1. Ni kiha kintu ekiri kutushemeza eki turi kukora?

NITWESIMA ahakuba turi Abahamya ba Yehova! Nitwetererwa izina rya Ruhanga kandi twereka ku tuhikire kuryetwa turi kukora omurimo g’okuburira n’okwegesa. Nitushemererwa twakwasa omuntu oyetegwire kuhurikiza amazima agari kutuhisya aha magara agatahwaho, rero akaba Omukristo. (Byak 13:48) Nitushemererwa nk’oku Yesu ‘yashemerirwe omu mwika’ obu abegi beye barugire omu murimo g’okuburira bine byingi ebi bahikireho.—Luk 10:1, 17, 21.

2. Ni bata oku turi kwereka ku nitutwara omurimo g’okuburira nk’og’omugasho?

² Omurimo gwitu g’okuburira nitugukwata nk’og’omuhendo. Entumwa Pawulo akagambira Timoteyo ati: ‘Oyerinde iwe wenka, kandi n’omu bi ori kwegesa.’ Akongeraho ati: ‘Ahakuba omu kukora osyo, noyija kwejuna, kandi ojune n’abari kukuhurira.’ (1 Tim 4:16) Obwe rero, omurimo g’okuburira ogu turi kukora nigukiza amagara. Nitwerinda itwe twenka ahakuba turi abaturage b’Obukama bwa Ruhanga. Buri izoba nituba turi kwenda kuhimbisa Yehova kandi twereka ku nitwikiriza obutumwa burungi obu turi kuburira. (Fil 1:27) Nitwereka ku nitwerinda omu bi turi kwegesa turi kwetebekanisa omurimo g’okuburira, kandi tukashaba Yehova obuyambi mbere y’okuza kuburira.

3. Ni bata oku abantu bingi bari kwakira obutumwa burungi? Gamba ecokureberaho.

³ N’obu twakukora nk’oku turi kubasa, hine obu abantu batari kuhurira obutumwa burungi bw’Obukama. Reba ebyahikire ahari mwenetata Georg Lindal, owaburire wenka omuri Iceland kwiha omu gwa 1929 kuhisya omu gwa 1947. Akaba natanga ebitabo byitu byingi, konka tihine omuntu n’omwe owayikirize amazima. Akahandika ati: “abamwe bakaba nibahakanisa amazima g’omuri Bibuli, konka abingi omuri bo bakaba batari kugenda.” Abamishonari ababire begire ishomero rya Gileyadi ku bagireyo kuyamba, hakahwa emyaka  mwenda yona abantu b’omuri Iceland batakehire Yehova ngu babatizibwe. *

4. Ni bata oku turi kubasa kwehurira abantu bayanga kuhurira obutumwa obu turi kuburira?

⁴ Abantu ku bari kwanga kuhurikiza obutumwa burungi nikitushasha. N’itwe nitubasa kwehurira nk’entumwa Pawulo owagizire ‘obusaasi obutari kuhwaho omu mutima gweye’ ahakuba Abayudaaya babire bangire kwikiriza ku Yesu ari we Mesiya owaraganisibwe. (Rom 9:1-3) Mbwenu shi okayehurira ota otireho amani ngu okwase omwegi wa Bibuli kandi okamushabira konka atakore entunguka? Kandi shi ku wakuba otakakwasaga n’omuntu n’omwe ngu ahike aha kubatizibwa? Mbehi oshemerire kwecwera orubanja ori kutekateka ngu Yehova tarahire omugisha ebi wakozire omu murimo gweye? Omuri eki kicweka, twaza kugarukamu ebi bibuzo bibiri: (1) Ni enki ekiri kwereka ku hine eki tuhikireho omu murimo g’okuburira? (2) Ni eha mitekatecere eyi tushemerire kuba twine twaba turi kuburira abandi?

5. Ahabw’enki omurimo ogu turi kukorera Yehova hine obu guri kugenda nk’oku tutari kukitekateka?

⁵ Bibuli negamba ngu omuntu ori kukora ebi Ruhanga ari kukunda, ‘ebi ari kukora byona nibigenda ge.’ (Zab 1:3) Konka, eco tikiri kumanyisa ngu ebi turi kukorera Yehova byona nibigenda nk’oku turi kubyenda. Ahakuba tutahikirire, ‘amagara g’omuntu ‘gijwire enaku nyingi.’ (Yob 14:1) Nambwenu abari kutuhakanisa hine obu bari kwemereza omurimo gwitu g’okuburira. (1 Kor 16:9; 1 Tes 2:18) Mbwenu shi ni bata oku Yehova ari kureba omurimo ogu turi kumukorera? Reka turebe emisinge emwe y’omuri Bibuli eri kubasa kutukwasa kugarukamu eco kibuzo.

