1. Mun na ninsɔndiyaba ni nɛɛma lo an fɛ ka kɛ Jehova Seerew ye?

NINSƆNDIYABA ni nɛɛma lo an fɛ ka kɛ Jehova Seerew ye! An ye Jehova sagokɛlaw ye ani an b’a yira ko an y’a seerew ye an kɛtɔ ka mɔgɔw waaju ani k’u kalan a koo la. Mɔgɔ ‘minw bɛɛ labɛnnin lo ka sɔn ɲɛnamaya banbali ma,’ n’an sera k’u dɔ dɛmɛ a kɛra Jehova sagokɛla ye, o b’an ninsɔn diya (Kɛw. 13:48, NW). An dusu be diya i ko Yezu. Ale “nisɔndiyara kosɔbɛ” tuma min na a ka kalandenw y’a lakali a ye u ye wale diiman minw sɔrɔ waajuli la.—Luka 10:1, 17, 21.

2. An be se k’a yira cogo di ko waajuli baara kɔrɔtanin lo kosɔbɛ an fɛ?

² Waajuli baara kɔrɔtanin lo kosɔbɛ an fɛ. Ciden Pol ye Timote jija ko: “I yɛrɛ minɛ ani k’i ka mɔgɔ kalancogo kɔlɔsi fana.” O kɔ, Pol ko: “N’o kɛra, i bena i yɛrɛ kisi ani k’i lamɛnbagaw fana kisi.” (1 Tim. 4:16). O la, an ka waajuli baara be mɔgɔw niin kisi. Tuma o tuma, an b’an “yɛrɛ minɛ” sabu an ye Ala ka Masaya ka marakɔnɔmɔgɔw ye. An b’a fɛ tuma bɛɛ ka koow kɛ minw be nɔɔrɔ la Jehova kan ani minw bɛnnin lo ni kibaro diiman ye (Filip. 1:27). An b’a yira ko an be “mɔgɔ kalancogo kɔlɔsi,” an kɛtɔ k’an yɛrɛ labɛn koɲuman waajuli kama. An be dɛmɛ ɲini fana Jehova fɛ ka sɔrɔ ka mɔgɔw waaju.

3. Yala bɛɛ lo bena sɔn Masaya kibaro diiman na wa? Misali dɔ fɔ.

³ Hali n’an b’an seko fisaman kɛ waajuli la, n’a sɔrɔ mɔgɔ caaman tɛna u mako don Masaya kibaro diiman na an ka kiinw kɔnɔ. An ka balimacɛ Georg Lindal ka koo lajɛ. Ale ye waajuli kɛ a kelen Isilandi jamana yɔrɔ caaman na k’a ta saan 1929-1947. A y’an ka sɛbɛ waa caaman to mɔgɔw ye. O bɛɛ n’a ta, mɔgɔ si ma kɛ Jehova Seere ye. A y’a sɛbɛ ko: “A yɛrɛ tun be komi dɔw wulila tiɲɛn batoli  kama. Mɔgɔw fanba m’u mako don Masaya kibaro diinan na.” Misɔnden minw ye Gilead lakɔli kɛ, olu dɔw nana walisa ka dɛmɛ don waajuli baara la yen. Nka, olu fana ye waajuli kɛ saan caaman ani mɔgɔ bɛrɛ m’u mako don kibaro diiman na. A laban, saan 9 kɔ le dɔw y’u yɛrɛkun di Jehova ma ani ka batize. *

4. Ni mɔgɔw tɛ sɔnna ka kibaro diiman lamɛn, o be se ka mun lo kɛ an na?

⁴ Ni mɔgɔw tɛ u mako don kibaro diiman na, an dusu be tiɲɛ. O be se k’an tɔɔrɔ i ko o ɲɔgɔn ye Pol tɔɔrɔ cogo min na. Tuma min na Yahutuw fanba ma sɔn a ma ko Yezu lo ye Masiya ye, o ye mun lo kɛ Pol la do? A ko: “Dusukasi be ne la kosɔbɛ, ne nii tɔɔrɔnin lo tuma bɛɛ.” (Ɔrɔm. 9:1-3). N’a sɔrɔ i be bibulukalan kɛra ni mɔgɔ dɔ ye. I be i seko bɛɛ kɛ walisa ka kɛ kalanfa ɲuman ye ani i be delili caaman kɛ kalanden koo la. Nka, a tigi be min kalanna a t’o sira tagama ani i ka ɲi k’a ka bibulukalan lalɔ. Wala n’a sɔrɔ i ma deli ka bibulukalan kɛ ni mɔgɔ dɔ ye ani a tigi batizera. Yala o kɔrɔ ko ele nɔɔ lo ani ko Jehova ninsɔn man di i kɔrɔ i ka waajuli baara koo la wa? Barokun nin na, an bena ɲiningali fila nunu jaabi: 1) Mun lo b’a yira ko an be sanga sɔrɔla waajuli la? 2) An ka ɲi ka kɛ ni laɲinita bɛnnin jumanw lo ye?

