1. Malo Misawacayay Tamdaw ni Yihofa, hano lipahak, malikoen kita hani?

MALO Misawacayay Tamdaw ni Yihofa, tada lipahakay kita, malikoay. O finawlan ni Yihofa kita, misaˈicelayho mitosil pasifanaˈ to tamdaw, misawacay to o soˈliˈlinay a Misawacayay Tamdaw ni Yihofa ko niyah. Ano ngaˈay kita padama to ‘iraay ko matatodongay waywayan ngaˈay milifok to midaˈocay ˈorip a tamdaw’ malo Krisciyang, maedeng o lalipahak kita. (Dmak 13:48) Kinacecayay, pasowalan no nisawawaan ni Yis cingra ngaˈayay ko minaroˈan a mitosil, itiya ‘tada lipahakay’ ci Yis, malecaday ko harateng ita ci Yisan.—Luka 10:1, 17, 21.

2. Samaan ko demak ita o paihkalay to misaaretengay ko niyah to mitosilay a tayal?

² Pakayni kitaanan tada kalimlaan ko mitosilay a tayal. Pakalalokan no tarokos ci Pawlo ci Timoti saan: ‘Ka pisinanot kiso to niyah ato sapasifanaˈ no niyah, mihaen to demak wa ngaˈay milidong to niyah, ngaˈayho milidong to mitengilay tisowanan a tamdaw.’ (1 Timoti 4:16) Mihaenay, o mitosilay a tayal ita milingatay to sakaˈorip ato sakapatay. Malo finawlan no Hongti Kitakit no Kawas, o mamicerid kita misinanot to niyah, makalim palecad to mitenakan ita a ngaˈayay lihaf ko waywayan no niyah, ngaˈayho pakahemek ci Yihofaan. (Filipi 1:27) O mamisinanot kita to sapasifanaˈ no niyah, itini ˈayaw no mitosil songilaˈen ko pisaday ato micangacang ci Yihofaan padama kitaanan.

3. Itini romaroma kilac a tamdaw samanay ko harateng to ngaˈayay lihaf no Hongti Kitakit? Tinakoen.

³ Latekay, soˈlin misaˈicelayto kita a mitosil, kawra kamayan eca ka kahi ko i kilacay tamdaw micada to ngaˈayay lihaf no Hongti Kitakit. Nengnengen ita ko nalifetan ni Keaweke Lintae. Mikitini 1929 miheca tangasa 1947 miheca, cecayay ko salikaka ci Lintae itini Pingtaw a mitosil. Masaefanay ko mapalilamay ningra a cudad, kawra awaay ko cecay to micadaay to soˈlinay kimad. Sanay cingra: “O romaroma tamdaw misafelitay to soˈlinay kimad, cowa ka olah ko ˈalomanay tamdaw.” Ikorto, miocoran no likakawa ko micudiyapay i Kiliyat mikiriwiˈay nilnilen a  mitosilay tayra i Pingtaw midama to mitosilay tayal, kawra kamayan caka olah ko ˈalomanay tamdaw, ikor no 9 miheca ngaˈ iraay ko papina Pingtaw a tamdaw micadaay to paputisem. *

4. Eca ka olah ko tao to ngaˈayay lihaf, wa ira ko masamanay harateng ita alatek?

⁴ Caka olah ko tamdaw to ngaˈayay lihaf, matoleday kita. O harateng ita malecaday ci Pawloan, pakayni ka eca pakasoˈlin no Yutaya tamdaw to o ci Misiya ci Yis, ‘tada masomaday, tada marorayay.’ (Loma 9:1-3) Misaˈicelay kita padama to pacekiwan alatek, patadoho cangranan a mitolon, kawra caay ka macakat cangra, telocto paselaˈ hananayto ita a pacekiw. Anca, na cowaho ka mapadama ita ko cecay pacekiwan malaˈosi ko patosokan patafang to tireng micada to paputisem. Ano mahaenay i, o pasokiyaway kita hokira, anca cowa ka palemeden ni Yihofa kita han? Oniya lalakaw papacaˈof to laenoay tosa salicay: (1) O mitosilay a tayal ita samaan ngaˈ o malaˈosiay? (2) Sasamaan matatodong ko pinengneng ita to mitosilay a tayal?

