1. Nganong giisip nato nga dakong kalipay ug pribilehiyo ang pagkahimong mga Saksi ni Jehova?

GIISIP gyod nato nga dakong kalipay ug pribilehiyo ang pagkahimong mga Saksi ni Jehova! Kita nagdala sa ngalan sa Diyos ug atong gipamatud-an nga iya tang mga Saksi pinaagi sa atong buluhatong pagsangyaw ug paghimog mga tinun-an. Malipay ta dihang matabangan nato nga mahimong magtutuo kadtong “nakiling sa pagdawat sa kamatuoran nga motultol sa kinabuhing walay kataposan.” (Buh. 13:48) Parehas tag gibati ni Jesus, kinsa “nalipay pag-ayo” diha sa balaang espiritu sa dihang gisultihan siya sa iyang mga tinun-an bahin sa ilang maayong mga eksperyensiya sa pagsangyaw.—Luc. 10:1, 17, 21.

2. Unsaon nato pagpakita nga importante kaayo para nato ang atong ministeryo?

² Importante kaayo para nato ang atong ministeryo. Si apostol Pablo nag-awhag kang Timoteo: “Tagda kanunay ang imong kaugalingon ug ang imong pagpanudlo.” Siya midugang: “Sa pagbuhat niini maluwas nimo ang imong kaugalingon ug kadtong maminaw nimo.” (1 Tim. 4:16) Busa ang atong pagsangyaw makaluwas ug kinabuhi. Kanunay natong gihatagag pagtagad ang atong kaugalingon kay sakop ta sa Gingharian sa Diyos. Gusto natong magkinabuhi kanunay sa paagi nga makahatag ug kadayeganan kang Jehova ug nahiuyon sa maayong balita nga atong gisangyaw. (Filip. 1:27) Atong gipakita nga gihatagan natog ‘pagtagad ang atong pagpanudlo’ pinaagi sa pagpangandam pag-ayo para sa ministeryo ug pagpangayog tabang kang Jehova sa dili pa mosangyaw.

3. Ang tanan ba modawat sa mensahe sa Gingharian? Paghatag ug pananglitan.

³ Pero bisan dihang himoon nato ang atong kinamaayohan, basin gamay ra o wala gyoy modawat sa mensahe sa Gingharian diha sa atong teritoryo. Konsideraha ang eksperyensiya  ni Brader Georg Lindal, kinsa nag-inusara sa pagsangyaw sa tibuok Iceland sukad sa 1929 hangtod sa 1947. Libolibo ka publikasyon ang iyang napanagtag, pero wala gyoy midawat sa kamatuoran. Siya misulat: “Ang pipila morag supak sa kamatuoran, pero ang kadaghanan dili interesado.” Bisan dihang ang mga misyonaryo nga migraduwar sa Gilead nangabot ug mitabang sa buluhaton, milabay pa ang siyam ka tuig una nagpahinungod kang Jehova ug nagpabawtismo ang pipila ka taga-Iceland. *

4. Unsa tingali atong bation kon ang mga tawo dili modawat sa maayong balita?

⁴ Madismayar ta kon ang mga tawo dili modawat sa maayong balita. Bation tingali nato ang gibati ni Pablo, kinsa “naguol pag-ayo” ug mibatig ‘way hunong nga kasakit’ tungod kay ang kadaghanan sa mga Hudiyo wala modawat kang Jesus ingong gisaad nga Mesiyas. (Roma 9:1-3) Komosta kon bisan pa sa imong mga paningkamot ug pag-ampo para sa imong Bible study, wala gihapon siya mouswag ug kinahanglan na nimong ihunong ang inyong pagtuon? O komosta kon wala gyod kay Bible study nga nagpabawtismo? Angay ba kang makonsensiya, nga tingali maghunahuna nga wala panalangini ni Jehova ang imong ministeryo? Niining artikuloha, atong tubagon ang duha ka pangutana: (1) Unsay basehanan sa malamposong ministeryo? (2) Unsay angay natong dahomon dihang mosangyaw ta?

5. Nganong ang resulta sa atong mga paningkamot para kang Jehova lahi usahay sa atong gidahom?

⁵ Bahin niadtong nagahimo sa kabubut-on sa Diyos, ang Bibliya nag-ingon: “Ang tanan niyang ginahimo magmalamposon.” (Sal. 1:3) Pero wala nâ magpasabot nga ang tanan natong paningkamot para kang Jehova moresultag parehas sa atong gidahom. Ang kinabuhi “punog kasakit” tungod sa atong kaugalingong pagkadili-hingpit ug nianang sa uban. (Job 14:1) Dugang pa, ang mga magsusupak makababag tingali usahay sa atong mga paningkamot nga mosangyaw sa naandan natong paagi. (1 Cor. 16:9; 1 Tes. 2:18) Busa, sa unsa ibase ni Jehova ang kalamposan sa atong ministeryo? Konsideraha ang mga prinsipyo sa Bibliya nga makatabang nato sa pagtubag niining pangutanaha.