5. An be baara min kɛra Jehova ye, mun na o tɛ ɲɛ an bolo tuma bɛɛ i ko an b’a fɛ cogo min na?

⁵ Bibulu b’a fɔ Ala sagokɛla koo la ko: “A be koo o koo kɛ, o be ɲa.” (Zab. 1:3). Nka o kɔrɔ tɛ ko an be koo o koo kɛ Jehova ye, o be ɲɛ an bolo i ko an b’a fɛ cogo min na. Adamaden b’a sii “kɛ sɛgɛn na,” k’a sababu kɛ an si dafanin tɛ (Zɔbu 14:1). Tuma dɔw la fana, an kɛlɛbagaw be se k’an bali ka waajuli kɛ i ko an be deli k’a kɛ cogo min na (1 Kor. 16:9; 1 Tes. 2:18). O la Jehova fɛ, mun lo b’a yira n’an be sanga sɔrɔla wala n’an tɛ sanga sɔrɔla waajuli la? An ka Bibulu ka sariyakolo dɔw lajɛ minw bena an dɛmɛ k’o ɲiningali jaabi.

6. Jehova fɛ, mun lo b’a yira n’an be sanga sɔrɔla wala n’an tɛ sanga sɔrɔla waajuli la?

⁶ Jehova b’an ka muɲuli n’an ka jijaliw lo filɛ. Mɔgɔw y’an lamɛn wo, u m’an lamɛn wo, Jehova t’o lo filɛ. Ale fɛ, an be sanga sɔrɔ waajuli la, n’a y’a sɔrɔ ale kanuya lo b’an lasun k’o baara kɛ ni kisɛya ye. Ciden Pol y’a sɛbɛ ko: “Aw ye baara min kɛ, ka koɲuman minw kɛ ka tɛmɛ, ani aw be minw kɛra sisan ka Ala ka mɔgɔw dɛmɛ, k’a yira Ala la ko a koo ka di aw ye, Ala ka ɲi, a tena ɲinɛ o si kɔ.” (Eburuw 6:10). An ye baara min kɛ ani an ye Ala kanu cogo min na, a tɛ ɲinɛ o kɔ, hali n’o m’a to an ye Bibulu kalanden dɔ dɛmɛ a batizera. O la, Pol ye min fɔ Korɛntikaw ye, o ɲɛsinna ele fana ma. A ko: “L’a la ko aw be baara min  kɛra Matigi ye, k’o tena kɛ gwansan ye.” I ka baara tɛna kɛ gwansan ye hali n’i jigi tun be min na, o ma kɛ.—1 Kor. 15:58.

7. Ciden Pol ye min fɔ a ka cidenya baara koo la, an be kalan juman lo sɔrɔ o la?

⁷ Ciden Pol tun ye misɔnden ɲuman ye. A ye kafow sigi dugu caaman na. Nka, tuma min na dɔw ye Pol kɔrɔfɔ ko a tɛ kalanfa ɲuman ye, a ye mɔgɔ hakɛ min dɛmɛ u kɛra kerecɛnw ye, a ma kuma o koo la. Minw tun b’a jati k’u ka fisa ni Pol ye, a y’a fɔ olu koo la ko: “Ne tɛmɛna olu kan o baara la.” (2 Kor. 11:23). I ko Pol, a to i hakili la ko i be jijali ani muɲuli min kɛra, olu lo nafa ka bon kosɔbɛ Jehova ɲɛɛ kɔrɔ.

