1. Boasa las rohatta jala bangga hita gabe Saksi Jahowa?

MASSAI las do rohatta jala bangga do hita gabe Saksi Jahowa. Dilehon do tu hita tugas na istimewa, mangajari akka halak taringot Jahowa. Las do rohatta mangalului akka “halak na marpangalaho na denggan na mambahen nasida tama mandapot hangoluan saleleng ni lelengna”. Jala lomo do rohatta asa gabe sisomba Jahowa nasida. (Ul. 13:48) Sarupa ma pakkilalaatta songon Jesus. “Marlas ni roha” do ibana ala mambege akka pengalaman na denggan sian akka siseanna tikki marbarita.​—Luk. 10:1, 17, 21.

2. Aha do na taulahon na patuduhon penting do ulaonta marbarita?

² Ulaon na massai penting do marbarita na uli, ala boi paluahon hita dohot na manangihon. Alani i, hea do dipaboa Apostel Paulus tu si Timoteus songon on, “Toktong ma parrohahon dirim dohot na diajarhonmi . . . Ai molo diulahon ho i na paluahon dirim do ho dohot na manangihon ho.” (1 Tim. 4:16) Hita sude rakyat ni Harajaon ni Debata. Alani i ikkon toktong do taparrohahon diritta. Lapatanna, ikkon denggan do pangalahotta, sadalan tu barita na uli na taboan. Jala unang sappe tabahen lea goar ni Jahowa. (Plp. 1:27) Asing ni i, ikkon taparrohahon do na taajarhon. Lapatanna, ikkon denggan ma taparade akka bahan na lao tapasahat tikki marbarita. Jala tapangido ma pangurupion sian Jahowa, andorang so lao hita marbarita.

3. Songon dia do tanggapan na mungkin tadapot di ulaon marbarita na uli? Paboa ma contohna.

³ Olo do ra nang pe nungnga taulahon na dumenggan di  ulaon marbarita, godangan halak di daerahta dang olo manangihon barita na tapasahat. Songon pengalaman ni donganta si Georg Lindal, marbarita do ibana sahalakna di Islandia sian taon 1929 sahat tu 1947. Nga ditempatton ibana puluhan ribu publikasi, hape nanggo sada pe dang adong na gabe Saksi. Didok ibana, “Godangan halak dang berminat, jala piga-piga menentang.” Adong do tong piga-piga misionaris lulusan Gilead na ditempatton disi. Alai dukkon sia taon nasida marbarita disi, baru pe adong na tardidi. *

4. Boha do perasaanta molo dang adong halak na olo manjalo barita na uli?

⁴ Memang kecewa do hita molo dang adong halak na olo marsiajar Bibel. Apostel Paulus pe hea do merasa songon i. ‘Marsak jala massai lungun do rohana’ ala dang olo halak Jahudi porsea molo Jesus i Messias. (Rom 9:1-3) Saonari pe sarupa do ra perasaanmuna songon si Paulus i. Misalna adong ma studimuna, nungnga berupaya hamu gabe guru na terampil, jala sai ditangiakkon hamu do ibana. Alai dang dibahen ibana kemajuan. Gabe dipaso hamu ma ibana marsiajar. Situasi na asing, mungkin dang hea diurupi hamu halak sappe tardidi. Porlu do hamu merasa bersalah alani i, jala merasa dang dipasu-pasu Jahowa upayamuna i? Di parsiajaran on, lao taulas ma dua sukkun-sukkun: (1) Aha do na patuduhon na marhasil ulaonta marbarita? (2) Aha do na porlu taingot di ulaonta marbarita?

5. Boasa sude na taharappon i dang boi saut?

⁵ Bibel mandok halak na mangulahon hata ni Debata, “sai marhasil do sude na niulana”. (Ps. 1:3) Alai dang berarti sude na taharappon i ikkon terjadi. Alana hita jolma na mardosa, jala ‘gok do hasusaatta’. (Job 14:1) Asing ni i, adong do akka halak na mangorai hita marbarita na uli. (1 Kor. 16:9; 1 Tes. 2:18) Alai sasittongna molo nungnga taulahon ulaon ni Jahowa i, nungnga marhasil hita disi. Boasa boi tadok songon i? Saonari tabahas ma taringot i.