5. Matayal kita saki Yihofaan, o minaroˈan hano caka lecad to mitokelan ita hani?

⁵ Sowal no Fangcalay Cudad, midofdofay to araaw no Kawas a tamdaw “ano o maan ko nidemakan ningra i, malahci a maemin.” (ˈOlic 1:3) Kawra matayal kita saki Yihofaan, sahtoay malecad to mitokelan no niyah ko minaroˈan cowa ka saan ko sowal. Cowa ka lefot kita ato tao, mansa o kaˈorip ita ‘matomesay ko cariraw.’ (Yopu 14:1) O roma i, misafelitay a tamdaw nolatekay micongeday kitaanan caka ngaˈay paihkal a mitosil. (1 Korinto 16:9; 1 Tisalonika 2:18) Samanay ko pinengneng ni Yihofa to malaˈosiay ko mitosilay ita a tayal hokira? Dotoc nengnengen ita ko pina safalod no Fangcalay Cudad.

6. Samanay ci Yihofa minengneng to malaˈosiay ko mitosilay a tayal ita hokira?

⁶Misaaretengay ci Yihofa minengneng to mihadakan ita a ˈicel ato paihkalan a mihadidiay. Makahi ko tao anca cowa ka kahi mitengil, ano paihkal kita to olah misaˈicel a milasil to ngaˈayay lihaf, o mitosilay a tayal ita itini pinengneng ni Yihofa o malaˈosiay. Sowal ni Pawlo: ‘O moecelay ko Kawas, cowa ka mapawan Cingra to midemakan namo ato paihkalan namo a olah pakayni ngangan Ningra, o pipatado namo matayal saki fangcalay sikawdan i saˈayaw, nohatini padadotocay matayal saki cangranan.’ (Hipray 6:10) Soˈlin awaay ko mapadamaay ita a pacekiwan malaˈosi ko patosokan micada to paputisem, mamaharateng ni Yihofa ko tayal ita ato olah. Mansa, o nano roray iso cowa ka milifok to mitokelan iso a minaroˈan, o ngangaˈay kiso mikitini i sowal ni Pawlo to Korintoay Krisciyang milifok to sapakalalok, sowal ningra: “Caay ko a awa ko epoc no nika rorayan namo a matayal to no Tapang.”—1 Korinto 15:58.

7. Mikitini i sowal ni Pawlo mananam ita ko manan hani?

 ⁷ O tarokos ci Pawlo o sikawdan ni Kristo, o idahiay a mikiriwiˈan minilnil a mitosilay, itini adihayay niyaroˈ patirengay to faelohay kasakopang, kawra iraayho ko cisasaay to saaroˈan ningra a tamdaw, somowal to mikikakaay ko ka idahi no niyah ci Pawloan. Toniya tatokian cowa ka pasowal ci Pawlo to hakowaay ko mapadamaay no niyah a tamdaw malo Krisciyang, ao mihaenay ko sowal: ‘Mikikakaay ko adihay no tayal ako cangranan.’ (2 Korinto 11:23) Malecad ci Pawloan, haratengen ita, o misaaretengan ni Yihofa o mihadakan ita a ˈicel, ato paihkalan a mihadidiay.

