1. Pine nemene matre easa madrin?

 EASA madrin pine laka, Itretre Anyipici Iehova së! Easa xome la ëje i Akötresie ngöne la mele së, me anyipici Nyidrë ngöne la huliwa ne cainöj me inine la itre atr. Easa madrin troa xatuane la ketre atr ka “hmalahnine troa kapa la mele ka pë pun.” (Itre hu. 13:48) Caasi hi la mekuna së me Iesu, ngöne lo kola bëeke hnene la itretre drei nyidrë qa hna cainöj. Öni Tusi Hmitrötr: “Hnene la uati hmitrötr hna amadrinë nyidrëti catr.”—Luka 10:1, 17, 21.

2. Tune kaa la aqane tro sa amamane laka, ka nyipiewekë koi së la huliwa ne cainöj?

² Easa wangatrune la huliwa ne cainöj. Öni Paulo aposetolo koi Timoteo: “Wai eö kö, me itre ini hnei eö hna hamën. . . . Nge tro hë eö a amele eö, me itre ka drei eö.” (1 Tim. 4:16) Ame la huliwa ne cainöj ke, jëne mel kowe la nöjei atr. Celë hi matre, easa thupëne la aqane ujë së, wanga troa hetre ethan kowe la ëje i Akötresie me kowe la maca hne së hna tro fë. (Fil. 1:27) Ketre, qëmekene troa cainöj, easa pane hnëkë me sipo Iehova troa amanathithine la itre trengecatre së. Aqane tro hi së lai a ‘thupëne la aqane hamë ini së.’

3. Nemene la aqane ujë ne la itre atr kowe la maca ne la Baselaia? Qaja jë la ketre ceitun.

³ Ngacama easa kuca la hne së hna atreine ngöne la hna cainöj, ngo ala xalaithe hi la ka kapa la maca ngöne la teritoar. Hanawang la ka traqa koi Georg Lindal, ketre trejin ka cainöje caas e Island, qaane lo macatre 1929 koi 1947. Itre thauzane la itre itusi hna tro fë hnei Georg, ngo pëkö atr ka kapa la nyipici. Öni nyidrë: “Ame itre xan, tha nyipiewekëne kö angatre la maca ka loi, nge hetre itre xan ka icilekeu.” Thupene lai, hna upe la itre xaa mesinare ka sine la Ini Ne Gileada troa cainöj e cili. Nge thupene  la 9 lao macatre, hetre Atre Anyipici Iehova hë e Island. *

4. Nemene la aqane ujë së ngöne la itre atr a thipetrije la maca ka loi?

⁴ Easa kucakuca ngöne la itre atr a thipetrije la maca hne së hna tro fë. Tui Paulo, easa ‘hleuhleu, nge hace la hni së.’ Akötre catre Paulo ke, alanyimu la angetre Iudra ka qaja ka hape, tha Iesu kö la Mesia hna thingehnaean. (Rom. 9:1-3) Tune kaa e tha kökötre kö la ka ini tus, ngacama hne së hna nue trengecatr matre troa hnëkë hnyawa me thithi sai angeic? Tune kaa e tha hne së kö hna hane xatuane la ketre atr troa xomi bapataiso? Hapeu, tro kö sa mekun laka, tha hnei Iehova kö hna amanathithine la huliwa ne cainöje së? Ame ngöne la tane mekun celë, easa troa sa la lue hnying: (1) Nemene la ka nyipiewekë ngöne la easa cainöj? (2) Tune kaa la aqane tro sa goeëne la huliwa ne cainöj?

5. Pine nemene matre ame itre xaa ijin, pëkö thangane la huliwa ne cainöje së?

⁵ Öni Tusi Hmitrötr göne la atr ka kuca la aja i Akötresie, ka hape: “Troa loi xölen’ asë la hnei angeice hna kuca.” (Sal. 1:3) Tha kolo kö lai a qaja ka hape, tro palahi a hetre thangane la huliwa së koi Iehova. Tusi Hmitrötre fe a qaja ka hape, “atraqate la gomegome” ne la atr ke, hnene la itre ngazo i angeic me ngazo ne la itre xan. (Iobu 14:1) Ketre, itre ka icilekeu a sewe së troa cainöjëne la maca ka loi. (1 Kor. 16:9; 1 Thes. 2:18) Ngo nemene la ka nyipiewekë ngöne la easa cainöj? Tro sa ce wang la itre xaa trepene meköt.

