1. Mase malas tumang uhurta gabe Saksi Jahowa?

TONTU malas tumang do uhurta gabe Saksi Jahowa halani hita boi mambaritahon ampa mangajarhon pasal Naibata bani halak na legan. Malas do homa uhurta anggo dong iurupi hita “halak na marosuh manjalo hasintongan” ronsi ia ididi. (Lah. 13:48, Terjemahan Dunia baru.) Sarupa ma pangahapta songon Jesus. “Marolob-olob ma ia ibagas tonduy na pansing” dobkonsi itangar ia pangalaman na dear na idapot susianni sanggah marbarita.​—Luk. 10:1, 17, 21.

2. Sonaha hita patuduhkon anggo horja parambilanon ai ponting tumang banta?

² Ponting tumang do horja parambilanon ai. Halani ai iojur apostel Paulus ma si Timoteus, “Jaga ma ham bani dirimu ampa bani pangajaran in . . . anggo ihorjahon ham in, na paluahkon dirimu do ham ijin sonai age na manangihon ham.” (1 Tim. 4:16) Jadi horja parambilanonta boi mangurupi halak mandapot hagoluhan. Halani ai totap ma hita ringgas mangidangi, halani rakyat ni Harajaon ni Naibata do hita. Marusaha ma hita pasangapkon Jahowa bani ganup pambahenanta. Anjaha jaga hita ma parlahounta ase sosok pakon ambilan na madear na ipadas hita. (Pil. 1:27) Maningon ‘jaga ma hita bani pangajaranta’. Carani, dear ma hita mambahen persiapan janah martonggo paima laho marbarita.

3. Ai ganup do halak marosuh bani baritanta? Bere ma contoh.

³ Tapi age pe domma ibere hita na sidearan sanggah marbarita, ra do totap lang dong na ra manangihon baritanta. Pardiateihon ma pangalaman ni Sanina Georg Lindal, na mangidangi  i Islandia. Marbarita ma ia sahalaksi humbani tahun 1929 ronsi 1947. Domma dong marribu publikasi na ibagihon ia ijai, tapi lang dong age sada na gabe Saksi Jahowa. Ia mangkatahon, “Sasintongni ijon otik dassa na marsogam ni uhur banta. Tapi, bahatan do halak na lang marosuh mambotoh hasintongan.” Dobkonsi ai, roh ma piga-piga utusan injil lulusan sikolah Gilead. Hassi pe domma martahun-tahun sidea marbarita ijai, totap do lang dong na marosuh manangar. Tapi dobkonsi siah tahun dong ma i Islandia na ra ididi gabe Saksi Jahowa. *

4. Sonaha ma pangahapta anggo lang dong halak na ra manangihon baritanta?

⁴ Tontu pusok do uhurta anggo lang dong halak na ra manangihon baritanta. Sonai do homa pangahap ni si Paulus. ‘Pusok tumang do uhurni’ halani bahat halak Jahudi na lang ra manjalo Mesias. (Rom 9:1-3) Ra do homa domma marusaha hita mangurupi parlajar Bibelta janah itonggohon hita do homa ia. Tapi, halani lalab lang idalankon ia na iparlajarini ai, maningon ipasoh hita ma parlajaran ai. Ra do homa lang dong na iurupi hita ronsi ididi. Ai halani salahmu do ase sonai? Ai na lang ipasu-pasu Jahowa do pangidangionmu? Bani artikel on iulas hita ma dua balosni sungkun-sungkun on, (1) Aha do buktini anggo pangidangionta domma marhasil? (2) Aha do na porlu idingat hita ase ulang marnaloja ibagas pangidangion?

5. Mase lang tongtong dear hasilni na ihorjahon hita ibagas pangidangion?

⁵ Bibel mangkatahon halak na mangkorjahon harosuh ni Jahowa “sagala hinorjahonni manjadi do”. (Ps. 1:3) Tapi sedo artini ganup na ihorjahon hita hasilni songon na iarapkon hita. Mase sonai? Halani jolma na mardousa do ganup hita sonai homa halak na legan. Ai ma na mambahen ‘buei hasunsahanta’. (Job 14:1) Leganni ai, bahat do homa munsuh na manlanglangi horja parambilanonta. (1 Kor. 16:9; 1 Tes. 2:18) Anggo sonai aha ma buktini parambilanonta domma marhasil? Ulas hita ma prinsip ni Bibel laho mambalosi ai.

