1. Ka san uagu wasandiragua woungua lau ugundani luma lau pantaü luagu gefentiña lan luagu Heowá wagía?

MA WAPANTA ani gunda ligía wasandiragun woungua luagu gefentiña lan luagu Heowá wagía! Barǘ wamuti liri Bungiu ani arufuda wamuti lani lan Gefentiña wagía dan le wapurichihan houn gürigia ani arufudaha wagía luagu houn. Hínsiñeti woun wíderaguniña gürigia “ha lúntiñabaña ibagari le magumuchaditi” (Adü. 13:48). Sandiguatiwa woungua kei lasandiragun Hesusu lungua, aba labuinchagüdüni sífiri sandu Hesusu lau ugundani lárigiñe hagiribudun disipulugu lídangiñe hapurichihan ani aba habahüdahani lun, lubuidun lidin houn (Luk. 10:1, 17, 21).

2. Ida liña warufuduni weiri lan lisudinin apurichihani woun?

² Wéiriti lisudinin apurichihani woun. Aba líchuguni apostolu Pábulu adundehani le lun Timotéu: “Góunigiguaba buáriuagua, luma lau le barufudahabei”. Ani ariñagayati lun: “Anhein badüga ítara, basalbaruba, salba hagíame giñe ha aganbubalibu” (1 Tim. 4:16). Arufudati dimurei le anihein lan ibagari lidan huraraü. Wéiriti wóunigiruni wagaburi ladüga subudi wamuti lílana lan Larúeihan Bungiu wagía. Súnwandan busén wamá lun buidu lan wóuserun lun wíchugun uéiriguni lun Heowá luma lun warufuduni afiñe wamá luagu uganu buiti le wapurichihabei (Fili. 1:27). Ténitiwa lun le warufudahabei lau waranserun buidu lubá wapurichihan ani amuriahatiwa luma Heowá lun líderaguniwa dan le woudin ayanuha luagu houn amu gürigia.

3. Ida liña burí hóunabun gürigia lun uganu luáguti Larúeihan Bungiu, ani ka hénpulu arufudubalin?

³ Gama lumoun, íbini wadügüni sun wayaraati lidan ministeriu, másiñati harufuduni gürigia ha lídanbaña fulasu le ñein lubéi wapurichihan meberesen hamá lau uganu le lánina Larúeihan Bungiu le wanügübei houn o lougua lan hebereserun lau. Samina wamá luagu íbiri Georg Lindal, le apurichihabei lábugua lidan  sun Islandia lúmagiñe irumu 1929 darí irumu 1947. Ígirati saragu milu agumeiraguagüdüni háhaburugun gürigia, gama lumoun, úatiña ni aban adügagutiña houngua Gefenti. Abürühati íbiri Georg: “Añahein hádangiñe mínsiñeti inarüni houn, ani saragu hádangiñe meberesenguntiña lau”. Lárigiñe aba hachülürün misionérugu tídangiñe Galaadü lun hídehan lidan apurichihani, lau sun lira meberesegúntiña gürigia hau. Chülüdüga buga dan, lárigiñe nefu irumu áfaaguni añahein hádangiñe gürigia ha lídanbaña ageiraü aba hederegeruni habagari lun Heowá ani badisei hagía. *

4. Ida luba wasandiragun woungua dan le maha hamá gürigia lun uganu le wapurichihabei?

⁴ Magundantiwa dan le hamahadun gürigia lun uganu le wapurichihabei. Gayaraati lasuseredun woun kei lun Pábulu, le ariñagubei “wéiriti nirun, ani súnwandan anihein lan gáriti tidan nanigi” ladüga máhatiña huríu hánharun Hesusu lan Mesíasibei le füramasewabei (Rom. 9:1-3). Ánhawati arufudaha lun aban gürigia, ani mawanserunti íbini áfaagua wamá ani furíei wagía, ani lárigiñe mosu wadüraaguni wíchugun aturiahani lun? Ida liñati anhein míderagugidiwa lubéi aban gürigia lun labadiseirun? Lunti san wasandiragun woungua lau duru, o wasaminarun mabinirun lani Heowá wáfaagun? Lidan aturiahani le wóunabubei bián álügüdahani le: Ida luba wasubudiruni anhein buídubei lubéi lidin woun lidan wani ministeriu? ani ka lunbei gabaroun wamani?