6. Aha do na mambahen las roha ni Jahowa?

⁶ Diparrohahon Jahowa do sude na taulahon i. Molo semangat hita marbarita na uli alani holongta tu Jahowa, pasti las do roha ni Jahowa mangida hita, nang pe ra dang adong halak na manjakkon hita. Alani i, didokkon si Paulus ma, “Tigor do Debata, dang lupahononna akka naung diulahon hamu dohot holong naung dipatudu hamu tu goarna i. Dipatuduhon hamu do i marhite mangurupi akka na badia i sahat tu saonari.” (Heb. 6:10) Diingot Jahowa do kerja kerasta dohot holongta, nang pe dang adong na boi taurupi sappe tardidi. Alani i, toktong ma taingot hata ni si Paulus on, “Dang marisuang halojaonmuna marhobas tu Tuhan i.”—1 Kor. 15:58.

7. Aha do na boi tatiru sian Apostel Paulus?

⁷ Guru na denggan do si Paulus, jala dibentuk ibana do godang huria na baru. Alai adong do piga-piga na mengkritik ibana jala  mandok guru na so denggan do ibana. Nang pe songon i, dang dipaboa ibana sadia godang halak na diurupi ibana gabe halak Kristen. Alai na didok si Paulus, “Unggodang do na huulahon sian nasida.” (2 Kor. 11:23) Jadi diboto si Paulus do na uppetting di Jahowa i ma kerja keras na diulahon ibana, dang hasilna.

8. Aha do na porlu taingot di ulaonta marbarita?

⁸ Las do roha ni Jahowa molo ringgas hita marbarita. Tikki di tano on Jesus, hea ma disuru ibana 70 siseanna marbarita na uli. Dung sae nasida marbarita, mulak ma nasida “di bagasan las ni roha”. Aha do na mambahen nasida marlas ni roha? Didok nasida, “Dohot do akka suru-suruan na jahat tunduk tu hami tikki hupakke hami goarmu.” Alai didok Jesus ma tu nasida, “Unang ma las rohamuna ala tunduk tu hamu akka suru-suruan na jahat i. Alai, marlas ni roha ma hamu ala nungnga tarsurat goarmuna di banua ginjang.” (Luk. 10:17-20) Diboto Jesus do dang sai torus boi didapot nasida pengalaman na luar biasa tikki marbarita. Jala memang dang taboto pasti sadia godang na manangihon barita ni nasida i gabe sisean. Jadi porlu do diboto akka sisean i, dang hasil na paling penting, alai upaya ni nasida do na mambahen nasida marlas ni roha.

9. Sesuai tu Galatia 6:7-9, aha do hasilna molo dang marnaloja hita marbarita na uli?

⁹ Molo torus hita marbarita na uli, dapotta ma ngolu na salelengna. Molo taulahon na dumenggan di ulaonta marbarita, “na manuan hombar tu panogu-noguon ni tondi parbadia” ma hita disi. Boasa boi tadok songon i? Alana tikki hita marbarita na uli, i patuduhon na olo do hita ditogu-togu tondi parbadia. Jadi molo “dang marnaloja” hita mangulahon ulaon marbarita na uli, lehonon ni Jahowa ma tu hita hangoluan na salelengna, nang pe dang adong halak na taurupi sappe tardidi.​—Jaha Galatia 6:7-9.