6. Aha do na mambahen hita marhasil i lobei ni Jahowa?

⁶ Haringgasonta do na ididah Jahowa. Anggo totap hita ringgas janah patuduhkon holong age pe lang bahat na manangihon baritanta, domma marhasil hita i lobei ni Jahowa. Si Paulus mangkatahon, “Ai sedo na geduk Naibata, gabe lupa Ia bani pambahenan nasiam ampa bani holong ni uhur nasiam, na pinatuduhkon nasiam bani goran-Ni, marhitei pangidangi nasiam hinan ampa sorani bani halak na mapansing in.” (Heb. 6:10) Jadi sai tongtong do idingat Naibata haringgason ampa holongta age pe lang dong na iurupi hita ronsi ididi. Dingat hita homa na ihatahon si Paulus bani halak Korint. Nini do “sedo na soya halojaon nasiam ibagas Tuhan in”, age pe hasilni lang songon na iharosuhkon nasiam.​—1 Kor. 15:58.

7. Aha do na boi iparlajari hita humbani si Paulus?

 ⁷ Sahalak misionaris na ringgas tumang do si Paulus. Halani pangidangionni, bahat ma kuria-kuria na baru. Hassi pe sonai dong do piga-piga halak na pasambor-samborhon ia janah mangkatahon sedo guru na dear si Paulus ai. Aha ma na ihatahon si Paulus laho mambalosi sidea? Ia mangkatahon, ‘Lobihan do ahu manaron torik ni horja.’ (2 Kor. 11:23) Lang dong ihatahon si Paulus piga halak na iurupi ia ronsi ididi. Humbani balosni ai, ibotoh hita ma haringgasonta ibagas pangidangion do na sipontingan bani Jahowa.

8. Aha do na porlu idingat hita pasal pangidangionta?

⁸ Malas do uhur ni Jahowa mangidah pangidangionta. Isuruh Jesus do 70 susianni marbarita, anjaha “ibagas malas ni uhur do mulak” sidea. Aha do na mambahen malas uhur ni sidea? Ihatahon sidea ma, “Tunduk do age setan-setan bannami halani goran-Mu.” Tapi ihatahon Jesus ma bani sidea, “Ulang ma malas uhurnima, halani tunduk setan-setan ai bannima, tapi malas ma uhurnima, halani domma tarsurat gorannima i nagori atas.” (Luk. 10:17-20) Ibotoh Jesus do lang tongtong adong na ra manangihon barita na madear. Anjaha hassi pe dong na ra manangar barita ni sidea, tapi lang ibotoh hita sadiha bahat do na gabe susian ni Jesus. Jadi sasintongni na mambahen malas uhur ni susian ni Jesus, ai ma halani malas uhur ni Jahowa mangidah sidea sedo halani hasilni.

9. Domu bani Galatia 6:7-9, aha ma na idapot hita anggo totap ringgas mangidangi Jahowa?

⁹ Anggo totap hita ringgas mangidangi, dapot hita ma hagoluhan sadokahni dokahni. Anggo hita mambere na sidearan sanggah marbarita ampa mangajarhon Harajaon ni Naibata, on patuduhkon na “manidahkon bani tonduy” do hita. Artini iihutkon hita do panogu-noguan ni tonduy na pansing. Anggo “seng gabe galek” hita, marjanji do Jahowa bereon-Ni do hagoluhan sisadokah ni dokahni banta age pe lang dong halak na iurupi hita ronsi ididi.​—Basa Galatia 6:7-9.