5. Ka uagu mama lubéi súnwandan lun lasalirun sun le wadügübei lun Heowá kei le aubei wagurabei?

⁵ Dan le tayanuha Bíbülia hawagu gürigia ha adügübalin lugundan Bungiu, ariñagatu: “Buíduti lidin houn lidan sun le hadügübei!” (Sal. 1:3). Ligíati, mama sun le wadügübei lun Heowá lasaliruba lan kei le aubei wabusenra. Adügati wachara luma hachara amu lun labuinchun ibagari “lau idiheri” (Hob. 14:1). Gayaraati giñe hadügün wáganiñu lun mapurichihan wamá kei le aubei wabusenra luagu fiu dan (1 Ko. 16:9; 1 Tesa. 2:18). Ligíati, ida liña larihini Heowá buidu lan lidin woun lidan ministeriu? Ariha wamá adundehani tídangiñeti Bíbülia le gayaraabei líderaguniwa óunabei álügüdahani burí le.

6. Ida liña larihini Heowá lubuidun lidin woun lidan wani ministeriu?

⁶ Téniti Heowá lun wáfaagun luma lun awanduni le warufudubei. Lun Heowá, buiti lidin woun lidan wani ministeriu anhein wadüga lau ubebeni luma ínsiñeni meberesenga ida liña lan hóunabun gürigia. Abürühati Pábulu: “Richaguati Bungiu, ani mabulieidun lubéi le adüga humaalibei, luma ínsiñehabuni le arufuda humaalibei lun lau híderaguniña hiduheñu luagu afiñeni, katei le áünhaguabei adüga” (Ebü. 6:10). Mabulieidun lumuti Heowá wáfaagun ni ínsiñeni le warufudubei luagu liri, íbini anhein wuriba lubéi lidin woun. Ligíati, gayaraati wayusuruni dimurei le lariñagubei Pábulu houn kristiánugu ha Korintubaña: “Lugundun subudi humuti  luagu mama lan luagu ni kata hadügei wadagimanu le hadügübei lidan aban luma Wabureme” (1 Ko. 15:58). Ítara liña katei le íbini móunabun hamá gürigia kei le aubei wabusenra.

7. Ka wafurendeirubei lídangiñe le lariñagubei apostolu Pábulu luagu lani ministeriu?

⁷ Aban meha misionéru buiti apostolu Pábulu ani gumeseti saragu damuriguaü lidan saragu uburugu. Íbini ítara, dan le hayanuhabei fiu kristiánugu ha asandiragubaña houngua íñugu luéi ani ariñaga hagía mama lan aban máisturu buiti ligía, mayanuhanti luagu átiriñanu lan gürigia lanügün lidoun badisei. Lubaragiñe lira, ariñagarügüti: “Nadagimeinhaadina sügǘ hau” (2 Ko. 11:23). Sigí waméi lani Pábulu hénpulu ani aritagua waméi létima lan súdinibei lun Heowá áfaaguni le wadügübei luma wawandun.

