1. Kai si erban kita ermeriah ukur ras bangga?

MERIAH kel ukurta ras bangga kel kita jadi Saksi Jahwe! Kita umat Jahwe janah sibuktiken maka kita me saksiNa. Si e sibuktiken alu erberita ras ngajari kalak kerna Jahwe. Meriah kel ukurta sanga banci sisampati sekalak jelma si “pusuh ras perbahanenna ngaloken kebenaren guna kegeluhen si rasa lalap” seh asa ia iperidiken. (Perb. 13:48) Bali perasanta bagi Jesus si ‘meriah kel akapna’ sanga iceritaken murid-muridna pengalamenna si mehuli bas erberita.​—Luk. 10:1, 17, 21.

2. Kai buktina penting kel siakap dahin erberita?

² Penting kel siakap dahin erberita. Inasehati Rasul Paulus Timotius, nina, “Teruslah perdiateken bandu ras pengajarenndu.” Nina Paulus ka, “Alu bage selamatkenndu bandu bage pe kalak si megiken kam.” (1 Tim. 4:16) Payo, dahin erberita banci nelamatken kegeluhen. Adi sipastiken perbahanenta sesuai ras berita si meriah ras simuliaken Jahwe, e ertina siperdiateken banta. Bage siban perban kita rakyat Kerajan Dibata. (Pil. 1:27) Adi siban persiapen sope erberita ras sipindo penampat Jahwe, e buktina si ‘perdiateken pengajarenta.’

3. Kerina nge kalak tertarik man beritata? Ban contohna.

³ Amin pe enggo siusahaken kel erberita, teremen kalak bas daerahta banci saja la tertarik man berita si meriah. Cuba perdiateken pengalamen Turang Senina Georg Lindal. Mulai tahun 1929 seh ngasa tahun 1947, sisada ia erberita bas daerah-daerah si lit i Islandia. Ibagikenna puluhen ribu buku-bukuta, tapi la lit sekalak pe si nggit ngaloken kebenaren. Itulisna bagenda, “Lit kalak si nentang beritata, tapi teremen kalak si la tertarik.” Dungna, piga-piga utusen injil arah lulusen Gilead reh nampati pendahin erberita bas Islandia. Tapi, enggo pe ertahun-tahun kalak e erberita i je, la  lit sekalak pe si tertarik man beritata. Dungna, kenca siwah tahun maka lit piga-piga kalak bas Islandia si mbaktiken dirina man Jahwe ras iperidiken. *

4. Uga perasanta adi lit kalak si la nggit ngaloken berita si meriah?

⁴ Adi lit kalak si la nggit ngaloken berita si meriah, pasti kecewa kita. Banci saja bali perasanta ras Paulus, si ‘ceda kel atena janah lalap ia sedih’ perban teremen kalak Jahudi la ngakui Jesus selaku Mesias si ijanjiken. (Rom. 9:1-3) Banci saja enggo usahakenndu kel nampati sekalak jelma guna erlajar Pustaka janah totokenndu ka ia. Tapi lalap la idalankenna kai si pelajarina. Dungna, arus kena ngadi erlajar Pustaka. Ntah banci saja lenga pernah sampatindu kalak erlajar Pustaka seh ngasa ia iperidiken. Arus nge salah akapndu bandu, janah la akapndu pasu-pasu Jahwe pendahinndu sanga erberita? Bas artikel enda sibahas kari dua penungkunen enda: (1) Kai buktina maka dahinta erberita enggo berhasil? (2) Uga arusna perukurenta kerna dahin erberita?

5. Engkai maka banci saja labo kita lalap berhasil bas dahin erberita bagi si enggo siarapken?

⁵ Ikataken bas Pustaka kerna kalak si ngelakoken peraten Dibata maka “berhasil me kerina si lakokenna.” (Ms. 1:3) Tapi, e labo ertina lalap sidat hasil si mehuli bagi si enggo siarapken. Kegeluhen manusia “dem kesusahen” perban kerina kita lit bas kesusahen. (Jop 14:1) Selain si e, kalak si nentang kita pe mon-mon berhasil ia erban kita lanai bebas erberita. (1 Kor. 16:9; 1 Tes. 2:18) Emaka, kai nge si erban dahin erberita berhasil iakap Jahwe? Guna njawap penungkunen e, mari sibahas piga-piga prinsip Pustaka.