10. Boasa beda-beda tanggapan ni akka halak tu barita na uli?

¹⁰ Olo manang na dang halak manjakkon hasittongan, bergantung tu roha ni nasida. Hea do dipaboa Jesus sada ilustrasi taringot sahalak panabur na manabur boni manang bibit di piga-piga jenis tano na berbeda. Alai holan bibit na di tano na denggan do na tubu jala marparbue. (Luk. 8:5-8) Piga-piga jenis tano na di tudosan ni Jesus i manggombarhon roha ni akka halak. Jadi dang sai sarupa tanggapan ni akka halak tu “hata ni Debata”. (Luk. 8:11-15) Hita dos songon panabur boni i. Dang boi tapaksahon tubu hasittongan i di roha ni sasahalak. Taingot ma tanggung jawabta, i ma pasahatton hasittongan i. Alani i ma songon na didokkon si Paulus, ‘tajalo ma upatta sesuai tu na taulahon’, dang bergantung tu hasil na tadapot.​—1 Kor. 3:8.

11. Boasa di Jahowa nungnga marhasil be si Noak gabe sahalak parbarita? (Ida gambar sampul.)

¹¹ Najolo godang do naposo ni Jahowa na pasahatton hata ni Debata, alai dang olo halak manangihon. Misalna si Noak, didok do di Bibel molo ibana “sahalak parbarita na paboahon dalan ni Debata na sittong i”. Jala diulahon ibana do tugasna i saleleng hira-hira 40 manang 50 taon. (2 Ptr. 2:5) Pasti lomo do rohana asa ditangihon halak barita na dipasahatna i. Alai dang songon i na didok Jahowa. Tikki naeng mambahen parau i, didok Jahowa ma tu si Noak, “Masuk ma ho tu parau i rap dohot sude anakmu, istrim, dohot sude parumaenmu.” (1 Mus. 6:18) Jala tikki dipaboa Jahowa ukkuran ni parau i tu si Noak, mungkin diboto si Noak do dang lao godang halak manangihon baritana. Alana ukkuran ni parau i pe dang dibahen lao manampung godang halak. (1 Mus. 6:15) Jala memang dang adong nanggo sada  pe na manangihon barita ni si Noak i. (1 Mus. 7:7) Na so marhasil do si Noak mangulahon tugasna i? Daong. Di Jahowa nungnga marhasil be si Noak ala nungnga diulahon ibana aha na diparettahon Jahowa tu ibana.​—1 Mus. 6:22.

12. Aha do na mangurupi si Jeremia toktong marlas ni roha di ulaon marbarita?

¹² Si Jeremia pe torus do ibana marbarita saleleng lobi sian 40 taon, nang pe dang ditangihon halak ibana jala godang na menentang. Sanga do ibana marmetmet ni roha jala hampir menyerah sian tugasna ala ‘dileai’ jala “direhei” akka halak. (Jer. 20:8, 9) Alai aha do na diulahon ibana asa semangat muse jala marlas ni roha mangulahon tugasna? Sai diingot ibana do na dua on. Na parjolo, diingot si Jeremia do molo barita sian Debata i, boi mangalehon harapan tu akka halak, jala mambahen ‘denggan ngolu ni nasida di ari na naeng ro’. (Jer. 29:11) Na paduahon, nungnga dipillit Jahowa ibana lao pasahatton hata ni Debata tu akka halak. (Jer. 15:16) Hita pe saonari, taboan do barita na mangalehon harapan tu akka halak. Jala nungnga dipillit Jahowa hita gabe Saksina. Molo torus taingot na dua on, boi ma hita torus marlas ni roha dang soal songon dia tanggapan ni halak.

13. Aha do na boi taparsiajari sian ilustrasi ni Jesus di Markus 4:26-29?

¹³ Porlu do tikki di sasahalak asa boi togu haporseaonna tu Jahowa. On ma na diajarhon Jesus di ilustrasina taringot sahalak panabur. (Jaha Markus 4:26-29.) Dung disuan panabur i akka boni manang bibit, dang boi pittor hatop tubu bibit i. Jala panabur i pe, dang boi dipaksa ibana asa hatop bibit i tubu. Hita pe, mungkin dang boi langsung taida kemajuan na dibahen parsiajar Bibelta, porlu do ra tikki di nasida. Jala dang boi tapaksa parsiajar Bibelta asa hatop maju. Jadi unang ma hita marmetmet ni roha manang menyerah, molo taida songon na lambat parsiajar Bibelta mambahen kemajuan. Songon sahalak panabur nakkin, porlu do hita sabar.​—Jak. 5:7, 8.