8. Ka lunbei waritaguni luagu wani ministeriu?

⁸ Gudagüda lumuti wani ministeriu Heowá. Luagu aban dan, aba lóunahan Hesusu 70 disipulugu apurichihei uganu luáguti Larúeihan Bungiu. Dan le hagumuchubei, aba tariñagun Bíbülia: “Aba hagiribudun [...] lídangiñe haweiyasun lau ugundani”. Ka san uagu gunda habéi? Ariñagatiña: “Íbini sífirigu wuribatiña aganba hamutiwa dan le wasagaruniña lidan biri”. Gama lumoun, aba lererehan Hesusu houn lau dimurei le: “Magundaara humá luagu haganbunün sífirigu wuribatiña, gunda humá luagu anihein lan hiri bürüwañu sielu” (Luk. 10:17-20). Subudi lumuti Hesusu mámaba lan súnwandan lasuseredun katei le wéirigüdati anigi lidan hani ministeriu. Lau sun lira ibidiñeti woun átiriñanu lan gürigia ha aganbubaliña disipulugu adügagutiña houngua kristiánugume. Lunti meha hasandiragun disipulugu houngua gúndaañu mámarügü ladüga aganba hamaniña gürigia, lunti hasandiragun houngua ítara luágutima gunda lan Heowá luagu áfaaguni le hadügübei.

9. Según Galasiana 6:7-9, kaba wibiha ánhawa mígirun wamá apurichihani?

⁹ Anhein mígirun wamá wapurichihan, wibihiba ibagari magumuchaditi. Dan le wadügüni sun wayaraati lidan wáfaagun lun wábunaguni luma lun walubahani lila inarüni, wábunaguñein giñe lau wasaminarun luagu “katei le layumahan” sífiri, lugundun ígiratiwa lun ladundehani sífiri sandu wabagari kei le aubei labusenra. Anhein lubeiti “mabuchadun wawagu” füramaseti Heowá líchugunba lan ibagari magumuchaditi woun, íbini mibihin wamá wíderagun aban gürigia lun labadiseirun (aliiha huméi Galasiana 6:7-9).

10. Ka adügübei lun hóunabun gürigia lun uganu le wapurichihabei houn?

¹⁰ Según le tídanbei hanigi gürigia ítara liña ligaburi hóunabun. Afuranguagüda lumuti Hesusu inarüni le lidan abahüdaguni le labahüdahabei luáguti aban ábunaguti. Lidan abahüdaguni le, aba lábunagun aban wügüri ilaü lidan ámuñegueinarügü luwuyeri múa, gama lumoun le ábürühabei lidoun múa buiti, ligía agindunbei (Luk. 8:5-8). Ariñaga lumuti Hesusu le mini lubéi ámuñegueinarügü luwuyeri múa, mini lan hanigi gürigia ha óunabubaña lidan ámuñegueinarügü igaburi tun “Lererun Bungiu” (Luk. 8:11-15). Ítara kei lasuseredun lun ábunaguti, mama wagía gabafubei luagu dasi le wadügübei, según le tídanbei hanigi gürigia ha aganbubaliwa. Le wadasinbei, lun wasigirun ábunaguei ilaü le lánina uganu luáguti Larúeihan Bungiu. Kei lariñaguni apostolu Pábulu: “lafayeirubei [...] Bungiu kada aban según luwuyeri leseriwidun lun”, mama según ida liña lan lidin lun (1 Ko. 3:8).

11. Ka uagu gayara lubéi wariñagun buidu lan lidin lun Noé kei “le apurichihabei houn gafigountiña”? (Ariha huméi dibuhu le luágubei tidáü garüdia).

¹¹ Lidan sun dan le sügühalibei hapurichihaña saragu lubúeingu Heowá houn gürigia ha maganbunñaha hamagili luganute. Kei hénpulu apurichihati Noé houn gafigountiña, másiñati luagu lan saragu irumu (2 Fe. 2:5). Chóuruti aguraba lan meha haganbubei lan gürigia, gama lumoun, mariñagunti Heowá lun lasusereduba lan. Dan le líchugubei adundehani lun, lun ladügünu árüka, ariñagati lun: “Tidoun ugunei tuguya, hebeluruba birahüñü, búmari, bídiñugu, buguya” (Agu. 6:18). Dan le lariñagubalin Heowá lun Noé ida luba lan tiseisin árüka, lunti hamuga meha lasubudiruni Noé lóuguabaña lan gürigia aganbuti (Agu. 6:15). Ani ítara liña. Ni aban hádangiñe gürigia furundetiña hagía madügüntiña gasu lau uganu (Agu. 7:7). Saminati san Heowá moun lan Noé? Uá mítaranti. Lun Heowá buiti meha le ladügübei Noé ladüga adüga lumuti sun le lamuriahabei luma lau úaraguni (Agu. 6:22).

