1. Ngu yihi lungelo hi ku nayo?

LITSAKO la hombe kuva Tifakazi ta Jehovha! Athu hi rwate ditina da Jehovha ni kutshumela hi di fakazela ngu kutxhumayela ni kumaha vagondiswa. Ha tsaka ngako hi txi vhuna m’thu awu aku “ni fanelo ya wutomi wo mbi guma” ti to e va fakazi. (Mith. 13:48) Ha tipfa kufana ni Jesu awu a nga “tala ngu kutsaka” mbimo ayi vagondiswa vakwe va nga wuya va di tsakile ngu kuva va di mani vathu vavangi vo tsakela.—Luka 10:1, 17, 21.

2. Hi nga kombisisa kutxani ti to ha teka m’thumo wo txhumayela i di wa lisima ngutu?

² Athu hi teka m’thumo wo txhumayela i di wa lisima ngutu. Mpostoli Paulo a kuzetile Timoti atxi womba tiya: “Ti wonele upune, u txi xola ni gondo yi u gondisako.” A tshumete a txi womba tiya: “Ngako u txi maha toneto, u na ti hanyisa awe ni va va kuengisako.” (1 Tim. 4:16) Phela wutomi wa vathu wu ha txibeheni. Athu hi xolisisa gondo ayi yi gondisako ngu ku hi emela mfumo wa Txizimu. Athu hi hanya ngu nzila yi yi tisako wudhumo ka Jehovha ni kutshumela yi kombisa ti to mahanyelo athu mayelano ni ti hi ti gondisako. (Vaf. 1:27) Hi tshumela hi kombisa ti to ha “xola ni gondo yi hi gondisako” ngu kululamisela khakwati hi si se ya kutxhumayelani ni ku tshumela hi kombela Jehovha kuva e katekisa hi si se ku ya txhumayela vamwani.

3. Ngu txihi txikarato atxi hi nga mananako natxo ka mthumo wo txhumayela? Ningela txikombiso.

³ Hambi i di ti to ha maha totshe ti hi nga ti kotako ka m’thumo wo txhumayela hi nga thuka hi si mani vo tsakela mwendo kumana va vadotho ka teritorio yathu. Wona txikombiso txa mwanathu Georg Lindal, awu a nga txhumayela ekha ka di tiko da Islândia kukhukhela ngu 1929 kala 1947. Ene a ningete mabhuku o tala kambe nem wammweyo a nga tumela ditshuri. Ene a bhate tiya: “Vamwani va txo so kaneta ditshuri aniko vamwani va txo mbi kombisa kutsakela.” Hambi ngu msana ku nga gwita kurumelwa varumiwa va nga gonda ka txikolwa txa Gileadhi  ti to ve va vhuneta, ti lavile ve ya heta 9 wa malembe i di kona ku nga maneka vathu vo ti ningetela ka Jehovha ni kubhabhatiswa. *

4. Hi tipfisa kutxani ngako vathu va si tsakeli mahungu a manene?

⁴ Ha karateka ngako vathu va si kombisi ku tsakela mahungu a manene. Hi nga tipfa ku fana ni Mpostoli Paulo awu a nga womba tiya: “Na pfa kuxaniseka ka hombe ni kupandiseka ko mbi guma.” Ene atxi tipfisa toneto nguko Majudha o tala ma si tumeli ti to Jesu i ti Mesiya awu a nga ti thembisilwe. (Var. 9:1-3) Se hani ngako u di mahile mizamo yo vhuna ni kukhongelela txigondo ti to txi kula ngu didhawa da moya kambe ti si koteki, ti sunga ti to u ema kutsimbitisa txigondo txonetxo. Hani ngako u si khali kuvhuna m’thu ti to e hokelela ko bhabhatiswa? Ina u fanete kutipfa mnando? U txi pimisa ti to Jehovha kha katekisa m’thumo wako? Ka gondo yi ya hi na xamula siwotiso siya sa simbidi: (1) Nji txani txi kombisako ti to ha humelela ka m’thumo wathu wo txhumayela? (2) Ngu kutxani hi di fanete kuemela totshe ka m’thumo wathu wo txhumayela?

5. Ngu kutxani mbimo yimwani mthumo wathu ka Jehovha wu si hi wuyiseli mihando ayi hi yi emelako?

⁵ Bhiblia yi womba ti to m’thu wu a mahako kuranda ka Txizimu “totshe ti a ti mahako ta bhindula.” (Mas. 1:3) Kambe eto kha ti wombi ti to totshe ti hi ti mahako hi txi mahela Jehovha, totshe ti na maheka nga ti hi ti lavisako tona. Wutomi wu “tate ngu sikarato” ngu kona ha ka kwa mba hetiseka kwathu ni ngu mhaka ya tiphazamo ta vamwani. (Jobe 14:1) I si nga eto dwe, vakaneti mbimo yimwani va humelela ko vhinganyisela m’thumo wathu kasi ku hi si wu mahi nga ti hi ti lavisako tona. (1 Vak. 16:9; 1 Vat. 2:18) Se masoni ka Jehovha ngu tihi ti kombisako to ha humelela? He wone matshina a milayo a Bhiblia aya ma no hi vhuna kuxamula txiwotiso txiya.

