1. ¿Kunatsa Jehová Diosan Testigopäsajj wali kusisitätanjja?

JIWASAJJ ¡Jehová Diosan Testigopäsajj wali kusisitätanwa! Sutipwa aptanjja, jaqenakar arunakap yatiyasasa yatichasas Jupan Testigopätaswa uñachtʼayaraktanjja. ‘Wiñay jakañatak suma chuymanïpki’ ukanakar Diosar servipjjañapatak yanaptʼañajj wali kusiskañawa (Hech. 13:48). Jesusan discipulonakapajj predicacionat kuttʼanisajja, wali suma experiencianakwa jupar cuenttʼapjjäna, Jesusajj uk istʼasajj ‘kusisiñampi espíritu santompi phoqtʼatänwa’, jiwasajj jupjamarakiw jikjjatastanjja (Luc. 10:1, 17, 21).

2. ¿Predicañajj jiwasatak wali importantëtap kunjamsa uñachtʼaytanjja?

² Jiwasatakejja, predicañajj wali importantewa. Apóstol Pablojj akham sasaw Timoteor ewjjtʼäna: “Kunjamsa sarnaqaskta, kunjamsa yatichaskta ukanakatjja amuytʼasipunim” sasa. “Ukhamatwa juma pachpas salvasïta khitinakatï jumar istʼapktam ukanakas salvasipjjarakiniwa” sasaw ukjjarojj sarakïna (1 Tim. 4:16). Ukhamajja predicatasajj jaqenakan vidapwa salvaspa, ukwa ukajj amuytʼayistu. Diosan Reinopat yatiyirinakjamajj kunjamas sarnaqasktan uk sumwa amuytʼasiñasa. Sarnaqatasampejj Jehová Diosaruw jachʼañchañ muntanjja, kuntï yatiyktan ukar creyitassa sarnaqatasampiw uñachtʼayañ munaraktanjja (Filip. 1:27). Predicañatak sum wakichtʼasktan jaqenakamp parlir sarañatak Diosar yanaptʼa mayisktan ukhaw kunjamsa yatichasktan ukanakat sum amuytʼasitas uñachtʼaytanjja.

3. ¿Diosan Reinopat yatiyktan uk taqe jaqenakat istʼapjjestaspa, ukat kuna uñachtʼäwis uk qhanañchistu?

³ Ukampis predicañatak walsa chʼamachaskstanjja, awisajj jukʼanikiw territoriosan istʼapjjestaspa jan ukajj janiw Diosan Reinopat akchʼas yaqhepajj istʼañ munapkaspati. Georg Lindal sat jilatat amuytʼañäni, Islandia sat markpachan 1929 marat 1947 marakamajj jupa sapakiw predicäna. Bibliat apstʼat walja qellqatanakwa jaqenakarojj jaytäna, ukampis janiw maynis  Jehová Diosan Testigopar tukkänti. Jilatajj akham siwa: “Yaqhepajja Diosan Arup contraw saytʼapjjäna, jilapartejj janiw kuns yatiñ munapkänti” sasa. Uka qhepatsti Galaad escuelat graduacir misioneronakaw predicacionan yanaptʼañatak purinipjjäna, jupanakarus janiw jaqenakajj istʼapkarakïnti. Llätunka maranak pasatatwa uka markankir yaqhep jaqenakajj Jehová Diosar jakäwip katuyasisa bautisasipjjäna. *

4. ¿Jaqenakajj jan istʼañ munapkistu ukhajj kunjamas jikjjatassna?