8. Midemak kita to mitosilay tayal i haharatengen ko maanan hani?

⁸Pakahemekay ci Yihofaan ko mitosilay a tayal ita. Kinacecayay, miocoran ni Yis ko 70 nisawawaan milasil to ngaˈayay lihaf no Hongti Kitakit, mahererek cangra i, ‘lipahakay a minokay.’ Hano tada lipahak cangra hani? Sanay cangra: ‘Tapangaw, samanen misaka dademak to ngangan iso, ano tatiihayto a coyoh midofdofay tamiyanan.’ Nikawrira patalipaˈelalan ni Yis cangra: ‘Aka pakayni pidofdof no tatiihay coyoh tamowanan a mahemek kamo, ka pakayni kamo matilid ko ngangan i kakarayan a mahemek.’ (Luka 10:17-20) Mafanaˈay ci Yis, masadak cangra mitosil cowa ka sahto saan ira ko ngaˈayay minaroˈan. Soˈlinay i, i lalomaˈ no makahiay mitengil a tamdaw, hakowaay ko soˈlinay malo nisawawaan, awaay ko pinang ita. Mihaenay, cowa ko ngangaˈay ko nisawawaan pakayni i minaroˈan a mahemek. Mafanaˈ to masemeray ci Yihofa to mihadakan ita, onini ko soˈlinay a lalangian ita a mahemek.

9. Mikitini Kalatiya 6:7-9, padadotoc kita a mitosil mamilifok to maanan a minaroˈan?

⁹Padadotoc kita a mitosil, o mamilifok to midaˈocay a ˈorip. Misarocod kita a mikosam ato palahad to sapaloma no soˈlinay kimad no Hongti Kitakit, o ‘midofdofay to fangcalay saocor a mikosam,’ papisaka dademak to fangcalay saocor no Kawas i kaˈorip no mita. Mikiˈokay ci Yihofa, ano ira anca awa ko mapadamaay ita a pacekiwan micada to paputisem malo Krisciyang, ano eca ka matoled kita, eca pisawad, o midaˈocay a ˈorip o mamalo minaroˈan no mita.—ˈOsien ko Kalatiya 6:7-9.

10. Mamicada ko tamdaw to soˈlinay kimad hokira, sakakaay i o maanan ko piˈarawan?

¹⁰Mamicada ko tamdaw to soˈlinay kimad hokira, sakakaay i falocoˈ nangra ko piˈarawan. Itini mikosamay tamdaw a sapatinako, mikosaman ko sapaloma i caka lecad a sera, kawra edengan o mikosaman i ngaˈayay sera ko ciheciay. (Luka 8:5-8) Sowal ni Yis, o caka lecad a sera mitaypiyaway to caka lecad a falocoˈ no tamdaw, pakayni ‘sowal no Kawas’ iraay ko caka lecad a harateng nangra. (Luka 8:11-15) Malecad o mikosamay a tamdaw, o minaroˈan no tayal ita cowa ko kita ko piˈarawan, ao falocoˈ no mitosilan ita a tamdaw. O ˈinorong ita o papadotoc mikosam to sapaloma no soˈlinay kimad no Hongti Kitakit. Malecad o sowal no tarokos ci Pawlo, ‘kahacecay tamdaw mamitoor to roray no niyah milifok to sapalifon,’ cowa ko mitooray to minaroˈan no roray no niyah a milifok to sapalifon.—1 Korinto 3:8.

11. O tayal ni Nowa ‘milasil to moecelay’ hano o malaˈosiay han ko sowal hani? (Nengnengen papotalay a coka.)

¹¹ Itini nolitengan, ˈalomanay sikawdan no Kawas itini pitosil misiˈayaway to tatiihay harateng no tao. Tinakoen, madeng 50 mihecaan, padotocay ci Nowa ‘milasil to moecelay.’ (2 Pitiro 2:5) Manaokaniw makalimay cingra micada ko tao to milasilan ningra a lihaf, kawra cowa ka pasowal ci Yihofa to mamahaen ko minaroˈan. Soˈlinay i, palimoˈot ci Yihofa ci Nowaan misangaˈ to tamina i sanay ko sowal: ‘Keriden  iso ko wawa, fafahi, kadafo a micomod to tamina.’ (Satapangan 6:18) Mikitini ci Yihofaan mafanaˈ ci Nowa to pakeciw no tamina ikor, mahapinangay to citolasay ko kitiraan, madeng cowa ko ˈaˈaloman ko mitengilay to lihaf ningra. (Satapangan 6:15) Soˈlinay mahaen ko teloc, itira toya tatiihay a hekal, awaay ko cecacecay to micadaay to lihaf ni Nowa. (Satapangan 7:7) Pasokiyaway ci Nowa sanay ko piharateng ni Yihofa han? Cowa! Madimadiay ci Nowa mitoor to kihcod a limoˈot ni Yihofa a midemak, mansa itini pinengneng no Kawas o malaˈosiay a mitosilay cingra.—Satapangan 6:22.

