1. ¿Jeowa ʉ̃rʉ Kʼawuabipanʉrãra kʼãrẽa sobiapanʉ?

DAYIRÃRA mejãcha sobiapanʉ Jeowa ʉ̃rʉ Kʼawuabipanʉrã baera akʉza ẽbẽrarã jõmaʉ̃ʼa iyi trʉ̃ ʉ̃rʉ jaradiapanʉ, Jesura mejãcha sobiasi iyi kʼaidupanʉraba jara jʉ̃ẽsidade ãyi sãwũã bia jʉ̃ẽnata ãya jaradiada ʉ̃rʉ (Luc. 10:1, 17, 21). Dayirãsida maʉ̃ kĩrãkʼa sobiapanʉ ẽbẽrarãba «ewari jõmaʉ̃nẽ bʼaita» ĩjãbʉrʉde akʉza buru kʼoebʉrʉde (Hech. 13:48).

2. ¿Dayirãbara sãwũã ũdubiseabʉ jaradia wãira yibiata?

² Dayirãitara Daizeze Bedʼea jaradia wãira jipa yibia. Apostol Pabloba jarasi Timoteoʼa: «Bʉyidebemata akʉza bʉa jaradiabʉta kĩrãkita akʉra. Maʉ̃ta jõma jipa orua, bʉa mawũã ora bʉta ẽdrʉyi akʉza yi wuabemara bʉa jaradiabʉ ũrĩbʉsida ẽdrʉbiyi» (1 Tim. 4:16). Maʉ̃ bedʼeabara jarakĩrãbasi, daya obʉdeba ẽbẽrarãta ẽdrʉbipanʉta. Dayirãba opanʉra kĩrãkita akʉpanʉ Daizeze Nokʼo juwa edrebʉ baera. Dayirãbara bia opanʉ ẽbẽrarãta Jeowa ʉ̃rʉ ibia bedʼeamarẽã akʉza dayirãba jaradiapanʉta wãrĩnu ĩjãbʉta ũdubipanʉ (Filip. 1:27). Daya jaradiabʉta kĩrãkita akʉiba jarakĩrãbʉ nãã krĩchaita deda kʼãrẽ ʉ̃rʉ jaradia wãita akʉza Daizeze jaure zarea widita jaradia wãi naena.

3. ¿Ẽbẽra jõmaʉ̃ba ũrĩkĩrãika Daizeze Bedʼea ʉ̃rʉra? Yiza aba jara ũrĩbira.

³ Dayirãba mejãcha zarea opanʉmina jaradia wãita ʉ̃kʉrʉba ũrĩkĩrã ẽ bayi Daizeze Bedʼeara. Akʉra kʼãrẽ berabaridata mebẽã George Lindalta, iyara dobaʉba jaradiabasi 1929deba poaga 1947 bayeda Islandia drʉade. Iya kartara mejãcha dedekasimina mia abaʉ ẽbẽraba ũrĩkĩrã ẽ basi Daizeze Bedʼeara. Iya bʉsi: «Ʉ̃kʉrʉra Daizeze Bedʼea ʉ̃rʉ basi akʉza ʉ̃kʉrʉbara kʼãrẽ ẽ kĩrãkʼa akʉpanasi». Tẽã mebẽrãta zokʼasida eskuela Galaadʼdeba maʉ̃ drʉaeda  jaradia wãmarẽã, mamina poaga 9 berabarisi ʉ̃kʉrʉ ẽbẽrarã maʉ̃ drʉadebemata buru kʼoemarẽã. *

4. ¿Sãwũã baseabʉ ẽbẽrarãba dayirã bedʼeata ũrĩ ẽ bʉrʉ?

⁴ Ẽbẽrarãba ũrĩkĩrã ẽãne arigʉ sopʉapanʉ, abarika Pablosida mawũã arigʉ sopʉabasi Jesu ʉ̃rʉ judioraba ĩjã ẽ basi baera (Rom. 9:1-3). Dayirã yiwidʼibʉmina akʉza zarea obʉmina Daizeze Bedʼea kʼawuabarira jaradiaita, mamina ãya okĩrã ẽ bʉrʉ ãya kʼawua wãta akʉza buru kʼoeda ze ẽ bʉrʉ maʉ̃ba dayirãba iduaribira, ¿maʉ̃ kʼarea sopʉa bʼaibaraka? ¿Maʉ̃ kʼarea dayirãba krĩchaibaraka Daizezeba bia akʉ ẽãta akʉza kʼareba ẽãta? Naʉ̃ artikulode panʉnañi bedʼea ũme: ¿kʼãrẽba ũdubibʉ dayirãba onʉmʉra bia obʉta Daizezeita? akʉza, ¿kʼãrẽ berabarita jʉ̃ãnaibara jaradiabʉrʉde?