⁴ Bibliat jaqenakajj jan yatiñ munapki ukhajja llakistanwa. Inas apóstol Pabljam jikjjatasiraksna, judionakajj Jesusajj jutaniw sat Mesiasätapar jan creyiñ munapkäna ukhajja, “wali jachʼa llakiw nayan utjitu, janirakiw jachañajj [...] tukuskiti” sasaw jupajj säna (Rom. 9:1-3). Jiwasat amuytʼañäni, mayniru Bibliat yatichañatakejj wal chʼamachastanjja, suma yatichirïñatakis chʼamachasiraktanwa, yateqerisatakis oraraktanwa, ukampis kuntï yateqki ukarjam jan luratapatjja jaytjjtanwa. Jan ukajj janiw mä yateqerisarus bautisasiñapatak yanaptʼktanti, ukhamïpanjja ¿jiwasas juchanïksna ukhamti amuyañasa, Jehová Diosajj janiw bendiskituti sasat amuyañasa? Aka yatichäwinjja, aka pä jisktʼaruw qhanañchaskañäni: ¿Jehová Diosajj predicatasampi kusisitätap kunjamatsa yattanjja? ¿Diosan arunakap yatiyasajj kunsa suyañasa?

5. Kuntï Jehová Dios layku lurktan ukajj ¿kunatsa kunjamtï munkayätan ukarjampun jan phoqaski?

⁵ Diosan munañap lurapki ukanakat parlkasajja, Bibliajj akham siwa: “Taqe kuntï jupajj lurkani ukajj sumaruw sarani” sasa (Sal. 1:3). Ukampis kuntï Jehová Dios layku lurktan ukajj kunjamtï munktan ukarjamaw phoqasini sasajj janiw sisksnati. Jiwasajj pantjasirïtanwa, mayninakas pantjasirïpjjarakiwa, ukatwa jan waltʼäwinakajj utjakipuni (Job 14:1). Maysa toqetjja, enemigonakasaw mä qhawqha tiempojj predicañ jarkʼapjjestaspa (1 Cor. 16:9; 1 Tes. 2:18). Ukhamajja, ¿kunarjamas Jehová Diosajj sumti predicasajj phoqasktan janicha uk uñji? Uka jisktʼar qhanañchañatakejja, Biblian wiñay yatichäwinakapaw yanaptʼistani, ukanakat mä qhawqha uñjañäni.

6. ¿Kun luratassa Jehová Diosajj uñji?

⁶ Jehová Diosajj chʼamachasitasa aguantataswa uñji. Jaqenakajj janis istʼañ munapkchistojja, Jehová Diosar munasitasat taqe chuyma predicktan ukhajj Diosajj wal kusisi. Apóstol Pablojj akham sänwa: “Diosajj cheqapar uñjir Diosawa, jupajj janiw luratanakamatsa ni sutipar munasipjjatamatsa armaskiti, ukanakjja santo jilatanakar jichhakam servisaw uñachtʼayapjjtajja” sasa (Heb. 6:10). Janis maynirus bautisasiñapatak yanaptʼkstanjja, qhawqsa chʼamachastan, Juparus munastan uk janiw Jehová Diosajj armkiti. Ukhamajja, kuntï Pablojj Corinto markankir cristianonakar siskäna  ukajj jiwasatakirakiwa, jupajj akham sänwa: “Tatitur servipjjatamajj janiw inamayäkiti” sasa (1 Cor. 15:58). Wal trabajitasajj janis kunjamtï suykayätan ukham phoqaskchejja, janiw inamayäkiti.

7. ¿Kuntï apóstol Pablojj siskäna ukat kunsa yateqsna?

⁷ Apóstol Pablojj wali suma misionerönwa, walja markanakanwa congregacionanak uttʼayarakïna. Yaqhep cristianonakajj jupat sipans jilankapkaspas ukham amuyasisajj jiskʼachapkchïnsa, janiw suma yatichirïkiti sapkchïnsa, Pablojj janiw qhawqha jaqenakarus bautisasiñapatak yanaptʼäna uka toqet parlkänti. Jan ukasti “jukʼampwa nayajj lurta” sasaw säna (2 Cor. 11:23). Apóstol Pablot yateqasisajj ak amtapjjapuniñäni: Jehová Diosatakejj qhawqsa chʼamachastan aguanttan ukaw jukʼamp importantejja.

8. ¿Kunsa predicatasat amtañasa?