6. Ni bata oku Yehova ari kureba omurimo ogu turi kumukorera?

⁶ Yehova nata omutima aha mani agu turi kutaho n’okwehangana kwitu. Yehova nareba ku hine eki twahikireho, twamukorera n’amani aha bwa rukundo eyi turi kumukunda, n’obu abantu bakuba batatuhurikize. Pawulo akahandika ati: ‘Ruhanga ti omuntu otahikirire kwebwa emirimo yanyu n’okukunda oku mwayorekire ah’izina ryeye obu mwahereza abari kwera abu mukiri kuhereza na hati.’ (Heb 6:10) Yehova nagumizamu kwijuka amani agu turi kutaho na rukundo eyi turi kumukunda n’obu abantu bakuba batatuhurikize. Obwe rero n’obu ebi ori kukora byakuba bitabire nk’oku ori kubitekateka, ebigambo ebi Pawulo yagambire Abakorinso ebiri kugira ngu: ‘Okukora kwanyu ti kwa busha omuri Mukama’ nibikukwataho.—1 Kor 15:58.

7. Ni enki eki turi kwegera aha bi entumwa Pawulo yagambire aha murimo ogu yakozire?

⁷ Entumwa Pawulo akaba ari omumishonari omanyirire, kandi akatandikaho  ebibina bisya omu matawuni mingi. Abantu ku bagambire ngu Pawulo tari omuburizi murungi, tarayerwanireho ari kugamba ku hine abantu bingi abu yaresire omu mazima. Omu mwanya gw’eco Pawulo akahandika ati: ‘Nimbakira omu kukora munonga.’ (2 Kor 11:23) Nk’oku Pawulo yakikozire, tushemerire kwijuka ku amani agu turi kutaho n’okwehangana kwitu ari byo ebi Yehova ari kureba nk’eby’omugasho.

8. Ni enki eki tushemerire kwijuka aha murimo g’okuburira?

⁸ Omurimo gwitu nigushemeza Yehova. Yesu akohereza abegi beye 70 kuburira obutumwa bw’Obukama, kandi ku barugireyo ‘bakagaruka bashemerirwe.’ Ahabw’enki babire bashemerirwe? Bakagamba ngu: ‘Na ba dayimoni nibatworobera omu izina ryawe.’ Konka Yesu akahabura emitekatecere yabo ari kubagambira ngu: ‘Eki mutakishemererwa ba dayimoni kuborobera, kureka mushemererwe aha bw’amazina ganyu kuhandikwa omu iguru.’ (Luk 10:17-20) Yesu akaba namanya ku obwire bwabire burije kuhika batatunge ebirungi nk’ebyo omu murimo g’okuburira. Kandi tituri kumanya abantu abu baburire omuri obwo bwire abahindukire Abakristo. Abo begi bakaba bashemerire kutunga okushemererwa hatari aha bintu ebi bari kuhikaho, ahobwe batunga okushemererwa okuri kuruga aha kumanya ku Yehova ari kushemerererwa ebi bari kukora.

9. Tukuratize ebiri omu Bagalatia 6:7-9, ni enki eki turije kutunga ku turigumizamu kukora omurimo g’okubirira tutari kuruha?

⁹ Twagumizamu kwehangana omu murimo g’okuburira, nitwija kutunga amagara agatahwaho. Twatamu amani omu kubiba embibo z’Obukama, nituba turi ‘kubibira omu mwika’ turi kwikiriza ngu omwika oguri kwera gutukwase. Ku turagumizemu kukorera Yehova tutari kuruha, naturaganisa ku arije kutuha ekiconco c’amagara agatahwaho.—Shoma omu Bagalatia 6:7-9.

