1. Inyuki di yé maséé i ba Mbôgi Yéhôva?

 KINJE bisai bikeñi di gwé i ba Mbôgi Yéhôva! Di yé bagwélél ba Yéhôva, di ñunda ki le di yé mbôgi yé ngéda di ñañle bôt ñañ nlam, di niigaga bo. Di yé maséé ngéda di nhôla mut a gwé “libak lilam inyu kôhna niñ boga” i yila ngwélél Yéhôva. (Minson mi baôma 13:48) Di yé kiki Yésu nu “a bi kon maséé iloo hihéga ni njel mbuu mpubi” ngéda banigil bé ba bi kal nye le hônd yap likalô i ntagbe loñge.—Lukas 10:1, 17, 21.

2. Lelaa di yé le di unda le nson likalô u yé nseñ ngandak?

² Nson likalô u yé bés nseñ ngandak. Ñôma Paul a bi kal Timôtéô le: “Yoñ yaga yihe ni wemede ngéda yosôna, u yoñok ki yihe ni biniigana gwoñ.” A kônde le: “Kiki u mboñ hala nyen w’a tohol wemede loñni i bôt ba ñemble we.” (1 Timôtéô 4:16) Likalô li nhôla bôt i kôhna niñ boga. Di nyoñ yihe ni bésbomede inyule di nit Ane Djob. Maboñok més ma nlama ti Yéhôva lipém hiki ngéda, di nlama ki boñ i mam di niiga bôt. (Filipi 1:27) Di ñunda le di ‘nyoñ yihe ni biniigana gwés’ ngéda di ntibil kôôba, di soohege ki ilole di nke likalô.

3. Baa bôt bobasôna bon ba nleege bés i likalô? Ti hihéga.

³ Yak ngéda di mboñ kii yosôna di nla inyu añal ñañ nlam, ngim bôt mu libôga jés i yé le i tjél emble bés. Di yoñ le hihéga hi mankéé Georg Lindal, nu a  bi añal ñañ nlam i Islandia ibôdôl nwii 1929 ikepam nwii 1947. A bi kap ngandak bikaat; ndi, mut to wada a bi yila bé Mbôgi Yéhôva. A nkal le: “Ngim bôt i bé kolba maliga, ndi libim li bé emble bé.” Yak ngéda lôk kéé i bi pam i suklu Giléad, i ke nyoo, mbus nwii bôô nyen ngim bôt i bi yila Mbôgi Yéhôva nyoo i Islandia. *

4. Lelaa di yé le di nôgda ibale bôt ba nleege bé bés i likalô?

⁴ Ngéda bôt ba ngwés bé nigil Bibel ni bés, hala a yé a ntééñga bés. Di yé le di nôgda kiki Paul, nu a bi nok “ndutu ikeñi ni njôghe i ñem” ngéda ngandak Lôk Yuda i bi tjél neebe le Yésu a yé Mésia. (Rôma 9:1-3) Bebek u njo sañ inyu hôla i mut u niiga Bibel, u nsoohe yak inyu yé, ndi to hala u ntehe le a nhol bé, bebek u nlama yak téé yigil yé? Tole bebek u niigaga bé mut Bibel letee a kôhna sôble. Baa u nlama hoñol le njom i yé yoñ, tole bebek le Yéhôva a nkônôl bé we maséé mu nson woñ? Di ga timbhe mana mambadga ima munu yigil ini: (1) Kii i ñunda le nson wés u num matam? (2) Kii di nyéñ ngéda di ñañle bôt ñañ nlam?

5. Inyuki nson di nsélél Yéhôva u ta bé le u ba hiki ngéda kiki di ngwés?

⁵ Bibel i nkal le i mut a mboñ sômbôl Djob: “To kinje a mboñ i ntoo.” (Tjémbi 1:3) Ndi hala a nkobla bé le hiki jam di mboñ inyu Yéhôva l’a ba kiki di ngwés. Niñ i mut binam i yé “nyonok ni ngéba” inyule bésbobasôna di yé bikwéha bi bôt. (Hiôb 14:1) Ni le ngim mangéda, baoo bés ba yé le ba sôña le di añal ñañ nlam i mbamba. (1 Korintô 16:9; 1 Tésalônika 2:18) Kii i ñunda ni le nson wés u num matam? Di béñge le minlôñ mi Bibel mi mi nla hôla bés i timbhe i mbadga i.

