. 5:11-13; 6:9, 10; Heb. 13:4.

16. Wetin we learn from the thing wey Bible talk for Ephesians 4:4-6?

¹⁶ Jesus talk say plenty people go claim to be e disciples, but no be all of them go be real disciples. (Matt. 7:21-23) Bible still warn say for last days, plenty people go de “pretend say them de serve God.” (2 Tim. 3:1, 5) But, Bible tell us for clear way say na “one faith” God don accept.—Read Ephesians 4:4-6.

17. Which people today de follow Jesus and de follow the one correct faith?

¹⁷ Which people de follow the one correct faith today? We don see things wey prove-am. We don see the example wey Jesus teach about the correct way to worship God. And we don see the example wey the first-first Christians show. So e clear say na only one answer dey. Na Jehovah Witness people. Na big honor to be one of Jehovah people, and to know the truth about Jehovah and the things wey e go do! So make we do everything wey we fit do to get strong belief say we dey the truth.