8. An ka ɲi ka mun lo to an hakili la an ka waajuli baara koo la?

⁸ An ka waajuli baara ka di Jehova ye. Yezu y’a ka kalanden 70 ci ka taga Masaya waajuli kɛ. U tilara tuma min na, u “segira ni nisɔndiya ye.” Mun na u ninsɔn diyanin tun lo? U ko: “Matigi, i tɔgɔ barika la, hali jinaw tun te se ka ban an ka fɔta ma.” Nka, Yezu ye u ka miiriya latilen ko: “Aw kana nisɔndiya bari jinaw tun te se ka ban aw ka fɔta ma. Nga aw ka nisɔndiya bari Ala y’aw tɔgɔ sɛbɛn a fɛ sankolo la.” (Luka 10:17-20). Yezu tun b’a lɔn ko u tɛna o wale diimanw ɲɔgɔn sɔrɔ waajuli la tuma bɛɛ. Minw ye Yezu ka kalandenw lamɛn, an t’a lɔn u hakɛ min nana kɛ kerecɛnw ye. Yezu ka kalandenw tun ka ɲi k’a faamu ko u man ɲi ka ninsɔn diya dɔrɔn sabu mɔgɔw be u lamɛn. Nka, min yɛrɛ ka ɲi k’u ninsɔn diya kosɔbɛ o ye ko u be baaraba min kɛra, o ka di Jehova ye.

9. Ka kɛɲɛ ni Galatikaw 6:7-9 ka fɔta ye, n’an t’an fari faga waajuli baara la, an bena nafa juman lo sɔrɔ?

⁹ N’an t’an fari faga waajuli baara la, an bena ɲɛnamaya banbali sɔrɔ. An k’an seko bɛɛ kɛ ka mɔgɔw waaju ani k’u kalan kibaro diiman na. O la, an b’an ka koo bɛɛ kɛra “nii senuman ka koo ye,” sabu an b’a to Ala ka hakili senu k’an ɲɛminɛ bɛrɛbɛrɛ an ka ɲɛnamaya kɔnɔ. Jehova ye layidu ta ko a bena ɲɛnamaya banbali di an ma, n’an ma “sigɛn” wala ka “dɛsɛ” ka waajuli kɛ. A bena o kɛ, hali n’an ma se ka mɔgɔ si dɛmɛ a batizera.—Galatikaw 6:7-9 kalan.

10. N’an be waajuli kɛra, mun na dɔw b’an lamɛn ani dɔw be ban k’an lamɛn?

¹⁰ Mɔgɔ dusukun cogoya lo b’a to, a b’an lamɛn wala a be ban k’an lamɛn. Yezu ye an dɛmɛ k’o tiɲɛn kuma faamu a ka talen na, a ye min la dannikɛla dɔ koo la. O cɛɛ ye suman seri dugukolo sifa caaman kan. Nka, min benna dugukolo ɲuman kan, o dɔrɔn lo bonyana ka den (Luka 8:5-8). Yezu ko o dugukolo sifaw ye mɔgɔw dusukun cogoya lo ye, o min b’a to u tɛ “Ala ka kuma” ta cogo kelen na (Luka 8:11-15). I ko o dannikɛla, an be Masaya kisɛ minw dan mɔgɔw dusukun na, an tɛ se ka foyi kɛ walisa u ka bonya ani ka den. An ka kunkanbaara ye ka to ka Masaya kisɛ ɲumanw dan. Ciden Pol y’a fɔ ko mɔgɔ “kelen kelen bɛɛ bena u ka sara sɔrɔ ka kɛɲɛ n’u ka baara ye.” U tɛna u ka sara sɔrɔ ka kɛɲɛ n’u ka baara tɔnɔ ye.—1 Kor. 3:8.

11. Tuma min na Nuhun tun be waajuli kɛra, hali ni mɔgɔw m’a lamɛn, mun na Jehova dusu diyara a kɔrɔ? (Jaa lajɛ ɲɛɛ fɔlɔ kan.)

¹¹ Kabi galen, Jehova sagokɛla caaman tun be waajuli kɛ ani mɔgɔw tun t’a fɛ k’u lamɛn. Misali la, Nuhun ye “tilenninyako fɔ” saan 40 wala 50 ɲɔgɔn kɔnɔ (2 Piyɛri 2:5). Siga t’a la, a jigi tun b’a la ko mɔgɔw  bena lamɛnni kɛ a fɛ. Jehova kɔni tun ma foyi fɔ a ye o koo la. Nka, tuma min na a tun be cii dira Nuhun ma ko a ka kurun lɔ, a y’a fɔ a ye ko: “E ka don kurun kɔnɔ n’i muso, an’i dencɛw n’i biranmusow ye.” (Zɛnɛzi 6:18). Ani tuma min na Jehova ye kurun bonya kofɔ Nuhun ye, n’a sɔrɔ a y’a faamu ko mɔgɔ caaman tun tɛna sɔn k’ale lamɛn (Zɛnɛzi 6:15). I ko an b’a lɔn cogo min na, hali mɔgɔ kelen ma sɔn ka mɛnni kɛ Nuhun fɛ (Zɛnɛzi 7:7). Yala Jehova y’a jati ko Nuhun ma waajuli kɛ bɛrɛbɛrɛ wa? Ayi dɛ! Jehova dusu tun ka di Nuhun kɔrɔ sabu a ye min ɲini Nuhun fɛ, a y’o lo kɛ tigitigi.—Zɛnɛzi 6:22.