6. Lelaa Yéhôva a ntehe nson wés?

⁶ Yéhôva a ntehe biliya gwés ni hônba yés. Yéhôva a nkônôl bés maséé ngéda di ñañal ñañ nlam ni makénd momasôna inyule di ngwés nye, to ibale bôt ba ñemble bé bés. Paul a kal le: “Nyambe a ta bé mut a téé bé sép le a hôya nson nan ni gwéha ni ñunda inyu jôl jé hala kiki ni bi gwélél bapubhaga nson, ni nke ki ni bisu i gwélél bo nson.” (Lôk Héber 6:10) Yéhôva a nhôya bé biliya gwés ni gwéha di ñunda nye, to ibale di niiga bé mut Bibel letee a kôs sôble. I bibañga Paul a bi tilna lôk kéé i Korintô bi mbéñge  yak bés. A bi kal bo le: “Ndumbba nan inyu Nwet i ta bé yañga,” to ibale nson wés u num bé matam kiki di sômblak.—1 Korintô 15:58.

7. Jam ñôma Paul a bi kal inyu nson wé li niiga kii bés?

⁷ Ñôma Paul a bé nsañal nunkeñi i biloñ bipe, a bi bot yak makoda ikété ngandak bitison. Ndi ngéda ngim bôt i bi kolba nye, i kal le a nyi bé nkwel, a bi pôdôl bé nsoñgi bôt a bi hôla i yila bagwélél ba Yéhôva. Inyu timbhe i bôt ba bé kadbana nye, Paul a bi kal le: “Me bi gwel nson iloo bo.” (2 Korintô 11:23) Kiki Paul, di nlama bigda le i yom i nkôhna Yéhôva maséé i yé biliya gwés ni hônba yés.

8. Kii di nlama bé hôya inyu nson wés?

⁸ Nson wés u nlémél Yéhôva. Yésu a bi ep 70 ma banigil inyu añal ñañ nlam u Ane. Ngéda ba bi mal, ba bi “témb ni maséé.” Kii i bé nkôhna bo maséé? Ba bi kal le: “Yak mimbuu mimbe mi nsuhus nwomede isi yés ngéda di ngwélél jôl joñ.” Ndi Yésu a bi kodol mahoñol map, a kal bo le: “Ni kon bañ maséé inyule mimbuu mimbe mi nsuhus nwomede isi nan, ndi kona maséé inyule môl manan ma yé ntilga i ngii.” (Lukas 10:17-20) Yésu a bé yi le ngéda yosôna bé nyen ba ga tehe nya bihélha bi mam i mu nson wap. Di nyi bé bôt bañen ba bi yila bikristen mu bôt banigil ba Yésu ba bi añle ñañ nlam. Banigil ba Yésu ba bé lama kon maséé ha ndik bé inyule ba bi emble bo, ndi téntén inyule Yéhôva a bi kônôl bo maséé inyu nson ba bi sal ni ñem wonsôna.

9. Inoñnaga kaat Galatia 6:7-9, kii di ga kôhna ibale di nwaa bé añal ñañ nlam?

⁹ Ibale di nwaa bé añal ñañ nlam, di ga kôhna niñ boga. Ngéda di añal ñañ nlam ni ñem wonsôna, di niigaga bôt, di “nsal inyu mbuu” hala wee di nwas le mbuu mpubi u hôla bés mu niñ yés. Yéhôva a mbôn bés le ibale di “nwaa bé” tole di “tomb bé,” di ga bumbul niñ boga, to ibale di nla bé hôla mut i hol ikepam i sôble.—Añ Galatia 6:7-9.