6. Ngu tihi ti hi nga ti mahako kasi ku Jehovha e hi wona hi txi humelela ka m’thumo wathu?

⁶ Jehovha a tsakiswa ngu mizamo ni ku timisela kwathu. Jehovha a tiwona hi txi humelela ka m’thumo wathu ngako hi txi wu maha ngu kuhiseka ni lirando. Ti si nga ni mhaka ni nzila yi vathu va angulako ngu yona. Paulo a bhate tiya: “Txizimu kha txi nga ni tshofu. Kha txi na kudivala m’thumo wanu, ni lirando li mi nga li kombisa ka ditina da txona anu mi nga thumela vasawuleki va txona, avava ni konkuwa, mi va thumelako.” (Vaheb. 6:10) Jehovha wa khumbula mizamo ni lirando ali hi li kombisako ti si nga ni mhaka ni ti to m’thumo wathu wa veka mihando ya yinene mwendo nem. Ngu toneto, awe u nga tsaniswa ngu mapswi a mpostoli Paulo aya a nga gela Vakorinto a txi khene: “Masoni ka Mkoma,” m’thumo wanu hi nga wa mahala ti si nga ni mhaka ni ti to ha mana wuyelo yi hi nga ti yi rinzela ka m’thumo wathu mwendo nem.—1 Vak. 15:58.

7. Hi gonda txani ka nzila yi mpostoli Paulo a nga txi wona ngu yona m’thumo wakwe wo txhumayela?

 ⁷ Mpostoli Paulo i ti murumiwa awu a nga ti thuma ngutu, ene a vhunetile ko simekwa ka mabanza o tala ka madhoropa o hambana-hambana. Kambe mbimo yi vathu vamwani va nga txi m’wona nga a si faneli kuva mgondiswa wa Kristu ene kha wombawomba ngu mtengo wa vathu va a nga va vhuna ti to ve ta ha ditshurini. Kambe ene a wombile ti to a txi “va pala ngu mithumo.” (2 Vak. 11:23) Kufana ni mpostoli Paulo nanawe khumbula ti to Jehovha a tsakiswa ngu mizamo ni kutimisela kwako.

8. Ngu tihi ati hi fanelako ku ti khumbula mayelano ni m’thumo wathu wo txhumayela?

⁸ M’thumo wo txhumayela wa tsakisa Jehovha. Jesu a rumete 70 wa vagondiswa ti to ve ya txhumayela. Mbimo yi va nga wuya, vona va wuyile “va txi tsaka.” Ngu tihi ti nga ti va maha ve tsaka? Vona va wombile tiya: “Hambi mimoya yo biha yi ti hi thava ngu mhaka ya ditina dako.” Kambe Jesu ava kawukile atxi va gela tiya: “Mi nga tsakeni ngu kuva mimoya yi mi thava, aniko tsakani nguko matina anu ma bhatwe nzumani.” (Luka 10:17-20) Jesu atxi ti ziva ti to hi nga mbimo yotshe vagondiswa vakwe va no mana simahakalo so xamatisa ka m’thumo wawe wo txhumayela. Phela kha hi ti zivi ti to va ngani va nga engisa mahungu a manene va nga gwitisa kuva Makristu. Se vagondiswa va ti fanete ku ve tsaka i si nga ngu simahakalo si si nga ti va humelela so xamatisa, kambe ngu kuziva ti to Jehovha atxi tsaka ngu mizamo yi va nga ti yi maha yo txhumayela.

9. Ngu kuya ngu dibhuku da Vagalatiya 6:7-9, ngu yihi wuyelo yi no manwa ngu vale va timiselako ka m’thumo wo txhumayela?

⁹ Ngako hi txi timisela ka m’thumo wathu wo txhumayela hi na mana wutomi wo mbi guma. Mbimo yi hi phayako ni kutshumela hi sakulela timbewu ta mfumo ngu mbilu yathu yotshe hi tshumela hi txi ‘phaya so tsakisa Moya’ ngu kutumelela Moya wo sawuleka ti to wu thuma ka wutomi wathu. Ngako hi si “rereki” ni kusimama hi “timisela,” Jehovha a na hi ninga wutomi wo mbi guma ti si nga ni mhaka ni ti to ha vhuna m’thu ku e va Kristu mwendo nem.—Lera Vagalatiya 6:7-9.