5. ¿Kʼãrẽa dayirãba Daizezeita obʉde edaʉde berabari ẽ dayirãba krĩchabada kĩrãkʼa?

⁵ Daizeze Bedʼeaba jarabʉ ẽbẽraba Daizezeba kãgabʉta opanʉbʉrʉ ãya «jõma kʼãrẽ obʉra bia wãñi» (Sal. 1:3). Maʉ̃ba jarakĩrãbʉ ẽ dayirãba Daizezeita jõma kʼãrẽ obʉra daya kãgabʉ kĩrãkʼa bʼaita, Daizeze Bedʼeaba jarabʉ ẽbẽra jõma «bedʼea zromanebʉta» dayi nekayiruadeba akʉza wuabemara nekayirua kʼarea (Job 14:1). Adewara dayirã jʉrapanʉrabida idu jaradiabida ẽ Daizeze Bedʼea ʉ̃rʉ (1 Cor. 16:9; 1 Tes. 2:18). Dayirãba jaradiabʉdebara, ¿Jeowaitara kʼãrẽta audre yibia? Daizeze Bedʼearadebemane maʉ̃ widibʉ panʉbʉta.

6. ¿Jeowabara sãwũã akʉbʉ dayirãba obʉra iyita?

⁶ Jeowabara akʉbʉ dayirãba zarea obʉra pae ẽ baera. Jeowabara bia akʉbʉ dayirãba zarea obʉbʉrʉ akʉza kãgade jaradiapanʉbʉrʉ ẽbẽrarãba ũrĩkĩrã ẽ mina. Pabloba jarabʉ: «Daizezera jipabʉ baera maraba opanʉra kĩrãdua ẽ akʉza Iyi trʉ̃ kãga ũdubipanʉsida, iyi pʉwʉrʉta kʼarebasida baera akʉza kʼarebapanʉ baera» (Heb. 6:10). Daizeze Bedʼea kʼawuabari buru kʼoe ze ẽ basimina, Jeowabara kĩrãdua ẽ dayirãba zarea odara akʉza kãgade odara. Dayirãba krĩchaseabʉ Pabloba jaradata mebẽrã Corintodebema, iya jarasi: «Kʼawuapanʉ maraba obʉra bari obʉ ẽãta» (1 Cor. 15:58). Naʉ̃ra wãrĩnu bʉa krĩchada kĩrãkʼa ze ẽ basimina.

7. ¿Kʼãrẽta kʼawuaseapanʉ apostol Pabloba jaradaba iya jaradiabada ʉ̃rʉ?

⁷ Apostol Pablobara bia jaradiabʉba, pʉwʉrʉra biode kongregasionta okuasi. Ʉ̃kʉrʉ mebẽrã ʉ̃ta krĩchabadabara Pabloʼa jarasida bia jaradiabe ẽãta maʉ̃ kʼarea iya jara ẽ basi ẽbẽrarã mejãchaʉta buru kʼoeda edesita, awuarabʉrʉ  iyara jarasi zarea osita trajaita (2 Cor. 11:23). Abarika dayirãbida Pablode kĩrãkʼa akʉdaibara Daizezebara bia akʉbʉta dayirãba zarea obʉra akʉza pae ẽ bʉta.

8. ¿Kʼãrẽta kĩrãbedaibara dayirãba jaradia wãbʉdebara?

⁸ Dayirãba jaradiabʉdeba Jeowata sobiabibʉ. Jesubara iyi kʼaidupanʉrata 70 zokʼasi jaradia wãmarẽã, ãyi jõmaʉ̃ta jẽda sobia zesida, mõbemata ¿kʼãrẽa sobia zesida? Ãya jarasi: «Nokʼó, jaira dai edre nʉmeã bʉ trʉ̃neba». Aramaʉ̃ta Jesuba ara jarabʉrʉta mawũãsia: «Sobiarãũdua jaita marã edre nʉme kʼarea. Awuarabʉrʉ sobiaudua marã trʉ̃ta zhi bʼʉma kʼarea ʉ̃tre» (Luc. 10:17-20). Jesubara kʼawuabasi ãya jaradiabʉde ewari jõmaʉ̃nẽ bia wã ẽ baibasita. Yi ẽbẽrarã maʉ̃ ũrĩnapeadara kʼawuada ẽ kʼãrẽaba buru kʼoe zesidata; Jesukʼaidupanʉrãra ẽbẽrarãba ũrĩbʉ kʼarea sobiabaibarabasi, mamina audre sobiabaibarabasi Jeowaba bia akʉbasi baera.