10. Inyuki ngim bôt i ñemble bés ndi bape ba ñemble bé?

¹⁰ I yom i yé mut i ñem yon i ntinde nye i emble bés tole i tjél emble bés. Yésu a bi pôdôl i jam li ngéda a bi yoñ hihéga hi nsalwom nu a mbel mbôô i ngandak mintén mi disi, ndi mbôô i num ndigi matam i hisi hiada. (Lukas 8:5-8) Yésu a bi kal le i disi di tjodisôna di yé yimbne i miñem mi bôt mi nleege bé “bañga i Djob” nya yada. (Lukas 8:11-15) Kiki nsalwom nunu, di nla bé boñ jam jo ki jo inyu boñ le mbôô i oo i ñem u mut di ñañle ñañ nlam. Mbegee yés i yé le di kee ni bisu i nwes mbôô i Ane. Ndik kiki ñôma Paul a bi kal, “hiki mut a’ kôhna gwé bibom inoñnaga ni nson wé nyemede,” he matam ma nson wé bé.—1 Korintô 3:8.

11. Inyuki Yéhôva a bi kônôl Nôa maséé tolakii bôt ba bi emble bé nye? (Béñge titii i lipep li bisu.)

¹¹ Ngim bôt i bi emble bé bagwélél ba Yéhôva ba kôba. Kiki hihéga, Nôa a bé “ñañal telepsép” yom kiki 40 tole 50 ma nwii. (2 Pétrô 2:5) Bebek a bé  bot ñem le bôt ba ga emble nye ngéda a ga añle bo ñañ nlam, ndi Yéhôva a bi yis bé nye hala. Ngéda Yéhôva a bé kal nye le a oñ nkuu, a bi kal nye le: “W’a jôp nkuu, wemede ni bon boñ, ni nwaa woñ, yak ni baa ba bon boñ.” (Bibôdle 6:18) Nôa a bi lama nok le ngandak bôt i ga emble bé nye, ngéda Yéhôva a bi toñle nye bikeñi bi nkuu. (Bibôdle 6:15) Kiki bésbomede di nyi, mut nye ki nye a bi emble bé Nôa. (Bibôdle 7:7) Baa Yéhôva a bi tehe le Nôa a nyônôs bé nson wé? To jam! Yéhôva a bi tehe le Nôa a bi yônôs nson wé inyule Nôa a bi boñ i mam momasôna a bi kal nye le a boñ.—Bibôdle 6:22.

12. Kii i bi hôla mpôdôl Yérémia i kon maséé mu nson wé tolakii bôt ba bé kolba nye?

¹² Yak mpôdôl Yérémia a bi añal ñañ nlam iloo 40 ma nwii tolakii bôt ba bé kolba nye. A bi nimis makénd ngéda bôt ba bé “sol nye, ba nolok nye hiol,” a bé sômbôl yak téé nson wé. (Yérémia 20:8, 9) Ndi Yérémia a bi tomb bé! Kii i bi hôla nye i yémbél mandutu ma momasôna ni i sal ni maséé? Mam ima. Pog, i nwin Yéhôva a bi kal nye le a legel u bé u mpôdôl “botñem inyu lisuk.” (Yérémia 29:11) Iba, Yéhôva a bi pohol Yérémia inyu ke i añal jôl jé. (Yérémia 15:16) Yak bés di nlegel bôt nwin u nti botñem, di yé ki Mbôgi Yéhôva. Ngéda di nhoñol i mam mana mo ima, di nsal bôlô yés ni maséé to ibale bôt ba ñemble bé bés.

13. Kii hihéga hi Yésu di nléba i kaat Markô 4:26-29 hi niiga bés?

¹³ I mbéda ngandak ngéda inyu boñ le i mut a nigil Bibel a hol. Yésu a bi unda jam li ngéda a bi ti hihéga hi mut a nwes mbôô, a kee hilo. (Añ Markô 4:26-29.) Ngéda mut a nwes mbôô, i nañ mbeñee mbeñee, a nla bé boñ jam jo ki jo inyu boñ le mbôô i pala hol. Yak bés, ngandak ngéda i nla tagbe ndi di kahal tehe mahol ma mut di niiga Bibel. Nwet a nwes mbôô a ta bé le a boñ le mbôô i hol kiki a ngwés, hala nyen to bés di ta bé le di boñ le i mut di niiga Bibel a hol kii di ngwés. Jon u tomb bañ ibale nnigil Bibel a nhol bé kiki u ngwés. Kiki nsalwom, i mut a nyilha bôt banigil a nlama hônba.—Yakôbô 5:7, 8.