10. Ni enki ekiri kutuma omuntu yahurikiza obutumwa burungi ninga shi atabuhurikize?

¹⁰ Emitima y’abantu ni yo eri kutuma batuhurikiza ninga shi batatuhurikize. Yesu akakishoborora omu cokureberaho ceye c’omubibi w’embibo owabibire embibo omu butaka obutari kushushana, konka emwe ekaba ari yo eyayana ebyana. (Luk 8:5-8) Yesu akagamba ku obwo butaka buri kugeranisa abantu abu emitima yabo eri kwakira ‘Ekigambo ca Ruhanga’ omu buryo obutari kushushana. (Luk 8:11-15) Nk’omuhingi, tituri kubasa kutuma embibo y’Obukama yakurira omu mutima g’omuntu ahakuba kugira ngu eyo mbibo ekure nikirugirira aha mutima gweye. Omurimo gwitu ni og’okugumizamu kubiba embibo z’Obukama. Nk’oku entuma Pawulo yakigambire, ‘buri omwe aryahebwa ebihembo nk’omurimo gweye oku guriba guri, hatari aha byarugamu.’—1 Kor 3:8.

11. Ahabw’enki Yehova yarebire Nowa nk’‘omuburizi w’okuhikirira’ owagizire eki yahikireho? (Reba ekishushani c’aha kishembeso.)

¹¹ Abahereza ba Yehova bingi bakaguma nibaburira abantu abatari kwenda kubahurikiza. Ecokureberaho: Nowa akamara emyaka myingi eri kuhika ahari 40 ninga shi 50 ari ‘omuburizi w’okuhikirira.’ (2 Pet 2:5) Hatariho okubanganisa akaba ari kwesiga ku abantu babire barije kumuhurikiza, konka Yehova ti ko yabire yamugambire. Ahobwe Ruhanga ku yamuhire obuhabuzi bw’okombeka obwato, akamugambira ngu: ‘Oryataha omu meri yawe n’omukazi wawe, na batabani bawe, na bakamwana bawe.’  (Kut 6:18) Nowa ku yamanyire oku emeri eyi yabire arayombeke eri kwingana, nabasa kuba yahikire ari kumanya ku abantu babire batarije kumuhurikiza ahakuba emeri yabire etarije kuzamu abantu bingi. (Kut 6:15) Kandi nk’oku turi kubimanya, tihine owahurikize Nowa. (Kut 7:7) Mbwenu shi Yehova akaba namureba nk’otine eki yakozire? Ingaha mazima! Yehova akareba ku hine eki Nowa yabire ahikireho omu murimo g’okuburira ahakuba akakora byona ebi yabire amushabire.—Kut 6:22.

12. Ni enki ecakwasize omuhanuzi Yeremiya kutunga okushemererwa omu murimo g’okuburira n’obu abantu babire bari kumuhakanisa?

¹² Omuhanuzi Yeremiya na we akamara emyaka eri kurenga 40 ari kuburira abantu ababire batari kwenda kumuhurira. Akacweka entege ahabw’abantu ababire bari kumuhakanisa kandi yatekateka n’aha kwemereza omurimo gweye. (Yer 20:8, 9) Konka Yeremiya tarahwire amani! Ni enki ecakwasize Yeremiya kuhindura emitekatecere kandi akatunga okushemererwa omu murimo gweye g’okuburira? Akaguma atire omutima aha bintu bibiri. Ec’okubanza: Obutumwa obu Ruhanga yahire Yeramiya bukaba nibuha abantu amasiko g’ebiro by’omu misho. (Yer 29:11) Eca kabiri: Yehova akaba atorine Yeremiya ngu amugambirire. (Yer 15:16) N’itwe nitugambira abantu b’omuri eyi nsi eyasisikire amasiko g’ebiro by’omu misho. Ku turate omutima ahari ebyo bintu bibiri, nitwija kushemererwa n’obu abantu bakuba bari kutuhurikiza ninga shi batari kutuhurikiza.

13. Ni enki eki turi kwegera aha cokureberaho ca Yesu ekiri omuri Mako 4:26-29?

¹³ Omuntu nakura omu by’omwika mporampora. Eco Yesu akacegesaho omu cokureberaho c’omubibi owanyamire. (Shoma omuri Mako 4:26-29.) Embibo ezi yahingire zikaba nizikura mporampora kandi tihine eki yabire nabasa kukora ngu zikure juba. N’iwe nobasa kutegereza obwire buringwa kugira ngu orebe yaba omwegi ari kutunguka, ahakuba natunguka mporampora. Nk’oku omuhingi atari kubasa kugema ekimera ngu kikure juba, ni ko n’itwe tutari kubasa kugema omwegi wa Bibuli ngu atunguke juba omu by’omwika nk’oku turi kubyenda. Obwe rero otahwa amani wareba omwegi ari kutunguka mpora. Nk’omurimo g’okuhinga, omurimo g’okuhindura abantu abegi na go nigwetenga okwehangana.—Yak 5:7, 8.