12. Ka ladügübei Heremíasi lun lagundaarun lidan apurichihani íbini magundan hamá gürigia lau ani éibaaha haméi?

 ¹² Apurichihati meha profeta Heremíasi luagu saragu irumu íbini magundan hamá gürigia ani éibaaha haméi. Adügati meha hanabuni luma bula le hadügübei lun, lun magundan lan darí lun lasaminarun lígiruni lidasin (Her. 20:8, 9). Gama lumoun mábürühanti larüna. Ka san íderagubalin lun lagidaruni luriban saminaü le luáriua luma lun lagundaarun lidan lapurichihan? Lau letenirun lun bián katei. Furumiñe, ladüga gayara lan líchuguni uganu lúmagiñeti Bungiu le lanügübei houn gürigia, aban lubuidun ámuñegü “buin lau emenigini” (Her. 29:11). Ani libiaman, Heowá anuádirubalin lun lanügüni liri (Her. 15:16). Barǘ wamuti uganu lánina emenigini houn gürigia lidan aban ubóu búrigati ani barǘ wamuti giñe liri Heowá ladüga lani wamá Gefentiña. Dan le wetenirun lun bián katei súdiniti le, gúndaatiwa lidan wapurichihan, meberesenga ida liña lan hóunabun gürigia.

13. Ka larufudahabei le labahüdagubei Hesusu lidan Márükosu 4:26-29 woun?

¹³ Barüti dan labuiduragüdüni gürigia lumadagu luma Bungiu. Arufudaha lumuti Hesusu inarüni le dan labahüdagun luáguti ábunaguti le arumugubei (aliiha huméi Márükosu 4:26-29). Murusun murusun larihini ábunaguti ida liña lan lidin lun lau áfaaguni le ladügübei ani siñati ladügün ni kata lun laweiridun nadü lau lóufudagun. Ítarameme, gayaraati lásügürün ítaga dan lun warihini líchuguni aban aturiahati lidan libagari le lafurendeirubei, lugundun murusun murusun awansereina lan gürigia. Ítara kei siñá lan ladügün aban ábunaguti lun laweiridun nadü lau lóufudagun, siñati giñe wafosuruniña áturiahatiña lun hawanserun lau lóufudagun kei le aubei wabusenra, lugundun murusun murusun lawanserun aban gürigia. Ligíati, mábürühan lan warüna ani mahirudagun wagíame anhein darasa lubéi lawanserun le aturiahabei wama lóugiñe le wagurabubei. Mégeiti gürigia gurasu dandu dan le lábunagun ítara kei dan le ladügün disipulugu (Sant. 5:7, 8).

14. Ka hénpulu arufudubalin gayara lan lásügürün saragu dan lubá burí hagumeserun gürigia aganbawa?

¹⁴ Lidan burí fiu fulasu, sügüti irumu ani úatiña ni aban óunabutiña lun uganu le wapurichihabei. Ariha waméi le asuseredubei tun Gladys luma tun Ruby Allen, bián íbirigu gamulenuguátiña kanadáana. Lidan irumu 1959, aba hounahóun lidan aban uburugu lóubawagu Quebec kei prekursorugu ha adügübaña 70 oura luagu hati. * Hanufudetiña meha gürigia hawéi tufadirin ligilisi katolika luma luéi le lubei hariñaguni gürigia, ligíati maganbun habaliña gürigia wábirigu dan le houdin apurichiha houn. Ariñagatu Gladys: “Apurichihatiwa muna tuagu muna widü oura luagu weyu ani lidan bián irumu, úatiña aganbutiwa. Ariaharügü hamutiwa luéigiñe lufunederan bena ani aba hadouruni. Gama lumoun mígiruntiwa lun labürühan warüna”. Lau lásügürün dan aba abuidureina lan hagaburi gürigia hagía ani aba buidu hali  lan lapurichihóuniwa ñein. Uguñe weyu, anihein ǘrüwa damuriguaü lidan fulasu ligía (Isa. 60:22).