6. Kai si erban pendahinta erberita berhasil iakap Jahwe?

⁶ Iperdiateken Jahwe kerja kerasta ras sipatta si megenggeng. Ianggap Jahwe kita berhasil adi semangat kita erberita perban keleng ateta Jahwe, la soal uga pe tanggapen kalak. Itulis Paulus bagenda, “Dibata labo la adil, emaka labo lupakenNa perbahanen kena bage pe kekelengen si buktiken kena guna gelarNa alu ngelayani kalak si badia ras terus ngelayanisa.” (Heb. 6:10) Amin pe banci saja la lit kalak si banci sisampati erlajar seh ngasa iperidiken, tapi inget Jahwe kerja kerasta ras kekelengen si enggo sibuktiken. Pernah bagenda nina Paulus man runggun i Korinti, “Kerja keras kena bas ngelayani Tuhan labo sia-sia.” Kam pe banci tek kerna si e amin pe hasil arah kerja kerasndu la bagi si arapkenndu.​—1 Kor. 15:58.

7. Kai si banci sipelajari arah kata-kata Rasul Paulus kerna pelayanenna?

⁷ Rasul Paulus eme sekalak utusen injil si luar biasa. Melala ibentukna runggun-runggun  si mbaru bas erbage-bage kota. Tapi, sanga lit kalak si mandangi ia ras katakenna ia labo guru si mehuli, uga nge tanggapenna? Labo kataken Paulus piga kalak si enggo sampatina jadi kalak Kristen, tapi itulisna bagenda, “Buen aku erdahin.” (2 Kor. 11:23) Bali bagi Paulus, perlu siinget maka si pentingna iakap Jahwe eme kerja kerasta ras sipatta si megenggeng.

8. Kai si arus siinget kerna pelayanenta?

⁸ Pelayanenta erban meriah ukur Jahwe. Isuruh Jesus 70 muridna mberitaken kerna Kerajan Dibata. Kenca mulih murid-murid e ‘meriah ukur’ kalak e. Engkai maka meriah ukur kalak e? Nina kalak e, “Malekat-malekat jahat pe patuh man kami sanga pake kami gelarndu.” Tapi isampati Jesus gelah benar cara rukur kalak e, nina, “Ula ermeriah ukur perban malekat-malekat jahat e patuh man kena, tapi ermeriah ukurlah perban gelar kena enggo itulis i surga.” (Luk. 10:17-20) Iteh Jesus maka labo pagi lalap luar biasa hasil pendahin kalak e. Memang payo, arah kerina kalak si ijumpai murid-murid e, labo siteh piga kalak si jadi kalak Kristen. Arus iteh murid-murid maka keriahen ukur kalak e labo itentuken tanggapen kalak. Tapi, meriah ukur kalak e perban enggo kerja keras kalak e ras meriah ibanna ukur Jahwe.

9. Menurut Galati 6:7-9, kai hasilna adi megenggeng kita bas pelayanenta?

⁹ Adi megenggeng kita bas pelayanenta, sidat pagi kegeluhen si rasa lalap. Adi tutus ateta ngambur benih Kerajan ras ngurussa, kita enggo “nuan sesuai ras sura-sura kesah si badia.” Engkai maka bage ninta? Perban sanga silakoken pelayanenta, nggit kita itegu-tegu kesah si badia. Amin pe lenga lit kalak si banci sisampati seh asa iperidiken, erjanji Jahwe maka bereNa pagi kegeluhen si rasa lalap man banta adi la kita nyerah.​—Baca Galati 6:7-9.