9. Gálatas 6:7-9ba jarabʉdebara, ¿kʼãrẽ nebiata ũduseabʉ aukʼarada ẽ bʉrʉ jaradiabʉde?

⁹ Dayirãba mawũã zarea jaradia wãpanʉbʉrʉ ewari jõmaʉ̃nẽ bayi. Dayirãta zarea opanʉbʉrʉ Daizeze Bedʼea jaradia wãita Daizeze jaure zareaba dayirãta kʼarebayi, dayirãta mapae ẽ bʉrʉ akʉza Daizeze Bedʼea jaradiaita iduaribi ẽ bʉrʉ, Jeowabara dayirãra ewari jõmaʉ̃nẽ babiyi mia abaʉ ẽbẽrata buru kʼoe zebi ẽ mina (akʉra Gálatas 6:7-9).

10. ¿Kʼãrẽa ʉ̃kʉrʉ ẽbẽraba ũrĩpanʉ daya jaradiabʉra akʉza kʼãrẽa ʉ̃kʉrʉbara ũrĩna ẽ?

¹⁰ Ẽbẽraba ũrĩbʉta mawũã ẽ bʉrʉ ũrĩ ẽãta ãyi sodebʉdebʉ. Jesura naʉ̃ ʉ̃rʉ bedʼeasi ẽbẽra abaʉba egorodebema awuara awuaraka ubʉ ʉ̃rʉ jara ũrĩbiside, mamina maʉ̃ranebemata egoro biade uside bia pãwãrasi (Luc. 8:5-8). Jesubara jarasi maʉ̃ra egororãra ẽbẽrarã sota jarakĩrãbʉta akʉza ãyi so sãwũãbʉdeba ãya kʼawuabʉ ũrĩta mawũã ẽ bʉrʉ ũrĩ ẽãta (Luc. 8:11-15). Ẽbẽra ne u ubari kĩrãkʼa dayirã juwuadebʉ ẽ ẽbẽrarãba ũrĩta, awuarabʉrʉ ãyi sodebʉba ũrĩseabʉ, maʉ̃ kʼarea krĩcha zroma oẽ baibara, awuarabʉrʉ jaradiabaibara. Apostol Pabloba jarasi: «Ẽbẽra aba abakaʉba ãyi trajabʉdeba nebiata ũduyi», mawũã ũduda ẽ bayi ãya jʉrepebʉdeba (1 Cor. 3:8).

11. ¿Kʼãrẽa Jeowara sobiabasi Noéba jaradiabada kʼarea ẽbẽrarãba ũrĩkĩrã ẽ basimina? (Akʉra poto yi nããrabemata).

¹¹ Nããrabema Jeowa ʉ̃rʉ Kʼawuabipanʉrãbara jaradiasida ẽbẽrarã iyi bedʼea ũrĩ ẽ badarabida; bari jaradaita Noébara ẽbẽrarã jaradiasi poaga mejãcha berabarisidu (2 Ped. 2:5). Iyara kãgabasi ẽbẽrarãba ũrĩnamarẽã iya jarabadata, mamina Jeowabara jara ẽ basi maʉ̃ta berabarita. Jeowaba jaraside Noéʼa jãba zroma sãwũã oibarata, iya jarasi: «Eda wãra bʉta bʉ wũãwũãrabawara bʉ kimata akʉza bʉ wũãwũãra kimata» (Gén. 6:18). Jeowaba Noéʼa jãba ojarasidera, Noébara krĩchasibaibara ẽbẽrarãba iyi bedʼeara ũrĩ ẽ baita, maʉ̃ jãbadera ẽbẽrarã mejãchaʉta ara ẽ baibasi baera (Gén. 6:15). Mõbemata dayirãba idi kʼawuapanʉ kĩrãkʼa maʉ̃ra ẽbẽra kayiruarabara ũrĩna ẽ basi (Gén. 7:7). Maʉ̃ba, ¿Jeowabara Noéra kʼãrẽ ẽ kĩrãkʼa akʉsika? Mawũã ẽ, Jeowabara akʉsi Noéra ẽbẽra dauchabʉta iya jarada kĩrãkʼa obasi baera (Gén. 6:22).