15. Ka larufudahabei 1 Korintuna 3:6, 7 woun luáguti dasi le lánina hadügün disipulugu?

¹⁵ Aban dasi le adügǘbei úara hadügün disipulugu. Ariñawagúati mégeiwa lan aban damuriguaü lun líderawagun aban gürigia lun labadiseirun (aliiha huméi 1 Korintuna 3:6, 7). Kei hénpulu, gayaraati lígirun aban íbiri aban tratadu o aban garüdia lun aban gürigia le arufudubei busén lan lafurendeirun. Ábati líchugun íbiri fe siñabei lan lagiribudun abisidahei gürigia ligía ladüga lóurate. Ábati lamuriahan ídemuei luma amu íbiri. Aba lagumeserun íbiri ligía, íchiga aturiahani lun gürigia ligía ani aba lamisurahan ámuñegueinarügü íbirigu lun houdin luma íchiga aturiahani ani kada aba rútiña gurasu lun aturiahati. Kada aban íbiri le lasubudirun aturiahati ídehati lun láturaguni ilaü le lánina inarüni. Ítarati kei lariñaguni Hesusu, dandu ábunaguti kei alubahati gayaraati hagundaarun úara lau hadarirun gürigia lun Bungiu (Huan 4:35-38).

16. Íbini lalouguaduña lan here ani laribaduña lan hátuadi, ka uagu gayara lubéi hasandiragun hungua lau ugundani lidan le hadügübei lidan ministeriu?

¹⁶ Ánheinti siñaali lubéi hapurichihan ni harufudahan kei meha hadügüni luagu aban dan ladüga lóuguaali lan here o mabuidunhali lan hátuadi? Íbini ítara gayaraati hasandiragun hungua gúndaañu luagu le gayaraabei hadügüni lidan háluahoun gürigia. Ariha waméi le asuseredubei dan le lagañeirubaliña urúei Dawidi amaléküna ani ibiha laaña liduheñu hárigoun luma sun le híweruhabei amaléküna hawéi. Aba herederun bián san wügüriña ha buchaañabaña uagu óunigirei hálagu ha ñǘdünbaña awuribuha. Lárigiñebei wuribu, aba lariñagun Dawidi lafareihounba lan le ibihibei lidan wuribu hadan súngubei (1 Sam. 30:21-25). Uguñe weyu, susereti aban katei ítarati lidan hadügǘn disipulugu lidan sun ubóu. Sun wagía le íchugubalin sun le buídutimabei wámagiñe lun Heowá, íbini huguya, gayaraati wagundaarun úara sagü lesefuruniwa aban gürigia ani íderawagua ligía lun léibugun lídangiñe üma le anügübei lidoun ibagari magumuchaditi.

17. Ka uagu gayara lubéi wíchugun seremei lun Heowá?

¹⁷ Rútiwa seremei lun Heowá ladüga hínsiñeti ani gebegiti eseriwiduni le wadügübei lun. Subudi lumuti luagu siñati lan ladügün áfaaguni le wadügübei lun buidu lan lidin woun, gama lumoun teniti lun dasi le wadügübei lau saragu ínsiñeni, ani líchuguba wafayeiruaha luagu lira. Arufudahati giñe woun lun gunda wamá lau le wayaraabei adüga lidan óunwenbu alubahani le (Huan 14:12). Chouru waméi: gúndaabei lan Bungiu wau anhein mábürühan warüna.