12. Hali ni mɔgɔw tun tɛ kira Zeremi lamɛn ani u tun b’a kɛlɛ, mun lo y’a dɛmɛ ka ninsɔndiya sɔrɔ waajuli la?

¹² Kira Zeremi fana ye waajuli kɛ saan 40 ni kɔ kɔnɔ, hali k’a sɔrɔ mɔgɔw tun t’a lamɛn ani u tun b’a kɛlɛ. A fari tun fagara fɔɔ a tun b’a fɛ ka waajuli dabila. Mun na do? A ko: “Masaba ka kuma kɛra ne lɔgɔbɔ sababu ni ne kɔrɔfɔkun ye.” (Zer. 20:8, 9). Nka, Zeremi ma waajuli dabila! Mun lo y’a dɛmɛ ka see sɔrɔ a ka miiriya juguw kan ani ka ninsɔndiya sɔrɔ waajuli la? A sinsinna koo kɔrɔtanin fila lo kan. A fɔlɔ, Zeremi ye Ala ka kuma min fɔ mɔgɔw ye, o tun bena a to u be “jigi ɲuman ni laban koɲuman” wala siniɲasigi ɲuman sɔrɔ (Zer. 29:11, Bible senuma). A filanan, Jehova tun ye a tɔgɔ la Zeremi kan (Zer. 15:16). An fana be jigiya kumaw lo fɔ mɔgɔw ye ani Jehova tɔgɔ lara an kan. Mɔgɔw y’an lamɛn wo, u m’an lamɛn wo, n’an be sinsin o koo kɔrɔtanin fila kan, o bena a to an be ninsɔn diya.

13. Yezu ka talen min be sɔrɔ Mariki 4:26-29 kɔnɔ, o b’an dɛmɛ ka mun lo faamu?

¹³ Mɔgɔ be wagatijan ta ka sɔrɔ ka limaniya. Yezu y’o tiɲɛn kuma fɔ a ka talen na, a ye min la cɛɛ dɔ koo la min ye danni kɛ ani a lara ka sinɔgɔ (Mariki 4:26-29 kalan). O cɛɛ ye danni kɛ ani o kɔ, sumankisɛ falenna ka to ka bonya dɔɔni dɔɔni. Dannikɛla tun tɛ se ka foyi kɛ walisa a ka bonya joona joona. N’a sɔrɔ ele fana ka ɲi ka kɔnɔni kɛ wagatijan kɔnɔ ka sɔrɔ k’a ye ko i ka Bibulu kalanden be min kalanna, a b’o sira tagamana. Dannikɛla tɛ se k’a kɛ suman be falen ka bonya joona joona i ko ale b’a fɛ cogo min na. An fana tɛ se k’a kɛ an ka Bibulu kalanden ka limaniya be bonya joona joona i ko an b’a fɛ cogo min na. O la, n’i ka Bibulu kalanden tɛ ɲɛtaga kɛra i ko i b’a fɛ cogo min na, kana i fari faga. Walisa ka mɔgɔw kɛ Krista ka kalandenw ye, an ka ɲi ka muɲu i ko dannikɛla.—Zaki 5:7, 8.

14. Misali dɔ fɔ min b’a yira ko a be se ka wagatijan ta mɔgɔw be sɔrɔ k’a daminɛ k’an lamɛn.

¹⁴ Yɔrɔ dɔw la, walisa mɔgɔ kelen ka batize, o be se ka wagatijan ta. An ka balimamuso Gladys ni Ruby Allen ka koo lajɛ. Dɔgɔ ni kɔrɔ lo ani saan 1959, u ye u kɛ kudayi piyɔniyew ye. U y’u ci dugu dɔ la Kebɛk mara la, Kanada jamana na. * Mɔgɔw tun tɛ sɔn ka lamɛnni kɛ sabu u tun be siran u sigiɲɔgɔnw ni u ka legilizi kuntigiw ɲɛ. Gladys ko: “Saan fila kɔnɔ, an tora ka waajuli kɛ soo ni soo lɛri segi loon o loon. Nka, mɔgɔ si ma sɔn k’an lamɛn. Mɔgɔw tun be na daa la, n’u y’a ye ko anw lo, u be tɛmɛ n’u yɛrɛ ye. Nka, an m’an fari faga.” Dɔɔni dɔɔni, mɔgɔw ka kɛwalew yɛlɛmana ani dɔw y’a daminɛ k’an lamɛn. Sisan, kafo saba lo be o dugu la.—Ezayi 60:22.

