1. Pingo watye ki yomcwiny ki awaka me bedo Lucaden pa Jehovah?

WATYE ki yomcwiny kacel ki awaka madit me bedo Lucaden pa Jehovah! Wabedo jo pa Jehovah, dok wanyuto ni wan lucadenne ka watito kwena dok wapwonyo dano lok i kome. Cwinywa bedo yom ka wabedo ki kare me konyo ngat mo ma ‘myero me nongo kwo ma pe tum’ me doko laye lawotwa. (Tic 13:48) Wawinyo calo Yecu. En “obedo ki yomcwiny i cwiny maleng” i kare ma lupwonnyene gunywako kwede adwogi maber ma gunongo i kare ma gucito ka tito kwena.—Luka 10:1, 17, 21.

2. Watwero nyutone nining ni ticwa me tito kwena pire tek adada botwa?

² Watero ticwa me pwony calo gin ma pire tek. Lakwena Paulo ocuko cwiny Temceo ni: “Gwokke keni, dok igwok pwonnyi bene.” Paulo omedde ni: “Pien ka itimo kumeno, in kikomi ibilarre ki jo ma winyi bene.” (1 Tem. 4:16) Pi meno, ticwa me pwony laro kwo pa dano. Wagwokke kekenwa pien wabedo dano me Ker pa Lubanga. Kare ducu, wamito kwo i yo ma kelo deyo i kom Jehovah dok ma rwatte ki kwena maber ma watito-ni. (Pil. 1:27) Wanyuto ni watye ka ‘gwoko pwonywa’ ka wayubbe maber pi tic me pwony dok walego pi kony pa Jehovah ma peya wacako tito kwena bot jo mukene.

3. Tika dano ducu gibibedo ki miti i kom kwena me Ker-ri? Mi labol.

³ Kadi bed watute matek me tito kwena bot jo mukene, watwero nongo ni dano mapol i kabedowa pe gitye ki miti i kom kwena maber me Ker-ri. Nen kong gin mutimme i kwo pa Omego Georg Lindal, ma obedo ka tito kwena kene i lobo Iceland nicakke i mwaka 1929 me o i 1947. En opoko bukke alip mapol ata; ento, pe tye kadi dano acel mo ma odoko Lacaden. En ocoyo ni: “Jo mogo gidag kwena me Baibul, ento pol pa dano pe gitye ki miti.” Lacen lumiconari ma gua ki i cukul me Gilead bene kicwalogi kunnu ka  konyo tic, ento gin bene gutito kwena pi mwaki mapol labongo nongo dano ma gitye ki miti. I nge mwaka abongwen mukene aye dong jo mogo gudyero kwogi dok gunongo batija. *

4. Watwero winyo nining ka dano pe gitye ki miti me kwano Baibul kwedwa?

⁴ Cwinywa tur ka dano pe gitye ki miti me kwano Baibul kwedwa. Watwero winyo calo lakwena Paulo, ma owaco ni “atye ki cwercwiny madit kun cwinya rem mada ma pe jukke” pien Lujudaya pe gujolo Yecu macalo Meciya ma kiciko pire-ni. (Rom. 9:1-3) Twero bedo ni itye ka kwano Baibul ki ngat mo. Itute matek me bedo lapwony maber dok ilego pi latin kwanni kare ducu. Ento en pe tye ka keto i tic jami ma pwonyo, dok mitte ni ijuk kwan kwede woko. Nyo ket ni peya ikwano Baibul ki ngat mo nio wa batija. Tika omyero cwinyi obed ka pidi kun itamo ni Jehovah pe tye ka goyo laane i kom ticci? I pwony man, wabigamo lapeny aryo magi: (1) Gin ango ma nyuto ni watye ka cobo ticwa me pwony maber? (2) Ngo ma myero wange ka watye ka tito kwena bot jo mukene?

5. Pingo ticwa pi Jehovah i kare mukene pe cobbe kit ma wamito kwede?

⁵ Baibul loko kit man i kom ngat ma tiyo miti pa Lubanga: ‘Gin ma en tiyo ducu, cobbe kakare.’ (Jab. 1:3) Ento, man pe tyen lokke ni jami ducu ma watimo pi Jehovah bicobbe kit ma wamito kwede. Kwo pa dano “opong ki ayelayela” pi roc ma watye kwede ki pa jo mukene bene. (Yubu 14:1) Medo i kom meno, jo ma gidagwa gitwero temo gengowa ki tito kwena i ot ki ot nyo i dye lwak. (1 Kor. 16:9; 1 Tec. 2:18) Dong Jehovah moko nining ni ticwa tye ka cobbe kakare? Nen kong cik ma igi lac mogo me Baibul ma gamo lapeny man.