10. Mase dong halak na ra manangihon baritanta janah dong homa na lang ra?

¹⁰ Uhur ni sasada halak do na manontuhon ra do ia manjalo baritanta atap lang. Dong sada contoh na isaritahon Jesus pasal sada halak na manabur bonih bani marmasam tanoh. Pitah bani tanoh na madear do bonih ai tubuh janah marbuah. Sonai ma homa barita hasintongan na ibaritahon hita. (Luk. 8:5-8) Jesus mangkatahon tanoh ai manggambarhon sonaha uhur ni sasada halak dobkonsi manangar barita na madear pasal “hata ni Naibata”. (Luk. 8:11-15) Songon si panabur ai, lang boi ipaksa ia ase bonih ai tubuh janah marbuah. Sonai ma homa hita lang boi ipaksa hita halak ase ra manangar baritanta. Pitah manabur dassa tugasta. Halani ai ma ihatahon si Paulus, “ganup manjalo upahni domu hubani horjani bei”, sedo halani hasil ni horjani.​—1 Kor. 3:8.

11. Mase boi ihatahon parambilan na marhasil do si Noak age pe lang dong na manangar baritani? (Tonggor gambar sampul.)

¹¹ Sapari pe bahat do halak na lang ra manangihon barita na ipadas juakjuak ni Naibata. Umpamani, si Noak ihatahon do ia “parambilan hapintoron” sadokah martahun-tahun. (2 Ptr. 2:5) Tontu mangarap do ia ase dong na ra manangar baritani. Tapi lang dong ipatugah Jahowa dong do holi halak na ra manangihon barita ai. Sanggah isuruh Naibata ia mambangun parau, on ma na ihatahon Naibata hu bani, “Masukanmu ma parau in, ho pakon anakmu, parinangonmu ampa parinangon ni anakmu na rap pakon ho.” (1 Mus. 6:18) Anjaha anggo irimangi si Noak ukuran ni  parau na ihatahon Naibata tontu sadar do ia lang dong holi halak na ra manangar barita ai. (1 Mus. 6:15) Janah tongon do sonai, lang dong na ra manangihonsi. (1 Mus. 7:7) Ai na ianggap Naibata do si Noak lang marhasil? Lang. I lobei ni Jahowa marhasil do si Noak halani tongtong do ia mandalankon parentah-Ni.​—1 Mus. 6:22.

12. Aha do na totap mangurupi si Jeremia marmalas ni uhur marbarita age pe lang dong na ra manangihon baritani?

¹² Sadokah 40 tahun si Jeremia marbarita, bahat do na marsogam ni uhur hu bani janah lang ra manangihon ia. Gabe maretek ni uhur do si Jeremia halani ai. Ihatahon ia do gabe “sirisaon ampa sipahata-hataon” ia halani barita ai. (Jer. 20:8, 9) Sompat do ia marpingkir lang ra be ia mandalankon tugasni. Tapi lang saud ibahen ia sonai. Aha ma na mangurupi ia ase totap marmalas ni uhur janah totap ringgas marbarita? Na parlobei idingat ia do “sura-sura hadearon” do na ipatugah ia bani halak. (Jer. 29:11) Na paduahon, Hata ni Jahowa do na ipadas ia bani halak na legan. (Jer. 15:16) Sonai ma homa hita, dingat hita ma anggo barita ai boi mambere pangarapan bani halak na legan. Anjaha baritanta ai boi pasangapkon Jahowa. Anggo tongtong ai idingat hita, gabe boi ma hita totap ringgas marbarita age pe lang dong na ra manangihon baritanta.

13. Aha do na boi iparlajari hita humbani contoh na ipatugah Jesus bani Markus 4:26-29?

¹³ Porlu do panorang ase sasada halak boi toguh haporsayaonni. Isaritahon Jesus do pasal ai marhitei contoh pasal panabur na modom. (Basa Markus 4:26-29.) Dobkonsi isaburhon parjuma ai bonih ai, tubuh ma anget-anget bonih ai. Tapi lang boi ibahen ia ase podas tubuh bonih ai. Sonai ma homa sanggah hita mangurupi halak gabe susian ni Jesus. Porlu do panorang bani parlajar Bibelta laho mandalankon aha na dob iparlajari ia. Anjaha songon parjuma ai, lang boi ipaksa ia ase podas tubuh bonih ai. Sonai ma homa hita lang boi ipaksa hita parlajar Bibelta ase podas mambahen parubahan. Jadi sanggah dong parlajar Bibelta songon na dokah mambahen parubahan ulang ma maretek ni uhur hita. Maningon sabar do hita songon parjuma ai.​—Jak. 5:7, 8.