6. Sa unsa ibase ni Jehova ang kalamposan sa atong paghago para kaniya?

⁶ Si Jehova nagpokus sa atong paningkamot ug paglahutay. Isipon ni Jehova nga malamposon ang atong ministeryo kon himoon nato ni nga makugihon tungod sa atong gugma kaniya, maminaw man ang mga tawo o dili. Si Pablo misulat: “Ang Diyos matarong, ug dili niya kalimtan ang inyong buhat ug ang gugma nga inyong gipakita para sa iyang ngalan pinaagi sa pag-alagad ug sa padayon ninyong pag-alagad sa mga balaan.” (Heb. 6:10) Si Jehova mahinumdom sa atong mga buhat ug sa atong gugma, bisan pag ang atong mga paningkamot walay maayong resulta. Busa, puwede pong mapadapat kanato ang giingon ni Pablo sa mga  taga-Corinto: “Ang inyong paghago dili makawang may kalabotan sa Ginoo,” bisan pag ang resulta sa atong mga paghago lahi sa atong gidahom.—1 Cor. 15:58.

7. Unsay atong makat-onan sa giingon ni Pablo bahin sa iyang ministeryo?

⁷ Si Pablo maoy maayo kaayong misyonaryo, nga nagtukod ug bag-ong mga kongregasyon sa daghang siyudad. Pero dihang may mga tawo nga nanaway kang Pablo ug miingon nga dili siya maayong magtutudlo, wala niya hisgoti kon unsa ka daghang tawo ang iyang natabangan nga mahimong Kristohanon. Hinunoa, siya miingon: “Mas daghan kog gibuhat.” (2 Cor. 11:23) Sama kang Pablo, hinumdoman nato nga mas gipabilhan ni Jehova ang atong mga paningkamot ug paglahutay.

8. Unsay angay natong hinumdoman bahin sa atong ministeryo?

⁸ Ang atong ministeryo nakapalipay kang Jehova. Si Jesus nagpadalag 70 ka tinun-an aron isangyaw ang mensahe sa Gingharian, ug human sa ilang pagsangyaw, sila “malipayong namauli.” Nganong malipayon kaayo ang mga tinun-an? Sila miingon: “Bisan ang mga demonyo mipatuo kanamo pinaagi sa imong ngalan.” Pero gitul-id ni Jesus ang ilang panghunahuna dihang giingnan niya sila: “Ayawg kalipay nga mipatuo ang mga demonyo kaninyo, kondili paglipay kay ang inyong mga ngalan nasulat sa langit.” (Luc. 10:17-20) Si Jesus nahibalo nga dili pirmeng maayo kaayo ang ilang maeksperyensiyahan diha sa ministeryo. Gani, wala ta mahibalo kon pila niadtong naestorya sa mga tinun-an ang nahimong Kristohanon. Kinahanglang masabtan sa mga tinun-an nga ang kalipay wala lang magdepende sa ilang kalamposan, kondili sa pagkahibalo nga si Jehova nalipay sa ilang mga paningkamot.

9. Sumala sa Galacia 6:7-9, unsay atong maangkon kon molahutay ta sa atong ministeryo?

⁹ Kon molahutay ta sa atong ministeryo, maangkon nato ang kinabuhing walay kataposan. Samtang naningkamot ta sa pagpugas ug pagpatubo sa mga binhi sa kamatuoran bahin sa Gingharian, kita sab “nagpugas maylabot sa espiritu” kay atong gitugotan ang balaang espiritu sa Diyos sa paggiya kanato. Kon dili ta “mohunong” o “maluya,” si Jehova nagpasalig nga atong madawat ang kinabuhing walay kataposan, bisan pag wala gyod tay Bible study nga nabawtismohan.—Basaha ang Galacia 6:7-9.