6. Jehovah moko nining ni ticwa pire tye ka cobbe kakare?

⁶ Jehovah neno tutewa ki kit ma wamedde kwede labongo ilo cingwa. Jehovah cwinye bedo yom i komwa ka watito kwena ki mit kom pien wamare, kadi bed jo mukene pe gijolo kwenawa. Paulo ocoyo ni: ‘Lubanga gire pe ye gin ma pe tye kakare, wiye pe biwil i kom tic ma yam wutiyo, kadi ki mar ma wunyuto pire ki konyo jo pa Lubanga, ma pud wutye ka konyogi bene wa i kare-ni.’ (Ibru 6:10) Jehovah wiye po i kom ticwa ki marwa, kadi bed pe wanongo latin kwan ma odongo nio wa i batija. Pi meno, gin ma Paulo owaco bot Lukricitayo me Korint bene tye ada botwa: ‘I Rwotwa yellewa-ni pe me nono’ kadi bed yellewa pe ocobo gin ma onongo wamito.—1 Kor. 15:58.

7. Ngo ma wapwonyo ki i gin ma lakwena Paulo owaco i kom ticce me pwony?

⁷ Lakwena Paulo onongo obedo lamiconari mucwiny, ma ocako kacokke manyen i boma mapatpat. Ento i kare ma jo mogo  gubedo ka cayo Paulo kun giwaco ni en pe lapwony maber, Paulo pe oloko i kom wel dano ma en okonyo me doko Lukricitayo. Me ka meno, Paulo ocoyo ni: ‘Atiyo tic aloyogi.’ (2 Kor. 11:23) Calo Paulo, omyero wiwa opo ni gin ma pire tek loyo bot Jehovah aye ni watiyo matek dok pe wailo cingwa woko.

8. Gin ango ma myero wiwa opo iye ka odok i kom ticwa me pwony?

⁸ Ticwa me pwony yomo cwiny Jehovah. Yecu ocwalo lupwonnye 70 ka tito kwena me Ker-ri, dok i agikki me rwec meno, “gudwogo cen ki yomcwiny.” Ngo ma okeligi yomcwiny? Gin guwaco ni: “Wa cen maraco bene guwinyo cikwa pi nyingi!” Ento, Yecu otiro tamgi i kare ma owaccigi ni: “Cwinywu pe obed yom pi man ni, cen guwinyo cikwu; ento cwinywu obed yom pien nyingwu gicoyo i wi polo.” (Luka 10:17-20) Yecu onongo ngeyo ni pe gibinongo adwogi maber kit meno kare ducu i ticgi me pwony. Ki lok ada, pe wangeyo dano adi ki i kin jo ma lupwonnye gutito kwena botgi ma lacen gudoko Lukricitayo. Onongo mitte ni lupwonnye guniang ni yomcwiny pe bino keken ka dano guwinyo lokgi. Ento yomcwinygi madit loyo bibino pi ngeyo ni cwiny Jehovah yom i kom tutegi.

9. Ngo ma Jo Galatia 6:7-9 waco ni wabinongo ka pe waol woko ki tito kwena?

⁹ Ka pe waol woko i ticwa me pwony, wabinongo kwo ma pe tum. Ka watute ki tekowa ducu me tito kwena maber ki pwonyo dano, nongo bene watye ka ‘coyo kodi i poto me cwiny maleng’ kun waweko cwiny pa Lubanga tiyo i kwowa. Ka pe “waol” nyo “ka cwinywa pe odoko nyap,” Jehovah ocikke ni ebiminiwa kwo ma pe tum, kadi bed pe wakonyo ngat mo me nongo batija.—Kwan Jo Galatia 6:7-9.