12. ¿Jeremíasbara kʼãrẽta osi sobia jaradiaita ẽbẽrarãba ũrĩamapanasimina?

 ¹² Propeta Jeremíasbida poaga bio jaradiasi bedʼea zroma ũdusimina. Iyara krĩcha zesi wua oẽ baita Daizezeba iya jaradata, ẽbẽrarãba iyi ʉ̃rʉ imitia jarabada kʼarea akʉza ipidabada kʼarea (Jer. 20:8, 9). Mamina iyira maʉ̃ʼa yi edebi ẽ basi. ¿Kʼãrẽa Jeremíasʼra pae ẽ basi akʉza kʼãrẽta osi sobia jaradiaita? Iya nekʼãrẽ ũme ʉ̃rʉ krĩchasi. Aba, iya krĩchasi maʉ̃ bedʼea biaba ẽbẽrarãba jʉ̃ãita nebia ʉ̃rabʉrʉ zeita (Jer. 29:11). Ũme, Jeowabara jarasi iyi bedʼeata jaramarẽã (Jer. 15:16). Abarika dayirãbida bedʼea biata jaradiapanʉ ẽbẽrarã naʉ̃ drʉade sopʉapanʉra mawũã nebiata jʉ̃ãnamarẽã, Jeowaba dayirãsida jidasi iyi trʉ̃ ʉ̃rʉ jaradiadamarẽã. Maʉ̃ra ũme ʉ̃rʉ krĩchabʉrʉde sobiapanañi dayirãba jaradiabʉrʉde ẽbẽrarãba ũrĩkĩrã ẽ mina.

13. ¿Kʼãrẽta kʼawuapanʉ Jesuba nebʉra jarada ʉ̃rʉ Marcos 4:26-29de?

¹³ Ewari bio berabaribʉ Daizeze Bedʼea kʼawuabariraba Daizeze Bedʼeaba jarabʉ ĩjãita. Jesubara naʉ̃ wãrĩnu ʉ̃rʉ jaradiasi ne umia kʼãĩbʉ ʉ̃rʉ bedʼeaside (akʉra Marcos 4:26-29). Iya uda tẽã akʉza bania weada tẽã iyara kʼãrẽ obe ẽ basi maʉ̃ ne u mesera pãwãramarẽãra, awuarabʉrʉ jʉ̃ãsi maʉ̃ ne u pãwãrañena. Maʉ̃ kĩrãkʼa dayirãbida jʉ̃ãibara dayirã nejaradiabarira Daizeze Bedʼeaba jarabʉ kĩrãkʼa ozemarẽã. Dayirãbara dayirã nejaradiabariara jaranʉma ẽ baibara mesera omarẽã Daizeze Bedʼeaba jarabʉta, awuarabʉrʉ jʉ̃ãibara ãya pikãgade oũdubimarẽã Daizeze Bedʼeaba jarabʉ kĩrãkʼa, maʉ̃ kʼarea mapae ẽ baibara akʉza sopʉa ẽ baibara ãya mesera oẽ mina daya kãgabʉ kĩrãkʼa, abarika maʉ̃ ẽbẽra ne umia kĩrãkʼa jʉ̃ã kʼawuabaibara (Sant. 5:7, 8).

14. ¿Kʼãrẽba ũdubibʉ ewari berabari wãne ẽbẽrarãba ũrĩ zeseabʉta?

¹⁴ Ʉ̃kʉrʉ pʉwʉrʉdera ewari bio berabaribʉ ʉ̃kʉrʉ ẽbẽra buru kʼoeita, akʉdaya maʉ̃ranebema yiza aba. Akʉdaya kʼãrẽ berabaridata Gladys akʉza Ruby Allenta, ãyira yi mebẽãʼarabasi, maʉ̃rata yi nãã edebaribasi akʉza zokʼasida pʉwʉrʉ Quebec drʉa kʼawa, Canadáde 1959de. * Mamabema ẽbẽrarãbara Iglesia katolikoraba jarabʉta mejãcha ĩjãpanasi, maʉ̃ba ãyara ũrĩkĩrã ẽ basi Daizeze Bedʼeara. Gladysba jarabʉ: «Poaga ũmebayeda daibara ewariza 8 ora jaradia wãbasi deza deza, mamina ẽbẽra miõba ũrĩkĩrã ẽ basi Daizeze Bedʼeara, ẽbẽrarãbara bentananeba akʉpanasi mamina daita ũdupanasi baera jẽda wãpanasi ãyira, mamina daita pae ẽ basi akʉza sopʉa pana ẽ basi». Maʉ̃ kʼarea ewari berabari wãne ẽbẽrarãbara ũrĩkĩrã ũrĩ wãsi akʉza mamabema pʉwʉrʉbara Jeowa ʉ̃rʉ ũrĩ zesi, atiara mamara kongregasion ũbeabʉ (Is. 60:22).