10. Sa unsa nagdepende ang reaksiyon sa mga tawo sa atong ministeryo?

¹⁰ Ang reaksiyon sa mga tawo sa maayong balita nagdepende sa kahimtang sa ilang kasingkasing. Gipatin-aw ni Jesus kini nga kamatuoran diha sa iyang ilustrasyon bahin sa magpupugas, kinsa nagpugas ug binhi diha sa lainlaing klase sa yuta, pero ang binhi lang nga naa sa maayong yuta ang namunga. (Luc. 8:5-8) Si Jesus miingon nga ang lainlaing klase sa yuta nagrepresentar sa mga tawo kansang kasingkasing lainlain ug reaksiyon sa “pulong sa Diyos.” (Luc. 8:11-15) Sama sa magpupugas, dili nato mapugos nga mamunga ang atong paningkamot, kay nagdepende ni sa kahimtang sa kasingkasing sa atong gisangyawan. Ang atong responsibilidad mao ang pagpadayon sa pagpugas ug maayo kaayong binhi sa mensahe sa Gingharian. Sama sa giingon ni apostol Pablo, ‘ang matag tawo makadawat sa iyang ganti sumala sa iyang buhat,’ dili sumala sa resulta sa iyang buhat.—1 Cor. 3:8.

11. Nganong nagmalamposon si Noe ingong “magwawali sa pagkamatarong”? (Tan-awa ang hulagway sa atubangan sa magasin.)

¹¹ Ang mga alagad ni Jehova sa karaang panahon nagsangyaw pod sa mga tawo nga dili gustong maminaw. Pananglitan, si Noe maoy “magwawali sa pagkamatarong,” tingali sulod  sa daghang katuigan. (2 Ped. 2:5) Seguradong naglaom siya nga ang mga tawo maminaw sa iyang mensahe, pero wala mag-ingon si Jehova nga kanay mahitabo. Hinunoa, dihang gisugo ni Jehova si Noe sa paghimog arka, Siya miingon: “Kinahanglan kang mosulod sa arka apil ang imong asawa, mga anak, ug mga asawa sa imong mga anak.” (Gen. 6:18) Ug dihang gisultihan siya sa Diyos bahin sa gidak-on ug kapasidad sa arka nga iyang himoon, tingali naamgohan ni Noe nga gamay ra ang maminaw sa iyang mensahe. (Gen. 6:15) Ug mao gyod nay nahitabo. Wala gyoy naminaw kang Noe. (Gen. 7:7) Giisip ba ni Jehova nga napakyas si Noe? Wala gayod! Sa panglantaw sa Diyos, milampos si Noe sa pagsangyaw kay matinumanon niyang gihimo ang gisugo ni Jehova kaniya.—Gen. 6:22.

12. Nganong nagmalipayon si propetang Jeremias sa iyang ministeryo bisan pag ang mga tawo wala maminaw ug misupak pa gani niya?

¹² Si propetang Jeremias nagsangyaw sab sulod sa daghang katuigan bisag ang mga tawo wala maminaw ug misupak pa gani niya. Naluya kaayo siya kay “giinsulto ug giyagayagaan” siya sa mga magsusupak maong naghunahuna siya nga moundang na lang sa iyang asaynment. (Jer. 20:8, 9) Pero wala gyod nâ buhata ni Jeremias! Unsay nakatabang niya nga dili madaog sa iyang negatibong panghunahuna ug padayong magmalipayon sa iyang ministeryo? Nagpokus siya sa duha ka importanteng kamatuoran. Una, ang mensahe sa Diyos nga gisangyaw ni Jeremias maghatag sa mga tawo ug “maayong kaugmaon ug paglaom.” (Jer. 29:11) Ikaduha, si Jeremias nagdala sa ngalan ni Jehova. (Jer. 15:16) Kita sab nagsangyaw ug mensahe sa paglaom, ug kita nagdala sa ngalan ni Jehova ingong iyang mga Saksi. Kon magpokus ta niining duha ka importanteng kamatuoran, magmalipayon ta bisag unsa pay reaksiyon sa mga tawo.

13. Unsay atong makat-onan sa ilustrasyon ni Jesus diha sa Marcos 4:26-29?

¹³ Ang espirituwal nga pag-uswag nagkinahanglag panahon. Gitudlo ni Jesus kini nga kamatuoran diha sa iyang ilustrasyon bahin sa magpupugas nga natulog. (Basaha ang Marcos 4:26-29.) Dili dayon makita sa magpupugas ang resulta sa iyang mga paningkamot ug dili niya makontrolar ang pagtubo sa binhi. Sa susama, dili tingali dayon nimo makita ang resulta sa imong paghimog mga tinun-an kay ang pagtubo anam-anam nga mahitabo. Sama nga dili mapugos sa mag-uuma ang iyang mga tanom nga motubo sumala sa gipaspason nga gusto niya, dili sab nato mapugos ang atong mga Bible study nga mouswag sa espirituwal sumala sa gipaspason nga gusto nato. Busa ayawg kaluya o ayawg undang kon ang ilang pag-uswag dili parehas sa imong gidahom. Sama sa pagpanguma, ang paghimog mga tinun-an nagkinahanglag pailob.—Sant. 5:7, 8.