12. Misiˈayaw ci Yirimiya to mapiliˈay ato misafelitay i samaanay padadotoc a lipahak?

¹² Itini pitosil ni Yirimiya to 40 miheca, caay ka olah ko ˈalomanay tamdaw, misafelitayho cingranan. Samanen ‘makapoˈiay ato malikafay no tao cingra’ mansa tada matoleday ko falocoˈ, sapisawadaw sanay a mitosil. (Yirimiya 20:8, 9) Kawra cowa ka pisawad cingra. O manan ko padamaay cingranan miremo to masofaway a harateng padadotoc lipahak hani? Misamacayay cingra to tosa kalimlaan a demak. Saka 1, palimoˈotan ni Yihofa cingra milasil to lihaf ‘paira to hatokel’ no tamdaw. (Yirimiya 29:11) Saka 2, panganganan ni Yihofa cingra to ilaenoay no ngangan no Niyah a tamdaw. (Yirimiya 15:16) Malecaday kitaanan, itini patoleday to falocoˈ a hekal kita milasilay to pairaay to hatokel a lihaf, hanaca ira ko tatodong malo ilaenoay no ngangan ni Yihofa a tamdaw. Edeng misamacay kita tonini tosa kalimlaan a demak, ano samaanto ko harateng no tao, ngaˈngaˈay kita padadotoc a lipahak.

13. Mikitini sapatinako ni Yis i Marko 4:26-29 mananam ita ko maanan?

¹³Palahad to pakasoˈlinay falocoˈ i Kawas misaaliay to toki. Itini mikosamay to sapaloma mafotiˈay a tamdaw a sapatinako ni Yis mitadtaday tonini. (ˈOsien ko Marko 4:26-29.) Makosam ko sapaloma ikor palidlid saan lomahad, o mikosamay a tamdaw cowa kangaˈay pacikay tonini a demak. Malecaday, mamitala kita to cecay liyad alatek, ngaˈ maˈaraw ko pacekiwan palidlid saan a macakat, mitoor to mananamay ningra misalof mafalic. Malecaday o mawmahay cowa kangaˈay pacieci to sapaloma lomahad, cowa kangaˈay kita pacieci to pacekiwan kaliki a macakat. Mihaenay, ano manaˈon ko kacakat no pacekiwan i piharateng iso, aka matoled, aka a pisawad, malecad to mawmahay ira ko mihadidiay a falocoˈ.—Yakop 5:7, 8.

14. Tinakoen mitadtad, o hahalafin kita mitala ngaˈ maˈaraw ko minaroˈan no mitosilay.

¹⁴ Itini romaroma kilac, adihay a mihecaan caay kaˈaraw ita ko minaroˈan no mitosilay. Nengnengen ita ko nalifetan ni Kelatise fafahiyan salikaka ato kaka ningra ci Ropi, o misakafahay cangra tatosa, 1959 miheca manilnilay cangra tayra i Kanata Kwipike kaemingay niyaroˈ matayal. * Samanen o saroero no taliyokay tamdaw ato pifiyor no Tingsokiyo, caay kakahi mitengil ko itiraay tamdaw to ngaˈayay lihaf no Hongti Kitakit. Sanay ci Kelatise: “Tosaay miheca a tatokian, pakalomalomaˈay kami mitosil to romiˈamiˈad 8 ko toki, misaromiˈad a mikongkong to fawahan, awaay ko pacaˈofay. O pinengneng aca no cilomaˈay i fawahan, maˈaraw kami, tefadanto ko mengli. Kawra cowa katoled kami.” Ikorto mafalicayto ko waywayan no tamdaw, roma tamdaw misatapangay mitengil to ngaˈayay lihaf. Nohatini, toloayto ko kasakopang tora niyaroˈ.—Isaya 60:22.