⁸ Predicatasajj Jehová Diosaruw kusisiyi. Mä kutejja, Jesusajj Diosan Reinopat jaqenakar yatiyapjjañapatakejj 70 discipulonakaparuw khitäna. Predicañ tukuyasajja, ‘wali kusisitaw kuttʼanipjjäna’ sasaw Bibliajj qhanañchi. ¿Kunatsa wali kusisitäpjjäna? Jupanakajj akham sapjjänwa: “Sutim aytasipjjta ukhajja, demonionakas nanakar istʼapjjetuwa” sasa. Ukampis Jesusajj akham sasaw jupanakar cheqañchäna: “Jumanakajj janiw demonionakamp istʼayasisakejj kusisipjjañamäkiti. Jan ukasti sutinakamajj alajjpachan qellqatätap laykuw kusisipjjañamajja” sasa (Luc. 10:17-20). Cheqas predicacionan janiw suma experiencianakpun sapa kuti jikjjatapkaspänti, uk Jesusajj yatïnwa. Jesusan discipulonakapar istʼapkäna ukanakat qhawqhanis cristianor tukupjjäna uk janiw yatktanti. Jupanakajj janiw jaqenakan istʼapjjatap laykuki kusisipjjañapäkänti, jan ukasti chʼamachasipjjatapajj Diosar kusisiyatap yatisaw kusisipjjañapäna.

9. Gálatas 6:7-9 textorjamajja, ¿predicaskakiñäni ukhajj kunsa katoqañäni?

⁹ Predicaskakiñäni ukhajj wiñay jakañwa katoqañäni. Suma yatiyäwinak predicañataki, yatichañataki chʼamachastan ukhajj ‘espíritu santomp irpayasisaw’ phawasktanjja, ukham lurasajj espíritu santompiw jakäwisan yanaptʼayasisktanjja. Janisay maynirus bautisasiñapatak yanaptʼkchiñänejja, ‘jan qarjtkañäni’ ukhajj wiñay jakañwa Jehová Diosajj churistani (Gálatas 6:7-9 liytʼäta).

10. Predicktan ukhajja, ¿kunatsa yaqhepajj sum istʼapjjestu yaqhepajj janirak istʼapkistu?

¹⁰ Jaqenakajja, kunatï chuymapan utjki ukarjamaw istʼapjjani jan ukajj janisa. Ukjja Jesusajj mä uñachtʼäwin mä yapuchirit parlkäna ukanwa qhanañchäna. Uka uñachtʼäwinjja, yapuchirejj kunayman oraqeruw jathanak phawäna, ukampis suma oraqer purkäna ukanakakiw achoqäna (Luc. 8:5-8). ‘Kunayman oraqenakajja, jaqenakan chuymapampi sasiwa’ sasaw Jesusajj säna, jupanakan chuymanakapajj kunaymanitwa ‘Diosan arunakap’ katoqapjje (Luc. 8:11-15). Yapuchirejj janiw jathanak jiltaykaspati ni achoqaykaspasa. Jiwasajj ukhamarakiw kuntï yatiyktan ukajj jaqenakan chuymapan jiltañapatakejj jan kuns lurksnati. Ukhamajja, Reinon suma yatiyäwinakap phawaskakiñaw jiwasar waktʼistu. Kunjamtï apóstol Pablojj siskänjja, ‘sapa mayniruw Diosajj luratasarjam bendisistani’, janiw qhawqhanirus Diosar serviñapatak yanaptʼtan ukarjam bendiskistaniti (1 Cor. 3:8).

11. “Kunatï cheqapäki uk yatiyiri” Noé chachajj ¿Diosarojj kusisiyänwa sasajj kunatsa sissna? (Nayrïr paginankir dibujo uñjjattʼäta).