15. 1 Corintios 3:6, 7ba jarabʉdera, ¿kʼãrẽta jaradiabʉ ẽbẽrarã buru kʼoeda edei ʉ̃rʉra?

¹⁵ Ẽbẽra aba buru kʼoe zemarẽãra mebẽrã mejãchaʉba kʼarebaibara. Mebẽrã kongregasionebemaba kʼarebaseabʉ ẽbẽra aba bʉrʉ kʼoemarẽã (akʉra 1 Corintios 3:6, 7). Mebẽã abaʉba iya Daizeze Bedʼea jaradianʉmʉena ẽbẽra abaʉʼa diabʉ kartata akʉza maʉ̃ ẽbẽrabara ũrĩkĩrãbʉ Daizeze Bedʼeara, mamina maʉ̃ mebẽãra jẽda wãbe ẽ ewari neẽ baera, maʉ̃ kʼarea jarabʉ awuru mebẽã akʉ wãmarẽã maʉ̃ ẽbẽraba kʼawuakĩrãbʉ baera, maʉ̃ mebẽãbara mebẽrã  kĩrãtana edebʉ semanaza maʉ̃ ẽbẽra jaradia wãita, maʉ̃ra mebẽrãba kĩrãtana so zarea diabʉ nekʼawuabaria, adewara kʼarebaseabʉ Jeowa audre kãga wãita, maʉ̃ kʼarea jõmaʉ̃ba kʼarebaseabʉ nekʼawuabarira, ãyisida sobiaseabʉ buru kʼoe zebʉrʉdera (Juan 4:35-38).

16. ¿Sãwũã sobiabaseabʉ Daizeze Bedʼea ʉ̃rʉ jaradiaiba bʉ sãwũãbʉba mejãcha obe ẽ mina?

¹⁶ Edaʉde bʉa obada kĩrãkʼa obe ẽ bayi bʉ kayabʉ kʼarea akʉza zareata jõ wã baera, mawũãsidu bʉra sobia baseabʉ Daizeze Nokʼo ʉ̃rʉ jaradiabʉ kʼarea. Akʉdaya David nebʉra ʉ̃rʉ, Davidba iyi gorogororabawaraʉba ẽdrʉbi wãibaside ãyi mebẽrãta akʉza amalekitaraba zrʉgadata, yumakẽrãra dosientorata David nezokʼaraba akʉbesi ãya erbadara, ãyira yõena wã ẽ basi paebasi baera. Davidʼba wuabema gorogororabawaraʉba ãyi juwa edre baebisida amalekitarãra, maʉ̃ kʼarea ãya nekʼare mejãcha jidadata Davidba jarasi dedekadamarẽã yi yõ ẽ badara akʉza yi yõnara jõma abarika (1 Sam. 30:21-25). Naʉ̃ nebʉraba dayirã nebiata jaradiabʉ, dayirãba krĩchaseabʉmina jõma diabe ẽãta mamina soiduba daya diaseabʉta diapanʉbʉrʉ sobiabaseabʉ ẽbẽra aba buru kʼoebʉrʉde.

17. ¿Kʼãrẽa biga diadaibara Jeowa?

¹⁷ Jeowa biga diapanʉ iya dayirãba obʉta bia akʉbʉ baera. Iya kʼawuabʉ dayirãba obe ẽãta ẽbẽraba ũrĩkĩrãnamarẽã dayirãba jaradiabʉra akʉza obe ẽ ẽbẽrarãta iyi ode bakĩrãnamarẽã. Mawũãsidu iyara akʉbʉ dayirãba zarea obʉra akʉza soiduba okĩrãpanʉta iya zokʼabʉta, adewara maʉ̃ kʼarea iya dayirã nebia diakĩrãbʉ. Iyara dayirãra sobiabiseabʉ krĩcha ẽã kʼãrẽ trabajo obʉta iyita (Juan 14:12). Wãrĩnu kʼawuapanaibara Jeowabara dayirãra bia akʉbʉta dayirãta mapae ẽ bʉrʉ.