14. Himbe hihéga hi ñéba le i nsômbla ngandak ngéda inyu boñ le bôt ba kahal emble bés?

¹⁴ Ngim bahoma, ngandak ngéda i yé le i tagbe, ndi bôt ba kahal yila Mbôgi Yéhôva. Di yoñ hihéga hi Gladys bo Ruby Allen, linyañ li ba bi ep kiki basañal ba Ngéda yôsôna i tison i Québec i Kanada i nwii 1959. * Kii bôt ba bé kon pada yap ni bôt bape woñi, ba bé emble bé lôk kéé. Gladys a nkal le: “Ngéda bôt ba bé ba lo i nwemel ba tehe bés, ba bé ba témb ni mbus. Ndi di bi tomb bé.” Ndék ni ndék, bôt ba bi kahal leege bés, di kahal añle bo ñañ nlam. Nano makoda maa ma yé mu tison i.—Yésaya 60:22.

15. Kii kaat 1 Korintô 3:6, 7 i niiga bés inyu nson i yilha bôt banigil?

¹⁵ Ngandak bôt i nyoñ ngaba i nson i yilha mut ngwélél Yéhôva. Lôk kéé yosôna i likoda yon i nhôla mut i hol ikepam i sôble. (Añ 1 Korintô 3:6, 7.)  Kiki hihéga, mankéé wada a yé le a ti mut kaat tole man lipep. Mankéé a tehe le a ga bana bé ngéda inyu témb i yuuga mut nu, a kal mankéé numpe le a kee a yuuga nye. I mankéé a nke yuuga i mut nu a bôdôl yigil Bibel ni nye. A kena ngandak lôk kéé i yigil i mut nu, hiki mankéé mu a ti nye makénd. Hiki mankéé mu a ga hôla nnigil Bibel i hol ikepam sôble. Ibale ba mboñ hala, kiki Yésu a bi kal, bobasôna ba nkon maséé ibale i mut nu a nsôblana.—Yôhanes 4:35-38.

16. Inyuki u yé le u kon maséé i nson woñ likalô to ibale u nkon tole u gwé ha bé ngui?

¹⁶ Bebek u nla ha bé añle bôt ñañ nlam ni niiga bo kiki u bé boñ behee inyule u nkon tole u gwé ha bé ngui. To hala, u nla kon maséé mu nson woñ. Di bigda ndémbél i Kiñe David ni bôt bé ngéda ba bi sôñ mahaa map ni masañgô map i moo ma Lôk Amalek. Mbôgôl bôlôm iba i bi la bé ke i jo gwét inyule ba bé nwaak, jon ba bi yégle ha i tééda masañgô. Ngéda ba bi yémbél gwét, David a bi kal le i gwom ba bi kadal nyoo i gwét ba kébha gwo bôt bobasôna nlélém. (1 Samuel 30:21-25) Hala nyen i yé inyu nson wés i añal ñañ nlam. To ibale u gwé ha bé ngui i téé likalô kii u ngwés, ibale u mboñ kii yosôna u nla mu nson u, w’a kon maséé hiki ngéda w’a tehe mut a nsôblana.

17. Inyuki di nlama ti Yéhôva mayéga?

¹⁷ Di nti Yéhôva mayéga inyule a ngwés bés ngandak, a yé ki maséé inyu nson di nsélél nye. A nyi le di ta bé le di nyégsa bôt i emble bés tole i gwélél nye. To hala, a ntehe bôlô yosôna di nsal, a nyi le di ngwés nye ngandak, jon a mbom bés. A ñunda ki bés kii di nla boñ inyu ba maséé mu nson wés likalô. (Yôhanes 14:12) Di nyi le Yéhôva a nkônôl bés maséé ibale di ntomb bé!