¹¹ Nayra tiempotpachaw Diosan servirinakapajj jaqenakar predicapjjäna, ukampis waljaniw jan istʼapkänti. Sañäni, “kunatï cheqapäki  uk yatiyiri” Noé chachajj walja maranakaw Diosat yatiypachäna (2 Ped. 2:5). Jupajja, ‘jaqenakajj istʼapjjetaniwa’ sasaw amuyarakpachäna, ukampis Jehová Diosajj janiw ‘ukhamäniwa’ sasajj yatiykänti. Antisas kunjamsa arca lurani uka toqet qhanañchkasajj akham sänwa: “Arcarusti jumampi yoqanakamampi esposamampi ukhamarak yojjchʼanakamampiw mantapjjäta” sasa (Gén. 6:18). Diosajj luram siskäna uka arcajj kawkchʼäñapänsa uk yatisajja, jukʼa jaqenakakiw istʼapjjetani sasaw amuypachäna (Gén. 6:15). Ukhamapuniw pasäna. Uka jan wali lurir jaqenakat janiw maynis jupar istʼkänti (Gén. 7:7). ¿Noé chachajj janiw sum predickiti sasat Jehová Diosajj amuypachäna? Janiwa. Jupajja, taqe kunanaktï Diosajj siskäna ukhampunwa luräna, ukaw Diosarojj wal kusisiyäna (Gén. 6:22).

12. Jaqenakajj janis istʼapkchïna, jupa contras saytʼapkchïnjja, ¿kunas Jeremías profetarojj kusisita predicaskakiñatakejj yanaptʼäna?

¹² Jeremías profetarojj janis jaqenakajj istʼapkchïna, jupa contras saytʼapkchïnjja, jupajj 40 jila maranakaw Diosat yatiyäna. Jupar insultapkäna burlasipkäna ukhajj aynachtʼänwa, ukhamïpansti janipuniw Diosat parljjäti sasaw säna (Jer. 20:8, 9). Ukampis predicaskakïnwa. ¿Kunas jan aynachtʼañataki kusisita predicaskakiñatak yanaptʼäna? Akanakat lupʼiñaw yanaptʼäna: maya, kuntï predickäna ukajj jaqenakarojj “mä suma suytʼäwi jutïritak” churaspäna (Jer. 29:11). Paya, Diosajj sutip apañapataki, jaqenakar arunakap yatiyañapatakiw jupar ajllïna (Jer. 15:16). Aka jan wali pachanjja, jiwasajj ukhamarakiw suma yatiyäwinak jaqenakar yatiytanjja, Jehová Diosan Testigopjamajj sutipwa aparaktanjja. Uka pä toqenakat lupʼtan ukhajja, jaqenakajj istʼapjjestpansa janisa, kusisitaw predicaskaktanjja.

13. Marcos 4:26-29 textorjamajja, ¿kunsa Jesusajj parlkäna uka uñachtʼäwejj yatichistu?

¹³ Maynin Diosar confiyañapatakejj tiempow munasi. Ukajj cheqäskapunitapjja, mä phawir jaqen iktʼañapkamajj kunas pasäna uka toqet parlir uñachtʼäwimpiw Jesusajj yatichistu (Marcos 4:26-29 liytʼäta). Yapuchirejj phawantäna ukhajja, jathanakajj jukʼat jukʼatwa jiltäna, ratuk jiltañapatakejj janiw kuns lurirjamäkänti. Yateqerejj kuntï yateqki ukarjam sarnaqañapatakejja, ukhamarakiw tiempojj munasini, jukʼat jukʼatwa jupajj nayrar sartaskaspa. Yapuchirejj kuntï phawki uk janiw kunjamtï munki ukarjam ratuki jiltaykaspati, yateqerisampejj ukhamarakiwa, janiw kunjamtï munktan ukarjam ratuki jiltayksnati. Ukhamajja, yateqerisatï kunjamtï munkayätan ukarjam jan jankʼak nayrar sartkchi ukhajj janiw aynachtʼañasäkiti, chʼamachasiskakiñasawa. Yapuchirjamarakiw yateqerisan Diosar serviñ amtañapkamajj pacienciampi suytʼañasa (Sant. 5:7, 8).