10. Ngu kutxani vathu vamwani va txi engisa mahungu a manene, kambe vamwani va si engisi?

¹⁰ Kutsakela mahungu a manene ti na ya ngu ti m’thu aku ngu tona mbiluni kwakwe. Jesu a txhamusete mhaka yiya ka txidinganiso txiya a nga txi womba txa mphayi, awu a phayako timbewu ka mafu o hambana-hambana, aha yi ku ya kula ka lixaka limwelo dwe la mafu. (Luka 8:5-8) Timafu tiya to hambana-hambana ti emela nzila yi vathu va angulako ngu yona ka mahungu aya ma ku ka “Dipswi da Txizimu.” (Luka 8:11-15) Kufana ni mphayi athu hi nge tizivi ti to ngu yihi mbewu yi no veka mihando, ngu ku eto ti na ya ngu ti mbilu ya m’thu yi ku ngu tona. M’thumo wathu ngu simama hi phaya mbewu ya yinene ya mfumo. Nga ha Mpostoli Paulo a nga womba ngu kona “mmwani ni mmwani a na tshungulwa madingano ni m’thumo wakwe” i si nga ngu mihando ya m’thumo wakwe.—1 Vak. 3:8.

11. Ngu kutxani Jehovha a nga txi wona Nowa kota mtxhumayeli awu a ngati humelela ka m’thumo wakwe? (Wona mfota wa kapa.)

¹¹ Tifakazi ta kale ta Jehovha ni tona ti mananile ni kwa mbi engiswa mbimo yi ti nga ti txhumayela. Ngu txikombiso Nowa i ti “mruruteli wa wululami” kudingana malembe o tala. (2 Pedro 2:5) Ti hakubasani ti to a ti navela ku vamwani va ndi na engisa, kambe Jehovha kha gela Nowa ti ti ndi na maheka. Mbimo yi a nga gela Nowa ti to e aka ngalava a mgete tiya: “U na wulela awe mu ngalavani awe ni vanana  vako, ni msikati wako ni vasikati va vanana vako.” (Gen. 6:18) Kambe mbimo yi Jehovha a nga gela Nowa mamedhidha a ngalava ti nga maha adi ti woni to ku sa maneka wukhalo wa hombe ti to vamwani ve wulela. (Gen. 6:15) Ngu magwito kha ngaho ni wamweyo awu a nga engisa kutxhumayelwa ngu Nowa. (Gen. 7:7) Ina Jehovha a wone Nowa kota m’thu wu a nga mbi maha kwati m’thumo wakwe? Ahim-him! Ka Jehovha Nowa a humelete ka m’thumo wakwe wo txhumayela ngu ku a mahile totshe ati Jehovha a nga mkombela ku a ti maha.—Gen. 6:22.

12. Mprofeti Jeremiya atxi li manisa kutxani litsako ka m’thumo wakwe hambi ku vathu va nga txi kaneta?

¹² Mprofeti Jeremiya nene a txhumayete kudingana malembe o tala, kambe atxi kanetwa ni ku vathu va si tsakeli. Ene a godhote ngutu nguku atxi ‘ruketelwa’ ngu vakaneti ati ti nga maha e za e pimisa kuleka m’thumo wakwe. (Jer. 20:8, 9) Kambe Jeremiya kha rereka. Nji txani txi nga mvhuna ti to e xula txikarato txiya ni ku mana litsako ka m’thumo wakwe? Ene a vekile mapimo ka timhaka timbidi ta lisima. Yo khata, didungula adi Jeremiya a ngati txhumayela di txi pata “wumangwana wo tsakisa ni themba.” (Jer. 29:11, NM) Txa wumbidi, Jehovha a ti rwekile Jeremiya ditina dakwe. (Jer. 15:16) Nanathu hi txhumayela didungula adi di ku ni themba ka vathu va va karatekako ni ku hi rwala ditina da Jehovha kota tifakazi takwe. Ngako hi txi veka mapimo ka timhaka tiya ta timbidi ta lisima hi na mana litsako hambi vathu va si tsakeli.

13. Hi gonda txani ka txidinganiso txa Jesu atxi txi ku ka Marku 4:26-29?

¹³ Kukula ngu didhawa da moya ti maheka kudotho-kudotho. Jesu a gondisile ditshuri diya ka txidinganiso txakwe txa mphayi. (Lera Marku 4:26-29.) Mbewu yi m’thu a phayako yi kula kudotho-kudotho na a si yi woni ni kukula. Ngu ha kufanako ti nga maha u si yi woni mihando ya mthumo wako wo maha vagondiswa ngu ku ti teka mbimo ti to eto ti maheka kudotho-kudotho. Kufana ni m’dimi awu a si ti kotiko kusinzisa ku timbewu ti kula ngu ha ati lavako ngu kona, nanathu hi nge sikoti ku sinzisa txigondiana ti to txi kula ngu didhawa da moya nga ha hi nga ti navelako ngu kona. Ngu toneto u nga godholi mwendo ku rereka, ngako u txi wona nga txigondiana txako kha txi kuli ngu ha u nga txi lava ngu kona. Kufana ni mphayi, kumaha vagondiswa ni kona ti lava hi timisela.—Jak. 5:7, 8.