14. Unsang pananglitan ang nagpasiugda nga dili tingali dayon nato makita ang mga resulta sa atong ministeryo?

¹⁴ Sa pipila ka teritoryo, dangtan tingalig pipila ka tuig una nato makita ang mga resulta sa atong ministeryo. Konsideraha ang eksperyensiya sa magsoong si Gladys ug Ruby Allen, kinsa niadtong 1959 naasayn ingong mga regular payunir sa usa ka lungsod sa probinsiya sa Quebec, Canada. * Tungod sa presyur sa komunidad ug sa impluwensiya sa Katolikong mga pari, ang mga tawo wala maminaw sa mensahe sa Gingharian. Si Gladys nahinumdom: “Namalaybalay mig walo ka oras sa usa ka adlaw sulod sa duha ka tuig nga walay motubag sa pultahan! Ang mga tawo igo rang molili sa pultahan ug manira.” Pero wala mosurender si Gladys ug Ruby. Ngadtongadto, ang mga tawo nahimo nang mas  mahigalaon ug ang pipila naminaw na. Karon, duna nay tulo ka kongregasyon nianang lugara.—Isa. 60:22.

15. Unsay atong makat-onan sa 1 Corinto 3:6, 7 bahin sa buluhaton nga paghimog mga tinun-an?

¹⁵ Ang paghimog mga tinun-an nagkinahanglag pagtinabangay. Ang tanan diha sa kongregasyon makatabang sa usa nga mouswag ug magpabawtismo. (Basaha ang 1 Corinto 3:6, 7.) Pananglitan, ang usa ka brader nagbilin ug tract o magasin sa interesado. Pero dili siya makabalik sa panahon nga bakante ang maong tawo, busa gihangyo niya ang laing brader sa pagbalikduaw. Ang maong brader nakasugod ug pagtuon sa Bibliya. Dayon, nagkuyog siyag lainlaing igsoon sa ilang pagtuon, ug ang kada usa nila nakadasig sa Bible study sa lainlaing paagi. Ang matag igsoon nga nailaila sa study nakatabang sa pagbisbis sa binhi sa kamatuoran. Busa, sama sa giingon ni Jesus, ang magpupugas ug ang mangangani duyog nga magsadya sa espirituwal nga pagpangani.—Juan 4:35-38.

16. Nganong magmalipayon gihapon ka sa imong ministeryo bisan pag limitado na lang ang imong mahimo tungod sa sakit o luya nga panglawas?

¹⁶ Komosta kon limitado na lang ang imong mahimo sa ministeryo tungod sa sakit o luya nga panglawas? Magmalipayon gihapon ka sa imong mahimo niana nga buluhaton. Konsideraha ang eksperyensiya ni Haring David dihang gibawi niya ug sa iyang mga sundalo ang ilang mga pamilya ug kabtangan gikan sa bandidong mga Amalekanhon. Ang 200 sa iyang mga sundalo gikapoy na kaayo ug dili na makahimo sa pagpakig-away, busa nagpabilin sila aron magbantay sa mga bagahe. Human modaog sa gubat, si David nagsugo nga kadtong nakig-away ug kadtong nagbantay sa mga bagahe hatagan ug parehas nga bahin sa mga inilog. (1 Sam. 30:21-25) Ingon ana pod sa atong buluhaton nga paghimog mga tinun-an. Ang tanan nga naghimo sa ilang kinamaayohan makadawat ug parehas nga kalipay matag higayon nga dunay tawo nga makaila kang Jehova ug mabawtismohan.

17. Unsay angay natong pasalamatan kang Jehova?

¹⁷ Mapasalamaton ta kang Jehova kay gilantaw niya sa mahigugmaong paagi ang atong pag-alagad kaniya. Nahibalo siya nga dili nato kontrolado ang resulta sa atong mga paningkamot. Pero nakita niya ang atong pagkugi ug maayong mga motibo, ug siya nagpanalangin kanato. Siya nagtudlo sab kanato nga magmalipayon sa bisan unsa nga atong mahimo diha sa ministeryo. (Juan 14:12) Makaseguro ta nga malipay ang Diyos kanato kon dili ta mosurender!