14. Saritahon ma sada pangalaman na patuduhkon ra do lang mintor podas jumpah hita halak na ra manangihon baritanta.

¹⁴ Ra do dokah do hita pajumpah pakon halak na ra manangihon hasintongan. Pardiateihon hita ma dua hasomanta naboru na marsanina, ai ma si Gladys pakon si Ruby Allen. Bani tahun 1959 gabe perintis biasa ma sidea i sada kota i provinsi Quebec, Kanada. * Tapi lang dong halak na ra manangihon baritanta halani mabiar sidea bani tetangga ampa pemimpin ugama Katolik. Si Gladys mangkatahon, “Sadokah dua tahun, marbarita ma hanami tiap ari ualuh jam. Sanggah itonggor sidea hanami roh, lang ra sidea mambuka pintu. Tapi totap do semangat hanami.” Dokah-dokah lambin basar ma halak ijai, janah dong ma piga-piga halak na ra manangihon baritanta. Sonari domma dong tolu kuria i kota ai.​—Jes. 60:22.

15. Humbani 1 Korint 3:6, 7, aha do na boi iparlajari hita pasal mangurupi sasada halak gabe susian ni Jesus?

¹⁵ Maningon bekerja sama do hita pakon ganup sanina botou laho mangurupi sasada halak ronsi ididi. Bibel mangkatahon ganup do halak i kuria boi mangurupi sasada halak marlajar Bibel janah mambahen hamajuan ronsi ididi. (Basa 1 Korint 3:6, 7.) Dong sada sanina na mambere risalah atap majallah hubani sada dalahi. Tapi halani lang boi ia manrohi use dalahi ai, isuruh ia ma sanina na legan laho manjumpahisi. Sanggah sanina ai manrohi  dalahi ai, ipungkah ia ma parlajaran Bibel pakonsi. Janah margantih-gantih do iboban sanina ai hasomanni sanggah marlajar Bibel. Hasomanni ai pe gati do mangurupi dalahi ai ase lambin toguh haporsayaonni, dos ma ai sidea mangarbahi bonih hasintongan ai. Sanggah dalahi ai ididi, ganup do halak i kuria marmalas ni uhur sedo pitah na mangajari ia marlajar Bibel. Sosok ma ai songon na ihatahon Jesus pasal sipanabur ampa sipartidah.​—Joh. 4:35-38.

16. Age pe ham boritan atap hurang gogohmu, mase boi do ham totap marmalas ni uhur ibagas pangidangion?

¹⁶ Tapi ra do lang bahat be na boi ibahen ham ibagas pangidangion halani boritan ham atap lang margogoh be. Age pe sonai totap do ham boi marmalas ni uhur. Pardiateihon ma pangalaman ni Raja Daud. Laho ma si Daud pakon hasomanni marporang laho paluahkon kaluarga ampa barang-barang ni sidea humbani halak Amalek. Tapi dong 200 halak na lang boi dihut halani domma lojatu. Jadi tading ma sidea manjaga barang-barang. Dobkonsi monang si Daud marporang, iparentahkon si Daud ma ase jarahan na idapot ai ibagi dos bani halak na dihut marporang ampa na tading. (1 Sam. 30:21-25) Sonai ma homa horja parambilanonta i sab tanoh on. Age pe lang bahat be na boi ibahen ham ibagas pangidangion, tapi boi do tong ham marmalas ni uhur halani domma ibahen ham na sidearan. Anjaha sanggah dong halak na ra marlajar Bibel ronsi ididi, marmalas ni uhur do homa ham halani ai.

17. Mase hita martarima kasih bani Jahowa?

¹⁷ Tontu martarima kasih banggal do hita hubani Jahowa halani holong tumang do Ia hubanta. Anjaha na ididah Ia, ai ma haringgason ampa holongta. Ibotoh Ia do homa lang boi ipaksa hita halak ase ra manangar baritanta. Anjaha ipasu-pasu Jahowa do haringgasonta. Ipatugah Ia do homa sonaha carani ase boi hita totap marmalas ni uhur ibagas pangidangion. (Joh. 14:12) Jadi, pos ma uhurta malas do uhur ni Jahowa anggo lang marnaloja hita ibagas pangidangion!