10. Engkai maka la seri tanggapen kalak man berita si meriah?

¹⁰ Tanggapen tiap kalak man berita si meriah itentuken isi pusuhna. Ijelasken Jesus kerna si e arah perumpaman kerna perjuma-juma si ngambur benih bas erbage-bage jenis taneh. Arah kerina benih e sada ngenca si erbuah. (Luk. 8:5-8) Ipeseri Jesus jenis-jenis taneh e ras pusuh kalak si megiken “kata Dibata.” (Luk. 8:11-15) Bali bagi perjuma-juma ndai, labo kita si nentuken perturah benih kebenaren bas pusuh kalak, tapi pusuh kalak e nge si nentukenca. Dahinta eme terus ngamburken benih kebenaren. Ikataken Rasul Paulus maka tiap kalak ‘alokenna pagi upah sesuai ras pendahinna masing-masing,’ labo sesuai ras hasil pendahinna.​—1 Kor. 3:8.

11. Engkai maka ianggap Jahwe Nuah “sekalak perberita kebenaren” si berhasil? (Nen gambar sampul.)

¹¹ Enterem umat Jahwe bas jaman Pustaka arus ngadapi kalak si la nggit megiken. Contohna eme Nuah. Enggo puluhen tahun dekahna ia ngelayani jadi “sekalak perberita kebenaren.” (2 Pet. 2:5) Pasti ngarap kel Nuah gelah nggit min kalak megiken berita si pesehna. Situhuna, labo pernah ikataken Jahwe maka bage pagi si terjadi. Tapi, sanga isuruh Jahwe iban Nuah bahtra, bagenda nina, “Arus kam masuk ku bahtra e, kam, anak-anakndu, diberundu, ras diberu anak-anakndu.” (Kej. 6:18) Selain si e, sanga ikataken Jahwe asa galangna bahtra si arus iban Nuah, banci saja enggo tehna maka labo pagi kerina kalak nggit megiken ia. Perban adi kerina kalak e megiken ia, labo siat bahtra e. (Kej.  6:15) Memang payo, la lit kalak si nggit megiken Nuah. (Kej. 7:7) Amin pe bage, labo ianggap Jahwe enggo gagal Nuah bas pelayanenna. I lebe-lebe Jahwe, pelayanen Nuah enggo berhasil perban setia ia ngelakoken perentah Jahwe.​—Kej. 6:22.

12. Engkai maka Jeremia tetap ermeriah ukur bas pelayanenna amin pe itulak ras itentang kalak ia?

¹² Nabi Jeremia pe terus erberita lebih 40 tahun dekahna amin pe la begiken kalak ia janah lit ka si nentang ia. Pernah kang kitik kel ukur Jeremia perban “ihina ras itokohi” kalak ia, sempat ka ngadi atena ngelakoken tugasna. (Jer. 20:8, 9) Tapi, Jeremia la nggit nyerah. Kai si nampati Jeremia tetap ermeriah ukur bas ndalanken tugasna? Terus ukurina kai si penting eme: Si pertama, berita arah Dibata si ipesehna mereken “masa depan si arapken” kalak. (Jer. 29:11) Si peduaken, enggo ipilih Jahwe ia jadi wakilNa. (Jer. 15:16) Gundari pe kita sangana mpeseh berita si banci mereken arapen man kalak janah enggo pilih Jahwe kita jadi SaksiNa. Adi siukuri duana si penting e, banci tetap meriah ukurta la soal uga tanggapen kalak man beritata.

13. Kai si banci sipelajari arah perumpaman Jesus si itulis bas Markus 4:26-29?

¹³ Perlu waktu gelah banci kalak erkiniteken. Ajarken Jesus kerna si e arah perumpamanna kerna kalak si ngambur benih si tunduh paksa berngi. (Baca Markus 4:26-29.) Kenca amburkenna benih e, alu manjar-anjar turah me benih e, janah la banci iban si ngambur benih e reh terna perturahna. Banci saja kita pe arus ndekah nimai kalak si erlajar Pustaka nggit ndalanken si ipelajarina. Bagi perjuma-juma si la banci ipaksana perturah sinuan-sinuanna, kita pe la banci sipaksa gelah mis idalanken kalak si erlajar Pustaka si ipelajarina. Emaka adi kalak si erlajar Pustaka ras kam ndekah maka dalankenna si pelajarina, ula kitik ukurndu ras ula kam nyerah. Bali bagi perjuma-juma ndai, arus sabar kita bas nampati kalak si erlajar Pustaka.​—Jak. 5:7, 8.