10. Pingo jo mogo gijolo lok ada ento jo mukene gikwero woko?

¹⁰ Ka dano bijolo lok ada nyo kwerone jenge i kom gin ma tye i cwinye. Yecu otito ada man i carolok ma en obolo i kom laco kodi ma ocoyo kodine i ngom mapatpat, ento kodi ma okir i ngom maber keken aye onyako nyige. (Luka 8:5-8) Yecu owaco ni ngom mapatpat-ti cung pi dano ma gijolo “lok pa Lubanga” i yo mapatpat ma lubbe ki kit ma cwinygi tye kwede. (Luka 8:11-15) Calo laco kodi-ni, pe watwero miyo lok pa Lubanga dongo i cwiny jo ma watito kwena botgi. Ticwa tye me medde ki coyo kodi me Ker-ri. Kit ma lakwena Paulo owaco kwede, ‘ngat acel acel binongo mucarane muporo tic ma en otiyo,’ ento pe adwogi me ticce.—1 Kor. 3:8.

11. Pingo watwero waco ni Nua ocobo ticce macalo “latit lok me kit ma atir”? (Nen cal ma tye i pok ngeye.)

¹¹ Cakke con i tekwaro pa dano, lutic pa Jehovah gubedo ka tito kwena bot jo ma pe gimito winyo lokgi. Me labolle, Nua onongo obedo “latit lok me kit ma atir,” nen calo pi mwaki 40 nyo 50 kulu. (2 Pet. 2:5) Labongo akalakala mo, en obedo ki gen ni jo mukene gibijolo kwenane, ento Jehovah pe owaco ni meno bitimme. Me ka meno, i kare ma en owaco ki Nua ni opa yeya, Lubanga owaco ni: “Ibidonyo i yeya, in kacel ki lutinoni, ki dakoni, ki mon pa awobeni ducu.” (Acak. 6:18) Dok i kare ma Jehovah otite bor ki lac pa yeya, Nua nen calo oniang ni pe dano mapol gibiwinyo lokke, pien yeya pe biromo gin ducu. (Acak. 6:15) Kit ma wangeyo kwede, pe tye kadi ngat acel ki i lobo marac meno ma owinyo lok pa Nua. (Acak. 7:7) Tika Jehovah oneno Nua calo ngat ma pe ocobo ticce  maber? Pe tye kit meno! Ki bot Lubanga, Nua ocobo ticce macalo latit kwena maber pien en obedo lagen i timo gin ma Jehovah owacce ni otim.—Acak. 6:22.

12. Lanebi Jeremia onongo yomcwiny nining i ticce me pwony kadi bed dano onongo pe giwinyo lokke dok gidage?

¹² Lanebi Jeremia bene obedo ka tito kwena pi mwaki makato 40 kadi bed dano onongo pe giwinyo lokke dok gidag en. Cwinye otur adada pi ‘cac ki anywar’ pa jo ma gidage ma oweko en onongo cok ilo cinge woko. (Jer. 20:8, 9) Ento Jeremia pe oilo cinge woko! Ngo ma okonye me lweny ki turcwiny ki me nongo yomcwiny i ticce me pwony? En oketo cwinye i kom jami aryo ma pigi tek. Mukwongo, kwena pa Lubanga, ma Jeremia obedo ka tito bot dano onongo bimiyogi ‘anyim maber ki gen.’ (Jer. 29:11) Me aryo, Jehovah onongo oyero Jeremia me lok pire kun tito kwena pa Lubanga bot dano. (Jer. 15:16) Wan bene watito kwena ma miyo gen bot dano i lobo marac-ci, dok watiyo ki nying Jehovah macalo Lucadenne. Ka waketo cwinywa i kom lok aryo ma pigi tego magi, wan bene wabibedo ki yomcwiny kadi bed dano gijolo kwenawa nyo pe.

13. Gin ango ma wapwonyo ki i carolok pa Yecu ma kicoyo i Marako 4:26-29?

¹³ Dongo i yo me cwiny timme motmot. Yecu opwonyo lok ada man i carolokke madok i kom laco kodi ma onino. (Kwan Marako 4:26-29.) I kare ma laco kodi otyeko coyo kodi, kodi meno odongo motmot dok en onongo pe twero ruyo dongo pa kodine. Twero mitte ni in bene ikur pi kare malac me neno ka latin kwanni keto gin ma en tye ka pwonyo i tic. Kit macalo lapur pe twero ruyo dongo pa ginapitane kit ma en mito kwede, wan bene pe watwero diyo lutino kwanwa me Baibul me dongo oyotoyot kit ma wamito kwede. Dong cwinyi pe otur nyo iil cingi woko ka pe gitye ka dongo oyotoyot kit ma imito kwede. Calo pur, loko dano me doko lupwonnye bene mito diyo cwiny.—Yak. 5:7, 8.