15. Baara min ye ka mɔgɔw kɛ Krista ka kalandenw ye, 1 Korɛntikaw 3:6, 7 b’an dɛmɛ ka mun lo faamu o koo la?

 ¹⁵ Balima caaman lo be dɛmɛ don walisa mɔgɔ dɔ ka kɛ Krista ka kalanden ye. Kafodenw kelen kelen bɛɛ be se ka Bibulu kalanden dɛmɛ a ka ɲɛtaga kɛ ani ka batize (1 Korɛntikaw 3:6, 7 kalan). Misali la, balima dɔ be sɛbɛnin wala zurunali dɔ to makodonmɔgɔ dɔ ye. O kɔ, o balima b’a ye ko a tɛna wagati sɔrɔ ka segi ka taga bɔ o tigi ye walisa k’a dɛmɛ Alako ta fan fɛ. O kama, a b’a ɲini balima wɛrɛ fɛ a ka segi ka taga bɔ o tigi ye. O balima sera ka bibulukalan daminɛ n’o tigi ye. A tora ka balima wɛrɛw weele u k’a bila sira o bibulukalan na. O balimaw kelen kelen bɛɛ ye Bibulu kalanden jija cogo dɔ la ani k’a dɛmɛ a ka dɔ fara a ka limaniya barika kan. O cogo la, minw bɛɛ ye jijalibaw kɛ ka kalanden dɔ dɛmɛ, u bɛɛ be se ka ninsɔndiya n’o tigi batizera.—Zan 4:35-38.

16. Mun na i be se ka ninsɔndiya sɔrɔ waajuli la, hali n’i tɛ sera ka caaman kɛ i ko fɔlɔ la?

¹⁶ N’a sɔrɔ i tɛ sera ka waajuli kɛ ani ka mɔgɔw kalan i ko fɔlɔ la sabu i man kɛnɛ wala i barika dɔgɔyara. Nka i be sera ka min kɛ waajuli baara la, i be se ka ninsɔndiya o kosɔn. An ka masacɛ Dawuda ka koo lajɛ. Amalɛkiw tun nana u somɔgɔw n’u bololafɛnw cɛ ka taga n’u ye. Dawuda n’a ka kɛlɛkɛcɛw tagara u bɔsi Amalɛkiw la. Dawuda ka kɛlɛkɛcɛ mɔgɔ kɛmɛ fila tun sɛgɛnnin lo kojugu. O kama, u tora ka minanw kɔrɔsi, u ma taga kɛlɛ la. Dawuda n’a ka kɛlɛkɛcɛw ye see sɔrɔ kɛlɛ la. A ye cii di ko u ye fɛɛn minw minɛ u juguw la, u ka tilan kɛlɛkɛcɛw bɛɛ ye. Minw tagara kɛlɛ la ani minw tora minanw kɔrɔ, bɛɛ ka sɔrɔ ka kɛ kelen ye (1 Sam. 30:21-25). O maana b’an dɛmɛ ka koo dɔ faamu an ka waajuli baara koo la. N’a sɔrɔ i tɛ sera ka waajuli kɛ ani ka mɔgɔw kalan i ko i b’a fɛ cogo min na. Nka n’i b’i seko bɛɛ kɛ, i be se ka ninsɔndiya kosɔbɛ tuma o tuma ni mɔgɔ dɔ ye Jehova lɔn ani ka batize.

17. An ka ɲi ka Jehova tando mun lo kosɔn?

¹⁷ An be Jehova tando sabu an be baara min kɛra a ye, a b’an kanu o kosɔn. A b’a lɔn ko an tɛ se ka mɔgɔw waajibiya u k’an lamɛn wala u k’a daminɛ k’ale bato. O bɛɛ n’a ta, an be Jehova kanu cogo min na ani an be jijaliba minw kɛra a ka baara la, a b’o kɔrɔsi. An be sera ka min o min kɛ waajuli la, Jehova b’a yira an na fana cogo min na an be se ka ninsɔndiya sɔrɔ o la (Zan 14:12). An be se ka la a la ko n’an ma waajuli dabila, Ala dusu bena diya an kɔrɔ!