14. Ningela txikombiso txi kombisako ti to wuyelo ya m’thumo wathu yi nga swela ku woneka.

¹⁴ Ka makhalo mamwani ti nga swela kuwona bhindulo ya m’thumo wathu wo txhumayela. Ngu txikombiso wona txikombiso txa mwanathu Gladys ni Ruby Allen, i nga ti mkoma ni txinanda ava va nga avelwa ku ya thuma kota va nyaphandule vo sawuleka ngu 1959 ka didhoropa da Quebec khe Canadá. * Vathu vo tala va si ti lavi kuengisa mahungu a manene ngu kuthava maxaka ni kuthava vafundisi va txhetxhe ya katolika ayi yi nga ti ñote ditiko dile. Gladys a womba tiya: “Hi txi tsimbila ngu mti ni mti hi txi heta 8 wa maora ngu ditshiku kudingana malembe mambidi, kambe nem wammweyo a nga txi engisa. Mbimo yi hi nga txigogota matimba, va txi hi vhalela matimba kumweko ni majanela. Kambe athu kha ha rereka.” Ngu kutsimbila ka mbimo vathu va txitxile se ve khata kuengisa mahungu a manene. Konkuwa ku ni mabanza a mararu ka didhoropa dile.—Isaya 60:22.

15. Dibhuku da 1 Vakorinto 3:6, 7, di hi gondisa txani mayelano ni m’thumo wo maha vagondiswa?

¹⁵ Hotshethu ha pateka ka m’thumo wo maha vagondiswa. Dibanza dotshe di nga pateka ko  vhuna m’thu e hokelela ko bhabhatiswa. (Lera 1 Vakorinto 3:6, 7.) Muhuweleli a nga ningela txiphephana mwendo direvhista ka m’thu wu a tsakelako. Se mwanathu eneyo e wona ti to kha na mbi sikota kutshumela endela m’thu wule a nga kombisa kutsakela, se a kombela muhuweleli mmwani ku e mu endela. Muhuweleli eneyo ti nga maha aya khata txigondo txa Bhiblia. Se a nga ramba vanathu vamwani kasi ku ni vona ve ya ka txigondo txile. Mmwani ni mmwani a na ya kuzeta txigondo ngu nzila yakwe yo hambana. Vanathu vale va vhuneta muhuweleli kutheletela mati ka mbewu yile. Ngu nzila yoneyo nga ha Jesu a nga womba ngu kona, mphayi ni mueluli va tsaka kumweko ka kuelula ka moya.—Joh. 4:35-38.

16. Ngu kutxani hi nga manako litsako ka m’thumo wathu wo txhumayela, hambi hi txi manana ni sikarato sa malwati?

¹⁶ Ti nga maha awe u si mahi to tala ko txhumayela ni kumaha vagondiswa ngu kona ha ka malwati. Hambi keto u nga simama u mana litsako ka tonti u ti mahako ka m’thumo wuwa wo txhumayela. Wona txikombiso txa mkoma Dhavhidha, mbimo yi ene ni vavamna va a ngati navo va nga hulukisa maxaka awe ni timwaya tawe ka Vaamaleki, kona mu ka 200 wa vavamna va ti karate ngutu se wona to i tshuku ku sala msana ve wonelela simaha. Kambe msana kova Dhavhidha adi ganyile yimbi ene a ningete mkongomiso wa ti to asi si nga handwa ve abana votshe ngu kufana. (1 Sam. 30:21-25) Ti fana ni m’thumo wathu wo txhumayela nyamsi. Ngako u txi maha totshe ti u nga ti kotako ka m’thumo wo txhumayela yotshe mbimo yi m’thu a gondako ditshuri ni kutiningetela e bhabhatiswa u na tsaka nawe.

17. Ngu kutxani hi di fanete kubonga Jehovha?

¹⁷ Ha bonga Jehovha ngu nzila yi awu wonako ngu yona m’thumo wu a nga hi ninga. Ene wa ti za ti to hi nge sinzisi vathu ku ve engisa mahungu a manene ni kutshumela ve mkhozela. Hambi keto ene wa kuwona kuhiseka kwathu ni misusumeto yathu ya yinene, e tshumela e hi hakela ngu toneto. Ene a tshumela e hi gondisa nzila yo mana litsako ka m’thumo wuwa wa lisima ngutu wo elula. (Joh. 14:12) Hi nga tsaniseka ti to Jehovha wa hi tsakela ngako hi si rereki!