14. Labol mene ma nyuto ni adwogi me ticwa me pwony twero nen motmot?

¹⁴ I wang tic mogo, adwogi me ticwa me pwony pe twero nen pi mwaki mapol. Nen kong gin mutimme i kwo pa Lamego Gladys Allen gin ki laminne Ruby Allen, ma kicwalogi macalo lupainia marii i taun mo ma tye i Quebec i lobo Canada i mwaka 1959. * Kit macalo dano onongo gilworo jiranigi ki gin ma padigi gibiwaco nyo timo ka guloko ki Lucaden, gin gukwero winyo kwena me Ker-ri woko. Gladys wiye po ni: “Onongo wacito i doggola ki doggola pi cawa aboro nino ducu pi mwaki aryo, ento kadi wa dano acel mo pe oye lok kwedwa! Dano onongo gibino i doggola, ci ka gunenowa, gidok cen. Ento pe wailo cingwa woko.” Motmot, jo mogo gucako mako lirem kwedgi, dok mukene guye winyo lok. I kare-ni dong gitye kacokke adek i taun meno.—Ic. 60:22.

15. Gin ango ma 1 Jo Korint 3:6, 7 pwonyowa madok i kom tic me loko dano me doko lapwonnye?

¹⁵ Jo mapol mitte me loko ngat mo me doko lapwonnye. Dano ducu ma i kacokke gitwero konyo latin kwan me medde ki dongo nio wa i batija. (Kwan 1 Jo Korint 3:6, 7.) Me labolle, oromo bedo ni omego mo oweko trak nyo magajin ki ngat ma onyuto miti. Ento en pe twero dok cen ka lim i cawa ma oporre bot ngat ma onyuto miti-ni, pi meno en openyo omego mukene me dok cen me kaka  en. Omego ma odok cen-ni ocako kwano Baibul ki ngat meno. Ka gimedde ki kwan, omego-ni lwongo omege ki lumege mapatpat me cito kwede bot latin kwanne man, dok ngat acel acel ma omego-ni cito kwede konyo latin kwan man me dongo niyene. Omege ki lumege ducu ma latin kwan man rwatte kwedgi gibikonye i yo mo me medo ngecce i kom Jehovah. I yo meno, kit ma Yecu owaco kwede, lacoyone ki lakayone igi bedo yom kacel ka latin kwan-ni onongo batija.—Jon 4:35-38.

16. Pingo itwero nongo yomcwiny i ticci me pwony kadi bed pe itwero tic kit ma yam con pi peko me yotkom nyo pien keroni dong tye ka dok piny?

¹⁶ Ket kong ni pe itwero tito kwena ki pwonyo dano kit ma yam itimo kwede pi peko me yotkom nyo pien keroni dong tye ka dok piny. Pud itwero nongo yomcwiny i tic me kac ma itye ka timone. Nen kong gin mutimme i kwo pa Kabaka Daudi i kare ma en ki lumonye gularo mongi ki lutinogi kacel ki jamigi ki i cing jo Amalek ma onongo guyakogi. Lumony miya aryo i kingi onongo guol matek adada ma pe dong gitwero lweny, pi meno gudong cen ka gwoko jami. Daudi ki lumonye guloyo lweny man dok guyako jami me wel ki bot lumonegi. I nge meno en omiyo rukca ni jo ma gucito ka lweny ki jo ma gudong cen omyero kipokigi jami marom. (1 Cam. 30:21-25) Gin mutimme man miniwa pwony ma pire tek madok i kom ticwa me loko dano me doko lupwonnye. Ngat acel acel ma nywako i tic man ki kerone ducu twero bedo ki yomcwiny ka ngat manyen opwonyo lok i kom Jehovah dok onongo batija.

17. Gin ango ma omyero wapwo Jehovah pire?

¹⁷ Wapwoyo Jehovah pi kit ma en neno kwede ticwa pire. En ngeyo ni pe watwero diyo dano me winyo lokwa. Kadi bed kit meno, en neno tic matek ma watimo pire ki kit ma wamare kwede, dok miniwa mot. En bene pwonyowa kit me nongo yomcwiny pi gin mo keken ma watimo pire i tic me pwony. (Jon 14:12) Watwero bedo ki gen ni Lubanga cwinye bibedo yom i komwa ka pe waol woko!