14. Paboa ma pengalaman na patuduhon porlu do godang tikki asa boi taida hasil ni ulaonta marbarita.

¹⁴ Di piga-piga inganan, olo do ra sappe martaon-taon baru pe adong halak na berminat. Parrohahon ma pengalaman ni si Gladys dohot kakakna si Ruby Allen, perintis biasa do halak i. Di taon 1959, ditugasson ma nasida tu sada kota na adong di provinsi Quebec, Kanada. * Ala mabiar do akka halak disi tu akka tetangga dohot pandita, gabe dang olo nasida mambege barita Harajaon. Didok si Gladys, “Marbarita do hami sian jabu tu jabu saleleng ualu jom di bagasan sadari. Diulahon hami ma i saleleng dua taon. Alai dang adong nanggo sada pe na olo manangihon hami! Jala dang adong na olo mambukka pintuna molo ro hami. Nang pe songon i, dang menyerah hami.” Lam leleng gabe lam burju do nasida, jala adong ma piga-piga halak na olo manangihon. Saonari, nungnga adong tolu huria di kota i.​—Jes. 60:22.

15. Aha do na porlu taulahon asa boi mangurupi sasahalak mambahen kemajuan? (1 Korint 3:6, 7)

¹⁵ Porlu do godang halak mangurupi sahalak parsiajar Bibel mambahen kemajuan. Sude do hita di huria boi mangurupi parsiajar Bibel asa tardidi. (Jaha 1 Korint 3:6, 7.) Taida ma jo contoh on. Misalna adong ma sahalak penyiar na mangalehon majalah tu sahalak bawa na berminat. Ala dang boi donganta i mangunjungi muse di tikki na pas tu parjabu i, jadi dipangido ibana ma donganta na asing lao mangunjungi. Mulai ma bawa na berminat i marsiajar. Sai margatti-gatti do patner ni guru studina, jala nasida sude berupaya patoguhon bawa i. Boi didok nasida sude mangurupi bawa  i asa lam jonok tu Jahowa. Jadi sude do hita di huria marlas ni roha tikki mambahen kemajuan sasahalak jala tardidi.​—Joh. 4:35-38.

16. Boi do hamu toktong marlas ni roha di ulaon marbarita nang pe nga moru gogo, manang adong masalah kesehatanmuna?

¹⁶ Adong do ra tantangan na asing na diadopi hamu. Mungkin nga moru gogomuna, manang adong masalah kesehatanmuna na mambahen hamu maol marbarita. Nang pe songon i, boi do hamu marlas ni roha di ulaon marbarita. Taingot ma pengalaman ni Raja Daud. Tikki i naeng marporang do ibana dohot akka tentarana mangalo halak Amalek, lao paluahon keluarga ni nasida. Alai adong ma 200 tentarana na palojahu lao marporang. Jadi disuru ibana ma nasida tinggal lao manjaga akka barang. Dung monang si Daud dohot akka tentarana, dibuat nasida ma arta ni halak Amalek i. Dung i disuru si Daud ma asa dibagi rata jarahan i tu halak na dohot marporang, dohot tu na manjaga barang. (1 Sam. 30:21-25) Dos songon i ma ulaonta marbarita na uli. Sude do hita boi mandapot las ni roha molo tardidi sasahalak.

17. Boasa mandok mauliate hita tu Jahowa?

¹⁷ Mandok mauliate do hita tu Jahowa alana diargai Ibana do sude upayatta di ulaon marbarita. Diboto Ibana do dang boi tapaksa sasahalak manangihon manang manjalo barita na tapasahat. Diida Jahowa do kerja kerasta. Diboto Ibana do muse, ala holongta tu Ibana do makana taulahon i. Pos ma rohatta pasti dipasu-pasu Jahowa do hita, jala urupan ni Jahowa do hita asa marlas ni roha di ulaonta marbarita. (Joh. 14:12) Taingot ma, pasti las do roha ni Jahowa mangida hita molo dang menyerah hita marbarita na uli!