14. Pengalamen kai si mbuktiken maka mon-mon ndekah maka nggit kalak megiken berita si meriah?

¹⁴ Bas piga-piga daerah banci saja turang seninata enggo ertahun-tahun erberita, tapi lenga lit sekalak pe si iperidiken. Cuba perdiateken pengalamen arah Gladys ras Ruby Allen. Bas tahun 1959, itugasken kalak e ngelayani jadi perintis biasa ku sada kota i provinsi Quebec, Kanada. * Perban pengaruh arah kalak si tading i je ras pengaruh arah Gereja Katolik, la kalak nggit megiken berita si meriah. Ikataken Gladys maka dua tahun dekahna erberita kalak e arah rumah ku rumah, waluh jam sada wari, tapi la lit sada pe si mbukaken pintu. Sanga idah kalak denga pe turang seninata e, mis tutupna tiraina. Tapi Gladys ras Ruby la nyerah. Dungna, enggo mulai mehuli tanggapen kalak janah lit ka si nggit megiken berita si meriah. Gundari, enggo lit telu runggun bas kota e.​—Jes. 60:22.

15. Kai si banci sipelajari arah 1 Korinti 3:6, 7 kerna dahin erban murid?

¹⁵ Pendahin erban murid eme pendahinta ras-ras. Kerina kita bas runggun lit baginta nampati kalak si erlajar Pustaka seh ngasa iperidiken. (Baca 1 Korinti 3:6, 7.) Sekalak perberita banci saja mereken risalah ntah pe majalah man kalak si nggit megiken beritata. Perban la sempat idahina mulihi, suruhna perberita si deban si ndahisa. Dungna, erlajar Pustaka kalak e. Iajak perberita e turang senina si deban mandu  pelajaren e. Kerina kalak e mereken semangat man si erlajar e alu erbage-bage cara. Kerina turang senina si ikut nampati si erlajar e ikut niram benih kebenaren bas pusuhna. Alu bage, terjadi me bagi si ikataken Jesus, kalak si ngambur benih ras kalak si mperanisa ras-ras ermeriah ukur sanga si erlajar Pustaka e iperidiken.​—Joh. 4:35-38.

16. Amin pe lanai banci bagi si mbarenda si ilakokenndu bas pelayanen, engkai maka banci kam tetap ermeriah ukur?

¹⁶ Banci saja lanai bagi si mbarenda si banci ilakokenndu bas dahin erberita ras ngajar, perban enggo urak gegehndu ntah pe kesehatenndu. Tapi banci kam tetap ermeriah ukur perban ikut kam bas dahin erberita i belang-belang doni. Cuba perdiateken pengalamen Raja Daud. Bas sada wari, ia ras anak buahna arus nelamatken keluargana si itaban kalak Amalek, janah arus ibuat kalak e mulihi barang-barangna. Lit 200 anak buah Daud si la ikut erperang perban latihsa akap kalak e. Dahin kalak e njaga barang ngenca. Kenca kalak Amalek enggo italuken, iperentahken Daud gelah barang si enggo ijarah kalak e ibagi rata man kalak si ikut erperang ras si njaga barang. (1 Sam. 30:21-25) Dahin erban murid pe bage. Banci saja si ilakokenndu bas dahin erberita la bagi si arapkenndu. Tapi, adi berekenndu si mehulina, banci kam tetap ermeriah ukur sanga lit kalak si nggit nandai Jahwe ras iperidiken.

17. Engkai maka ngata bujur kita man Jahwe?

¹⁷ Iteh Jahwe maka labo mungkin sipaksa kalak megiken kita ntah pe guna nembah Jahwe. Tapi, perdiateken Jahwe kerja kerasta ras kekelengenta si enggo sicidahken man baNa, janah pasti ipasu-pasuNa kita. Pasti ngata bujur kita man Jahwe perban banci silayani Ia, Dibata si perkeleng. Selain si e, iajari Jahwe kita uga carana gelah banci kita tetap ermeriah ukur la soal uga buena si banci silakoken bas pelayanen. (Joh. 14:12) Banci kita tek maka meriah ukur Jahwe ngidah kita adi la kita nyerah!