6. Nemene la ka nyipiewekë ngöne la easa cainöj?

⁶ Iehova a wangatrune la itre trengecatre së me aqane xomihni së. Ngacama tha kapa kö itre xan la maca hne së hna tro fë, ngo ame la ka sisitria koi Iehova ke, ene la ihnimi së me aqane hnëkë së kowe la huliwa ne cainöj. Celë hi lai hna qaja hnei Paulo, lo kola hape: “Ka meköti pala hi Akötresie, matre thatreine kö nyidrëti thëthëhmine la itre huliwa i nyipunie, me ihnim hnei nyipunieti hna amamane kowe la ëje i nyidrë, ene lo itre huliwa i nyipunie ekö me enehila kowe la ange ka hmitrötr.” (Heb. 6:10) Eje hi, tha sihngödri kö koi Iehova la itre trengecatre së me ihnimi së, ngacama tha kapa kö la itre atr, la maca hne së hna tro fë. Haawe, tha tro kö sa thëthëhmine lo hnei Paulo hna qaja koi angetre Korinito ka hape: “Tha gufa kö la itre trenge catre i nyipunie koi Joxu,” ngacama tha öhne kö së la thangane la huliwa së.—1 Kor. 15:58.

7. Nemene la ini hne së hna xom qa ngöne la hnei Paulo aposetolo hna qaja göne la huliwa ne cainöj?

 ⁷ Paulo aposetolo la ketre mesinare, nge tru catr la itre ekalesia hnei nyidrëti hna acil. Ame la itre xan a qaja ka hape, thatreine kö nyidrë hamë ini, tha hnei Paulo kö hna selën la etrune la itre atr hnei nyidrëti hna xatuane troa atre la nyipici. Öni nyidrëti pe koi angatr ka hape: “Tru catre kö la itre huliwang . . . hui angatr.” (2 Kor. 11:23) Tui Paulo, tha tro kö sa thëthëhmine laka, ame la ka sisitria koi Iehova ke, itre trengecatre së me aqane xomihni së.

8. Nemene la nyine tro sa mekun göne la huliwa ne cainöj?

⁸ Easa amadrinë Iehova ngöne la easa cainöj. Hnei Iesu hna upe la 70 lao atre drei nyidrë troa cainöjëne la maca ka loi, nge hnei angatre hna bëek “cememine la madrin.” Pine nemen? Öni angatr koi Iesu: “Goi drei huni fe hnene la itre dremoni la eahuni a ameköti angatr ngöne la ëje i nyipë.” Ngo hnei Iesu hna sa koi angatr ka hape: “The madrine kö pine la hna drei nyipunie hnei itre dremoni, ngo madrine jë pe laka, hetre ëje i nyipunieti fe hë e hnengödrai.” (Luka 10:17-20) Atre hi Iesu laka, hetre itre jol hnei angatr hna troa cile kow, ngöne la hna cainöj. Ketre, thatre kö së la etrune la itre atr hnei angatr hna xatuane troa atre Iehova. Ame la ka sisitria kowe la itretre dreng ke, tha ene kö la thangane la huliwa ne cainöj, ngo itre trengecatre i angatr hna nue koi Iehova.

9. Thenge la Galatia 6:7-9, nemene la hne së hna troa kapa e tro sa catre cainöj?

⁹ Maine tro palahi sa xomihni ngöne la hna cainöj, tro hë sa kapa la mel ka pë pun. Ame la easa jume la itre itine nyipici, easë fe hi lai a “tran thatraqane la ua.” Kolo lai a hape, easa nue la uati hmitrötre i Akötresie troa eatrongë së ngöne la mele së. Maine tro sa “catr,” tro hë sa hetrenyi la mel ka pë pun. Ketre, tha tro hë sa kucakuca, e pëkö atr hne së hna xatuane troa xomi bapataiso.—E jë la Galatia 6:7-9.