14. Jaqenakajj janiw Diosan arunakap jankʼak istʼapkaspati, ¿kuna uñachtʼäwis uk amuytʼayistu?

¹⁴ Yaqhep cheqanakanjja, walja maranak pasatatwa maynejj bautisasiskaspa. Canadá markankiri Gladys ukat Ruby Allen jupanakat parltʼañäni, jupanakajj kullakpuräpjjewa. 1959 maranjja, Quebec markaruw precursora regularat serviri sarapjjäna. * Jaqenakajja, tatacuranakasa vecinonakas kamsapjjanisa sasin ajjsarasaw kullakanakar jan istʼapkänti. Gladys kullakajj akham siwa: “Pä maranakaw sapüru 8 horanaka utat uta predicapjjayäta, ukampis janiw maynis istʼapkitänti. Jaqenakajj punkur makatanisajj nanakar uñjasajja, kuteqtawayjjapjjakïnwa. Ukampis janiw qarjtapkayätti” sasa. Tiempompejj janiw ukhamäjjänti, jaqenakajj  munasiñampiw Testigonakar katoqjjapjjäna, sumwa istʼjjapjjarakïna. Jichhajj kimsa congregacionanakaw uka cheqan utj-jje (Is. 60:22).

15. Jesusan discipulopar tukuñapataki maynir yanaptʼañ toqetjja, ¿kunsa 1 Corintios 3:6, 7 textojj yatichistu?

¹⁵ Maynin Jesusan discipulopar tukuñapatakejj taqenin yanaptʼapaw munasi. Mä yateqerin bautisasiñapatakejja, congregacionan taqeniw yanaptʼapjjaspa (1 Corintios 3:6, 7 liytʼäta). Sañäni, mä publicadorajj Bibliat yatiñ muniri mä jaqerojj mä tratado jan ukajj mä revistwa churi. Ukampis visitañatak jan tiemponïtap amuyasisajj yaqha publicadoraruw visitañapatak mayi. Jupasti uka jaqerojj Bibliat yatichañwa qallti, kunayman jilat kullakanakampiw yatichkasajj compañtʼayasiraki, jupanakajj sapa mayniw yateqerirojj chʼamañchtʼapjje, Diosar jukʼamp jakʼachasiñapatakis yanaptʼapjjarakiwa. Yateqerejj bautisasjje ukhajja, yanaptʼapkäna ukanakajj taqeniw kusisitäpjje (Juan 4:35-38).

16. Jumatï usutästa jan ukajj edadanëjjatam layku jan chʼamanëjjsta ukhajja, ¿kunatsa Diosan arunakap yatiyasajj kusisitäsma?

¹⁶ Inas usutäsina jan ukajj edadanëjjatam layku jan chʼamanëjjasin nayrjam predicañ jan puedjjstati. Ukhamäkchisa kuntï lurañ puedkta uk lurasajj kusisitäsmawa. Uk amuytʼañatakejja, Davidampi jupamp chikäpkäna uka chachanakampejj saqueyjiri amalequitanakar atipjasin familianakapa, kuntï lunthatapkäna ukanak aparasinipjjäna ukhajj kunas pasäna uk uñjañäni. 200 chachanakajja, wali qaritäjjasajj janiw nuwasirejj Davidampi chika sarjjapjjänti, jan ukasti qʼepinak uñjañatakiw quedasipjjäna. Davidampi mayni chachanakampejj amalequitanakar atipjasin kuttʼanipjjäna ukhajja, kuntï aparanipkäna uk mä igualak taqeni jaljasiñapwa Davidajj mayïna (1 Sam. 30:21-25). Jesusan discipulopar tukuyañampejj niya uka pachparakiw pasi. Inas jukʼamp predicañsa yatichañsa jan puedkstati. Ukampis qhawqtï lurañ puedkta ukarjam chʼamachasiskakim, ukhamatwa mä yateqerejj bautisasini ukhajj wal kusisïta.

17. ¿Kunatsa Jehová Diosar yuspärsna?

¹⁷ Jupar serviñatakejj kuntï lurktan uk valoranitwa Jehová Diosajj uñji, ukat wal yuspärtanjja. Jaqenakarojj janiw jiwasar istʼapjjañapataki, jan ukajj Diosar servipjjañapatak obligksnati, uk Jehová Diosajj yatiwa. Ukampis qhawqsa chʼamachastan, qhawqsa Jupar munastan uk uñjasaw bendisistu. Qhawqtï lurañ puedktan ukarjam predicasin kusisitäñasatakiw yanaptʼarakistu (Juan 14:12). Jiwasatï jan qarjtkañänejja Diosajj wal kusisini, uk janipun armañäniti.