14. Ni kiha cokureberaho ekiri kwereka ku hari kubasa kuhwaho obwire buringwa kugira ngu abantu batuhurikize?

¹⁴ Omu tucweka tumwe, noshanga hari kuhwaho emyaka myingi hatine omuntu n’omwe owabatizibwe. Reba ebyahikire ahari Gladys na Ruby Allen, abakorire obupayoniya bw’obwire bwona omuri Kanada, omuri Quebec 1959. * Ahakuba abantu babire bari kutina amisho g’abantu kandi bari kutina abebembezi b’edini y’Abakatoliki, bakanga kuhurikiza obutumwa bw’Obukama. Gladys akagamba ati: “Tukamara emyaka ibiri turi kuburira amashaha munana aha nju n’enju hatine ori kutwakira! Abantu bakaba nibija aha rwigi, bacamara kureba ari itwe bahika bari kwegendera. Konka tibiratumire twaruha.” Ku hahwireho obwire abantu bakatandika kubakira kandi bakahika ahari byingi. Hati omuri eyo tawuni harimu ebibina bishatu.—Isa 60:22.

15. Ni enki eki ebiri omu 1 Bakorinso 3:6, 7 biri kutwegesa aha murimo g’okuhindura abantu abegi?

¹⁵ Omurimo g’okuhindura abantu abegi nigwetenga amani g’abantu bingi. Abantu bona b’omu kibina nibabasa kukwasa  omuntu kuhika aha kubatizibwa. (Shoma omu 1 Bakorinso 3:6, 7.) Mwenetata omwe nabasa kuha omuntu akatabo kace. Bwanyima ogo mwenetata nabasa kuba ayine ebintu byingi by’okukora, rero ashaba ondijo muburizi kugaruka kutayayira ogo muntu. Ogo muburizi nabasa kutandika kumwegesa Bibuli. Nabasa kuguma ari kweta abandi baburizi ngu bekwatanise na we omu kwegesa omwegi, kandi buri omwe omuri bo nabasa kugumya omwegi omu buryo obutari kushushana n’obw’abandi. Abo benetata abari kwekwatanisa omu kwegesa nibabasa kukwasa omwegi kumanya byingi ahari Yehova. Nk’oku Yesu yakigambire, bona abari kukwasa omuntu kuhika aha kubatizibwa nibashemererwa.—Yoh 4:35-38.

16. Ahabw’enki ori kubasa kutunga okushemererwa omu murimo g’okuburira n’obu wakuba orwire ninga shi oyine emani mace?

¹⁶ Mbwenu shi ku wakuba otari kukora byingi omu murimo g’okuburira ahabw’oburwire ninga shi amani mace? Nabwo nobasa kutunga okushemererwa ahabw’eby’ori kubasa kukora. Reba ebyahikire aha mugabe Dawudi obu we n’abashija beye bacungwire ab’omu maka gabo n’ebintu byabo omu mikono y’Abameleki. Abashija magana abiri bakasigara enyima barinzire ebintu byabo ahabw’okuruha. Bwanyima y’okusingura orutaro, Dawudi akaragira ngu bona abaza aha rutaro n’abasigara enyima batunge ebiri kwingana. (1 Sam 30:21-25) Ni ko kiri n’aha murimo g’okuhindura abantu abegi oguri kukorwa omu nsi yona. Buri omwe ori kukora nk’oku ari kubasa natunga okushemererwa omuntu musya ku ari kweha Yehova akabatizibwa.

17. Ni enki eki turi kusimira Yehova?

¹⁷ Nitusima Yehova munonga ahabw’oburyo obu ari kurebamu omurimo ogu turi kumukorera. Namanya ku tutari kubasa kugema abantu kutuhurikiza. Konka nareba amani agu turi kutamu n’entego zitu kandi natuha emigisha. Nambwenu natwegesa ebiri kubasa kutukwasa kutunga okushemererwa omu murimo g’okuburira. (Yoh 14:12) Nitwesiga tutari kubanganisa ku Yehova arigumizamu kuha omugisha omurimo gwitu twagumizamu kugukora tutari kuruha!