10. Pine nemene matre itre xan a kapa la maca ka loi nge itre xan a xelen?

¹⁰ Hnene la pengöne la aliene hni ne la itre atr, matre angatr a kapa maine xelene la maca ka loi. Celë hi hna amamane hnei Iesu ngöne lo ceitune i nyidrë göne la atre eëny. Hnei angeic hna jume la itre itine feja ngöne la itre götrane ka isapengön. Ngo hna cia hi ngöne la gaa hmelek. (Luka 8:5-8) Hnei Iesu hna aceitunëne la itre götrane cili memine la hni ne la itre atr ka drenge la “Trengewekë i Akötresie.” (Luka 8:11-15) Tune lo atre eëny, tha tro kö sa musinëne maine saze la ketre atr. Easa isa ujë thenge la aliene hni së. Ame la hnëqa së ke, troa jume la itre itine nyipici, ene la maca ne la Baselaia i Akötresie. Öni Paulo aposetolo: “Tro la nöjei atr a isa kepe thupen, thenge la isa huliwa i angatr,” ngo tha thenge kö la thangane la huliwa i angatr.—1 Kor. 3:8.

11. Pine nemene matre ame koi Iehova, hnei Noa hna eatrëne la huliwa i angeic? (Wange ju la icetrön.)

¹¹ Hnene la itre hlue i Iehova ekö hna cainöj kowe la itre atr ka xelene la maca. Tui Noa, “atre cainöjëne la meköt” koi nyimu macatre. (2 Pet. 2:5) Eje hi, aja i Noa tro la itre atr a kapa la maca, ngo tha celë kö la ka traqa. Hnei Akötresieti hna  upi Noa troa cane la aka, me hape: “Tro eö a lö hnine la aka, eö, me ite nekö i ’ö, me ifënekö i ’ö, me ite föe ne la ite nekö i ’ö ce me eö.” (Gen. 6:18) Pine laka, tru catre la aka matre Noa a mejiune laka, nyimutre la itre atr ka troa drei angeic. (Gen. 6:15) Ngo pëkö ka drenge la maca hnei angeic hna tro fë. (Gen. 7:7) Hapeu, ka gufa kö koi Iehova la itre trengecatre hna kuca hnei Noa? Ohea! Ame koi Nyidrë, hnei Noa hna eatrëne hnyawa la hnëqa i angeic.—Gen. 6:22.

12. Nemene la ka hamë madrine koi Ieremia troa cainöj ngacama kola icilekeu?

¹² Nyimutre la itre macatre ne xomihni Ieremia perofeta la itre atr ka icilekeu. Ame la ketre ijin, hnei angatr hna “qaqa [Ieremia] me jele ngazo” angeic. Kucakuca catre angeic, nge hnei angeic hna mekun troa nue la hnëqa i angeic. (Iere. 20:8, 9) Ngo tha hnei Ieremia kö hna nue la huliwa ne cainöj! Nemene la ka thue trengecatre me madrine koi angeic ngöne la huliwa cili? Hnei angeic hna lapa mekun la lue ini ka sisitria. Ame la hnapan, angeic a tro fë la maca i Akötresie ka hamëne “la pune memine la mejiun” kowe la itre atr. (Iere. 29:11) Ame la hnaaluen, angeic la qeneqaja i Iehova. (Iere. 15:16) Ketre tu së fe, easa tro fë la maca ka hamë mejiune kowe la itre atr, nge easa nyitrengewekë i Akötresie. Maine tro sa lapa mekun la lue ini cili, tro hë sa madrin ngacama tha kapa kö itre xan, la maca hne së hna tro fë.

13. Nemene la ini hne së hna xom qa ngöne la ceitune i Iesu ngöne Mareko 4:26-29?

¹³ Hmitre troa kökötre la lapaunene la ketre atr. Celë hi hna qaja hnei Iesu ngöne la ceitune ne la atre eëny ka meköl. (E jë la Mareko 4:26-29.) Tha hna canga cia kö la itre itin hnei angeic hna jum. Ketre, thatreine kö angeic troa canga aciane la itre feja. Ketre tu së fe, loi e tro sa atreine itreqe ke, tha canga mama kö la itre trengecatre hna kuca hnene la itre ka ini tus. Nge ketre, tha tro kö sa musinëne la itre ka ini tus troa canga trongëne la itre hnei angatr hna inin. Haawe, tha tro pi kö sa kucakuca e tha canga saze kö angatr. Tune la easa eëny, nyipiewekë tro sa atreine xomihni aqeany ngöne la easa inine la itre atr.—Iako. 5:7, 8.