15. Pakayni padama to tamdaw malo Krisciyang a tayal, mikitini 1 Korinto 3:6, 7 mananam ita ko maanan?

¹⁵Micada ko cecay tamdaw to paputisem o  minaroˈan no ˈalomanay tamdaw. O kahacecay tamdaw no kasakopang ngaˈngaˈay mihadak to ˈicel padama to pacekiwan micada to paputisem malo Krisciyang. (ˈOsien ko 1 Korinto 3:6, 7.) Tinakoen ko sowal, cecay faˈinayan salikaka pafeliay to cecay tancang ato casi i maolahay a tamdaw, kawra awaay ko toki a milisoˈ tonini a tamdaw, orato mitahidangay to roma salikaka a milisoˈ. Misatapangay koya salikaka pacekiw toya tamdaw, mitahidangayho to caka lecad a salikaka mirienang to pipacekiw, tano caka lecad a pakayraan cangra pakalalok tonini a pacekiwan. O maˈaraway noniya pacekiwan a kahacecay salikaka na micefosay to sapaloma no soˈlinay kimad, padama to kacakat ningra. Ikor micada to paputisem konini a pacekiwan i, malecaday o misowalan ni Yis, ‘o mikosamay ato mipanayay malacafayay a lipahak.’—Yohani 4:35-38.

16. Soˈlin malonay adada ko tireng iso, hano ngangaˈayho lipahak mirienang to mipanayay a tayal hani?

¹⁶ Pakayniay i kalonay ato adada no tireng, cangoˈotayto ko ˈicel iso itini mitosilay a pasifanaˈ to tamdaw han? Soˈlin mahaen, wa ngaˈayho kiso mihadak to ˈicel mirienang to mipanayay a tayal, pakayni ko kalipahak. Haratengen ko nalifetan ni Tafiti ato sikawdan ningra. Kinacecayay, miˈafasan no Amalik tamdaw ko paro no lomaˈ ato dafong nangra. Oya 200 a sofitay ni Tafiti tada malotayay, caay kangaˈay milepel to ˈada, terek sanay a mihimaw to dafong. Mapadik ni Tafiti ko ˈada i, palilaman ko polong a tamdaw to maˈafasay a dafong. (1 Samuil 30:21-25) Mikitini toniya tawcikel mamananam ita ko cecay kalimlaan a kimad: Soˈlin caka adihay ko midemakan ita, ano misarocodayto kita a pasifanaˈ to tamdaw, ano ira ko faelohay tamdaw mafanaˈ ci Yihofaan hanaca patafang to tireng micada to paputisem i, o ngangaˈay kita miladaˈ to lipahak.

17. Hano aakoˈiden ita ci Yihofa hani?

¹⁷ Tada miakoˈiday kita tano ciolahay a falocoˈ ci Yihofa a minengneng to nano tayal ita saki Cingranan. Mafanaˈay Cingra ano hakowato ko pisaˈicel ita cowa ko papakaˈimer to minaroˈan no demak, maˈaraway Ningra ko nano rorayan ita ato olah Cingranan, o papalifon kitaanan. Padamaayho Cingra kitaanan cipinang, ngaˈay mirienang to mitosilay a tayal i polong no hekal tada kalikoanto, ano hakowato ko midemakan ita o ngangaˈay a lipahak. (Yohani 14:12) Ano eca pisawad kita, o ngangaˈay pakasoˈlin o mihaydaan no Kawas kita!