14. Nemene la ceitune ka amamane laka, nyipiewekë troa nue ijine matre hetre thangane la huliwa ne cainöj?

¹⁴ Ame ngöne la itre xaa nöj, nyimutre la itre macatre ne cainöje la itre trejin, qëmeken troa öhne la thangane la huliwa i angatr. Celë hi hna melën hnei Gladys me Ruby Allen, lue trejin ka pionie lapa e Québec ngöne lo macatre 1959. * Nyimutre la itre atr ka xelene la maca ka loi ke, angatr a xouene la itre hene ne hmi katolik. Öni Gladys: “Lue macatre ne cainöje nyio ngöne la itre hnalapa trootro. Ame ngöne la drai, nyio a cainöj koi 8 lao hawa. Ngo pëkö ka kapa la maca hnei nyio hna tro fë! Öhnyi nyio hi hnei angatr, ngo hnei angatr hna thinge la itre mamalama. Ngo hnei nyio palahi hna catre cainöj.” Thupene la itre macatre, kola saze la aqane ujë ne la itre atr, nge hetre thangane hë la huliwa i nyidro. Ame hë enehila, köni ekalesia hë ngöne la traone cili.—Is. 60:22.

15. Thenge la 1 Korinito 3:6, 7, ijije kö tro la caa trejin a xatuane la ketre atr troa xötrethenge Iesu?

¹⁵ Tha ijiji së kö tro xatuane caasine la  ketre atr troa xötrethenge Iesu. Hnëqa ne la ekalesia asë troa xatuane la ketre atr troa acatrene la lapaune i angeic, uti hë la kola xomi bapataiso. (E jë la 1 Korinito 3:6, 7.) Maine jë, ketre trejin a hamë zonal maine tarak kowe la ketre atr ka ajan. Ngo tru la huliwa i angeic, matre hnei angeic hna sipone kowe la ketre trejin troa iwai hmaca. Hnene la trejin cili hna nyiqane ini tus memine lai atr, nge hnei angeic hna hëne la itre xaa trejin troa hane sine la ini tusi nyidro. Kösë itre trejin a fie la itine nyipici hna jume ngöne la hni ne lai atr. Tune la hna qaja hnei Iesu, kola ce madrine hnene la atre jumi feja me atre menuëne la hlapa.—Ioane 4:35-38.

16. Pine nemene matre loi e tro palahi sa madrin troa cainöj, ngacama hna tithi së hnei mec nge pëhë trengecatre së?

¹⁶ Pine nemene matre loi e tro palahi sa madrin troa cainöj me inine la itre atr, ngacama hna tithi së hnei mec nge pëhë trengecatre së? Pine laka, easa kuca la hnëqa së. Pane mekune jë la ka traqa koi Dravita joxu me itre sooce i angeic, ngöne la angatr a amelene la itre atrene la hnepe lapa i angatr me xome hmaca la itre mo i angatr hna atrekënö hnei angetre Amaleka. Kucakuca catre la itre sooce i Dravita, matre tha hnei angatre kö hna isi. Hna upi angatre pe troa thupëne la itre ewekë. Thupene la Dravita a ngaan la angetre Amaleka, hnei angeic hna thawa ceitun la itre mo kowe la itre sooc. (1 Sam. 30:21-25) Celë fe hi hne së hna kuca ngöne la huliwa ne cainöj. Tru la madrinene la itre trejin ngöne la kola thapa la ketre atr qa ngöne la fene celë ka ngazo, me xatua angeic troa trongëne la gojenyi ne mel.

17. Nemene la aqane goeëne Iehova la huliwa ne cainöje së?

¹⁷ Tru la hni ne ole së koi Iehova ke, Nyidrëti a wangatrune la itre trengecatre hne së hna nue ngöne la hna cainöj. Atre hi Nyidrë laka, tha tro kö sa musinëne la itre atr troa drei së. Ame pe, öhne hi Iehova la itre trengecatre së me itre aliene hni së, nge Nyidrëti a amanathithin. Ketre, easa madrine troa sine la huliwa ne iamele hna kuca e cailo fen. (Ioane 14:12) Haawe, catre pi së ke, tro palahi Akötresieti a amanathithi së!